Sooq Guutip naalliunnerit akuerai?

NAALLIUUTEQARNERPUT PILLUGU GUUTI QANOQ MISIGIVA?

Maja: Aluu Sara. Nuannaarutigaara takoqqillutit.

Sara: Aamma uanga.

Maja: Kingullermik maaniikkama naalliuutigut pillugit Guuti qanoq misiginersoq sammivarput. Eqqaavat tamanna eqqarsaatigiuar­tarsimallugu, pingaartumik anaanavit biilinik ajutoornerata kingorna. Anaanat qanoq ippa?

Sara: Ullut ilaanni pitsaanerusarpoq. Ullumikkut ajunngin­neruvoq.

Maja: Qujanarmi. Isumalluar­tuujuar­niarnerit oqitsuin­naasimanavianngilaq.

Sara: Taamaappoq. Ilaannikkut eqqarsaatigisarpara qanoq sivisutigisumik suli naallius­sanersoq.

Maja: Tamanna tupinnanngilaq. Kingullermik anilerama apeqqutiga eqqaamas­sagunarpat, sooq Guutip naalliuutitta atuukkun­naarsin­nissaanut pissaaneqartup naalliuutigut akuerigai.

Sara: Aap, eqqaamavara.

Maja: Akissutaa Biibilimeersoq sammitinnagu kingullermik sammisatta ilaamininngui uterfigeq­qilaariartigit.

Sara: Aap.

Maja: Ilaatigut paasivarput Biibilip nalaani allaat upperluartup eqqarsaatigisarsimagaa sooq Guutip naalliuutit atuunnissaat akuerigai. Taamaattorli taama aperinera pillugu Guutip assuarinngilaa, imaluunniit uppersuseqar­neruleq­qullugu oqarfiginngilaa.

Sara: Tamannaluunniit eqqarsaatiginikuun­ngilara.

Maja: Aamma paasivarput Guutip naalliuttugut isigaluta aliasuutigaa. Assersuutigalugu Biibilimi allassimavoq Guutip innuttami ‘erloqissutaat tamaasa nammineq erloqis­sutigigai’.a Guutip naalliun­nitsinni misigeqatigisaraatigut paasillugu tuppallernaqaaq, ilaa?

Sara: Ilumut.

Maja: Taavalu paasivarput Pinngor­titsisorsuarput naalliuutinik tamanik atuukkun­naarsitsinissamut pissaaneqartoq.

Sara: Tassa tamanna paasisin­naanngisara – Guuti pissutsinik ajortunik atuukkun­naarsitsisin­naaguni sooq taamaaliunngila?

KINA EQQORTUMIK OQALUPPA?

Maja: Apeqqutit Biibilip aallaqqaataani, Mosesimik allakkani siullerni, akissutis­sarseriartigu. Adamip Evallu paarnamik nereqqusaan­ngitsumik nerinerat pillugu oqaluttuaq ilisimaviuk?

Sara: Aap, atuarfimmi samminikuuarput. Guutip orpik aalajangersimasoq neriffigeq­qunngisaa naalanngillutik neriffigaat.

Maja: Ilumoorputit. Maannakkulli sammeriartigu Adamip Evallu ajortuliun­nginnerani qanoq pisoqartoq. Tamatumani pisoq iluaqutigalugu paasisin­naavarput sooq naalliut­tartugut. Mosesimik allakkat siulliit kapitali 3, versi 1-miit 5-mut atuarusuppigit?

Sara: Aap. “Pulateriaarsuk nersutinit nujuartanit Guutip Naalakkap pinngor­titaanit tamanit peqqusersuuneruvoq; arnarlu aperaa: ‘Ilumut Guuti oqarpa naatsiiviup orpii neriffigis­sanngikkisi?’ Arnap pulateriaarsuk akivaa: ‘Naatsiiviup orpiisa paarnaannik nerisin­naatitaavugut, kisianniuna Guuti oqartoq orpiup naatsiiviup qeqqaniittup paarnaanik nerissan­ngitsugut attornagil­luunniit, taamaaliorutta toqussagatta.’ Pulateriaarsuulli arnaq oqarfigaa: ‘Naamik, toqussan­ngivippusi! Guutilli nalunngilaa neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujun­naassallugit.’”

Maja: Qujanaq. Versit sammilaariartigit. Siullermik, maluginiaruk pulateriaarsuup Eva oqaluffigigaa. Biibilip ilaani allami ersersin­neqarpoq pulateriaarsuk aqqutigalugu oqaluttoq tassaasoq Saatani Diaavulu.b Guutip orpimmik aalajangersimasumik nereqqusin­nginnera pillugu Saatanip Eva aperaa. Adamip Evallu orpik neriffigigaluarunikku qanoq pillarneqar­nissaat pillugu Guuti qanoq oqartoq maluginiarpiuk?

Sara: Toqussasut?

Maja: Ilumoorputit. Taava Saatanip oqaatsimini tulliuttuni ajortorujus­suarmik Guuti unnerluutigaa. Oqaasii maluginiariakkit: “Naamik, toqussan­ngivippusi!” Saatanip Guuti sallutuujunerarpaa!

Sara: Tamanna aatsaat tusarpara.

Maja: Saatanip Guuti sallutuujunerarmagu apeqqummik aatsaat piffissap ingerlanerani akineqar­tariaqartumik pilersitsivoq. Paasisin­naaviuk sooq?

Sara: Hmm. Paasinngilara.

Maja: Ok, immaqa imatut assersuusiorsin­naavunga. Oqariarta oqarfigigikkit ilinnit nukittunerullunga. Tamatuma ilumuun­nginnera qanoq uppernarsas­sagaluarpiuk?

Sara: Nukittuneq­qusaannikkut?

Maja: Aap, ilaa. Oqimaatsoq kia arlatta kivissin­naanera misiliutigisin­naavarput, taamaaliornikkut kina nukittunerunersoq ingerlaannaq takuneqarsin­naalissaaq.

Sara: Paasivara suna pinerit.

Maja: Taava takorloortigu ilinnit nukittunerullunga oqarnanga oqartungali ilinnit unneqqarin­nerullunga. Tamatumali uppernarsarnissaa ajornar­nerungaarpoq, ilaa?

Sara: Taamaas­simassaaq.

Maja: Tassa ilumoortumik oqalunneq nukittunerunerup misilin­neqarnikkut uppernarsariaan­naaneratulli inngilaq.

Sara: Aap.

Maja: Aatsaat piffissap ingerlanerani allanit takuneqarsin­naalissaaq kina arlarput unneqqarin­nerpaajusoq.

Sara: Tamanna paasinarpoq.

Maja: Mosesimik allakkani siullerni oqaluttuaq takoqqilaariartigu. Saatani Guutimit nukittunerunerarpa?

Sara: Naamik.

Maja: Guutip Saatani sallusoq ingerlaannaq uppernarsarsin­naagaluarpaa. Saatanili Guutimit unneqqarin­nerunerarpoq. Soorlulusooq Evamut ima oqarniartoq: ‘Guutip salloqit­tarpaatit, uangali eqqortumik oqaluppunga.’

Sara: Sunaaffa.

Maja: Guutip nalunngilaa aatsaat piffissarujussuaq ingerlareerpat unammil­lerneqarnini akiguniuk pitsaanerusoq. Naggataatigut ersaris­sissaaq kina eqqortumik oqaluttoq kinalu sallulluni oqaluttoq.

APEQQUT PINGAARUTILIK

Sara: Evami toqummat uppernarsineqanngila Guuti eqqortumik oqaluttoq?

Maja: Ilaatigut aap. Saatanili aamma allamik unnerluuteqarpoq. Versi 5 takoqqeriaruk. Maluginiarpiuk Saatanip Eva aamma qanoq oqarfigigaa?

Sara: Oqarpoq paarnaq nerippagu isai uisitaajumaartut.

Maja: Ilumut, aamma ‘Guutisut ilerumaartut ajunngitsoq ajortorlu nalujun­naassallugit’. Tassa Saatanip unnerluuppaa oqarlunilusooq Guutip inuit ajunngitsumik erliguukkai.

Sara: Tamanna paasilerpara.

Maja: Tamanna sakkortuumik unnerluus­sineruvoq.

Sara: Tassa qanoq?

Maja: Saatani oqarporlusooq Eva – allaallumi inuit tamarmik – Guutimit naalakkersor­neqanngikkunik iluanaar­nerussasut. Jehovap nalunngilaa Saatanip tamatuminnga uppernarsaaniarnera akueriguniuk pitsaanerussasoq. Taamaattumik Guutip Saatani piffissami aalajangersimasumi inunnut naalakkersuisuutippaa. Taamaat­tuminguna nunarsuarmi taama naalliut­toqartigisoq – tassa Saatani aqutsisuuvoq, Guutiun­ngitsoq.c Nuannersumilli nutaarsias­saqarpoq.

Sara: Suunuku?

Maja: Guuti pillugu nuannersut marluk Biibilimi ilinniar­titsissutigineqarput. Siullertut, Jehovap annikil­lioraangatta najortarpaatigut. Assersuutigalugu Daavip oqaasii Tussiaat 31:8-mi allassimasut atuariartigit. Daavi inuunermini annikil­liuuteqartaqaaq, Guutimulli qinulluni qanoq oqartoq maluginiariaruk. Versi taanna atuarusuppiuk?

Sara: Aap. Ima allassimavoq: “Unneqqarissutsit qiimmat­taatigalugulu tipaatsuutigissavara. Annikil­liornera takoreerpat, annikil­liuutinni ikiorparma.”

Maja: Tassa Daavi annikil­liuuteqaraangami misigisani tamaasa Jehovap ilisimagai nalunagu tuppallersaatigisarpaa. Illimmi, Jehovap suut tamaasa – allaat misigis­sutsitsigut anniaatigut inunnit allanit paasineqarsin­naanngitsut – ilisimagai nalunagu tuppallersaatigaajuk?

Sara: Suu.

Maja: Guuti pillugu nuannersut aappaat tassaavoq annikil­liuutitsinnik atuukkun­naarsitsiumaarnera. Biibilimi ilinniar­titsissutigineqarpoq ungasin­ngitsukkut Saatanip aqutsinera ajortoq atorunnaarsik­kumaaraa. Ajortunut pissutaasut tamarluinnaasa, aamma illit anaanallu atukkasi, aaqqilluin­narumaarpai. Sapaatip-akunnerata tulliani aggeqqikkuma takutis­sinnaavara sooq upperisin­naagipput Guutip ungasin­ngitsukkut naalliuutit tamaviisa atorunnaarsik­kumaarai?d

Sara: Ilaana, qilanaalereerpunga.