Imermut morsutsitaaneq qanoq paasisariaqarpa?

Akissut Biibilimeersoq

Kuisinneq imermut morsutsitaaneruvoq.a Imermut morsutsin­neqarnerit amerlasuut Biibilimi eqqaaneqarput. (Apustilit Suliaat 2:41) Taakkua ilagaat Jiisusip kuussuarmi Jordanimi morsutsitaanera. (Matiusi 3:13, 16) Ukiut arlaqan­ngitsut qaangiummata angut Etiopiamiu “imeqarluartumut” pigami Fiilippimit imermut morsutsin­neqarpoq. – Apustilit Suliaat 8:36-40.

Jiisusip ilinniartitani imermut morsutsitaasariaqar­nerannik ilinniartippai. (Matiusi 28:19, 20) Apustilip Petrusip aamma tamanna erseqqissarpaa. – Petrusimit 1. 3:21.

Allaaserisami sammisassat

• Imermut morsutsitaaneq qanoq isumaqarpa?

• Naalungiarsunnik kuisitsineq pillugu Biibilimi allassimasoqarpa?

• Ataatap aqqani, Ernerup aqqani anersaallu illernartup aqqani imermut morsutsitaaneq qanoq isumaqarpa?

• Kuisereersimagaanni imermut morsutsitaaneq ajortuliornerua?

• Morsutsitaanerit allat Biibilimi eqqaaneqartut

• Kukkusumik isummernerit

Imermut morsutsitaaneq qanoq isumaqarpa?

Inuup imermut morsutsitaanermigut allanut ersersippaa ajortuliaminik peqqissimisimalluni Guutimullu neriorsuisimalluni qanorluunniit pisoqas­sagaluarpat taassuma piumasaa malillugu inoorusulluni. Tamanna isumaqarpoq Guuti Jiisusilu sutigut tamatigut naalallugit inuuniarluni. Imermut morsutsitaasut Guutip iluarisaatut inooriaaseqar­niarlutik aalajangeramik naassaan­ngitsumik inuunissamik neriuuteqalerput.

Imermut morsutsitaaneq inuup inuunermini allannguisimaneranut assersuutaal­luarpoq. Tassa qanoq? Imermut morsutsitaaneq Biibilimi ilisaanermut assersuun­neqarpoq. (Romamiut 6:4; Kolossimiut 2:12) Imermut morsutsitaanermigut inooriaaserisimasaminut tunngatillugu ilineqartutut ippoq. Imermillu qaqigami kristumiutut tunniul­luinnarsimasutut inuuneq nutaaq aallartippaa.

Naalungiarsunnik kuisitsineq pillugu Biibilimi allassimasoqarpa?

Naamik, naalungiarsunnik kuisitsineqb Biibilimi eqqaaneqaranilu ilinniar­titsissutigineqanngilaq.

Naalungiarsunnik kuisitsineq Biibilimut allassimasunut naapertuutinngilaq. Biibilimi ilinniar­titsissutigineqarpoq inuup morsutsitaarusuttup piumasaqaatit naammas­sisariaqarai. Assersuutigalugu Biibilimi ilinniar­titsissutit tunngaviusut paasisimasariaqarpai paasisanilu naapertorlugit inuulluni. Ajortuliani peqqissimis­sutigisimavai qinunikkullu neriorsuilluni inuunini tamaat Guuti kiffartorfiginiarlugu. (Apustilit Suliaat 2:38, 41; 8:12) Naalungiarsuit taama iliorsin­naanngillat.

Ataatap aqqani, Ernerup aqqani anersaallu illernartup aqqani imermut morsutsitaaneq qanoq isumaqarpa?

Jiisusip ilinniartitani ima oqarfigai: “Inuit … uannik malinnit­tunngoq­qullugit ilinniar­tikkiar­torsigit. Ataatap aqqani, Ernerup aqqani anersaallu illernartup aqqani imermut morsutsissavasi ilissinnullu peqqussutinnik tamanik maleruaaq­qullugit ilinniar­tillugit.” (Matiusi 28:19, 20) Oqaaseq “aqqani” isumaqarpoq imermut morsutsitaasoq Ataatap Ernerullu oqartus­saasusiinik inissisimaf­fiinillu aamma Guutip anersaavata illernartup pingaaruteqas­susianik paasinnillunilu akuerinnittoq. Assersuutigeriartigit Petrusip angummut inunnguutsiminit nukillaarsimasumut oqaasii uku: “Jiisusip Kristusip Naazaratsimiup aqqani: Pisugit!” (Apustilit Suliaat 3:6) Isumaa ersarippoq – Petrusip nalunngilaa Kristusi oqartus­saassuseqartoq ajorunnaarsitsisar­nermullu pissaaneqarnera upperalugu.

• ‘Ataataq’ tassaavoq Jehovac Guuti. Pinngor­titsisuugami inuunermillu tunisisuugami Guutiugamilu Killeqan­ngitsumik Pissaanilik Jehova oqartus­saassuseqar­nerpaavoq. – Mosesimik 1. 17:1; Saqqummersitat 4:11.

• ‘Erneq’ tassaavoq Jiisusi Kristusi uagut pilluta toqusoq. (Romamiut 6:23) Guutip inuiannut siunertaani Jiisusip pingaaruteqangaarnera paasillugulu upperigutsigu aatsaat annaanneqarsin­naavugut. – Johannesi 14:6; 20:31; Apustilit Suliaat 4:8-12.

• ‘Anersaaq illernartoq’ tassaavoq Guutip nukinga piumasaminik naammas­sisitsinermut atortagaa.d Guuti pinngor­titsigami, uumassuseqalersitsigami aamma pruffiitiminut allanullu oqariar­tortitsigaangami anersaani illernartoq atortarpaa. Anersaarlu illernartoq Guutip piumasaatut iliornissamut nukissaqalersitsisarpoq. (Mosesimik 1. 1:2; Jobi 33:4; Romamiut 15:18, 19) Aamma Guutip anersaani illernartoq aqqutigalugu Biibilimik allattut isumassarsisillugit eqqarsaatiminik allatsippai. – Petrusimit 2. 1:21.

Kuisereersimagaanni imermut morsutsitaaneq ajortuliornerua?

Inuit ilaasa allamik upperisaqaler­tarnerat takornar­taanngilaq. Taavami oqaluffimmi ilaasor­taaffigisimasamini kuisissimappata? Allamik upperisaqalerlutik imermut morsutsitaappata ajortulior­nerussava? Ilaat taama isumaqarput, immaqa Efesossimiut 4:5-imi allassimasut uku tunngavilersuutitut atoramikkit: “Naalagaq ataasiuvoq, upperisaq ataasiuvoq, imermut morsutsitaaneq ataasiuvoq.” Versimili tassani pineqanngilaq inuk imermut morsutsitaaq­qissinnaan­ngitsoq. Sooq taama isummersin­naavugut?

Versit ataqatigiinnerat. Efesossimiunut allakkani kapitali 4-mi versini allani apustilip Paulusip ersersippaa kristumiut ilumoortut upperisaminni ataasius­suseqassasut. (Efesossimiut 4:1-3, 16) Ataasioqatigiinneq tamanna aatsaat pisinnaavoq Naalagaq ataaseq, Jiisusi Kristusi, malippassuk, assigiimmik upperisaqarpata – tassa Biibilimi ilinniar­titsissutigineqartunut tunngatillugu isumaqatigiippata – aamma imermut morsutsin­neqarnissamut Biibilimi piumasaqaatinik maleruaappata.

Apustili Paulusi kajumis­saarivoq imermut morsutsitaareersimasut ilaat morsutsitaaq­qissasut. Taamatut peqquneqarput kristumiunut ilinniar­titsissutigineqartut tamakkiisumik paasilluarsiman­nginnamikkit. – Apustilit Suliaat 19:1-5.

Imermut morsutsin­neqarnissamut tunngaviusoq eqqortoq. Imermut morsutsitaaneq Guutimut iluarinar­tuussappat Biibilimi ilumoortoq pillugu eqqoqqis­saartumik paasisimasaqarneq tunngaviusariaqarpoq. (Timuutiusimut 1. 2:3, 4) Ajoqersuutit Biibilimut naapertuutin­ngitsut tunngavigalugit imermut morsutsitaasoqarpat morsutsitaanera Guutimit akuerineqar­navianngilaq. (Johannesi 4:23, 24) Imaassinnaavoq imermut morsutsitaasimasoq eqqortumik iliorsorigaluartoq, kisianni ‘eqqoqqis­saartumik paasisimasaqarneq’ tunngaviginagu morsutsitaasimavoq. (Romamiut 10:2) Guutimit iluarisaassaguni Biibilimi ilumoortut ilinniar­tariaqassavai, ilikkakkani maleruassavai, Guutimut qinunikkut neriorsuissaaq taanna inuunini tamaat kiffartorfiginiarlugu, taavalu imermut morsutsitaaq­qittariaqarpoq. Imermut morsutsitaanera ajortulior­nerunani eqqortulior­nerussaaq.

Morsutsitaanerit allat Biibilimi eqqaaneqartut

Morsutsitsinerit allat, Jiisusimik malinnit­tunngorlutik imermut morsutsitaanerannit allaanerusumik isumallit, Biibilimi eqqaaneqarput. Assersuutigalugu uku:

Johannesip imermut morsutsitsisarneri. Juutit juutinullu ilanngus­simasut Moorsisip inatsisaanik – tassa inatsisinik Guutip Moorsisi aqqutigalugu Israalikkunnut tunniussaanik – unioqqutitsisimanertik pillugu peqqissiminerminnut takussutis­saasumik Johannesimit imermut morsutsin­neqarput. Johannesip imermut morsutsitsisarnerata inuit Missiarsimik, Jiisusimik Naazaratsimiumik, upperin­ninnissaannut piareersarpai. – Lukkarsi 1:13-17; 3:2, 3; Apustilit Suliaat 19:4.

Jiisusip imermut morsutsitaanera. Jiisusip, Johannesimit imermut morsutsitsisartumit imermut morsutsin­neqarnera immikkorluinnaq ittuuvoq. Jiisusi naammal­luinnartuuvoq ajortuliorsiman­ngisaan­narlunilu. (Petrusimit 1. 2:21, 22) Taamaattumik imermut morsutsitaanera peqqissimis­suteqarnermik ‘nalunngeqatigin­nissummillu ajunngitsumik tunineqar­nissamik Guutimut qinunikkut aniguisin­neqarnissamik’ peqquteqanngilaq. (Petrusimit 1. 3:21) Jiisusilli imermut morsutsin­neqarnermigut imminut Missiarsitut, tassa Kristusitut, neriorsuutigineqartutut Guutip piumasaatut iliorusunnini ersersippaa. Guutillu piumasaraa Jiisusi uagut pilluta inuunini tunniutissagaa.—Hebræerit 10:7-10.

Anersaamut illernartumut morsutsitaaneq. Johannesip imermut morsutsitsisartup Jiisusillu anersaamut illernartumut morsutsitaaneq eqqartorpaat. (Matiusi 3:11; Lukkarsi 3:16; Apustilit Suliaat 1:1-5) Morsutsitaaneq tamanna anersaap illernartup aqqani imermut morsutsitaanermit allaaneruvoq. (Matiusi 28:19) Qanoq allaanerugami?

Jiisusip malinnittaasa ilaannaat amerlan­ngitsut anersaamut illernartumut morsutsitaapput. Taakku qilammi Kristusi ilagalugu kunngisut palasitullu kiffartor­tussatut anersaamik illernartumik taninneqarsimapput, imaluunniit toqqagaapput.e (Petrusimit 1. 1:3, 4; Saqqummersitat 5:9, 10) Taakkua Jiisusip ilinniar­titaanut millionilinnut nunarsuarmi paratiisiusumi naassaan­ngitsumik inuusussanut naalakkersuissapput. – Matiusi 5:5; Lukkarsi 23:43.

Kristusimut Jiisusimut aamma toquanut morsutsitaaneq. Anersaamut illernartumut morsutsitaasut aamma ‘Kristusimut Jiisusimut morsutsitaasarput’. (Romamiut 6:3) Tassa tanitat qilammi Jiisusi ilagalugu naalakkersuisussat kisimik taamatut morsutsitaapput. Jiisusimut morsutsitaanermikkut ilagiivinut tanitaasunut ilaasor­tanngorput. Jiisusi ilagiinnut niaquuvoq, taakkulu timiupput. – Korintimiunut 1. 12:12, 13, 27; Kolossimiut 1:18.

Kristumiut tanitat aamma ‘Jiisusip toquanut morsutsitaapput’. (Romamiut 6:3, 4) Jiisusi ilaarlugu namminis­sarsiornatik inuunertik tamaat Guutimut kiffartornermut atorpaat. Aamma Jiisusitulli nalunngilaat nunarsuarmi naassaan­ngitsumik inuusus­saanatik. Toqugunik anersaatullu qilammiin­nissamik makititaallutik akissarsisin­neqarunik morsutsitaaneq assersuutaasoq tamanna naassaaq. – Romamiut 6:5; Korintimiunut 1. 15:42-44.

Innermut morsutsitaaneq. Johannesip imermut morsutsitaasup tusarnaartini ima oqarfigai: “Taassuma [Jiisusip] anersaamut illernartumut innermullu morsutsik­kumaarpaasi. Nivaataq teqqalatitsissut tigumiarpaa, aamma karrertaajaaffik saleqqis­saarumaarlugulu qajuusiassat peqqumaasivimmut katersorumaarpai. Qalipakuili innermik qamissin­naanngitsumik ikuallak­kumaarpai.” (Matiusi 3:11, 12) Maluginiaruk innermut morsutsitaaneq anersaamullu illernartumut morsutsitaaneq assigiin­ngitsuummata. Johannesi taama oqarami qanoq isumaqarpa?

Qajuusiassat Jiisusimut tusarnaarlutillu naalattunut assersuutaapput. Taakkua ilaat toqqagaallutik anersaamik illernartumik taninneqarput. Qalipakut Jiisusimut tusarnaaruman­ngitsunut assersuutaapput. Taakku ‘innermut morsutsin­neqarumaarput’, tamannalu isumaqarpoq suujunnaarsin­neqarluin­nassasut. – Matiusi 3:7-12; Lukkarsi 3:16, 17.