Tallimanngorneq, oktobarip 31-at
Ataatap asavaasi asagassinga upperalugulu Guutip sinniisuatut tikiussimasunga. – Joh 16:27.
Jehovap kiffani asallugillu akueralugit paasitissallugit nuannarisarpaa. Biibilimi pisuni marlunni Jiisusi toqqaannartumik oqarfigaa Erneralugulu asallugu aamma akueralugu. (Mat 3:17; 17:5) Aamma illit Jehovamit taama oqarfigitikkusuppit? Jehovap nipaa qilammiit tusartanngikkaluarlutigu oqaasii Biibili aqqutigalugu “tusarnaartarsinnaavagut”. Jiisusip ilinniartitaminut oqaasii asannipaluttut atuaraangatsigit tusartarparpullusooq Jehovap oqarfigigaatigut akueraluta. Jiisusip Ataatami pissusii ilaaqqissaarpai. Taamaattumik atuaraangatta Jiisusip ilinniartitani naammalluinnanngitsut, kisianni aalajaatsut, asanerarai takorloortarsinnaavarput Jehovap taama oqarfigigaatigut. (Joh 15:9, 15) Misilinneqarutta isumaqanngilaq Jehovap akueriunnaarsimagaatigut. Periarfissinneqarpugulli takutissallugu Jehova qamannga pisumik asallugulu tatigalugu. – Jaak 1:12. w24.03 28 § 10-11
Arfininngorneq, novembarip 1
“Meeqqat allaallu naalungiarsuit unnersiutigissavaatsit.” – Mat 21:16.
Angajoqqaajuguit meeqqavit ukiuinut naleqquttumik akinissaannut piareersaqatigisinnaavatit. Ilaannikkut meeqqanut naleqqutinngitsut, soorlu aappariinnermi ajornartorsiutit atoqatigiinnikkullu eqqunngitsuliorneq, ataatsimiinnermi sammineqaraluartut immaqa immikkoortoq ataaseq marlulluunniit meeqqap akissuteqarfigisinnaavai. Aamma meeqqatit paasitikkit nappaagaangamik immaqa ilaannikkuinnaq tiguneqartarsinnaasut. Taamatut nassuiaanneqarnertik tiguneqanngikkaangamik pakatsinnginnissaminnut iluaqutigissavaat. (Tim 1. 6:18) Tamatta Jehovamut ataqqinaataasumik uppeqatitsinnullu qiimmassaataasumik akissuteqarnissamut piareersarsinnaavugut. (Uss 25:11) Ilaannikkut nammineq misigisatsinnik naatsumik oqaaseqartaraluarluta imminut pilluta oqaaseqarpallaarnaveersaartariaqarpugut. (Uss 27:2; Kor 2. 10:18) Jehova, innuttai ataatsimut isigalugit Biibililu pingaarnerutissavagut. – Saqq 4:11. w23.04 24-25 § 17-18
Sapaat, novembarip 2
“Allatulli siniinnarnata eqqumasa silatusaarlutalu.” – Tes 1. 5:6.
Eqqumajuarlutalu silatusaartuassagutta asanninneq pingaaruteqarluinnarpoq. (Mat 22:37-39) Guuti asagatsigu oqaluussinitsinni qanorluunniit ajornartorsioraluarluta oqaluussiuarsinnaavugut. (Tim 2. 1:7, 8) Aamma uppeqatiginngisagut asagatsigit oqaluussiuarpugut, allaat oqarasuaatikkut allakkatigullu. Inoqatitta allannguinissaat eqqortumillu iliuuseqalernissaat neriuutigiuarparput. (Ez 18:27, 28) Uppeqatigut aamma asagatsigit ‘qiimmassaqatigiittuarlutalu ineriartorteqatigiittuarpugut’. (Tes 1. 5:11) Soorlu sakkutuut sanileriillutik akiuuteqatigiittartut, uagut aamma qiimmassaqatigiittarpugut. Qatannguterput akiniarlugu piaaraluta ajuallatsinnavianngilarput. (Tes 1. 5:13, 15) Aamma ilagiinni siulersuisut ataqqinerisigut asanninnerput ersersittarparput. – Tes 1. 5:12. w23.06 9 § 6; 11 § 10-11