Guutimik mianerinnilluni tunisiumatooq pilluarnermik naassaanngitsumik akissarsissaaq
’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — JUÁNASE 3:16.
1, 2. (a) Kina Tunisisut annersaraat, inuiannullu tunissutaasa suna annersaraat? (b) Guutip pissusia suna tamatumani erserpa?
JEHOVA GUUTI, nunamik qilammillu Pinngortitsisoq, Tunisisut annerpaartaraat. Soorlu ajoqersugaq kristumiu Jakob allassimasoq: ’Tunissutit tamarmik ajunngitsut tunniussallu tamarmik naammalluartut pavannga qaamasut Ataataannit allanngorfeqanngitsumit tarranilluunniit taallerneqartanngitsumit pisarput.’ (Jâko 1:17) Tassami Jehova tunissutit annerpaartaannik tunisisuusimavoq. Inuiannullu tunissut asseqanngitsoq tamanna pillugu ima allassimasoqarpoq: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — Juánase 3:16.
2 Oqaatsit taakku Guutip ernituanit namminerpiamit oqaatigineqarsimapput. Ernituap ataatani imminik inuunermik tunisisimasoq inuunerminillu pisuunngorsaataasunik tamanik pilersitsisimasoq soorunami pingaartingaarlugulu asangaassavaa. Guutilli asanninnini ernerminut taassumunngaannaangitsoq tutsittarpaa. Pinngortitat allattaaq tunissummik tamatuminnga ilangiisinnerisigut asanninnini immikkorluinnaq annertussusilimmik ersersissimavaa. (Naleqqiuguk Rûmamiunut agdlagkat 5:8-10.) Tamatumunnga atatillugu ’tunisineq’ sunik nassataqarnersoq misissorutsigu tamanna paasinerulissavarput.
Guutip tunissutaa — ’ernera asasaa’
3. ’Ernituami asasami’ saniatigut aamma kikkut Ataatatta qilammiusup asanninnermik ersersitsivigai?
3 Guutip ukiorpassuarni ’ernituaminik asasaminik’ nammineq qilammeeqateqarnini nuannaarutigisimavaa. (Kulorsamiut 1:13) Piffissap ingerlanerani Ataataq Ernerlu asaqatigiinnermik tunniusimaqatigiinnermillu ima nakuutigisumik ineriartortitseqatigiissimapput ataqatigiinnerat allamit nallerneqarsinnaanani. Aammali pinngortitat allat Jehovap ernituani ikiortigalugu pinngortissimasai Guutip ilaqutariissortaanut ilaasortaasutut asasatut isigineqarput. Taamaammat Guutip ilaqutariissortai tamarmik asanninnermik malunnaateqarput. Bibelimilu Guuti nammineq eqqorluartumik ’asassutaanerarneqarpoq’. (1 Juánase 4:8) Taamaattumik Guutip ilaqutariissortai tassaasimassapput Ataatap, Jehova Guutip, asasai tamarmik.
4. Guutip ernerminik tunniussinera qanoq kinguneqaannanngila, kikkunnullu iluaqutaava?
4 Jehova erninilu angajullersaq ima qanitsigisumik ataqatigiipput najortigiinnerannik tamatuminnga kipititsineq immini ujariatsinerussalluni annertooq. (Kulorsamiut 1:15) Guutilli ernituaminik ’tunniussinera’ qanimut najortigiinnerannik tamatuminnga Guutimut namminermut annaasaqaataaginnanngilaq, aammali Jehovap ernermi toquneranik taamaalillunilu Guutip ilaqutariissortaanit qimagutitsiarallarneranik akuerinnittariaqarneranik kinguneqarsimavoq. Aammalu Guutip ernera toqusimavoq pinngortitanut Guutip ilaqutariissortaanut ilaasimanngisaannaraluartunut iluaqutissamik. Jehova inuiannut annikilliortunut iluaqutissamik ernituaminit, Bibelimi ’Guutip pinngortitaasa aallaqqaataattut’ taaneqartumit, annerusumik tunniussaqarsinnaasimanngilaq. — sarĸúmersitat 3:14.
5. (a) Adamip kinguaavi qanoq atugaqalersimappat, Guutillu naapertuilluassusia ernerisa aalajaatsut ilaannut ataatsimut sumik piumasaqarpa? (b) Guuti annerpaamik tunissuteqassappat suut pisariaqarsimappat?
5 Inuit aappariit siulliit, Adam Evalu, Guutip ilaqutariissortaani inissarisartik tigummiinnanngilaat. Tamanna erseqqippoq Guutimut ajortulioreerlutik Edenip naatsivianit anisinneqarmata. Guutip ilaqutariissortaanit peersinneqaannanngillat, aammattaarli toqumik eqqartuunneqartipput. Taamaattumik apeqqutaalersoq tassaaginnanngilaq taakkua kinguaassaasa qanoq illillutik Guutip ilaqutariissortaanut ilaasutut taassuminnga akuerineqarnissartik angusinnaassaneraat, aammali qanoq ililluni toqumik eqqartuussut kinguaassanut taakkununnga tuttoq atorunnaarsinneqarsinnaanersoq. Guutip naapertuilluassusia naapertorlugu tamatuma nassatarisariaqassavaa Jehova Guutip ernerisa aalajaatsut ilaata inuunerminik taartitut imaluunniit utertitsissutitut tunniussinissaa. Apeqqut annertooq tassaalerpoq: Toqqagaq inuunerminik inunnut ajortilinnut iluaqutissamik tunniussinissaminut piumassuseqassanerpa? Tamatumani Guutip ajugaqanngitsup tupinnartuliakkut akuliunnissaa asanninnerminillu asseqanngitsumik annertussusilimmik ersersitsinissaa pisariaqassapput. — Rûmamiut 8:32.
6. Sooq Guutip ernera inuiannut ajortiliusunut annaassisuunissaminut naleqqulluartuusimava, namminerlu qanoq oqarsimava?
6 Jehovap ernitua kisimi inuiaat ajortilittut inissisimanerannut atatillugu piumasarisaasunik immikkut ittunik naammassinnissinnaasimavoq. Guutip ilaqutariissortaanut tunniusimaneq eqqarsaatigalugu taassuma Ataatani qilammiusoq ima assigilluinnaqqissaartigaa Guutip ernerisa akornanni nallernissaqarani. Pinngortitat sianissusillit allat tamarmik pinngortinneqarmata ikiuussimagami Guutip ernera taakkununnga assut tunniusimaffiginnippoq. Asanninnerlu Jesus Kristusip, ’Guutip naalannassusiata akisunnerata qanoq-issusiatalu ersinnerata’, pissuseraa malunnarnerusoq. (Eprîarit 1:3) Asanninnermi tamatuma misinnarnerpaamik iliuuseqarluni ersersinnissaanut Jesus piumassuseqarsimavoq, inuunermi inuiaat ajortiliusut iluaqutissaannut pilliutigineratigut. Apustiliminut 12-inut ima oqarsimavoq: ’Inuummi ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ — Mákorse 10:45; naleqqiuguk Juánase 15:13.
7, 8. (a) Jehova Jesus Kristusip nunamut aallartinnissaanut sumit killinneqarsimava? (b) Jehovap ernituani immikkut ittumik sumik suliassippaa?
7 Jehova Guutip immikkut ittumik siunertaqarluni Jesus inuiannut piitsunngorsimasunut aallartissimavaa. Tassa taamaaliornera Guutitut asanninnerata erserneraa, Jesusimi ima oqarsimavoq: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu. Guutip erni silarsuarmut aallartinngilaa silamiut eqqartooqqullugit, kisianni silamiut taassumuuna annaqqullugit.’ — Juánase 3:16, 17.
8 Jehovap asannilluni ernituani aallartippaa inuit annaakkumallugit — eqqartuukkumallugiinngitsoq. Guutip ernera eqqartuussissalluni aallartinneqarsimagaluarpat, inuiaat siunissaat neriunartoqarnavianngikkaluarpoq. Taamaassimagaluarpammi eqqartuussut iluanaarnanngitsoq malunaarutigisimassagaluarpaa — tassa toqumik eqqartuussut. (Rûmamiut 5:12) Asanninnermilli asseqanngitsumik ersersitsinikkut tamatumuunakkut Guutip toqumik eqqartuussut naapertuilluassutsip piumasarisaa nalinganik taarserpaa.
9. David Jehovap tunisiumatussusianut atatillugu qanoq misigisaqarsimava?
9 Jehova Guutip sutigut tamatigut ersersittarpaa asanninneq pissutsimi malunarnerpaartarigaat. Eqqortumillu oqartoqarsinnaavoq Jehovap asannilluni pallorfiginnitsini nunamiittut aalajaatsut ajunngitsunik tamanik sinnilissuarmik tunigai. Tussiaasiortoq David taama misigisimavoq Guutimut ima oqarami: „Angingaarpoq isumassuinerit ilinnut mianerinnittunut pissarititat, tamarmik takkuanni takutittakkat ilinni qimarravissarsiortunut.“ (Tussiaat 31:20) Davidip Israelimi kunngiunermini — aap, inuiaat Guutimit qinerneqarsimasut ilagalugit inuunini tamaat — Jehovap isumassuissusia, imaluunniit ajunngissusia, misigikulasarsimaqaa tupigusuutigisaqalugulu angeqimmat.
Guutip tunissutaa angingaartoq Israelip annaavaa
10. Israelitoqaq inuiannit nunamiittunit allanit qanoq immikkooruteqarsima?
10 Israelitoqaq nunarsuarmi inuiannit allanit immikkooruteqarsimavoq Jehovamik Guuteqarnermigut. Pruffiiti Moses akunnermiliuttoralugu Jehova Abrahamip, Isakip Jakobillu kinguaavinik angerfigeqatiginnissimavoq. Inuiannut allanut taamatut attaveqarfiginninngimmat, tussiaasiortoq isumassarsisinneqarluni ima oqarsinnaasimavoq: „Oqaatsini nalunaarutigai Jaakup kinguaavinut, inatsisini inassutinilu Israelikkunnut. Inuiaat allat taamaaliorfiginngilai nalummata inassutiminik. Halleluja.“ — Tussiaat 147:19, 20.
11. Israel qanga Guutimit iluarisaajunnaarpa, tamannalu Jesusip qanoq oqaatigaa?
11 Inuiaat Israelikkut ukiumi 33-mi ukiunik naatsorsuisalerfitta kingornagut Jesusip Messiasiuneranik akuerinnikkumannginnertik tikillugu taamatut immikkut ittumik Guutimut attaveqarput. Ulloq Jesusip ima oqarfia Israelimut alianartuuvoq: ’Jerusalem, Jerusalem-iaa, pruffiitinik toqutsisutit ilinnullu aallartitat ujaqqanik milloorlugit, qassinimmitaava qitornatit katersorumagaluarikka, soorlu marloraap piaqqani sulummi ataanut katersortarai, piumanngilasili. Ata, illorsi ilissinnut qimagaassavoq inueruttoq.’ (Matîuse 23:37, 38) Jesusip oqaasiisigut erserpoq Israelikkut — naak siornatigut Jehovamit iluarisaasimagaluarlutik — Guutip tunissutaa immikkut ittoq annaagaat. Suna?
12. Kikkut tassaappat ’Jerusalemip qitornai’, Jesusillu suna pivaa oqarami ’katersorumagaluarlugit’?
12 ’Qitornanik’ oqarami Jesusip pivai juutit kipineqarsimasut Jerusalemimi najugallit taamaalillutillu tassaasut inuiaat juutit ataatsimut isigalugit. Jesusip ’Jerusalemip qitornai’ tamaasa ataatsimut katersortuugunigit ’qitornat’ taakku Guutimik angerutsimut nutaamut eqqussimassagaluarpai — nammineq Jehovap inuiaallu juutit taakku akornanni akunnermiliuttuulluni. (Jeremia 31:31-34) Taamaalillutik ajortiminnik isumakkeerfigineqarsimassagaluarput, Guutimmi asanninnera taama angitigaaq. (Naleqqiuguk Malakia 1:2.) Tunissutip angigaluassusia!
13. Israelikkut Guutip erneranik ilassinnikkumannginnamik suna annaavaat, soorli Guutip nuannaarnera millinngila?
13 Oqaatsiminut siulittuutaasunut naapertuuttumik iliorluni juutiunngitsut angerutsimut nutaamut peqataanissaannik neqeroorfiginissaat sapinngisaminik Jehovap utaqqisikkallarpaa. Inuiaalli Israelikkut Guutip erneranik, Messiasimik, ilassinnikkumannginnertik pissutigalugu tunissut tamanna annaavaat. Taamaattumik Jehovap juutit Jesusimik ilassinnikkumannginnerannut taartitut juutiunngitsut tunissummut peqataanissaannik periarfissippai. Taamaalillunilu Jehovap Tunisiumatoorsuartut nuannaarnini attatiinnarpaa.
Tunisinikkut nuannaarneq
14. Sooq Jesus Kristus pinngortitanit tamanit pilluarnerpaartaava?
14 Jehova ’Guutiuvoq pilluartoq’. (1 Timûtiuse 1:11) Pilluarneq tamanna misigisarpaa ilaatigut tunisisarnermigut. Ukiuni hundredelinni siullerni ukiunik naatsorsuisalerfitta kingornagut taassuma ernitua ima oqarsimavoq: ’Tunisineq tigusinermit pilluarnarneruvoq.’ (apustilit suliait 20:35) Tamanna naapertorlugu Jesus tassaalersimavoq pinngortitanit tamanit pilluarnerpaaq. Qanoq ililluni? Tassa Jehova Guuti eqqarsaatigissanngikkaanni Jesus Kristus tamanit annerpaamik tunissuteqarsimavoq inuunerminik inuiannut iluaqutissamik pilliutiginninnermigut. Aap, taanna tassaavoq ’pilluartoq kisimi pissaanilik’. (1 Timûtiuse 6:15) Tassa paasivarput Jesusip nammineq inuunera tunisinerup tigusinermit pilluarnarneruneranut assersuutaasoq.
15. Sukkut Jehova maligassaalluarnerpaajuaannassava, uagullu inuit qanoq ililluta taassuma nuannaarnerata assinganik misigisaqarsinnaavugut?
15 Jehova Guuti, Jesus Kristus ikiortigalugu, pinngortitaminut sianissusilinnut Tunisiumatuutut naassaangitsussamut imminut nittarssaatissaaq, tamannalu eqqarsaatigalugu maligassaalluarnerpaajuassalluni. Guutip nammineq tunissutinik ajunngitsunik tunisineq nuannaarutissarsiffigisaqigamiuk inuk tunisiumatussutsip anersaavanik uummammiulersimavaa. Taamaammat pissutsitsigut tassuuna Guuti malinniarsinnaavarput nuannaarneratalu assinganik misigisaqarsinnaalluta. (1 Moses 1:26; Evfisumiut 5:1) Jesusip ajoqersukkani eqqorluartumik oqarfigisimavai: ’Tunisigitsi, taava ilississaaq tunineqassaasi. Ajunngitsumik naqissimasumik aalatikkamik qammissimasumik uuttugaq saassinnut tunniukkumaarpaat uuttuutigisassinnik uuttuiffigineqarumaarassi.’ — Lúkarse 6:38.
16. Jesusip Lúkarse 6:38-mi tunisineq eqqartoramiuk suna pivaa?
16 Jesus nammineq tunisiumatussutsimik malinninnermigut maligassiuilluarsimavoq. Soorlulu taanna oqarsimasoq taamatut tunisiumatussuseq inuit allat ajunngitsumik qisuariarfigisarpaat. Lúkarse 6:38-mili Jesusip timip piinik tunisinerinnaq eqqartunngilaa. Oqanngilaq ajoqersukkani pigisaminnik tamanik tunioraassinermikkut imminnut piitsunngortissasut. Kajumissaarpaali anersaakkut nalerisimaalersitsisumik iliuuseqartaqqullugit.
Naassaanngitsumik pilluarnissamik neriorsuutit
17. Guutip kiffani ulluni kingullerni makkunani sumik nuanningaartumik tunisimavai?
17 Jehovap pinngortitarsuarmi tamarmi qullersaasutut ullussani kingullerni makkunani kiffani nuanningaartumik tunisimavai, tassa naalagaaffini pillugu tusagassamik nuannersumik. Guutip qilammi naalagaaffianik pilersinneqarsimasumik Jesus Kristusimillu kunngeqartumik oqaluussissutiginninnissamik immikkut pisinnaatitaaffilerneqarsimavugut. (Matîuse 24:14; Mákorse 13:10) Guutimut qutsinnerpaasumut oqaatsikkut nalunaajaasussatut qinerneqarneq tunissutisiaavoq assissaqanngitsoq. Guutillu tunisiumatussusianik malinnissutigisinnaasarput pitsaanerpaaq tassa silarsuup ajortup matuma naggatissaata nalliutinnginnerani inunnik allanik tusagassamik nuannersumik tusarliineq.
18. Jehovap nalunaajaasuisut inuit allat sumik tunisariaqarpavut?
18 Apustili Paulusip Naalagaaffik pillugu tusagassamik allanut oqaluussissutiginninnermini ajornartorsiutit nalaattakkani eqqartorpai. (2 Korintumiut 11:23-27) Aammattaaq nalitsinni Jehovap nalunaajaasui ajornartorsiutissinneqartarput Naalagaaffimmillu neriuummik allat oqaluttuukkumallugit namminneq soqutigisatik tunulliuttariaqartarlugit. Immaqa matumiit matumut angalaarnissarput ornigivallaarneq ajorparput, ingammik ittoortuugutta. Kristusilli ajoqersugaasut ’naalagaaffimmik tusagassap tamatuma’ oqaluussissutigineratigut anersaakkut tunissutinik inunnik allanik avitseqateqarnissamik immikkut pisinnaatitaaffipput illikartiinnarsinnaanngilarput. (Matîuse 24:14) Jesusitut isumaqartariaqarpugut. Taanna toqulerluni ima qinusimavoq: ’Ataataga, . . . uanga peqqusattut pinnani illit peqqusattut pili.’ (Matîuse 26:39) Naalagaaffik pillugu tusagassamik nuannersumik inunnik allanik tusarliinissaq pineqaraangat Jehovap kiffaasa Guutip piumasaa, namminneq piumasartik pinnagu, malittariaqarpaat. Taassuma piumasaanik iliornissartik kissaatigiumassavaat, namminneq kissaatitik tunulliullugit.
19. ’Ininik ittuinnartunik’ kikkut piginnittuuppat, qanorlu ililluta taakku ikinngutigilersinnaavavut?
19 Tunisiumatunermik taama ittumik ersersitsiniaraanni piffissaq timillu piisigut pilliuteqarnissaq pisariaqarput. Guutimilli mianerinnilluni tunisiumatussuseq ersersittarutsigu qularutigissanngilarput naassaanngitsumik pilluarneq angujumaarlugu. Jesusimi ima oqarsimavoq: ’Pisuussutit iluaassutsip pii [„silamiorpaluttut“, New International Version] ikinngutissarsiutigisigik, taava suerukkussi taakkua ininut ittuinnartunut ilasiarissavaasi.’ (Lúkarse 16:9) Anguniagarisariaqarparput ’pisuussutitta iluaassutsip piisa’ ’ininik ittuinnartunik’ pigisalinnik ikinngutissarsiniutitut atornissaat. Jehovap Pinngortitsisuugami suut tamaasa pigai — ernitualu kingornussisussaavoq. (Tussiaat 50:10-12; Eprîarit 1:1, 2) Taakku ikinngutigilerumagutsigik pisuussutivut taakkua iluarisaattut atortariaqarpavut. Taamaammat allat iluaqutissaannut pisuussutitsinnik atuineq eqqortumik isumaqarfigisariaqarparput. (Naleqqiuguk Matîuse 6:3, 4; Korintumiunut agdlagkat áipait 9:7.) Assersuutigalugu, pigisavut annikilliortut ikiornissaannut nuannaarluta atorsinnaavavut, Guutillu naalagaaffiata siuarsarnissaanut tunissuteqartarsinnaalluta. — Ussatit 19:17; Matîuse 6:33.
20. (a) Sooq Jehovap Jesusillu ’ininut ittuinnartunut’ siulersorsinnaavaatigut, inillu taakku sumiippat? (b) Immikkut pisinnaatitaaffik suna naassaanngitsumik pigilersinnaavarput?
20 Jehova Guuti Jesus Kristusilu toqujuitsuummata naassaanngitsussamut ikinngutigilersinnaavavut, taakkualu ’ininut ittuinnartunut’ siulersorsinnaavaatigut — inngilit illernartut ilagalugit qilammi imaluunniit paratiisimi pilerseqqitaasumi nunamiittumi. (Lúkarse 23:43) Tamanna pisinnaavoq Guutip asanningaassutsimigut tunissutigisimasaa, tassa Jesus Kristus, tunngavigalugu. (Juánase 3:16) Jehova Guutip Jesus ikiortigalugu inuiaat tamaasa tunisiumatulluni isumagiuassavai, nammineq nuannaarutigeqisaminik. Aap, uaguttaaq tunisiumatussuserput immikkut pisinnaatitaaffigalugu naassaanngitsussamut ersersissinnaassavarput, Jehova Guutip qilammi nunamilu tamarmi kisimi oqartussaanera ernituatalu, Naalakkatta Jesus Kristusip, kunngiussusia akueriitigalugit. Tamanna Guutimik mianerinnillutik tunisiumatuujusunut tamanut naassaanngitsussamut pilluarnermik kinguneqassaaq. (wD 15/1 92)
Apeqqutit uteqqiissutit
□ Guutip tunissutit annersaat tunissutigissaguniuk suna pisariaqartissimavaa?
□ Suna siunertaralugu Guutip ernini aallartissimavaa?
□ Kina pinngortitani tamani pilluarnerpaartaava, sooq?
□ Guutimik mianerinnillutik tunisiumatuujusut naassaanngitsumik pilluarneq qanoq ilillutik angussavaat?
[Qupp. 18-mi assiliartaq]
Guutip ernerminik utertitsissutitut pilliutiginnissimanera pingaartippiuk?
[Qupp. 20-mi assiliartat]
Nalunaajaasarnikkut suliamullu tamatumunnga aningaasatigut tapersersuinikkut Guutip naalagaaffia salliutippiuk?