Atuartartut apeqqutaat

Kristumiutut kuisittoqarnerani qanoq pissusilersortoqartariaqarpa?

Apeqqut tamanna tamatsinnut soqutiginarpoq, aamma kuisereersimasunut. Siullermik imermut morsutsitaanikkut kuisittut eqqartoriartigik. Taakku qanoq pissuseqartariaqarpat?

Matîuse 28:19, 20-mi Jesusip ajoqersukkani peqquai aallaqqullugit inunnillu allanik ajoqersuganngortitsiortoqqullugit, inuit ajoqersorlugit kuillugillu. Kuisinneq pisutut killitsisimaarnersuaqarfiusutut eqqaanngilaa, sivikitsuinnarmik persuarsiutissatut eqqartornagu. Jesusip maligassiaatigut erserpoq kuisinneq alloriarnerusoq asuleerussassaanngitsoq. Lúkarse 3:21-mi ima allassimavoq: ’Jesusilu kuisimmat qinummallu, taava qilak ammarpoq.’ Aap, maligassatta annerpaap kuisinneq asuleerussassaanngitsutut isigaa. Takorloorsinnaanngilarput taanna kuisikkami ajugaasimaarpalulluni arlaannik ussersorsimassasoq, imaluunniit ajugaasimaarpalulluni nillersimassasoq, soorlu ukiuni kingulliunerusuni ilaat taamaaliortarsimasut. Aap, Jesusip Ataatani qinunikkut saaffigaa, Johannes kisimi najuutsillugu.

Aammali Biibilimi oqaatigineqanngilaq kuisinneq tassaassasoq pisoq avaanngunartoq nikallunganartorluunniit. Timikkut aalajangersimasumik pissusilersuuteqarneq imaluunniit oqaatsit aalajangersimasut alanngaarlugit oqartarnerat, soorlu kristumiuuneraqatigiit ilagiivisa ilaanni ileqqorineqartartut, pisariaqanngillat. Ukiumi 33-mi piinsip ulluani pisimasut eqqarsaatigeriakkit, juutit juutillu upperisaannut ilasiat tuusintilikkuutaat kristumiutut kuisimmata. Guutip inatsisai atuaqqissaareersimallugit taanna attaveqarfigilereersimavaat. Maanna Messias, Jesus, pillugu ilinniartariaqarput taannalu akuerisariaqarlugu. Taamaaliorunik kuisissinnaapput.

apustilit suliait 2:41-mi Ny Verden-nutsigaq naapertorlu allassimavoq ’oqaasianik kajumillutik ilassinnittut kuisissimasut’. Malunnarluarpoq alloriarneq tamanna nuannaarlutik naammassisimagaat, nutsikkanilu arlalinni tamanna ersersinneqarpoq. Nutaat Messias pillugu nutaarsiassaq nuannersoq nuannaarutigisimavaat, qularnanngitsumillu nuannaarneq tamanna kuisinnermi malunnarpoq, nalunanngitsumik arlalinnik hundredelinnik nuannaartunik isiginnaartoqarlutik. Aamma inngilit qilammit isiginnaarsimapput nuannaaqataallutillu. Eqqaamakkit Jesusip oqaasii uku: ’Ajortuliortoq allamik isumataartoq ataaseq Guutip inngiliini tipaatsuutigineqarumaarpoq.’ — Lúk. 15:10.

Kuisittoqarnermi tamatta assigiinngitsutigut nuannaarnerput ilungersornerpullu takutissinnaavavut. Oqaluffeqarfiit ilaanni kuisittussat qaqortunik qernertunilluunniit atisaqartarput. Biibilimili taamatut piumasaqaateqarneq nassaassaanngilaq. Kisianni nalunnguffasit paquminartut, angutit imaluunniit arnat atortagaat, soorunami naleqqussanngillat. Soorlulu eqqaaneqareersoq kuiserlaaq ajugaasimaarpasittumik ussersortariaqanngilaq. Qatanngutigiit kristumiut takunnittut kuisittoqarnera nuannaarutigaat. Kuiserlaap paasisariaqarpaa uppernermik takussut tamanna tassaasoq Guutimut iluarisaajumalluni assuarnaatsuliortarnissamini alloriarneq aallaqqaataanaasoq. — Matîuse 16:24.

Uagut kuisinnermut najuukkaangatta kuisittut nuannaaqatigisarpavut, ingammik qanigisarput atuaqqissaaqaterpulluunniit kuisippat. Nuannaarnerli tamaat peqataaffigiumallugu kuisinnermut oqalugiaat tamaat tusarnaaqqissaartariaqarparput, kuisittut apeqqutinut akinerat tusarnaarlugu qinunermullu peqataalluta. Taamaaliorutta kuisinneq eqqortumik isigissavarput, Guutip isiginninneratut isigilerlugu. Nuannaarnerput ersersinniarlugu ajugaasimaarpaluttumik iliuuseqartariaqanngilagut, naasunik tunissuteqartariaqanngilagut imaluunniit kuisinneq festissutigisariaqarnagu. Pitsaassaarli kuisittoq ornissallugu, aalajangerneranik nuannaarutiginninnitsinnik ersersitsivigalugu, aammalu kristumiunut qatanngutigiissuarnut tikilluaqqullugu.

Naatsumik oqaatigalugu tamatta, aamma kuisittut, kuisinnermut atatillugu ilumoorsaassutsimik naleqquttumik ersersitsisariaqarpugut. Kuisinneq misigissutsinik ingasattajaarluni ersersitsiffiusussaanngilaq, festerfiusussaanani imaluunniit ingasattorsuarmik qiimasuffiusussaanani. Aammali tassaanngilaq pisoq alianartoq. Nutaat inuunermut naassaanngitsumut aqqummut ingerlaqatigilermatigut nuannaarnissamut pissutissaqarpugut. Nuannaarlutalu qatanngutitaavut tikilluaqqusinnaavavut. (wE 1/4 95)

[Qupperneq 31-mi tamakkerlugu asseq]