Jehova kiffartuuguk uummatikkut nuannaarlutit
„Perloqqussutit tamakku tamarmik ilissinnut nalliukkumaarput. . . . [Jehova] Guutersi nuannaarlusi uummatissigullu iluunngarlusi kiffartuussimanngi[nnassiuk].“ — 5 MOSES 28:45-47.
1. Jehovamut kiffartortut sumiikkaluarunilluunniit nuannaartuunerannut sunik uppernarsaatissaqarpa?
JEHOVAP kiffai, qilammi imaluunniit nunami piumasaanik iliortut tamarmik, nuannaartuupput. „Ullaap ulloriai“, inngilit, nunarsuaq tunngavilerneqarmat nipertik illugalugu qiimmattarsimapput, qularnanngitsumillu inngilerpassuit qilammiut nuannaarlutik ’Guutip oqaasia suaarutigisarpaat’. (Job 38:4-7; Tussiaat 103:20) Jehovap ernitua qilammi nuannaarluni ’suliortuusimavoq’, nunamilu inuttut Jesus Kristusitut Guutip piumasaa nuannaarluni malissimallugu. Aammalu allassimavoq ’tipaatsuutissaq imminut saqqangiussaq pillugu ilalaarluni [nappagaq anniartitsivik, NV] atorsimagaa, mitaatigineqarnini soqutiginagu, ingissimallunilu Guutip issiavissaarsuata talerpiata tungaani’. — Ussatit 8:30, 31; Eprîarit 10:5-10; 12:2.
2. Israelikkut pilluaqqusaanissaannut perloqqusaanissaannulluunniit suut aalangiisuuppat?
2 Israelikkut Guutip iluarisaanik ilioraangamik nuannaarneq misigisarsimavaat. Guutimulli naalanngikkaangamik? Ima mianersoqquneqarsimapput: „Perloqqussutit taakku ilissinni kinguaassassinnilu nalunaaqutaassapput tupinnartuliaassallutillu naassaanngitsumut atuuttussat. [Jehova] Guutersi nuannaarlusi uummatissigullu iluunngarlusi kiffartuussimanngilarsi naammattorsuarnik pissaqarnersi naammagigassiuk. Taamaattumik kaallusi, imerusullusi, atisaqarnasi sunillu tamanik amigaateqarlusi inussiaataassaasi akeqqani [Jehovap] ilissinnut sorsukkiartortikkumaagaani. Qungatsissigut uniuserfeqartikkumaarpaasi nungutereerserlusi.“ (5 Moses 28:45-48) Tassa pilluaqqussutit perloqqussutillu nalunaatsumik paasinarsisittarsimavaat kikkut Jehovap kiffarigai kikkullu Jehovap kiffarinngikkai. Perloqqussutit taama ittut aamma uppernarsartarsimavaat Guutip najoqqutassiai siunertaalu suusupagisassaanngitsut, imaluunniit nikagisassaanngitsut. Suujunnaarsitaanissamik aallarussaanissamillu Jehovap mianersoqqussutai Israelikkut tusaajumanngimmatigik Jerusalem ’nunarsuarmi inuiannut tamanut perloqqusissutissanngortinneqarsimavoq’. (Jeremia 26:6) Taamaattumik uagut Guuti naalanniartigu iluarinninnera misigalugu, nuannaarnerlu Guutimit pilluaqqusaanerit Guutimik mianerinnittut misigisartagaasa ilagaat.
Qanoq ililluni ’uummatikkut nuannaarluni’ kiffartortoqarsinnaasoq
3. Assersuutaasumik uummat suua?
3 Israelikkut ’uummatimikkut nuannaarlutik’ Jehova kiffartuuttussaasimavaat. Ullumikkuttaaq Guutip kiffai taamaattussaapput. Nuannaarneq qamuuna, uummatikkut, misigissusiuvoq. Uummat uummativik Biibilimi arlalinni eqqartorneqartarpoq. (2 Moses 28:30) Uummatip suliassaa tassa aak timip celliinik inuussutissalersuisoq ingerlaartissallugu. Biibilimili uummat eqqartorneqaraangat amerlanertigut pineqartarpoq assersuutaasumik uummat, misigissutsit, pissutiginiakkat sianissutsillu sumiiffiat. Assersuutaasumik uummat ’tassaagajuppoq qitiusoq, ilukkut pissuseq, taamaattumillu tassaalluni inuup ilukkut pissusia iliuusiisigut tamatigut, kissaataasigut, misigissusiisigut, kajungerisaasigut, siunertaasigut, eqqarsaataasigut, paasinnittaasiatigut takorluugaasigullu, ilisimasaasigut silatussusiatigullu, piginnaasaasigut, isumaasigut isumaliutaasigullu, eqqaamannissinnaassusiatigut qaammaasaqassusiatigullu ersertartoq’. (Journal of the Society of Biblical Literature and Exegesis, 1882, qupperneq 67) Tassa assersuutaasumik uummatitsinnut ilaapput misigissutsivut, ilaatigut nuannaarnerput. — Juánase 16:22.
4. Uummatikkut nuannaarluta Jehova Guutimik kiffartuussinissatsinnut suup ikiussavaatigut?
4 Uummatikkut nuannaarluta Jehovamut kiffartornissatsinnut suup ikiussavaatigut? Pilluaqqusaanitsinnik immikkullu pisinnaatitaaffitsinnik Guutimeersunik ajunngitsumik isiginninneq qujamasuutiginninnerlu iluaqutaapput. Assersuutigalugu Guutimut ilumoortumut ’illernartumik kiffartuuteqarnermik’ immikkut pisinnaatitaaffipput nuannaarluta eqqarsaatigisarsinnaavarput. (Lúkarse 1:74) Jehovap nalunaajaasuisut taassuma aqqanik taaguuteqarneq aamma immikkut pisinnaatitaaffiuvoq. (Jesaja 43:10-12) Aamma Guutip oqaasianik malinninnikkut taassuma iluarisaanik iliornermik ilisimanninneq nuannaarnermik nassataqartarpoq. Aammalu nuanneqaaq anersaakkut qaamanermik qaamatitsineq taamaalillunilu inuppassuarnik taarsuarmit aniguinissaannik ikiuineq! — Matîuse 5:14-16; naleqqiuguk Pîtrusip agdlagai sujugdlît 2:9.
5. Nuannaarneq Guutimeersoq qanoq pigilerneqarsinnaava?
5 Soorunami uummatikkut nuannaarluni Jehovamik kiffartorneq tassaannaanngilaq ajunngitsumik eqqarsarneq. Pissutsinik isumalluartumik isiginnittaaseqarneq iluaqutaavormi, nuannaarnerli Guutimeersoq inuttut pissutsimik ineriartortitsinikkut pigisarilerneq ajorparput. Nuannaarneq Jehovap anersaavata inerititaraa. (Galâsiamiut 5:22, 23) Nuannaarnermik taama ittumik amigaateqarutta immaqa allannguisariaqarpugut, Biibilimut naapertuutinngitsumik Guutillu anersaavanik aliasutsitsisinnaasumik eqqarsarnaveersaarlutalu iliuuseqarnaveersaarluta. (Evfisumiut 4:30) Jehovamulli kiffaasutut tunniulluinnarsimasutut eqqarsarnaveersaartariaqarpugut ilaannikkut qamuuna nuannaassuseqanngittarneq Guutimit iluarisaannginnermik pissuteqartoq. Naammalluinnanngitsuuvugut anniaatinillu, aliasuutinik ilaannikkullu allaat eqqarsaatikkut artorsarujussuarnernik atugaqarsinnaalluta, Jehovalli paasisarpaatigut. (Tussiaat 103:10-14) Nuannaarneq Guutip anersaavata inerititarimmagu anersaavanik annerusumik qinusinnaavugut. Qinnutit taama ittut Ataatatta qilammiusup akisarpai uummatikkullu nuannaarluta kiffartornissatsinnut saperunnaarsittarluta. — Lúkarse 11:13.
Nuannaarneq amigaataappat
6. Guutimut kiffartornitsinni nuannaarneq amigaatigigutsigu qanoq iliortariaqarpugut?
6 Jehovamut kiffartornitsinni nuannaarneq amigaatigigutsigu naggataatigut ilungersuussiunnaariartorsinnaavugut allaalluunniit taassumunnga ilumuunngitsuliorsinnaalluta. Taamaammat maniguulluta qinorpasissumillu pissuseqarluta pissutiginiakkavut eqqarsaatigeqqissaartariaqarpavut pisariaqarpallu arlaatigut allannguisariaqarluta. Nuannaarneq Guutimeersoq pigissagutsigu Jehova asanninnermik pissuteqarluta uummatikkullu iluunngarluta, tarnikkullu iluunngarluta isumakkullu iluunngarluta kiffartuuttariaqarparput. (Matîuse 22:37) Kiffartortariaqarpugut unammerpalaartumik pissuseqarnata, Paulusimi ima allassimavoq: ’Anersaaq najortigalugu inuugutta taavattaaq anersaaq najortigalugu ingerlaniarta. Piunngitsumik ataqqineqarnissaq piniaqinatigu kamassaaqatigeeqqunata sinngaattaqqunatalu.’ (Galâsiamiut 5:25, 26) Allanit kakkanneruniarluta imaluunniit ataqqineqarniarsaraluta kiffartorutta nuannaarneq piviusoq piginavianngilarput.
7. Uummatikkut nuannaarneq qanoq ililluta pigileqqissinnaavarput?
7 Jehovamut tunniulluinnarsimanermik eqqortitsineq nuannaarnartuuvoq. Guutimut tunniulluinnaqqammernitsinni kristumiutut inuuneq ilungersuussilluta ingerlassimavarput. Biibili atuaqqissaartarsimavarput ataatsimiinnernullu aggertarluta. (Eprîarit 10:24, 25) Oqaluusseqataasarnerput nuannaarutissarsiffigisarsimavarput. Taavami nuannaarnerput millisimappat? Biibilimik atuaqqissaartarneq, ataatsimiigiartarneq, oqaluusseqataasarneq — kristumiutut suliassanut tamanut tamakkiisumik peqataaneq — anersaakkut aalajaaleqqissutaasarpoq asanninnermillu uummatikkullu nuannaarnermik aallaqqaammut pigisimasamik uummarsaaqqittarluni. (sarĸúmersitat 2:4) Tamakkuninnga tamanik sammisaqartarutta nuannaassuseqarpiannginnissaq taamaattumillu anersaakkut ikiorneqartariaqakulanissaq pinngitsoortissavarput. Utoqqaanertat ikiuinissartik nuannaarutigisarpaat, tamattali immikkut Guutimut tunniulluinnarsimanerput nammineq eqqortittariaqarparput. Allat taamaaliussussinnaanngilaatigut. Taamaattumik Jehovamut tunniulluinnarsimanerput eqqortinniarlugu piviusumillu nuannaassuseqarniarluta kristumiutut ingerlaaseqartuaannarnissarput sulissutiginiartigu.
8. Nuannaarnermik pigisaqarumagutta sooq ilerasuuteqannginnissarput taama pingaartigaa?
8 Nuannaarneq Guutip anersaavata inerititaa pigisarissagutsigu minguitsumik nalunngeqatiginnissuteqartariaqarpugut. Itsaq Israelimi kunngip Davidip ajortuliani toqqortorniarsariuartillugu ilerasuttuarsimavoq. Inuussutaa sakkukilliartortutut issimavoq, immaqalu timikkut napparsimalersimalluni. Peqqissiminini ersersikkamiuk ajortulianilu anngiiaatigalugu assorsuaq oqiliallassimavoq! (Tussiaat 32:1-5) Ajortuliamik ingasattumik toqqortugaqarutta nuannaarsinnaanngilagut, ajornartorsiutinillu nassataqarsinnaavoq. Ilumut taamaalilluni nuannaarneq anguneqarsinnaanngilaq. Anngiiarnerli peqqissiminerlu oqiliallannermik nuannaaleqqinnermillu nassataqartarput. — Ussatit 28:13.
Nuannaarluta utaqqisa
9, 10. (a) Abraham qanoq neriorsorneqarsimava, qanorli ililluni uppernera nuannaarneralu misilinneqarpat? (b) Abrahamip, Isakip Jakobillu maligassiaat qanoq iluaqutigisinnaavavut?
9 Guutip siunertaanik tusaqqaarluni nuannaarneq allaavoq, ukiullu ingerlaneranni nuannaarnermik atatitsiniaaneq allarluinnaavoq. Tamanna Abrahamimik aalajaatsumik pisimasoq eqqarsaatigalugu paasineqarsinnaavoq. Guutip peqqusineratigut ernini pilliutiginialeraluaraa inngilimit ima nalunaarfigineqarpoq: „’Ima oqarpoq [Jehova]: „Imminik naqqissigalunga uppernarsaavunga. Peqqussutiga naalallugu ilioravit ernituannillu erliguutinnginnamma pilluaqqussavakkit, kinguaassatillu qilaap ulloriaasut sioqqatullu sissamiittutut amerlatigilersissavakka, taakkualu akeqqamik isaaffii tiguassavaat. Illillu kinguaassakkut nunarsuarmi inuiaqatigiit tamarmik pilluaqqunarsissapput, naalakkamma.“’“ (1 Moses 22:15-18) Qularnanngivissumik Abraham neriorsuut tamanna pillugu nuannaarsimassaqaaq.
10 Immaqa Abrahamip ilimagisimagaluarpaa Isak tassaassasoq „kinguaassaq“ pilluaqqussutissat neriorsuutigisaasut takkuffissaat. Ukiunili qaangiussuuttuni Isak aqqutigalugu nuannersumik immikkut ittumik pisoqannginnera Abrahamip ilaqutaasalu uppernerannut nuannaarnerannullu misilinneqaataasimassaaq. Guutip neriorsuutiminik Isakimut kingornalu Jakobimut uppernarsaaqqinnera taakkununnga qularunnaarsitsivoq kinguaassaaq aatsaat siunissami takkuttussaasoq, tamannalu iluaqutigalugu uppernertik nuannaarnertillu attattuaannarsinnaasimavaat. Abraham, Isak Jakobilu toqupput Guutip imminnut neriorsuutai suli takunagit, taamaakkaluartorli Jehovamut kiffartorsimapput nuannaarneq pigisaralugu. (Eprîarit 11:13) Aamma uagut Guutip neriorsuutaasa piviusunngornissaat utaqqiitigalugu Jehova kiffartuuttuaannarsinnaavarput upperluta nuannaarlutalu.
Qinugisaagaluarluni nuannaarneq
11. Sooq qinugisaagaluarluta nuannaarneq pigiuaannarsinnaavarput?
11 Naak allaat qinugisaagaluarluta Jehova kiffaatut nuannaarluta kiffartuussinnaavarput. Jesusip nammineq pilluni qinugisaasut pilluarnerarsimavai, apustililu Peter ima oqarsimavoq: ’Soorluli Kristus anniarnerisigut peqatigigissi, taamatut tipaatsugitsi, naalannassusiata saqqummerfissaanissaaq qiimmattarlusi tipaatsoqqullusi. Kristusip aqqa pillugu mitaatigineqarussi pilluarpusi, anersaap naalannartitsisup Guutillu anersaata uniffigimmasi.’ (1 Pîtruse 4:13, 14; Matîuse 5:11, 12) Qinugisaagutta naapertuilluarnerlu pillugu atugarliortitaagutta Jehovap anersaava iluarinninneralu nakuussutissaraavut, tamannalu nuannaarnitsinnut allisaataassaaq.
12. (a) Uppernikkut misilinneqarnerit qanoq ililluta nuannaarluta atorsinnaavavut? (b) Levikkuusoq nunaminit qimaatitaasimasoq eqqarsaatigalugu ilinniutissaq tunngaviusoq suna ilikkarneqarsinnaava?
12 Uppernikkut misilinneqarnerit nuannaarluta atorsinnaavavut Guuti qimarravigigatsigu. Tamanna Tussiaat 42-mi aamma 43-mi erseqqissarneqarpoq. Sumik pissuteqarsimanerluni Levikkuusoq nunaminit qimaatitaasimanermini Guutip illernartuutaani pallorfiginninnermut ima kipisatigisimavoq tuttutut, imaluunniit tuttorsuartut arnavissatut, qilalersutut nunami imeqaranilu naggorluttumiittutut misigisimalluni. (Tussiaat 42:1-3) Qimaatitaasimasup taassuma misigisimasaa Jehovap innuttaanik peqateqarsinnaanitsinnik pingaartitsinerulissutigisariaqarparput. Soorlu qinugisaaneq pissutigalugu parnaarunneqarnikkut Jehovap innuttaanik peqateqarsinnaajunnaarallassagaluarutta kiffartornitsinni illernartumi nuannaarutissarisarsimasavut eqqarsaatigisarniartigik, nikallujuinnissatsinnillu qinusarluta ’Guuti neriuffigiitigalugu’ pallorfiginnittai ilagalugit nalinginnaasumik suliniuteqarnermut peqataaleqqinnissarput isumagissagaa. — Tussiaat 42:5, 6, 12; 43:3-5.
’Jehova kiffartorfigiuk tipaatsuummik erinalersorlutit’
13. Tussiaat 100:1, 2-mi qanoq ililluni erserpa nuannaarneq Guutimut kiffartornitsinnut ilaasariaqartoq?
13 Nuannaarneq Guutimut kiffartornitsinni malunnarluartuusariaqarpoq. Tussiaasiortup qujaniarluni erinarsuusiaani tamanna erserpoq: „Nilleritsi [Jehova] unnersiutigalugu, nunamiut tamassi! [Jehova] kiffartorfigisiuk tipaatsuummik erinalersorlusi, sassaritsi kiinaata saanut.’ (Tussiaat 100:1, 2) Jehova tassaavoq ’Guuti pilluartoq’, kissaatigaalu kiffani imminut tunniulluinnarsimanerminnik eqqortitsinermikkut nuannaarnermik pigisaqassasut. (1 Timûtiuse 1:11) Inuit inuiannit tamaneersut Jehova qiimmattaatigisariaqarpaat, unnersiutiginnissutivullu kimittuujusariaqarput, sakkutuut ajugaasut ’ajugaasimaarlutik nillianerattut’. Guutimut kiffartorneq inuummarissinartuugami nuannaarnermik ilaqartariaqarpoq. Taamaattuminguna tussiaasiortup inuit kajumissaarai Guutimut sassassasut ’tipaatsuummik erinalersorlutik’.
14, 15. Tussiaat 100:3-5 ullumikkut Jehovap kiffaanut nuannaartunut qanoq ililluni naleqquppa?
14 Tussiaasiortup oqaatsini ima ilavai: „Misiginiaritsi [Jehova] Guutiummat. Taassuma pinngortippaatigut, taassumalu pigaatigut. Tassaavugut innuttai, savaatit paarisai.“ (Tussiaat 100:3) Jehova Pinngortitsisigigatsigu taassuma pigaatigut soorlu savanik paarsisup savaatini pigigai. Isumassorluangaarmatigut qujamasulluta unnersiutigaarput. (Tussiaat 23) Jehova eqqarsaatigalugu tussiaasiortoq aamma ima erinarsorpoq: „Isaaffiisigut iseritsi qujaniummik erinalersorlusi, silarliutaanut iseritsi unnersiutiginnissummik tussiarlusi. Qutsavigisiuk, aqqa unnersiutigisiuk! [Jehova] avaaginnittuummat, isumassuinera atammat naassaanngitsumut, unneqqarissusialu kinguaariikkuutaani.“ — Tussiaat 100:4, 5.
15 Ullumikkut inuit inuiannit tamaneersut nuannaarlutik Jehovap illernartuutaata isaaffiisigut isaapput qujaniarlutik unnersiutiginnillutillu. Nuannaarluta Guutip aqqa unnersiutigisarparput Jehovap ajunngitsumik oqaluuseriuaannarneratigut, pissusiisalu nuannersut taassuminnga unnersiutiginnitsilertarpaatigut. Ajunngilluinnartuuvoq, kiffaminullu isumassuinera imaluunniit unneqarissusia tunaartarineqartuaannarsinnaavoq, naassaanngitsumimmi atassagami. Piumasaminik malinnittunut Jehovap asanninnera „kinguaariikkuutaani“ aalajaattuassaaq. (Rûmamiut 8:38, 39) Taamaattumik ’nuannaarluta Jehovamut kiffartornissatsinnut’ pissutissaqarluarpugut.
’Neriugitsi tipaatsullusi’
16. Kristumiut sunik neriuutissaqarlutillu qilanaarutissaqarpat?
16 Paulus ima allassimavoq: ’Neriugitsi tipaatsullusi.’ (Rûmamiut 12:12) Jesus Kristusip malittai tanitaasut qilammi toqusuitsuulluni inuunissamik Guutip ernini aqqutigalugu ajornarunnaarsissimasaanik neriuumminni nuannaarutissaqarput. (Rûmamiut 8:16, 17; Filípimiut 3:20, 21) Aamma kristumiut nunarsuarmi paratiisiusumi naassaanngitsumik inuulernissaminnik neriuutillit nuannaarutissaqarput. (Lúkarse 23:43) Jehovap kiffai aalajaatsut tamarmik Naalagaaffimmik neriuummi nuannaarnissaminnut pissutissaqarput, qilammimi naalakkersuinermi tamatumani peqataanngikkunik nunarsuarmi naalakkersuiffigisassaani inuusussaagamik. Tamanna pilluaqqusaaneruvoq nuanningaartoq! — Matîuse 6:9, 10; Rûmamiut 8:18-21.
17, 18. (a) Jesaja 25:6-8-mi suna siulittuutigineqarsimava? (b) Esajasip siulittuutaa tamanna qanoq ililluni eqquussimava, siunissamilu qanoq eqquutissava?
17 Aamma Esajasip inuiaat naalattut siunissaat nuanningaartoq siulittuutigisimavaa: „Katersaarsuit [Jehovaat] qaqqami Sionimi inuiannik tamanik neriartortitsissaaq sassarlugit nerisassat pikkunartut viinnilu kimittooq, nerisassat patermik orsuarnequtillit viinnilu kimittooq pitsaalluinnartoq. Qaqqamilu Sionimi inuiaqatigiit aliasuummik saagusimagaluartut tamaasa saaguerumaarpai inuiaallu toqusimasutut ulissimagaluartut tamaasa uleerlugit. [Jehovap] toqu nungutissavaa piujunnaarsivillugu. Guutillu [Jehovaasup] isit tamaasa qullingiarumaarpai nunarsuarmilu tamarmi innuttani kanngunarsagaajunnaarsillugit. Taamaapput [Jehovap] oqaasii.“ — Jesaja 25:6-8.
18 Ullumikkut Jehovamik pallorfiginnittutut nerersuaqatigiinnerput ilumut nerersuarneruvoq nuannersoq. Tassami nuannaarnerput annerulertarpoq ilungersuussilluarluta Guuti kiffartuukkaangatsigu silarsuassami nutaami neriorsuutigisaani timikkut ajunngitsorsiassarpassuavut qilanaariitigalugit. (2 Pîtruse 3:13) Jesusip pilliutaa tunngavigalugu Jehovap inuiaat Adamip ajortuliornera pissutigalugu ’toqusimasutut ulissimagaluartut’ uliissavai. Ajorti toqulu peerneqartut takullugit nuannissaqaaq! Aammalu nuannissaqaaq toqusunit makittut tikilluaqqussallugit, malugissallugu aliasunnerup qullii piiarneqarsimasut, inuussallunilu nunarsuarmi paratiisiusumi, Jehovap innuttai unnerluutigineqarunnaarlutik Guutimillu akissutissaqartitsissallutik mamarliisorsuarmut, Satan Diaavulumut! — Ussatit 27:11.
19. Jehovap nalunaajaasumisut uagutsinnut siunissarititaa qanoq qisuariarfigisariaqarparput?
19 Jehovap kiffaminut iliuuseriumaagassaanik ilisimanninnerpit nuannaarnermik qujamasunnermillu ulikkaarpaatit? Ilumut, siunissaq taama nuannerunartigisoq nuannaarnitsinnut allisaataaqaaq! Neriuutitta nuanningaartup Guutitsinnut pilluarlunilu asannillunilu tunisiumatuumut imatut misigitippaatigut: „Taannaavoq Guuterput, neriuffigisarput. Annaassinera qiimmattaatigalugulu tipaatsuutigisigu.“ (Jesaja 25:9) Neriuuterput nuanningaartoq isumatsigut aalajangiusimallugu uummatikkut nuannaarluta Jehovamut kiffartorniarluta ilungersuussisa. (wE 15/1 95)
Qanoq akissavit?
□ Qanoq ililluta ’uummatikkut nuannaarluta’ Jehova kiffartuussinnaavarput?
□ Guutimut kiffartornitsinni nuannaarneq amigaatigigutsigu qanoq iliorsinnaavugut?
□ Sooq Jehovap innuttai qinugisaagaluarlutik nuannaarsinnaappat?
□ Neriuutitsinni nuannaarnissamut sunik pissutissaqarpugut?
[Qupp. 17-mi assiliartat]
Kristumiutut sammisassanut tamanut peqataaneq nuannaarnitsinnut allisaataassaaq