Qitornat amerlasuut Jehovap naalannarsiartortippai
’Taassuma [Guutip] qitornat amerlasuut naalannarsiartortissagamigit, ileqqussaraa annassimanissaannik aallarniisoq anniarnikkut inersimatissallugu.’ — EPRÎARIT 2:10.
1. Sooq qularinngissinnaavarput Jehovap inuannut siunertaa naammassineqarumaartoq?
JEHOVAP nunarsuaq inuiaat naammalluinnartut nuannaarlutik naassaanngitsumik inuuffigisassaattut pinngortissimavaa. (Nalunaajaasup oqaasii 1:4; Jesaja 45:12, 18) Siuaasattali Adamip ajortuliorami ajortimik toqumillu kingornussitippaatigut. Taamaattorli Guutip inuiannut siunertaa kinguaassaq neriorsuutigisaq, Jesus Kristus, aqqutigalugu naammassineqarumaarpoq. (1 Moses 3:15; 22:18; Rûmamiut 5:12-21; Galâsiamiut 3:16) Inuiaat asagamigit Jehovap ’ernitui tunniuppaa kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. (Juánase 3:16) Jesusillu nammineq asanninneq killissutigalugu ’inuunini akissatut tunniuppaa amerlasuut utertinneqaatissaannik’. (Matiuse 20:28) ’Utertitsissut’ tamanna ikiortigalugu pisinnaatitaaffiit periarfissallu Adamip annaasimasai tamaasa pigileqqissinnaavavut naassaanngitsumillu inuuneq angusinnaallugu. — 1 Timûtiuse 2:5, 6; Juánase 17:3.
2. Israelitoqqami ullormi saammaannartitsivimmi pisarsimasut qanoq ilillutik Jesusip utertitsissutitut pilliutaata atuunnissaanut siumut assersuutaasimappat?
2 Jesusip pilliutaa utertitsissutaasoq ullormik saammaannartitsivimmik ukiumoortumik siumut assersuutigineqarsimavoq. Ullormi tamatumani Israelitoqqami palasiunerup ussik ajortaaruteqqussutitut pilliutigisarpaa aavalu illernartuummi, kingusinnerusukkullu naalaffimmi, Illernarnerpaami angerutsip illerfianut serpartartarlugu. Nammineq, ilaquttami naggueqatigiillu Levikkuusut iluaqutissaannut taamaaliortarpoq. Tamatumunnga assingusumik Jesus Kristusip aammi nalinga Guutimut sassaappaa siullermik anersaakkut ittunik ’qatanngutimi’ ajortuliorsimanerisa matoorneqaatissaannut. (Eprîarit 2:12; 10:19-22; 3 Moses 16:6, 11-14) Ullormi saammaannartitsivimmi palasiunerup aamma savaasaq ajortaaruteqqussutitut pilliutigisarpaa aavalu Illernarnerpaamut sassaattarlugu, taamaalilluni Israelikkut naggueqatigiissortaasa palasiunngitsut 12-iusut ajortaat pillugit saammaannartillugit. Jesus Kristusip palasiunertut tamatumunnga assingusumik aanni inuiaat uppertut iluaqutissaannut atussavaa ajortaat peerluinnarlugit. — 3 Moses 16:15.
Naalannartitaaneq
3. Eprîarit 2:9, 10 naapertorlugu Guutip ukiut 1900-it ingerlaneranni suna naammassiartorsimavaa?
3 Ukiut 1900-t ingerlaneranni Guuti Jesusip ’qatanngutai’ eqqarsaatigalugit maluginiarnartumik iliuuseqartarsimavoq. Tamanna pillugu Paulus ima allassimavoq: ’Innali inngilinit minnerutitaallatsiaraluartoq, Jesus, isigaarput toqutitaanermigut naalannaammik ataqqinaammillu niaqorusersimasoq, Guutip saammaassineragut toqu ooqattaassagamiuk tamaasa pillugit. Taannami [Jehova Guuti] pillugu suut tamarmik tassaammata, taassumuunalu suut tamarmik tassaammata, taassuma qitornat amerlasuut naalannarsiartortissagamigit, ileqqussaraa annassimanissaannik aallarniisoq anniarnikkut inersimatissallugu.’ (Eprîarit 2:9, 10) Annannissamik aallarniisoq tassaavoq Jesus Kristus, taannalu nunarsuarmi inuttut inuugallarami anniartitaanermigut naalannermik ilikkarpoq. (Eprîarit 5:7-10) Jesus siulliulluni Guutip anersaakkut erneratut kinguaassiarineqarpoq.
4. Qanga qanorlu ililluni Jesus Guutip anersaakkut erneratut kinguaassiarineqarpa?
4 Anersaani illernartoq, tassa pissaanini sulisoq, atorlugu Jehovap Jesus anersaakkut ernermisut kinguaassiaraa qilammi naalannarsisitaanissaa siunertaralugu. Jesus Johannes kisimeeqatigitillugu imermut morsulluni kuisippoq taamaalilluni takutillugu Guutimut imminut sassaalluni. Iivangkiiliu Lukasip allagaa naapertorlugu imaappoq: ’Pivorli inuit tamarmik kuisimmata, Jesusilu kuisimmat qinummallu, taava qilak ammarpoq, anersaarlu illernartoq tuisut isikkoqarluni qulaanut aqqarpoq, nipilu qilammit tutsiuppoq: „Illit tassa ernera asanartoq, illit nuannaraakkit.“’ (Lúkarse 3:21, 22) Johannesip anersaaq illernartoq Jesusimut aqqartoq takuaa tusarlugulu Jehovap taanna ernermisut asanartutut ammasumik nalunaarutigigaa. Taamani anersaaq illernartoq ikiortigalugu Jehovap Jesus ’qitornat amerlasuut naalannarsisitaasussat’ siullersaattut kinguaassiaraa.
5. Kikkut siulliullutik Jesusip pilliutaa iluaqutigaat, taakkualu qassiuppat?
5 Jesusip ’qatanngutaasa’ siulliullutik taassuma pilliutaa iluaqutigaat. (Eprîarit 2:12-18) Apustili Johannesip takorruuisitaanikkut takuai taakkua qilammi Zionip qaqqaani qeqartut, Savaaraq, Naalagaq Jesus Kristus makititaasimasoq, ilagalugu. Johannesip aamma eqqaavaa taakkua qassiunersut ima oqarluni: ’Takunnikkamalu, ata, savaaraq Zionip qaqqaani qeqartoq, ilagigaalu untritilinnik sisamanillu qulilinnik sisamanillu tuusintillit [144.000-it], aqqanik Ataataatalu aqqanik qaarmikkut allanneqartut. . . . Taakku inunnit immikkoortillugit Guutimut savaaqqamullu naaqqaataallutik pisiaapput. Sallunermillu qanermiugisaqartillugit malugineqanngillat, assuarnaatsuugamik.’ (sarĸúmersitat 14:1-5) Taamaattumik qilammi ’qitornat amerlasuut naalannarsisitat’ 144.001-innaassapput — Jesus taassumalu anersaakkut qatanngutai.
’Guutimit erniusut’
6, 7. Kikkut ’Guutimit erniuppat’, tamannalu taakkununnga sumik nassataqassava?
6 Jehovamit kinguaassiarineqartut ’Guutimit erniupput’. Taakku apustili Johannesip ima allaffigisimavai: ’Kinaluunniit Guutimit erniusoq ajortimik ileqquliunngilaq, kingunissiaa taassumaniittuarmat; ajortuliorsinnaanngilarlu Guutimit erniugami.’ (1 Juánase 3:9) ’Kingunissiaq’ tamanna tassaavoq, Guutip anersaava illernartoq, Guutip oqaasia ikiortigalugu 144.000-inik tamanik ’ernioqqissitsisoq’ qilammi inuunissamik neriuuteqalersillugit. — 1 Pîtruse 1:3-5, 23.
7 Jesus inuttut inunngorami Guutip erneraa, soorluttaaq Adam naammalluinnartoq ’Guutip ernerisimagaa’. (Lúkarse 1:35; 3:38, NV) Maluginiarnartuuvorli Jesus kuisereermat Jehova nalunaarmat: ’Illit tassa ernera asanartoq nuannarisara.’ (Mákorse 1:11) Anersaap illernartup Jesusimut kuineqarnerani nalunaarutip tamatuma takutippaa Guutip pisumi tamatumani Jesus anersaakkut ernermisut erniutikkaa. Allatut oqaatigalugu Jesus taamani ’ernioqqissinneqarpoq’ qilammilu anersaatut Guutip erneratut inooqqissinnaatitaalerluni. Taanna assigalugu qatanngutai 144.000-iusut aamma ’ernioqqipput’. (Juánase 3:1-8; Takuuk Vagttårnet, 15. novembari 1992-imoortoq, qupperneq 3-6.) Jesusitut Guutimit tanitaapput nalunaarullu nuannersoq oqaluussissutigissallugu suliassinneqarlutik. — Jesaja 61:1, 2; Lúkarse 4:16-21; 1 Juánase 2:20.
Guutimit kinguaassiarineqarnermut uppernarsaat
8. Qanoq takutinneqarpa Jesus ajoqersugaalu siulliit anersaamit kinguaassiarineqarsimasut?
8 Jesusip Guutip anersaavanit kinguaassiarineqarsimanera uppernarsaatissaqarpoq. Johannes Kuisisup takusimavaa anersaaq Jesusimut aqqartoq tusarsimallugulu Guuti nalunaarmat Messias anersaakkut ernerigini. Jesusilli ajoqersugaasa qanoq ilillutik nalunngissinnaavaat anersaamit kinguaassiarineqarlutik? Jesus qilalialerluni ima oqarpoq: ’Johannes imermik kuisigaluarmat ilissi anersaamik illernartumik kuineqarumaarpusi ullut amerlanngitsut qimmuuppata.’ (apustilit suliait 1:5) Ukiumi 33-mi u.n.k. ullormi piinsimi Jesusip ajoqersugai ’anersaamik illernartumik kuineqarput’. Anersaaq kuineqarmat ’tassanngaannaq ittuppaluk qilammit pivoq, soorlu anorersuaq pitorartoq’ aamma ajoqersukkanut tamanut ’oqqat nuungajuttuut innerinnaasullusooq takutipput’. Immikkut maluginiarnartumik ajoqersukkat maanna ’oqaatsinik allanertanik oqalulerput, soorlu anersaap oqalutsikkaatik’. Taamaalilluni takussaasumik tusarsaasumillu uppernarsaatissaqarpoq Kristusip ajoqersugaasa Guutip qitornaatut qilammi naalannarsisitaanissamut periarfissaqalernerannut. — apustilit suliait 2:1-4; 14-21; Joel 3:1, 2.
9. Qanoq takuneqarsinnaava ukiuni hundredelinni siullerni Samariamiut, Kornelius allallu anersaamit illernartumit kinguaassiarineqarsimasut?
9 Tamatuma kingorna Filipip Samariami nutaarsiassaq nuannersoq oqaluussissutigaa. Tusarliussaa Samariamiut ilassivaat kuisillutillu, kisianni Guutip qitornaatut kinguaassiarineqarnerannut takussutissaqanngikkallarpoq. Apustilit Peter Johannesilu qinummata uppertullu taakku assamminnik patillugit ’anersaaq illernartoq pigilerpaat’ takunnittut paasisinnaasaannik. (apustilit suliait 8:4-25) Taamaalilluni uppernarsarneqarpoq Samariamiut uppertut Guutip qitornaasut anersaamit kinguaassiarineqartut. Tamatumunnga assingusumik ukiumi 36-mi u.n.k. Kornelius juutiunngitsullu allat sallusuissut Guutimeersoq ilassivaat. Peterip juutillu uppertut ilagisaasa tupigusuutigaat ’anersaap illernartup tunissutaa Guutimik nalusunuttaaq kuisaammat, tusaramikkik oqaatsinik allanertanik oqaluttut Guutilu naalannartikkaat’. (apustilit suliait 10:44-48) Ukiuni hundredelinni siullerni kristumiut amerlasuut ’anersaap tunissutaanik’, assersuutigalugu oqaatsinik allanertanik oqalussinnaanermik, tunineqarsimapput. (1 Korintumiut 14:12, 32) Taamaattumik taakkua qulakkeersinnaavaat anersaamit kinguaassiarineqarsimallutik. Kristumiulli tamatuma kingorna inuusut qanoq ilillutik nalunngissinnaavaat anersaamit kinguaassiarineqarsimanerlutik?
Anersaap nalunaajaataa
10, 11. Rûmamiut 8:15-17 tunngavigalugu qanoq nassuiarsinnaaviuk anersaap Kristusip kingornusseqatai nalunaajaaqatigigai?
10 Kristumiut tanitaasut 144.000-it tamarmik paasitinneqarluinnarsimapput Guutip anersaava pigilersimallugu. Tamanna pillugu Paulus ima allassimavoq: ’Ilissi . . . qitornaasutut anersaaqartitaavusi; taassumuuna torlulavugut: „Abba, Ataataq!“ Anersaap taassuma anersaarput nalunaajaaqatigaa Guutip qitornarigaatigut. Qitornaaguttali kingornussisussaavuguttaaq, Guutimit kingornussissalluta Kristusilu kingornusseqatigissallugu; massami naallioqatigigutsigu taava naalannarseqatigissavarputtaaq.’ (Rûmamiut 8:15-17) Kristumiut tanitaasut qitornaasutut Ataatartik qilammiusoq attaveqarfigaat, nalunagu Guutip qitornarigaatik. (Galâsiamiut 4:6, 7) Qularinngilluinnarpaat Guutimit kinguaassiarineqarsimallutik qilammilu Naalagaaffimmi Kristus kingornusseqatigissallugu. Tamatumani Jehovap anersaava illernartoq immikkut pingaaruteqarpoq.
11 Guutip anersaavanit illernartumit sunnerneqarlutik tanitat namminneq anersaakkut, imaluunniit isumakkut, kajumissisinneqartarput Guutip oqaasiani qilammi inuunissamik neriuut pillugu allassimasut ajunngitsumik qisuariarfigeqqullugit. Assersuutigalugu Biibilimi Jehovap anersaakkut qitornai pillugit atuaraangamik paasisarpaat namminneq pineqarlutik. (1 Juánase 3:2) Nalunngilaat ’Kristus-Jesusimut kuisimallutik’ toquneranullu kuisimallutik. (Rûmamiut 6:3) Qularinngilluinnarpaat Guutip anersaakkut qitornarigaatik, Jesusitullu toqusussaallutik qilammilu naalannarsisitaanermut makititaassallutik.
12. Kristumiut tanitat Guutip anersaavanit sumik tunineqarsimappat?
12 Anersaakkut qitornatut kinguaassiarineqarneq inuup nammineq ineriartortissinnaanngilaa. Anersaamit kinguaassiarineqartut qilammi inuunermut makititaanissamik kissaateqarnerat pissuteqanngilaq nunarsuarmi annikilliornartunik isumatsaatiginninnerannik. (Job 14:1) Akerlianik, Jehovap anersaavata ilumut tanitaasut neriuuteqartilersimavai kissaateqartilersimallugillu inuit nalinginnaat kissaatiginngisaannik. Anersaamit kinguaassiarineqarsimasut nalunngilaat ikinngutit ilaquttallu pilluartut ilagalugit nunarsuarmi paratiisiusumi naassaanngitsumik inuunissaq nuannerluinnassasoq. Inuunerli taama ittoq kipisaginngilaat. Kristumiut tanitaasut qilammi inuunissamik ima kissaateqartigigamik nunarsuarmi inuunissaq periarfissallu tamatumunnga atasut kajumillutik taamaatippaat. — 2 Pîtruse 1:13, 14.
13. Korintumiunut agdlagkat áipait 5:1-5 naapertorlugu Paulusip suna kajungeraa, tamatumalu tanitat pillugit suna takutippaa?
13 Qilammi inuunissamik neriuut Guutimit tunniunneqartoq ima sakkortutigimmat kristumiut taakku Paulusitut misigipput, taanna allassimammat: ’Ilisimavugut tupeq nunami inigisarput ingutserneqarpat Guutimit illumik assannik sanasimanngitsumik naassaanngitsumik qilammiittumik inissaqartugut. Tamatumanilu anersaamillaaraagut kajungeqaluta inissatsinnik qilammit pisumik atisartaarumagaluarluta, massami annoraarsimalluta tamaqanngitsuutinneqassannginnata. Uagummi tupermiusugut nanertugaalluta anersaamisarpugut, annoraajarneqarumannginnata atisartaarumallutali, toqujasoq inuunermut eeqqullugu. Uatsinnilli tamatumunngarpiaq piareersaasoq tassa Guuti, taassumalu sallunaveerummik anersaap pianik tunivaatigut.’ (2 Korintumiut 5:1-5) Paulus ’kajungeqaluni’ anersaatut toqujuitsutut qilammi inuunissamut makititaarusuppoq. Inuup timaa tupermut ingutserneqarsinnaasumut, illup ataavartup akerlianut, assersuuppaa. Kristumiut qilammi inuunissamut qularnaveeqqutitut anersaaq pigaat, nunamilu inuttut toqusussaasutut timeqaraluarlutik ’Guutimit illu’, tassa anersaatut timi toqujuitsoq aserortussaanngitsoq, pigissallugu qilanaaraat. (1 Korintumiut 15:50-53) Paulusitut ilumoorlutik oqarsinnaapput: ’Isumalluarpugut iluarinerullugulu timimit qimagusimagallarutta Naalakkamilu [qilammi] najugaqarluta.’ — 2 Korintumiut 5:8.
Angerutsinut immikkut ittunut peqataasut
14. Eqqaaniaalluni nalliuttorsiorneq pilersikkamiuk Jesusip angeruseq suna eqqaaqqaarpaa, tamatumuunalu Israelikkut anersaakkut ittut eqqarsaatigalugit suna naammassineqarpa?
14 Kristumiut anersaamit kinguaassiarineqarsimasut qularutiginngivippaat angerutsinut marlunnut immikkut ittunut peqataallutik. Jesusip aappaa eqqaavaa timiusaq seernarsaateqanngitsoq viinnilu atorlugit toqunissaminik eqqaaniaalluni nalliuttorsiorneq pilersikkamiuk ermuserlu viinnimik imalik pillugu oqarluni: ’Ermuseq manna tassa angerusisaaq aakkut pillusi kuisukkut.’ (Lúkarse 22:20; 1 Korintumiut 11:25) Kikkut angerusisaamut peqataappat? Jehova Guuti taavalu Israelikkut anersaakkut ittut, Jehovamit qilammi naalannartinneqartussat. (Jeremia 31:31-34; Galâsiamiut 6:15, 16; Eprîarit 12:22-24) Angerusisaaq tamanna Jesusip aava kuisaq tunngavigalugu atulersinneqartoq ikiortigalugu inuit Guutip aqqanut ilannguttut inuiaqatigiinnit tamanit katersorneqarput, taakkulu kristumiut anersaamit kinguaassiarineqartut Abrahamip ’kinguaavinut’ ilaatinneqarput. (Galâsiamiut 3:26-29; apustilit suliait 15:14) Angerusisaaq tamanna ikiortigalugu Israelikkut anersaakkut ittut tamarmik qilammi toqujuitsumik inuunissamut makitinneqarlutillu naalannarsisitaassapput. ’Angeruseq naassaanngitsuugami’ ataavartussanik kinguneqassaaq. Siunissami paasinarsissaaq angeruseq tamanna ukiuni tuusintini naalagaaffimmi tamatumalu kingorna allanik pingaaruteqassanersoq. — Eprîarit 13:20.
15. Lúkarse 22:28-30 naapertorlugu angerutsimut allamut sumut Jesusip ajoqersugai tanitaasut peqataalersinneqarpat, qangalu angeruseq tamanna atulersinneqarpa?
15 ’Qitornat amerlasuut’ Jehovamit ’naalannarsisitaasussat’ aamma inuttut ataasiakkaatut qilammi Naalagaaffik pillugu angerutsimut peqataatinneqarput. Jesusip ajoqersugaasalu akornanni angeruseq tamanna pillugu Jesus oqarsimavoq: ’Ilissili uanni aalajaatsuuvusi usserneqartillunga; [angerfigeqatigaassilu, soorlu Ataatama uanga angerfigeqatigigaanga, naalagaaffik pillugu, NV] nerrivinni nerillusilu imertussanngortippassi uanga naalagaaffinni issiavissaarsuarnilu issiasussanngortillusi Israelip naggueqatigiissortai aqqaneq-marluusut eqqartuussallugit.’ (Lúkarse 22:28-30) Naalagaaffik pillugu angeruseq atulersinneqarpoq ukiumi 33-mi ullormi piinsimi Jesusip ajoqersugai anersaamik illernartumik taninneqarmata. Kristusip kunngeqataasalu akornanni angeruseq tamanna naassaanngitsumik atassaaq. (sarĸúmersitat 22:5) Taamaattumik kristumiut tanitaasut qularinngilaat angerusisaamut Naalagaaffillu pillugu angerutsimut peqataallutik. Naalakkap unnukkorsiortitsinerani nalliuttorsiornermi tanitat ikittut suli nunami inuusut kisimik timiusaq, Jesusip inuttut timaanut ajorteqanngitsumut assersuutaasoq, aammalu viinni, aavanut naammalluinnartumut toqunerani kuineqartumut angerusisaamillu atulersitsisumut assersuutaasoq, ilangiiffigissavaat. — 1 Korintumiut 11:23-26; takuuk Napasuliaq Alapernaarsuiffik, 1. februaari 1990-imoortoq, qupperneq 10-13.
Qaaqqusat, qinikkat ilumoortullu
16, 17. (a) 144.000-it tamarmik naalannarsisitaassagunik qanoq iliortariaqarpat? (b) ’Kunngit qulit’ kikkuuppat, taakkualu qanoq Kristusip ’qatanngutaasa’ sinneri nunamiittut iliorfigaat?
16 Jesusip utertitsissutitut pilliutaa siullermik atorneqarpoq 144.000-it Guutip anersaavanit kinguaassiarineqarnikkut qilammi inuunissamut qaaqquneqarnerannut qinerneqarnerannullu. Naalannartitaassagunik soorunami ’ilungersortariaqarput qaaqqusimassusertik qinigaassusertillu aalajangersarlugit’, toqulu tikillugu ilumoortariaqarlutik. (2 Pîtruse 1:10; Evfisumiut 1:3-7; sarĸúmersitat 2:10) Tanitat sinneruttut suli nunami inuusut ’kunnginit qulinit’, naalakkersuinikkut pissaanilinnut tamanut assersuutaasunit, assortorneqaraluarlutik assuarnaattuarput. Inngili oqarpoq: ’Taakkua Savaaraq sorsukkumaarpaat, Savaaqqallu ajugaaffigiumaarpai, naalakkanut naalagaagami kunnginullu kunngiugami, ilagisaasalu qaaqqusat qinikkallu ilumoortullu.’ — sarĸúmersitat 17:12-14.
17 Naalakkersuisut nunamiusut Jesus ’kunnginut kunngiusoq’ ajugaaffigisinnaanngilaat, taanna qilammiimmat. Kisianni ’qatanngutaasa’ sinnerinut suli nunamiittunut akeraanertik takutittarpaat. (sarĸúmersitat 12:17) Akeqqersimaarneq tamanna Guutip sorsunnissaani Harmagedonimi soraarsinneqassaaq ’kunnginut kunngiusup’ ’qatanngutini’ — ’qaaqqusat, qinikkat ilumoortullu’ — ilagalugit akeqqersimaartut ajugaaffigippagit. (sarĸúmersitat 16:14, 16) Tamanna nalliutserlugu kristumiut anersaamit kinguaassiarineqarsimasut ulapputissaqaqaat. Ullumikkut Jehovamit naalannarsisinneqarnissartik sioqqullugu sunik suliaqarpat? (wE 15/2 98)
Qanoq akissavigit?
□ Kikkut Guutip qilammi naalannarsisissavai?
□ ’Guutimit erniuneq’ qanoq paasisariaqarpa?
□ Anersaap qanoq ililluni kristumiut ilaat ’nalunaajaaqatigai’?
□ Anersaamit kinguaassiarineqartut angerutsinut sunut peqataatinneqarpat?
[Qupp. 15-imi assiliartaq]
Ukiumi 33-mi piinsip ulluani takutinneqarpoq qilammi naalannarsisitaanissamut periarfissaq ammarneqartoq