Jehovap Nalunaajaasuisa Biibili allanngortillugu nutsersimavaat?

Jehovap Nalunaajaasuisa Biibilimik atuaq­qis­saar­tar­nerminni nutsik­kat assigiin­ngitsor­pas­suit ator­tarsimavaat. Taamaat­torli Biibili – Nunarsuup nutaan­ngornis­saanik nutsigaq, oqaatsinut assigiin­ngitsor­pas­suar­nut nutser­neqarsimasoq, Guutip atianik atuim­mat, eqqoq­qis­saarmat paasiuminarmallu qujamasuutigingaar­par­put.

• Guutip atianik atuisoq. Biibilimik saq­qum­mersitsisut ilaat Atuak­kior­tumik ataq­qin­nis­siman­ngil­lat. Assersuutigalugu Biibilip nutsik­kap ataatsip saq­qum­mersin­neqar­neranut arlaatigut tapersiisimasut 70-init amerlanerusut atii allat­tor­neqarsimap­put. Biibilimili tamatumani Atuak­kior­tup – Jehovap Guutip – atia eqqaaneqan­ngil­luin­nar­poq!

  Nunarsuup nutaan­ngornis­saanik nutsikkami Guutip atia allagatoq­qani eqqaaneqarsimagaangat ilan­ngutiteq­qin­neqar­tar­poq, nutsik­kamilli saq­qum­mersitsinermut akisus­saasut atii iser­tuun­neqar­put.

• Eqqoqqissaartoq. Nutsik­kat ilaanni Biibilimi tusarlius­saq eqqoq­qis­saar­tumik ingerlateq­qin­neqar­neq ajor­poq. Assersuutigalugu nutsik­kami ataatsimi Matiusi 7:13 ima nutser­neqar­poq: “Anniarfim­mut isaaf­fik nerutum­mat tas­sungalu aqqusineq ingerlavigiuminarmat isaaf­fik­kut nerukitsuk­kut iseritsi.” Allagatoq­qanili oqaaseq “anniarfik” ator­neqar­nani “toqu” ator­neqar­poq. Nutserisut immaqa oqaaseq “anniarfik” allap­paat upperigamikku inuit ajor­tut anniarfimmi ikualasumi naas­saan­ngitsumik naal­liutsin­neqas­sasut. Biibilimili tamanna taperser­neqan­ngilaq. Taamaat­tumik Nunarsuup nutaan­ngornis­saanik nutsikkami ima eqqoq­qis­saar­tumik allan­neqar­poq: “Isaaf­fik­kut nerukitsuk­kut iseritsi. Toqumummi isaaf­fik nerutuvoq aqqullu sileqaluni.”

• Paasiuminartoq. Nutserluagaq eqqoq­qis­saagin­nar­nani aamma paasiuminar­tuusariaqar­poq. Assersuuteqariarta. Romamiut 12:11-mi apustilip Paulusip kristumiuusup oqariar­taaseq nutsiin­navil­lugu ima isumalik ator­paa: “Anersaamit iller­nar­tumit qalaar­tin­neqaritsi.” Nalitsinni kalaal­lisut tamanna paasiuminaam­mat Nunarsuup nutaan­ngornis­saanik nutsikkami allas­simaf­fik paasiuminar­nerusumik nutser­neqar­poq. Allas­simavoq kristumiut ‘anersaamit iller­nar­tumit sun­ner­neqangaar­tariaqar­tut’.

Nunarsuup nutaan­ngornis­saanik nutsigaq Guutip atianik atuivoq, eqqoq­qis­saar­poq paasiuminarlunilu, tamatumali saniatigut aamma allamik allaanerus­suteqar­poq: Akeqan­ngitsumik agguaan­neqar­tar­poq. Tamanna pis­sutigalugu mil­lionilip­pas­suit – allaat Biibilimik pisinis­samut akis­saqan­ngik­kaluar­tut – ilitsoq­qus­saralugu oqaatsitik atorlugit Biibili atuarsin­naavaat.