Upperisarput illersorparput

’Naalagaq Kristus uummatissinni illernartissiuk, piareertuinnarlusi kikkunnulluunniit neriuutigisaq ilissinniittoq pillugu ilissinnik nassueqqusisunut illersuutissaqarniarlusi.’ — 1 PÎTRUSE 3:15.

1, 2. Suna pillugu Jehovap nalunaajaasuisa tupaallaatigisanngilaat assortorneqartaramik, sunali kissaatigaat?

NUNAT amerlanersaanni Jehovap nalunaajaasui amerlanertigut inuttut peqqusersuitsutut ileqqorilluartutullu ilisimaneqarput. Inuppassuarnit sanilitut pitsaasutut akornutaanngitsutut isigineqarput. Taamaakkaluartorli kristumiut eqqissinermik nuannarisaqartut taakku pisuussuteqarnatik malersorneqartarsimapput — ukiuni sorsunneqarfiusuni ukiunilu sorsunneqanngiffiusuni. Malersorneqarnertilli tupaallaatigineq ajorpaat. Tassami taama pisoqarnissaa ilimagaat. Nalunngilaammi kristumiut ilumoortut ukiuni hundredelinni siullerni inuusut ’tamanit uumissorneqarsimasut’, taamaattumik ullumikkut Kristusimik ilumoortumik malinnikkumasut allatut iliorfigineqarnissartik sooq ilimagissagaluarpaat? (Matîuse 10:22) Biibilimi allassimavoq: ’Kristus Jesusimimi Guuti mianeralugu inuujumasut tamarmik qinugineqassapput.’ — 2 Timûtiuse 3:12.

² Jehovap nalunaajaasuisa malersugaanissartik anguniartanngilaat, aammalu annikilliornerit malersugaanerup nassatarisai — akiliisitaanerit, parnaarussaaneq peqqarniitsuliorfigineqarnerlu — nuannaarutigineq ajorpaat. ’Ersiornaatsumik eqqissisimaarnartumillu inoorusupput’ Guutip naalagaaffia pillugu nutaarsiassaq nuannersoq akornuteqaratik oqaluussissutigisinnaajumallugu. (1 Timûtiuse 2:1, 2) Nunat amerlanersaanni pallorfiginninnerminnut upperisarsiornikkut kiffaanngissuseqaramik qujamasoqaat, nalunngeqatiginnissusertillu naapertorlugu sapinngisamik iliuuseqartarput naalakkersuisut ajunngitsumik attaveqarfigiumallugit. (Rûmamiut 12:18; 13:1-7) Sunami pillugu taava ’tamanit uumissorneqarpat’?

3. Suna pissutigalugu Jehovap Nalunaajaasui naapertuilluanngitsumik uumissorneqartarsimappat?

³ Tunngaviusumik Jehovap Nalunaajaasuisa malersorneqartarnerat kristumiut siulliit malersorneqartarsimanerannut assingusumik pissuteqarpoq. Siullermik Jehovap nalunaajaasuisa upperisarsioriaasiat inuit ilaasa nuannarinngilaat. Assersuutigalugu ilungersuussillutik Guutip naalagaaffia pillugu nutaarsiassaq nuannersoq oqaluussissutigisarpaat, ilungersuussineralli inuit paatsuukulasarpaat innimiitsumik ilanngutitsiniarnertut isigalugit. (Naleqqiuguk apustilit suliait 4:19, 20.) Aamma naalakkersuineq inuiaqatigiillu sorsuunneri eqqarsaatigalugit attaviitsuusarput, tamannalu pissutigalugu ilaannikkut innuttaasutut ilumoorfiginninngitsutut isigineqartarput. — Mika 4:3, 4.

4, 5. (a) Jehovap Nalunaajaasui qanoq ilillutik eqqunngitsumik unnerluutigineqartarsimappat? (b) Kikkut Jehovap kiffaasa malersorneqarnerannut pisuugajuttarpat?

⁴ Aappassaanik, Jehovap Nalunaajaasui eqqunngitsumik unnerluutigineqartarsimapput, toqqaannartumik salluliutigineqartarsimallutik upperisaallu eqqunngitsumik oqaatigineqartarsimalluni. Taamaattumik nunat ilaanni immikkoorniaqatigiittut navianartutut oqaatigineqartarsimapput. Assersuutigalugu Biibilimi ’aammik nereqqusinnginneq’ pissutigalugu nakorsaatitigut aalersuinertaqanngitsumik passunneqarumasaramik eqqunngitsumik ’meeqqanik toqutsisutut’ imaluunniit ’imminorniartutut’ oqaatigineqartarsimapput. (apustilit suliait 15:29) Jehovalli nalunaajaasuisa inuuneq pingaartippaat imminnullu meeqqaminnullu nakorsamit suliarineqarneq pitsaanerpaaq piniartaralugu. Oqartoqarsimavoq Jehovap nalunaajaasuisa meeraasa ilaat amerlasuut ukiut tamaasa aalersortikkumannginneq pissutigalugu toqusartut, tamannali ilumuunngivippoq. Sallusuissullu Biibilimeersoq ilaqutariit ilaasortaannut tamanut assigiimmik sunniuteqarneq ajormat nalunaajaasut aamma ilaqutariinnik avissaartitsisutut unnerluutigineqartarsimapput. Jehovalli nalunaajaasuinik ilisimannittut nalunngilaat ilaqutariittut inuuneq ataqqingaaraat Biibilimilu uiusunut nuliaasunullu asaqatigiinnissamik ataqqeqatigiinnissamillu, aamma meeqqanut angajoqqaaminnut naalannissamik peqqussutit maleruartaraat uppertuunngikkaluarpataluunniit. — Evfisumiut 5:21–6:3.

⁵ Arlaleriarluni paasinarsisimavoq Jehovap Nalunaajaasuinut malersuinermik pilersitsisut ingammik tassaasut upperisarsiornikkut assortuisut naalakkersuisunut tusagassiuutinullu sunniisut. Uagulli Jehovap nalunaajaasuisut akerlilersorneqarneq — upperisarput, oqaluussinerput imaluunniit eqqunngitsumik unnerluussinerit pissutaagaluarpataluunniit — qanoq qisuariarfigisariaqarparput?

’Ingasaassiniannginnersi inunnut tamanut malunnarsili’

6. Sooq pingaaruteqarpa kristumiut ilagiissaasa avataanniittut oqimaaqatigiissumik isigissallugit?

⁶ Siullermik upperisatsinnut isumaqataanngitsut eqqortumik isigisariaqarpavut — Jehovap isiginninneratut isigalugit. Taamaaliunngikkutta allanit pisariaqanngikkaluartumik uumissorneqarsinnaallutalu avoqqaarineqarsinnaavugut. ’[Ingasaassiniannginnersi, NV] inunnut tamanut malunnarsili,’ apustili Paulus taama allassimavoq. (Filípimiut 4:5) Taamaattumik Biibilimi kajumissaarneqarpugut kristumiut ilagiissaasa avataanniittunut oqimaaqatigiissumik isiginninnissatsinnut.

7. ’Silarsuarmit mingutsinnaveersaarneq’ qanoq paasisariaqarpa?

⁷ Biibilimi ersarissumik kajumissaarneqarpugut ’silarsuarmit mingutsinnaveersaaqqulluta’. (Jâko 1:27; 4:4) Soorluttaaq allassimaffinni allarpassuarni, tamaani oqaaseq ’silarsuaq’ isumaqarpoq inuiaat kristumiunit ilumoortunit immikkoortut. Inuiaqatigiit taakkua akornanni inuuvugut; suliffitsinni, atuarfitsinni eqqatsinnilu attaveqarfigisarpavut. (Juánase 17:11, 15; 1 Korintumiut 5:9, 10) Taamaattoq silarsuarmit mingutsinnaveersaartarpugut isummat, oqaluttarneq ileqqullu Guutip naapertuilluartumik aqqutigeqqusaanut akerliusut ingalassimaniarlugit. Aamma paasisariaqarparput silamiunik, ingammik Jehovap najoqqutassiaanik ataqqinnikkumanngitsunik, ikinnguteqarneq qanoq navianartigisoq. — Ussatit 13:20.

8. Naak peqquneqaraluarluta ’silarsuarmit mingutsinnaveersaassasut’ sooq pissutissaqanngilagut allat nikagissallugit?

⁸ Kisianni silarsuarmit mingutsinnaveersaaqqulluta kajumissaarineq isumaqanngilaq Jehovamut nalunaajaasuunngitsut nikagissallugit pissutissaqartugut. (Ussatit 8:13) Eqqarsaatigikkit juutit upperisarsiornikkut siuttui allaaserisap matuma siulianiittumi eqqaaneqartut. Upperisarsioriaasiat Jehovap iluarinngilaa; aamma juutiunngitsunut ajunngitsumik attaveqartitsinngilaq. (Matîuse 21:43, 45) Angutit taakkua ingasaassiniartut imminnut iluartuutinniarlutik Guutimik nalusut nikagisarpaat. Uaguttaaq nalunaajaasuunngitsut nikagigaluarutsigik aamma tamatumunnga assingusumik qisuariarfigineqarsinnaavugut. Apustili Paulus assigalugu kissaatigaarput Biibilip tusarliussaanik tusarnaartut tamarmik Guutimut iluarisaajumaartut. — apustilit suliait 26:29; 1 Timûtiuse 2:3, 4.

9. Biibilimi unnersuussutigineqartut allamik upperisalinnik eqqartuisarnitsinnut qanoq sunniuteqartariaqarpat?

⁹ Biibili tunngavigalugu oqimaaqatigiissumik isumaqarnerput nalunaajaasuunngitsunik eqqartuisarnitsinnut sunniuteqassaaq. Paulusip Titus peqqusimavaa kristumiut qeqertami Kretamiittut eqqaaseqqullugit ’kimilluunniit mitalleqqunagit saqitsaagajoqqunagillu, piuaaqqullugilli inuillu tamaasa qanilaartumik pisartuaqqullugit’. (Títuse 3:2) Malugiuk kristumiut ’kimilluunniit’ mitalleqqusaanngitsut — aamma Kretamiunik kristumiuunngitsunik, naak taakkua ilaat sallutuutut, nerivallaartutut eqiattartutullu ilisimaneqaraluartut. (Títuse 1:12) Taamaattumik upperisatsinnut isumaqataanngitsut asissuilluta eqqartortaraluarutsigik Biibilimut naapertuunnavianngilaq. Imminut pitsaanerusutut isigigutta taama isumaqarnerup Jehovamik pallorfiginninneq allanut kajungernarsitissanngilaa. Akerlianik najoqqutassiat ingasaassinianngitsut Jehovap oqaasianiittut naapertorlugit inuit allat isigalugillu iliorfigisarutsigik, Guutip ’ajoqersuutaa naalannarsisinniassavarput’. — Títuse 2:10.

Nipangersimaffissaqarlunilu oqaluffissaqarpoq

10, 11. Jesusip qanoq takutissimavaa nalunagu qaqugu (a) ’nipangersimaffissaqartoq’? (b) ’oqaluffissaqartoq’?

¹⁰ Nalunaajaasup oqaasii 3:7-imi allassimavoq ’nipangersimaffissaqarlunilu oqaluffissaqartoq’. Unamminiarnartuusinnaavoq aalajangissagaanni akerlilersiusut sumiginnaannassanerlugit imaluunniit upperisaq illersorlugu oqaluffigissanerlugit. Jesus tamatigut periaaserissuusoq tamatumani ilinniarfigilluarsinnaavarput. (1 Pîtruse 2:21) Taassuma nalunngilaa qaqugu ’nipangersimaffissaqartoq’. Assersuutigalugu palasiunerit utoqqaanertallu Pilatusimut eqqunngitsumik unnerluutigimmanni Jesus ’akinngilluinnarsimavoq’. (Matîuse 27:11-14) Guutip imminut piumasaata naammassineqarnissaanut akornutaasinnaasumik oqaaseqarumanngilaq. Iliuuserisimasani kikkut tamarmik nalunngisaat nassuiartariaqanngilai. Nalunngilaa allaat sallusuissutip inuit taakkua isumaat uummataallu pingaarniartut allanngortissinnaanngikkai. Taamaattumik unnerluussutaat sumiginnarpai piaaralunilu nipangiinnarluni. — Jesaja 53:7.

¹¹ Jesusilli aamma nalunngilaa qaqugu ’oqaluffissaqartoq’. Ilaannikkut isornartorsiuisut toqqaannartumik ammasumillu akisarpai, eqqunngitsumik unnerluussineri assortorlugit. Assersuutigalugu allakkanik ilisimasut farisiiarillu inuppassuarnut tusagaanerlutsimmanni Beelzebub ikiortigalugu inngilipilunnik anisitsisarnerarluni Jesus aalajangerpoq eqqunngitsumik unnerluutit sumiginnarumanagit. Tunngavissaqarluartumik ersarilluinnartumillu assersuusiorluni sallunerat qulaarpaa. (Mákorse 3:20-30; takuuttaaq Matîuse 15:1-11; 22:17-21; Juánase 18:37) Aamma taamaappoq Jesus killuutigineqarlunilu tigusaammat killisiuisoqatigiinnullu pisinneqarmat, palasiunerlu Kajfas ima peqqusimmat: ’Guuti uumasoq naqqissigalugu uppernarsaaqquakkit oqarfigeqqulluta illit taannaanersutit Kristus Guutip ernera!’ Maannakkut oqalunnermut piffissanngorpoq, oqaaseqanngippammi allat isumaqalissapput Messiasiunini miserratigigaa. Taamaattumik Jesus akivoq: ’Taannaavunga.’ — Matîuse 26:63, 64; Mákorse 14:61, 62.

12. Sooq Paulus Barnabasilu aalajangersimappat Ikoniumimi ersisuillutik oqalussallutik?

¹² Aamma Paulus Barnabasilu eqqarsaatigikkit. apustilit suliait 14:1, 2-mi allassimavoq: ’Pivorli Ikoniumimi juutit naalagiartarfiannut iseqatigiillutik oqalummata, taava juutillu griikerillu amerlasoorsuit uppertunngorput. Juutilli naalasseriitsut Guutimik nalusut tarnaat qatanngutigiinnut uumitsatsippaat aserorsaarlugillu.’ The New English Bible-imi ima allassimavoq: „Juutilli uppertunngorsimanngitsut Guutimik nalusunik kamassaaripput kristumiunullu isumaat aserorsaarlugit.“ Juutit akerlilersuisut namminneq tusarliussaq tunuartiinnanngilaat, aammali asissuillutik oqaaseqarput juutiunngitsut kristumiunut akeqqertinniarlugit.a Ilumut kristumiunik uumissuisimaqaat! (Naleqqiuguk apustilit suliait 10:28.) Paulus Barnabasilu isumaqarput ’oqalunnermut piffissanngortoq’, ajoqersuganngorlaat tamanit avoqqaarineqarnerminnit sapiissuseerutitaaqqunagit. ’Taava sivisuumik tassaniipput, ersisuillutillu Jehova tunaaralugu oqalupput,’ taassumalu iluarinninnini takutippaa tupinnartuliortissinnaallugit. — apustilit suliait 14:3.

13. Sooq mamarlerneqarnitsinni amerlanertigut ’nipangersimaffissaqartarpa’?

¹³ Taavami eqqunngitsumik eqqartorneqaraangatta qanoq qisuariartariaqarpugut? Pissutsit qanoq innerat tamatumunnga apeqqutaasarput. Ilaannikkut paasisariaqarparput ’nipangersimaffissaqartoq’, ingammik assortuiniaannarlutik siunertaqanngitsumik oqqateqatigerusukkaangatigut taamaappoq. Puigussanngilarput inuit ilaasa sallusuissut paasiumanngikkaat. (2 Tásalûníkamiut 2:9-12) Pingaarniarlutik upperumanngitsut oqaloqatiginiaraluaraanni iluaqutaaneq ajorpoq. Aamma uagutsinnik eqqunngitsumik unnerluussisut tamaasa akiorlugit oqqateqatigisaraluarutsigik suliassaq alla pingaaruteqarnerungaartoq iluaqutaanerungaartorlu tunulliutittoorsinnaavarput — tassa inuit ilumoortumik uummatillit Biibilimik paasisaqarusuttut ikiornissaat. Taamaattumik akerlilersuisut uagut pilluta salluliorumatuut eqqarsaatigalugit ima isumassarsiarititaasumik unnersuussuteqarpoq: ’Taakku nigorsigik.’ — Rûmamiut 16:17, 18; Matîuse 7:6.

14. Qanoq ililluta upperisarput allanut illersorsinnaavarput?

¹⁴ Tamannali soorunami isumaqartariaqanngilaq upperisarput illersornianngikkipput. Ilaannikkut aamma ’oqaluffissaqartarpoq’. Inuit ilumoorusuttut uagut pilluta ajortitsiniutaasumik oqaluttuunneqaraangata eqqortumik isumakuluutigisarparput. Periarfissaqaraangatta qularata isumarput allanut nassuiarusuttarparput. Peter ima allassimavoq: ’Naalagaq Kristus uummatissinni illernartissiuk, piareertuinnarlusi kikkunnulluunniit neriuutigisaq ilissinniittoq pillugu ilissinnik nassueqqusisunut illersuutissaqarniarlusi, kisianni piuaallusi mianerinnillusilu.’ (1 Pîtruse 3:15) Inuit ilumoortumik soqutiginnillutik upperisatsinnut erligisatsinnut uppernarsaatinik, aammalu akerlilersuisut eqqunngitsumik unnerluussineri pillugit, paasisaqarusukkaangata upperisatta illersornissaanut Biibililu tunngavigalugu akinissatsinnut akisussaaffeqarpugut. Saniatigullu ileqqorinnerput nalunaajaataalluarsinnaavoq. Takunnittut paqumisunngitsut takusinnaagunikku Guutip najoqqutassiai naapertuilluartut maleruarniarsarigivut paasissavaat ilumuunngitsumik unnerluutigineqartugut. — 1 Pîtruse 2:12-15.

15. Jehovap Nalunaajaasuisa tusagassiuutitigut eqqunngitsumik oqaatigineqarsimanerannik assersuummik taasaqarit.

¹⁵ Ilaannikkut Jehovap Nalunaajaasui tusagassiuutitigut eqqunngitsumik oqaatigineqartarsimapput. Assersuutigalugu 1997-imi aggustip aallaqqaataani Ruslandimi aviisimi mamarleerpaluttumik allaaserisaqarpoq, tassanilu ilaatigut allassimavoq nalunaajaasunut ilaasortat peqquneqartut nuliatik, uitik angajoqqaatillu ’ajattussagaat upperisaminnik paasisaqanngippata isumaqataanngippataluunniit’. Kialuunniit Jehovap nalunaajaasuinik ilisimannittup nalunngilaa pasilliineq tamanna ilumuunngitsoq. Biibilimi erseqqissarneqarpoq kristumiut ilaquttatik uppinngitsut asannittumik ataqqinnittumillu iliorfigissagaat, nalunaajaasullu tamanna maleruarniarsaraat. (1 Korintumiut 7:12-16; 1 Pîtruse 3:1-4) Taamaattorli allaaserisaq tamanna naqiterneqarpoq aviisimillu atuartartut amerlasuut eqqunngitsumik pasitinneqarput. Eqqunngitsumik eqqartorneqaraangatta qanoq ililluta upperisarput illersorsinnaavarput?

16, 17, aamma qupperneq 17-imi ungalusaq. (a) Tusagassiuutitigut eqqunngitsumik paasissutissiinermut qisuariarneq pillugu Napasuliaq Alapernaarsuiffik-mi qanoq allassimasoqarpa? (b) Pissutsit suut apeqqutaatillugit Jehovap Nalunaajaasuisa immaqa tusagassiuutitigut ajortumik oqaatigineqarneq qisuariarfigisinnaavaat?

¹⁶ Aamma tamanna eqqarsaatigalugu ’nipangersimaffissaqarlunilu oqaluffissaqartarpoq’. Napasuliaq Alapernaarsuiffik-mi ilaanni ima allassimavoq: „Tusagassiuutitigut eqqunngitsumik paasissutissiineq sumiginnarneqassanersoq imaluunniit sallusuissut naleqquttumik periaaseqarnikkut illersorneqassanersoq aalajangerniarnermi pissutsit, isornartorsiuisup kinaanera taassumalu siunertaa tamarmik apeqqutaapput.“ Ilaannikkut nalunaarutit isiginerluerpaluttut sumiginnarneqartariaqarput, taamaalillutimmi salluliuutit tusagassiuutini oqallisigineqarunnaartarput.

¹⁷ Ilaannikkulli ’oqaluffissaqartarpoq’. Tusagassiortoq akisussaassuseqarpalaartoq Jehovap Nalunaajaasui pillugit eqqunngitsumik paasitinneqarsimasinnaavoq, immaqalu paasissutissat ilumoortut tusarusussallugit. (Takuuk ungalusaq „Paasissutissat eqqunngitsut naqqinneqarput.“) Tusagassiuutitigut isiginerluerpaluttumik nalunaarutit pissutigalugit paqumisunneq oqaluussinissatsinnut akornutaasinnaasoq pilerpat Napasuliaq Alapernaarsuiffiup Peqatigiiffiata nunami tamatumani immikkoortortaqarfiani sinniisut tulluartumik iliuuseqarsinnaapput sallusuissut illersorniarlugu.b Assersuutigalugu utoqqaanertat piukkunnaatillit toqqarneqarsinnaapput fjernsynimi paasissutissat eqqortut saqqummersinniarlugit, taamaaliunngitsoorneq isumaqartitsisinnaappat Jehovap Nalunaajaasui illersuutissaqanngitsut. Nalunaajaasut tamarmik tamatumani silatusaarlutik Napasuliaq Alapernaarsuiffiup Peqatigiiffia taassumalu sinniisui suleqatigisarpaat. — Eprîarit 13:17.

Nutaarsiassaq nuannersoq inatsisitigut illersorneqarpoq

18. (a) Sooq oqaluussinitsinni oqartussaasut nunamiusut akuersiteqqaarnissaat pisariaqanngila? (b) Oqaluussinerput akuersissutigineqanngippat qanoq iliussaagut?

¹⁸ Guutip naalagaaffianik nutaarsiassap nuannersup oqaluussissutiginissaanik piginnaassuseqartitaanerput qilammit tunniunneqarpoq. ’Qilammi nunamilu piginnaaneq tamarmi’ Jesusimut tamatuminnga suliassiisumut tunniunneqarsimavoq. (Matîuse 28:18-20; Filípimiut 2:9-11) Taamaattumik oqaluussinitsinni nunami oqartussaasunit akuerineqaqqaartariaqanngilagut; nalunngilarpulli upperisarsiornermut kiffaanngissuseqarneq tusarliussap siaruarterneqarneranut iluaqutaasorujussuusoq. Nunani upperisarsiornitsinnut kiffaanngissuseqarfiusuni kiffaanngissuseqarneq tamanna eqqartuussiviit ikiortigalugit illersorniassavarput. Nunani allani tamatuminnga kiffaanngissuseqartitaasimanngikkaangatta inatsisit naapertorlugit taama kiffaanngissuseqartitaalernissarput anguniarsarisarparput. Taamaaliortanngilagut innuttaaqatigiit allanngortinniarlugit, ’nutaarsiassarli nuannersoq illersorniarlugu inatsisitigullu aalajangersarniarlugu’.c — Filípimiut 1:7, (NV).

19. (a) ’Guuti tunissagutsigu Guutip pissaanik ’sumik nassataqassava? (b) Qanoq iliornissatsinnut aalajangerluinnarsimavugut?

¹⁹ Jehovap nalunaajaasuisut akueraarput Jehova nunami qilammilu qutsinnerpaasoq. Taassuma inatsisai inatsisinit allanit tamanit pingaarnerupput. Oqartussaasut nunamiusut naalaqqissaarniartarpavut taamaalillutalu ’kaasari tunisarlugu kaasarip pissaanik’. Kisianni ’Guuti Guutip pissaanik tunissallugu’ pingaaruteqarnerungaartumik akisussaaffeqaratta sunaluunniit taamaaliornissatsinnut akornutigisinnaanngilarput. (Matîuse 22:21) Nalunngilluarparput taamaalilluta ’tamanit uumissorneqassalluta’, tamannali Jesusimut ajoqersugaanermut ilaavoq. Ukiuni 1900-kkunni makkunani Jehovap Nalunaajaasuisa inatsisitigut akiuussimanerata takutippaa upperisatta illersornissaanut aalajangerluinnarsimasugut. Jehovap ikiuineratigut tapersersuineratigullu ’soraarnianngilagut ajoqersuilluta nutaarsiassarlu nuannersoq oqaluutigalugu’. — apustilit suliait 5:42. (wE 1/12 98)

[Quppernerup ataani ilanngussat]

Eqqaamavigit?

□ Sooq Jehovap Nalunaajaasui ’tamanit uumissorneqarpat’?

□ Allamik upperisallit qanoq isigisariaqarpavut?

□ Jesusip imminut assortuisut qanoq oqimaaqatigiissumik isigisimavai?

□ Oqaatiginerlunneqaraangatta ’nipangerfissaqarlunilu oqaluffissaqarneranik’ najoqqutassiaq qanoq ililluta atorsinnaavarput?

[Qupp. 17-mi ungalusaq]

Paasissutissat eqqunngitsut naqqinneqarput

Boliviami Yacuibami upperisarsiortut evangelistiusut filmip tunussisunit suliarineqarsimagunartup tv-qarfimmit aallakaatinneqarnissaa isumagisimavaat. Aallakaatitap ajortumik sunniuteqarnera eqqarsaatigalugu utoqqaanertat aalajangerput tv-qarfiit marluk ornissallugit neqeroorutigalugulu videofilmit Jehovas Vidner og deres organisation-ip (Jehovap Nalunaajaasuisa peqatigiiffiallu) aamma Bibelen — nøjagtig historie, pålidelig profeti-p (Biibili — oqaluttuarisaaneq eqqorluinnartoq, siulittuutit tutsuiginartut) aallakaatinneqarnissaat akilerumallugu. Peqatigiiffiup videofilmiutai takugamigit radioqarfimmik piginnittup tunussisut Jehovap Nalunaajaasuinik eqqunngitsumik saqqummiussisimanerat ingasagitsaallugu neqeroorutigaa Jehovap Nalunaajaasuisa qanittukkut ataatsimeersuarnissaat akeqanngitsumik takoqqusaarutiginiarlugu. Amerlasuut ataatsimeersuarnermut najuupput, inuppassuillu ajunngitsumillu isumallit pitsaasumik apeqqutissaqartalerput Jehovap nalunaajaasui oqaluussiartorlutik pulaaraangata.“ — Jehovas Vidners Årbog 1997, quppernerit 61-62.

[Qupp. 18-mi assiliartaq]

Ilaannikkut Jesusip isornartorsiuisut eqqunngitsumik unnerluussutaat ammasumik naqqissortarpai