Taakkutut misigisaravit Biibilimik atuarneq tunuarsimaarfigisarpiuk? Inuppassuit taamaapput. Paasigukkuli nuannaarnerulernissannut nalerisimaarnerulernissannullu Biibili iluaqutigisinnaallugu? Aamma paasigukku Biibilimik atuarneq soqutiginarsarneqarsinnaasoq? Taava Biibili qanoq iluaqutigisinnaanerlugu paasiniarusussaviuk?

Biibilimik atuartalersimasut tamanna qanoq iluaqutigisimanerlugu oqaluttuartut oqaasii uku eqqarsaatigikkit.

Ezekiel 20-t sinnilaarlugit ukiulik ima oqarpoq: “Siornatigut siunnerfeqarnanga biileruusaartartutut inuuvunga. Biibilimilli atuartarnikkut inuunera siunertaqalerpoq. Ullut tamaasa atorsinnaasannik Biibilimi siunnersuuteqarpoq.”

Frieda aamma 20-t sinnerlugit ukiulik ima nassuerpoq: “Kamaammiasuunikuuvunga. Biibilimilli atuartarnikkut imminut aqussinnaalerpunga. Ilakkuminarnerujussuanngorama maanna ikinnguterpassuaqarpunga.”

Arnaq Eunicemik atilik 50-it sinnerlugit ukiulik ima oqarpoq: “Biibilimik atuartarnikkut pissuserinnerulerpunga, ileqqukka pitsaavallaanngitsut iperarlugit.”

Atuartartut taakku inuillu millionillit allat paasisimavaat Biibilimik atuartarneq pilluarnerunissaminnut iluaqutigisimallugu. (Esaja 48:17, 18) Assersuutigalugu ukunatigut iluaqutigisinnaavat: (1) silatusaartumik aalajangiinissannut, (2) tatiginartunik ikinngutitaarnissannut, (3) qamuuna eqqissinissannut (4) pingaarnerpaamillu Guuti pillugu ilumoortumik ilinniarnissannut. Biibilimi siunnersuutit Guutimeersuugamik kingunerlutsitsinngisaannarput. Guuti siunnersuinerlunngisaannarpoq.

Atuartalernissat pingaaruteqarpoq. Aallartilluarnissannut soqutiginarsaanissannullu siunnersuuteqarpa?

Biibilimik atuartarnerit qanoq nuannaarutigalugulu pissarsiffigilluarsinnaaviuk? Siunnersuutit tallimat inuppassuit iluaqutigisimasaat malugikkit.

Ini atuarfissat eqqarsaatigiuk. Qaamappat, nipaatsuuppat silaannarippallu atuarnerit pissarsiffigilluarnerussavat. Atuarninnilu allamut saasaatigisinnaasatit ikilisakkit.

Eqqortumik isiginnittaaseqarit. Biibili Ataatatta qilammiusup tunniussarimmagu iluaqutiginerpaassavat meeqqatut angajoqqaaminit asannittunit ilinniartinneqarnissaminut piareersimasutut isiginnittaaseqaruit. Biibili pillugu isumalluarnanngitsunik isummiussaqareersimaguit taakku eqqarsaatiginaveersaakkit Guutimit ilinniartitaasinnaajumallutit. – Tussiaat 25:4.

Atuartinnak qinugit. Biibili Guutip eqqarsaataanik imaqarmat paasiumallugu taassumannga ikiorneqartariaqarnerput tupinnanngilaq. Guuti neriorsuivoq ‘imminut qinusut anersaamik illernartumik tuniumaarlugit’. (Lukasi 11:13) Anersaaq illernartoq iluaqutigalugu Guutip eqqarsartaasia paasisinnaavarput. Atuarnerujartortillugu ‘allaat Guutip itissusii’ paasiumaarpatit. – 1 Korinthimiut 2:10.

Paasisaqarumallutit atuarit. Atuarniaannarlutit atuaqinak. Atuakkatit eqeersimaarfigikkit. Imminut ima aperisarit: ‘Atuakkanni inuttaasoq qanoq pissuseqarpa? Atuakkakka qanoq maleruarsinnaavakka?’

Anguniagaqarit. Biibilimik atuarnerit iluaqutigiumallugu inuunerinnerulissutigisinnaasannik ilinniarnissat anguniaruk. Ima anguniagaqarsinnaavutit: ‘Guuti pillugu paasisaqarnerorusuppunga.’ ‘Pissuserinnerulerusuppunga, imaluunniit aappaalluarnerulerusuppunga.’ Taava Biibilip ilaa anguniakkavit angunissaanut iluaqutigisinnaasat toqqaruk.a

Siunnersuutit tallimat taakku atuartalernissannut iluaqutigissavatit. Atuartarnerli qanoq soqutiginarsarnerusinnaaviuk? Allaaserisami tulliuttumi siunnersuuteqarpoq.

Biibilimik atuartarnerit qanoq issava? Pikkunaassava? Qiimmaallannassava? Qanoq atuariaaseqarnersutit apeqqutaavoq. Soqutiginartikkumallugu nuannernerutikkumallugulu qanoq iliorsinnaavit?

Nutsigaq tutsuiginartoq paasiuminartorlu toqqaruk. Atuakkanni qangarnisaavallaartunik oqaaserpassuaqarpat atuarnerit nuannarissagunanngilat. Taamaattumik Biibilimik nutsigaq paasiuminarlunilu killitsinnartoq pissarsiariniaruk. Aamma nutsigaq eqqoqqissaartuusariaqarpoq.a

Teknologii nutaaq atoruk. Ullumikkut Biibili aamma elektroniskiusoq pineqarsinnaavoq. Biibilit ilaat internetimi atuarneqarsinnaapput qarasaasiamulluunniit, tabletimut mobilimullu aaneqarsinnaallutik. Taakkua ilaat atortorissaaruteqarput versinik allanik innersuussutigineqartunik takunnipallaatinik nutsikkanilluunniit arlalinnik naleqqiutitalinnik. Namminerli atuarnak tusarnaarusunneruguit Biibilimik immiussaqarpoq. Inuppassuit angalatillutik, errortaleritillutik allanilluunniit suliaqartillutik tusarnaarusuttarpaat. Periaaseq ilinnut naleqquttoq misiliguk.

Biibilimik misissueqqissaarutit atortakkit. Misissueqqissaarutit atornerisigut atuarnerit pissarsiffiginerusinnaavat. Nunat Biibilimi eqqaaneqartut assingini pisimasut sumiiffissillugillu takorloornarnerutissavatit. Allaaserisat soorlu atuagassiami matumaniittut nittartakkamiluunniit jw.org-imiittut iluaqutigalugit Biibilip ilarujussua paasisinnaavat.

Biibilimik atuagassatit immikkoortitikkit. Biibili aallaqqaataaniit atuarlugu pikkunaappasippat soqutiginarsaallutit Biibilip ilaa kajuminnarsorisat atuarlugu aallartissinnaavat. Biibilimi inuttaasoq ilisimaneqarluartoq paasisaqarfigerusukkukku taanna pillugu kapitalit atuarsinnaavatit. Ungalusami “Biibilip inuttai ilisarisimalerniarlugit itisiliigit”-mi tamatumunnga siunnersuuteqarpoq. Immaqaluunniit pisimasut tulleriiaarlugit sammisalluunniit aalajangersimasut pillugit Biibilimik atuarusupputit. Arlaat misilinniariuk.

Biibili atuagaavoq nalinginnaanngitsoq. Pinngortitsisutsinneersunik siunnersuutitaqarpoq. (2 Timotheusi 3:16) Tusarliussaa inuunitsinnut sunniuteqangaarsinnaavoq. Biibilimimi ima allassimavoq: “Guutip oqaasia uumavoq sunniisinnaassuseqarlunilu.” (Hebræerit 4:12) Marlutsigut inuunerinnerulernissatsinnut sunniuteqarsinnaavoq – maanna inuunitsinni siulersorluta aamma Guuti neriorsuutaalu pillugit ilisimasaqalersilluta. – 1 Timotheusi 4:8; Jaaku 4:8.

Maanna inuunerinnerulersinnaavutit. Biibili ulluinnarni iluaqutigisinnaavat. Ukununnga tunngasunik siunnersuuteqarpoq:

• Allanut attaveqarnermut. – Efesosimiut 4:31, 32; 5:22, 25, 28, 33.

• Timikkut misigissutsikkullu peqqissuunermut. – Tussiaat 37:8; Ussatit 17:22.

• Ileqqorissaarnermut. – 1 Korinthimiut 6:9, 10.

• Aningaasatigut. – Ussatit 10:4; 28:19; Efesosimiut 4:28.a

Aappariit inuusuttut Asiamiut Biibilimi siunnersuutit pingaartingaarpaat. Katerlaatut allatulli imminnut naleqqussarniarneq oqaloqatigiittarnerlu ajornartorsiutigaat. Biibilimili atuakkatik maleruartalerpaat. Qanoq kinguneqartumik? Uiusoq Vicent ima oqarpoq: “Aappariinnitsinni unamminiarnartut asannittumik iliuuseqarfiginissaat Biibilimik atuartarnikkut ilikkarpara. Biibilimik maleruaanitsigut aappariittut pilluarnerulerpugut.” Nulia Annalou isumaqataavoq: “Maligassiuisut Biibilimi allaatigineqartut iluaqutigaavut. Maanna pilluarpunga aappariinnerpullu anguniakkavullu nalerisimaarutigalugit.”

Guuti ilisarisimalersinnaavat. Aappariinnerminnut tunngasut saniatigut Vicent aamma ima oqarpoq: “Biibilimik atuartarnikkut aatsaat taama Jehovamut qanitsigilerlunga misigivunga.” Vicent pingaarutilimmik malugisaqarpoq – Biibili iluaqutigalugu Guuti ilisarisimaneqalersinnaasoq. Illit Guuti ilisarisimalerukku taassuma siunnersuutai iluaqutigiinnarnagit aammali taanna ikinngutigilersinnaavat. Aamma paasissavat siunissaq ajunnginnerusoq – “inuunivik” naassaanngitsumut nuannaarutigisinnaasat – pillugu Guuti sukumiisumik paasititsisartuusoq. (1 Timotheusi 6:19) Biibili atuakkanit kisiartaalluni paasissutissanut tamakkununnga aallaaviuvoq.

Biibilip atuartuarnissaa aalajangiusimagukku illittaaq maanna inuunerinnerulersinnaallutillu Guuti ilisarisimalersinnaavat. Biibilimilli atuartarninni ilimanarpoq apeqqutissarpassuaqalissasutit. Taamaappat maligassiuilluartoq Etiopiamiu ukiut 2.000-t matuma siorna inuusoq ilinniarfigiuk. Biibilimut tunngasunik apeqqutissarpassuaqarpoq. Atuakkani paasinerai aperineqarami ima akivoq: “Qanoq ilillunga paasisinnaassavakka ilitsersorneqanngikkuma?”b Taava Biibilimik ilinniartitsillaqqissumut, Filipimut, Jiisusip ajoqersugaasa siulliit ilaannut ikioqquvoq. (Apustilit Suliaat 8:30, 31, 34) Illittaaq Biibili pillugu paasisaqarnerorusullutit ikiorneqarusukkuit nittartakkami www.pr2711.com-imi immersuigit, atuagassiamiluunniit matumani adressit ilaat allaffigiuk. Aamma Jehovap Nalunaajaasui attavigisinnaavatit naalagaaffilersaarfippulluunniit alakkarlugu. Soormi ullumimiit Biibili atuartalerukku inuunerinnerulernissannullu siulersortillutit?