Maleruagassaq atortuujuaannartoq — Suli atorsinnaava?
KUULTI piviusoq manngertornerneq ajorpoq, tamannalu pissutaalluni pinnersaatit piumaneqaqaat. Kuultip naleqarsutsi katanneq ajormagu pinnersaatit ajoqusersimagaluartut iginneqarneq ajorput, kuultilerisummi aatsillugit pinnersaatiliareqqisinnaavai.
Naak ukiut 2000-ngajaat matuma siorna Jesusip maleruagassaq atortuujuaannartoq oqaatigisimagaluara, maleruagassap naleqarsutsi kuultitullusooq attattuarpaa. Pisoqalisimannginneranut pissutaasut misissornerugutsigik periarfissaqarluassaagut maleruagassap tamatuma ullumikkut uatsinnut iluaqutaassusia paasissallugu.
Jesusip maleruagassaq atortuujuaannartoq, tassa ’inunnut qanorluunniit iliorfigeqqugussi ilississaaq taamatut iliorfigisigik,’ oqaatigeqqaaramiuk nangilluni oqarpoq: ’Taamaapput inatsisit pruffiitillu allagaat.’ (Matîuse 7:12) Jesusip ajoqersugaasa tusarnaartaasalu oqaatsit tamakku qanoq paasisimavaat?
’Inatsisit pruffiitillu allagaat’
’Inatsisit’-ni pineqarput Bibelimi allakkat tallimat siulliit, tassa Mosesip allagai. Tassani Jehovap siunertaa, tassa kinguaassamik ajussutsimut ajugaasinnaasumik pilersitsinissaq, saqqummersinneqarpoq. (1 Môrsase 3:15) Biibilimi allakkat siulliit aamma Inatsisinik imaqarput, inatsisit Jehovap ukiumi 1513 u.n.a.s.-imi Qaqqami Sinajimi akunnermiliuttoq Moses aqqutigalugu israelikkunut tunniussimasai.
Guutip inatsisaasa Israel inuiaqatigiinnit avatangiisunit Guutimik nalusuusunit immikkoortippaat, israelikkullu Jehovamut iluarisaasumik attaveqarnerminnik navianartorsiortitsisumik iliuuseqarnissaannik inerterlugit. Taakku immikkut ittumik innuttarai, pilluaqqussutaalu ilassiumagunikkik tamaattuaannartariaqarlutik. (2 Môrsase 19:5; 5 Môrsase 10:12, 13) Mosesilli inatsisaani israelikkut Guutimut akisusaaffiat nassuiarneqaannarani aammattaaq nunami allamiunik israelikkut akornanni najugaqartunik ajunngitsuliorfiginnittarnissaat erseqqissaarpaat. Assersuutigalugu, allassimavoq: ’Ilassisut nunassinni inunngortutut itissavarsi takornartaq akornassinni takornartaasoq, asassavallu ilittut, nammineq takornartaagaluarassi Ægyptenimi; uanga tamassa Jehova Guutersi.’ (3 Môrsase 19:34) Ukiuni israelikkut kunngeqarfigisaanni allamiut israelikkut akornanni najugaqartut pisinnaatitaaffippassuaqartinneqarsimapput. Assersuutigalugu, Jerusalemimi Guutip naalaffiliorneqarnerani sanaqataasimapput. — 1 nalunaerssûtigdlit 22:2.
Israelikkunut inatsisini allasiorneq, inuarneq, tillinneq piumatuussuserlu inerteqqutigineqarput. Tamakku, ’allamilluunniit inassutit’ ilanngullugit, najoqqutassami matumani ataatsimut oqaatigineqarsinnaapput: ’Tullit ilittut asassavat.’ Apustili Paulus nangippoq: ’Asannittup tullini ajortumik pissanngilaa; taamaammat asanninneq inatsisit naammassissutigaat.’ — Rûmamiut 13:9, 10.
Maleruagassap atortuujuaannartup tunngavia inatsisini pingaarnersiorneqarmat taava ’pruffiitit’ tamanna pillugu qanoq oqaluttuuppaatigut?
Allakkani hebræerisuuni allakkat siulittuutaasut aammattaaq uppernarsarpaat maleruagassaq atortuujuaannartoq suli atorsinnaasoq. Jehova Guuti unneqarissutut siunertaminik naammassinnittuaannartutut allaatigaat. Kiffani ilumoortut naammalluinnanngikkaluarlutik taassuma piumasaanik iliorniarsarigaangata ajortuliarisimasaminnillu ilumoortumik peqqisimissutiginnikkaangata, pilluaqqusarpai. ’Uffaritsi, eqqiaritsi, suliassi ajorsusiat isima saannit peersiuk, ajortoq alarsiuk. Ajunngitsuliornermut sungiusaritsi, innarluissut apeqqutigisiuk, angutaaserfigisat ikiorsigik, iliarsuit illersorsigik, uillarnerit sernigisigik.’ — Isaia 1:16, 17.
Kiffani imminut inoqatiminnullu iluartulioraangata, imaluunniit eqqortulioraangata, tapersersortarnissaannik Jehovap neriorsorpai. ’Ima oqarpoq Jehova: „Eqqartuussisissat maleruarsigik iluartuliorlusilu. . . . Pilluarpoq inuk taamaaliortoq, inuup qitornaa tamatuminnga aalajangiussisoq.“’ — Isaia 56:1, 2.
Kristusip ilagiissini siulersorpai
Kristus Inatsisit Pruffiitillu naammassiniarlugit tikiussimavoq, tamatumalu kingorna Jehovap siunertani soraajuitsoq naammassiartuaartuarsimavaa. (Matîuse 5:17; Evf. 3:10, 11, 17-19) Mosesip inatsisitoqai angerusissaamit kristumiunik tanitaasunik juutiusunik juutiunngitsunillu angeqateqarluni pilersinneqartumit tarserneqarsimapput. (Jerimia 31:31-34) Kisianni maleruagassaq atortuujuaannartoq kristumiunit ilagiinnit ullutsinni suli maleruarneqarpoq. Maleruagassallu tamatuma akuerinissaanut suli pissutissaqarluarpugut: Nalitsinnittaaq ilagiit Kristus niaqoraat, unnersuussutinillu nutaanik tunisimanngilaatigut. Siunnersuutai Guutip sunniineratigut isumassarsiarisai suli atortuujuarput.
Qilaliartinnani Jesusip malitsini peqquai inunnik inuiaqatigiinnit tamaneersunik ajoqersuganngortitseqqullugit ’peqqusaminillu tamanik maleruarnissaannik’ ajoqersueqqullugit. Peqqusai maleruagassaq atortujuaannartumik imaqarput. Jesusip ajoqersukkani neriorsorpai: ’Ata, ullut tamaasa najorpassi silarsuup naggatissaanut allaat.’ — Matîuse 28:19, 20.
Soorlu Lúkarse 6:31-mi allassimasoq Jesus ima peqqusivoq: ’Qanoq inunnut iliorfigeqqugussi ilississaaq taamatut iliorfigisigik!’ Jesus nammineq siulliulluni allanut ajunngitsuliortarnermigut maligassaalluarpoq.
Nunami kiffartornermi nalaani Jesusip ajorsangaarneq sualuttoq malugilluarpaa, inunnillu naakkinnittuuvoq. Oqaluussiartorluni angalanermini inuppassuit misigeqatigingaarlugit isigai. Aammali ikiorniarlugit qanoq iliuuseqarpoq. Qanoq? Aap, oqaluussineq annertooq aaqqissuuppaa, inuit angerlarsimaffiinut ajoqersukkani pulaartittarlugit. Soorlu oqarfigigai: ’Sumut illoqarfimmut nunaqarfimmulluunniit pigaangassi, siunersiuisaritsi, qinngaqqunnanngitsumik tassaniittoqarnersoq, taassumaniittuaritsilu aallarserlusi.’ Jesusip suliamut tamatumunnga tapersersuinera Jehovallu tamatuminnga pilluaqqusinera Jesusip nangilluni oqaasianit takuneqarsinnaapput: ’Ilissinnik ilassisup uanga ilassivaanga, uannillu ilassisup aallartitsisiga ilassivaa. . . . Ukualu minninnguit ilaat imermik nillertumik ermutsip imaannaanik immikkuniuk ajoqersugaammat, ilumut oqarfigaassi: akilerneqanngissanngilaq.’ — Matîuse 9:36–10:42.
Allami Jesusip oqaasiisa takutippaat maligassaq atortuujuaannartoq maliniaraanni inunnut allanut iliuuseqarnissaq pisariaqartoq: ’Ilissinnik asannittut asagussigik, sukkut taava qutsavigisariaqassavisi? Ajortuliortuttaaq asasitik asasarmatigik. Ilissinnullu ajunngitsuliortut ajunngitsuliorfigigussigik, sukkut taava qutsavigisariaqassavisi? Ajortuliortuttaaq taamaattarmata. Kisianni qinngarsortisi asaniarsigik, ajunngitsuliorlusilu . . . taava akissarsiassarsi angissavoq.’ (Lúkarse 6:32, 33, 35) Maleruagassaq atortuujuaannartoq suli atuuttoq malikkumagutsigu nammineq siulliulluta ajunngitsuliortariaqarpugut, inunnut nalusatsinnut allaat.
Maleruagassaq atortuujuaannartoq suli atorsinnaavoq
Maleruagassap atortuujuaannartup suli atuunneranut uppernarsaatit pitsaanerpaat immaqa tassaapput tamatuminnga maleruaasorpassuit misigisimasaat. Kristumiut ulluinnarni Guutip inatsisai naapertorlugit inooriaaseqartut nuannaarutissarsisaqaat akuttunngitsumillu ilimaginngisaminnik pilluaqqusaasarlutik. Assersuutigalugu, arnap kristumiup napparsimmavimmi ornitakkamini napparsimasunik paarsisunit nakorsanillu ikiuiumangaartumik isumaginnittumillu iliorfigineqartarnini malugisimavaa, taakkununnga ataqqinnilluni inussiarnisaarnini pissutigiinnarlugu.
Jehovap nalunaajaasuisa rigssalinik sanagasuakkanik sanaqataasimasut aamma maleruagassap atortuujuaannartup iluaqutaassusia misigisimavaat. Nalunaajaasut rigssaliliorniarnerminnik oqaluttuarniarlutik pulaarfigigaangatik inuit rigssaliliorfiup eqqaani najugaqartut amerlanertigut ajunngitsumik qisuariartarsimapput. Taamaalillutik inuit, assortuisuusimagaluartut, paasilersarpaat Jehovap nalunaajaasuisa tullertik ajunngitsuliorfigisaraat, Guutillu innuttai qanoq suleqatigiittartut namminneq isiminnik takuaat. Tamatuma kingunerisaanik taakkua ilaat illuliornermut ikiuukkumasarsimapput, toqqaannartumik aningaasaatigulluunniit. — Saggaria 8:23.
Oqaluussisartoq Iranimiu London-imi najugalik nerisassanik pisiniartilluni allamiuunini pissutigalugu pisiniarfiup piginnittuanit ajuallannartumik oqalorujuffigineqarpoq. Nikallornanili nalunaajaasup inussiarnerluni periaaserillunilu nassuiaappaa Jehovamut nalunaajaasuulluni, inuit allamiut nikagisarnagit, tamaasali Bibelimi tusagassamik tusarlerumallugit pulaartarini. Tamatuma kingunerisaanik pisiniarfiup piginnittuata nalunaajaasoq mamartulianik saniatigut tunivaa.
Maleruagassaq atortuujuaannartoq malissagutsigu tassa tamakku annikitsualuit assersuutigineqartut saniatigut iliuuseqarnerusariaqarpugut. Maleruagassaq atortuujuaannartoq pitsaanerpaamik takutinneqartarpoq Jehovap nalunaajaasuisa nunarsuaq kaajallallugu inoqatitik Guutip naalagaaffia pillugu tusagassamik nuannersumik tusarlerniarlugit akuttunngitsumik pulaartarnerisigut ajunngitsuliorfigigaangamikkik.
Maleruagassaq atortuujuaannartoq malillugu inuugit
Maleruagassaq atortuujuaannartoq malikkumagukku inuit allat soqutigisariaqarpatit. Isumalluarlutit sulissutiginnittariaqarputit, aap ilagisartakkatit ajunngitsuliorfigissallugit periarfissiortariaqarputit. Avammut ammasuullutit naalaartarit, inuit allat immikkut soqutiginiakkit. (Filípimiut 2:4) Taamaalioruit pilluaqquneqangaarumaarputit. Jesusip unnersuussutaa malissavat: ’Taamattaaq qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ (Matîuse 5:16) Ilumoorlutit ujarakku ulluinnarnilu maleruagassaq atortuujuaannartoq malillugu inuugavit Jehovap akilerumaarpaatit. — Eprîarit 11:6. (wD 1/11 89)