“Anersaamik illernartumik peqangaa­lerput”

1. Ullormi piinsimi inuit sunersut oqaluttuariuk.

INUPPASSUIT Jerusalemmip aqquserngini nuannaarlutillu pissangapput.a Guutisiorfiup pilliivianiit pujorpoq, aamma akioriilluni erinarsuutaagunartunik Levikkut erinarsorput. (Tuss 113-118) Tikeraarpassuit aqqusinerni takussaapput. Nunanit ungasis­sorsuarniit ukunaneersuupput: Elarmi, Mesopotaamia, Kapaduukia, Pontusi, Egypteni aamma Roma.b Susunuku? Ulloq piinsi, tassa ‘inereqqaatisiorfik’, nalliussivaat. (Mos 4. 28:26) Ukiumoortumik nallius­sinermi tamatumani suaasiassanik katersinerup naammassinera aamma qajuusiassanik katersuinerup aallartinnera malunnar­tinneqartarpoq. Ulloq nuannersuusarpoq.

2. Ukiumi 33-mi ullormi piinsimi tupinnartumik sumik pisoqarpa?

² Ukiumi 33-mi upernaakkut ullaap tungaani qulingiluat missaanni tupinnangaartumik pisoqarpoq ukiorpassuarni eqqaamaneqarumaartumik. Tassanngaannaq “qilammit nipi nipitooq anorersuartut” nipilik tutsiuppoq. (ApS 2:2) Isersimasullu ilinniartitat 120-t missaan­niittut tamarmik tusaasin­naavaat. Tupaallan­nartumillu pisoqarpoq. Oqqat innertut ittut takussaalersut isersimasut niaquinut tupput.c Taava ilinniartitat “anersaamik illernartumik peqangaalerput” allamiutullu oqalulerlutik. Illumiit anigamik tikeraat allamiut Jerusalem­mimiittut oqaluutilerpaat. Oqaluussaallu tupigusungaarput, tassami immikkut tamarmik “oqaatsitik atorlugit oqaluttut” tusaavaat. – ApS 2:1-6.

3. (a) Sooq oqarsin­naavugut guutisiornermi ilumoortumi ukiumi 33-mi ulloq piinsi pingaaruteqartoq? (b) Petrusip oqalugiaatimini “qilaap kunngeqarfianut matuersaatit” siullersaat qanoq atorpaa?

³ Pisimasoq tupinnartoq tamanna guutisiornermi ilumoortumi pisimasuuvoq pingaarutilik – tassami inuiaqatigiit anersaakkut Israali, kristumiut tanitat ilagiivi, pilersin­neqarput. (Gal 6:16) Allamilli aamma pisoqarpoq. Petrusi ullormi tamatumani inuppas­suarnut oqalukkami “qilaap kunngeqarfianut matuersaatit” imminut paaritin­neqartut pingasuusut siullersaat atorpaa. Matuersaatillu pingasut tamarmik immikkut inunnut eqimattanut assigiin­ngitsunut pingasunut immikkut pisinnaatitaanissamut ammaassinermut atortus­saapput. (Mat 16:18, 19) Matuersaat siulleq atorneqarmat juutit aamma juutit upperisaannut ilanngus­simasut nutaarsiassat nuannersut paasisin­naalerlugillu Guutip anersaavanik illernartumik taninneqarsin­naalerput.d Taamaalillutik anersaakkut Israalimut ilaalersin­naapput Guutip kunngeqarfiani kunngiunis­saminnik palasiunis­saminnillu neriuuteqalerlutik. (Saqq 5:9, 10) Piffissap ingerlanerani Samaariamiut kingusin­nerusukkullu inuit inuiannit tamaneersut taamatut neriuuteqalerput. Ukiumi 33-mi ullormi piinsimi pisimasut pingaarutillit qanoq ilinniarfigisin­naavagut?

“Tamarmik illumi katersuupput” (ApS 2:1-4)

4. Ilagiit kristumiut ukiumi 33-mi pilersin­neqartut suliaat maannamut qanoq ingerlan­neqarpat?

⁴ Ilinniartitat 120-t missaan­niittut inimi qullermi katersuuttut anersaamik illernartumik taninneqarmata kristumiut siulliit ilagiittut aaqqissuun­neqarput. (ApS 2:1) Ulloq naammat inuit tuusintit arlallit imermut morsutsin­neqarlutik ilagiinnut ilaalersimapput. Taamani peqatigiiffipput aallartippoq nalitsinnilu ilagiit kristumiut amerliar­tuinnarlutik. Angutit arnallu Jehovamik asannittut ‘Kunngeqarfik pillugu nutaarsiassat nuannersut inuiaqatigiinnut tamanut’ naggatissaq nalliutsinnagu “nunarsuaq tamakkerlugu” oqaluus­sissutigaat. – Mat 24:14.

5. Kristumiut siulliit assigalugit uppeqatitsinnik peqateqartarneq qanoq iluaqutigisarparput?

⁵ Aamma kristumiut ilagiittut aaqqissuun­neqarnerat tanitanut kingusin­nerusukkullu ‘savanut allanut’ anersaakkut nakussatsis­sutaassaaq. (Joh 10:16) Paulusip kristumiunut Romamiittunut allakkamini ersersippaa ilagiin­niittut tapersersoqatigiinnerat qanoq pingaar­titsigalugu. Ima allappoq: “Takorusoqaassi, nakussatseq­qullusimi anersaakkut tunissummik avitseqatigerusukkassi imaluunniit allatut oqaatigalugu: Uppernitsigut tamatta qiimmas­saqatigiin­niassagatta.” – Rom 1:11, 12.

6, 7. Nalitsinni Jehovap Nalunaajaasuisa Jiisusip inuiannut tamanut oqaluus­seqqusinera qanoq eqquutitippaat?

⁶ Kristumiut siulliit suliaannik uagut nangitseqataavugut. Jiisusip ilinniartitani taakkua sapernar­tissinnaasaannik pissanganar­tumilli suliassippai. Ima oqarfigai: “Inuit inuiaqatigiinnit tamaneersut uannik malinnit­tunngoq­qullugit ilinniar­tikkiar­torsigit. Ataatap aqqani, Ernerup aqqani anersaallu illernartup aqqani imermut morsutsissavasi ilissinnullu peqqussutinnik tamanik maleruaaq­qullugit ilinniar­tillugit.” – Mat 28:19, 20.

⁷ Nalitsinni Jehovap Nalunaajaasuisa tamanna aamma suliaraat. Soorunami nunarsuarmi inuit assigiin­ngitsunik oqaasillit oqaluus­siffigis­sallugit sapernarsinnaavoq. Jehovalli Nalunaajaasuisa atuagassiat Biibilimik tunngavillit oqaatsini tuusintinit amerlanerusuni saqqummersis­simavaat. Jehovap Nalunaajaasuisa ilagippatsit Guutillu kunngeqarfia pillugu oqaluus­sisaruit nuannaar­nissamut pissutis­saqarluarputit. Tassaavutimmi nunarsuarmi inuit amerlagisas­saanngitsut Jehovap aqqanik ilisiman­nittutut nassuiaaq­qissaartartut ilaat.

8. Qatanngutigiissuit qanoq iluaqutigaagut?

⁸ Piffissami erloqinartumi matumani nuannaarluta pinertusaarsin­naaqqulluta Jehova Guuti nunarsuaq tamakkerlugu qatanngutigiis­suarnik pilersitsisimavoq. Paulusi kristumiunut hebræerinut ima allappoq: “Asannit­tuliornissamut ajunngitsulior­nissamullu kajumis­saaqatigiik­kumalluta isumassoqatigiitta. Ataatsimiigias­saarsimasut ilaarnagit qiimmas­saqatigiitta. Ulloq nalliutilermat tamakku tamaasa iliuuserinerus­savagut.” (Hebr 10:24, 25) Kristumiut ilagiittut aaqqissuun­neqarnerat Jehovamit tunissutaavoq uppeqatinnik qiimmas­saasinnaaq­qullutit namminerlu qiimmas­sarneqarsin­naaqqullutit. Anersaakkut qatanngutitit qanimut attaveqarfigisakkit kristumiullu ataatsimiinnerini tamatigut najuuttarlutit.

‘Tamarmik immikkut oqaatsitik atorlugit oqaluttut tusaavaat’ (ApS 2:5-13)

9, 10. Allamiutut oqaasillit oqaluus­siffigisin­naajumallugit oqaluus­sisartut ilaat susimappat?

⁹ Takorlooruk ukiumi 33-mi ullormi piinsimi juutit upperisaannut ilanngus­simasut juutillu katersuuttut nuannaangaarnerat. Ilimanarpoq taamani najuuttut amerlanersaat nammineq oqaatsimik saniatigut grækerisut hebræerisul­luunniit oqalussin­naasimassasut. Maannali allamiut ‘tamarmik immikkut oqaatsitik atorlugit oqaluttut tusaavaat’. (ApS 2:6) Oqaatsit ilitsoq­qussatik atorlugit nutaarsiassat nuannersut tusaramikkit killitsingaarsimassapput. Soorunami nalitsinni tupinnar­tuliornikkut allamiutut oqaluleriataarsin­naanngilagut. Oqaluus­sisartorpassuilli Guutip kunngeqarfianik inuiannut tamanut oqaluus­sisarput. Qanoq? Ilaasa allamiut oqaasii ilinniarsimavaat ilagiinni allamiutut oqaasilinni kiffartorsin­naajumallutik, imaluunniit nunamut allamut nuussimapput. Oqaluus­sisartullu taakkua ilungersorlutik iliuuserisimasatik oqaluus­siffigisamik nuannaarutigisaraat malugisarpaat.

¹⁰ Christine assersuutigeriartigu. Nalunaajaasut arfineq-marluk allat peqatigalugit oqaatsit gujarati pikkoris­sarfigai. Ilaanni suliffimmini arnaq inuusuttoq naapikkamiuk ilitsoq­qussaralugu oqaasii atorlugit gujaratitut ilassivaa. Arnaq tupigusuppoq, paaserusuppaalu sooq Christinep oqaatsit taama ilikkaruminaatsigisinnaasut ilinniarusus­simagai. Christinellu oqaluus­siffigaa. Arnarlu Christinemut oqarpoq: “Ilumut pingaarutilimmik oqaluttuas­saqarsimassaasi.”

11. Inunnut allamiutut oqaasilinnut oqaluus­sinissamut qanoq piareersarsin­naavugut?

¹¹ Soorunami tamatta allamiut oqaasiinik ilinniar­nissamut periarfis­saqanngilagut. Tamattali inunnut allamiutut oqaluttunut oqaluus­sinissamut piareersarsin­naavugut. Qanoq? Ilaatigut app-eq JW Language^® atorlugu illoqarfitsinni allamiutut oqaasilinnut ilassin­neriaatsit ilinniarsin­naavugut. Aamma oqaaseqatigiinnik soqutigin­nilersitsisin­naasunik ilinniarsin­naavugut. Nittartak­katsinni jw.org-imi isiginnaagassiat Biibililersaarutillu oqaluus­siffigisap oqaasii atorlugit sanaat takutis­sinnaavagut. Taamaaliornikkut nuannaangaarsin­naavugut, soorlu kristumiut siulliit allamiut ‘oqaasii atorlugit’ oqaluus­sigamik nuannaangaartut.

‘Petrusi sassarpoq’ (ApS 2:14-37)

12. (a) Pruffiitip Juuilip ukiumi 33-mi ullormi piinsimi tupinnar­tuliornikkut pisussaq qanoq oqaatigaa? (b) Sooq Juuilip siulittuutaata kristumiut siulliit nalaanni eqquunnissaa ilimagineqarpa?

¹² ‘Petrusi sassarpoq’ allamiut assigiin­ngitsorpas­suarnik oqaasillit oqaluun­niarlugit. (ApS 2:14) Tusarnaarusuttunut tamanut nassuiarpaa tupinnar­tuliornikkut allamiutut oqalussin­naalerneq Guutimeersuusoq tamannalu pruffiitip Juuilip siulittuutaanut uunga naapertuuttoq: “Anersaara kuiumaarpara inunnut tamanut.” (Joel 3:1) Jiisusi qilalian­nginnermini ilinniar­titaminut oqarpoq: “Ataataq qinnuigissavara, taassumalu … ikiortis­sassinnik allamik tunissavaasi.” Jiisusillu ikiortissaq taanna tassaanerarpaa ‘anersaaq illernartoq’. – Joh 14:16, 17.

13, 14. Petrusi tusarnaartimi uummataat killikkumallugit qanoq iliorpa, periaasialu qanoq ilaarsin­naavarput?

¹³ Petrusip naggasiilluni katersorsimasunut oqaasii uku paatsuugas­saanngillat: “Israalikkut tamarmik qularis­sanngilaat Jiisusi taanna qisummi naalliutsitsiviliami toqutarsi Guutip Naalagan­ngortillugulu Kristusin­ngortikkaa.” (ApS 2:36) Soorunami Petrusip tusarnaartaasa amerlanersaat Jiisusi qisummik naalliutsitsiviliami toqutaammat najuutin­ngillat. Inuiattulli ataatsimut isigalugit pisumut akisussaapput. Maluginiaruk Petrusip juuteqatini ataqqin­nittumik oqaluullugit uummataat killinniarai. Petrusip tusarnaartini assuariniarnagit allamik isumataar­tinniarpai. Petrusip oqaasii ajuallaatigaat? Naamerluinnaq. Tassami “uummatimikkut kapineqartutut misigipput”. Imalu aperipput: “Qanoq iliussaagut?” Qularnan­ngilluinnarpoq Petrusip isumalluar­tuunera tusarnaartaasa uummatimikkut killitsis­sutigalugulu allamik isumataar­nissaminnut kajumis­sissutigigaat. – ApS 2:37.

¹⁴ Petrusip tusarnaartimi uummataannik killiiniar­nermini periaasia ilaarsin­naavarput. Uagut oqaluus­siffigisatta isiginnit­taasiat Biibilimut naapertuutin­ngippat naqqinniapal­lattassan­ngilagut. Isumaqatigiis­sutigisin­naasarput samminerugutsigu pitsaanerussaaq. Taamaalior­taruttami Guutip oqaasia tunngavigalugu ataqqin­nittumik tunngavilersuisin­naassaagut. Ilumoortoq Biibilimeersoq isumalluar­nartumik saqqummiuk­kaangatsigu eqqortuliorusuttut tusarlius­satsinnik akuerin­ninnissaat ilimanar­nerussaaq.

‘Tamassi imermut morsutsitaagitsi’ (ApS 2:38-47)

15. (a) Petrusi qanoq oqaaseqarpa, tusarnaartaalu qanoq qisuariarpat? (b) Qanoq nalunngilarput inuit tuusintillit ullormi piinsimi nutaarsiassanik nuannersunik tusartut imermut morsutsin­neqarnissamut piareersimasut?

¹⁵ Ukiumi 33-mi ullormi piinsimi juutinut juutillu upperisaannut ilanngus­simasunut Petrusi ima oqarpoq: “Peqqissimigitsi, tamassilu … imermut morsutsitaagitsi.” (ApS 2:38) Tamatuma kingunerisaanik inuit 3.000-t missaat imermut morsutsin­neqarput, tamannalu tatsini Jerusalem­mimiittuni eqqaaniit­tuniluunniit pisimagunarpoq.e Anersaakkut piareersimanatik ingerlaannaq imermut morsutsitaappat? Imaappa Biibilimik ilinniar­titagut meerartagul­luunniit suli anersaakkut piareersimanatik imermut morsutsin­neqarsinnaasut? Naamerluinnaq. Eqqaamajuk juutit upperisaannut ilanngus­simasut juutillu ullormi tamatumani imermut morsutsin­neqartut Guutip oqaasianik ilisiman­nilluartuusut inuiannullu Jehovamut tunniul­luinnarsimasunut ilaasut. Aammami pimoorus­silluarnertik ersersereerpaat – taakkuami ilaat ungasis­sorsuarmiit ukiumoortumik nallius­sisarnermut najuukkiar­torlutik Jerusalemmimut tikissimapput. Guutip siunertaata piviusun­ngortin­neqarnissaani Jiisusip Kristusip pingaaruteqarnera pillugu ilumoortunik akuerin­nereerlutik Guutip kiffartorfigiuar­nissaanut piareerput – maannali Kristusip ilinniar­titaatut imermut morsutsin­neqarsimasutut.

16. Kristumiut siulliit qanoq imminut pilliutigeriaan­naasimappat?

¹⁶ Erseqqippoq Jehovap inuit taakku pilluaqqugai. Ima oqaluttuarineqarput: “Uppertun­ngortut tamarmik katersuupput pigisaminnillu tamanik avitseqatigiillutik. Nunaatitik pigisatillu tuniniarpaat pisariaqar­tinneqartullu naapertorlugit aningaasat tamanut agguaallugit.”f (ApS 2:44, 45) Soorunami kristumiut ilumoortut tamarmik, aamma nalitsinni, taamatut asannit­tuliorusul­lutillu imminut pilliutigeriaan­naarusuttarput.

17. Imermut morsutsin­neqarusuttoq susariaqarpa?

¹⁷ Jehovamut tunniul­luinnarlunilu imermut morsutsin­neqarusuttoq Biibili naapertorlugu pingaarutilinnik arlalinnik iliuuseqar­tariaqarpoq. Biibili ilisimal­luartariaqarpaa. (Joh 17:3) Uppertuusariaqarpoq, siornatigullu kukkussutigisimasani peqqissimis­sutigisariaqarlugit. (ApS 3:19) Taava allamik isumataarluni Guutip piumasaanut naapertuuttumik inooriaaseqaler­tariaqarpoq. (Rom 12:2; Ef 4:23, 24) Taakku pingasut iliuuserereerlugit qinunikkut Guutimut tunniul­luinnar­tariaqarpoq imermullu morsutsitaalluni. – Mat 16:24; Pet 1. 3:21.

18. Kristusip ilinniartitai imermut morsutsin­neqarsimasut qanoq immikkut pisinnaatitaaf­feqarpat?

¹⁸ Jiisusimik Kristusimik malinnittuuit Jehovamut tunniul­luinnarsimasoq imermullu morsutsitaasimasoq? Taamaappat immikkut pisinnaatitaaffinnut qujamasunnerit ersersittaruk. Kristumiut siulliit nalaanni Jiisusimit ilinniartitat anersaamik illernartumik peqangaalersimasut assigalugit sunniuteqangaartumik oqaluus­sisinnaavutit Jehovallu piumasaatut iliorsin­naallutit.