‘Ilinniarsima­suunatillu inuinnaapput’

1, 2. Petrusi Johannesilu guutisiorfiup isaaffiata eqqaani sumik tupinnar­tuliorpat?

UALIUVOQ seqinnarissuaq. “Piffissap qinuffiusartup nalaani” inuppassuit, ilaatigut juutit kristumiullu, guutisiorfiliaapput.a (ApS 2:46; 3:1) Petrusi Johannesilu ‘Isaaffikkut Kusanartumik’ taaneqar­tartukkut guutisiorfimmut aamma iseriartorput. Inuppassuit pisuppaluat oqaloqatigiin­nerallu tusarsaapput. Aamma angut inunnguutsiminit nukillaarsimasoq 40-t sinnerlugit ukioqartoq tassani inuussutis­saminik qinusartuuvoq. – ApS 3:2; 4:22.

² Qinusartup Petrusi Johannesilu eqqaminut pimmata aningaasanik qinnuuloorfigai. Taakkua uniffigimmanni angut isumalluarpaseqaaq. Petrusi ima oqarpoq: “Sølviuteqar­nangalu kuultiuteqan­ngilanga, pigisannilli tunissavakkit. Jiisusip Kristusip Naazaratsimiup aqqani: Pisugit!” Taava Petrusip assaatigut tigoriarlugu nikuisippaa. Angut nukillaarsimasoq inuunermini aatsaavissuaq nikorfalerpoq. (ApS 3:6, 7) Inuppassuit tupigusungaarnerat takorlooruk. Aamma takorlooriaruk angutip niuni ajoquteqan­ngitsut tupigusulluni isiginnaarai. Pisulaariarluni pisseqat­taarpoq Guutilu unnersiutigalugu!

3. Angut ajorunnaarsin­neqarsimasoq inuppassuillu allat naleqangaartumik sumik periarfis­saqalersin­naappat?

³ Inuppassuit tupigusungaartut Petrusi Johannesilu Saalumuup torsuusaasaani sukalim­miittut ornippaat. Jiisusi tassani ilinniar­titsinikuuvoq, maannalu Petrusip qanoq taamatut tupinnar­tuliortoqarsin­naanersoq nassuiarpaa. (Joh 10:23) Inuppassuit angullu ajorunnaarsitani tunissummik sølvimit kuultimillu naleqar­nerungaartumik neqeroorfigai. Tunissut tamanna akuerigunikku ajorunnaarsin­neqaannaratik ajortuliaminnik peqqissiminissamut aamma Jiisusimik Kristusimik, tassa ‘inuunermut Siulersuisuunermik’, malinnit­tunngor­nissamut periarfis­saqalissapput. – ApS 3:15.

4. (a) Petrusip Johannesillu angut ajorunnaarsereermassuk inuit pissaanillit suniarsarippat? (b) Apeqqutit marluk suut akissutis­sarsissavagut?

⁴ Ila ullup puigunaassusia! Inuk ajorunnaarsin­neqarpoq pisussin­naalerlunilu. Inuppassuillu allat Guutip piumasaanik paasinnin­nissamut taassumunngalu kiffartor­tunngor­nissamut periarfis­saqalerput. (Kol 1:9, 10) Aamma ullormi tamatumani pisut pissutigalugit Jiisusip ilinniar­titaasa aalajaatsut oqaluus­sinerat inunnit pissaanilinnit unitsin­niarneqarpoq. (ApS 1:8) Inuit pissaanillit taakku isumaqarput Petrusi Johannesilu “ilinniarsimasuunatillu inuinnaasut”. Uagulli Petrusip Johannesillu oqaluus­seriaasiat qanoq ilinniarfigisin­naavarput?b (ApS 4:13) Aamma taakku ilinniar­titallu allat ilaarlugit malersor­neqarnermi qanoq sapiitsuusin­naavugut?

“Nammineq pissaanerput” atornagu (ApS 3:11-26)

5. Petrusip inuppas­suarnut oqaluus­seriaasia qanoq ilinniarfigaarput?

⁵ Petrusip Johannesillu nalunngilaat inuppassuit oqaluus­siffigisatik taamani Jiisusip toqutaanissaanik kissaateqarsimasut. (Mak 15:8-15; ApS 3:13-15) Taamaattumik angut Jiisusip aqqani ajorunnaarsin­neqarsimasoq Petrusip oqaatigigamiuk sapiitsuusariaqarsimavoq. Ilumoortoq isertornagu inuppassuit Kristusip toqutaaneranut pisooqataasimanerat pillugu avoqqaarai. Petrusilli nalunnginnamiuk inuit taakku ‘qanoq iliornerlutik nalugaat’ kamaatinngilai. (ApS 3:17) Qatanngutitut taavai Kunngeqarfillu pillugu nutaarsiassanik nuannersunik oqaluttuullugit. Peqqissimigunik Kristusilu upperfigilerlugu ‘Jehovamit nakussatsin­neqassapput’. (ApS 3:19) Uaguttaaq Guutip eqqartuus­sinissaa oqaluus­sissutigigaangatsigu sapiitsuusariaqarpugut. Kisianni inussiar­nersuullutalu isornar­torsiuinaveersaar­tariaqarpugut. Oqaluus­siffigisagut uppeqatigilersin­naasatsitut isigisariaqarpagut Petrusilu ilaarlugu Kunngeqarfik pillugu nutaarsiassat nuannersut isumalluarpaluttumik oqaluus­sissutigalugit.

6. Petrusip Johannesillu maniguunnertik qanoq ersersippaat?

⁶ Apustilit maniguut­tuupput. Namminneq pissaanermikkut tupinnar­tuliorneran­ngillat. Petrusi inuppas­suarnut ima oqarpoq: “Sooq nammineq pissaanerput Guutimul­luunniit tunniusimanerput atorlugu pisussin­naanngor­titsisimasoraluta nakkuppisigut?” (ApS 3:12) Petrusip apustilillu allat nalunngilaat kiffartor­nerminni ajunngitsuliatik tamarmik Guutip pissaaneratigut, namminneq pissaanermik­kuunngitsoq, pisartut. Taamaattumik maniguullutik ataqqinaat tamaat Jehovamut Jiisusimullu tunniuppaat.

7, 8. (a) Tunissut suna inunnut neqeroorutigisin­naavarput? (b) ‘Piffissamik sunik tamanik aaqqissuus­seqqiffissamik’ siulittuut nalitsinni qanoq eqquuppa?

⁷ Uaguttaaq oqaluus­sigaangatta maniguut­tuusariaqarpugut. Nalitsinni Guutip tupinnar­tuliorsin­naatinngilaatigut. Taamaak­kaluartoq inuit Guutimik Kristusimillu upperin­ninnissaannut ikiorsin­naavagut. Petrusillu tunissut neqeroorutigisaa neqeroorutigisin­naavarput, tassa inuit ajortuliaminnik isumakkeerfigineqar­nissaat Jehovamillu nakussatsin­neqarnissaat. Ukiut tamaasa inuit tuusintilip­passuit tunissut tamanna akueralugu imermut morsutsin­neqarlutik Kristusimut ilinniar­titanngortarput.

⁸ Petrusip eqqaasaatut ‘piffissami sunik tamanik aaqqissuus­seqqiffissami’ inuuvugut. “Guutip itsaq pruffiitini illernartut aqqutigalugit” siulittuutigisaatut 1914-imi Kunngeqarfik qilammi pilersin­neqarpoq. (ApS 3:21; Tuss 110:1-3; Dan 4:13, 14) Tamatuma kinguninngua Kristusip guutisiornerup ilumoortup nunarsuarmi pilerseq­qinnissaa isumagaa. Taamaattumik inuit millionillit anersaakkut paratiisimiilerlutik Guutip kunngeqarfiani innuttan­ngorput. Kinaassusitoqaq peerlugu ‘kinaassuseq nutaaq, Guutip piumasaanut naapertuuttumik pinngor­tinneqartoq, ativaat’. (Ef 4:22-24) Angutip nukillaarsimasup ajorunnaarsin­neqarneratut suliaq tupinnangaartoq tamanna inuit pissaaneratigut pinnani Guutip anersaavata pissaaneratigut naammas­sineqarpoq. Taamaattumik Petrusitut ilinniar­titsinitsinni Guutip oqaasia sapiilluta atorluarsin­naasariaqarparput. Eqqaamasariaqarparpullu uagut pissaanitsigut pinnani Guutilli pissaaneratigut inuit Kristusimut ilinniar­titanngortartut.

“Takusagut tusakkagullu eqqartorun­naarsin­naanngilagut” (ApS 4:1-22)

9-11. (a) Juutit siuttui Petrusip Johannesillu oqaluus­sinerannut qanoq qisuariarpat? (b) Apustilit suniarlutik aalajangerpat?

⁹ Petrusip oqalugiaataa angutillu ajorunnaarsin­neqartup suaartaatigaluni pisseqat­taarnera tupigusuutigineqarluni alakkar­terneqarpoq. Taamaattumik guutisiorfimmi isumannaal­lisaanermik nakkutilliisoq palasillu susoqarnersoq paasiniarlugu ornigupput. Angutit taakku tassaagunarput sadukiiarit pisuut politikkikkut pissaaneqartut Romamiunut attaveqarluarusuttut. Inatsisit allanneqarsiman­ngitsut farisiiarit nuannarisaat maleruan­ngilaat makititaanissarlu upperinagu.c Petrusip Johannesillu guutisiorfimmi Jiisusip makititaaneranik oqaluus­sissutigin­ninnerat pissutigalugu kamapput.

¹⁰ Akerlilersuisut kamattut Petrusi Johannesilu parnaarus­saatippaat aqaguanilu juutit eqqartuus­siviisa qullersaannut sassartillugit. Eqqartuussisut nuimasut taakkua allanit pingaaruteqar­nerusorigamik aamma Petrusi Johannesilu ‘ilinniarsimasuunatillu inuinnaasutut’ isigigamikkit guutisiorfimmi ilinniar­titsisus­saanngin­nerarpaat. Apustilit palasitut ilinniarsiman­ngikkaluarlutik sapiillutik qularnatillu oqaluus­sisarput. Taamaattumik eqqartuussisut tupigusul­lutillu paasisin­naanngilaat sooq Petrusi Johannesilu taama oqaluus­sillaqqitsiginersut. Taavali ‘paasilerpaat Jiisusi ilagisimagaat’. (ApS 4:13) Allakkanimmi ilisimasut assiginagit Naalagaat “Guutimit piginnaaniligaasutut” ilinniar­titsisarsimavoq. – Mat 7:28, 29.

¹¹ Eqqartuussisut apustilit oqaluus­siunnaaqquaat. Taamanikkut eqqartuussivik taanna pissaaneqangaarpoq. Assersuutigalugu siusinnerusukkut Jiisusi eqqartuus­sisunut sassartin­neqarmat taakku oqarput: “Toqutaasariaqarpoq.” (Mat 26:59-66) Petrusi Johannesilu qununngillat. Ataqqin­nillutik angutinut pisuunut, ilinniagaqarluarsimasunut pissaaneqar­tunullu ima oqarput: “Guutimut naalannani ilissinnut naalanneq Guutip eqqortuliornertut isigissaneraa nammineq nalilis­savarsi. Uagulli takusagut tusakkagullu eqqartorun­naarsin­naanngilagut.” – ApS 4:19, 20.

12. Sapiinneruler­nissatsinnut qulanngin­neruler­nissatsinnullu suna iluaqutigis­savarput?

¹² Apustilitut sapiitsuusinnaavit? Inuit pisuut ilinniagaqarluartut pissaaneqar­tulluunniit oqaluus­siffiginis­saannut periarfis­saqaraangavit qanoq misigisarpit? Ilaquttannit, atuaqatinnit suleqatin­nilluunniit upperisat pillugu illaruaatigineqaraangavit qanoq misigisarpit? Qunusarpit? Taamaappat misigis­sutsitit akiorsin­naavatit. Jiisusimmi nunarsuarmiik­kallarami apustilit upperisartik qularnatik ataqqin­nittumillu qanoq illersorsin­naagaat ilinniartippai. (Mat 10:11-18) Makititaanermilu kingorna ilinniartitani neriorsorpai ‘naggatissap nalaata tungaanut ullut tamaasa najussallugit’. (Mat 28:20) Nalitsinni inussiap aalajaallunilu silatuup Jiisusimit siulersor­neqarluni uagut upperisatsinnik qanoq illersuisin­naanissatsinnik ilinniar­tittarpaatigut. (Mat 24:45-47; Pet 1. 3:15) Ilaatigut ataatsimiinnerni, soorlu “Kristumiutut inuunerput kiffartor­nerpullu”-mi, aamma Biibililersaarutit, soorlu nittartak­katsinni allaaserisat “Apeqqutit Biibilimi akineqartut”, atorlugit ilinniar­tittarpaatigut. Ataatsimiinnerit taakku najuuffigisarpigit? Biibililersaarutillu atorluar­tarpigit? Taamaaliortaruit qulanngin­nerulerlutillu sapiinnerulissaatit. Apustilillu ilaarlugit ilumoortut Biibilimeersut nuanningaartut paasisavit eqqartor­tarnissaannut sunaluunniit unissutigis­sanngilat.

“Guutimut … qinupput” (ApS 4:23-31)

13, 14. Akerlilersor­neqarutta sussaagut, aamma sooq?

¹³ Iperagaagamik Petrusip Johannesillu ilagiit ornippaat. Ataasioqatigiillutik oqaluus­sinermi sapiissin­naaqqullutik “Guutimut … qinupput”. (ApS 4:24) Petrusip nalunngilaa Guutip piumasaa naammas­sissagutsigu imminut tatigival­laassan­ngitsugut. Siusinnerusukkummi imminut tatigival­laarluni Jiisusimut ima oqarsimavoq: “Allat tamarmik qimakkaluarpatsit uanga qimanngisaan­nassavakkit!” Jiisusilli siulittuutigisaatut Petrusip inunnut qunulerluni ikinngutini ilinniar­titsisunilu nalunerarpaa. Petrusip kukkussutini ilinniutigaa. – Mat 26:33, 34, 69-75.

¹⁴ Oqaluus­sinermi pinertusaarusukkuit aalajangius­siinnarneq naammanngilaq. Akerlilersuisut unitsin­niarpatsit Petrusi Johannesilu ilaakkit. Nakussatsin­neqarumallutit Jehovamut qinugit. Ilagiinni ikiortis­sarsiorit. Aamma utoqqaanertat anersaakkullu inersimal­luartut allat ajornar­torsiutitit pillugit oqaluttuutikkit. Ilinnik qinnussisut qinnutaat sunniuteqangaarsin­naapput. – Ef 6:18; Jaak 5:16.

15. Oqaluus­sisarun­naarallarsimasut sooq nikallus­sanngillat?

¹⁵ Akerlilersor­neqarneq pissutigalugu oqaluus­sisarun­naarallarsimaguit nikalloqinak. Eqqaamajuk apustilit tamarmik Jiisusip toqunerata kingorna oqaluus­sisarun­naarallariarlutik oqaluus­sisaleq­qissimasut. (Mat 26:56; 28:10, 16-20) Kukkussutitit nikallus­sutiginagit ilinniutigigukkit allanut nakussatsis­sutaasin­naassaatit.

16, 17. Kristumiut Jerusalem­mimiittut qinnutaat qanoq ilinniarfigisin­naavarput?

¹⁶ Oqartus­saasunit malersor­neqaraangatta suna qinnutigisarsin­naavarput? Maluginiaruk ilinniartitat malersor­neqarun­naarnissartik qinnutigin­ngikkaat. Jiisusimmi oqaasii uku eqqaamavaat: “Uanga malersorsimaguninnga aamma ilissi malersus­savaasi.” (Joh 15:20) Ilinniartitat aalajaatsut taakkua akerlilersuisut ‘sioorasaarutaat tusaaqqullugit’ Jehova qinnuigaat. (ApS 4:29) Ilinniartitat nalunngilaat Guutip piumasaata naammas­sisinneqarnissaa pingaaruteqar­nerpaasoq. Paasivaat malersor­neqarnertik siulittuutit eqquunnerigaat. Nalunngilaat inuit naalakkersuisut qanorluunniit oqassagaluarpata Guutip piumasaa ‘nunarsuarmi eqquutissasoq’. Tamatumami qinnutigisar­nissaanik Jiisusip ilinniar­tissimavai. – Mat 6:9, 10.

¹⁷ Guutip piumasaatut iliorumallutik ilinniartitat Jehovamut ima qinupput: “[Inussiaatitit] sapiissuseqangaarlutik illit oqaatsit pillugu oqaluus­siniassammata ikiukkit.” Jehovap akissutaa ingerlaannaq ersarissivoq ima pisoqarmat: “Katersuuf­figisaat sajuppoq, tamarmillu anersaamit illernartumit sunnerneqangaarlutik Guutip oqaasia sapiillutik oqaluus­sissutigaat.” (ApS 4:29-31) Guutip piumasaata naammas­sinissaa unitsin­neqarsin­naanngilaq. (Es 55:11) Tamanna ajornarpasis­sinnaagaluartoq akerlilersor­tigullu pissaaneqangaaraluartut Guutimut qinusarutta qularis­sanngilarput sapiilluta oqaluus­sinissatsinnut nakussatsik­kumaaraatigut.

‘Inuit salloqit­tarnagit Guuti salloqit­tarpaat’ (ApS 4:32–5:11)

18. Jerusalemmimi ilagiin­niittut qanoq tapersersoqatigiittarpat?

¹⁸ Jerusalemmimi kristumiut ikittun­nguugaluarlutik piffissap sivikitsup ingerlanerani 5.000-nit amerlanerulerput.d Assigiin­ngitsunik tunuliaqutaqaraluarlutik ilinniartitat “assigiimmik eqqarsar­taaseqarlutillu misigis­suseqarput”. (ApS 4:32; Kor 1. 1:10) Ilinniartitat ilungersornertik pilluaq­qoqqullugu Jehova qinnuigisarpaat. Aammali anersaakkut, pisariaqaraangallu aningaasatigut, tapersersoqatigiittarput. (Joh 1. 3:16-18) Assersuutigalugu ilinniartitap Juuserfimik atillip, Barnabamik apustilinit taaneqartartup, nunaatini tunivaa aningaasallu apustilinut tunniullugit. Aningaasat taakku atorpaat ilinniar­titanngorlaat ungasissumi najugaqartut Jerusalem­mimiigin­narsinnaaq­qullugit upperisar­taartik pillugu ilikkagaqar­nerunias­sammata.

19. Jehovap sooq Anania Safiiralu toquppai?

¹⁹ Aappariit Ananiamik Safiiramillu atillit aamma nunaatertik tuneriarlugu aningaasanik ilagiinnut tunissuteqarput. Oqarput iluanaarutit tamaasa tunissutigalugit, ‘isertorlutilli iluanaarutit ilaat tigummiin­narpaat’. (ApS 5:2) Jehovap aappariit taakku toquppai, imaanngitsoq tunissutaat ikippal­laarmata pissutiginiagaalli ajortuummat ilumoor­tuusaarmatalu. ‘Inuit salloqit­tarnagit Guuti salloqit­tarpaat.’ (ApS 5:4) Ilumoor­tuusaartut Jiisusip assuarisai assigalugit Ananiap Safiirallu inunnit ataqqineqar­nissartik Guutimit akuerineqar­nissamit pingaar­tinneruaat. – Mat 6:1-3.

20. Jehovamut tunissuteqarneq pillugu suna ilikkarparput?

²⁰ Kristumiut siulliit tukkortut ilaarlugit nalitsinni Nalunaajaasut millionillit namminneq kajumis­sutsiminnik tunissuteqar­tarnermikkut nunarsuaq tamakkerlugu oqaluussineq tapersersor­tarpaat. Kikkulluunniit piffissamik aningaasanil­luunniit tunisinissamik pinngitsaalineqan­ngillat. Jehovammi kissaatigaa ‘pinaannata pinngitsaalineqar­nataluunniit’ kiffartorfigis­sagitsinni. (Kor 2. 9:7) Tunissuteqaraangatta tunissutitta qanoq annertutiginera pinnagu Jehovap pissutiginiagarput pingaar­tittarpaa. (Mak 12:41-44) Anania Safiiralu assigerusun­ngilagut, taakkumi namminis­sarsiorlutik ataqqineqarusuk­kamillu Guutimut kiffartorput. Petrusi, Johannesi Barnabalu ilaarlugit Guutimik inoqatitsinnillu asanninnivik kajumis­sissutigalugu Jehovamut kiffartortuarta! – Mat 22:37-40.