Guutip Aaperaat angerfigeqatigaa

NOAP nalaani ulersuareerneraniit ukiut 350-it missaat qaangiutereerput. Ataataanerpaaq Aaperaat najugaqarpoq illoqarfimmi ingerlalluarfiusumi Urimi, ullumikkut Irakiusumi. Aaperaap uppernera maluginiarnartuuvoq. Maannali uppernera misilinneqarpoq.

Jehovap Aaperaat peqquaa nuna inunngorfini qimallugu nunamut allamut nuussasoq, paasinarsivorlu nuuffigisaa Kana’aniusoq. Aaperaat nangaanani naalappoq. Inoqutini, ilaatigut nuliani Sara jorngunilu Loti aallaqatigai, sivisuumillu angalareerlutik Kana’animi tupermiuulerput. Aaperaamut angerutsimini Jehovap taanna neriorsorpaa inuiassuanngortikkumaarlugu, taassumuuna nunarsuarmi eqqarleriit tamarmik pilluaqqunarsissasut kinguaavisalu Kana’ani nunagilerumaaraat.

Aaperaat Lotilu pigissaalerput savaaterpassuaqalerlutik nersutaaterpassuaqalerlutillu. Aaperaap namminissarsiorani Loti nunasiffigiumasaanik qinersitippaa. Lotip Jordanip Qoorua naggorissoq qinerpaa illoqarfiullu Sodomap eqqaani najugaqalerluni. Angutilli Sodomamiut kinguaassiuutitigut inuunerluttuupput — Jehova ingasattumik ajortuliorfigisarlugu.

Kingusinnerusukkut Jehovap Aaperaat neriorsoqqissaarpaa kinguaavi qilaap ulloriaasut amerlatigilissasut. Aaperaap neriorsuut taanna upperaa. Aaperaalli nulia asasaa, Sara, qitornartaanngilaq. Taava Aaperaat 99-inik ukioqartoq Saralu 90-it pallillugit ukioqartoq Guutip Aaperaat oqaluttuuppaa Saralu ernertaassasut. Guutip neriorsuineratut Sarap Iisaaq ernertaaraa. Aaperaat allanik qitornaqarpoq, aniguisitsisussarli Edenimi neriorsuutigineqartoq Iisaaq aqqutigalugu tikiuttussaavoq.

Loti ilaquttanilu Sodomami najugaqalerput, Lotili naapertuilluartuusoq illoqarfimmi tassani najugalinnut inuunerluttunut naleqqussanngilaq. Jehovap aalajangerami Sodomamut eqqartuussutini naammassiniarlugu inngilit piuneerussingajalernerminik Lotimut mianersoqqusiartortippai. Inngilit Loti ilaqutaalu Sodomamit qimaaqqullugit kingumullu qiviaqqunagit ilungersorlutik kajumissaarpaat. Taava Guutip Sodoma illoqarfillu eqqaaniittoq guutiitsuuffiusoq Gomorra ikuallassaammik innermillu nakkaatitsivigai, taakkunani innuttaasut tamaasa piuneerullugit. Loti paniilu marluk aniguipput. Lotilli nulia kingumut qiviarpoq, immaqa pigisani qimatani iluatigalugit. Taamatut naalannginnini toqqutigaa.

— Tunngavigineqartut: 1 Mosesi 11:10–19:38.