Nooap umiarsuaa

Piffissap ingerlanerani nunarsuarmi inuit amerliartorput. Amerlanerillu ajortuupput. Allaat inngilit qilammiittut ilaat aamma ajortun­ngorput. Qilammi angerlarsimaffitsik qimallugu nunarsuarmukarput. Nalunngiliuk sooq taamaaliortut? Inuttut timeqalerusukkamik arnanillu katikkusullutik.

Inngilit arnallu ernertaarput. Taakku alliartorput nukittoorsuan­ngorlutik inupilun­ngorlutillu. Inunnik annersaasarput. Tamanna Jehovap isiginngitsuusaagin­narsinnaanngilaa. Aalajangerporlu inuit ajortut ulersuaqar­titsinikkut peerniarlugit.

Allaanerusumilli anguteqarpoq. Taassuma Jehova asavaa. Taanna Nooamik ateqarpoq. Nuliaqarpoq pingasunillu erneqarluni – Semi, Kami, Jafetilu – tamarmillu nuliaqarput. Jehovap Nooa ilaqutaalu ulersuaqarnerani annannias­sammata umiarsualioqquaa. Umiarsuaq karsitut angisoorujus­suartut isikkoqarpoq, taannalu immami puttasinnaavoq. Jehovap aamma Nooa oqarfigaa uumasorpassuit ilaatissagai taakku aamma annannias­sammata.

Nooa ingerlaannaq umiarsualiorluni aallartippoq. Ukiut 50-it missaanni Nooa ilaqutaalu umiarsualiorput. Jehovap oqaasii maleqqis­saarlugit sanavaat. Umiarsualior­nerminni Nooap inuit ulersuaqar­nissaanik mianersoqquai. Kisianni tusaarusun­ngillat.

Kiisami umiarsuaq naammas­sigamikku ikisinnaan­ngorput. Kingorna susoqarnersoq paasiniariartigu.