Jehovap oqaasia uumavoq
Thessalonikamiunut allakkanit aamma Timotheusimut allakkanit pingaarnersat
Thessalonikami ilagiit nutaat apustili Paulusi tassani tikeraartillugu pilersinneqaramilli akerlilersorneqarput. Taamaattumik Timotheusi — immaqa 20-t sinnerlugit ukioqartoq — ajunngitsumik nalunaarutissaqarluni Thessalonikamit utermat, Paulusip Thessalonikamiut nersualaarniarlugit kajumissaarniarlugillu allaffigerusutsappai. Allakkat, ukiup 50-ip naalernerani allataagunartut, Paulusip allagaasa isumassarsiarititaasut siullersaraat. Tamatuma kinguninngua kristumiut Thessalonikamiittut allaffigeqqippai. Tamatumuuna ilaasa eqqunngitsumik isumaqalersimanerat naqqippaa qatanngutillu uppernermi aalajaannissaannik kajumissaarlugit.
Tamatuma kingorna ukiut qulit missaat qaangiuttut Paulusi Makedoniamiippoq Timotheusilu Efesosimiilluni. Paulusip Timotheusi allaffigaa Efesosimiiginnarnissaanik aamma eqqunngitsumik ilinniartitsisunut ilagiinniittunut anersaakkut sorsuutiginnittuarnissaanik kajumissaarlugu. Ukiumi 64-imi Romami ikuallannersuaqarnerata kingorna kristumiut malersorneqarujussualermata Paulusip Timotheusimut allakkami aappaat allappai. Allagaasa isumassarsiarititaasut taakku kingullersaraat. Paulusip allagaani sisamani taakkunani qiimmassaataasut siunnersuutigineqartullu uagut ullumikkut iluaqutigisinnaavavut. — Hebræerit 4:12.
„EQQUMANIARTA“
Paulusip Thessalonikamiut ’uppernermi suliaat, asanninnermi assoroornerat nikallujuinnerallu’ pillugit nersualaarpai. ’Neriuuteqaatigisarigini tipaatsuutigisariginilu nigaliliatullu ataqqinaatitut usorsisimaarutigisassarigini’ oqaluttuuppai. — 1 Thessalonikamiut 1:3; 2:19.
Kristumiut Thessalonikamiittut makititaanissamik neriuummik tuppallersaqatigiinnissaannut kajumissaareerlugit Paulusi ima allappoq: ’Jehovap ullussaa nalliukkumaarpoq unnuami tillinniatut.’ Siunnersorpai ’eqqumaqqullugit aalakooqqunagillu’. — 1 Thessalonikamiut 4:16-18; 5:2, 6.
Allassimaffiit pillugit apeqqutinut akissutit:
4:15-17 — Kikkunuku ’nuissatigut aallarunneqarumaartut Naalagaq parsiarlugu silaannarmi’, tamannalu qanoq pisarumaarpa? Tassaapput kristumiut tanitat Kristusip Guutip naalagaaffiani kunngitut pissaaneqarluni najuunnerani inuusut. Jiisusi ’Naalagaq parsiarpaat’ qilammi takussaanngitsumi. Tamannali misigiumallugu toqoqqaartariaqarput pinngortitatullu anersaajusutut makitinneqaqqaartariaqarlutik. (Romamiut 6:3-5; 1 Korinthimiut 15:35, 44) Kristusi najuutilereerpoq, taamaattumik kristumiut tanitat nalitsinni toqusartut toqugaangamik toqungaannartanngillat. ’Aallarunneqartarput’, tassa ingerlaannaq makitinneqartarput. — 1 Korinthimiut 15:51, 52.
5:23 — Paulusip suunuku pigai qatanngutit ’anersaavatalu tarnaatalu timaatalu sernigineqarnissaat’ qinnutigigamiuk? Paulusip pivai kristumiut ilagiikkuutaat tamarmiusut, ilaatigut kristumiut tanitat Thessalonikamiittut, anersaavat, tarnaat timaallu. Ilagiit sernigineqarnissaat qinnutigiinnarnagu, taakkua ’anersaavata’, tassa taakkunani isiginnittaaserineqartup, sernigineqarnissaa qinnutigaa. Qinnutigaattaaq ilagiit ’tarnaat’, tassa piunerat, aamma ’timaat’ — timi kristumiunik tanitanik katitigaasoq. (1 Korinthimiut 12:12, 13) Taamaalilluni qinnut taanna Paulusip ilagiinnik soqutiginningaarneranut ersiutaavoq.
Ilinniarfigisinnaasavut:
1:3, 7; 2:13; 4:1-12; 5:15. Sunniuteqarluartumik siunnersueriaaseq tassaavoq siumukarnissamut kajumissaariitigaluni pissutissaqarluartumik nersualaarineq.
4:1, 9, 10. Jehovamik pallorfiginnittut anersaakkut siumukartuartariaqarput.
5:1-3, 8, 20, 21. Jehovap ullussaa qanilliartortillugu ’aalakoornata upperneq asanninnerlu saattuaasatut atisariaqarpavut annaanneqarnissamillu neriuut niaqorortinnaveeqqutigisariaqarlugu’. Aammattaaq Guutip oqaasia siulittuutaasoq, Biibili, eqqumaffigeqqissaartariaqarparput.
„AALAJAANNIARITSI“
Ilagiinniittut ilaasa Paulusip allakkamini siullerni allagai eqqunngitsumik nassuiarsimagunarpaat ’Naalakkatta Jiisusi-Kristusip tikiunnissaa’ qanillilluinnarnerarlugu. Isuma taanna naqqinniarlugu Paulusip nassuiarpaa suna ’nalliuteqqaartussaanersoq’. — 2 Thessalonikamiut 2:1-3.
Paulusi ima oqaaqqissaarivoq: „Aalajaanniaritsi, maligassarsiat . . . ajoqersuutigisavut aalajangiullugit.“ Peqquai „qatanngut kinaluunniit torinngitsumik inuuseqartoq . . . nigorsimaqqullugu“. — 2 Thessalonikamiut 2:15; 3:6.
Allassimaffiit pillugit apeqqutinut akissutit:
2:3, 8 — Kinaava „inatsisaatsuunerup inuttaa“, qanorlu piuneerussaassava? ’Inuttaq’ katitigaasoq taanna tassaavoq kristumiuunerartut palasii. Guutip guutiitsunut eqqartuussutaanik oqaluussisinnaatitaasoq taakkualu naammassinissaannik peqqusisinnaatitaasoq tassaavoq „Oqaaseq“ — Guutip oqaaseqartitaa pingaarnerpaaq, Jiisusi Kristusi. (Johannesi 1:1) Taamaattumik oqartoqarsinnaavoq Jiisusip inatsisaatsuunerup inuttaa ’anersaartorfigalugu [nukimmik sulisumik] toqukkumaaraa’.
2:13, 14, (1936) — Kristumiut tanitat qanoq ’pileqqaarneranit annannissamut qinerneqarpat’? Guutip aalajangermagu arnap kinguaassaata Saatanip niaqua aserortissagaa, tanitat eqimattatut siumut aalajangerneqarput. (1 Mosesi 3:15) Jehovap piumasaqaatit taakkuninnga naammassineqartussat taakkualu suliassaat qanorlu misilinneqassanersut aamma siumut oqaatigai. ’Tamatumunnga’ qaaqquai.
Ilinniarfigisinnaasavut:
1:6-9. Jehovap eqqartuussutai eqqugaasussanuinnaq naammassineqartarput.
3:8-12. Jehovap ullussaata qanillinera patsisigineqassanngilaq kiffartornerup saniatigut imminut pilersunnginnissamut. Assannik sarliaannarneq eqiasulissutaasinnaavoq ’susassarinngisatsinnullu akuliunnermik’ kinguneqarsinnaalluni. — 1 Petrusi 4:15.
„ILINNUT PAARISASSANNGORTITAQ PAARILLUARNIARUK“
Paulusip Timotheusi siunnersorpaa ’ajunngitsussaq siunertaralugu sorsoqqullugu uppertuulluni ilerasuuteqarnanilu’. Apustilip allaatigaa ilagiinni nakkutilliisut piumasaqaatit suut eqqortissaneraat. Paulusi Timotheusimut aamma allappoq ’ingalassimassagai oqaluttuatoqqat iluaatsut’. — 1 Timotheusi 1:18, 19; 3:1-10, 12, 13; 4:7.
„Angut utoqqaq sukannersumik oqaluffigissanngilat,“ Paulusip Timotheusi allaffigaa, imalu kajumissaarlugu: „Ilinnut paarisassanngortitaq paarilluarniaruk; tunukkit oqalunneq iluaatsoq piunngitsorlu akerliliissutillu ilisimasaqarnermit eqqunngitsumik taama taaneqartartumit pisut.“ — 1 Timotheusi 5:1; 6:20.
Allassimaffiit pillugit apeqqutinut akissutit:
1:18; 4:14 — Timotheusi pillugu „pruffiititut oqaluttut oqaasii“ suut oqaatigineqarpat? Tassaasinnaapput Timotheusip ilagiinni kristumiuni siunissami suliassai pillugit siulittuutit, Paulusi ajoqersuiartortitatut angalanermi aappassaanni Lystra tikeraarmagu isumassarsisitaanikkut saqqummiunneqartut. (Apustilit Suliaat 16:1, 2) „Pruffiititut oqaluttut oqaasii“ taakku tunngavigalugit ilagiinni utoqqaanertat assatik Timotheusimut inuusuttumut tutsippaat tamatumuuna kiffartornermut immikkut ittumut immikkoortillugu.
2:15 — Arnaq ’qitorniornermigut annaanneqassasoq’ qanoq paasisariaqarpa? Qitorniornermigut, qitornaminik isumassuinermigut illuminilu ningiuunermigut arnaq tarfiinnartuunissaraluamit, ’oqalukkumavallaartunngortutut susassarinngisaminut akuliuttarnissaraluamit’, „annaanneqassaaq“. — 1 Timotheusi 5:11-15.
3:16 — „Guutimik mianerinninnerup anngigisartaa“ suua? Jehovap kisimi oqartussaaneranut inummik naalalluinnartoqarsinnaassanersoq ukiorparujussuarni anngigisaavoq. Jiisusip toqussi tikillugu Guutimut assuarnaalluinnarnera tamatumunnga akissutissarsisitsivoq.
6:15, 16 — Uani kina pineqarpa Jehova Guuti imaluunniit Jiisusi Kristusi? Pineqartoq tassaavoq saqqummersussatut allaatigineqartoq, Jiisusi Kristusi. (1 Timotheusi 6:14) Inunnut kunngiullutik naalagaallutillu naalakkersuisunut sanilliullugu Jiisusi tassaavoq ’naalagaasutuaasoq’ kisimilu toqujuissusermik pigisaqartoq. (Danieli 7:14; Romamiut 6:9) Jiisusi qilannut takussaanngitsunut qilaliarmalli inuup nunamiuusup kialuunniit isiminik takusinnaasimanngilaa.
Ilinniarfigisinnaasavut:
4:15. Kristumiunngorlaajugaluarutta qangaliluunniit kristumiunngorsimagaluarutta anersaakkut uniinnassanngilagut siumukartuartariaqarlutali.
6:2. Uppeqaterput sulisitsisorigutsigu atornerlunngisaannassavarput, sullinnissaanulli kajuminnerusariaqarpugut sulisitsisup ilagiit avataanniittup sullinnissaraluanit.
’OQAASEQ OQALUUSSISSUTIGUUK, SASSARTARIT’
Ullussanut artornartunut Timotheusi piareersarniarlugu Paulusi ima allappoq: „Guutip tuninngilaatigut anersaamik qunutuumik, kisianni tunivaatigut anersaamik nakuussuseqartumik asannissuseqartumillu silatussuseqartumillu.“ Timotheusi ima siunnersorneqarpoq: ’Naalakkamut kiffaasoq saqitsaassisussaanngilaq. Taanna tamanut inussiarnersuussaaq ajoqersuilluartuullunilu.’ — 2 Timotheusi 1:7; 2:24.
„Ilinniarsimasatit nakimaatsumillu upperilersimasatit aalajangiunniakkit,“ Paulusip Timotheusi kajumissaarpaa. Tunussisut ajoqersuutertik siaruartermassuk apustilip nakkutilliisoq inuusunnerusoq ima siunnersorpaa: „Oqaaseq oqaluussissutiguuk, . . . sassartarit, nakimajunnaarsitsigit, naqqissuisarit, oqaaqqissaarisarit.“ — 2 Timotheusi 3:14; 4:2.
Allassimaffiit pillugit apeqqutinut akissutit:
1:13, NV — „Najoqqutassiaq oqaatsinit peqqissinartunit [Timotheusip Paulusimit tusagaanit] pisoq“ suua? ’Oqaatsit peqqissinartut’ tassaapput oqaatsit ’Naalakkatsinnit Jiisusi-Kristusimeersut’ — tassa kristumiut ajoqersuutaat ilumoortut. (1 Timotheusi 6:3) Jiisusip ilinniartitsissutigisai iliuuserisaalu Guutip oqaasianut naapertuupput, taamaattumillu oqariartaaseq ’oqaatsit peqqissinartut’ annertunerpaamik isumaqartillugu innersuutaasinnaavoq Biibilimi ajoqersuutigineqartunut tamarmiusunut. Ajoqersuutigineqartut taakku iluaqutigisinnaavavut Jehovap uagutsinnut piumasaqaataanik paasinninnissatsinnut. Ilikkakkatsinnik Biibilimeersunik maleruaanitsigut najoqqutassiaq taanna aalajangiusimavarput.
4:13 — ’Mappersakkat pergamentimut allassimasut’ suuppat? ’Pergamenti’ tassaavoq ameq allaffissiaq. Paulusip Allakkat Hebræerisuut immikkoortuisa ilaat qinnutigisimasinnaavai Romami parnaarussaaqqanermini atuaqqissaarniarlugit. Mappersakkat ilaat immaqa papyrusiupput, allalli pergamentiullutik.
Ilinniarfigisinnaasavut:
1:5; 3:15. Timotheusip Kristusimik Jiisusimik upperinnilerneranut, upperneranut iliuusiinut tamanut sunniuteqartumut, pissutaanerpaajuvoq meeraanerminiilli angerlarsimaffimmini Biibilimik ilinniartinneqarnera. Angajoqqaat Guutimut qitornaminnullu akisussaaffimminnik tamatuminnga qanoq isumaginninnerlutik eqqarsaatiginneqqissaarnissaata pingaaruteqassusia!
1:16-18. Uppeqativut misilinneqaraangata, malersorneqaraangata parnaarussaaqqagaangataluunniit qinnuttartigik sapinngisarpullu tamaat ikiortartigik. — Ussatit 3:27; 1 Thessalonikamiut 5:25.
2:22. Kristumiut, ingammik kristumiut inuusuttut, nukkassarneq, timersorneq, nipilersorneq, aliikkusersorneq, sukisaarsaatit, angalanerit, asuliinnaq oqalunneq assigisaallu ima aallutsigilissanngilaat Guutimut kiffartornissamut piffissaarutingajallutik piffissaarutivillutilluunniit. (w08 09/15-E)
[Qupp. 31-mi assiliartaq]
Apustilip Paulusip allagai isumassarsiarititaasut sorliit kingulliullugit allanneqarpat?