’Pisariaqarpoq tusagassaq nuannersoq oqaluussissutigineqarallassasoq’
„Pisariaqarporlu tusagassaq nuannersoq inuiaqatigiinni tamani oqaluussissutigineqarallassasoq.“ — MÁKORSE 13:10, NW.
1. Jehovap Nalunaajaasuisa kristumiuuneraqatigiinnilu uppeqatigiit tamarmik sunarpiaq assigiinngissutigaat, sunalu pissutigalugu?
KRISTUMIUUNERARTUNI tamani Jehovap Nalunaajaasuisa kisimik tusagassamik nuannersumik oqaluussissutiginninneq pisariaqarluinnartutut isigaat. Uppeqatigiit taakkuinnaat isumaqarput ilaasortaasut tamarmik pinngitsooratik inoqatitik saaffigisartussaagaat Guutip siunertai pillugit oqaloqatiginiarlugit. Sooq Jehovap Nalunaajaasui taama isumaqarpat? Isumaqaramik kristumiuugamik tamarmik immikkut Kristusip tumai atuartariaqaritik. (1 Pîtruse 2:21) Tamanna sumik nassataqarpa?
2. Inuit ilarpassuisa Jesus Kristus qanoq isumaqarfigaat, kisiannili nunamiikkallarami suliassaasa suna pingaarnersaraat?
2 Inuppassuit isumaat naapertorlugu Jesus Kristus tassaannaavoq angut ajunngitsumik iliortartoq. Napparsimasut ajorunnaarsittarpai, kaattut nerisittarpai, annikilliortullu asannittumik avaaginnittumillu pisarpai. Jesusilli suliai taakkuinnaanngillat. Siulliusumik pingaarnerusumillu Guutip naalagaaffia pillugu tusagassamik nuannersumik aallussilluarluni oqaluussissutiginnittuuvoq. Jordanip kuussuani kuisinnermi qaammatit arlaqanngitsunnguit kingornagut Jesus tamanut oqaluussisalerpoq oqarluni: ’Allamik isumataaritsi, qilammiup naalagaaffia qanillimmat.’ (Matîuse 4:17) Markusip oqaluttuaani allassimavoq: ’Jesus Galilæamut pivoq, Guutillu naalagaaffianik iivangkiiliu [tusagassaq nuannersoq] oqaluussissutigaa oqarluni: Ullut nallersiisat nalliupput, Guutillu naalagaaffia qanillivoq: allamik isumataaritsi, iivangkiiliulu upperisiuk.’ — Mákorse 1:14, 15.
3, 4. (a) Naak Jesus nappaatinik tamalaanik katsorsaasaraluarluni, kiffartuussinermini suna pingaarnerutippaa? (b) Suna siunertaralugu Jesus aallartitaava? (c) Jesusip oqaluussinini sumut assersuuppaa, ajoqersukkanilu qanoq ilioqquai?
3 Jesusip Peter, Andreas, Jakob Johannesilu qaaqquai maleqqulluni, imaattorlu atuarparput: ’Galilæalu tamaat Jesusip angalavaa naalagiartarfiini ajoqersuisarluni, iivangkiiliulu naalagaaffimmik oqaluussissutigalugu, inuillu nappaataat tamalaat ajuutaallu tamalaat katsorsartarlugit.’ Inuppassuit Galilæamiittut kimigiiserfiginiaraluarmanni tassaniittuaqqulluni, oqarpoq: ’Nunaqarfinnut allanuttaaq Guutip naalagaaffianik iivangkiiliu oqaluutigisassaraara, tamanna pillugu aallartitaagama.’ Taava aallarpoq Judæami naalagiartarfinni oqaluussiartorluni. — Matîuse 4:18-23; Lúkarse 4:43, 44.
4 Galilæamut uterluni Jesusip ’illorpallit nunaqarfinnguillu aqqutigai oqaluussillunilu Guutillu naalagaaffianik iivangkiiliu oqaluutigalugu’. (Lúkarse 8:1) Oqaluussinini katersuinermut assersuuppaa oqarlunilu: ’Katersugassat amerlaqaat, sulisussalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.’ (Matîuse 9:35-38) Allaammi qasuersaarniaraluartilluni inuppassuit ornikkaanganni ’ilassillugit Guutip naalagaaffianik oqaluffigai katsorsariaqartullu katsorsarlugit’. — Lúkarse 9:11.
5. Jesusip apustilini ajoqersukkallu 70-it oqaluussiartoqqullugit aallartikkamigit, sunik ilitsersuuppai?
5 Ilumoorpoq Jesusip napparsimasut ajorunnaarsittarai ilaatigullu kaattut nerisittarlugit. Pingaarnerpaamilli ulapissutigisarpaa Guutip naalagaaffianik inunnut oqaluutiginnittarneq. Kissaatigaalu ajoqersukkani taamaaliortassasut. Apustilini ilitsersoreeramigit marlukkuutaarlugit aallartippai oqarfigalugit: ’Oqaluussiartoritsi oqarlusi: Qilammiup naalagaaffia qanillivoq.’ (Matîuse 10:7) Lukasip ima allaatigaa: ’Aallartippai Guutip naalagaaffia oqaluussissutigeqqullugu napparsimasullu katsorsaqqullugit.’ (Lúkarse 9:2) Ajoqersukkat 70-it aamma Jesusip peqquai: ’Napparsimasullu tassaniittut katsorsarsigik oqarfigalugillu: Guutip naalagaaffia ilissinnut qanillivoq.’ — Lúkarse 10:9.
6. Qilaliartinnani ajoqersukkani kiffartuutissaat pillugu Jesusip sumik unnersuuppai?
6 Qilaliartinnani Jesusip malitsigisani peqquai oqaluussisarneq ingerlateqqullugu aammalu annertusaqqullugu. Oqarfigai: „Aallaritsi inuillu inuiaqatigiinnit tamaneersut ajoqersuganngortissigik . . . ajoqersorsigillu ilissinnut peqqusakka tamaasa maleruaqqullugit.“ (Matîuse 28:19, 20, NW) Aamma oqarfigai: ’Anersaap iluartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judæamilu tamarsuarmi Samariamilu nunallu isuanut allaat.’ (apustilit suliait 1:8) Tamatumannga paasineqarsinnaavoq Jesusip aamma apustiliisa Guutip naalagaaffianik oqaluussissutiginninneq pingarnerpaatillugu sulissutigigaat.
Naalagaaffik nalitsinni oqaluussissutigineqassasoq
7. Oqaluussisarnissaq ’pissutsit aaqqissuussaanerata naalerfissaani’ naammassiniarlugu suliarineqartussaq Jesusip qanoq oqaatigaa?
7 ’Pissutsit aaqqissuussaanerata naalerfissaani’ piumaartussat pillugit siulittuummini Jesus oqarsimavoq: „Naalagaaffimmillu tusagassaq nuannersoq tamanna oqaluussissutigineqassaaq nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliutissaaq.“ (Matîuse 24:3, 14, NW) Imaluunniit, soorlu Mákorse 13:10-mi (NW) allassimasoq: „Pisariaqarporlu tusagassaq nuannersoq inuiaqatigiinni tamani oqaluussissutigineqarallassasoq.“ — Aamma takuuk sarĸúmersitat 14:6, 7.
8. (a) Apustilit nalaanni ’tusagassap nuannersup’ suut ilagai? (b) Nalitsinni ’tusagassap nuannersup’ suut ilagai?
8 Naalagaaffimmik tusagassaq nuannersoq Jesusip ulluini imaqarnerminit ’ulluni kingullerni’ annerusumik imaqarpoq. Taassuma oqaluussissutigisimavaa Naalagaaffik qanillisoq, taama oqarnermigut uparuarniarlugu Messiasiulluni kunngiusoq inuit akornanniittoq. (2 Timûtiuse 3:1; Matîuse 4:17; Lúkarse 17:21, NW) Tusagassap nuannersup kristumiut siulliit oqaluussissutigisaata imaraattaaq Jesusip makissimanera qilaliarsimaneralu, inuillu maniguuttut kajumissaarneqarput Naalagaaffik tikiuttussaq uppereqqullugu. (apustilit suliait 2:22-24, 32; 3:19-21; 17:2, 3; 26:23; 28:23, 31) Maanna ’pissutsit aaqqissuussaanerata naalerfiani’ inuugatta, Naalagaaffimmik oqaluussissutiginninnerup imaraattaaq tusarliussaq malunnaqisoq Naalagaaffiup qilammi pilersitaanera pillugu. — sarĸúmersitat 11:15-18; 12:10.
Kikkut tusagassaq nuannersoq oqaluussissutigissavaat?
9. (a) Suna tunngaviginerarlugu oqartoqartarpa ullumikkut kristumiut tamakkeratik „tusagassaq nuannersoq“ oqaluussissutigisussaagaat? (b) Siornatigut Jehovap kikkut kiffarisarpai oqaatsini oqaluussissutigeqqullugu, tamannalu ullutsinni uatsinnut qanoq kingunilimmik isumaqassava?
9 Ullumikkut kikkut oqaluusseqataasussaappat? Kristumiuuneraqatigiinni upperisarsiortut isumaqarunanngillat tamarmik oqaluussisussaasut. Tassami, Jesus oqarami tusagassaq nuannersoq oqaluussissutigineqassasoq, oqanngilaq kikkut oqaluusseqataasussaasut. Kikkulli allat Jehovap suliassamut taama ittumut kiffarissavai kisianni uku oqaatsiminik upperinnittut inuunermikkullu maleruaasut! Noap ulluini Jehova aalajangerami inuiaat ajortut aserornissamik nalliukkumaartussamik siumut ilisimatissallugit, angut ’Guutimik ilumoortumik saqeqatiginnittoq’ kiffaraa. (1 Môrsase 6:9, 13, 14; 2 Pîtruse 2:5) Oqariartuutinik siulittuutaasunik Israelikkunnut tusarliisitsiniaraangami, ’kiffani, pruffiitit’ aallartittarpai. (Jerimia 7:25; Aamorse 3:7, 8) Israelikkut inuiaqatigiillutik Guutimut nalunaajaasuupput. (2 Môrsase 19:5, 6; Isaia 43:10-12) Aap, Jehovap kiffani tunniulluinnarsimasut nalunaajaasigisarpai.
10. Matîuse 28:19, 20-p oqaasertaanit qanoq paasineqarsinnaava ajoqersuganngortitsinermik peqqussut kristumiunut tamanut tunngasuusoq?
10 Oqartoqarsimavoq ajoqersuganngortitsinissamik peqqussut Matîuse 28:19, 20-mi allassimasoq apustilinut taamaallaat peqqussutigineqarsimasoq taamaattumillu kristumiunut nalinginnarnut atortuunngitsoq. Jesusilli oqaasii malugeriakkit: „Taamaattumik aallaritsi inuillu inuiaqatigiinnit tamaneersut ajoqersuganngortissigik . . . ajoqersorsigillu ilissinnut peqqusakka tamaasa maleruaqqullugit.“ Jesusip ajoqersugaasa inuit allat ajoqersortussaavaat Jesusip peqqusai tamaasa maleruaqqullugit. Peqqusaasalu ilagaat „ajoqersuganngortissigik“. Soorunami ajoqersukkat ilannguteqqammersut tamarmik ajoqersorneqartariaqarput aammattaaq peqqussut tamannarpiaq maleruaqqullugu.
11. (a) Ukiuni hundredilinni siullerni ilagiit kristumiut pinngitsooratik qanoq iliortussaappat? (b) Pisariaqartoq suna annakkumaarutissaava, aammattaaq suna pineqarpa?
11 Ukiuni hundredilinni siullerni kristumiut ilagiissaat taaneqarput ’Guutip innuttarisassarsiai, taakkuninnga taartumit qaamasumut tupinnartumut piminut qaaqqusisup ajunngingaarutai nalunaarutigissallugit’. (1 Pîtruse 2:9) Ilagiinnut ilaasortat aallussilluarlutik Guutip naalagaaffia nalunaajaassutigisarpaat. (apustilit suliait 8:4, 12) Paulusip ’iluartut’, tassa kristumiut tanitaasut, Romamiittut tamaasa allaffigai ’qanikkut tamanut nassuertartut annakkumaarutissaminnut’ aamma ’kinaluunniit Jehovap aqqanik torlorfiginnittoq annakkumaartoq’. (Rûmamiut 1:7; 10:9, 10, 13, NW) Tamanut nassuerneq annakkumaarutissaasoq kuisinnikkut pisarpoq, aammattaarli Jehovap naalagaaffia pillugu tusagassamik nuannersumik tamanut oqaluussissutiginnittarneq pineqarpoq.
12, 13. (a) ’Neriugisatsinnik tamanut nassuerutiginninneq’ Eprîarit 10:23-mi eqqartorneqartoq sumik ilaqarpa? (b) Tusagassaq nuannersoq ilagiit avataanni oqaluussissutigineqassasoq Tussiaatit 96-ianni qanoq takutinneqarpa, tamannalu sarĸúmersitat 7:9, 10-mi qanoq erseqqissarneqarluni?
12 Apustili Paulusip kristumiut hebræerit ima allaffigai: „Neriugisatsinnik tamanut nassuerutiginninneq nakimanata aalajangiunniartigu, ilumoormat neriorsuisoq.“ (Eprîarit 10:23, NW) Tamanut nassuerutiginninneq ilagiit ataatsimiinneriniinnaq pinngilaq. (Tussiaat 40:10, 11) Tussiaat 96:2, 3, 10-mi erseqqissumik takusinnaavarput ilagiit avataanni, inuiaat allamiut akornanni, oqaluusseqqussutaasumik peqqussut siulittuutaasoq, allassimammat: „Ajugaanera torlulaatigisiuk ullut tamaasa! Inuiaat allamiut oqaluttuussigit naalannassusianik, inuiaqatigiillu tamaasa tupinnartuliaanik. Inuiaqatigiinnut torlulagitsi: [Jehova] kunngiuvoq!“ Tassami, Matîuse 28:19, 20-mi aammalu apustilit suliáinik agdlagkane 1:8-mi Jesusip kristumiut peqquai inuiaqatigiinnut oqaluusseqqullugit.
13 Tamanut oqaluussineq tamanna pineqarportaaq Paulusip kristumiunut tanitaasunut hebræerinut nangilluni oqaasiisigut ukunuuna: ’Soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik [tamanut, NW] nassuerutiginnittut anitaannik.’ (Eprîarit 13:15) Bibelip atuagartaasa ilaanni, sarĸúmersita-ni, ’amerlangaartut’ inuiaqatigiinnit tamanit katersugaasut takuneqarput nipituumik torlulallutik oqartut: ’Annaassut Guutitta issiavissaarsuarmi issiasup savaaqqallu pigaat.’ (sarĸúmersitat 7:9, 10) Taamaattumik, ulluni makkunani pissutsit aaqqissuussaanerata nalerfigisaani tusagassamik nuannersumik oqaluussissutiginnittut tassaapput Jehovap Nalunaajaasui tunniulluinnarsimasut, tassa Kristusip anersaakkut qatanngutaasa sinneri aamma taakkua suleqatigisaat savanut assersuunneqartut ’amerlangaartut’. Qanorpiarli ilillutik tamanna suliarisussaavaat?
„Inuit tutsaanni illumillu illumut“
14. Jesus sumi oqaluussisarpa, tamannalu najoqqutassamik tunngaviusumik sumik ilinniarfigisinnaavarput?
14 Jesusip inuit toqqaannartumik oqaluussiffigisarpai. Atuarparput naalagiartarfinni oqaluussisartoq. Suna pillugu naalagiartarfinni? Sapaatikkut inuit tassani katersuuttarput Allakkallu Illernartut atuffassissutigineqarneri oqaloqatigiissutigineqarnerilu nassuiarneqartarnerilu tusarnaarlugit. (Matîuse 4:23; Lúkarse 4:15-21) Aammattaaq Jesusip inuit aqqusinnermiittut, immap sinerianiittut, qaqqap sivingarniniittut, illoqarfiup avataaniittut, puilasuliap eqqaaniittut aammalu inuit illuiniittut oqaluussiffigisarpai. Sumiluunniit inoqarfiusuniittut Jesusip oqaluussiffigisarpai. — Matîuse 5:1, 2; Mákorse 1:29-34; 2:1-4, 13; 3:20; 4:1, 2; Lúkarse 5:1-3; 9:57-60; Juánase 4:4-26.
15. (a) Ajoqersukkani oqaluussiartoqqullugit aallartikkamigit, Jesusip sunik ilitsersuuppai? (b) Bibelimik nassuiaasartut ilaasa tamanna qanoq nassuiarpaat?
15 Ajoqersukkani aallartikkamigit oqaluussiartoqqullugit, Jesusip inunnut aallartippai. Tamanna paasineqarsinnaavoq ilitsersuutaanit Matîuse 10:1-15, 40-42-mi allassimasunit. Versi 11-mi (NW) oqarpoq: „Sumut illoqarfimmut nunaqarfimmulluunniit pigaangassi, tassani qinngaqqunnanngitsut tassanimiut ujassavasi, tassaniittuaritsilu aallarserlusi.“ Bibelimi kalaallisuunngortitami atortussaatitaasumi versi taanna imatut oqaasertaqarpoq: ’Siunersiuisaritsi, qinngaqqunnanngitsumik tassaniittoqarnersoq,’ isumaqarunartumik ajoqersukkat nunaqarfimmiu nuimasoq ilisimannilluartorluunniit qinnuigissagaat paasiniaaqqullugu kikkut ajunngitsumik oqaatigineqartuunersut tusarliussamullu qinngaqqunnanngitsuunersut. Bibelimillu nassuiaasartut ilaasa Matîuse 10, versi 11 taama nassuiartarpaat.
16. Matîuse 10:11-mi oqaasii Jesusip pisaa naapertorlugu nassuiarniassagaanni, apustilit qanoq ilillutik qinngaqqunnanngitsut ujartussaavaat?
16 Eqqaamasariaqarporli kristumiuuneraqatigiinni guutisiornerup piinik ilinniarsimasut amerlanerit illumit illumut angalaarneq ajortut, Bibelimillu nassuiaasartut Allakkat Illernartut namminneq misilittakkatik tunngavigalugit nassuiartaraat. Jesusip ilitsersuutaa taassuma siunertaa naapertorlugu nassuiarneqassaguni paasisariaqarpoq Jesusip pisimagaa ajoqersukkami inuit ataasiakkaarlugit ujartassagaat, illumit illumut angalaarnermikkut imaluunniit inuit tutsaanni oqaluussinermikkut, Naalagaaffik pillugu tusagassamik ilisimatinniarlugit. (Matîuse 10:7) Inuit qanoq periarnermikkut takutissimassavaat qinngaqqunnannginnerlutik qinngaqqunnarnerlutilluunniit. — Matîuse 10:12-15.
17. Suup uppernarsarpaa Jesusip ajoqersugaasa inunnut qinngaqqunnanngitsunut pulaartarnerisa tunngaviginngikkaat siunnersuutigineqarsimaneri imaluunniit isumaqatigiissuteqarfigineqarsimaneri?
17 Tamanna paasineqarsinnaavoq Jesusip oqaasiinit Matîuse 10:14-imi allassimasunit: ’Sumilu ilassiumanngippasi oqaatsisilu tusarumanagit, taava illumit nunaqarfimmilluunniit tassannga anigitsi, isikkasilu qasiiarsigik.’ Taama oqarnermigut Jesusip pivaa ajoqersukkat qaaqqusaanatik inunnut aggertarnissaat oqaluussiffigiartorlugit. Soorunami, inooqutigiit tusarliussamik ilassinnittut illusisitsiumasut arlaat najorsimassavaat. (Matîuse 10:11) Oqaluussinerli pingaarnerpaavoq. Lúkarse 9:6-imi allassimavoq: ’Taava aallarput, illoqarfiillu aqqusaartorpaat iivangkiiliu oqaluutigalugu katsorsaallutillu tamaginni.’ (Aamma takuuk Lúkarse 10:8, 9.) Ajunngitsumik isumallit ajoqersukkanik, pruffiititut isigigamikkik ilassisut immaqalu ’imermik nillertumik immitsisut’, immaqalu illusisitsisut, akissarsinngitsoornavianngillat. Naalagaaffik pillugu tusarliussaq tusartarpaat. — Matîuse 10:40-42.
18, 19. (a) apustilit suliáinik agdlagkat 5:42 naapertorlugu kristumiut siullerpaat suut periaaseralugit oqaluussinertik suliaraat? (b) Paulusip oqaasiisa apustilit suliáinik agdlagkane 20:20, 21-miittut qanoq takutippaat uppinngitsunut oqaluussineq pineqartoq, ilagiit iluanni anersaakkut paarsilluni pulaartarneri pineqanngitsut?
18 Kristumiut ilagiissaat pilersinneqareersimammata, apustilit pillugit allassimavoq: „Ullullu tamaasa, naalaffimmi illumillu illumut angalaarlutik, soraarnatik ajoqersuiuaannarput Messiasimillu, Jesusimik, tusagassaq nuannersoq oqaluussissutigalugu.“ (apustilit suliait 5:42, NW qinerlerfissialik, takuuk quppernerup ataani nassuiaasiullugu ilanngussaq.) Oqaatsit „illumillu illumut angalaarlutik“ nutserneqarput grækerit oqaasiinit kat’ oiʹkon. Kataʹ agguaanersiutitut atorpoq. Taamaattumik oqartoqarsinnaavoq ajoqersukkat oqaluussinerat illumit illumut agguarneqarsimasoq. Tassa imaanngilaq siumut isumaqatigiissuteqareersimallutik asuli pulaartartut. Oqaaseq kataʹ taama ittumik atorneqarportaaq Lúkarse 8:1-imi oqaatsini ’illorpallit nunaqarfinnguillu aqqutigigai’.
19 Oqaatsit taakkuusut qasseersiutaallutik, kat’ oiʹkous, apustili Paulusip oqaaserai apustilit suliáinik agdlagkane 20:20-mi (NW). Tassani allappoq „inuit tutsaanni illumillu illumut angalaar“luni ajoqersunngitsoorsimallugit. Oqaatsit ’illumit illumut angalaartoq’ Bibelip nutsernerisa ilaanni nutserneqartarpoq „illuni“ imaluunniit „angerlarsimaffissinni“. Tamanna pissutigalugu Bibelimik nassuiaasartut kristumiuunerartut ilaasa Paulusimut pinerarpaat uppertut illuini anersaakkut paarsisutut pulaartarnini. Kisiannili Paulusip oqaasiinit tulliusunit paasineqarsinnaavoq uppinngitsunut oqaluussineq pisimagaa, oqarami: ’Juutit grækerillu nalunaajaaffigalugit Guutimut allamik isumataarnissamik uppernissamillu naalakkatsinnut Jesus Kristusimut.’ — apustilit suliait 20:21.
20. (a) Nalitsinni Jehovap Nalunaajaasuisa Guutip naalagaaffianik tusagassaq nuannersoq qanoq annertutigisumik oqaluussissutigisimavaat? (b) Inuit ilaasa oqaluussiuarneq immaqa qanoq apeqqutigiumassavaat?
20 Taamaattumik nalitsinni ’naalagaaffimmik tusagassaq nuannersoq tamanna nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik oqaluussissutigineqassammat’ oqaluusseriaaseq tamanna periaaserineqartariaqarpoq. (Matîuse 24:14) Ukiunit 65-init sivisunerusumik Jehovap Nalunaajaasuisa Guutip naalagaaffia pilersitaasoq pillugu tusagassaq nuannersoq inuit tutsaanni illumillu illumut angalaarlutik aallussilluarlutik oqaluussissutigaat — maanna nunani 210-ni taamaaliorlutik. Nalunaajaanerup ila annertussusia! Taamaappoq naak ullumikkut inuit amerlanerit tusarliussaq tusaraangamikku ilassiumanngikkaluaraat, ilaasalu puffaatigalugu allaat. (Matîuse 13:15) Suna pissutigalugu Jehovap Nalunaajaasuisa inuit tusarnaarusunngitsut allaallu inussiarniitsut oqaluussiffigiuarpaat? Apeqqut tamanna ilanngutassiami tulliusumi sammineqassaaq. (wD 1/1 88)
Illit uku qanoq akissavigit?
□ Bibeli naapertorlugu Jesusip oqaluussinerata suna ilisarnaatigaa?
□ Apustilit oqaluussinerminnut tunngatillugu sumik ilitsersuunneqarpat?
□ Nalitsinni suliaq suna suliarineqartariaqarpa, sunalu pissutigalugu?
□ Ullumikkut Jehovap tusagassamik nuannersumik oqaluussissutiginninnermut kikkut kiffarai?
□ Oqaluussisarneq sumi sunalu periaaseralugu suliarineqassava?