Jesusitut iliuuseqarnissannut kajumissisinneqarpit?
’Jesus niugami inuppassuillu takugamigit nalligingaalerpai, savatut paarsisoqanngitsutut immata; amerlasuunillu ajoqersulerpai.’ — MÁKORSE 6:34.
1. Suna pissutaalluni inuit amerlasuut nersornartunik pissuseqartarpat?
UKIUT ingerlaneranni inuppassuit nersornartunik pissuseqarsimapput. Tamatumunnga pissutaavoq Jehova Guutip ilaatigut asannittumik, inussiarnersumik tunisiumatunermillu pissuseqarnera, pissutsit pingaartingaakkavut. Inuillu Guuti assilillugu pinngortitaagamik, amerlasuut asanninneq, inussiarnissuseq, misiginneqataaneq pissutsillu allat ajunngitsut ersersissinnaavaat, soorluttaaq amerlanerni malugineqarsinnaasoq nalunngeqatiginnissuseqartut. (1 Moses 1:26; Rûmamiut 2:14, 15) Immaqali malugisimassavat ilaasa pissutsit tamakku ersersinnissaat allanit ajornartinnginnerusaraat.
2. Inuit ilaat sunik ajunngitsuliortarpat, immaqa isumaqarlutik tassuuna Kristus ilaarlugu?
2 Qularnanngitsumik inunnik nalunngisaqarputit akulikitsumik napparsimasunut pulaarlutillu ikiuisartunik, innarluutilinnik isumaginnittunik imaluunniit tukkorlutik piitsunik ikiuisunik. Eqqarsaatigiuttaaq inuit misiginneqataanertik pissutigalugu pupissut katersuuffiini imaluunniit meeqqanut perorsaavinni sulillutik inuunerminnik atuisartut, imaluunniit qimaasunik angerlarsimaffeqanngitsunillu ikiuiniarsarisut. Ilaat qularnanngitsumik misigipput Jesusitut iliuuseqarlutik, taanna kristumiunut maligassiuimmat. Iivangkiiliuni oqaluttuarineqarpoq Jesusip nappaatillit ajorunnaarsittarai kaattullu nerisittarlugit. (Mákorse 1:34, 8:1-9; Lúkarse 4:40) Jesusip asanninnera, isumaginninnera misiginneqataaneralu ’Kristusip isumaanut’ ersiutaapput, Jesusillu nammineq Ataatani qilammiusoq ilaarpaa. — 1 Korintumiut 2:16.
3. Jesusip ajunngitsuliaasa oqimaaqatigiissumik isumaqarfiginissaanut suna ilaava?
3 Eqqarsaatigisimaviuk ullumikkut amerlasuut Jesusip asanninneranit misiginneqataaneranillu killinneqartut Kristusip isumaanut atatillugu ataaseq sumiginnaraat? Tamanna paasisinnaavarput îvangkîlio Mákorsip agdlagâ kapitali 6 misissornerugutsigu. Tassani oqaluttuarineqarpoq inuit napparsimasunik Jesusimukaassisut ajorunnaarseqqullugit. Oqaluttuarineqarportaaq Jesusip tusindilikkuutaat imminut orniguttut kaattut takugamigit tupinnartuliorluni nerisikkai. (Mákorse 6:35-44, 54-56) Nappaatillit ajorunnaarsillugit kaattullu nerisittarmagit asannittumik misiginneqataanermut immikkut ittumut ersiutaavoq, Jesusilli pingaarnerusumik inoqatini taamaalilluni ikiortarpai? Uagullu taassuma, Jehova malinniarlugu, asanninnermik, inussiarnissutsimik misiginneqataanermillu naammalluinnartumik maligassiuinera qanoq ililluta pitsaanerpaamik malinniarsinnaavarput?
Anersakkut pisariaqartitanik matussutissiinissaminut killinneqarpoq
4. Mákorse 6:30-34-mi oqaluttuarineqartumut suna tunuliaqutaava?
4 Jesusip imminut orniguttut nalligisarpai pingaartumik anersaakkut pisariaqartitaat pissutigalugit. Jesusimut pingaarnerpaasoq tassaavoq inuit anersaakkut pisariaqartitaasa matussutissineqarnissaat, inuit timikkut pisariaqartitaasa matussutissineqarnissaannit pingaarnerulluni. Oqaluttuaq Mákorse 6:30-34-miittoq malugiuk. Tassani oqaluttuarineqartoq ukiumi 32-mi poorski sioqqutsiarlugu Galilæap Tasersuata sinaani pisimavoq. Apustilit pissutissaqarluarlutik pissangaqaat. Sivisuumik oqaluussiartorlutik angalasimapput, maannalu Jesus ornippaat qanoq pisoqarsimanersoq oqaluttuariniarlugu. Inuilli ussagarput. Amerlangaarmata Jesus apustilillu nerinissaminnut qasuersaarnissaminnullu periarfissaqanngillat. Taamaattumik Jesusip apustilit oqarfigai: ’Ilissi asimut qaagallaritsi inoqanngitsumut, qasuersaallatsiarlusilu.’ (Mákorse 6:31) Umiatsiamut ikipput, qularnanngitsumik Kapernaumip eqqaani, Galilæallu Tasersuata illua tungaanut inoqanngitsumut aallarlutik. Inuppassuilli tatsip sinaatigut malippaat siulliullutillu apuullutik. Jesus qanoq qisuariarpa? Eqqissisimaarsinnaannginnami kamappa? Naamerluinnaq.
5. Jesusip inuppassuit imminut orniguttut qanoq isigai, qanorlu iliorpa?
5 Inuit tusindilippassuit, ilaatigut nappaatilippassuit, erinitsallutik utaqqisut takugamigit Jesusip uummataa attorneqarpoq. (Matîuse 14:14; Mákorse 6:44) Markus Jesusip misiginneqataaneranut pissutaasoq taassumalu qisuariarnera samminerullugit allappoq: ’Jesus niugami inuppassuillu takugamigit nalligingaalerpai, savatut paarsisoqanngitsutut immata; amerlasuunillu ajoqersulerpai.’ (Mákorse 6:34) Jesus inuppassuaannarnik takusaqanngilaq. Inuit ataasiakkaat anersaakkut pisiariaqartitallit takuai. Savatut eqqissisimanngitsutut ikiortissaqaratik angalasutut ipput, illersuisinnaasumik ivigalinnullu ingerlanissaminnut siulersuisinnaasumik paarsisoqanngitsut. Jesusip nalunngilaa upperisarsiornikkut siuttut misigittaatsut, paarsisutut isumaginnittuusussaagaluartut, inuinnaat uumigigaat anersakkullu pisariaqartitaasa matussutissinneqarnissaat isumaginagu. (Hesekiel 34:2-4; Juánase 7:47-49) Jesus taamaanngilaq. Iluaqutiginerpaasinnaasaannik ikiortarpai. Guutip naalagaaffianik ilinniartilerpai.
6, 7. (a) Iivangkiiliut naapertorlugit pisariaqartitat suut Jesusip pingaarnerusutut isigai? (b) Suna pissutigalugu Jesus oqaluussisarlunilu ajoqersuisarpa?
6 Oqaluttuap matumunnga assingusup pisimasut tulleriiaarneri takutippai taamaalillunilu suna pingaaruteqarnerusoq tikkuarlugu. Lukasimit allanneqarpoq, taanna nakorsaavoq inuit timikkut peqqissusiannik soqutigisaqartorujussuaq. ’Inuilli [Jesus] ilisimaleramikku malippaat; taassumalu ilassillugit Guutip naalagaaffianik oqaluffigai katsorsariaqartullu katsorsarlugit.’ (Lúkarse 9:11; Kulorsamiut 4:14) Naak tupinnartulianik oqaluttuani tamani eqqaaneqanngikkaluartoq Jesusip inuppassuit ajoqersortarai, pisimasumi tamatumani oqaluttuamini isumassarsiarititaasumi Lukasip siulliullugu eqqaavaa.
7 Allassimaffimmi tamatumani Mákorse 6:34-milu erseqqissarneqartut assigiipput. Ersarippoq Jesusip misiginneqataanera pingaarnertut ersersinneqartoq. Inuit ajoqersortarpai anersaakkut pisariaqartitaat matussuserniarlugit. Kiffartornermini piffissami siusinnerusumi Jesus oqarsimavoq: ’Nunaqarfinnut allanuttaaq Guutip naalagaaffianik iivangkiiliu oqaluutigisassaraara, tamanna pillugu aallartitaagama.’ (Lúkarse 4:43) Kukkunerussaarli isumaqarutta Jesusip pisussaaffittut isigiinnarlugu Guutip naalagaaffianik tusarliussaq oqaluussissutigisaraa, soorlu suliassaq naammassiinnagassaq suliarigini. Jesusip inunnut nutaarsiassamik nuannersumik oqaluussisarneranut pissutaasut pingaarnerpaartaat tassaavoq misiginneqataangaarnera. Jesusip inunnut — aamma napparsimasunut, anersaapiluit naalliutsitaannut, piitsunut kaattunullu — iliuuserisinnaasaasa pitsaanerpaartaat tassaavoq Guutip naalagaaffia pillugu sallusuissummik ajoqersorlugit ikiornissaat, sallusuissut ilassillugulu nuannarilersinnaaqqullugu. Sallusuissut tamanna immikkut pingaartorujussuuvoq Naalagaaffik Jehovap kisimi oqartussaanerata qutsisisinneqarnissaanut inuiaallu naassaanngitsumik pilluaqqusaanissaannut aalajangiisuummat.
8. Jesusip oqaluussinini ajoqersuininilu qanoq isigai?
8 Jesusip nunarsuarmukarneranut pissutaanerpaasut ilagaat Guutip naalagaaffia oqaluussissutigissagamiuk. Nunarsuarmi kiffartornini naangajalersoq Pilatus ima oqarfigaa: ’Inunnguutigalugulu nunamut pissutigaara sallusuissut nalunaajaatigissallugu. Sallusuissummit pisup nipiga tusararaa.’ (Juánase 18:37) Allaaserisani marlunni siulianiittuni nassuiarneqarpoq Jesus itisuunik misigissuseqartoq — isumaginnilluartoq, soqutiginnilluartoq, tatiginnilluartoq, ilassiortoq tamanillu pingaarnerusumik asannittuusoq. Kristusip isumaa paaserusukkutsigu kinaassusianut tunngasut tamakku maluginiarluartariaqarpavut. Taamatuttaaq pingaaruteqartigaaq paasissallugu Kristusitut isumaqarneq pigiliutissagutsigu oqaluussineq ajoqersuinerlu taassumatut pingaarnerpaatittariaqarivut.
Allat oqaluussinissamut kajumissaartarpai
9. Aamma kikkut oqaluussillutillu ajoqersuisariaqarpat?
9 Jesusip kisimi asanninnini misiginneqataaninilu oqaluussisarnerup ajoqersuisarnerullu salliutinneratigut takutittussaanngilaa. Ajoqersukkani nammineq pissutigisamisut pissutigisaqassasut kajumissaarpai, aammalu immisut iliuuseqarnissaannut pingaarnerutitaqarnissaannullu. Assersuutigalugu apustilit taakku aqqaneq-marluk Jesusimit toqqarneqaramik qanoq iliortariaqarpat? Mákorse 3:14, 15-imi ima paasitinneqarpugut: ’Taava aqqaneq-marluk peqquai najortuaqqulluni oqaluussiartortikkumallugillu piginnaassuseqassasullu anersaapiluit anisissinnaassallugit.’ Suna pingaarnerpaatissavaat?
10, 11. (a) Jesusip apustilit aallartikkamigit sumik peqquai? (b) Apustilit aallartikkamigit Jesusip suna erseqqissarpaa?
10 Kingusinnerusukkut Jesusip taakku aqqaneq-marluk piginnaassuseqartippai napparsimasunik ajorunnaarsitsinissaannut inngilipilunnillu anisitsisinnaanissaannut. (Matîuse 10:1; Lúkarse 9:1) Taava aallartippai ’savat tammarsimasut Israelip inoqutaasa ilagisaat orneqqullugit’. Qanoq iliussappat? Jesus ima peqqusivoq: ’Oqaluussiartoritsi oqarlusi: „Qilammiup naalagaaffia qanillivoq.“ Napparsimasut katsorsarsigik, toqusut makitissigik, pupissut pupiiarsigik, anersaapiluit anisissigik.’ (Matîuse 10:5-8; Lúkarse 9:2) Taava qanoq iliorpat? ’Taava aallarput [1] oqaluussillutillu allamik isumataaqqullugit. [2] Anersaapiluillu amerlasuut anisippaat, napparsimasullu amerlasuut uuliamik tanippaat katsorsarlugillu.’ — Mákorse 6:12, 13.
11 Ajoqersuineq tamatigut siulliunneqartanngimmat, Jesusip pingaarnersiuilluni tulleriiaarinera pissutiginiagaalu tikkuaratsigik ingasappallaarpa? (Lúkarse 10:1-9) Arlaleriarluni ajoqersuineq ajorunnaarsitsinermit siulliullugu eqqaaneqarajummat suusupagisariaqanngilaq. Tulliuttut ataqatigiinneri maluginiakkit. Jesusip apustilit aqqaneq-marluk aallartinngitsiarneranni inuppassuit atugaat pissutigalugit nalligingaalerpai. Atuarpugut: ’Jesusip illorpassuallit nunaqarfinnguillu tamaasa angalaffigai, naalagiartarfiini ajoqersuisarluni iivangkiiliulu naalagaaffimmik oqaluussissutigalugu, inuillu nappaataat nalinginnaat ajuutaallu nalinginnaat katsorsarpai. Inuppassuillu takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut. Taava ajoqersukkani oqarfigai: „Katersugassat amerlaqaat, sulisussalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.“’ — Matîuse 9:35-38.
12. Jesusip apustilillu tupinnartuliortarneri aamma sumik allamik siunertaqarpat?
12 Jesus ilagigamikku apustilit Kristusip isumaa pigiliulluarsinnaavaat. Paasivaat inuit asassagunikkik misiginneqatigalugillu Guutip naalagaaffia oqaluussissutigisariaqaritsik — tassaassaaq ajunngitsuliornerisa pingaarnerpaat ilaat. Taamaattumik ajorunnaarsitsillutik ajunngitsulioraangamik naalliuttut ikiuinnarnagit aamma allamik naammassisaqartarput. Pissusissamisoorpoq ajorunnaarsitsinerit tupinnartuliornikkullu nerisitsinerit amerlasuunit malugineqarmata. (Matîuse 4:24, 25; 8:16; 9:32, 33; 14:35, 36; Juánase 6:26) Tupinnartuliat tamakku inuit timikkut iluaqutigaat, aammali takunnittut ilaasa paasilerpaat Jesus tassaasoq Guutip ernera tassaallunilu „pruffiiti“ Mosesip saqqummertussatut siulittuutigisimasaa. — Juánase 6:14; 5 Moses 18:15.
13. 5 Moses 18:18 naapertorlugu pruffiitip saqqummertussap suna sulissutigissavaa?
13 Sooq malugisariaqarparput Jesus tassaasoq pruffiiti siulittuutigineqartoq? Pruffitip taassuma suliassaanut atassuteqarpoq. Tupinnartuliorluni ajorunnaarsitsisutut imaluunniit kaattunik nerisitsisutut ilisimaneqalertussaava? 5 Moses 18:18-imi ima siulittuuteqarpoq: „Pruffiitimik ilittut ittumik saqqummersitsiniarpunga inuiaqataasa ilaannik. Uanga oqaasissiorumaarpara, oqaasereqqusakkalu tamaasa taakkununnga oqaatigiumaarpai.“ Apustilit misigissutsinik itisuunik ersersitsisarnissamut ilinniartillutik aammattaaq Kristusitut isumaqassagunik oqaluussisariaqarlutillu ajoqersuisariaqarnertik paasivaat. Tassaavoq allanut pitsaanerpaamik iliuuserisinnaasat. Taamaalillutik nappaatillit piitsullu ataavartumik pilluaqquneqarsinnaapput, nerisassanik ikittunik imaluunniit inuunerup sivikitsup ingerlanerani ikiorneqaannarnatik. — Juánase 6:26-30.
Ullumikkut Kristusitut isumaqarneq ineriartortiguk
14. Kristusitut isumaqarnerput kiffartornitsinnut qanoq sunniuteqassava?
14 Arlaannarpulluunniit Kristusitut isumaqarnerup ineriartortinnissaata taamaallaat ukiuni hundredelinni siullerni Jesusimut ajoqersukkanullu Paulusip ima allaffigisimasaanut pingaaruteqartoq isumaqanngilaq: ’Uagulli Kristusip isumaanik peqarpugut.’ (1 Korintumiut 2:16) Uagulli paasivarputtaaq nutaarsiassaq nuannersoq oqaluussissutigisariaqarlugu ajoqersuganngortitsisariaqarlutalu. (Matîuse 24:14; 28:19, 20) Ajunngissaqaarli eqqarsaatigilaarutsigu oqaluussinitsinnut sunik pissutigisaqarnerluta. Pisussaaffittuinnaq isigisariaqanngilarput. Guutimut asanninneq kiffartuussinermut peqataanitsinnut pissutaasut pingaarnerit ilagaat, Jesusilu ilaassagutsigu allanut misiginneqataanitta aamma oqaluussinissamut ajoqersuinissamullu killitsittariaqarpaatigut. — Matîuse 22:37-39.
15. Sooq misiginneqataaneq pissusiua oqaluussisartunut pingaaruteqartoq?
15 Miserratigineqarsinnaanngilaq isumaqatiginngisavut, ingammik soqutiginninngitsut, ilassiortuunngitsut inussiarninngitsullu, misiginneqatiginissaat tamatigut piuminartuunngitsoq. Tullitsinnulli asanninneq misiginneqataanerlu annaagutsigik, aammattaaq kristumiutut kiffartornermut peqataanissamut pissutigisarput pingaartoq annaasinnaavarput. Qanoq ililluta misiginneqataaneq ineriartortissinnaavarput? Jesusitut inoqativut isumaqarfigisariaqarpavut. Taassumunga inuit ’paarinerlugaallutillu isumakkiigaapput savatut paarsisoqanngitsutut’. (Matîuse 9:36) Inuppassuit ullumikkut atugarisaat taamatut oqaatigineqarsinnaannginnerpat? Eqqunngitsumik upperisarsiornikkut siuttut paarinerlussimavaat anersaakkullu tappiitsunngortillugit. Taamaattumik unnersuussineq pitsaasoq Biibilimeersoq naluaat, pissutsillu paratiiserpalaartut Guutip naalagaaffiata qanittukkut nunarsuarmi atuutilersitassai tusarsimanagit. Ulluinnarni ajornartorsiutit assoruutigisarpaat — ilaatigut piitsuussuseq, ilaqutariit avissaartuuttut, nappaatit toqulu — Guutip naalagaaffianik neriuut ilisimanagu. Uagut taakkua pisariaqartitaannik peqarpugut — Guutip naalagaaffia maanna qilammi pilersinneqareersoq pillugu nutaarsiassaq nuannersoq inuunermik annaassisinnaasoq.
16. Sooq nutaarsiassamik nuannersumik allanut oqaluusserusussuseqartariaqarpugut?
16 Eqqarsaatigigutsigu inuit avatangiisivut qanoq anersaakkut nerisassanik pisariaqartitsitigisut, sapinngisamik iliuuseqarusulinnginnerpugut Guutip asannittumik siunertaanik oqaluttuunniarlugit? Aap, misiginneqataanitta iliuuseqartittarpaatigut. Jesusitut inuit misiginneqatigigaangatsigik nipitsigut, kiinatsigut ajoqersuinitsigullu ersissaaq. Tamakku tamarmik tusarliussarput inunnut ’inuunermik naassaanngitsumik pissaqaqqusaasunut’ kajuminnarnerulersissavaat. — apustilit suliait 13:48.
17. (a) Qanoq takutissinnaavarput allat asallugillu misiginneqatigigivut? (b) Sooq ajunngitsuliorneq allanulluunniit oqaluusseqataaneq apeqqutaanngillat?
17 Asanninnerput misiginneqataanerpullu soorunami inooriaasitsinni ersertariaqarpoq. Tassa imaappoq inuit naalliuttut, nappaatillit, piitsut inussiarnerfigisariaqarpavut — ingasaassiniarnatali naalliuutaasa millisinnissaannut sapinngisamik iliuuseqartariaqarpugut. Tamatuma kingunerivaattaaq asasaminnik toqusoorsimasut oqaatsikkut iliuutsikkullu tuppallersarniarnissaat. (Lúkarse 7:11-15; Juánase 11:33-35) Kisianni asanninnermut, inussiarnernermut misiginneqataanermullu ersiutaasut taakku uatsinnut pingaarnerpaalertariaqanngillat, soorlu ullumikkut ajunngitsuliorusuttut ilaannut pingaarnerpaalersimasut. Pissutsit qulaani taaneqartut Guutimeersut killissutigalugit kristumiutut oqaluussinermut ajoqersuinermullu peqataagaangatta killeqanngitsumik iluaqutaasinnaasunik naammassisaqartarpugut. Eqqaamajuk Jesus juutit upperisarsiornikkut siuttui pillugit ima oqarmat: ’Naatsiiat akusat qasilitsuaqqallu kumaasallu qulinginik tunniussisarassi, inatsisit pisariaqarnerusortaat isumakkeerlugit, uku: eqqartuussisissaq isumassuinerlu ilumoornerlu. Tamakku naammassillugit ikkulu isumakkeernagit pisariaqarpoq.’ (Matîuse 23:23) Jesus oqanngilaq inuit timikkut pisariaqartitaasa matussutissinnissaat anersaakkulluunniit inuussutissanik piviusunik ilinniartinnissaat arlaat qinissagipput. Jesusip tamaasa sulissutigai. Ersaripporli oqaluussineq salliutikkaa taamaalillunimi inuit ataavartumik ikiorsinnaagamigit. — Juánase 20:16.
18. Kristusitut isumaqarnerup sunaassusianik paasisaqarnitta sumut kajumissaassavaatigut?
18 Qujamasungaarsinnaavugut Jehovap paasitissimammatigut Kristusitut isumaqarneq qanoq paasisariaqartoq. Iivangkiiliut ikiortigalugit inuup inuit inuusimasut pingaarnerpaartaata kinaassusianik paasisaqarnerusinnaavugut, eqqarsaatai, misigissusii, pissusii, suliai suullu pingaarnerutinnerai. Biibilimi Jesus pillugu allanneqarsimasut uagut nammineq atuarlugit eqqarsaatigalugillu maleruarsinnaavavut. Eqqaamajuk Jesus suliaasigut ilaassagutsigu siullermik taassumatut eqqarsarneq, misigineq pingaarnerutitaalu ilinniartariaqarivut, inuttut naammalluinnanngitsutut sapinngisavut naapertorlugit. Taamaattumik aalajangerniarta Kristusitut isumaqarneq pigiliunniarlugu iliuutitsigullu takutillugu. Allamik pitsaanerusumik inooriaaseqanngilaq, inuit allamik pitsaanerusumik iliorfigisinnaanngilavut, Jesusillu naammalluinnartumik maligassiatut uagut allallu allatut pitsaanerusumik qanimut attavigisinnaanngisarput tassaavoq Guuterput asannittoq Jehova. — 2 Korintumiut 1:3; Eprîarit 1:3. (wE 15/2 2000)
Qanoq akissavigit?
• Biibilip Jesusip naalliuutilinnik ikiuikulanera pillugu sumik paasitippaatigut?
• Jesusip ajoqersukkaminut suna erseqqissarpaa?
• Qanoq erserpa ’Kristusitut isumaqartugut’?
[Qupperneq tamakkerlugu asseq]
[Qupp. 26-mi assiliartaq]
Kristumiut qanoq ilillutik allat pitsaanerpaamik ikiorsinnaavaat?