Aqqut sileqisoq kiffaanngissuseqarpallaanngitsoq

Australiami Sydneymi ilaqutariit — ataataasoq, anaanaasoq paniaraallu — tamarmik angerlarsimatillugit illuat ikuallalerpoq. Igalaakkut qimaaniaraluarput taakkuli assiaqutsersorsimapput. Assiaquttat pissutigalugit qatserisartunit annaanneqarsinnaanngillat. Anaanaasoq ataataasorlu tamarmik ikuallagussaallutik toqupput. Paniat kingusinnerusukkut napparsimmavimmi toquvoq.

ILAQUTARIIT taakku illersuutissiariniaraluakkatik pissutigalugit toqummata, ila alianassusia! Ilaqutariit taakku kisimiunngitsoq angerlarsimaffitsik assiaquttanik parnaarsaatinillu isumannaallisarsimavaat. Sanilit ilarpassui aamma pallittaalisatut ittunik illoqarput. Sooq? Isumannaatsumik eqqissillutillu inoorusukkamik. Innuttaaqatigiinnut ’kiffaanngissuseqartunut’ kanngusuutaaqaaq inuit angerlarsimaffimminni parnaarussatut ikkaangamik aatsaat isumannaatsutut misigisinnaasarmata! Sumiiffinni amerliartuinnartuni meeqqat illoqannginnersarsuarni eqqaminniittuni isumannaatsumik pinnguarsinnaajunnaarlutillu inersimasunik ilaqaratik atuarfimmukarsinnaajunaarsimapput. Inuunerup immikkoortortaani arlalinni kiffaanngissuseqarneq tammarsimavoq.

Inooriaaseq allanngorsimasoq

Aatakkutta meeraanerata nalaani pissutsit allaasimapput. Taakku meeraagallaramik piumasaminni sumiluunniit ersinatik pinnguarsinnaasarput. Inersimasunngoramillu parnaarsaatit assiaqutallu isumakuluutigisariaqanngilaat. Kiffaanngissuseqarsoripput amerlanertigullu kiffaanngissuseqartarlutik. Aatattali aanattalu inuunerminni innuttaaqatigiit anersaavat allanngoriartortoq takusimavaat. Misigissutsikkut nillertikkiartorsimavoq, inuit namminissarsiornerulersimapput; tullermik asanninneq tullermik ersinermik taarserneqarsimavoq, tamannalu pisimasumut alianartumut qulaani eqqartorneqartumut pisooqataavoq. Kiffaanngissuseqarunnaariartornerup saniatigut ileqqussat eriaginartut aseroriartorsimapputtaaq. Innuttaaqatigiit ’ileqqussat nutaat’ atulersimavaat, aperisoqarsinnaavorli tamanna tassaannginnersoq ileqqussatigut najoqqutassaqanngilluinnarneq.

Queenslandip universitetiani ilisimatusarnermik ilinniartitsisuusimasoq, Dr. Rupert Goodman, ima allassimavoq: „Ullumikkut inuusuttut inooriaatsimik allaanerusumik, inuulluapilukkumassutsimik, sunnertittarput. . . . Inuk nammineq pingaarnerusorivoq, imminut pingaartippallaarluni, tatigivallaarluni, imminut naammagisimaarpallaarluni.“ Nangillunilu allassimavoq: „Nalillit makku: imminut naalakkersinnaaneq, imminut naaggaarneq, sulilluarneq, atorluaassuseq, oqartussaasunik ataqqinninneq, angajoqqaanik asanninneq ataqqinninnerlu . . . inuppassuit naluaat.“

Ilumut, aqqut sileqisoq

Biibilip siulittuutaanik ilisimasaqarutta namminissarsiorneq atugaangaartoq tamanna tupigusuutigisariaqanngilarput, Jesus Kristusimmi tusarnaartini ima mianersoqqusimavai: ’Isertarfik nerutoqimmat aqqusinerlu sileqimmat aserorsimaffimmut sammisoq, tassuunalu ingerlasut amerlaqaat; isertarfilli nerukippoq, aqqusinerlu ameqaaq inuunartumut sammisoq, taassuminngalu nanisisut ikeqaat.’ (Matîuse 7:13, 14) Aqqut siulleq amerlasuunut inissaqartoq ’sileqaaq’, tassani ileqqussatigut ulluinnarnilu inuunermut Biibilip najoqqutassiaanit killilersortittoqanngilaq. Inuit piumasaminnik eqqarsarusullutik inoorusuttut aqqut tamanna nuannarinerusarpaat — inatsisit piumasaqaatillu tamaasa pinnagit.

Ilumoorpoq amerlasuut aqqummik sileqisumik qinersisimasut isumaqarmata kiffaanngissusertik nuannaarutigisinnaallugu. Amerlanersaalli anersaamit nalinginnaasumit namminissarsiortumit ingerlanneqarput. Biibilimi allassimavoq taakku ’anersaamut naalasseriinnerup qitornaani sunniisumut naalagaasoq malillugu saqisartut’. Anersaap tamatuma sunniineratigut inuit ’uinngup pilerissusii malillugit ingerlasut uinngullu piumasaa naammassisarlugu’, soorlu kanngunartuliortut, ikiaroornartunik atornerluisut imaluunniit ataqqisaassutsimik, pisuussutinik pissaanermillu naakkittaatsumik noqqaassutiginnittut. — Evfisumiut 2:2, 3.

Aqqut sileqisoq ajunaarnissamut sammisoq

Malugeriaruk aqqummi sileqisumi ingerlasut ’uinngup piumasaanik ingerlatinneqartut’. Tamatuma takutippaa kiffaanngissuseqanngivissut — naalagaqarput. Uinik naalagaraat. Tamatuminngalu naalakkersorneqarneq ajornartorsiutinik amerlasuunik kinguneqarsinnaavoq — kinguaassiuutitigut nappaalanersuit, avinnerpassuit, ikiaroornartunik imigassanillu atornerluinerup kingunerisaanik timikkut isumakkullu nappaatit, ilaannaat taassagaanni. Aamma nakuuserneq, tillinniarneq pinngitsaaliinikkullu arneriffiginninneq aqqummi sileqisumi suut tamarmik akuerisaaffianni namminissarsiortumik eqqarsariaaseqarfiusumi aallaaveqarput. Aqqut tamanna ’aserorsimaffimmut sammisoq’ atuuttuartillugu kinguneri alianarnerujartuinnassapput. — Ussatit 1:22, 23; Galâsiamiut 5:19-21; 6:7.

Australiamit misigisimasat marluk misissoriartigik. Mary usserneqarluni ikiaroornartunik atornerluisalerlunilu kanngunartuliortalersimavoq.a Pilluarnerli nassaarisimanngilaa. Allaat marlunnik meeraqaraluarluni inuunini imaqanngitsutut misigaa. Paasigamiullu AIDS-imik tunillatsissimalluni neriuutaarulluinnarpoq.

Tom allatigut eqqorneqarsimavoq. „North Queenslandimi angerlarsimaffimmi upperisarsiorfiusuni alliartorsimavunga,“ taama allappoq. „16-inik ukioqarlunga assut imertalerpunga. Ataataga, akkaakkukkalu ikinngutikkalu tamarmik assut aalakoornartutortarput, taamaattumillu taamaaliornissara pissusissamisoorsorinarpoq. Naggataatigut suulluunniit imersinnaalerpakka, immiaaqqanit spritti ilanngullugu. Aamma hiistinik aningaasanoorutiginnittalerpunga, ilaannikkut aningaasarsiama amerlanersaat annaasarlugit. Tassaappullu aningaasarpassuit, ivissuarnik sukkoqutilinnik katersuisarnera akissarsissutigilluartarakku.

„Taava katippunga, meeraqalerpugullu. Akisussaaffikkali naammassinagit ikinngutittut iliortarpunga — imertarlunga, aningaasanoortarlunga paannittarlungalu. Akuttunngitsumik politiinit tigusaasarpunga. Taamaakkaluartorli tamanna allanngussutigisimanngilara. Inuunera ajuleriartuinnarpoq. Ajornartorsiuteqartorujussuuvunga.“

Aap, Tom Marylu kukkusunik kissaateqarnermikkut imminnut aammalu ilaqutaminnut ajoqusiipput. ajoraluartumik inuusuttorpassuit aqqummi sileqisumi suut tamarmik akuerisaaffigisaanni kiffaanngissuseqarusunnermit salloqittarneqarajuttarput. Aap, kiffaanngissusiusorinartup tamatuma ilumuunngissusia takusinnaassagaluaramikku! Aqqummi sileqisumi piviusut takusinnaagaluaramikkik — kingunipilui tassani ingerlasut tamarmik misigiumaagaat. Aqqut sileqaaq ajornanngitsuaqqamillu ingerlavigilerneqarsinnaalluni, tamassalu navianartua. Silatuumik ingerlassagutta miserratigineqarsinnaanngitsoq manna eqqaamasariaqarparput: ’Uinimminummi siaruarterisoq uinimmit aserujassummik katersuiumaarpoq.’ — Galâsiamiut 6:8.

Pitsaanerusumimmi qinigassaqarpugut. Tassaavoq aqqut amitsoq. Aqqulli tamanna qanoq amitsigalunilu killilersuiffiutigaa? Sumullu sammiva?

[Quppernerup ataani ilanngussaq]