Ajornartorsiutit neriulersitsisut

‘Ullussani kingullerni nalliukkumaarput ullut atugarliungaarfissat.’ — 2 TIMOTHEUSI 3:1.

MATUMA ataani eqqaaneqartut alianartut ilaat tusarsimavigit — namminerluunniit misigisimavigit?

● Nappaat tunillaassuuttoq toqussutaasartoq.

● Kaannersuaq inuit hundredelikkuutaat toqussutigisaat.

● Nunap sajunnerani tusindilikkuutaat toqusut sulilu amerlanerusut angerlarsimaffeeruttut.

Quppernerni tulliuttuni taama pisoqartarnera pillugu eqqarsaallannartut sammineqarput. Aamma malugisinnaassavat taama pisoqartarnissaa Biibilimi siulittuutaasoq ‘ullussanik kingullernik’ taaneqartunut ilisarnaatitut.

Allaaserisat taakku silarsuarmi ajornartorsiuterpassuaqarneranik paasissutissiiniarnerunngillat. Qularnanngitsumik tamakku nalunngereerpatit. Allaaserisat neriuuteqalernissat siunertaralugu allataapput. Taakkunani ersersinneqassaaq Biibilimi siulittuutit arfinillit eqquuttut, paasinarsissallunilu ‘ullussat kingulliit’ naangajalersut. Aamma sammineqarput tamatumunnga akerliliissutigineqartartut ilaat, erseqqissarneqarlunilu qanittukkut pissutsit pitsaanerulernissaasa upperinissaannut pissutissaqarluartoq.

1. Nunap sajuttarneri

“Nunami sajunnersuaqartarumaarpoq.” — LUKASI 21:11.

● Winnie 16-inik qaammatilik Haitimi qarmakunit annaanneqarpoq. TV-kkut aallakaatitassiortartut ajunaarnersuaq pillugu aallakaatitassiorlutik taqqavaniittut Winniep aanngasissumik qiarpalunnera tusaavaat. Winniep nunap sajunnera anigorpaa, angajoqqaavili ajunaarput.

PIVIUSUT SUMIK ERSERSITSIPPAT? 2010-mi januaarimi richterskalamik uuttorlugu 7,0-mik sakkortussusilimmik Haitimi nuna sajuppoq, inuillu 300.000-nit amerlanerusut ajunaarput. Sulilu 1,3 millionit allat tassanngaannaq angerlarsimaffeerupput. Nunap sajorujussuarnera Haitimiinnaq pinngilaq. 2009-mi apriilimiit 2010-mi apriilimut nunarsuaq tamakkerlugu ikinnerpaamik 18-eriarluni nunamik sajorujussuartoqarpoq.

AKERLILIISSUTIGINEQARTARTOQ: Ullumikkut nuna sajunnerukulanerunngilaq; teknologii-una pissutigalugu qangarniit eqqumaffigineruliinnarivut.

AKERLILIISSUT ATORSINNAAVA? Malugiuk Biibilimi erseqqissarneqanngimmat ullussani kingullerni nunap sajuttarnerisa amerlassuiat. Allassimavorli ‘nunami sajunnersuaqartarumaartoq’ aamma ‘tamani tamaani’ sajuttarumaartoq. Taamaattumik nunap sajuttarneri oqaluttuarisaanermi piffissami pingaarutilimmi tamatumani ilisarnaataapput arajutsisassaanngitsut. — Markusi 13:8; Lukasi 21:11.

QANOQ ISUMAQARPIT? Ilumut, Biibilimi siulittuutigineqartutut, nuna sajorujussuartarpa?

Immaqa nunap sajuttarnera ullussani kingullerni inuunitsinnut uppernarsaatitut immini naammanngilaq. Taannali siulittuutit eqquuttut ilaannaraat. Siulittuut alla malugiuk.

[Qupp. 4-mi issuagaq]

“Uagut [geofysikeriusugut] sajunnersuunerarpavut. Allat tamarmik amiilaarnartuunerarpaat.” — KEN HUDNUT, U.S. GEOLOGICAL SURVEY

[Qupp. 4-mi suminngaanneernera]

© William Daniels/Panos Pictures

2. Kaanneq

‘Kaannersuaqartarumaarpoq.’ — MARKUSI 13:8.

● Angut Nigerimi illoqarfeeqqamut Quaratadjimut qimaavoq. Qatanngutai illooraalu kaanneq anigorniarlugu nunap timaaniit aamma tamaanngarsimapput. Angulli nunami allequttami kisimiilluni nalavoq. Sooq kisimiippa? “[Ilaquttani] inuussutissaqartinnginnamigit isaasigut toqqarlugit isigisinnaanagit misigivoq,” Sidi, illoqarfeeqqami høvdingi, nassuiaavoq.

PIVIUSUT SUMIK ERSERSITSIPPAT? Nunarsuaq tamakkerlugu inuit arfineq-marluugaangata ataasingajak ullormut naammattumik nerineq ajorpoq. Afrikami Saharap kujataani pissutsit suli ajornerupput, tassanimi inuit pingasuugaangata ataaseq kaattuaannartuuvoq. Tamanna paasinerujumallugu ilaqutariit uku takorlooriakkit: ataataq, anaanaq naalungiarsullu. Nerisassat marluinnarnut naammappata, kina nerinngitsuussava? Ataataasoq? Anaanaasoq? Imaluunniit naalungiarsuk? Ilaqutareeqarpoq ullut tamaasa taamatut aalajangertariaqartunik.

AKERLILIISSUTIGINEQARTARTOQ: Nunarsuaq tamatsinnut naammangaartunik nerisassaqartitsivoq. Agguaalluarneqaannartussaapput.

AKERLILIISSUT ATORSINNAAVA? Ilumoorpoq ullumikkut naasorissaasut aatsaat taama inuussutissanik nioqqutissaliortigalutillu nassiussuitiginerat. Nunarsuarmi naalakkersuisut inuussutissanik agguaassilluarsinnaasariaqaraluarput kaannerup ajornartorsiutaaneranik aaqqiillutik. Ukiunili qulikkuutaani aaqqiiniareeraluarlutik suli iluatsinngillat.

QANOQ ISUMAQARPIT? Markusi 13:8 eqquuppa? Teknologiikkut siumukarluartoqaraluartoq nunarsuarmi sumi tamaani inuussutissaaleqisoqarpa?

Nunap sajuttarnera kaannersuillu ajornartorsiummik allamik malitseqarajupput, tamannalu ullussanut kingullernut aamma ilisarnaataavoq.

[Qupp. 5-mi issuagaq]

“Meeqqat nuammik nipititsinermik, timminnermik nappaatinillu allanik toqquteqartut pingasorarterutaannit amerlanerusut nappaat anigorsimasinnaagaluarpaat inuussutissaqarluarsimasuugunik.” — ANN M. VENEMAN, FN-IP MEEQQANUT ANINGAASAATEQARFIANI PISORTAASIMASOQ.

[Qupp. 5-mi suminngaanneernera]

© Paul Lowe/Panos Pictures

3. Nappaatit

‘Nappaassuaqartarumaarpoq toqoraataasunik.’ — Lukasi 21:11.

● Bonzalip, Afrikami nunap inuisa imminnut sorsuuffigisaanni nakorsaanerup, illoqarfigisamini aatsitassarsiorfimmi sulisut nappaammik Marburgimik toqussutaasartumik nappaatillit sapinngisani tamaat katsorsarniarpai.a Illoqarfimmi annerusumi oqartussaasunut iluatsinngitsumik ikiortissarsioraluarpoq. Qaammatit sisamat qaangiuttut ikiuisussat kiisami takkupput, takkummatali Bonzali toqoreersimavoq. Aatsitassarsiorfimmi sulisunit annaanniakkaminit tunillatsissimavoq.

PIVIUSUT SUMIK ERSERSITSIPPAT? Anersaartuutikkut aseruuttoornerit (soorlu nuammik nipititsinerit), timminnermik nappaatit, HIV/AIDS, tuberkulose malarialu nappaataapput inuit toqussutiginerpaartagaat. Ukiup ataatsip ingerlanerinnaani inuit 10,7 millionit nappaatinik tallimanik taakkuninnga toqussuteqarput. Allatut oqaatigalugu sekundit pingasut qaangiukkaangata, ukioq naallugu, inuk ataaseq nappaammik taamaattumik toqussuteqartarpoq.

AKERLILIISSUTIGINEQARTARTOQ: Nunarsuarmi inuit amerliartuinnarmata nappaateqartut aamma amerliartuinnarput. Napparsimasinnaasut amerlaneruinnarput.

AKERLILIISSUT ATORSINNAAVA? Nunarsuarmi inuit amerliartupiloorsimanerat ilumoorpoq. Aammali nappaatinik suussusersiisarnerit, pinaveersaartitsinerit katsorsaanerillu pitsaanerujussuanngorsimapput. Taamaattumik isumaqarsinnaagaluarpugut nappaatit inunnut sunniutaarukkiartussasut, ilaa? Akerlianilli pisoqarpoq.

QANOQ ISUMAQARPIT? Nappaassuaqarpa Biibilimi siulittuutigineqarneratut?

Nunap sajuttarneri, kaannersuit nappaatillu inuppassuarnik ajoqusiingaartuupput. Aammattaaq inuit millionillit allat inoqatitik pissutigalugit naalliupput; allaat sernissortigisassaraluaminnik eqqugaallutik. Malugiuk tamanna pillugu Biibilimi siulittuummi qanoq allassimasoq.

[Quppernerup ataani ilanngussaq]

[Qupp. 6-mi issuagaq]

“Avataaneersumit, soorlu løvemit, nerineqarluni amiilaarnaqaaq, taamatulli ajortigaaq nappaassuarmit qamanngaanniit nerineqarluni sumilu tamaani taamaattoqarnera takullugu.” — EPIDEMIOLOGI MICHAEL OSTERHOLM.

[Qupp. 6-mi suminngaanneernera]

© William Daniels/Panos Pictures

4. Asannissuseqannginneq

‘Inuit ilaquttaminnut pissusissamisoortumik tunniusimassuseqassanngillat.’ — 2 TIMOTHEUSI 3:1-3, God’s Word Bible.

● Chris angerlarsimaffimmi nakuuserfigitittunik ikiuiniartuni Walesip avannarpasissuani sulisuuvoq. Ima oqaluttuarpoq: “Arnaq takunikuusara uagutsinnut orniguttoq unatartissimangaarmat ilisarinngilaraluunniit. Arnat allat misigissutsikkut innarlerneqarsimangaaramik qiviarsinnaanerluunniit ajorput.”

PIVIUSUT SUMIK ERSERSITSIPPAT? Nunami Afrikamiittumi arnat 33 procentiisa missaat meeraallutik kinguaassiuutitigut atornerlunneqartarsimapput. Nunami tassani misissuinermi erserpoq angutit pingasorarterutaannit amerlanerusut isumaqartut nuliamik unataaneq ajortuunngitsoq. Angerlarsimaffimmili nakuuserfigineqartartut arnaannaanngillat. Assersuutigalu Canadami angutit 30 procentingajaat inooqatigisaminnit unatarneqartarput allatulluunniit ajortumik pineqartarlutik.

AKERLILIISSUTIGINEQARTARTOQ: Angerlarsimaffimmi nakuusertoqartuaannarsimavoq. Ullumikkut siornatigorniit eqqumaffigineqarneruinnarpoq.

AKERLILIISSUT ATORSINNAAVA? Ilumoorpoq ukiuni kingullerni angerlarsimaffimmi nakuusernerit eqqumaffigineqarnerulernerat, tamannali ilutigalugu angerlarsimaffimmi nakuusertut ikilippat? Naamik. Ajoraluartumik pissusissamisoortumik asannissuseqannginneq nalinginnaaleraluttuinnarpoq.

QANOQ ISUMAQARPIT? 2 Timotheusi 3:1-3 eqquuppa? Ilumoorpa ilaquttanut pissusissamisoortumik tunniussimassuseqarneq takussaannginnerulersimasoq?

Siulittuutit tallimaat maanna eqquuttoq tamatta angerlarsimaffitsinnut, nunarsuarmut, tunngavoq. Tamanna pillugu Biibilimi qanoq allassimasoqarnersoq allaaserisap tulliani atuaruk.

[Qupp. 7-mi issuagaq]

“Angerlarsimaffimmi nakuusernerit tassaasorineqarput innuttaaqatigiinni pinerlunnernik unnerluutigineqartartunik qaqutigoornerpaajusut ilaat. Arnaq aatsaat agguaqatigiissillugu 35-riarluni inooqatigisaminit nakuuserfigineqareeraangami politiinut saaffiginnittarpoq.” — WALESIMI PERSUTTARTISSIMASUT SIANERFIGISINNAASAANNIT OQAASEQARTARTOQ.

5. Nunarsuarmik aseruineq

Guutip ‘aserussavai nunarsuarmik aseruisut.’ — SAQQUMMERSITAT 11:18.

● Angut, Pirrimik atilik, Kporimi palmip viinnianik maqiterisuuvoq. Nigeriap sineriaani uuliamik maqisoornerujussuaq pissutaalluni Pirri inuussutissarsiutaaruppoq. Ima oqarpoq: “Aalisakkat toqupput, amerlulerpugut kuuillu mingutsinneqarlutik. Inuussutissaaruppunga.”

PIVIUSUT SUMIK ERSERSITSIPPAT? Ilisimatuut ilaat naapertorlugit ukiut tamaasa igitassat 6,5 million tonsit imarpinnut iginneqartarput. Missingerneqarsimavoq igitat 50 procentii plastikkiusut, taakkualu ukiuni hundredelikkuutaani arroratik sarfaatitikkumaartut. Inuit nunarsuarmik mingutsitsiinnanngillat, aammali pinngortitap pisuussutai nungulerpaat. Misissuinerni paasineqarpoq inuit ukiup ataatsip ingerlanerani atugaat nunarsuup aatsaat ukiup ataatsip qaammatillu tallimat ingerlaneranni pilerseqqittarai. “Inuit amerliartuinnarlutillu atuinerujartuinnarpata ukiumi 2035-mi nunarsuit marluusariaqassapput,” Australiami aviisimi Sydney Morning Herald-imi allassimavoq.

AKERLILIISSUTIGINEQARTARTOQ: Inuit isumassarseriataallaqqeqaat. Nunarsuaq annaanniarlugu aaqqiissutissarsiumaarput.

AKERLILIISSUT ATORSINNAAVA? Inuit ataasiakkaat amerlasuut eqimattakkuutaarpassuillu mingutsitsineq akiorniarlugu ilungersorput avatangiisitigullu ajornartorsiuteqarnera uparuarlugu. Taamaattoq nunarsuarmik suli mingutsitsinerujussuaqarpoq.

QANOQ ISUMAQARPIT? Pisariaqarpa Guuti akuliulluni nunarsuarmik aserortinnagu annaassinissaa — neriorsuinermisut iliorluni?

Siulittuutit tallimat sammeriikkatta saniatigut aamma ullussani kingullerni nuannersunik pisoqarnissaa Biibilimi siulittuutigineqarpoq. Nuannersut taakkua ilaat allaaserisami tulliuttumi sammeriartigu.

[Qupp. 8-mi issuagaq]

“Soorlu tassa paratiisip ilaa pigisara pigiunnaarlugu eqqaavissuaq toqunartortalik pigileriga.” — ERIN TAMBER, USA, 2010-MI MEXICOP KANGERLIUMARNANI UULIAMIK MAQISOORNERUP SUNNIUTAI PILLUGIT.

[Qupp. 8-mi ungalusaq]

Guuti akisussaava?

Ullumikkut pissutsit alianartut Biibilimi siulittuutigineqarmata imaappa Guuti akisussaasoq? Naalliunnartunut pisuua? Apeqqutit taakku akineqarput kapitali 11-mi atuakkami Biibilimi sorpiaat ajoqersuutigineqarpat?-mi. Jehovap Nalunaajaasuinit saqqummersinneqartoq.

[Qupp. 8-mi suminngaanneernera]

U.S. Coast Guard photo

6. Nunarsuaq tamakkerlugu oqaluussineq

‘Naalagaaffimmik iivangkiiliu taanna silarsuarmi tamarmi oqaluussissutigineqassaaq.’ — MATTHÆUSI 24:14.

● Vaiatea Manerassuarmi Tuamotup qeqertaanni 80-iusut ilaanni najugaqarpoq. Qeqertat taakku 800.000 kvadratkilometerinit annertunerusumi siammasitsigipput, 16.000-t missaannaannilli inoqarlutik. Taamaattoq Vaiatea eqqaamiuilu Jehovap Nalunaajaasuinit attavigineqarsimapput. Sooq? Jehovap Nalunaajaasuisa inuit tamaasa — sumiluunniit najugaqaraluarpata — Guutip naalagaaffia pillugu nutaarsiassamik nuannersumik tusarlerusukkamikkit.

PIVIUSUT SUMIK ERSERSITSIPPAT? Guutip naalagaaffia pillugu tusarliussaq silarsuaq tamakkerlugu oqaluussissutigineqarpoq. 2010-innarmi Jehovap Nalunaajaasuisa nalunaaquttap-akunneri 1,6 milliardit kristumiut tusarliussaannik oqaluussissutiginninnermi atorpaat, taamaaliorpullu nunani 236-ni. Allatut oqaatigalugu Jehovap Nalunaajaasui immikkut tamarmik agguaqatigiissillugu minutsit 30-t oqaluussinermi ullormut atortarpaat. Ukiuni qulini kingullerni Jehovap Nalunaajaasui Biibililersaarutinik 20 milliardinit amerlanerusunik atuagassialiorput agguaallugillu.

AKERLILIISSUTIGINEQARTARTOQ: Tusarliussaq Biibilimiittoq ukiuni tusindini arlalinni oqaluussissutigineqareerpoq.

AKERLILIISSUT ATORSINNAAVA? Ilumoorpoq amerlasuut Biibilimeersunik saqqummiussisarsimanerat. Amerlanerilli sivikinnerusumik nunarsuullu ilaannaani oqaluussisarsimapput. Jehovap Nalunaajaasuili silarsuaq tamakkerlugu aaqqissugaasumik oqaluussillutik inuit 100 millionit arlallit tusarlerpaat. Oqaluttuarisaanermi pissaaneqarnerpaat naakkittaannerpaallu ilaannit akerlilersorneqangaaraluarlutik oqaluussiuarput.a (Markusi 13:13) Aammami oqaluussinertik akissarsissutigineq ajorpaat. Aap, namminneq kajumissutsiminnit piffissartik atortarpaat atuagassiaatitillu akeqanngitsumik agguaattarlugit. Sulinerat nammineq kajumissutsimit tunissutaannarnik aningaasalersorneqarpoq.

QANOQ ISUMAQARPIT? ‘Naalagaaffimmik iivangkiiliu’ silarsuaq tamakkerlugu oqaluussissutigineqarpa? Siulittuut tamanna eqquummat imaappa qanittukkut pitsaanerungaartumik pisoqassasoq?

[Quppernerup ataani ilanngussaq]

[Qupp. 9-mi issuagaq]

“Jehova akuersitillugu Guutip naalagaaffia pillugu nutaarsiassaq nuannersoq kajumingaarluta oqaluussissutigiuassavarput sapinngisatsinnillu inuit tusarlerniarlugit.” — JEHOVAS VIDNERS ÅRBOG 2010.

Atugarissaarfiunerusut qanittukkut!

“Iluanngitsoq erniinnaq peeruttussaa- voq . . . Kisianni qanilaartut nuna kingornutissavaat pilluangaarnertillu nuannaarutigissallugu.” — TUSSIAAT 37:10, 11.

SIULITTUUTIP tamatuma eqquunnissaa misigerusuppiuk? Ilimanarpoq. Qanittukkut eqquunnissaata upperinissaanut tunngavissaqarluarpoq.

Siulittuutit Biibilimeersut “ullussani kingullerni” inuunitsinnut ersersitsilluartut ilaannamininngui allaaserisani matuma siuliini sammineqarput. (2 Timotheusi 3:1-5) Guutip Biibilimik allattut isumassarsisillugit pisussanik tamakkuninnga siulittuisippai neriuutissaqaqqulluta. (Romamiut 15:4) Siulittuutit tamakkua eqquunnerannit erserpoq ajornartorsiutigisavut qanganngungajalersut.

Ullut kingulliit qaangiuppata susoqassava? Guutip naalagaaffia inuiannut tamanut naalakkersuissaaq. (Matthæusi 6:9, 10) Taamanikkussamut pissutsit qanoq ikkumaarnerat Biibilimi ima allaatigineqarnerat malugikkit:

● Kaattoqassanngilaq. “Karrit naammangaartut nunami naasimassapput, qaqqat qaanni aalataarumaarput.” — Tussiaat 72:16, 1990.

● Napparsimasoqassanngilaq. “Innuttaasoq kinaluunniit oqassanngilaq: ‘Napparsimavunga!’” — Esaja 33:24.

● Nunarsuaq mingoqassanngilaq. “Inoqajuitsoq nunalu panertoq tipaatsussapput. Inuilaaq qiimmattassaaq naasunillunilu.” — Esaja 35:1.

Taakku siulittuutit Biibilimeersut qiimmaallannartut qanittukkut eqquuttussat ilaminiinnaraat. Jehovap Nalunaajaasuisa ilaat aperisinnaavat sooq upperilluinnarneraat qanittuararsuakkut atugarissaalerumaartugut.