Imminuinnaq eqqarsaatigalunga inuuvunga

INUUNINNI PEREERSUT:

Angajoqqaakka Tysklandimi Kangillermi Leipzigip eqqaani, Tjekkoslovakiap Polenillu killeqarfiisa qanittuanni, najugaqartut inunngorpunga. Arfinilinnik ukioqarlunga nunami allami ataataga sulisussanngorami nuuppugut — siullermik Brasiliamut taava Ecuadorimut.

14-inik ukioqarlunga Tysklandimi kostskolemut atuariartortitaavunga. Angajoqqaakka Amerikami Kujallermiittut ungasikkakkit nammineerusuppallaartunngorpunga. Iliuutsikka allanut qanoq sunniuteqartartut eqqarsaatigivallaarneq ajorpara.

17-inik ukioqarlunga angajoqqaakka Tysklandimut utermata najugaqarfigilerpakka. Nammineerusussuseqarpallaarnerali pissutigalugu angajoqqaannut uternera assut sungiukkuminaatsippara. 18-inik ukioqarlunga angajoqqaanniikkunnaarpunga.

Inuunerup siunertaanik ujarlerninni toqqissiveerukkaluttuinnarpunga. Inooriaatsit peqatigiillu assigiinngitsut maluginiaqqissaartareerlugit isumaqarluinnalerpunga nunarsuaq alutornartoq inunnit aserorneqartinnagu misigisassarsiorfigigukku inuunera pitsaanerpaamik siunertaqassasoq.

Tysklandi qimappara, motorcykeliseriarlungalu Afrikaliarpunga. Sivitsunngitsorli motorcykelera iluarsaakkiartorlugu Europamut utertariaqalerpunga. Tamatuma kinguninngua misigilerpunga Portugalimi sissamiillunga. Aalajangerpunga motorcykelera qimaannarlugu puttasumik angallatissarsiorniarlunga.

Inuusuttoqatigiit umiartorlutik Atlantikoq ikaarniarlugu piareersartut ilagisalerpakka. Taakkua ilagaat nuliariligassara, Laurie. Qeqertanut Caribiamiittunukaqqaarpugut. Puerto Ricomiilaariarluta Europamut uterpugut. Angallatissatsinnik angerlarsimaffinngortissinnaasatsinnik tissiartaammik piserusuppugut. Qaammatinili pingasuni ujarlereerluta ilimaginngisatsinnik pisoqarpoq. Sakkutuunngoriartoqqusaavunga.

Qaammatini 15-ini tyskit sakkutuuatut imarsiorpunga. Sakkutuujutillunga Laurielu katippugut angalajuartutullu inuuleqqinnissarput piareersarlutigu. Sakkutuunngunngitsiarninni umiatsiap annanniutip timitaa pisiarivarput. Sakkutuujutillungalu taanna tissiartaatiliareruusaarparput. Pilersaarutigaarput nunarsuaq alianaatsoq misigisassarsiorfigalugu najugaqarfigiitigalugu angallatiginiarlutigu. Tamatuma nalaani — sakkutuujujunnaareerlunga umiatsiap suliarinerani — Jehovap Nalunaajaasuinit attavigineqarpugut Biibilimillu atuaqqissaartalerluta.

BIIBILI INUUNINNIK QANOQ ALLANNGUISSUTIGIGIGA:

Isumaqaqqaaraluarpunga inuuninni allannguingaartariaqarnanga. Arnaq inooqatigisara katereerpara pujortartarunnaareerlungalu. (Efesosimiut 5:5) Nunarsuup angalaarfiginissaanik pilersaarutitsinnut tunngatillugu eqqarsarpunga Guutip pinngortitarsuanik tupinnangaartumik misissuinermut inuunerput atorutsigu pitsaasumik siunertaqassasugut.

Nassuerutigisariaqarparali allannguisariaqarlunga — ingammik pissusinnut tunngatillugu. Assut makitasuujunera nammineerusuppallaarneralu pissutigalugit nammineq piginnaasakka angusakkalu kiserluinnaasa aalluppakka. Imminuinnaq eqqarsaatigalunga inuuvunga.

Ilaanni Jiisusip qaqqami oqaluusia ilisimaneqarluartoq atuarpara. (Matthæusi, kapitalit 5-7) Jiisusip pilluarneq pillugu oqaasii aallaqqaammut paasinngilakka. Assersuutigalugu oqarpoq kaattut imerusuttullu pilluartut. (Matthæusi 5:6) Amigaateqartut qanoq pilluarsinnaanersut eqqarsaatigaara. Atuaqqissaarnerali ingerlatiinnarakku paasivara tamatta anersaakkut pisariaqartitsisugut, tamannalu nassuerutigisariaqarparput matussusersinnaajumallugu. Jiisusi ilumoorpoq ima oqarami: “Pilluarput anersaakkut pisariaqartitsinerminnik eqqumaffiginnittut.” — Matthæusi 5:3, NW.

Tysklandimi Biibilimik atuaqqissaartalereerluta Laurielu Frankrigimut, kingusinnerusukkullu Italiamut, nuuppugut. Sumiikkaluaraangattaluunniit Jehovap Nalunaajaasuinik naapitsisarpugut. Taakkua asaqatigiinnerat ataasiussuseqarnerallu killitsissutigingaarpara. Paasivara Nalunaajaasut ilumut nunarsuaq tamakkerlugu qatanngutigiiusut. (Johannesi 13:34, 35) Piffissap ingerlanerani Laurielu Jehovap Nalunaajaasuisut kuisippugut.

Kuisinnerma kingorna pissusinnik suli allannguisariaqarpunga. Laurielu aalajangerpugut Afrika kujammut sinersoriarlugu Atlantikoq ikaarlugu USA-mukarniarluta. Ikerinnarmiitilluta — imaannarsuarmi marluinnaalluta umiatsiannguamiitilluta — paasilerpara Pinngortitsisitsinnut angingaartumut sanilliullunga qanoq suunngitsigalunga. Piffissaqartorujussuugama (imaannarsuarmi suliassaqarpallaannginnama) Biibilimik atuartorujussuuvunga. Ingammik Jiisusip nunarsuarmi inuuneranik oqaluttuat killitsissutigaakka. Taanna naammalluinnartuugaluarluni ajasoorutigisannillu piginnaaneqaraluarluni imminut malugeqqusaanngisaannarpoq. Imminuinnaq eqqarsaatiginani Ataatani qilammiusoq salliutippaa.

Jiisusip maligassiaanik eqqarsaa­tiginneq­qissaar­tarnikkut paasilerpara nammineq kissaatikka tunulliullugit Guutip naalagaaffia inuuninni siulliullugu noqqaas­sutigi­sariaqarlugu. (Matthæusi 6:33) Laurielu USA tikikkatsigu aalajanger­pugut tamaani nunaseriarluta guutisiornerput salliutin­niarlugu.

QANOQ ILUAQU­TIGIGIGA:

Imminuinnaq eqqarsaatigi­sarallarama assut nalornisarpunga. Maannakkulli ilisimassuseq tutsuiginartoq iluaqutigalugu siulersor­neqarpunga. (Esaja 48:17, 18) Aamma Guutimik pallorfigin­nittuu­lerlungalu taanna pillugu allanik ilinniartit­sisalerama allarluinnarmik inuunera siunertaqa­lersimavoq.

Najoqqutassiat Biibilimeersut maleruarnerisigut Laurielu aappariil­luarneruler­simavugut. Aamma panipput asanartoq, Jehovamik ilisimannilluni asannillunilu perorsimasoq, pilluaqqune­qaatigaarput.

Imaanngilaq inuunitsinni qatsunganersior­tuaannartugut. Jehovalli ikiuineratigut taanna kiffartor­figiunnaanngi­saannassallugu tatigiun­naanngisaan­nassallugulu aalajangiusimavarput. — Ussatit 3:5, 6.