Eqqissineq Guutimit eqquutissaaq — qaqugu?

’Guutip eqqissisaasup Satan isikkassi ataanni aserorterasuassavaa.’ — RÛMAMIUT 16:20.

1, 2. (a) Hinduit ilaata sorsunneq eqqissinerlu qanoq oqaaseqaatigisimavai? (b) Kikkuuppat pilluartut eqqissinermik Guutimit pisumik piginnittussat?

„SAKKUSSALIORNIKKUT ingiarniunneq sualuppallaaqisoq unitsinneqanngikkuni, allatut ajornartumik toqoraanersuarmik inuiaat oqaluttuarisaaneranni naleqarsimanngisaannartumik kinguneqassaaq. Ajugaasoqassagaluarpat, ajugaaneq tassaaginnassaaq inuiaqatigiit akiuunnermi ajugaasut atugarliungaarnissaat.“ Mohandas Gandhip 1938-mi siulittuutigisaa taanna piumaartussanik takunninneruvoq.

² Taama oqarnermi siornatigut, 1931-mi, Gandhip tuluit kunngiat sinnerlugu naalagaatitaq oqarfigisimavaa: „Illit nunavit uagullu nunatta Kristusip qaqqami oqaluutsimini maligassiai malissinnaagaluarutsigik, uagut nunatsinni ajornartorsiutit piinnarnatik silarsuarmili tamarmi ajornartorsiutit anigorneqassagaluarput.“ Soorlu silatuup hindusiortup taassuma takutitsiaraa, Jesusip qaqqami oqaluusaa eqqissinissamut aqqutissiuivoq. Oqaluutsimini tassani Jesus oqarsimavoq: ’Pilluarput eqqissisitsisut, Guutip qitornaanik taaneqassagamik.’ (Matîuse 5:9) Maanna ’qitornarpassuit’ eqqissineq Guutimit pisoq atorpaat. Kiisa, nunami qanilaartut tamarmik ’eqqissineqangaarneq tipaatsuutigilluinnassavaat’. (Tussiaat 37:11, NW) Tamatumali piumaarnissaa qularinngilluinnarsinnaanerparput?

3. Suna pillugu ullumikkut nunami piviusumik eqqissineqanngila?

³ Nunarsuup tamarmiusup piuneerunneqaratarsinnaanissaanik eqqarsaat ullumikkut inuiaat erloqissutigaat. Ungasinngitsukkut misissuinermi isuma una inerneqarpoq: „Sianiilliornerujussuuvoq sorsunnersuup aappaaniilli koruunit 30.-40.000.000.000.000-it (30-40 billionit) aningaasartuutigineqarsimammata atomitortunik sakkussiornermut, sakkussamaatillu tamakku atorneqassagaluarpata silarsuup tamarmiusup imminornissaanik naleqassagaluarpoq. . . . Silarsuarmi atomitortunik sakkussamaatit naammattumik qaarsinnaassuseqarput inuit 58-inik milliardillit toqussinnaassallugit — imaluunniit inuit maannakkut inuusut tamaviisa aqqaneq-marloriarlugit toqussinnaassallugit.“a Taamaakkaluartoq sakkussaliornikkut ingiarniunneq sualuppallaaqisoq sukkatsikkaluttuinnarpoq. Akerliusumik isumalinnik qunutitsiniangaarnikkut oqimaaqatigiinniarneq qajannaatsoq, suujunnaarsitsinissamik nalorninaatsumik ilisimalersitseqatigiinneq, naalagaaffissuit pissaanilissuit eqqisseqatigiinnerannik taaneqartup tunngavigaa — eqqissinerunngivippoq Guutimit pisoq.

4. (a) Maannakkut silarsuarmi suut atugaappat? (b) Jehovamilli pallorfiginnittut suna qularinngivillugu neriugisaraat?

⁴ Silarsuaq manna tamarmigut naakkinartorujussuuvoq. Innuttaaqatigiit aatsaat ukiuni makkunani nakuuserneq atorlugu pinerlunnerit, naalakkersuisutigut peqquserlunnerit, aningaasatigut ajuleriartornerit, guutiitsuussuseq upperisarsiornikkullu paatsiveerussimaneq taama sualutsigisut atortariaqalersimavaat. Aatsaat taama ilumoortigilerpoq ’pinngortitat tamarmik suli tamassa anersaameqatigiillutik erloqeqatigiissut’. Guutilli neriorsuutigisimavaa pinngortitani inuit ’aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu’. (Rûmamiut 8:21, 22) Eqqissinermik nuannarisaqartut Bibelip Guutiutitaanik, Naalakkamik kisimi oqartussaasumik Jehovamik, pallorfiginnittut qularunnaarsagaapput kiffaanngissuseq tamanna pigilissagitsik. Kiffaanngissusiussaaq eqqissinermut piviusumut, eqqissinermut soraajuitsumut, tunngaviligaq. (Hisĩkiale 37:26-28) Eqqissinerli tamanna qaqugu qanorlu ililluni eqqunneqassava?

’Qaqugu qanoq ilisukkullu piumaartoq’ Guutip qanoq isumaqarfigaa

5. Tásalûníkamiunut agdlagkat sujugdlît 5:1 pillugu apeqqut suna apeqqutinngorpa?

⁵ Apustili Paulusip kristumiut Thessalonikamiittut tuppallersareersimavai nassuiaakkamigit makiffissap ’Naalakkap najuunnissaanut’ atassuteqarneranik. Taava oqaatsini imatut nangippai: ’Kisiannili qaquguluunniit qanoq ilisukkulluunniit piumaartumik allaffigisariaqanngilasi qatanngutivut.’ — 1 Tásalûníkamiut 4:15, NW; 5:1.

6. Qanoq nalunngissinnaavarput Guutip piffissat qanoq ilinerillu pingaartikkai?

⁶ Apustilip oqaasii taakku ima paasisariaqarpat Guutip piffissat qanoq ilinerillu pingaartinngikkai? Naaggarluinnaq! (akugdlîssup oĸausê 3:1) ’Ullut naammatsiffissaat nalliummat,’ sapaatit akunnerisa 69-it ulluisa ukiunngortitat naaneranni, ’Guutip erni aallartippaa’. Jesusillu nunami kiffartuussinera ukiut sisamassaat qiteqqullugu — ukiumiit 29 u.n.a.k. ukiumut 33 u.n.a.k. — sivisussuseqarpoq, siulittuutigineqarsimanera naapertorluinnarlugu. (Galâsiamiut 4:4; Dâniale 9:24-27) ’Inuiaqatigiit ullussaasa aalajangersimasut’ naanerannerpiaq 1914-imi Jesus ’Jerusalemimi qilammiittumi’ kunngitut ivertinneqarpoq. (Lúkarse 21:24, NW; Eprîarit 12:22; Hisĩkiale 21:32; Dâniale 4:31, 32) Aammattaaq ’annikilliornartussaq angisooq’ ’ullussami ullullu qanoq ilinissaani’ Jehovap aalajangersimasaani nalliukkumaarpoq. ’Kingoqqutsissanngilaq.’ — Matîuse 24:21, 36; sarĸúmersitat 7:14; Hâpakuk 2:3.

7. Suna pillugu Paulusip ’qaquguluunniit qanoq ilisukkulluunniit piumaartumik’ Thessalonikamiittut allaffigisariaqanngilai?

⁷ Taamanikkulli ’qaquguluunniit qanoq ilisukkulluunniit piumaartumik’ Paulusip allaffigisariaqanngilai. Kristumiut Thessalonikamiittut taakkua qulariunnaarsimavaat juutit pissutsinik aaqqissuussinerata naalerfissaa nalliussimasoq, ukiut 20-t matuma kingornatigut, ukiumi 70-imi u.n.a.k., naasussaammat. Aallussilluarnermikkut ’anersaakkullu iluartukkut tipaatsunnermikkut’ maligassiuilluarput. (1 Tásalûníkamiut 1:4-7) Taakkunatut ullumikkut Jehovap Nalunaajaasuisa nalunngilluinnarpaat sorsunnersuit pisimasullu erloqinartut allat 1914-imiilli pisartut ’nalunaaqqutaasut’ Jesusip takussaanani najuunneranut Naalagaaffik pigilersimallugu pissaaneqarneranut naalannassuseqarneranullu. — Matîuse 24:3-8; 25:31.

8. Suna pillugu eqqumaniartariaqarpugut suliuaannartariaqarlutalu?

⁸ Tulliullugu apustilip kristumioqatini isumalluarsarpai, oqarluni: ’Ilissi nammineq ilisimalluarassi Jehovap ullussaa nalliukkumaartoq soorlu tillittoq unnuakkut pisartoq.’ (1 Tásalûníkamiut 5:2) Nalliuffissarpiaa naak nalugaluaripput, ullussaq eqqartuussummik naammassineqarfissaa qanilliartuinnarpoq. Piffissami Guutip aalajangersimasaani, tassanngaannaq, uisoriinnaq nalliuppallakkumaarpoq. Taamaattumik eqqumasariaqarpugut suliuaannarluta. — Lúkarse 21:34-36.

Pissangatseruttorlutik eqqisseqqusisut

9. (a) Suna nilliassutigineqalissava, sunalu pillugu kristumiut ilumoortut tamatuminnga nilliaqataassanngillat? (b) Kikkuuppat eqqississaarisut, qanorlu ilillutik Jeremiasip nalaani naalakkersuisunut naleqqiunneqarsinnaappat?

⁹ ’Eqqissinarpoq, siooranartoqanngilaq.’ Taama issuaanermigut Paulusip uparuartuuppaatigut nalunaarutissamik Kristusip ’najuunnerata’ pissanganarseruttorfissaani tutsiukkumaartussamik. (1 Tásalûníkamiut 5:3) Eqqississaarut tamanna erniinnaq tusassanerparput? Silarsuarmi eqqississaarutissaq toqqississaarutissarlu suminngaaneersinnaassava? Soorunami Kristusip malittaasa akornanneersinnaanavianngilaq, Jesusimi oqarsimavoq taakku naalagaaffialuunniit ’silamit matumannga pinngitsut’. (Juánase 15:19; 17:14, 16; 18:36) Taamatut eqqississaarisut tassaassapput silamiut Guutip naalagaaffiata tikiunnissaanut assortuisut. Silarsuarmut ajortup, Satanip Diaavulup, pissaaneqarfigisaanut ilaapput. (1 Juánase 5:19, NW) Naalakkersuisutigut upperisarsiornikkullu pisortaasut Jeremiasip inooqataasut, ’uummatimik takorluugaanik oqaluttassapput’, oqarlutik: ’Eqqissiumaarpusi,’ kukkusumik eqqissineq Guutimeersuunerarlugu. Oqaasiili sallutuutut paasineqarumaarput! — Jerimia 23:16, 17, 19, 20.

10. Pisimasut tulleriiaartut suut pissutsinik maannakkut silarsuarmi atuuttunik kinguneqarpat?

¹⁰ Pisimasut tulleriiaartut kajumissaarummik ’eqqissinarpoq, siooranartoqanngilaq’ kinguneqarumaarput. 1920-mi, sorsunnersuup, maanna taaneqartartup sorsunnersuup siulliup, kinguneratut Naalagaaffiit Peqatigiit siulliit (Folkeforbundi) pilersinneqarput. Peqatigiit taakkua siunertaraat nunarsuarmi naassaanngilluinnartumik sorsunneqarunnaarsitaanissaq. Kisiannili sorsunnersuup aappaata pilerneratigut Peqatigiit taakku itinersuarmullusooq iginneqarpallapput. Oktoberip 24-anni, 1945-mi, peqatigiiffiusimasut taakku uummarsarneqarput, itinersuarmit qaqillutik FN-imik atertaarsimallutik. (Naleqqiukkit sarĸúmersitat 17:8.) Pingaarnerusutigut siunertaraa „silarsuarmi eqqissinermik isumannaassusermillu atatitsiniarnissaq“. FN-ip aallarniisui nalunaarput siunertarigitsik „kinguaariit inunngortussat sorsunnermit naalliutsinneqatsaaliorumallugit“. FN sorsutsaaliuiniarnermigut siooranartoqarunnaarsitsiniarnermigullu iluatsissimava?

11. Silarsuaq maannakkut qanoq navianartorsiortigaa?

¹¹ FN-ip aallarniisui naak peqqusersuitsumik siunertaqaraluartut, peqatigiit siulini assigalugu siunertaminik nalunaarut piviusunngortinngitsoorsimavaa. Maanna silarsuup paassaasivissuaq sakkussianik atomitortunik ulikkaartoq issiavigaa. 1986-imi aprili qaammataagaa Sovjetunionimi Tjernobylimi ajunaarnersuaqarnerup, Europap iluarujussuanut navianartunik qinngornilinnik nakkartoqarneranik kinguneqartup, takutippaa atomip nukinganik atuisarneq, naak eqqissinartumik siunertaqaraluarluni, assut navianartorsiortitsisinnaasoq. Manerassuup kujaterpiaani nunat ilaasa aalajangiunniarsaraat nunat pigisamik „atomitortunik sakkussialersimaqqusaannginnissaat“. Kisianni sakkussiat atomitortut atorlugit tamakkiisumik sorsunneqalissappat, sumiluunniit annattoqarsimanavianngilaq.

’Eqqissineq siooranartoqannginnerlu’ anguneqarsinnaappat?

12. Ukioq 1986 pillugu FN sumik nalunaaruteqarsimava, nalunaarutaalu naalagaaffinni qanoq ilassineqarsimalluni?

¹² Ajornartorsiornerup sakkortusiartornera paasilluinnaramiuk, FN-ip tungaaninngaaniit 1986 taaneqarpoq ’naalagaaffiit tamalaat eqqisseqatigiinniarnissaata ukiua’nik. Naalagaaffiit tamanna assigiinngitsumik ilassivaat. Amerlanersaasa FN-ip eqqisseqatigiinniarnissamut ukiunngortitaa arlaatigulluunniit tapersersorsimavaat, uparuarpaalli atominik sakkussiat atorlugit sorsunneqaratarsinnaanissap eqqissisitsiniarnissamut aarlerinartorsiortitsisuunera. Taamaattoqartilluguli nunarsuarmi tamarmi annikinnerusunik sorsunneqartuaannarpoq. Sorsunnersuup aappaaniilli 150-inik assigiinngitsunik sorsunneqarsimavoq, toqutaasortaallu 30.000.000-init amerlanerusimapput. Ilumoortumik oqartoqarsinnaava naalagaaffiit arlaataluunniit oqaatsit tusaamasaasut Isaia 2:4-meersut FN-ip qullersaqarfiata New Yorkimiittup illoqannginnersaani qarmarsuarmi qiperugaasut aallarniillutik piviusunngortinniarsimagaat?

13. Upperisarsiornerup tungaatigut siulersuisut tamanna qanoq tapersersorpaat?

¹³ Silarsuup upperisarsioqatigiivisa FN-ip eqqisseqatigiinniarnissamut ukiunngortitaa tapersersorumanngissimanngilaat. Paavip Johannes Paulip aappaata januarip aallaqqaataa 1986 silarsuarmi tamarmi eqqisseqatigiinniarnissamut ullunngortippaa, naalakkersuisullu kajumissaarlugit aqutsisuulluaqqullugit silarsuarmi tamarmi eqqisseqatigiinniarnissamik tunngaviliinissamut pisariaqartumik. Aamma silarsuup upperusersiortui tamaasa kajumissaarpai naalagaaffiit tamalaat eqqisseqatigiinniarnissaata ukiuata ingerlanerani Assisimi Italiamiittumi qinujartoqqullugit. Canterburymi biskorpiunerup, ilagiit tuluit naalagaaffiannut atassuteqartut palasikkuini qullersaasup, buddhasiortullu immikkoorniaqatigiit assigiinngitsut qaaqqussut tamanna kajumingaarlutik tigusimavaat. Ilagiit silarsuarmi tamarmi Siunnersueqatigiissortaat naalagaaffiit tamalaat eqqisseqatigiinniarnissaata ukiua pillugu nalunaarusiaminni atomitortunik sakkussakillisarniarnerup nukinginnartumik aallartinneqarnissaanut kajumissaaripput.

14. Suna pisariaqarpa eqqissinissamik pilersitsiniarneq iluatsissappat?

¹⁴ Kisiannili, eqqissinermik isumannaassusermillu pilersitsiniarneq eqqarsaatigalugu, ’Guutip eqqissisaasup’ suna piumasaraa? Guutip oqaasiani siulittuuteqarfiusumi takutinneqarnerpa inuit naalagaaffiillu naammalluinnanngitsut eqqissineq isumannaassuserlu silarsuarmut tamatumunnga pilersissinnaassagaat? Naaggarluinnaq! Jehova naapertuilluassutsi naapertorlugu naalannaatissaminillu iliuuseqalerpat aatsaat tamanna iluatsissaaq. — Isaia 55:11; 61:11.

’Perlussap tassanngaannaq tikikkumaarpai’

15. Tulliullugu Paulus tupaallannartumik sumik nalunaaruteqarpa?

¹⁵ Apustilip Paulusip erniinnaq piumaartussanik oqaluttuuppaatigut: ’Oqarpata: Eqqissinarpoq, siooranartoqanngilaq, taava perlussap tassanngaannaq tikikkumaarpai, soorlu nallisarnerit ernisulersoq tikittaraat; aniguinavianngillallu.’ — 1 Tásalûníkamiut 5:3.

16. Suna pillugu inuiaqatigiit aqqutaat Guutip aqqutigisarinngilai?

¹⁶ Oqaatsit taakku atuaqqaarlugit immaqa ajuallannartinneqarsinnaapput. Bibelimili erseqqissarneqarput. Ullumikkut inuiaqatigiit aqqutaat Guutip aqqutigisarinngilai. (Isaia 55:8, 9) Inuit naalakkersueriaasiisa assigiinngitsut ingerlajuarnerat akuerigamiuk pissutigaa apeqqummut akerleriissutaasumut Pulateriaarsuup peqquserluttup, Satanip Diaavulup, ukiut 6000-it matuma siornatigut apeqqutaalersitaanut akissuteqarnissani. Satanip siuaasavut siulliit kimigiiserfigigamigit Guutimut attaviitsuussusissartik qineqqullugu, inuiaat Guutip naalakkersuineranik atorfissaqartitsinersut apeqqutaalersippaa. — 1 Môrsase 3:4, 5.

17. Inuit naalakkersuinermikkut suut angusaraat, tamatumalu suna uppernarsarpaa?

¹⁷ Taamanerniilli ukiuni tuusintilinni inuit naalakkersueriaatsinik assigiinngitsorpassuarnik inuit isummerfigisinnaasaannik tamanik ooqattaareqattaartuarnerat Guutip akuerisimavaa. Ukiorpaalunnguaannaat ukiulluunniit hundredilippassuit atasimagaluarunik, inuit naalakkersueriaasii tamarmik eqqissinermik piviusumik isumannaassusermillu pilersitsiniarnermikkut iluatsinngitsoorluinnarsimapput. Naalakkersueriaatsip qanoq ittuugaluartulluunniit nalaani, inuiaat sorsunnerit, pinerlunnerit, peqqarniisaarnerit toqulu atugariuaannarpaat. Silamiut oqaluttuarisaaneranni tamani ’inuk inoqamminut pissaaneqartarallartillugu perlussiornartumik’. (akugdlîssup oĸausê 8:9) Ullumikkut allaanngilaq. Akerleriissummik ilisimannittoq kinaluunniit Guutip pruffiitiutitaatut oqarsinnaanngorsimavoq: „Nalunngilluinnarpara, Jehova, inuup ingerlavissi oqartussaaffiginngikkaa. Ingerlasup alloriartarnimi sangunaveernissaat piginngilaa.“ — Jerimia 10:23, NW.

18. Suna pillugu inuiaqatigiit oqarnerat ’Eqqissinarpoq, siooranartoqanngilaq’, asuliinnaassava?

¹⁸ Maanna akerleriissutip nangittussaanngitsumik aaqqissorneqarnissaanut piffissanngorpoq. Guutip naalakkersuineratigut aatsaat eqqissineq piviusoq isumannaassuserlu inuiaat akornanni pilersinneqarsinnaassapput. Inuiaqatigiilli oqarnermikkut ’Eqqissinarpoq, siooranartoqanngilaq’, Guutip naalakkersuineranik tapersersuisuunngillat. Pingaarniarlutik namminneq eqqarsartaatsitik najoqqutaralugit tamanut oqartussaallutik naalagaajuarusupput. Piffissaarussimappulli! Naalagaaffiit malugaat annertuumik sunniisumik iliortoqalerpat aatsaat suut tamarmik atominik sakkussiat atorlugit sorsuunnissami suujunnaarsinneqarluinnarnissaat ingalanneqarsinnaassasoq. Taamaattumik Jeremiasip siulittuutigisaatut iliussapput: ’Innuttamalu aserorneri katsorsarniapalaaginnarpaat oqarlutik: Eqqissilit, eqqissilit; naak eqqissivissaqanngitsoq.’ Iluatsinngitsuussappulli! — Jerimia 6:14; 8:11, 15.

Naggatissaq siulittuutigisaq

19. ’Jehovap ullussaa’ qanoq ililluni nalliutissava?

¹⁹ ’Perlussap tassanngaannaq tikikkumaarpai,’ apustili Paulus oqarsimavoq. ’Takuasi pissarsuartaat silami nilliasut, arpaartut eqqissinermik oqaassisut qiangaartut.’ (Isaia 33:7) Bibelimi allassimaffippassuarni allassimavoq Jehovap inuiaqatigiinnik ajortunik eqqartuussutaa tassanngaannaq, ilimaginngisaannik, naammassineqarumaartoq, ’soorlu tillittoq unnuakkut pisartoq’. (1 Tásalûníkamiut 5:2, 3; Jerimia 25:32, 33; Sivfânia 1:14-18; 2 Pîtruse 3:10) Silamiut nipituumik nalunaarutigilerpassuk eqqissineq isumannaassuserlu ilaatigut angusimallugit, ’Jehovap ullussaa’ uissuumminartumik tassanngaannaq nalliukkumaarpoq. Guutip innuttaasa nilliassut ’Eqqissinarpoq, siooranartoqanngilaq’ pissusiviagut paasisimassavaat, Jehovallu qimarnguffissiaaniillutik isumannaassapput. — Tussiaat 37:39, 40; 46:2, 3; Jûîtdle 3:21.

20. (a) FN qanoq ittuulluni nersutaava? (b) Jehovap eqqunngitsumik upperisarsiornerit qanoq isigai, sunalu pillugu?

²⁰ Guutip oqaasiani Naalagaaffiit Peqatigiit, Folkeforbundip FN-illu, ingerlaasiat assersuunneqarpoq ’nersutip aappalujattup’ ingerlaasianut. Nersut taanna arfineq-marlunnik niaqoqarpoq, assersuutaasunik silarsuarmi naalagaaffissuarnut nersutip nagguivigisaanut, qulinillu nassoqarluni, assersuutaasunik naalakkersuinikkut pissaanilinnut maannakkut nersutip tapersersortaanut. Bibelimi takutinneqarpoq „nersut“ taanna naalakkersuinermik ingerlatsinermut assersuutaasoq, soorlu tuluit „liiuviat“ russillu „allarsuat“. Qaaniippoq arnaq ’Babylon angisooq, uersartut maajunnartullu nunami pisartut arnaat’. (sarĸúmersitat 17:3-8) Oqaatsitigut tamakkunuunatigut Jehovap qanoq eqqunngitsumik upperisarsiornerit, Guutimut naalagaaffianullu iluartumut sinniisuunngitsut, isigigai ersersitaalluinnarpoq. Anersaakkut uersartuuvoq naalakkersuinermik ingerlatsinermut akuliuttarami. Tamanna takutinneqarpoq upperisarsiortut FN iligimmassuk silamiut eqqissinermik isumannaassusermillu pilersitsiniarnerisigut. Aammattaaq ’arnaq’ upperisarsiornerusup taassuma kissaatigigaluarpaa Guutip eqqartuussummik oqariartuutaa Jehovap Nalunaajaasuisa nalunaarutigisartagaat tutsiussaassasoq. Tamanna anguniarlugu naalakkersuisut ilaat sunnersinnaasimavai Nalunaajaasut kristumiorpaluttumik sulinerat inerteqqutigeqqullugu. — Tussiaat 2:1-3.

21. (a) ’Jehovap ullussaata’ pisimasoq suna aallaqqaatigissavaa? (b) ’Ullussami’ tassani suna tullinngorluni pissava?

²¹ ’Jehovap ullussaa’ qanoq ililluni nalliutissava? Inuiaat ingerlaasiata unnuarujussuani taartumi matumani ’tillittutut’ tikiukkumaarpoq! Nalliukkumaarpoq Guutip sunniineratigut naalagaaffiit nersummut FN-iusumut ilaasortaasut eqqunngitsumik upperisarsiornerit tassanngaannaq saassutilerpatigik. Babylonimik angisuumik qamanerpiaq uumissuinertik ersersillugu, pissusivii uleerumaarpaat suujunnaarsilluinnarlugulu. Eqqartuussut ima pilertortigisumik naammassineqassammat, naalakkersuisut asaqatigisaralui nillissapput: ’Eqqanaq, eqqanaq, uumaa illorpassuaqarfik angisooq, Babylon illorpassuaqarfik nakuusoq, eqqartuunneqarnerit nalunaaqquttap akunnerani ataatsimi nalliummat.’ Naalagaaffiilli sakkutoorpassuisalu Guutip innuttai saassukkumaarpaat. Taavali kunngit kunngiata, Jesus Kristusip, akeqqat tamaasa suujunnaarsissavai assortuisuunerlu, Satan Diaavulu, itinersuarmut igissallugu. — sarĸúmersitat 17:16, 17; 18:10; 19:11-21; 20:1-3; naleqqiuguk Hisĩkiale 38:11, 16, 18-23.

22. (a) Inuit uppertut ullumikkut nuanningaartoq suna neriugisaraat? (b) Qanoq ilioruit aatsaat eqqissineq Guutimit pisoq nuannaarutigisinnaassaviuk?

²² Kiisa eqqissineq piviusoq isumannaassuserlu Guutip naalagaaffiata ataani atuulluassapput! (Tussiaat 72:1, 7; Isaia 9:6, 7) Qujanartumik ullumikkut inuusut ’eqqumaniartut silatusaartartullu’ ilarpassuisa tamanna angumerissavaat. (1 Tásalûníkamiut 5:4-6, NW) ’Amerlangaartut inuiaqatigiinnit tamaneersut,’ Jehovap Kristus aqqutigalugu utertitsissut tunngavigalugu annaassissutaanik suliaqarlutik upperfiginnittut, ’annikilliornartussamit angisuumit’ aniguisinneqassapput eqqissineq Guutimit pisoq naassaanngitsuusoq nuannaarutigissallugu. (sarĸúmersitat 7:9-17; 21:3, 4) Qanortoq amerlangaartunut illit ilaaniarna! (wD 1/10 86)

[Quppernerup ataani ilanngussaq]

Uku qanoq akissavigit?

□ Suna pillugu ’piffissat qanoq ilinerillu’ Guutimut uatsinnuttaaq pingaartuuppat?

□ ’Jehovap ullussaata’ qanilliartornera qanoq isumaqarfigissavarput?

□ Eqqississaarut Tásalûníkamiunut agdlagkane sujugdlerne 5:3-mi siulittuutigisaq kikkut nilliassutigissavaat, qaqugulu?

□ Piumaartussat pissanganaqisut pingaartumillu kinguneqartussat suut taamani nalliutilissappat?