Anersaakkut ittunik pingaartitsineq ilumoortoq qanoq anguneqarsinnaava?
„UINNGUP kajungernera toqussutaavoq, Anersaalli kajungernera [Anersaamulli kajungerneq, NV] inuussutaallunilu eqqississutaavoq,“ apustili Paulusi allappoq. (Romamiut 8:6) Apustilip taamatut oqarnermigut pingaarutilik una erseqqissarpaa: Anersaakkut ittunik pingaartitsineq inuup nammineq piumanerusaanut misigissusiinulluunniit tunngassuteqaannanngilaq. Inuunermut toqumullu aalajangiisuuvoq. Inummut anersaakkut ittunik pingaartitsisumut ’inuussutaallunilu eqqississutaasoq’ qanoq paasisariaqarpa? Biibili naapertorlugu inuup anersaakkut ittunik pingaartitsisup eqqissineq — imminik Guutimillu eqqisseqateqarneq — maannakkut misigilereerpaa siunissamilu inuunermik naassaanngitsumik akissarsisinneqarumaarpoq. (Romamiut 6:23; Filippimiut 4:7) Tupinnanngilaq Jiisusi ima oqarmat: „Pilluarput anersaakkut pisariaqartitaqarnerminnik miserratiginninngitsut“! — Matthæusi 5:3, NV.
Atuagassiap uuma massakkorpiaq atuarneratigut takutippat anersaakkut ittut soqutigigitit — tamannalu isumatusaarneruvoq. Anersaakkulli ittunik pingaartitsineq pillugu isummat assigiinngitsut amerlaqimmata immaqa ima eqqarsarputit: ’Anersaakkut ittunik pingaartitsineq ilumoortoq suua? Qanorlu ililluni anguneqarsinnaava?’
’Kristusip isumaa’
Inuup anersaakkut ittunik pingaartitsisuunerata qanoq pingaaruteqartigineranik iluaqutaatigineranillu tikkuaanermi saniatigut, apustili Paulusi anersaakkut ittunik pingaartitsinerup ilumoortup suunera pillugu oqaasissalerujussuuvoq. Kristumiunut itsaq illoqarfiusumi Korinthimiittunut nassuiarpaa inuup tarnimut atasup, tassa inuup uinngup pilerigisaanik maleruaasup, inuullu anersaamut atasup, tassa inuup anersaakkut ittunik pingaartitsisup, assigiinngissutaat. Paulusi ima allappoq: „Inuup tarnimut atasup Guutip Anersaavanit pisut ilassisanngilai; tamanna taassumunnga sianiitsuliorneruvoq.“ Taava nangilluni allappoq inuup anersaakkut ittunik pingaartitsisup ilisarnaatigigaa ’Kristusip isumaatut’ (1900/1961) isumaqarnini. — 1 Korinthimiut 2:14-16.
’Kristusip isumaatut’ isumaqarneq isumaqavippoq ’Kristusi-Jiisusimiittutut isumaliortarneq’. (Filippimiut 2:5) Allatut oqaatigalugu inuk anersaakkut ittunik pingaartitsisoq Jiisusitut eqqarsartarpoq taassumalu tumaanik malinnittarluni. (1 Petrusi 2:21; 4:1) Isumarput Kristusip isumaanut assingunerujartortillugu, anersaakkut ittunik pingaartitsinerujartuinnassaagut, aamma ’inuussutaallunilu eqqississutaasup’ pigiliunnissaa qaninnerussavarput. — Romamiut 13:14.
’Kristusip isumaa’ qanoq ilinniarsinnaavarput
Kristusip isumaatut isumaqassagaanni nalunngeqqaartariaqarpoq. Anersaakkut ittunik pingaartitsilerniaraanni iliuuserisassaq siulleq tassaavoq Jiisusip eqqarsartaasiata ilinniarnerunissaa. Inuulli ukiut 2000-t matuma siorna inuusup eqqarsartaasia qanoq ilinniarneqarsinnaava? Aap, inuit nunagisanni itsaq inuusut qanoq ilinniartarpigit? Qularnanngitsumik taakkua pillugit atuarnikkut. Aamma taamatut Jiisusip oqaluttuarineqarnerata allataasup atuarneratigut Jiisusip isumaa ilinniarsinnaavarput. — Johannesi 17:3.
Jiisusi pillugu sisamanik oqaluttuaqarpoq, tassa iivangkiiliut Matthæusimik, Markusimik, Lukasimik Johannesimillu allagaasut. Oqaluttuat taakku peqqissaartumik atuaraanni Jiisusip eqqarsartaasia, qamuuna misigissusii iliuutsiminullu pissutigisai paasineqarnerusinnaapput. Jiisusi pillugu atuakkatsinnik eqqarsaatiginneqqissaarnissaq piffissaqarfigisarutsigu, inuttut qanoq ittuunera takorloorsinnaalissavarput. Kristusimut ajoqersugaalereersutut imminut naatsorsuukkaluaruttaluunniit, taamatut atuarneq eqqarsaatiginneqqissaarnerlu iluaqutigissavarput ’ineriartornissatsinnut saammaannermi Naalakkatsinnik annaassisitsinnillu Jiisusi-Kristusimik ilisarsinermi’. — 2 Petrusi 3:18.
Tamanna eqqarsaatigalugu Jiisusip suna anersaakkut ittunik pingaartitsisunnguutigisimaneraa paasiniarlugu iivangkiiliuni allassimasut ilaat misissoriartigik. Taava imminut aperisinnaavutit taassuma maligassiaa nammineq qanoq malissinnaanerit. — Johannesi 13:15.
„Anersaap inerititai“
Iivangkiiliumik allattoq Lukasi oqaluttuarpoq Jiisusi kuisimmat Guutip anersaava illernartoq kuineqartoq, Jiisusilu ’Anersaamik Illernartumik ilumioqangaalersoq’. (Lukasi 3:21, 22; 4:1) Jiisusip ajoqersukkaminut erseqqissarpaa aamma taakkua Guutip anersaavanit siulersortinnissaasa pingaaruteqarnera. (Lukasi 11:9-13) Sooq taama pingaaruteqartigaa? Guutip anersaavata inuup isumaa Kristusip isumaanut assingulersillugu allanngortissinnaammagu. (Romamiut 12:1, 2) Anersaap illernartup ineritittarpai pissuserineqartussat soorlu „asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq“. Pissuserineqartussat taakkua Biibilimi ’anersaap inerititaanik’ taaneqartut inuup anersaakkut ittunik pingaartitsisup ilisarnaatigai. (Galatiamiut 5:22, 23) Naatsumik oqaatigalugu inuk anersaakkut ittunik pingaartitsisoq tassaavoq Guutip anersaavanit siulersortittoq.
Jiisusi kiffartornini naallugu anersaap inerititaanik ersersitsivoq. Pissuserineqartussat soorlu asanninneq, inussiarnersuuneq ajunngitsuunerlu pingaartumik ersersittarpai inunnut inuiaqatigiinni appasissumik inissisimasunut pinneriaatsimigut. (Matthæusi 9:36) Assersuutigalugu pisimasoq apustili Johannesip eqqaasaa malugiuk. Ima allassimavoq: „Jiisusip ingerlatilluni takulerpaa inuk inunnguutsiminiilli tappiitsuusoq.“ Jiisusip ajoqersugaasa angut taanna aamma malugaat, ajortuliortutulli isigaat. Ima aperipput: „Nammineq ajortuliorsimagami angajoqqaaniluunniit ajortuliorsimammata?“ Angut saniliminit aamma malugineqarpoq, qinusartutuinnarli isigaat. Taakku ima oqarput: „Ilaa taannaana issialluni qinnuuloortartoq?“ Jiisusilli angut tappiitsoq inuttut ikiortarialittut isigaa. Angut oqaluuppaa ajorunnaarsillugulu. — Johannesi 9:1-8.
Kristusip isumaa pillugu oqaluttuaq taanna qanoq paasisaqarfigaarput? Siullermik, Jiisusip inuinnaat sumiginnartanngilai, misiginneqatigingaartarpaali. Aappassaanik, allat ikiorniarlugit siulliulluni iliuuseqartarpoq. Jiisusip maligassiaanik malinnippit? Jiisusip allanut isiginninneratut allat isigisarpigit? Pitsaanerusumik inuunissaannut siunissamullu qaamanerusumik neriuuteqalernissaannut ikiorpigit? Imaluunniit nuimasut siulliuteqqajaasarpigit, nuimanngitsullu qaangiinnaqqajaasarlugit? Jiisusip allanut isiginninneratut allat isigigukkit, taassuma maligassiaanik malinnittuusutit erseqqippoq. — Tussiaat 72:12-14.
Qinuneq
Jiisusip qinunikkut Guutimut saaffiginnikulanera iivangkiiliuni erserpoq. (Markusi 1:35; Lukasi 5:16; 22:41) Jiisusi nunami kiffartornermini qinunissaminut piffissaqartarnissani eqqumaffigaa. Ajoqersugaq Matthæusi ima allappoq: „Inuppassuit aallartereeramigit [Jiisusi] qaqqamut majuarpoq kisimiilluni qinujartorluni.“ (Matthæusi 14:23) Jiisusi Ataatani qilammiusoq piffissani taamaattuni nipaatsumik attavigalugu nakussatsinneqartarpoq. (Matthæusi 26:36-44) Taamatuttaaq ullumikkut inuit anersaakkut ittunik pingaartitsisut Pinngortitsisup attaviginissaanut periarfissarsiortarput, nalunnginnamikku taassumunnga attaveqarnertik nakussatsinneqassasoq Kristusillu isumaatut isumaqalernissap ineriartortinnerunissaanut iluaqutigissallugu.
Jiisusi sivisuumik akulikitsumillu qinusarpoq. (Johannesi 17:1-26) Assersuutigalugu angutit aqqaneq-marluk imminut apustiliulertussat toqqartinnagit „ulluni taakkunani Jiisusi ilaanni qaqqamut majuarpoq qinujartorluni, unnuarlu naavaa Guutimut qinulluni“. (Lukasi 6:12) Anersaakkut ittunik pingaartitsisut unnuaq naallugu qinusanngikkaluarlutik Jiisusip maligassiaa malippaat. Inuunerminni pingaarutilinnik aalajangiitinnatik, piffissaq sivisooq atorlugu Guutimut qinusarput anersaaq illernartumit siulersorneqarniarlutik. Taamaalillutik aalajangiinitik anersaakkut ineriartuutigisarpaat.
Jiisusip qamannga pisumik qinusarneri aamma ilaartariaqarpavut. Malugiuk Jiisusip aqagumut toqussussaalluni unnukkut qinunera Lukasip qanoq allaatigigaa. „Annilaanganermini suli ilungersornerulluni qinulerpoq, kiagunnerilu soorlu aap kuserneri nunamut nakkaasut.“ (Lukasi 22:44) Jiisusi siusinnerusukkut qamannga pisumik qinusarpoq, maannali, nunami inuunermini misilinneqarnermi artornarnersaat misigigamiuk, „suli ilungersornerulluni“ qinuvoq — akineqarporlu. (Hebræerit 5:7) Anersaakkut ittunik pingaartitsisut Jiisusip maligassiaanik malinnipput. Artornarnerungaartumik misilinneqaraangamik Guutip anersaava illernartoq, annertoqqusersuinera siunnersuineralu ’suli ilungersornerullutik’ Guutimut qinnutigisarpaat.
Jiisusip Guutimut qinukulanera erseqqimmat tamatumunnga tunngatillugu ilaarnissaa ajoqersugaasa kissaatigimmassuk tupaallannanngilaq. Ima oqarfigaat: „Naalagaq, ajoqersortigut qanoq qinusassasugut.“ (Lukasi 11:1) Ullumikkut anersaakkut ittunik pingaartitsisut Guutillu anersaavanik illernartumik siulersortittut Guutimut qinunermi Jiisusip maligassiaanik malinnipput. Anersaakkut ittunik pingaartitsineq ilumoortoq qinunerlu imminnut atalluinnarput.
Nutaarsiassap nuannersup oqaluussissutigineqarnera
Markusip iivangkiiliuani oqaluttuarineqarpoq Jiisusip unnulluarnera tikillugu napparsimasorpassuit ajorunnaarsikkai. Aqaguani ullaaralaakkut kisimiilluni Guutimut qinutillugu, ajoqersugaasa ornippaat oqarlutillu inuppassuarnik ujarneqartoq — immaqa ajorunnaarsinneqarnissartik neriuutigalugu. Jiisusilli ima oqarfigai: „Allanukarta, illoqarfeeqqanut matuma eqqaaniittunut, taakkunanissaaq oqaluussisinnaaniassagama.“ Sooq taama oqarnerluni Jiisusip ima nassuiarpaa: „Tamanna pillugu aallarpunga.“ (Markusi 1:32-38; Lukasi 4:43) Jiisusip inunnik ajorunnaarsitsinissani pingaartikkaluarlugu Guutip naalagaaffia pillugu nutaarsiassamik nuannersumik oqaluussissutiginninneq pingaarnerutippaa. — Markusi 1:14, 15.
Kristusip isumaatut isumalinnut Guutip naalagaaffiata oqaluussissutiginera suli ilisarnaataavoq. Imminut ajoqersugaajumasut tamaasa Jiisusip ima peqquai: „Taamaattumik aallarlusi inuiaqatigiit tamaasa uannut ajoqersuganngortissigit [inunnik inuiannit tamaneersunik ajoqersuganngortitsigitsi, NV] . . . ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:19, 20) Aamma ima siulittuivoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Guutip oqaasiani allassimammat oqaluussineq anersaap illernartup ikiuineratigut pisoq, suliami tamatumani siunertaqarluartumik suleqataaneq anersaakkut ittunik pingaartitsinermut ersiutaavoq. — Apustilit Suliaat 1:8.
Guutip naalagaaffianik tusarliussaq inunnut silarsuarmi sumi tamaniittunut oqaluussissutiginiarlugu inuit millionilikkuutaat ataasiussuseqarlutik iliuuseqartariaqarput. (Johannesi 17:20, 21) Suliami tamatumani peqataasut anersaakkut ittunik pingaartitsisuuginnaratik, aammali silarsuaq tamakkerlugu oqaluussinerat aaqqissuulluagaasariaqarpoq. Kristusip tumai atuarlugit Guutip naalagaaffia pillugu nutaarsiassamik nuannersumik inuit eqimattat oqaluussissutiginnittut tikkuarsinnaavigit?
Inuttut qanoq ittuuit?
Anersaakkut ittunik pingaartitsineq ilumoortoq soorunami allanik aamma ilisarnaateqarpoq, taaneqareersunulli naapertuuttumik inooriaaseqarpit? Tamanna paasiniarlugu imminut ima aperisinnaavutit: ’Guutip oqaasia, Biibili, aalajangersimasumik atuartarpara, atuakkakkalu eqqarsaatigisarpakka? Anersaap inerititaa inuuninni ersersittarpara? Guutimut akulikitsumik qinusarpunga? Silarsuaq tamakkerlugu Guutip naalagaaffia pillugu nutaarsiassamik nuannersumik oqaluussissutiginnittartut ilagisartagarerusuppakka?’
Anersaakkut ittunik qanoq pingaartitsitigisuunerit paasiniarlugu unneqqarillutit imminut misissorneq immaqa iluaqutigisinnaavat. ’Inuussutaallunilu eqqississutaasoq’ pigiliunniarlugu iliuuserisariaqakkanik iliuuseqaqqullutit kajumissaarpatsigit. — Romamiut 8:6; Matthæusi 7:13, 14; 2 Petrusi 1:5-11. (wE 8/1 07)
[Qupp. 7-mi ungalusaq/assiliartat]
ANERSAAKKUT ITTUNIK PINGAARTITSINERMUT ERSIUTAASUT
◆ Guutip oqaasianik nuannarisaqarneq
◆ Anersaap inerititaanik ersersitsineq
◆ Guutimut aalajangersimasumik ilumoortumillu qinusarneq
◆ Guutip naalagaaffianik nutaarsiassaq nuannersoq pillugu allanik oqaloqatiginnittarneq
[Qupp. 5-mi assiliartaq]
’Kristusip isumaata’ ilinniarnissaanut Biibili iluaqutigissavat