Arfininngorneq, oktobarip 25-at
Shafanip kunngi atuffappaa. – Nal 2. 34:18.
26-nik ukioqarluni kunngip Josiiap guutisiorfik iluarsaatsippaa. Iluarsaannerani mappersagaq inatsisinik Jehovap “Mosesikkut nalunaarutigisimasaanik imaqartoq” nassaarineqarpoq. Josiiap allassimasut tusaramigit maleruarumallugit ingerlaannaq iliuuseqarpoq. (Nal 2. 34:14, 19-21) Illit ullut tamaasa Biibilimik atuartarusuppit? Atuartarnissat sulissutigigukku qanoq ingerlava? Allassimaffiit iluaqutigisinnaasatit maluginiartarpigit? Josiia 39-t missaannik ukioqarluni toqussutigisaminik kukkuvoq. Jehovamut siulersoqqunani imminut tatigivoq. (Nal 2. 35:20-25) Tamanna ilinniutissartaqarpoq. Qanorluunniit ukioqaraluarutta qanorluunniillu sivisutigisumik Biibilimik atuartarsimagaluarutta Jehova qanilliartortuartariaqarparput. Tassunga ilaavoq Jehovamut qinunikkut siulersoqqujuarneq, oqaasianik misissuisarneq anersaakkullu inersimalluartut siunnersuutaannik tusarnaarneq. Taamaaliorutta kukkorujussuarnissarput ilimanannginnerussaaq pilluarnissarpullu ilimanarnerussalluni. – Jaak 1:25. w23.09 12 § 15-16
Sapaat, oktobarip 26-at
“Guutip makitasuut iluarinngilai, maniguuttulli ajunngisaangaarfigisarpai.” – Jaak 4:6.
Arnarpassuit Jehovamik asannittut taassumunngalu kiffartortut Biibilimi allaatigineqarput. ‘Ileqquminnik aqutsisinnaapput sutigullu tamatigut aalajaallutik.’ (Tim 1. 3:11) Nalitsinnilu ilagiinni arnat anersaakkut inersimalluartut amerlaqaat, taakkulu inuusuttut ilinniarfigilluarsinnaavaat. Arnaasutit inuusuttoq, arnat maligassaalluartut nalunngisatit kikkut ilaarsinnaavigit? Pissusii nuannersut maluginiartakkit. Eqqarsaatigiuk taakkunatut qanoq pissuseqarsinnaanerlutit. Anersaakkut inersimalluarumalluni maniguunneq pingaaruteqarluinnarpoq. Arnaq maniguuttoq Jehovamut inunnullu attaveqarluartarpoq. Assersuutigalugu arnap Jehovamik asannittup siulersuinermut najoqqutassiaq Jehovamit pilersinneqartoq maniguulluni malikkusuppaa. (Kor 1. 11:3) Najoqqutassiaq tamanna ilagiinni ilaqutariinnilu atuuppoq. w23.12 18-19 § 3-5
Ataasinngorneq, oktobarip 27-at
“Uiusut nuliatik timimittut asasariaqarpaat.” – Ef 5:28.
Jehovap piumasaraa uiusup nuliami timikkut, misigissutsikkut anersaakkullu pisariaqartitai isumagissagai. Eqqarsarsinnaassuseq, arnanik ataqqinnittuuneq tatiginartuunerlu uiulluarnissannut iluaqutigissavatit. Aappariit ilaat meerartaartarput. Illit meerartaaruit qanoq ataataalluarsinnaavit? Jehova ilinniarfigingaarsinnaavat. (Ef 6:4) Inuit tusaatillugit Jehovap ernini, Jiisusi, oqarfigaa asallugu akueralugulu. (Mat 3:17) Meeraqaleruit meeqqatit asanerartakkit. Ajunngitsuliaat pillugit nersualaartakkit. Ataataasut Jehovamik ilaarsisut meeqqatik anersaakkut inersimalluartunngornissaannut ikiortarpaat. Taamatut akisussaaffeqalernissannut piareersarsinnaavutit ilaquttatit ilagiinniittullu oqaatsikkut iliuutsikkullu asanninnermik qujamasunnermillu ersersitsivigisarnerisigut. – Joh 15:9. w23.12 29 § 17-18