Kuisissallutit sumik akornuteqarnerpit?
’Takuat aana imeq; kuisissallunga sumik akornuteqarnerpunga?’ — apustilit suliait 8:36.
1. Aqqusinermi Jerusalemip Gazallu akornanniittumi susoqarpa?
JEHOVAP inngilia oqalussimavoq, maannalu aqqummi puilasuitsukkoortumi Jerusalemimiit Gazamut ingerlasumi maluginiarnartumik pisoqalerpoq. Qamutimini ingerlasumi issialluni Ætiopiamiu Allakkanik Illernartunik atuarpoq. Angut alla qamutit ingiaqatigalugit arpalerpoq. ’Atuakkatit paasivigit?’ aperivoq. Ætiopiamiup akivaa: ’Ajoqersorneqanngikkuma qanoq ilillunga paasissavakka?’ Iivangkiiliumik oqaluutiginnittup Filipip, inngilimit aallartitaasup, ajoqersulerpaa. Qamutinut ikilluni siulittuut Esajasip allagaa aallarniutigalugu Filipip ’iivangkiiliu Jesusimik’ oqaluussissutigaa.
2, 3. (a) Ætiopiamiup tusagassaq nuannersoq qanoq qisuariarfigaa? (b) Pisimasup tamatuma apeqqutit suut apeqqutaalersippai?
2 Ingerlatillutik Ætiopiamiu pilerpoq: ’Takuat aana imeq; kuisissallunga sumik akornuteqarnerpunga?’ Taava qamutit unitseqquai. Marluullutik imermut aqqarput Filipillu Ætiopiamiu kuivaa. Tamanna pereermat Jehovap anersaavata iivangkiiliumik oqaluutiginnittoq allamukartippaa, Ætiopiamiulu tipaatsulluni ingerlaqqippoq. — apustilit suliait 8:26-39.
3 Jehovap Nalunaajaasui ilagisarukkit sulili kuisimanak, oqaluttuap tamatuma immaqa ima aperilersissavaatit: Suna pillugu Ætiopiamiu ingerlaannaq kuisippa? Kuisinneq qanoq ingerlanneqartussaava? Sumut assersuutaava? Uanga kuisissallunga sumik akornuteqarnerpunga?
Kuisiaarpallaanngitsoq
4. Ætiopiamiu taanna kinaava?
4 Ætiopiamiup ’palloriartorluni Jerusalemiliarsimanerata’ ersersippaa kipineqarsimalluni juutinut ilanngussimasuusoq. ’Kunngimut kiffarsuuvoq,’ tassaananilu timimigut angutaassutaajagaq, angutimmi angutaassutaajagaasut Israelikkut ilagiissaannut ilannguteqqusaanngillat. (5 Môrsase 23:1) Atorfikkaajuvorli, tassaagami ’Ætiopiap kunngiata arnap Kandakep pissaaneqartitaa, aningaasaataanik tamanik paarsisoq’. — apustilit suliait 8:27.
5. Suna pissutaalluni kunngip kiffarsua Ætiopiamiu taama kuisiaartigisinnaasimava?
5 Ætiopiamiu taanna juutiunani inuiannit allaneersuuvoq. Juutisulli upperisaqalersimasuugami Naalagaaffik pillugu tusarliussaq Guutimik nalusunut kipineqarsimanngitsunut, soorlu ukiumi 36-mi u.n.a.k. Korneliusimut, suli tusarliunneqanngitsoq, Kristusimut ajoqersukkatut kuisissinnaatitaavoq. Juutinut ilanngussimasuugami Ætiopiamiu Guutimik taassumalu oqaasianik ilisimasaqarpoq, anersaakkulli ikiorneqarnissani pisariaqartissimavaa. Taamaattumik Filip aallartinneqarpoq angut taanna oqaluussiffigiartoqqullugu, sulilu tusagassap nuannersup Guutimik nalusunut tusarliunneqanngikkallarnerani kuisinnaasimallugu.
Kristumiut siulliit kuissutaat
6. Ætiopiamiu qanoq ililluni kuisippa, tamatumunngalu akissutit qanoq tunngavilersinnaaviuk?
6 Ætiopiamiu qanoq ililluni kuineqarpa? Oqaatsip „kuisinneq“-up grækerisuua baptiʹzō isumaqarpoq „misunneq, morsunneq“. Septuaginta-mi grækerisuumi oqaaseq oqaatsimut tamatumunnga assingusoq kúnginik agdlagkat áipait 5:14-imi atorneqartoq tassaavoq ’misuppoq’. Aammattaaq malugisariaqarpoq Filipilu ’imeqarfik tikikkamikku’ Ætiopiamiu kuisinnissaminik qinnuteqarmat. Kuisinniassammat marluullutik ’imermut aqqarput’ kingornatigullu ’imermit qaqillutik’. (apustilit suliait 8:36-39) Taamaattumik imermut morsutsitaalluni Ætiopiamiu kunngip kiffarsua kuisippoq.
7. Siornatigut pisimasup suup takutippaa ajoqersukkanik imermut kuisineq ileqquusimasoq?
7 Aammattaaq Jesus nammineq imermut morsutsitaalluni kuisissimavoq. Jordanip kuussuani kuisereerami ’imermit qaqivoq’. (Matîuse 3:13, 16) Jordanip qooruata ilaa Salemip eqqaaniittoq kuisisarfissaalluartutut Johannes Kuisisup qinersimavaa. Sooq? ’Tassani imeqaqimmat.’ (Juánase 3:23) Imeqarluartumi kuisittoqartarnissaq Bibelimut naapertuuttuuvoq.
8. Kuisinneq eqqarsaatigalugu farisiiarit juutillu allat ileqquinit suna paasineqarsinnaava?
8 Farisiiarit juutillu allat ileqqutoqaat misissorutsigik kuisinnermut tunngasunik paasissutissarsiffigisinnaavavut. Iivangkiiliumik allattoq Markus ima allappoq: ’Niueriartortarfimmit angerlaraangamik nerisarinngillat kisianni asaqqaarlutik [grækerisut: rhantiʹzō, tassa serparterillutik], allanillu qassiinik ileqqorsiaqarput aalajangiussaminnik: ermutsit qummuattallu puuguttallu kanngussaasut nallartarfiillu asanneqassasut [baptismousʹ, tassa morsunneq].’ (Mákorse 7:3, 4) Angutit taakku niueriartortarfimmit angerlaraangamik neritinnatik peqqissaartumik assatik serpartartarpaat. Nerinermili atortussat assigiinngitsut imermut morsutsittarpaat.
9. Tertullianip kuisinneq qanoq oqaatigaa?
9 Allaat tunussinersuup aallartinnerata kingorna ilagiinni ajoqersuisuuneq Tertullian (160-230 u.n.a.k. missaanni inuusimasoq) kuissut pillugu ima allappoq: „Guutip naammassisaasa pilimanngissusii suliatigut ersersinneqartut, kingunerinut angingaartunut neriorsuutigineqartunut naleqqiukkaanni, inunnut paasissaanngeqateqanngillat. Inuk taama pilimanngitsigisumik, alutornangaassuseqarani, immikkut ittumik piareersaateqanngitsumik akeqanngitsumillu, imermut misunneqartoq, taavalu amerlanngitsunik oqaaseqarfigineqarluni serpartarneqartoq qaqinneqarlunilu — immannguaannaq ipeqannginnerulluni, imaluunniit ipeqannginnerunani — uppernanngingajappoq tamatuma kingunerisaanik naassaanngitsumik inuuneqarsinnaatitaassammat.“ Malugeriaruk Tertullian allammat inuk „imermut misunneqartoq, taavalu . . . qaqinneqarluni“.
10. Kristumiut kuissutaat siullerpaaq pillugu immikkut ilinniarsimasut qanoq oqaaseqarpat?
10 Immikkut paasisimasallit assigiinngitsut miserratiginngilaat kristumiut siulliit imermut morsutsitsillutik inunnik kuisisarmata. Atuakkami qinerlerfissiami ilisimaneqarluartumi franskisuumi ima allassimasoqarpoq: „Kristumiut siulliit sumiluunniit imeqarfiusumi imermut morsutsitaallutik kuisittarput.“ Aammalu The Catholic Encyclopedia-mi ima allassimasoqarpoq: „Kuissut nalinginnaasoq siullerpaaq qularutissaanngivissumik tassaavoq imermut morsutsitaaneq.“ — Atuagaq II, qupperneq 261, (1907-imi naqitigaq).
Ajoqersuineq kuisinerlu
11. Jesusip ajoqersukkani sumik peqquai?
11 Kuisitsinnani inuk eqqortumik ilisimasaqalersariaqarpoq ilisimasanilu naapertorlugit iliuuseqartariaqarluni. Taamatut ittussaanera erseqqissarneqarpoq Kristusip ajoqersukkaminut oqaasiinit ukunannga: „Taamaattumik aallaritsi inuillu inuiannit tamaneersut ajoqersuganngortissigik, Ataatap Ernerullu anersaallu iluartup aqqanut kuillugit, ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ — Matîuse 28:19, 20, NV.
12. ’Ataatap aqqanut’ kuisinneq qanoq paasisariaqarpa?
12 „Ataatap . . . aqqanut“ kuisinneq tassaavoq Guutip inissisimaffia oqartussaaneralu kuisikkusuttup paasillugit akuerisimagai. Jehovap ’nunarsuarmi tamarmi Qutsinnerussaartuunera’, Pinngortitsisuunera aammalu qilammi nunamilu tamarmi Kisimi Oqartussaanera kuisikkusuttup akuerisimavai. (Tussiaat 36:10; 83:19; 2 kúngit 19:15) Aammattaaq kuisikkusuttup Jehova Eqqartuussisimisut, Inatsisimisut Kunngimisullu ilassigaa. — Isaia 33:22; Tussiaat 119:102; sarĸúmersitat 15:3, 4.
13. ’Ernerup aqqanut’ kuisinneq qanoq paasisariaqarpa?
13 ’Ernerup aqqanut’ kuisinneq tassaavoq Kristusip inissisimaffia oqartussaaneralu kuisittup akuerigai, paasigaalu taanna aqqutigalugu Guuti ’pissuseqataasumik utertitsissutissaqartitsisimasoq’. (NV) (1 Timûtiuse 2:5, 6) Jesusip assuarnaassutsiminik aalajangiussilluni toqunerata kingornagut ’Guutip taanna akitsingaartippaa’, kuisikkusuttullu akuerisariaqarpaat Kristus tassaasoq ’Naalagaasoq, Guuti Ataataq naalannarseqqullugu’. (Filípimiut 2:9-11) Aammattaaq Jesus Jehovap ’nalunaajaasuatut ilumoortutut’ aamma ’kunngit kunngiattut’ ilassisariaqarpaat. — sarĸúmersitat 1:5; 19:16.
14. ’Anersaap iluartup aqqanut’ kuisissagaanni suna pisariaqarpa?
14 Inuk aammattaaq ’anersaap iluartup aqqanut’ kuisittariaqarpoq. Paasisariaqarpaa anersaaq iluartoq kinaassusiliunngitsuusoq, tassaasorli Guutip pissaanera sulissutiginnittartoq, pinngortitsinermigut, Bibelimik allattunik isumassarsisitsinermigut ilaallu ilanngullugit atortorisaa. (1 Môrsase 1:2; 2 Sâmuale 23:1, 2; 2 Pîtruse 1:21) Akuerisariaqarpaa Jehovap anersaavata ikiuineratigut aatsaat ’Guutip itissusiinik’ paasisaqarniarsinnaasugut Guutillu iluarisaanik inerititaqarsinnaalluta makkuninnga: „Asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq, imminut naalakkersorsinnaaneq.“ (1 Korintumiut 2:10; Galâsiamiut 5:22, 23, NV) Paasisariaqarpaattaaq Guutip anersaavata ikiuineratigut aatsaat Naalagaaffimmik oqaluussissutiginninneq naammassiniarneqarsinnaasoq. — Jûîtdle 3:1, 2.
Kuisinneq sumut assersuutaasoq
15. Suna pillugu kristumiutut kuisinneq ajortinik peersitsisuunngila?
15 Anersaap iluartup siulersuineratigut Johannes Kuisisoq inunnik imermut morsutsitsisarpoq. (apustilit suliait 13:24) Ajortaat peerniarnagit, allamilli isumataarsimanerannut assersuutaasumik, kuisarpai. (apustilit suliait 19:4) Johannesip aammattaaq Jesus ’ajortulinngitsoq’ kuivaa. (1 Pîtruse 2:22) Aamma Ananiasip Saul Tarsusimiu ima kajumissaarpaa: „Nikuigit, kuisinniarit taassumalu [Jesusip] aqqanik torlorfiginninnikkut ajortitit piiarlugit.“ (apustilit suliait 22:12-16, NV) Tassa kristumiutut imermut morsutsitaalluni kuisinnikkut ajortit piiarneqarneq ajorput. Kuisinnerunngitsukkut, Jesusilli aavata kuutsinneqarsimaneratigut taassumalu ’aqqanik torlorfiginninnikkut’ inuk ajortiminik isumakkeerfigineqarsinnaavoq. — Eprîarit 9:22; 1 Juánase 1:7.
16. (a) Kuisinneq ajortinik peersitsisuunngimmat, taava sumut assersuutaava? (b) Assersuutitut oqaatigalugu inuk kuisikkaangat susoqartarpa?
16 Kristumiutut kuisinneq naak ajortit piiarneqaatiginngikkaluaraat, taamaattoq inuup imermut morsutsinneqartup Jesus Kristus aqqutigalugu Jehova Guutimut nangaassuteqarnani tunniulluinnarsimaneranut assersuutaavoq. (Naleqqiuguk Matîuse 16:24.) Guutimut tunniulluinnarnermigut inuk aalajangerpoq nangaanngivilluni silarsuarmit avissaarumalluni Kristus aqqutigalugu Guutip piumasaanik naammassinninniarluni. Kuisittup imermut morsutsinneqarluni „ilineqarnermigut“ taavalu imermit qaqitinneqarnermigut, inooriaaserisimasaa toquvorlusooq inooriaatsimullu nutaamut, Guutip piumasaanik nangaanani naammassinninniarnissaminut, makititaalluni. — Naleqqiuguk Rûmamiut 6:4-6.
17. Naalungiarsunnik kuisineq sooq kukkusuua?
17 Kuisinneq alloriarneruvoq pingaartorujussuaq. Naalungiarsunnik kuisineq kukkuneruvoq, naalungiarsuimmi paasinnissinnaanngillat, aalajangiisinnaanngillat ajoqersuganngorsinnaanatillu. (Matîuse 28:19, 20) Filip Samariami oqaluussimmat kuisittut tassaanngillat naalungiarsuit tassaallutilli ’angutit arnallu’. (apustilit suliait 8:4-8, 12) Ilinniarnissaminnut, uppertunngornissaminnut suliamikkullu uppernerminnik ersersitsisinnaanissaminnut naammattumik utoqqaassuseqartut taamaallaat kuisissinnaapput. (Juánase 17:3; apustilit suliait 5:14; 18:8; Eprîarit 11:6) Tamanna pillugu inuiaat oqaluttuarisaanerannik atuakkiortoq, August Neander, ima allassimavoq: „Upperneq kuisinnerlu imminnut atajuaannarsimapput; ilimanarluinnarporlu . . . naalungiarsunnik kuisineq [ukiuni hundredelinni siullerni u.n.a.k.] atorneqarsimanngivissoq. . . . Naalungiarsunnik kuisisarnerup aatsaat ukiut hundredellit pingajuanni apustilinit ajoqersuutigineqartutut isigineqalersimanera apustilinit atorneqarsimaneranut uppernarsaataanani atorneqarsimannginneranut uppernarsaataaneruvoq.“ — History of the Planting and Training of the Christian Church by the Apostles (New York, 1864), qupperneq 162.
18. (a) Bibeli naapertorlugu Jehovamut Nalunaajaasunngorusukkaanni suut piumasarineqarpat? (b) Uppernermut ersiutaasut suut inuup kuiseriaannaaneranik nalunarunnaarsitsisuuppat? (c) Utertitsissummik upperfiginnittariaqarneq kuisittussanut qanoq erseqqissarneqartarpa?
18 Bibelimi uppertut kuisinnerat eqqartorneqaqattaarpoq. (apustilit suliait 4:4; 5:14; 8:13; 16:27-34; 18:8; 19:1-7) Taamaattumik Jehovamut Nalunaajaasunngorusukkaanni uppertuusariaqarpoq — uppernermik ersersitsisariaqarpoq kuisittariaqarlunilu. Allaat kuisinnerup siornagut upperneq ersersinneqartarpoq Guutimik mianerinnilluni ileqqoqarnikkut, Jehovamik tatiginninnikkut, Naalagaaffik pillugu oqaluusseqataanikkut, Jesusillu utertitsissummik pilliutaaneranik ilassinninnikkut. Utertitsissummik upperfiginninnerup pingaaruteqassusia kuisinniartunut erseqqissarneqartarpoq oqalugiartup ima apeqquteqarneragut: „Jesus Kristusip pilliutaa tunngavigalugu ajortuliatit peqqissimissutigaagit, Jehovamullu tunniulluinnarsimavit taassuma piumasaa naammassiumallugu?“ Kuisinniartoq angeruni aatsaat, tunniulluinnarnermigut kuisinnermigullu Guutip peqatigiissortai, anersaamigut siulersugai, peqatigalugit kiffartorumalluni Jehovap Nalunaajaasuisa ilaattut isigineqalernissani akueriguniuk aatsaat imermut morsutsinneqarsinnaanngorpoq.
Qinunikkut tunniulluinnarneq
19. Jehovamut tunniulluinnarneq suna pillugu qinunikkut pisariaqarpa?
19 Kuisittut Guuti Kristusilu upperfigisariaqarpaat. Soorli Jehovap Nalunaajaasui oqartarpat inuk qinunikkut Guutimut tunniulluinnartariaqartoq? Inuup Jehovamut qinutilluni taassuma piumasaatut tamakkiisumik taassumunnga tunniussimanissaminik aalajangiussisimanerminik oqaatiginninnissaa tulluarmat. (5 Môrsase 5:8, 9; 1 nalunaerssûtigdlit 29:10-13) Qularnanngitsumik qinunikkut Jesusip Ataatani qilammiusoq kisiat illernartumik kiffartorfigerusullugu nalunaarfigaa. (Eprîarit 10:7-9) Allaat kuisinnermi nalaani Jesus qinuvoq! (Lúkarse 3:21, 22) Taamaattumik inuup Guutimut tunniulluinnarnissaata qinunikkut pisariaqarnera erseqqippoq.
20. Ajoqersuganngorlaat qinunikkut Guutimut tunniulluinnarnissaannik kristumiunit siullernit kaammattorneqartarsimanerat suna pillugu naatsorsuutigineqarsinnaava?
20 Ajoqersuganngorlaat qinunikkut tunniulluinnarnissaannik kristumiunit siullernit qularnanngitsumik kajumissaarneqartarput, kingusinnerusukkullumi Tertullian ima oqarsimavoq: „Kuisinniartut iisinnginniarlutik seeqqumiarlutillu qinusariaqartarput.“ Tamatuma siornagut Justinus Martyr (100-165 missaanni u.n.a.k. inuusimasoq) ima allassimavoq: „Aammattaaq oqaluttuarissavara Kristusimi nutaanngoreersimanitsinni qanoq ililluta Guutimut tunniulluinnarsimanerput . . . Ajoqersuutigisatta oqaatsittalu ilumoortuunerannik qularutiginninngitsut upperfiginnittullu, tamakkulu naapertorlugit inuussallutik aalajangersimasut, ajoqersorneqarput peqatigalugit uagut qinutillutalu iisinnginniartilluta qinullutik iisinnginniarlutillu ajortuliarisimasaminnik isumakkeerfigineqaqqullutik Guutimut saaffiginninnissaannik.“
21. Ukiut arlallit matuma siornagut qinunikkut Guutimut tunniulluinnarnissap pingaaruteqassusia suli erseqqissaatigineqanngikkallarmat kuisissimaguit qanoq iliortariaqarpit?
21 Ukiut arlallit matuma siornagut, qinunikkut tunniulluinnarnissap pingaaruteqassusia erseqqissaatigineqanngikkallarmat, illit kuisissimaguit imaattariaqanngilaq illit kuisinnerit atorsinnaanngitsoq. Qularnanngitsumik ilarpassuavut angutitut, ukiut 40-t matuma siornagut nukappiaraatilluni seeqqumiarluni ilungersorluni qinunikkut Jehovamut tunniulluinnarsimanerminik eqqaamannittutut, iliorsimassapput. Kuisinnivilli siornagut Guutimut tunniulluinnarlutit qinusimaninnik eqqaamanninngikkuit, qularnanngivissumik ullormi kuisiffinni aalajangersimanerit qinunikkut Guutimut nalunaarutigisimassavat, kuisinniartunut oqalugiarnermi kuisittussat tusarnaartullu qinoqatigiinnerisa nalaani.
Sooq ilaat kuisikkumanngitsut
22. Suna pissutigalugu inuit ilaat kuisinnissaminnut nangaappat?
22 Tunniulluinnarsimalluni Jehovamut nalunaajaasuuneq immikkut pisinnaatitaaffiummat pilluarnangaartoq, soormi taava ilaat kuisikkumanngillat? Piviusumik asannissuseqannginnertik ilaatigut pissutigalugu inuit ilaat Guutip oqaasia maleruarusunnagu Jesusillu maligassiaa malikkusunnagu kuisikkumanngillat. (1 Juánase 5:3) Inuit kuisimanngitsut Jesusip maligassiaanik malinnikkusunnginnertik Guutimullu naalakkusunnginnertik oqaatigineq ajorajuppaat. Imaannerusarporli: silarsuarmut tunnganerusut ulapputigingaaramikkik anersaamut tunnganerusut piffissaqarfigerpianngilaat. Illit taamaakkuit, silatusaarnerussannginnerpa allanik nutaanik nuannarisaqalerlutillu soqutigisaqalerlutillu anguniagaqaleruit? Guutimik asannilluartut tamanna ilutigalugu silarsuarmik matuminnga asannissinnaanngillat. (1 Juánase 2:15-17) ’Pisuussutinit salloqittagaallutit’ illit piviusuunngitsumik toqqissisimalernaveerit. (Matîuse 13:22) Jehova Guutimut tunniulluinnarsimalluni attaveqaruni aatsaat inuk piviusumik toqqissisimalersinnaavoq. — Tussiaat 4:8.
23. Allat suna pissutigalugu Jehovamut tunniulluinnarumanngikkallarpat kuisikkumanatillu?
23 Inuit allat Guutimik asanninnerartarput kisianni tunniulluinnarumanatik, isumaqaramik taamaalillutik akisussaaffik pinngitsoorsinnaallugu suliaminnillu nassueqqusaassanatik. Paratiisimi inoorusukkaluarput, mannali tikillugu tamatuminnga angusinissaminnut annikitsuinnarmik iliuuseqarsimallutik, imaluunniit iliuuseqanngilluinnarsimallutik. (ússatit 13:4) Inuilli taamaattut akisussaaffik pinngitsoorsinnaanngilaat, tassami Jehovap oqaasianik tusagaqaqqaarnerminniilli akisussaaffeqalerput. (Hisĩkiale 33:7-9) Tunniulluinnarsimagaluarunik Guutip piumasaanik paasinnissimanerminnik naammassinninniarusunnerminnillu ersersitsissagaluarput. Taamaalillutik Guutimut naalannertik akisussaaffeqarnerulissutiginagu Jehovamit pilluaqquneqarnerulissutigissagaluarpaat, taassuminngalu asanninnerarnertik naapertorlugu inuulernertik nuannaarnerulissutigissagaluarlugu.
24. Sulilu inuit allat suna pissutigalugu kuisikkumanngillat?
24 Sulili inuit allat kuisikkumanngillat isumaqaramik Bibelimik nassuiaanissaminnut ilisimasakippallaarlutik. Kunngilli kiffarsua Ætiopiamiu qamutimini ingerlatillutik Filip oqaloqatigereerlugulu tunniulluinnarsimanini ersersikkumallugu kuisinnissaminut piareerpoq. Inuit allat sallusuissummik oqaluttuukkaangamigit aallaqqaataani apeqqutaat tamakkernagit akisinnaasimassavai. Uummataali tusakkaminik qujamasuutiginninnermik ulikkaarpoq, siooranerlu nangaassutigiumanngilaa. ’Asanninneq ersinermik ilaqanngilaq, kisianni asanninnerup naammatsittup ersineq anisittaraa.’ (1 Juánase 4:18) Akissutissanik ulikkaartumik niaqoqarnini pissutiginagu asanninnermilli ulikkaartumik uummateqarnini pissutigalugu inuk Guutimut tunniulluinnarumassaaq kuisikkumassallunilu. — Lúkarse 10:25-28.
25. Imminik asanninnerartut Jehova Guutip sumik ilimasuffigai?
25 Suli kuisimanngitsuuguit imminut ima apereriarit: Imminik asanninnerartut Guutip sumik ilimasuffigai? Tamakkiisumik tunniussimanissaat kissaatigaa, aammalu ’anersaakkut ittumik ilumoortumillu’ imminik pallorfiginnikkusuttut ujarpai. (Juánase 4:23, 24; 2 Môrsase 20:4, 5, NV; Lúkarse 4:8) Kunngip kiffarsua Ætiopiamiuusoq taama ittumik pallorfiginnippoq, kuisinnissaminullu periarfissaqalerami nangaanngilaq. Jehovamut tunniulluinnarnissat maannakkorluinnaq qinnutigalugu eqqarsaatigisariaqannginnerpiuk imminullu ima aperalutit: „Kuisissallunga sumik akornuteqarnerpunga?“ (wD 15/1 89)
Uteqqiineq
□ Kunngip kiffarsua Ætiopiamiu sooq taama kuisiaartigisinnaasimava?
□ Ajoqersuganngorlaat kristumiunit siullernit qanoq ilillutik kuineqartarpat?
□ „Ataatap, Ernerup anersaallu iluartup aqqanut“ kuisinneq qanoq paasisariaqarpa?
□ Kristumiut kuissutaat sumut assersuutaava?
□ Jehovamut tunniulluinnarneq suna pillugu qinunikkut pisariaqarpa?
□ Inuit ilaasa tunniulluinnarnissa- minnut kuisinnissaminnullu suut nangaassutigaat?