Kristusitut isumaqarpit?

’Guutip erinitsannaveersaasup tuppallersaasullu tunilisi ataasiusumik isumaliorfigeqatigeeqqullusi Kristus Jesus malillugu.’ — RÛMAMIUT 15:5.

1. Kristumiuuneraqatigiit qalipagaataanni amerlasuuni Jesus qanoq ersersinneqartarpa, sunalu pillugu ersersitsinerit taamaattut naleqquttuunngillat?

„ILLARTILLUGU takuneqarsimanngisaannarpoq.“ Jesus pillugu allagatoqqani eqqunngitsumik itsaq Romamiumit atorfilimmit allanneqarsimasuunerakkani taama allassimasoqarpoq. Eqqumiitsuliortut amerlasuut allagatoqqamit taassumannga maanna ilusini iluseralugu 1000-kkunniilli ilisimaneqartumit sunnerneqarsimanerat oqaatigineqarpoq.a Qalippakkani amerlasuuni Jesus angutitut ilungersorpasissutut qungujunngisaannartutut imalluunniit qaqutiguinnaq qungujuttartutut ersersinneqartarpoq. Jesusimilli taamatut ersersitsineq naleqqutinngilaq, iivangkiiliunimi inuttut asannittutut inussiarnersutullu itisuunik misigissuseqartutut allaatigineqarmat.

2. Qanoq ililluta Kristus Jesusip isumaata assinganik ineriartortitsisinnaavugut, taamaaliornerullu sumut ikiussavaatigut?

² Jesusip qanoq ittuusimanera paasissagutsigu isumarput uummaterpullu Jesusip nunamiikkallarami inuttut qanoq ittuusimaneranik paasissutissanik eqqortunik immertariaqarparput. Taamaattumik iivangkiiliuni oqaluttuarineqartut ilaat ’Kristusitut isumaqarneq’ — tassa misigissusiinik, paasinnittaasiinik, eqqarsaataanik tunngavilersuutaalu — paasisaqartitsisinnaasut misissoriartigik. (1 Korintumiut 2:16) Misissortillugit eqqarsaatigisinnaavarput qanoq ililluta ’ataasiusumik isumaliorfigeqatigiissinnaasugut Kristus Jesus malillugu’. (Rûmamiut 15:5) Tamatuma inuunitsinni allanullu iliuuseqartarnitsinni taassuma malinniarnissaanut ikiussavaatigut. — Juánase 13:15.

Ilassiortuunera

3, 4. (a) Pisimasup Mákorse 10:13-16-imi oqaluttuarineqartup suna tunuliaqutarivaa? (b) Jesus qanoq qisuariarpa ajoqersukkami meeraaqqat imminut ornigutsaaliniaraluarmatigik?

³ Inuit Jesusimut kajungersisinneqartarput. Inuit assigiinngitsunik utoqqaassusillit tunuliaqutaqartullu pisuni amerlasuuni ammasumik saaffigisarpaat. Malugiuk Mákorse 10:13-16-imi oqaluttuarineqartoq. Tamanna kiffartornerata naalernerani pisimavoq, naggataamik Jerusalemiliarnerani, tassani naalliutsitaangaarluni toqutaassammat. — Mákorse 10:32-34.

⁴ Qularnanngitsumik pisoq takorloorsinnaavarput: Inuit Jesus ornipaat meeraqqat, allaat naalungiarsuit, nassarlugit Jesusimit pilluaqqoqqullugit.b Ajoqersukkat meeraaqqat Jesusimut palligutitinnaveersaaraluarpaat. Immaqa isumaqarsimapput Jesus piffissami ilungersunartumi tamatumani meeqqanit akornusersorneqarumassanngitsoq. Kukkuppulli. Jesusip ajoqersukkat qanoq iliornerat paasileramiuk, iliuusaat nuannarinngilaa. Meeqqat qaaqquai oqarlunilu: ’Merlertunnguit uannut qaaginnarlit pitsaaleqinasigillu.’ (Mákorse 10:14) Taamaalioreeramilu takutippaa qanoq asannitsigalunilu isumassuitigaluni. Ima oqaluttuarineqarpoq: ’Pakkullugillu assamminik patippai pilluaqqullugillu.’ (Mákorse 10:16) Meeqqat Jesusimit asannittumit pakkunneqarnertik toqqissisimanartikkunarpaat.

5. Mákorse 10:13-16-imi oqaluttuarineqartup Jesus inuttut qanoq ittunera pillugu sumik paasitippaatigut?

⁵ Oqaluttuami naatsumi tamatumani Jesusip inuttut qanoq ittuusimaneranik paasitinneqangaarpugut. Malugiuk ilassiortuusimasoq. Naak qilammi qutsissumik inissisimaffeqarsimagaluarluni inunnut naammalluinnangitsunut ersinartuunanilu nikaginnittuusimanngilaq. (Juánase 17:5) Maluginiarnarpoq allaat meeqqat ilaginera nuannarisaraat. Angut ilasseraanngitsoq ilungersorpasippallaartoq qungujunngisaannarlunilu illarneq ajortoq ornikkusunnavianngilaat. Inuit assigiinngitsunik utoqqaassusillit Jesus saaffigisarpaat malugisinnaagamikku inussiarnersuullunilu isumassuisuusoq, qularinagulu itigartinneqassanatik.

6. Utoqqaanertat qanoq ilillutik ilassiortuusinnaappat?

⁶ Oqaluttuaq taanna eqqarsaatigigutsigu immitsinnut aperisinnaavugut: ’Uanga Kristusitut isumaqarpunga? Ilassiortuuvunga?’ Ulluni artornartuni makkunani Guutip savaataasa paarsisut ilassiortut, angutit ’anorersuarmut oqquiffiusutut’ ittut, pisariaqartippaat. (Jesaja 32:1, 2; 2 Timûtiuse 3:1) Ilissi utoqqaanertat qatanngutissinnut ilumoortumik qamannga pisumik soqutiginnittuugussi ikiorniarlugillu immissinnut tunniusimagussi, isumassuinersi malugissavaat. Isikkussinni takusinnaassavaat, nipissinni tusaasinnaallugu, iliuutsissigullu inussiarnersukkut takusinnaassallugu. Ilumoorluni inussiarnissuseq soqutiginninnerlu taamaattoq tatiginnilersitsisinnaapput, utoqqaanertanut saaffigininnissaq allanut, aamma meeqqanut, piuminarnerulersillugu. Arnap kristumiup nassuiarpaa sooq utoqqaanertaq aalajangersimasoq ammasumik oqaluffigisinnaagini: „Inussiarnersumik misiginneqataasumillu oqaluffigaanga. Taamaassimanngitsuuppat oqaaseqarsimanavianngikkaluarpunga. Toqqissisimasutut misigilersippaanga.“

Allanik soqutiginninnera

7. (a) Jesus qanoq ililluni allanik soqutiginnittuua? (b) Suna pissutigigunarlugu Jesusip angut tappiitsoq tappissisikkiartuaarpaa?

⁷ Jesus inunnut soqutiginnittuuvoq. Allat misigissusii eqqumaffigai. Nappaatilinnik takuinnarluni killinneqangaartarami ajorunnaarsinnissaanut kajumissisinneqartarpoq. (Matîuse 14:14) Aammattaaq allat amigaataat pisariaqartitaallu soqutigai. (Juánase 16:12) Ilaanni angut tappiitsoq Jesusimukaanneqarpoq, Jesusilu qinnuigaat ajorunnaarseqqullugu. Jesusip angut tappissisippaa, tappissisikkiartuaarlugulu. Siullermik angutip inuit eqqaminiittut takusinnaalaalerpai — ’inuit isigaakka angalasut soorlu orpiit,’ oqarpoq. Taava Jesusip angut tappissisilluinnarpaa. Sooq angut ajorunnaarsikkiartuaarpaa? Immaqa angut taanna taartumiinnermik sungiusimasaqartoq avatangiisit assigiinngitsorpassuit seqinnarisumiittut tassanngaannartumik takusinnaalerlugit tupigusuppallaannginnerussammat. — Mákorse 8:22-26.

8, 9. (a) Jesusip ajoqersukkallu Dekapolisimut tikinnerata kinguninngua qanoq pisoqarpa? (b) Nassuiaruk Jesusip angut tusilartoq qanoq ajorunnaarsikkaa.

⁸ Eqqaamajuttaaq ukiumi 32-mi poorskip kingorna pisimasoq. Jesus ajoqersugaalu Dekapolisimiipput, Galilæap tasersuata kangiani. Sivitsunngitsoq inuppassuit nanivaat napparsimasullu iloqiaasullu amerlasuut Jesusimukaallugit. Tamaasa ajorunnaarsippai. (Matîuse 15:29, 30) Soqutiginarpoq Jesusip taakkua ilaat ataaseq immikkut soqutigimmagu. Iivangkiiliumik allattoq Markus kisimi pisimasumik tamatuminnga oqaluttuarpoq. — Mákorse 7:31-35.

⁹ Angut tusilarlunilu oqalussinnaanngingajappoq. Immaqa annilaanganera ittoorneraluunniit Jesusip takusinnaavaa. Maanna Jesus qaqutigoorluinnartumik iliuuseqarpoq. Angut allanit nigortilaarpaa kisimiissinnaaqqullutik. Qanoq iliornialernini ussersorluni angummut takutippaa, taavalu ’assani siutaanut mannguppai, qiserlunilu oqaa attorpaa’. (Mákorse 7:33) Qilammut aarlorpoq qinorpasillunilu anersaamilluni. Iliuutsit ersarissut taakkua angut oqarfigaalusooq: ’Ilinnut iliuuserisassakka Guutip pissaanerata pisinnaalersippai.’ Naggataatigut Jesus oqarpoq: ’Ammarit.’ (Mákorse 7:34) Angut tusaasinnaaleqqippoq nalinginnaasumillu oqalussinnaalerluni.

10, 11. Qanoq ililluta ilagiinni allat misigissusii soqutigisinnaavavut? Ilaqutariinni?

¹⁰ Jesusip allat soqutiginnittuliorfigai. Misigissusii eqqumaffigai, naakkinnissusiatalu allanut qajassuartumik iliuuseqartittarpaa. Kristumiutut Kristusitut isumaqarnissaq ineriartortittariaqarparput taassumalu iliorsimaneratut allanik soqutiginnittuusariaqarluta. Biibilimi ima kajumissaarneqarpugut: ’Kiisalu tamassi isumaqatigiigitsi ilasseqatigiillusilu qatanngutigiinnillu asannillusi nallittuillusilu qanilaarlusilu.’ (1 Pîtruse 3:8) Taamaattumik soorunami oqaaseqartinnata iliuuseqartinnatalu allat misigissusii eqqarsaatigisariaqarpavut.

¹¹ Ilagiinni allat misigissusii soqutigissavavut nammineq iliorfigineqarusunnitsitut ataqqinnittumik iliorfigalugit. (Matîuse 7:12) Taamaattumik qanoq oqalunnerluta aamma qanoq oqaatiginerlugit mianersuutigisariaqarparput. (Kulorsamiut 4:6) Eqqaamajuk eqqarsaqqaarnani oqaaserisat ’panatut kapisisartut’. (Ussatit 12:18) Ilaqutariit iluanni qanoq soqutiginnittoqarsinnaava? Aappariit asaqatigiittut aappamik misigissusii malugisinnaasarpaat. (Evfisumiut 5:33) Sakkortuunik oqarnaveersaartarput, isornartorsiuingaarneq naakkittaatsumillu mitallerneq, misigissutsinut annernartut qaangeruminaassinnaasullu, atorumanagit. Meeqqattaaq misigissuseqartarput, angajoqqaallu asannittut tamanna soqutigissavaat. Perorsaatissiinissaq pisariaqarpat angajoqqaat asannittut avoqqaarinninnerup meeqqanut nikanarsaataannginnissaat ataqqissavaat, pisariaqanngitsumillu peqqusiileqitinnagit.c (Kulorsamiut 3:21) Taamaalilluta allat soqutigigutsigik Kristusitut isumaqarluta takutissavarput.

Allat tatigiumasarpai

12. Jesusip qanoq ililluni ajoqersukkat oqimaaqatigiissumik piviusorsiortumillu isumaqarfigai?

¹² Jesusip ajoqersukkani oqimaaqatigiissumik piviusorsiortumillu isumaqarfigai. Nalunngilluinnarpaa naammalluinnanngitsuusut. Inuimmi uummataat atuarsinnaavai. (Juánase 2:24, 25) Kisianni sanngiissutaat amigaataallu maluginiaannarnagit aammali pissusii ajunngitsut maluginiarpai. Inuit Jehovap kajungersitaasa periarfissaat takusinnaavai. (Juánase 6:44) Jesusip ajoqersukkanut isumalluarnartumik isiginninnera taakkununnga iliorfiginninnerani erserpoq. Assersuutigalugu taakkununnga tatiginninnini takutippaa.

13. Jesusip qanoq ililluni takutippaa ajoqersukkat tatigigini?

¹³ Jesusip ajoqersukkat tatigalugit qanoq takutippaa? Nunarsuaq qimakkamiuk ajoqersukkani tanitat annertuumik akisussaaffeqartippai. Nunarsuaq tamakkerlugu naalagaaffimminut atatillugu soqutigisat pillugit akisussaaffeqartippai. (Matîuse 25:14, 15; Lúkarse 12:42-44) Kiffartornermi ingerlanerani annikitsutiguttaaq toqqaannanngitsumillu takutissimavaa tatigalugit. Assersuutigalugu tupinnartuliornikkut inuppassuit nerisikkamigit ajoqersukkani nerisassanik agguaanermik akisussaaffeqartippai. — Matîuse 14:15-21; 15:32-37.

14. Mákorse 4:35-41-mi oqaluttuarineqartoq naatsumik qanoq oqaatigissaviuk?

¹⁴ Malugiuttaaq Mákorse 4:35-41-mi oqaluttuarineqartoq. Taamani Jesus ajoqersukkallu Galilæap Tasersuagut kangimut ingerlapput. Avalassimatsiaannarlutik Jesus umiatsiap aquaniiginnarpoq itisuumillu sinilerluni. Erniinnarli ’anoraasuartorsuanngorpoq’. Anorersuit taamaattut Galilæap Tasersuani nalinginnaapput. Tatsip appasinnerunera pissutigalugu (immap qaavanit 210 meterinik appasinnerulluni) tatsip qaava avatangiisinit kiannerusarpoq, tamatumalu kingunerisaanik silaannaq tatsip qulaaniittoq allanngorsinnaasarpoq. Saniatiguttaaq Hermonip Qaqqaanit avannaaniittumit Jordanip qoorua aqqusaarlugu sakkortuumik anorlertarpoq. Anoreqanngikkaluarluni tassanngaannaq sakkortuumik anorlileriataarsinnaavoq. Galilæami alliartorsimagami Jesusip qularnanngitsumik nalunngilaa qanoq akulikitsigisumik anorersuartartoq. Taamaattoq sininniarluni innarpoq. Tatigaa ajoqersukkat, ilaat aalisartuusut, ajornartorsiuteqalissagunik isumagisinnaagaat. — Matîuse 4:18, 19.

15. Jesusip ajoqersukkaminut tatiginnikkusunnera qanoq ilaarsinnaavarput?

¹⁵ Jesusip ajoqersukkaminut tatiginnikkusunnera malinniarsinnaavarput? Ilaasa akisussaaffimmik allanut tunniussinissartik ajornakusoortittarpaat. Akisussaaffik kisimiillutik tigummerusunneruaat. Immaqa ima eqqarsarput: ’Iluamik iliortoqassappat nammineq isumagisariaqarput!’ Isumaqaruttali suut tamaasa nammineq naammassisariaqarivut sulinermit inuunerput naalisarsinnaavarput, immaqalu pisariaqanngikkaluartumik ilaquttavut ilaginngitsoorlugit. Aamma immaqa allat pisariaqartumik misilittagaqalernissaminnut ilinniartitaanissaminnullu, naleqqulluartumik suliassinneqaratillu akissussaaffilerneqanngikkunik periarfissinneqanngitsuussapput. Allat tatiginissaat suliassinnissaasalu ilinniarnissaat silatusaarnerussaaq. Taamaattumik ilumoorluta immitsinnut ima aperisariaqarpugut: ’Tamanna eqqarsaatigalugu Kristusitut isumaqarpunga? Suliassat aalajangersimasut allanut tunniunnissaat piumassuseqarfigaara sapinngisaminnillu iliussasut tatigalugit?’

Jesusip tatiginninnini ajoqersukkaminut ersersippaa

16, 17. Naak nalunngikkaluarlugu apustilit qimassagaanni Jesusip nunami inuunermini unnuk kingulleq sumik neriorsoqqissaarpai?

¹⁶ Jesusip aamma pingaaruteqartukkut allakkut takutippaa ajoqersukkani isumalluartumik isumaqarfigigini. Paasitippai tatigalugit. Tamanna nunami inuunermini unnuaq kingulleq apustilinut oqaasiini eqqissiallannartuni erserpoq. Malugiuk qanoq pisoqartoq.

¹⁷ Jesus unnuk taanna ulappippoq. Apustilini maniguunnermik ilinniartippai isigaat asallugit, tamatumalu kingorna unnukkorsiortitsineq toqunerminik eqqaasitsisussaq pilersillugu. Taava apustilit kina arlartik annerunersoq assortuussutigeqqingaalerpaat. Jesusip kamagittartuartup avoqqaarinngilai eqqarsalersinniarlugilli. Pisussamik oqaluttuuppai: ’Unnuk manna tamassi mamiatsaatigiumaarpassinga, allassimammat. „Paarsisoq patikkumaarpara, savallu unguukkat siammarumaarput.“’ (Matîuse 26:31; Sakarja 13:7) Nalunngilaa suleqatimi qaniginerpaasa piffissami artornartumi tamatumani qimassagaanni. Avoqqaarinngilaali. Akerlianik ima oqarfigai: ’Makereerumali siulerissavassinga Galilæamut.’ (Matîuse 26:32) Naak qimakkaluaraanni nammineq qimanniarnagit neriorsoqqissaarpai. Misilinneqarneq annilaarnartoq tamanna qaangiuppat kingumut naapeqqinniarpai.

18. Galilæami Jesusip ajoqersukkat sumik pingaartumik suliassippai, tamannalu apustilinit ilassineqarpa?

¹⁸ Jesusip neriorsuutini eqqortippaa. Kingusinnerusukkut Jesus makissimasoq Galilæami apustilinut aqqanilinnut ilumoortunut, qularnanngitsumik amerlasuunit ilagineqartunut, saqqummerpoq. (Matîuse 28:16, 17; 1 Korintumiut 15:6) Taamani Jesusip pingaartumik suliassippai: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit.“ (Matîuse 28:19, 20, NV) Biibilimi apustilit suliánik agdlagkat takutippaat apustilit tamatuminnga suliniuteqalersut. Ukiuni hundredelinni siullerni aalajaallutik nutaarsiassamik nuannersumik oqaluussinermi siuttuusimapput. — apustilit suliait 2:41, 42; 4:33; 5:27-32.

19. Jesusip makititaanermi kingorna iliornerata ’Kristusitut isumaqarneq’ pillugu sumik ilinniartippaatigut?

¹⁹ Oqaluttuap imaqarluartup tamatuma kristusip isumaanik sumik paasitippaatigut? Jesusip apustilit sanngiissutaat nalunngilai, taamaakkaluartoq ’naggatissamut allaat asavai’. (Juánase 13:1) Naak kukkusaraluartut paasitippai tatigigini. Malugiuk Jesusip tatiginninnera pakatsisinneqanngitsoq. Tatiginninnermik takutitsivigimmatik qularnanngitsumik uummatikkut aalajangerluinnarnissaminnut suliareqqusaata suliarinissaanut kajumissisinneqarput.

20, 21. Qanoq ililluta takutissinnaavarput uppeqativut isumalluartumik isumaqarfigigivut?

²⁰ Qanoq ililluta takutissinnaavarput tamanna eqqarsaatigalugu Kristusitut isumaqartugut? Uppeqativut isumalluanngitsumik isumaqarfigissanngilavut. Ajornerpaamik ilimagisaqartoqarpat oqaasiisigut iliuusiisigullu saqqummernissaat ilimanarpoq. (Lúkarse 6:45) Biibilimili ima paasitinneqarpugut: ’Asannittoq tamatigut upperaraaq.’ (1 Korintumiut 13:7) Asanninneq isumalluartuuvoq, ajortumik eqqarsarneq ajorpoq. Aserorterinani ineriartortitsisarpoq. Inuit asanninneq qiimmassaanerlu sukannissutsimit ajunnginnerusumik qisuariarfigisarpaat. Allat nakussatsinneqarsinnaapput kajumissaarneqarsinnaallutillu tatiginninnermik ersersitsiviginerisigut. (1 Tásalûníkamiut 5:11) Kristusitut qatanngutivut isumalluarnartumik isumaqarfigigutsigik ineriartuutissaannik ajunngitsuliornissamullu kajumississutigisaannik iliorfigissavavut.

²¹ Kristusip isumaanut assingusumik isumaqarneq pigiliukkiartussagutsigu Jesusip iliuusiisa maliinnarnissaat naammanngilaq. Soorlu allaaserisami siuliani eqqaaneqartoq taassumatut iliuuseqassagutta taassumatut isiginnittaaseqarneq ilinniartariaqarparput. Iivangkiiliut ikiorpaatigut kinaassusianut tunngasunik allanik paasinninnissatsinnut, tassa suliassiissutigineqartumut atatillugu eqqarsaatai misigissusiilu paasisinnaallugit. Allaaserisami tulliuttumi tamanna sammineqassaaq. (wE 15/2 2000)

[Quppernerup ataani ilanngussaq]

Uku nassuiarsinnaavigit?

• Jesus qanoq qisuariarpa ajoqersukkami meeraaqqat imminut palligutitinnaveersaaraluarmatigik?

• Jesusip qanoq takutippaa allat soqutigalugit?

• Jesusip ajoqersukkaminut tatiginnikkusunnera qanoq ilaarsinnaavarput?

• Qanoq ililluta Jesusip apustilinut tatiginninnera malinniarsinnaavarput?

[Qupp. 17-mi assiliartaq]

Meeqqat Jesusip najornera toqqissisimanartippaat

[Qupp. 18-mi assiliartaq]

Jesusip allat misiginneqataanermik takutitsivigisarpai

[Qupp. 19-mi assiliartaq]

Utoqqaanertat ilassiortut nuannaarutigineqarlutillu iluaqutigineqartarput