’Inussiaq aalajaatsoq’ siulersuisoqatigiivilu
„Kinami taava inussiaava aalajaallunilu silatooq naalagaata illumini kiffaminut paarsisunngortitaa, piffissanngoraangat nerisassaannik tunisaqqullugit?“ — Matîuse 24:45, NV.
1. Sooq Jehova oqartussaassutsimik tunisiumasarpa, kinalu oqartussaassutsimik annerpaamik tunineqarsimava?
JEHOVA tassaavoq Guuti aaqqissuussinermik pingaartitsisoq. Aammattaaq taanna tassaavoq oqartussaanernut inatsisinut naapertuuttunut tamanut aallaaviusoq. Pinngortitami aalajaatsut ilumoortuarnissaannik tatiginnilluni oqartussaassutsimik tunisiumasarpoq. Oqartussaassutsimik annerpaamik tunisimasaa tassaavoq ernini, Kristus Jesus. Taassuma ’isigaasa ataannut suut tamaasa Guutip pisippai, tamanillu annerutillugu ilagiinnut niaqoritikkaa’. — Evfisumiut 1:22.
2. Apustili Paulusip ilagiit kristumiut qanoq taavai, Kristusilu kikkunnut oqartussaassutsimik tunisisarpa?
2 Apustili Paulusip ilagiit kristumiut taavai „Guutip inoqutai“-nik, oqarlunilu Kristus, Guutip erneratut aalajaatsutut, inoqutaanut taakkununnga qullersanngortinneqarsimasoq. (1 Timûtiuse 3:15; Eprîarit 3:6) Taavalu Kristus Guutip inoqutaanut ilaasortaasunut oqartussaassutsimik tunisisarpoq. Matîuse 24:45-47-mi taassuma oqaasiini tamanna erserpoq, Ny Verden-nutsigaq naapertussagaanni ima oqarami: „Kinami taava inussiaava aalajaallunilu silatooq naalagaata illumini kiffaminut paarsisunngortitaa, piffissanngoraangat nerisassaannik tunisaqqullugit? Inussiaq taanna pilluassaaq naalakkami, tikiukkuni, taamaaliortoq naammattoorpani. Ilumut oqarfigaassi: Pigisaminut tamanut paarsisunngortissavaa.“
Ukiuni untritilinni siullerni illumi pisortaatitaasoq
3. ’Inussiaq aalajaallunilu silatooq’ kikkunnik ilaasortaqarpa, ilaasortallu ataasiakkaat qanoq taaneqarpat?
3 Bibelimi atuaqqissaartarnitsinni nalunngilarput inuiaat oqaluttuarisaaneranni qaqugukkulluunniit Guutip inoqutaanut ilaasortaasut tanitaasut ataatsimut tassaasut „inussiaq aalajaallunilu silatooq“ imaluunniit ’illumi pisortaatitaq’. ’Kiffatullu’ eqqartorneqartut tassaapput inoqutigiinnut ilaasortaasut ataasiakkaat. — Matîuse 24:45, NV; Lúkarse 12:42, NV.
4. Toqunermi siuninnguagut Jesus qanoq aperiva, sumullu imminut assersuuppa?
4 Toqunissi qaammatialunnguanik sioqqullugu Lúkarse 12:42-mi allassimasutut Jesus aperaaq: „Kinami taava illumi pisortaatitaava aalajaatsoq, silatooq, naalagaata kiffaminut paarsisunngortitassaa piffissanngoraangat nerisassaannik tunisaqqullugit?“ (NV) Kingornagullu, toqunissi ullualunnguanik sioqqullugu, angummut nunamut allamut aallalersumut taamaattumillu inussiaatiminik aggeqqusisumut taakkuninngalu pigisaminik tamanik qimatsiffiginnittumut Jesus imminut assersuuppoq. — Matîuse 25:14.
5. (a) Jesus qanga pigisaminik allanut isumaginnitsitsilerpa? (b) Illumi pisortaaqatigiissitassaminut ilaasussat sumik annerusumik piginnaassusilerpai?
5 Tassani eqqartorneqartutut iliorluni Jesus qanga aallartippa, tassa pigisaminik allanut isumaginnitsitsilerpa? Makinnermi kingorna taamaaliorpoq. Oqaatsit Matîuse 28:19-imiittut ilisimaneqarluartut atorlugit illumi pisortaaqatigiissitani tusagassamik nuannersumik oqaluussinissaannut annerusumik oqartussaassusilerpai. Ajoqersuineq Jesusip nunarsuarmi kiffartornermini aallarnersimasaa kiffanit ataasiakkaanit tamanit ’nunap isuanut allaat’ annertusisinneqartussaavoq. (apustilit suliáinik agdlagkat 1:8) Tassa ’Kristus sinnerlugu’ suliassaqarput. ’Anngigisanik Guutip piinik pilittaasutut’ allat ajoqersuganngortissavaat anersaakkullu inuussutissanik isumagalugit. — 2 Korintumiut 5:20; 1 Korintumiut 4:1, 2.
Inoqutaasut siulersuisoqatigiivi
6. Ukiuni hundredelinni siullerni illumi pisortaaqatigiissut Guutimit isumassarsisitaallutik qanoq iliorpat?
6 Kristumiut tanitaasut ataatsimut Naalakkap illumi pisortaatitaatut, Guutip inoqutaanut ilaasortaasunik ataasiakkaanik anersaakkut inuussutissanik piffissanngoraangat pilersuisussatut, sulisussaapput. Ukiup 41-p 98-illu akornanni taamanikkut illumi pisortaaqatigiissut isumassarsisitaanermikkut pisimasuiusunik oqaluttuat tallimat, allakkat 21-t aammalu sarĸúmersitat atuagartaat qatanngutiminnut, tassa Guutip inoqutaani ’kiffanut’, iluaqutissaasut allappaat. Allakkat isumassarsiarititaasut tamakku kiffanut, tassa tanitanut ataasiakkaanut, inuussutissanik anersaakkut ittunik imaqarput.
7. Inussiaaqatigiit taakkua ilaat anguterpaaluit sumut Kristusimit toqqarneqarsimappat?
7 Kristumiut tanitaasut ataatsimut tassaapput Guutip inoqutai, takussutissaqarporli inussiaaqatigiinnit taakkunannga anguterpaaluit siulersuisoqatigiittut takussaasutut sulisussatut Kristusimit toqqarneqarsimanerannut. Ilagiit aallarteqqaarneranniilli takuneqarsinnaavoq apustilit aqqaneq-marluk, ilaatigut Mattias, tassaasimasut siulersuisoqatigiit siulliit. apustilit suliáinik agdlagkat 1:20-26-mi tamatumannga tikkuunneqarpugut. Tassami Judas Iskariotip kingoraartissaanik toqqaaniarnermut atatillugu oqaluttuarisaanermik allattup Lukasip eqqartorpai taassuma ’paarsisuussutaa’ aammalu ’kiffartuut apustiliussut’.
8. Siulersuisoqatigiit ukiuni hundredelinni siullerni suut akisussaaffigaat?
8 Apustilit ’paarsisuussutaata’ ilagaa angutinik assigiinngitsunik kiffartuuteqarnissamut aammalu kiffartuussinermik aaqqissuussinissamut piukkussaminnik toqqaasarnermik akisussaaffik. Tamannaannaanngilarli. Aammattaaq ajoqersuisussaapput ajoqersuutinillu nassuiaasartussaallutik. Juánase 16:13-imi Jesusip neriorsuutigeriigaatut sallusuissutip anersaavata ilagiit kristumiut sallusuissummut tamarmiusumut pisikkiartuaartussaavai. Oqaatsimik ilassinnillutik kuisillutik tanitaallutik kristumiunngortut aallaqqaataaniilli ’apustilit ajoqersuutaannik’ sammisaqartuartuusimapput. Aap, angutit arfineq-marluk nerisassanik tunioraanermik suliassamik pisariaqartumik siulersuinissamut qinerneqarput, ’aqqaneq-marluk soraaratik qinusarsinnaaqqullugit oqaaserlu kiffartuutigisinnaaqqullugu’.— apustilit suliáinik agdlagkat 2:42; 6:1-6.
9. Ukiuni hundredelinni siullerni qanoq ilillutik siulersuisoqatigiit aqqaniliinnanngorpat, sunalu pissutiginnguatsiarlugu ingerlaannartumik nutaamik ilaasortaqalersinneqanngillat aqqaneq-marlunngortillugit?
9 Imaannguatsiarpoq siulersuisoqatigiit aallaqqaataani Jesusip apustiliiniinnaq ilaasortaqartut. Taamaattuaannassavali? Ukiup 44-p missaani apustili Jakob, Johannesip qatanngutaa, Herodes Agrippa I-mit toqutaatinneqarpoq. (apustilit suliáinik agdlagkat 12:1, 2) Qularnanngitsumik Judasip kingoraartissarsissunneqarneratut taanna kingoraartissarsiuunneqanngilaq. Suna pillugu? Qularnanngitsumik apustilini siulliulluni Jakob aalajaalluni toqummat. Akerlianilli, Judas tunussisutut toqusimavoq taamaattumillu taarserneqartariaqarluni Israel anersaakkut ittoq aqqaneq-marlunnik tunngaveqartuarsinnaaqqullugu. — Evfisumiut 2:20; sarĸúmersitat 21:14.
10. Ukiuni hundredelinni siullerni qanga qanorlu ililluni siulersuisoqatigiit annertusisinneqalerpat, Kristusillu Guutip inoqutai siulersorniarlugit taakku qanoq atorpai?
10 Tassa ukiuni hundredelinni siullerni siulersuisoqatigiinnut ilaasortaaqqaarsimasut tassaasimapput apustilit, angutit Jesusimik saqeqateqarsimasut aammalu toquneranik makinneranillu takunnissimasut. (apustilit suliáinik agdlagkat 1:21, 22) Pissutsilli allanngoriartortussaapput. Ukiut ingerlaneranni kristumiunik anguteqartarsimavoq anersaakkut inerilluarsimasunik ilinniakkaminnillu pigiliussilluinnarsimasunik aammalu ilagiinni Jerusalemimiittuni utoqqaanertatut toqqarneqartartunik. Kingusinnerpaamik ukiumi 49-mi siulersuisoqatigiit annertusisinneqarsimapput, apustilit sinneruttut saniatigut Jerusalemimi utoqqaanertanik ilaqalerlutik. (apustilit suliáinik agdlagkat 15:2) Tassa imaappoq siulersuisoqatigiit katitigaanerat ataavartussatut ataasiaannarluni aalajangersarneqanngilaq, pissutsilli pisariaqartitallu allanngoriartornerat ilutigalugu nalunanngitsumik Guutip siulersuineratigut allanngortinneqartarsimapput. Kristumiut juutiunngitsut kipineqartarnissaannik Mosesip Inatsisaanillu maleruaanissaannik apeqqutit aalajangerniarneranni Kristusip, ilagiinnut qullersaasutut sulisup, siulersuisoqatigiit annertusisat taakku atorpai. Taava tamatuma kingorna siulersuisoqatigiit allagaqarput aalajangikkaminnik nassuiaallutik aalajangersakkanillu maleruagassaasunik saqqummiussillutik. — apustilit suliáinik agdlagkat 15:23-29.
Pilittaq naatsorsueqatigineqarpoq
11. Kristumiut siulliit siulersuisoqatigiit piginnaassuseqartitaasutut siulersuinerannik pingaartitsippat, Jehovallu aaqqissuussineq tamanna pilluaqqugaa qanoq takuneqarsinnaava?
11 Kristumiut siulliit inuttut ataasiakkaatut ilagiittullu ataasiakkaatut siulersuisoqatigiit piginnaaneqartitaasutut siulersuinerannik pingaartitsisuupput. Ilagiit Antiochiami Syriamiittumiittut siulersuisoqatigiinnit allagarsiatik atuareeramikkik qiimmassaanerat nuannaarutigaat. Ilagiillu ataasiakkaat paasissutissani pisaminni aalajangersakkanik maleruaanerujartortillutik ’uppernikkut nakussatsikkiartorput ullullu tamaasa amerliartorlutik’. (apustilit suliáinik agdlagkat 16:5) Ersarippoq aaqqissuussinerup tamatuma Guutimit pilluaqqusaanera. — apustilit suliáinik agdlagkat 15:30, 31.
12, 13. Jesusip miinit pillugit talantillu pillugit assersuusiamini pisussat suut siulittuutigai?
12 Maannali qimerlooriartigu pingaaruteqartup tamatuma illua-tungaa. Miinit (aningaasat) pillugit assersuusiamini angummut pingaartumut kunngiussutsimik piartorluni nunamut allamut aallartumut kingornalu utertumut Jesus imminut assersuusiarivoq. (Lúkarse 19:11, 12) Ukiumi 33-mi makinnermi kingorna Jesus Guutip talerpiata tungaanut pisitaalluni nersornarsisinneqarpoq, akeqqami tummagassanngortitaanissaata tungaanut tassani issiassalluni. — apustilit suliáinik agdlagkat 2:33-35.
13 Assersuusiamini tamatumunnga assingusumi — talantinik assersuusiamini — Jesus oqarpoq naalagaq kingunersuagut uterumaartoq kiffani paarisaannik naatsorsueqatigiartorlugit. Inussiat aalajaatsut ima oqarfigai: ’Qassinnguanut ilumoortutit amerlasuunut paarsisunngortikkumaarpakkit; naalakkavit tipaatsuffianut iserit.’ Inussiarli aalajaanngitsoq pillugu ima oqarpoq: ’Peqanngitsoq arsaarneqassavoq piminik allaat. Kiffarlu atunngitsoq ajattorsiuk silataanut taarnersuarmut.’ — Matîuse 25:21-23, 29, 30.
14. Jesusip inussiani anersaakkut kinguaassiarineqartut qanoq ilimasuffigai?
14 Tamatuma kingunerujussuagut — ukiut 1900-ngajaat qaangiuttullu — Kristus kunngiussutsimik tunineqarpoq, tassa 1914-imi, ’inuiaat ullussaata aalajangersagaasut’ naammatsinneranni. (Lúkarse 21:24, NV) Tamatuma kinguninnguagut ’tikippoq inussiani [kristumiut tanitaasut] paarisaannik naatsorsueqatigilerlugit’. (Matîuse 25:19) Inuttut ataasiakkaatut ataatsimullu isigalugit Jesusip qanoq ilimasuffigai? Illumi pisortaasutut sulineq ukiuni hundredelinni siullerniilli taamaattuarsimavoq. Tamaasa talantialunnik Jesusip tunisimavai — ’piginnaassusiat naapertorlugu’ — tamannalu naapertorlugu naammassisaqarsimanissaat ilimagalugu. (Matîuse 25:15) Najoqqutassaq Korintumiunut agdlagkat sujugdlît 4:2-miittoq tamatumani atuussimavoq: ’Pilittat [illumi pisortaatitat] piumaffigineqartarput ilumuussasut.’ Talantinik erniortitsineq tassaavoq Kristus sinnerlugu aallartitatut aalajaatsutut sulineq, ajoqersuganngortitsiortorluni taakkuninngalu anersaakkut inuussutissanik pilersuilluni. — 2 Korintumiut 5:20.
’Inussiaq aalajaatsoq’ siulersuisoqatigiivilu maanna naggatissap nalaata naalernerani
15. (a) Kristumiut tanitaasut ataatsimut isigalugit Jesusip sumik ilimasuffigai? (b) Qanoq takuneqarsinnaava Kristusip illuminik misissuiartorluni tikiutinnginnermini inussiatut katersat taamaaliornissaat ilimagigaa?
15 Kristumiut tanitaasut ataatsimoorlutik illumi pisortaasutut aalajaatsutut ’piffissanngoraangat kiffami nerisassaannik’ pilersuisutut sulinissaat Kristusip naatsorsuutigaa. (Lúkarse 12:42) Lúkarse 12:43-mi ima oqarpoq: ’Pilluarpoq kiffaq taamaaliortoq naalakkami tikippani.’ Tamatumannga paasineqarsinnaavoq Kristusip tikiutinnginnerani ilagiinnut kristumiunut, Guutip inoqutaanut, ilaasortaasut taassuma inussiaanit tanitaasunit anersaakkut inuussutissanik isumagineqalereersimassasut. Guutip illuanik misissuiartorluni 1918-imi tikiukkami kikkut taama iliortut Kristusip naammattoorppai? — Malaki 3:1-4; Lúkarse 19:12; 1 Pîtruse 4:17.
16. Sooq Jesusip Guutip illuanik misissuiartorluni 1918-imi tikiukkami kristumiuuneraqatigiit ilagiivi piffissanngoraangat nerisassanik pilersuinngitsut naammattoorpai?
16 Jesusip Jehovap talerpiata tungaani sivisuumik utaqqiffia naalermat, nalunarunnaariartorpoq kikkut Kristusip kiffaanik anersaakkut nerisassanik pilersuisuunersut, allaat 1914-p siornani. Kristumiuuneraqatigiit ilagiivi taama iliorsimanerpat? Naamerluinnaq, tassami taakku silarsuarmiut naalakkersuinermik ingerlatsinerannut akuliusimaqaat. Nunasiaatilissuit nunasiaatimik annertusisikkiartornissaat anguniarlugu sulineranni ikiuunniarlutik eqinnaassimaqaat, inuiaassutsiminnillu pingaarneqqusaattarsimapput, taamaalillutik inuiaassutsimik pingaartitsiniarneq annertusisissimallugu. Tamatuma kingunerisaanik politikki tunngavigalugu naalakkersuisunik, sorsunnersuarmut siullermut peqataasunik, tapersersuinermikkut inuit amerlaqisut toqunerannut pisooqataasimapput. Uppernerat pissutsinit nutaanit atuutilersunit nukillaartinneqarsimavoq. Upperisarsiornikkut siuttumik pinngoriartorsimanermik ajoqersuummut Bibelimillu isornartorsiuinermut nakkaannarnerat pissutigalugu anersaakkut ajornartorsiulersimapput. Tassa kristumiuuneraqatigiit siuttuinit anersaakkut inuussutissalersorneqarnissaq ilimagineqarsinnaasimanngilaq.
17. Sooq Kristusip kristumiut tanitat ilaat ajattorpai, tamannalu taakkununnga qanoq kinguneqarpa?
17 Aammattaaq kristumiut tanitaasut akornanniittut Naalakkap ’talantiutaanik’ erniortitsinissaminnit annerutillugu namminiinnaq annannissaminnik ulapputiginnittut anersaakkut inuussutissanik pilersuisimanngillat. Paasinarsisimavoq taakku ’eqiasuttuusut’, Naalakkap pigisaanik isumaginninnissamut atorsinnaanngitsuusut. ’Silataanut taarnersuarmut,’ kristumiuuneraqatigiit ilagiissaasa inissisimaffigiuaannarsimasaannut, ajattorneqarput. — Matîuse 25:24-30.
18. Naalakkap kikkut naammattoorpai piffissanngoraangat kiffami nerisassaannik pilersuisut, tamannalu sumut uppernarsaataava?
18 Taavami, Naalakkap, Kristus Jesusip, inussiaminik misissuiartorluni 1918-imi tikiukkami kikkut naammattoorpai kiffami „piffissanngoraangat nerisassaannik“ pilersuisut? Aap, taamanikkut kikkut utertitsissutissamik pilliut pillugu, Guutip aqqa pillugu, Kristusip takussaanani najuunnera pillugu aammalu 1914-ip pingaaruteqassusia pillugu inunnut unneqqarissunut, sallusuissummik ujarlersunut eqqortumik paasissutissiisimappat? Ataasiullunilu pingasuussutsimik, inuup toqusuitsumik tarneqarneranik aammalu ikualasumik anniarfeqarneranik ajoqersuutit kukkusuunerannik kikkut qulaarisimappat? Aammalu pinngoriartorsimanermik ajoqersuutip anersaarsiornerullu navianassusiinik kikkut mianersoqqusisimappat? Pisimasuviusut ersersippaat taamaaliortut tassaasut kristumiorpaalunnguit tanitaasut atuagassiamut Zions Vagt-Taarn og Forkynder af Kristi Nærværelse-mut, maanna Napasuliaq Alapernaarsuiffik-mik taaguuteqartumut, atasuusut.
19. (a) Inussiaqatigiit aalajaatsut qanoq ilillutik 1918 sioqqullugu takkussimappat? (b) Qanoq ilillutik anersaakkut nerisassanik pilersuippat, qangalu taamaaliulerpat?
19 Vagttaarnet-mi oktoberip ulluisa 15-ianni 1945-mi saqqummersumi allassimavoq: „Taamatut ukiumi 1878-imi, Naalakkap 1918-imi naalaffimmut tikinnera ukiunik 40-nik sioqqullugu, ilumoortunik tunniulluinnarsimasunik kristumioqarpoq, palaseqatigiit peqatigiinnerinit avissaarsimasunik kristumiuussuserlu naapertorlugu inoorusuttunik . . . Ajoqersuutit ilumoortut Guutip Kristus Jesus aqqutigalugu ’piffissanngoraangat inuussutissatut’ tunniussai akuttunngitsumik inoqutaanut meeqqatut tunniulluinnarsimasunut tamanut anngussinnaaqqullugit, ukiup tulliani 1879-imi julimi, atuagassiaq manna, Vagttaarnet saqqummersalerpoq.“
20. (a) Ullumikkut Siulersuisoqatigiit qanoq pilersimappat? (b) Siulersuisoqatigiit ilaasortaasa suut suliaraat, kimillu siulersorneqarlutik?
20 Atuagassiami Vagttårnet-imi februarip ulluisa 15-ianni 1972-imi saqqummersumi maannakkut Siulersuisoqatigiit qanoq pilersimanerat erseqqissaatigineqarpoq. Ima allassimavoq: „Ukiut tallimat kingorna [1884-imi] Zion’s Watch Tower Society atuutilersinneqarpoq, inuillu unneqqarissut tuusintilikkuutaat Guutimik ilisarserusuttut taassumalu oqaasiinik paasinnikkusuttut anersaakkut inuussutissaannik pilersornissaannut ’atortuulluni’ . . . Peqatigiiffik taanna Pennsylvaniami qullersaqarfeqartoq kristumiunit tanitaasunit kuisimasunit tunniulluinnarsimasunillu suleqatigineqalerpoq. Siulersuisunut ilaasortaagaluarunik ilaasortaanngikkaluarunilluunniit suliassamut ’inussiap aalajaallunilu silatuup’ suliassaanut tamaviaarlutik suleqataapput. Kiffaaqatigiinnik siulersuinermut inuussutissalersuinermullu ikiuupput, taamaalillutillu siulersuisoqatigiit pilerput. Tamanna pivoq qularnanngilluinnartumik Jehovap pissaanerata takussaanngitsup imaluunniit anersaavata iluartup siulersuineratigut, aammalu Guutip ernerata, Jesus Kristusip, ilagiit kristumiut qullersaata, siulersuineratigut.“
21. (a)Kristusip kikkut anersaakkut nerisassanik pilersuisut naammattoorpai, qanorlu akilerlugit? (b) Inussiaq ilumoortoq Siulersuisoqatigiivilu sumut iserpat?
21 Tassa imminut inussiaanerartunik misissuiartorluni 1918-imi tikiukkami Kristusip kristumioqatigiit nunarsuarmi sumi tamaaniittut Bibelimi ajoqersuutinik ilumoortunik ilagiit iluanni aammalu ilagiit avataanni oqaluussinermi atugassanik naqitertitsisartut naammattoorpai. Kristusip siulittuutigisimasaatut 1919-imi malunnarluartumik pisoqarpoq: „Inussiaq taanna pilluassaaq naalakkami, tikiukkuni, taamaaliortoq naammattoorpani. Ilumut oqarfigaassi: Pigisaminut tamanut paarsisunngortissavaa.“ (Matîuse 24:46, 47, NV) Kristumiut ilumoortut taakku naalakkamik tipaatsuffianut iserput. Paasinarsisimavoq ’qassinnguanut ilumoortuusut’ Naalakkamillu ’amerlasuunut paarsisunngortinneqarput’. (Matîuse 25:21) Inussiaq aalajaatsoq taassumalu Siulersuisoqatigiivi annerusumik suliaqalernissaminnut piareersimasimapput. Taama pisoqarsimanera ilumut uagut nuannaarutigisinnaavarput, tassami kristumiut ilumoortut inussiap aalajaatsup Siulersuisoqatigiivisalu Guutimut-tunniusimallutik sulinerminni ullumikkut naammassisaannik assut iluaqutiginnipput! (wD 15/3 90)
Eqqaamavigit?
□ Kina Guutip inoqutaanut qullersaava, taannalu kikkunnut oqartussaassutsimik tunisiva?
□ Suliassaq peqatigiilluni suliarisassaq suna Kristusip inussiaqatigiinnut taakkununnga suliassiissutigaa?
□ Inussiaqatigiit iluanni qanoq ittumik ataatsimooqatigeeqarpa, sumillu suliassaqarpa?
□ Kristus Guutip inoqutaanik misissuiartorluni tikiukkami kikkut anersaakkut nerisassanik pilersuisuusut naammattoorpai?
□ Ullumikkut Siulersuisoqatigiit qanoq pilersimappat?
[Qupp. 10-mi assiliartaq]
Ukiuni Hundredelinni siullerni ’inussiaq’ siulersuisoqatigeeqarpoq apustilinik Jerusalemimilu ilagiinni utoqqaanertaasunik ilaasortaqartumik