Jesusip inuunera ajoqersuineralu

Jesusip Kanami tupinnartuliornerisa aappaat

JUDÆAMI oqaluussinermik annertuumik suliaqareerluni Jesus najukkaminut uterami siunertarinngilaa suliami unitsinnissaa. Suliassarli suli annerusoq nunagisamini Galilæami aallartippaa. Ajoqersugaasali najorunnaarpaat. Ilaquttatik suliarisimasatillu uterfigeqqippaat.

Tusarliussaruna suna Jesusip oqaluussissutigileraa? Tusarliussaq manna: ’Guutip naalagaaffia qanillivoq. Allamik isumataaritsi tusagassarlu nuannersoq upperisiuk.’ Inuit qanoq qisuariarpat? Galilæamiut Jesus ilassilluarpaat. Tamanit nersugaalerpoq. Tusarliussaali pissutiginerullugu nersugaalinngilaq, qaammataalunnguilli sioqqullugit Jerusalemimi poorskimi nalunaaqqutiliai eqqumiitsut pinerullugit inuit ilaannit nersugaalerpoq.

Jesusip Galilæami oqaluussinini annertooq illoqarfimmi Kanami aallarnersimannguatsiarpaa. Eqqaamassannguatsiarpat Jesusip, Judæamut utereerluni, tamaani katittorsiortunut ilaatilluni imeq viinninngortikkaa. Tamatumuuna Kunngi Herodes Antipasip atorfilittaasa ilaat meeraqarpoq napparsimasorujussuarmik. Atorfillip taassuma tusaramiuk Galilæamit Kanamut Jesus tikissimasoq, najukkaminit Galilæamit, aqqussua tamaat atorlugu, aallarpoq nanerusullugu. Aliasuppaloqaluni qinorpaloqalunilu oqarfigaa: ’Qitornara toqunngikkallartillugu tasamunnarna.’

Jesusip akivaa: ’Angerlaannarit, ernerit ajorunnaarpoq!’ Herodesip atorfilittaata taanna upperaa aqqussualu sivisoqisoq atorlugu angerlamut aallarluni. Aqqutaani kiffaasa parsiarpaat; tuaviorsimapput nalunaarfiginiarlugu suut tamarmik ajunngitsut — ernera ajorunnaarsimasoq! ’Qanga ajorunnaarpa?’ aperai.

’Ippassaq nalunaaquttap akunnerisa arfineq-aappaata nalaani,’ akivaat.

Atorfillip nalunngilaa nalunaaquttap taamaalineranerpiaq Jesus ima oqartoq: ’Ernerit ajorunnaarpoq!’ Tamatuma kingorna angut taanna inoqutaalu tamarmik Kristusimut ajoqersuganngorput.

Kana, Jesusip Judæamit uternini takutinniarlugu marloriarluni tupinnartuliorfigisimasamisut, pingaarnerutitarilerpaa. Soorunami manna tikillugu tupinnartuliarisimasai marluinnaanngillat, taakkuli marluk immikkut ittuupput Galilæamut uternera ersersikkamikku.

Maanna Jesus Nazaretimut angerlamut aallarpoq. Pisussap suup taavani utaqqivaa? Johannes 4:43-54; Markus 1:14, 15; Lukas 4:14, 15. (wD 1/2 86)

◆ Jesus Galilæamut utermat ajoqersugai suppat, qanorlu inuit Jesus ilassivaat?

◆ Jesus sumik tupinnartuliorpa, tupinnartuliaanillu nalaanneqartut qanoq qisuariarpat?

◆ Kana qanoq ililluni Jesusimit pingaarnerutitaalerpa?

[Qupperneq 8-mi tamakkerlugu asseq]