Kikkut ’annaanneqassappat’?
’Kinaluunniit Jehovap aqqanik torlorfiginnittoq annakkumaarpoq.’ — APUSTILIT SULIAIT 2:21.
1. Sooq ukiumi 33-mi u.n.k. piinsip ullua oqaluttuarisaanermi allanngorfiua?
UKIUMI 33-mi piinsip ullua inuiaat oqaluttuarisaaneranni allanngorfiuvoq. Sooq? Ullormi tamatumani inuiaqatigiit nutaat pilersinneqarmata. Aallaqqaataani inuiaqatigiittut amerlavallaanngillat — taamaallaat tassaapput Jesusip ajoqersugai 120-t Jerusalemimi inimi qullermi katersuussimasut. Inuiaqatigiit taamani piusut amerlanersaat ullumikkut puigorneqareersimapput, inuiaqatigiilli inimi tamatumani pilersinneqartut suli atuupput. Tamanna tamatsinnut immikkut pingaaruteqarpoq, inuiaqatigiit taakku Guutimit toqqarneqarsimammata inuiannut tamanut taassumunnga nalunaajaasussatut.
2. Tupinnartuliat suut inuiaqatigiit nutaat pilersinneqarnerannut ersiutaasimappat?
2 Inuiaqatigiit nutaat taakku pilermata pingaartumik pisoqalerpoq Joelip siulittuutaanik eqquutitsisunik. Pisut tamakku apustilit suliait 2:2-4-mi atuarsinnaavavut: ’Tassanngaannaq ittuppaluk qilammit pivoq, soorlu anorersuaq pitorartoq, illullu taakkua najugaata ilua tamakkerpaa. Taakkununngalu takutipput oqqat nuungajuttuut innerinnaasullusooq, tamakkualu taakku tamaasa immikkut tuffigaat. Taava tamarmik anersaamik illernartumik ilumioqangaalerput, oqaatsinillu allanertanik oqalulerput, imatut soorlu anersaap oqalutsikkaatik.’ Taamaalillutik angutit arnallu 120-t aalajaatsut taakku inuiaqatigiinngorput anersaakkut ittut, apustili Paulusip kingusinnerusukkut ’Israel Guutip pigisaa’-nik taasaanut ilaasut siulliit. — Galâsiamiut 6:16.
3. Joelip siulittuutaasa ilaat suna ukiumi 33-mi piinsip ulluani eqquuppa?
3 Inuppassuit katersuupput ’anorersuaq pitorartoq’ sunaanersoq paasiniarlugu, apustilillu Peterip nassuiaappai Joelip siulittuutaasa ilaat maanna eqquutilersoq. Siulittuut suna? Oqaasii tusarnaariartigik: ’„Piumaarporlu ullussani kingullerni,“ oqarpoq Guuti, „taava uinilinnut tamanut anersaannik kuisiumaarpunga; ernisilu panisilu pruffiitisut oqalussapput, inuusuttortasilu takorloornernik takusaqassapput, utoqqartasilu sinnattukkanik sinnattussapput. Kiffannullu angutaasunullu arnaasunullu allaat ulluni taakkunani anersaannik kuisiumaarpunga, pruffiitisullu oqalussapput. Tupinnartulianillu nalliutitsiumaarpunga qilammi pavani nalunaaqqutinillu nunami samani, aammillu innermillu putsumillu isortortalimmik. Seqineq taartunngussavoq, qaammallu aanngorluni, Jehovap ullua angeqisoq ersingaarumaartoq nalliunngikkallartillugu. Piumaarporlu, kinaluunniit Jehovap aqqanik torlorfiginnittoq annakkumaarpoq.“’ (apustilit suliait 2:17-21) Oqaatsit Peterip issuagai Joel 3:1-5-imi atuarneqarsinnaapput, eqquunnerallu isumaqarpoq inuiaqatigiinnut juutiusunut ullut kingulliit nalliutilersut. ’Jehovap ullua angeqisoq ersingaarumaartorlu’, tassa Israelikkunnut ilumuunngitsunut eqqartuutiffissaq qanillivoq. Kikkulli aniguissappat imaluunniit annaanneqassappat? Tamannalu sumut assersuutaava?
Siulittuut marloriarluni eqquutissaaq
4, 5. Pisussat eqqarsaatigalugit Peter qanoq iliornissamik siunnersuiva, siunnersuutaalu sooq aamma ullumikkut pingaaruteqarpa?
4 Ukiup 33-p u.n.k. kingorna anersaakkut Israel Guutip pigisaa siumukariartorpoq, timikkulli inuiaqatigiit Israelikkut taamaanngillat. Ukiumi 66-imi u.n.k. Israelikkut Romamiut sorsuffigaat. Ukiumi 70-imi u.n.k. Israel inuiaqatigiittut puiunnaangajappoq, illoqarfillu Jerusalem naalaffik ilanngullugu ikuallalluni nungutinneqarpoq. Ukiumi 33-mi piinsip ulluani Peter ajunaarnissaq tamanna eqqarsaatigalugu pitsaasumik siunnersuisimavoq. Joel issuaqqillugu ima oqarpoq: ’Kinaluunniit Jehovap aqqanik torlorfiginnittoq annakkumaarpoq.’ Juutit tamarmik namminneq inuttut aalajangertariaqarput Jehova torlorfigiumallugu. Taamaaliussagunik aamma Peterip nangilluni ilitsersuutai maleruartariaqarpaat: ’Allamik isumataaritsi, nungullusilu kueqqugitsi Jesusip Kristusip aqqagut ajortit isumakkeerneqaatissaannik.’ (apustilit suliait 2:38) Peterip tusarnaartaasa Jesus, inuiaqatigiit Israelikkut ajattorsimasaat, Messiasitut akuerisariaqarpaat.
5 Joelip oqaasii siulittuutaasut ukiuni hundredelinni siullerni inunnut qanilaartunut sunniuteqartorujussuupput. Ullumikkulli sunniuteqarnerupput, ukiunimi 1900-kkunni makkunani pisimasut takutippaat Joelip siulittuutaa aappassaanik eqquuttoq. Paasiniariartigu qanoq ililluni.
6. 1914 qanilliartortillugu qanoq ililluni takuneqarsinnaalerpa ’Israel Guutip pigisaa’ kikkunnik inuttaqartoq?
6 Apustilit toqoreermata Israel Guutip pigisaa kristumiuuneraqatigiit ilumuunngitsut naasupiluinit matuneqarpoq. Naggatissalli nalaani 1914-imi aallartittumi inuiaqatigiit anersaakkut ittut taakku ilisarnarseqqipput. Taamaalilluni Jesusip naatsiiassarissunik naasupilunnillu assersuusiaa eqquuppoq. (Matîuse 13:24-30, 36-43) 1914 qanilliartortillugu kristumiut tanitaasut kristumiuuneraqatigiinnit ilumuunngitsunit immikkoornialerput, qunujuillutik ajoqersuutit eqqunngitsut akueriumanagit aammalu ’inuiaat ullussaasa aalajangersagaasut naammatsinneqarnissaat’ qanillisoq oqaluussissutigalugu. (Lúkarse 21:24, NV) 1914-imili sorsunnersuaq siulleq siulleq aallartimmat ilimagisimanngisaminnik apeqqutissaqalerput. Sakkortuumik tatineqarnertik amerlasuut iliuuseqarunnaassutigaat, ilaallu nakkaannarlutik. 1918-imi oqaluussineq annerusutigut unippoq.
7. (a) 1919-imi qanoq pisoqarpa ukiumi 33-mi piinsip ulluani pisimasumut assingusumik? (b) Guutip anersaava 1919-imiilli Jehovap kiffaanut kuineqartalermat qanoq sunniuteqarpa?
7 Pissutsilli tamakku ataannanngillat. 1919-imi Jehovap anersaani innuttaminut kuisalerpaa ukiumi 33-mi u.n.k. piinsip ulluani pisimasumut assingusumik. Soorunami 1919-imi oqaatsinik allanertanik oqalulertoqanngilaq anorersuarnanilu pitorartumik. Paulusip oqaasiisa Korintumiunut agdlagkat sujugdlît 13:8-miittut paasitippaatigut ukiut tupinnartuliortarfiusut qangali atorunnaareersimasut. Taamaattorli Guutip anersaava 1919-imi ersarissumik sunniuteqarpoq USA-mi Cedar Pointimi Ohiomiittumi ataatsimeersuarnermi kristumiut aalajaatsut ’uummarsarneqarmata’ Guutillu naalagaaffianik nutaarsiassaq nuannersoq oqaluussissutigileqqillugu. 1922-mi Cedar Pointimut uterput kajumissaarummillu matumannga kaammattorneqarlutik: „Kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik.“ Ukiuni hundredelinni siullerni pisimasutut Guutip anersaavanik kuineqarnerata sunniuteqarneri silarsuup maluginngitsoorsinnaanngilai. Kristumiut tunniulluinnarsimasut tamarmik — angutit, arnat, inuusuttut utoqqaallu — ’pruffiitisut oqalulerput’, ’Guutip malunnangaartuliai oqaatigilerlugit’. (apustilit suliait 2:11) Peterip iliorsimaneratut inuit qanilaartut ima kajumissaarpaat: ’Eqqarleriinnit ukunannga killormoortunit annatsinniaritsi.’ (apustilit suliait 2:40) Ilassinnikkumasut qanoq ilillutik taamaaliorsinnaappat? Joelip oqaasii Joel 3:5-imi allassimasut maleruartariaqarpaat: „Kinaluunniit [Jehovap] aqqanik torlorfiginnittoq annaanneqassaaq.“
8. Israel Guutip pigisaa qanoq ililluni 1919-imiilli siumukariartorsimava?
8 Taamanerniilli Israel Guutip pigisaa siumukartuarsimavoq. Tanitanik naqissusiineq naammassineqanngajalersorinarpoq, 1930-kkunnilu qanilaartut amerlangaartut nunarsuarmi inuunissamik neriugisallit katersorneqalerput. (sarĸúmersitat 7:3, 9) Tamarmik misigipput nukinginnartuusoq, Joel 3:1, 2-mi allassimasut eqquunnerata takutimmagu Jehovap ullua taamanernit pingaarneroqisoq siooranangaarneroqisorlu qanillisoq silarsuaq tamakkerlugu upperisarsiornikkut, naalakkersuinikkut niuernikkullu aaqqissuussaaneq suujunnaarsinneqassammat. Pissutissaqarluarpugut ’Jehovap aqqa torlorfigissallugu’ taassumannga annaanneqarnissarput tatigilluinnarlugu!
Jehovap aqqa qanoq ililluni torlorfigineqassava?
9. Jehovap aqqanik torlorfiginninneq ilaatigut sumik nassataqassava?
9 Jehovap aqqata torlorfigineqarnera qanoq paasisariaqarpa? Tamanna paasisinnaavarput Joel 3:1, 2-mi allassimasut ataqatigisaat misissorutsigik. Assersuutigalugu Jehovap torlorfigisini tamakkernagit tusartarpai. Pruffiiti Esajas aqqutigalugu Israelikkut ima oqarfigai: „Qinuniarlusi assasi isaakkaluarussigit isikka matussavakka, qanorluunniit qinutigigaluarussi tusassanngilassi.“ Sooq Jehova innuttaminut tusarusussimanngila? Nammineq nassuiarpaa: „Assasi aammik ulikkaarmata.“ (Jesaja 1:15) Jehovap aammik kuisinermut pisuusut ajortuliortartulluunniit tusarumanngilai. Taamaattumik Peterip ullormi piinsimi juutit oqarfigai allamik isumataaqqullugit. Joelittaaq erseqqissarpaa allamik isumataarneq imaluunniit allamut saanniarneq pisariaqartoq. Assersuutigalugu Joel 2:12, 13-imi allassimavoq: „’Maannakkulluunniimmi,’ oqarpoq taama [Jehova], ’uannut saanniaritsi uummatissigut iluunngarlusi, iisinnginniarlusi, qiallusi kappialallusilu. Atisasi pinnagit uummatisi alittorsigit, saanniaritsi [Jehovamut] Guutissinnut! Taanna saammaasuuvoq nallittuisuullunilu, kamaginnippoq isumassuingaarlunilu.’“ 1919-imiit kristumiut tanitat oqaatsit tamakku malerualerpaat. Eqqunngitsuliornitik peqqissimissutigaat aalajangerlutillu kingorna nakkaannaqqinngisaannassallutik ilungersornertilluunniit millisissanagu. Tamanna pillugu Guutip anersaava taakkununnga kuineqarsinnaalerpoq. Jehovap aqqanik torlorfiginnikkusuttut tusarneqarusuttullu tamarmik aamma taamaaliortariaqarput.
10. (a) Isumataavinneq sunaava? (b) Isumataavikkutta Jehova qanoq iliussava?
10 Paasisariaqarparput isumataavinneq tassaannaanngitsoq ima oqarneq: „Ajuusaarutigaara!“ Israelikkut aliasungaarnertik takutittarsimavaat atisamik alittorneratigut. Jehovali ima oqarsimavoq: „Atisasi pinnagit uummatisi alittorsigit.“ Isumataavinneq uummammi, inuup ilorpiaani, aallaaveqarpoq. Taamaaliussagutta eqqunngitsuliornermit allamut saattariaqarpugut, soorlu Jesaja 55:7-imi atuarsinnaagipput: „Guutiitsup qimalliuk aqqutigisani, iluaatsuliortullu soraarulligit pilersaarutini, saallunilu [Jehovamut], nallittoqqulluni Guutitsinnut.“ Ajortuliorneq uumigisariaqarparput, soorluttaaq Jesus taamaaliorsimasoq. (Eprîarit 1:9) Taamaaliorutta tatigisinnaavarput Jehovap Jesusip utertitsissutitut pilliutaa tunngavigalugu isumakkeerfigissagaatigut, taanna ’saammaasuummat nallittuisuullunilu, kamaginnittuummat isumassuingaarlunilu’. Taassuma pallorfiginninnerput, ’naatitanit pilliutissarput’ ’viinnimillu pilliutissarput’, ilassissavaa. Aqqa torlorfigigutsigu tusassavaatigut. — Joel 2:14.
11. Pallorfiginninneq ilumoortoq inuunitsinni qanoq pingaaruteqartariaqarpa?
11 Qaqqami oqaluutsimini Jesusip eqqaamasariaqakkatsinnik uparuuppaatigut. Ima oqarpoq: „Naalagaaffik naapertuilluassuserlu taassuma pia salliutittuaannarsigik.“ (Matîuse 6:33, NV) Guutimik pallorfiginninnerput asuleerussinnaanngilarput; ilerasuuteqannginniaannarluta sapinngisamik annikitsumik kiffartortussaanngilagut. Guutimut kiffartorneq inuunitsinni salliutinneqartariaqarpoq. Taamaattumik Jehova nangilluni pruffiiti Joel aqqutigalugu ima oqarpoq: „Sulluartaassuarmik qarlortaritsi Sionimi, . . . Katersortissigit inuiaat Israelikkut, ilagiit illernartissigit, utoqqaat aggersissigit. Meeqqat katersortissigit naalungiarsuit miluttullu ilanngullugit. Katernaat ininnguaminnit anigilit.“ (Joel 2:15, 16) Katernaat tupinnanngitsumik imminnuinnaq soqutigisarput. Taakkuali allaat Jehovamut kiffartorneq salliutittariaqarpaat. Guutimik pallorfiginninniarluta katersortarnitsinnit taassumalu aqqanik torlorfiginninnitsinnit allamik pingaarnerusoqanngilaq.
12. Siorna eqqaaniaalluni nalliuttorsiorneq pillugu nalunaarusiap qanoq takutippaa amerliartornissamut periarfissaqartoq?
12 Tamanna eqqarsaatigalugu ukiumi oqaluussiffiusumi 1997-imi Jehovap nalunaajaasuisa sulinerannik nalunaarusiamit kisitsisit ilaat misissoriartigik. Siorna oqaluussisartut amerlanerpaaffiat tassaavoq 5.599.931 — ilumut unnersiutiginnittut amerlangaartut! Eqqaaniaanermik nalliuttorsiornermut 14.322.226-t najuussimapput — oqaluussisartunit 8.500.000-t missaannik amerlanerullutik. Tamatuma takutippaa amerliartornissamut suli periarfissaqarluartoq. 8.500.000-t taakkua ilarpassui Jehovap nalunaajaasui ilagalugit Biibili atuaqqissaartarpaat imaluunniit kuisimasunik angajoqqaaqarlutik. Amerlasuulli tamatumani ataatsimiinnermut aatsaat najuussimapput. Jehovap nalunaajaasui periarfissaqarluarput inuit taakku ilisarinerulernissaannut siumukarnissaannillu ikiornissaannut. Taakkua akornanniipputtaaq ukiut tamaasa eqqaaniaalluni nalliuttorsiornermut najuuttartut immaqalu ukiup ingerlanerani qaqutigut ataatsimiinnernut najuuttartut, annerusumilli siumukanngitsut. Soorunami taakku tamatigut ataatsimiinnernut tikilluaqqusaasarput. Kajumissaarniarpavulli Joelip siulittuutaanik eqqarsaatiginneqqissaaqqullugit isumaliutigalugulu Jehovap aqqa torlorfigigaangamikku tusarneqaqqullutik qanoq iliortariaqarnerlutik.
13. Jehovap aqqa torlorfigisareerutsigu inunnut allanut sumik akisussaaffeqarpugut?
13 Apustili Paulusip Guutip aqqanik torlorfiginninnermut atatillugu pingaaruteqartoq alla tikkuarpaa. Romamiunut allakkamini Joelip siulittuutai issuarpai: ’Kinaluunniimmi Jehovap aqqanik torlorfiginnittoq annakkumaarpoq.’ Taava ima tunngavilersuivoq: ’Qanorli ilillutik upperfiginngisartik torlorfigissavaat? Qanorlu ilillutik tusaamanngisartik upperfigissavaat? Qanorlu ilillutik oqaluussisoqanngippat tusassappat?’ (Rûmamiut 10:13, 14) Aap, allarpassuit suli Jehovamik ilisarsinngitsut taassuma aqqa torlorfigisariaqarpaat. Jehovamik ilisarsereersimasut oqaluussinerinnaq akisussaaffiginngilaat, aammali allat taassuminnga ilisarsilernissaannik ikiornissaat akisussaaffigaat.
Paratiisi anersaakkut ittoq
14, 15. Jehovap innuttaasa taassuma iluarisaanik aqqa torlorfigisaramikku pilluaqqussutit paratiiserpalaartut suut nuannaarutigisinnaavaat?
14 Tanitat savallu allat tamarmik taama isiginnittaaseqarput, taamaattumillu Jehovamit pilluaqquneqartarlutik. „[Jehovap] nuna pigisani ilungersuutigilerpaa innuttanilu nalligilerlugit.“ (Joel 2:18) 1919-imi Jehovap takutippaa innuttani ilungersuutigalugit nalligalugillu ’nunamut pigisaminut’ anersaakkut suliniuteqarfissaannut isertillugit. Nuna tamanna tassaavoq paratiisi anersaakkut ittoq Joelimit ima allaatigineqartoq: „Nuna, siooraqinak, qiimasullutillu tipaatsugit [Jehova] tupinnangaartumik iliuuseqarmat. Siooraqinasi nersutit nujuartat, inoqajuitsup ivigaqarfii qorsooqqissilermata, orpiit inerititaqalerumaarmata, orpiit figenillit viinnequtillu naammattunik katersugassaqartissammasi. Ilissi Sionip inui, [Jehova] Guutersi tipaatsuutigisiuk qiimasuutigalugulu, taassuma tunissammasi sialummik pilluaqqussutaasumik, ukiap sialuanik upernaallu sialuanik aallartitsivigissammasi siornatigutut. Karrertaajaaffiit karrinik immerneqassapput, tunguiaaffiillu utsersussapput viinnimik olivenillu uuliaanik.“ — Joel 2:21-24.
15 Allaatiginninnera tusarneqaaq! Israelimigooq inuussutissat pingaartut pingasut naammangaassapput — karrit, olivinip uuliaa viinnilu — aamma nersuterpassuaqassaaq. Ullumikkut siulittuut tamanna anersaakkut eqquuppoq. Jehovap inuussutissat anersaakkut ittut pisariaqartitavut tamaasa pilersittarpai. Peqangaarneq tamanna nuannaarutiginnginnerparput? Soorlu Malakiasip siulittuutigisimagaa Guutitta ’qilaap suppivii ammarpai pilluaatissiissutinillu killiligaanngitsunik kueraaffigaluta’. — Malaki 3:10.
Pissutsit aaqqissuussaanerata naggatissaa
16. (a) Jehovap anersaavata ullumikkut kuineqarnera sumut ersiutaava?(b) Siunissami qanoq pisoqarnissaa ilimagisinnaavarput?
16 Guutip innuttaasa paratiiserpalaartumik atugaqarnissaat siulittuutigereerlugu Joelip eqqaavaa Jehovap anersaavata kuineqarnissaa. Peterip ullormi piinsimi siulittuut tamanna issuaramiuk oqarpoq ’ullussani kingullerni’ eqquukkumaartoq. (apustilit suliait 2:17) Guutip anersaava taamani kuineqarmat isumaqarpoq juutit pissutsinik aaqqissuussaanerannut ullut kingulliit nalliutilersut. Ukiuni 1900-kkunni makkunani Guutip anersaava Israelimut Guutip pigisaanut kuineqarmat isumaqarpoq silarsuaq tamakkerlugu pissutsit aaqqissuussaanerata maanna atuuttup ullui kingulliit inuuffigigivut. Taamaammat siunissami qanoq pisoqarnissaa ilimagisinnaavarput? Joelip siulittuutaa ima nangippoq: „Nalunaaqutinik saqqummersitsiumaarpunga qilammi nunarsuarmilu — aammik innermillu putsunillu napasunik. Seqineq allanngussaaq taarnerinnaalerluni, qaammallu aanngorluni, [Jehovap] ullussaa pingaaqisoq siooranangaaqisorlu nalliutinngikkallartillugu.“ — Joel 3:3, 4.
17, 18. (a) ’Ulloq’ siooranangaaqisoq suna Jerusalemimut nalliussimava? (b) Siunissami siooranangaaqisumik ’ulloqassammat’ qanoq iliornissamut kajumissaarneqarpugut?
17 Ukiumi 66-imi u.n.k. siulittuut tamanna eqquutilerpoq Judæami pissutsit ajornerpaaffissaminnut allaqquttussaanngitsumik ingerlarsortillugit — ukiumi 70-imi Jehovap ulluanut siooranangaaqisumut. Taamani Jehovap aqqanik torlorfiginninngitsunut pissutsit annilaanganaqaat! Ullumikkut aamma siooranangaaqisumik pisoqarumaarpoq pissutsit aaqqissuussaanerat maanna atuuttoq Jehovamit suujunnaarsinneqarpat. Aniguisoqarsinnaavorli. Siulittuut ima nanginneqarpoq: „Kinaluunniit [Jehovap] aqqanik torlorfiginnittoq annaanneqassaaq. [Jehovap] oqaasia naapertorlugu qaqqami Sionimi Jerusalaamilu annaffissaqassaaq aniguisunut [Jehovap] qaaqqusaanut.“ (Joel 3:5) Jehovap nalunaajaasuisa qujamasuutigeqaat Jehovap aqqa nalunnginnamikku, tatigilluinnarlugulu Jehova torlorfigigunikku annaatissagaatik.
18 Jehovalli ullussaa pingaaqisoq tupinnangaartorlu silarsuarmut matumunnga nalliuppat qanoq pisoqassava? Tamanna allaaserisat atuaqqissaaqatigiissutissat kingullersaanni sammineqassaaq. (wE 1/5 98)
Eqqaamavigit?
□ Qanga Jehovap siullermik innuttaminut anersaani kuisimavaa?
□ Jehovap aqqanik torlorfiginninneq ilaatigut sumik nassataqassava?
□ Jehovap ullua pingaaqisoq tupinnangaartorlu qanga Israelikkunnut timikkut ittunut nalliussimava?
□ Ullumikkut Jehovap aterminik torlorfiginnittut qanoq pilluaqqusarpai?
[Qupp. 15-imi assiliartaq]
Ukiumi 33-mi ullormi piinsimi inuiaqatigiit nutaat pilersinneqarput
[Qupp. 16, 17-imi assiliartaq]
Ukiut hundredellit makkua aallartinneranni Jehovap innuttaminut anersaani kueqqippaa taamaalilluni Joel 3:1, 2 eqquutillugu
[Qupp. 18-imi assiliartaq]
Inuit Jehovap aqqanik torlorfiginninnissaminnut ikiorneqartariaqarput