Jesusip inuunera ajoqersuineralu

Sabbatimi suna akuerisaava?

SABBATIMI allami Jesus naalagiartarfimmut Galilæap tasiata eqqaaniittumut iserpoq. Angut assammigut talerpillikkut toqungasoq naalagiartarfimmi isersimavoq. Allakkanik ilisimasut farisiiarillu Jesus alapernaarsorpaat angut taanna ajorunnaarsissasoralugu. Naggataatigut aperipput: „Sabbatimi katsorsaalluni iluarpa [katsorsaanissaq akuerisaava, NV]?“

Uppersarsiornerup tungaatigut pisortaasut isumaqarput sabbatimi taamaallaat inuunerup navianartorsiornerani ajorunnaartitsinissaq akuerisaasoq. Assersutigalugu, isumaqarput sabbatimi niup napinikup ikkuuneqarnissaa pilluttoortulluunniit nimilerneqarnissaa akuerisaanngitsoq. Allakkanik ilisimatuut farisiiarillu Jesus taama aperaat unnerluunneqaatissarsiorlugu.

Kisianni Jesusip isumaliornerat nalunngereerpaa. Aammattaaq nalunngilaa taakku sabbatimi suliarineqaqqusaanngitsut pillugit Bibelimik tungaveqanngitsumik ingasaassisumillu isumaqartut. Taamaattumik angummut toqungasumik assalimmut Jesus oqarami: „Qaallutit sassarit,“ akerleriinneq aallartippaa.

Manna Jesusip allakkanik ilisimatuut farisiiarillu saappai oqarfigalugillu „Kia arlassi savaatituaqartup, sabbatimi itersamut nakkarpat, tigussannginnerpaa qaqillugulu?“ Sava aningaasanik naleqarmat qaqinnissaa aqaguanut utaqqisinnavianngilaat napparsimalersinnaammat naleqassutsilu katassimasinnaammagu. Aammattaaq Bibelimi allassimavoq: „Iluartup nersutaatimi piumasaat ilisarisarpai [isumagisarpai].“

Jesus nangilluni assersuusiorpoq: „Inuk savamit pingaarnerungaarpoq. Taamaattumik sabbatimi ajunngitsuliorluni iluarpoq [ajunngitsuliornissaq akuerisaavoq, NV].“ Upperisarsiornerup tungaatigut pisortaasut taamaanneraaneq tamanna naakkinnittoq tunngavissaqarluartorlu akineq sapileramikku nipanngiinnarput.

Uummataasa manngertorsuunnerat kamaatigalugulu aliasuutigalugu Jesus qinerpoq. Taava angut oqarfigaa: „Assat isatsiguk.“ Isatsippaa, assaalu kingumut ajorunnaarpoq.

Angutip assaata iluarsinnera nuannaarutiginaguluunniit farisiiarit anipput erniinnarlu Herodesip partiiata malittai ilagalugit isumalioqatigiilerput Jesus toqutsinniarlugu. Naalakkersuinikkut partii tamanna upperisarsioqatigiinnit sadukæerinit ilaasortaaffigineqannguatsiarpoq. Amerlanertigut naalakkersuinikkut partiimut tamatumunnga ilaasortaasut farisiiarillu inuit tamarmik takkuanni imminnut assortuuttuupput, Jesusimmulli assortuinerimnni isumaqatigiilluinnarput. Mattæus 12:9-14; Markus 3:1-6; Lukas 6:6-11; ússatit 12:10; 2 Môrsase 20:8-10. (wD 1/8 86)

◆ Jesusip qanoq ililluni juutit uppersarsiornerup tungaatigut pisortai akiuuteqatigilerpai?

◆ Jesusip sabbatimi ajorunnaartitsineq qanoq isigaa?

◆ Assersuut suna atorlugu Jesusip taakkua isumaatigut eqqunngitsukkut akissutissaarutsippai?