Arfininngorneq, juulip 26-at
“Guuti ilissinnik qitornamisut asannittoq ilaarsiuk.” – Ef 5:1.
Nalitsinni Jehova nuannaartissinnaavarput qujamasulluta asannillutalu taanna eqqartortarutsigu. Oqaluussigaangatta inuit Jehovamut qanillinissaat Ataatatsinnillu asannittumik uagutsitulli asannilernissaat pingaarnertut anguniagarisarparput. (Jaak 4:8) Nuannaarutigisarparput Jehova Biibilimi qanoq allaatigineqarnersoq inunnut takutissinnaagaangatsigu. Allassimavormi asannittuusoq, naapertuilluartuusoq, ilisimassuseqartoq, pissaaneqartoq nuannersunillu allanik pissuseqartoq. Sapinngisatsinnik Jehova ilaaraangatsigu taanna unnersiutigalugulu nuannaartittarparput. Taamaalioraangatta malugineqassagunarpoq inunnit allanit allaanerusugut. (Mat 5:14-16) Sooq allaanerunerput ulluinnarni attavigisartakkatsinnut nassuiaanissamut immaqa periarfissaqalissaagut. Tamatuma kingunerisaanik inuit eqqortuliorusuttut Guutimut qanillerusulissapput. Taamatut assigiinngitsutigut Jehova unnersiutigigaangatsigu nuannaartingaartarparput. – Tim 1. 2:3, 4. w24.02 10 § 7
Sapaat, juulip 27-at
Qiimmassaasinnaallutillu oqaaqqissaarisinnaassaatit. – Tit 1:9.
Anersaakkut inersimalluartunngussaguit piginnaanerit inuunermi iluaqutigilluarsinnaasatit pisariaqartissavatit. Taakku iluaqutigalugit ilagiinni akisussaaffitit isumagilluarsinnaassavatit, imminut pilersorniarlutit ilaquttatilluunniit pilersorniarlugit aningaasarsiorsinnaassaatit inunnullu allanut attaveqarluarsinnaassallutit. Assersuutigalugu atuarneq allannerlu pikkoriffigilersinnaavatit. Biibilimi allassimavoq Guutip oqaasianik ullut tamaasa atuartartoq eqqarsaatiginneqqissaartartorlu iluatsitsisarlunilu pilluartuusoq. (Tuss 1:1-3) Guutip oqaasia angutip ullut tamaasa atuartaruniuk Jehovap eqqarsartaasia ilinniassavaa, tamannalu eqqarsarluarnissaminut naliliisinnaassuseqarnissaminullu iluaqutigissavaa. (Uss 1:3, 4) Angutit Biibili tunngavigalugu ilinniartitsilluarlutillu siunnersuilluarsinnaasut ilagiinniittunut iluaqutaangaarput. Atuarneq allannerlu pikkoriffigilerukkit ataatsimiinnerni oqalugiaatit akissutillu uppeqativit iluaqutigisinnaasaat uppernikkullu nakussatsissutigisinnaasaat piareersarsinnaalissavatit. Aamma eqqaamarusutannik allattuisarsinnaalissaatit. Allattukkatit uppernikkut nakussatsissutigisinnaassavatit taakkulu iluaqutigalugit allat qiimmassarsinnaalissallugit. w23.12 26-27 § 9-11
Ataasinngorneq, juulip 28-at
Ilissinnik ataasioqateqartoq inunnik allanik tamanik ataasioqateqartumit anneruvoq. – Joh 1. 4:4.
Annilaangagaangavit siunissami Saatani piuneerunneqarpat Jehovap iliuuseqarumaarnera eqqarsaatigisaruk. 2014-imi ataatsimeersuarnermi takutitsinermi ersersinneqarpoq ataataasup ilaquttanilu Timuutiusimut allakkat aappaat 3:1-5 inuit paratiisimiittut allaatigineqaraluarpata qanoq issanerannik eqqartuinerat: “Paratiisissami pissutsit ima nuannertigissapput: Inuimmi tassaalerumaarput asannittut, anersaakkut ittunik pingaartitsisut, anneruniajuitsut, maniguuttut, Guutimik unnersiutiginnittut, angajoqqaanut naalattut, qujamasuttut, ilumoorfiginnittut, ilaquttaminnut tunniusimasut, isumaqatigiikkumasut, allat pillugit ajunngitsuinnarnik oqaaseqartartut, imminut aqussinnaasut, saamasut, ajunngitsunik nuannarisaqartut, tatiginartut, uteriitsuunngitsut, makitanatik pingaakujunngitsut, Guutimik asannillutik nuannaarniutinik pingaartitsinngitsut, Guutimut tunniusimalluinnartut. Inuit taamaattut ilagisassavatit.” Ilaquttatillu imaluunniit uppeqatitillu paratiisissami inuuneq qanoq issanersoq eqqartortarpisiuk? w24.01 6 § 13-14