Angajoqqaat, meeqqassi isumassorneqarnissartik pisariaqartippaat
„Ernitit orpittut olivenilittut naallualersutut issapput nerriviit kaajallassimallugu.“ — TUSSIAAT 128:3.
1. Naatitsiniarneq meeqqanillu perorsaaneq qanoq imminnut assersuunneqarsinnaappat?
AMERLASUUTIGUT meeqqat naasutut ineriartortarput. Taamaattumik tupinnanngilaq angutip nulia „viinnequtitut inerittoqarluartartutut“ Biibilip eqqartormagu meeraalu assersuullugit ’orpimmut olivenilimmut naallualersumut angutip nerriavia kaajallaullugu’ ittumut. (Tussiaat 128:3) Naasorissaasup oqaluttuukkumassavaatit naatitanik naatitsiniarneq ajornaatsuungitsoq, ingammik silaannap issullu qanoq issusii eqqarsaatigalugit. Taamatuttaaq ’ulluni kingullerni’ ajornartuni makkunani meeqqanik ingerlalluartunngornissaannut Guutimillu mianerinnittunngornissaannut perorsaaniarneq oqitsuunngeqaaq. — 2 Timûtiuse 3:1-5.
2. Naatitaqarluassagaanni suut pisariaqartarpat?
2 Naatitaq inerilluassappat issoq pitsaasoq, seqineq kisartoq imerlu naasorissaasup pisariaqartippai. Ineriartorluarlutilu peqqissuuniassammata uumasuaqqanut ajoqutaasunut toqoraatinik naatitanullu illersuutinik allanik pilersuisariaqarpoq. Ineriartornerani inerilluinnarnissaa tikivillugu arlaannik ajornakusuulaartoqartuartassaaq. Naatitarlu ajutuussagaluarpat ajussaqaaq! Suleruloreerlunili naasoissaasup naatitani pitsaasut katersorsinnaalerunigit mikinngitsumik nalerisimaassaaq! — Jesaja 60:20-22; 61:3.
3. Naasut meeqqallu pingaassuseq eqqarsaatigalugu sanilliunneqarsinnaappat, qanorlu isumassorneqarneq meeqqat pisariaqartippaat?
3 Inuulli iluatsittumik imaqarluartumillu inuulernera naasorissaasup iluatsittumik naatitaanit nuannaarnarnerungaarpoq. Taamaattumik tupinnanngilaq meeqqamik iluatsittumik perorsaaniarneq naatitamik kusanartumik naatitsiniarnermit piffissartornarneroqalunilu nukinnik amerlanerusunik pisariaqartitsimmat. (5 Moses 11:18-21) Meeraq inuunerup naatsiivianut ikkussaq asanninnermik imerterneqartarlunilu inuussutissalersugaq peqqinnartumillu killilersugaq allaat silarsuarmi ileqqussatigut ajortunngorsimasumi ineriartorsinnaavoq sikkerluarlunilu. Ajortumilli pinneqaruni naqisimaneqarlunilu meeraq ilumigut toquliorneqalersinnaavoq immaqalu anersaakkut toqusinnaalluni. (Kulorsamiut 3:21; naleqqiuguk Jeremia 2:21; 12:2.) Ilumummi meeqqat tamarmik immikkut isumassorneqarnissartik pisariaqartippaat!
Naalungiarsuunermit ulluinnarni isumassorneqarneq
4. Meeqqat ’naalungiarsuunerminnit’ qanoq isumassorneqartariaqarpat?
4 Angajoqqat inoorlaaq atasuinnangajammik paaqqutarisariaqartarpaat. Meeqqalli ulluinnarni timikuinnaq isumassorneqarnissani pisariaqartippaa? Guutip kiffaanut Timoteusimut apustili Paulus ima allassimavoq: ’Naalungiarsuuninniilli allakkat illernartut ilinnik Kristus Jesusimut uppernikkut annattussanngorninnik ilisimalersitsisinnaasut ilisimavatit.’ (2 Timûtiuse 3:15, NV) Tassa Timoteus allaat naalungiarsunerminit angajoqqaaminit isumassorneqarsimavoq, aamma anersaakkut ittunik. Naalungiarsuunermiilli ajoqersorneqalernissaq pillugu aperisoqarsinnaavoq: ’Qaqugu?’
5, 6. (a) Naartoq pillugu Biibilimi qanoq allassimasoqarpa? (b) Suup takutippaa naartumut ajunngitsussaq isumagisariaqaraat?
5 Griikerit oqaasiat Paulusip tassani atuagaa (breʹphos) aamma naartumut atorneqarsimavoq. Elisabethip, Johannesip Kuisup anaanaata, qanigisani Marie ima oqarfigisimavaa: ’Ata, ilassinnittutit tusalerakkit ilumiuga [breʹphos] nuannaarluni ilunni aalalerpoq.’ (Lúkarse 1:44) Tassa allaat naartoq naalungiarsummik taaneqarsimavoq, Biibilimilu ersersinneqarpoq naap avataani pisunut qisuariarsinnaasoq. Taamaattumik naartunermi allaat isumassuinissaq, soorlumi ullumikkut taama kajumissaarisoqartartoq, naartup anersaakkut ingerlallualernissaanut atatillugu isumassuinermut ilaassussaannginnerpa?
6 Tamanna ilumoorullugu eqqarsaatigisariaqarpoq, uppernarsaatissammi paasinarsitimmassuk naartoq tusaasaminit ajunngitsup ajortulluunniit tungaanut sunnerneqarsinnaasoq. Nipilersornermik sammisaqartut ilaata paasisimavaa nipilersukkat ilaat, ingammik agiarsuarsornertallit, ilisarisutut ittarlugit. Tamanna anaanaminut eqqaammagu anaanaata, agiarsuarsortartuusup, oqaluttuuppaa nipilersukkat taakkorpiaat taassuminnga naartunermini sungiusartarsimallugit. Taamatuttaaq naartusup tv-mi nipilersugassiat pitsaarpianngitsunik imallit isiginnaartarpagit naartuanut sunniuteqarsinnaavoq. Nakorsallu atuagassiaanni eqqartorneqarsimavoq allaat ’naartut tv-mi isiginnaagassianik pinngitsoorsiannaajunnaarsinnaasut’.
7. (a) Angajoqqaarpassuit qanoq ilillutik naartumut anersaakkut ajunngitsussaq isumagisimavaat? (b) Sunik meeraq piginnaaneqarpa?
7 Angajoqqaat ilaasa paasillugu ajunngitsumik sunniisinnaallutik meeraq allaat inunngunngikkallarnerani atffallugulu, oqaluffigalugulu erinarsorfigisalereertarpaat. Aamma illit taamaaliortarsinnaavutit. Immaqa meeqqap oqaatsit paasisinaanngikkaluarlugit nipit sallaatsoq asannippaluttorlu iluarusuutigissavaa. Inunngoruni immaqa ilimagisannit siusinnerujussuakkut oqaatsitit paasisinnaalissavai. Ukiut marluinnaat pingasuinnaalluunniit ingerlanerini meeqqap oqaatsit nalunartut tusaaginnarlugit ilikkartarpai. Aamma naalungiarsuup Biibilip sallusuissutaata ’oqaasii minguitsut’ ilinnialersinnaavai. — Sefanja 3:9, NV.
8. (a) Biibilimi suna pineqarunarpa allassimagami Timoteusip allakkat illernartut ’naalungiarsuunerminit’ ilisimasimagai? (b) Timoteusip eqqartorneqarnera ilumoortuusoq suup uppernarsarpaa?
8 Paulusip suna pivaa oqarami Timoteusip ’naalungiarsuunerminiilli allakkat illernartut ilisimasimagai’? Qularnanngitsumik pivaa Timoteus inoorlaajunerminiilli, imaaginnanngitsoq meeraanerminiilli, anersaakkut ilinniartinneqalersimasoq. Tamanna griikerit oqaasiannut breʹphos-imut, inoorlaanut atorneqartartumut, naapertuuppoq. (Lúkarse 2:12, 16; apustilit suliait 7:19) Timoteus kingumut eqqaamasinnaasani tikivillugit anaanaminit Eunicemit aanaminillu Loisimit anersaakkut ilinniartinneqalersimavoq. (2 Timûtiuse 1:5) Oqarusiut ’avalequtinnguaq ilusilersorneqarnermisut orpinngortarpoq’ Timoteusimut eqquulluarsimaqaaq. ’Ingerlavissaminik ajoqersorneqarsimavoq’, tamatumalu kingunerisaanik Guutip kiffanngorsimavoq.— Ussatit 22:6; Filípimiut 2:19-22.
Immikkut isumassorneqarneq pisariaqartitaq
9. (a) Angajoqqaat suna pinaveersimatittariaqarpaat, aamma sooq? (b) Meeraq alliartortillugu angajoqqaat qanoq iliortariaqarpat, kialu maligassiaa malinniartariaqarpaat?
9 Meeqqat aamma naasutut upput tamarmik assigiinngitsunik pissuseqaramik, isumassorneqarnermullu aalajangersimasumut tamarmik immikkkut assigiinngitsumik qisuariartarput. Assigiinngissutaat tamakku angajoqqaat ataqqisariaqarpaat imminnullu naleqqiuttaqattaarnaveersaarlugit. Galâsiamiut 6:4.) Meeqqatit ajunngitsumik inerilluassappata immikkut pissusii misissortariaqarpatit, pissusiisa ajunngitsortaat ineriartortinniarlugit ajortortaallu piiarniarlugit. Taavami paasigukku sanngiissuteqartut imaluunniit pitsaanngitsumik ileqqoqartut, soorlu unneqqarinnginnermik, pigisanik pingaartitsinermik namminissarsiornermilluunniit? Inussiarnersumik oqaaqqissaakkit soorlu Jesusip apustilini sanngiissuteqaraangata oqaaqqissaartarsimagai. (Mákorse 9:33-37) Ingammillu meeqqatit tamarmik immikkut naammassisaannik pissusiinilluunniit pitsaasunik nersualaartakkit.
10. Meeqqat ingammik suna pisariaqartippaat, qanorlu tamanna naammassineqarsinnaava?
10 Meeqqat pisariaqartinnerpaasaat tassaavoq asannittumik inuttut soqutigineqarneq. Jesusip meeqqat immikkut soqutiginninnermik ima atsigisumik ersersitsivigisimavai allaat kiffartornermini ulapinnerpaaffimmini samminissaannut piffissaqarsimalluni. (Mákorse 10:13-16, 32) Angajoqqaat, taassuma maligassiaa malinniarsiuk! Namminissarsiornasi meeqqassi ilaginissaannut piffissaqartittaritsi. Asanninnermillu piviusumik ersersitsiviginissaat qusageqinasiuk. Pakkuttarsigit, soorlu Jesus taamaaliortarsimasoq. Asannippaluttumik eqitaarlugillu kunissortarsigit. Angajoqqaat meeqqaminnik perorsaanerminni kinguneqarluartitsisimasut aperineqaramik angajoqqaanut qanoq siunnersuuteqarsinnaanersut amerlasuut ima akisimapput: ’Naammattorsuarmik asasigit,’ ’iIlaginissaannut piffissaqartaritsi,’ ’aAkunnissinni ataqqeqatigiinneq ineriartortissiuk,’ ’tusarnaarluartarsigit,’ ’maligassiuussigit oqaluffigiinnarnagit,’ aamma ’piviusorsiortuugitsi.’
11. (a) Meeqqaminnik immikkut isumassuineq angajoqqaat qanoq isigisariaqarpaat? (b) When might parents be able to enjoy valuable interchanges with their children?
11 Taamatut immikkut isumassuineq nuannersuusinnaavoq. Angajoqqaaq iluatsitsisimasoq ima allassimavoq: „Nukappiaraativut minnerugallarmat innarnissaannut piareersartarnerat, atuffattarnerat, innartittarnerat qinoqatigisarnerallu nuannersuutittarsimavarput.“ Piffissat taama ittut attaveqatigiinnissamut periarfissiisarput angajoqqaanut meeqqanullu qiimmassaataasumik. (Naleqqiuguk Rûmamiut 1:11, 12) Aappariit meeqqamik pingasunik ukiullip „Wally“ („Malawi“ meerarpaluttumik taallugu) pilluaqqoqqullugu Guutimut qinusoq tusarnaarsimavaat. Qinusimavoq „Wally“-p unnuanik ajunngitsunik atugaqarnissaanik, angajoqqavilu nuannaarsimaqaat paasileramikku Malawimi qatanngutit malersugaasut qinnukkai. Arnaq nuliaasoq oqaluttuarsimavoq sisamaannarnik ukioqarallarami anaanani erruisoq ikiorlugu issiavimmut qaqilluni allarterissutsillugu anaanami Biibilimi allassimaffinnik Naalagaaffiullu erinarsuutaanik ilinniartitarsimagaani. Illit meeqqannik itsaasumik attaveqatiginniffigisinnaasatit eqqumaffiginerusinnaavigit?
12. Angajoqqaat kristumiuusut silatusaarlutik meeqqatik soqatigisariaqarpaat, periaatsillu suut atorneqarsinnaappat?
12 Angajoqqaat kristumiuusut silatuut aalajangersimasumik atuaqqissaarfeqartitsisarput. ’Apeqqutinik-akissutinillu’ periaatsip saniatigut ingammik meeqqanut minnernut naleqqussarsinnaavarsi nuannersumik attaveqatigiinnermut ilasaataaniassammat. Immaqa titartakkat Biibilimeersut atorsinnaavasi, Biibilimi oqaluttuami oqaluttuullugit imaluunniit meeraq imminut piareersaqquneqarsimasumik oqaluttuartoq tusarnaarlugu. Guutip oqaasii meeqqassinnut nuannersunngortissigik tamakkununnga kajumissutsimik inerairtortitsiniassammata. (1 Pîtruse 2:2, 3) Ataataq ima oqarsimavoq: ’Meeqqavut minnerugallarmata Biibilimi pisimasunik isiginaartitsissutilioqatigisarsimavavut. Assorsuaq nuannarisarpaat.’
13. Atoriaannaasumik sungiusarneq qanoq iluaqutaatigaa, suullu sungiusaatigineqarsinnaappat?
13 Sungiusarnerit atoriaannaasut aamma attaveqatigiillualersitsisarput meeqqanik pissutsinut piviusunut piareersaasaramik. Kusserowip meeraasa — nazistit qinuginninnerisa nalaanni tamarmik Guutimut aalajaassimasut — ilaat ataaseq angajoqqaani pillugit ima oqarsimavoq: „Qanoq iliornissatsinnik Biibililu atorlugu qanoq immitsinnut illersornissatsinnik takutittarsimavaatigut. [1 Pîtruse 3:15] Atoriaannaasunik sungiusartikulavaatigut, apersortarluta akisassatsinnik.“ Ilissi taamaaliortarsinnaanngilasi? Oqaluussinermi saqqummeeriaatsinik sungiusartarsinnaavusi, angajoqqaat matuusuusaartillugit. Imaluunniit atoriaannaasumik sungiusarnermi inuunermi ussernartorsiorfigineqarsinnaasut atorneqarsinnaapput. (Ussatit 1:10-15) „Pissutsinik ajornakusoortunik sungiusarneq meeqqap piginnaanerinik tatiginassusianillu ineriartortitsisinnaavoq,“ atuakkiortoq arnaq taama nassuiaasimavoq. „Meeraqat meeqqannik cigaretimik, imigassamik ikiaroornartumilluunniit tunisiniartoq piviusuusaartillugu atoriaannaasumik sungiusaatigineqarsinnaavoq.“ Taamatut sungiusarnermi paasiniarsinnaavat pissutsini assigiinngitsuni meeqqat qanoq qisuariarumaarnersoq.
14. Asannittumik saamasumillu meeqqannik oqaloqatiginnittarnissat sooq taama pingaartigaa?
14 Meeqqannik attaveqatiginninnissinni kajumissisinniartarsigit oqaatsinik ukuninnga allattutut saamatigalusi: „Ernera, ajoqersuutikka puigorniaqinagit inassutikkalu uummatinni pigiliullugit! Taakkuami ullunik ukiunillun amerlasuunik inuuffissaqartissavaatsit.“ (Ussatit 3:1, 2) Meeqqavit uummataa attussannginnerpiuk asannittumik nassuiaakkukku naalannissaa piumasarigit taamaalioruni eqqissinermikpigisaqassammat sivisuumillu inuussalluni — allaat Guutip silarsuassaani eqqissineqarfiusumi naassaanngitsumik inuulersinnaassalluni? Meeqqat Guutip oqaasia atorlugu eqqarsalersinniaraangakku inuttut pissusia eqqarsaatigisaruk. Uppissuseqarlutit taamaaliortarit, ilungersorninnillu Jehovap pilluaqqussavaatit. Taamatut asannittumik saamasumillu Biibili tunngavigalugu oqaloqatigiinnerit kinguneqarluassapput naassaanngitsumillu iluaqutaassallutik. — Ussatit 22:6.
15. Meeqqat ajornartorsiummik aaqqiiniarneranni angajoqqaat qanoq ikiuussinnaappat?
15 Taamatut attaveqatigiinneq atuaqqissaarnerup nalaaniunngikkaluarpalluunniit periarfissaq asiutinnaveersaartaruk. Meeqqavit qanoq oqarnera piinnarnagu aamma eqqarsaat qanoq ililluni saqqummiunneraa tusarnaartaruk. „Meeqqat isigisaruk,“ paasisimasalik siunnersuivoq. „Tamakkiisumik sammiuk. Paasisariaqarpat, tusaaginnarnagu. Angajoqqaat taamatut immikkut ilungersuuteqartut meeqqamik inuuneranik pingaartumik allanngortitsisinnaapput. Ullumikkut meeqqat atuarfimmi allamilu ajornartorsiutinik annertuunik naapitassaqartarput. Angajoqqaatut meeqqasi oqaaqqissaartarsigit ikiorlugillu pissutsinik Guutip isiginnittaasianit isiginnittaaseqalersillugit. Ajornartorsiut qanoq ilillugu aaqissallugu nalorniguit Biibili atuagassiallu „inussiamit aalajaallunilu silatuumit“ suliarineqarsimasut misissuiffigisakkit. (Matîuse 24:45) Kiisalu meeqqat tamakkiisumik immikkut isumassoruk ajornartorsiummik aaqqiiniarninni pisariaqartumik.
Peqatigiittarnersi pingaartiguk
16, 17. (a) Sooq meeqqat inuusuttullu immikkut isumassorneqarnissartik unnersuunneqarnissartillu ingammik ullumikkut taama pisariaqartitsigaat? (b) Meeqqat angajoqqaaminnit oqaaqqissaarneqaraangamik suna paasisariaqarpaat?
16 Meeqqat inuusuttullu ullumikkut immikkut isumassorneqarnissartik aatsaat taama pisariaqartilersimatigaat ’ullussanimi kingullerni ajornartuni’ inuugatta. (2 Timûtiuse 3:1-5; Matîuse 24:3-14) Angajoqqaat meeqqallu tamarmik sernissorneqarneq ilisimassummit piviusumit, ’inuutitsisumit’, pisoq pisariaqartippaat. (Nalunaajaasup oqaasii 7:12) Ilisimassut Guutimeersoq Biibilimi ilisimasanik eqqortumik atuinikkut pilersarmat meeqqat Guutip oqaasianik ilitsersuunneqarnissartik pisariaqartippaat. Taamaattumik meeqqatit Biibilimik atuaqqissaaqatrigisakkit. Jehova pillugu oqaluttuuttakkit, taassuma piumasaqaataanik nassuiaateqqissaartakkit siunertaasalu nuanningaartut eqquunnissaannut qilanaartuusertakkit. Angerlarsimaffissinni meeqqat eqqanniitillugu — aap, periarfissani tamani — tamakku oqaluuserisakkit.
17 Naasorissaasut nalunngilaat naasut tamarmik pissutsini assigiinni sikkerneq ajortut. Naasut tamarmik immikkut paaqqutarineqartariaqarput. Taamatuttaaq meeqqat tamarmik immikkut isumassorneqarnissaminnik, unnersuunneqarnissaminnik oqaaqqissaarneqarnissaminnillu pisariaqartitaat assigiinngillat. Assersuutigalugu meeqqamut ataatsimut ajorinnippasissumik isiginninnerinnaq naammassinnaavoq, meerarli alla perorsaatissinneqarnissaminik pisariaqartitsisinnaaluni. Meeqatilli tamaasa paasitittariaqarpatit oqaatsit iliuutsillu aalajangersimasut sooq iluarinngikkitit, angajoqqaallu tamatumani suleqatigiittariaqarput oqaaqqissaarineq sunniuteqassappat. (Evfisumiut 6:4) Ingammillu pingaaruteqarpoq angajoqqaat kristumiuusut unnersuussutaasa Biibilimut naapertuuttuunissaat.
18, 19. Angajoqqaat kristumiuusut meeqqaminnut sumik akisussaaffeqarpat, suliarlu tamanna naammassilluarneqarpat qanoq kinguneqassava?
18 Naasorissaasoq piffissaalluartukkut inerittussanik ikkuissuillunilu ineriartortitsisariaqarpoq. Kingusinaarukkuniuk imaluunniit paarilluanngikkuniuk ineriartornerlussaaq inerititaqanngitsuuissalluniluunniit. Taamatut meeqqasi ’orpiupput’ massakkorpiaq, qaammatip tullianiunngitsoq imaluunniit aappaaguunngitsoq, immikkut isumassorneqarnissaminnik pisariaqartitsisut. Meeqqavit Guutip oqaasii naapertorlugit anersaakkut ineriartortinnissaanut eqqarsaatinillu silamiorpaluttunik meeqqap anersaakkkut toquliussutigisinnaasaanik piiaanisamut periarfissat naleqangaartut asiutinnaviikkit. Piffissat ullullu meeqqannik najuiffitit eriagalugit pingaartikkit, qaangiussupallattarpummi. Guutip pissusiisa assingi Jehovamik kiffartuussisutut pilluarluni inuunissamut pisariaqartut kinguaanni ineriartortikkumallugit ilungersorlutit suliniuteqarit. (Galâsiamiut 5:22, 23; Kulorsamiut 3:12-14) Suliassaq tamanna nalaatsornerinnaanngilaq; tassaavorli illit suliassat, suliarineranilu Guutillu ikiorsinnaavaatit.
19 Meeqqatit anersaakkut naammattumik kingornussassaqartikkit. Guutip oqaasianik atuaqqissaaqatigisakkit, peqqinnartumillu aammalu iluaqutaasumik sukisaarsaqatigisakkit. Meeqqatit kristumiut ataatsimiinnerinut Naalagaaffimmillu oqaluussissutiginninnermut ilagisakkit. Inuttut pissutsit Jehovap iluarisai kinguaanni ineriartortinniakkit, tamaalioruit inuunerup sinnerani nuannaarutissaqangaassaatit. Ilumummi matuma ilumuussusia: „Iluartup ataataa ilumut qiimmattaatissaqarpoq, silatuumik ernilik nuannaarutissaqarpoq. Ataatannut anaanannullu nuannaarutaaniarit, ilinnik erniarinnittoq qiimmattaatissiguk.“ — Ussatit 23:24, 25.
Akissarsiaq annertooq
20. Inuusuttuaqqanik perorsaalluarnermut suna aqqutissaava?
20 Meeqqanik perorsaaneq suliassaavoq tamakkiisoq sivisoorlu. ’Orpinnik naallualersunik nerrivimmik kaajallaasunik’ taakkuninnga Guutimik mianerinnittunngorlutik Naalagaaffiullu inerititaanik inerititaqalerlutik inersimanngornissaannut perorsaaneq ukiuni 20-ni suliassamik taaneqarsimavoq. Tussiaat 128:3; Juánase 15:8) Suliassaq tamanna artornarnerulersarpoq meeqqat inuusuttuaranngoraangata, taakkuninnga tatisineq annertusigaangat angajoqqaallu tamviaarnerunissartik paasigaangassuk. Iluatsitsinissamulli aqqutissaq taannaajuassaaq — isumassuineq, asanninneq paasinninnerlu. Eqqaamassavarsi meeqqassi ilumut inuttut soqutigineqarnissartik, taakkua iluaqutissaannut piviusumik asannillusi isumassuinissigut ersersissinnaasarsi, pisariaqartimmassuk. Ikiorniarlugit imminut atortariaqarpusi piffissarsi, asanninnersi soqutiginninnersilu taakkua pisariaqartilluinnagaat tunniullugit.
21. Meeqqamik immikkut isumassuinermut suna akissarsiaassava?
21 Inerititaq erlinnangaartoq Jehovap ilissinnut paarisassanngortissimasaa isumassorniarlugu ilungersornissinnut akissarsiassarsi naasorissaasup katersuilluarnermigut nalerisimaarneranit ilimagisannit annerungaartumik nalerisimaarnassaaq. (Tussiaat 127:3-5) Taamaattumik ilissi angajoqqaat, meeqqasi immikkut isumassortuaannarsigit. Taakkua iluaqutissaannut Ataatatsinnullu qilammiusumut, Jehovamut, nersornaatissamut taamaalioritsi.
Qanoq akissavit?
□ Naatitsiniarneq meeqqanillu perorsaaneq qanoq imminnut assersuunneqarsinnaava?
□ Meeqqap naalungiarsuunerminiit ulluinnarni isukmassorneqarneq qanoq ittoq pisariaqartippaa?
□ Immikkut isumassorneqarneq suna meeqqat pisariaqartippaat?
□ Sooq meeqqatit immikkut isumassortariaqarpigit?