Naalungiarsuunerannit ilinniartissigik

MISISSUINERIT nutaat takutippaat „naartut nipinut qisuariartartut“. University of North Carolinami misissuisut „paasisimavaat anaanat naartunerminni nipituumik atuartakkatik naalungiarsuup inunngoreernerani atuaqqikkaangatigik naalungiarsuit qisuariarfigisaraat,“ Winnipeg Free Press-imi allassimavoq. Anaanat naartunerminni nipituumik atuartarpata meeqqap inunngoreernerani ileqqussatigut pingaartitanik pigiliussaqalersinniarnissaanut iluaqutaassaaq. Biibilimi allanneqaqqaatit naapertorlugit oqaatigineqarpoq Timoteus naalungiarsuunerminit ilinniartinneqarsimasoq. (2 Timûtiuse 3:14, 15) Qularnanngitsumik naalungiarsuuneranit ilinniartinnissaata, ilaatigut nipituumik atuffattarnissaata, naleqassusia anaanaata aanaatalu nalusimanngilaat.

Atuarneq „ullumikkut inuiaqatigiinni inuunermi piginnaanerit pigisatta kimittunerpaartaraat,“ atuakkiortoq Jim Trelease taama oqarsimavoq. Nipituumik atuarnikkut oqaatsitigut ilisimasat oqaatsillu atorsinnaasat annertusarneqartarput.

Naalungiarsuutit oqaluffigisalerniariarlugu nipituumik atuffattalernissaa silatusaarnerussaaq. Naak naartuit imaluunniit naalungiarsuutivit oqaatsitit aallaqqaammut paasissanngikkaluarai kingusinnerusoq eqqarsaatigalugu iluaqutaassaaq. Ussatit 22:6-imi allassimavoq: „Inuusuttoq [nukappiaraq] ingerlavissaanik ajoqersuuguk, taava utoqqaliguni tamanna nigussanngilaa.“

Suut iluaqutaasut atuffassissutigisarsinnaavigit? Biibili nipituumik ullut tamaasa meeqqannut atuffassissutigisaruk. Aamma atuagassiat nalillit allat atuffassissutigisarsinnaavatit, soorlu Ajokersuissorssuak tusarnârparput, bîbilimik okalugtuautíka, Inuk inuit inuusimasut pingaarnerpaartaat aamma Napasuliaq Alapernaarsuiffik-mi Iteritsi!-milu ilanngutassiat.

Soorunami taamaaliussagaanni piffissamik atuisariaqarpoq, piffissarli ajunngitsumik atorneqassaaq. Meeqqannittaaq isumassuinerit asanninnerillu taamaalillutit tigussaasumik takutissavat. (wE 15/7 96)