Inuuneq sumik siunertaqarpa?

Akissut Biibilimeersoq

Inuunerup sumik siunertaqarneranik apereriaatsit amerlapput, soorlu ‘Sooq maaniippugut?’, imaluunniit ‘Uanga inuunerma suna siunertaraa?’ Biibilimi ersersinneqarpoq inuunitta siunertaa tassaasoq Guutimik ikinnguteqalernissaq. Sallusuissutit tunngaviusut Biibilimi ersersinneqartut ilaat makku eqqarsaatigikkit.

• Guuti pinngortitsisigaarput. Biibilimi ima allassimavoq: “Taassuma pinngortippaatigut, taassumalu pigaatigut.” – Tussiaat 100:3; Saqqummersitat 4:11.

• Guutip pinngortitani tamaasa, aamma uagut, siunertaqarfigai. – Esaja 45:18.

• Guutip ‘anersaakkut pisariaqartitaqartilluta’, ilaatigut inuunitta siunertaa pillugu paasisaqarusutsilluta, pinngortippaatigut. (Matthæusi 5:3, NW) Kissaatitsitut pisoqassasoq piumasaraa. – Tussiaat 145:16.

• Anersaakkut pisariaqartitarput pissavarput Guutimik ikinnguteqarneq ineriartortikkutsigu. Guutimik ikinnguteqarsinnaaneq inuit ilaasa ajornarsorigaluaraat Biibilimi ima kajumissaarneqarpugut: “Guuti qaninniarsiuk, taava taanna ilissinnut qanillissaaq.” – Jaaku 4:8; 2:23.

• Guuti ikinngutigilissagutsigu taassuma uagutsinnut siunertaa naapertorlugu inuusariaqarpugut. Siunertaa tamanna Biibilimi ima allaatigineqarpoq: “Guuti mianeruuk inatsisaalu maleruarlugit, inuit tamarmik taamaaliortussaapput!” – Oqaluussisartup oqaasii 12:13.

• Siunissami Guutip naalliuutit atorunnaarsippagit ikinngutinilu naassaanngitsumik inuulersippagit taassuma aallaqqaammut uagutsinnut siunertaa tamakkiisumik piviusunngortoq misigissavarput. – Tussiaat 37:10, 11.