Misilinneqartaraluarlutit uppernikkut aalajaagit!

’Qatanngutikka, tamalaanik misilinneqaraangassi tipaatsuutigiinnarsiuk.’ — JÂKO 1:2.

1. Jehovap innuttai suneqartaraluarlutik upperlutik uummatimikkullu nuannaarlutik Jehovamut kiffartorpat?

JEHOVAP innuttai taassuma nalunaajaasuisut upperlutik uummatikkullu nuannaarlutik kiffartorput. (5 Moses 28:47; Jesaja 43:10) Taamaaliorput misilinneqartaraluaqalutik. Misilinneqarnerminni oqaatsit uku tuppallersaatigisarpaat: ’Qatanngutikka, tamalaanik misilinneqaraangassi tipaatsuutigiinnarsiuk, nalunnginnassi uppersusersi misilinneqaruni nikallujuinnermut sunniutaassasoq.’ — Jâko 1:2, 3.

2. Jâkup agdlagai-nik allassimasoq pillugu sunik ilisimasaqarpugut?

² Oqaatsit taakku ukiup 62-ip u.n.k. missaani ajoqersukkamit Jesus Kristusip affarmik qatanngutaanit, Jakobimit, allanneqarsimapput. (Mákorse 6:3) Jakob Jerusalemimi ilagiinni utoqqaanertaavoq, ersersinneqarporlu taanna kiisalu Kefas (Peter) aamma Johannes ilagiinni ’sukarsuartut’ — tapersersuisutut nukittuutut tatiginartutullu — isigineqartut. (Galâsiamiut 2:9) Kipineqarneq pillugu apeqqut ukiup 49-p missaani ’apustilinut utoqqaanernullu’ saqqummiunneqarmat Jakob Biibilimik tunngavilersorluakkamik siunnersuuteqarpoq taamanikkut siulersuisoqatigiinnit aalajangiiffigineqartumik. — apustilit suliait 15:6-29.

3. Ajornartorsiutinik sunik kristumiut siulliit nalaanneqartarsimappat, qanorlu iliorluta Jâkup agdlagai iluaqutissarsiffiginerpaasinnaavavut?

³ Jakob anersaakkut paarsisuuvoq isumassuilluartoq ’savaatit qanoq issusiinik’ ilisimasaqartoq. (Ussatit 27:23) Nalunngilaa taamanikkut kristumiut annertuumik misilinneqartartut. Ilaat pisuunut nakerisarsiornertik pissutigalugu isummaminnik allannguisariaqarput. Allat pallorfiginninnertik taamaattussaannartut isigilersimavaat. Allallu oqaqarpallaarnertik pissutigalugu ajoqusiisarput. Anersaaq silamiorpaluttoq annertuumik ajoqusiivoq, amerlasuullu naammagittaatsuupput qinusarnissartillu sumiginnarsimallugu. Tassa kristumiut ilaat anersaakkut napparsimalersimapput. Jakobip allakkamini ajornartorsiutit tamakku ineriartornartumik eqqartorpai, unnersuussutaalu ullumikkut ukiuni hundredelinni siullernisulli atorluarsinnaatigipput. Allakkat taakku uagutsinnut allakkatut isigalugit atuarutsigik assut iluaqutigissavarput.a

Misilinneqaraangatta

4. Misilinneqarnivut qanoq isigisariaqarpavut?

⁴ Misilinneqarnernik qanoq isiginninnissatsinnik Jakobip takutippaatigut. (Jâko 1:1-4) Guutip erneranut ilaqutaanerminik eqqaasaqanngilaq, maniguullunili tassaanerarluni ’Guutip Naalakkallu Jesus Kristusip kiffaa’. Anersaakkut Israelip ’naggueqatigiissortaanut aqqaneq-marlunnut’, qinugisaaneq pissutiginerullugu ’siammarsimasunut’, Jakob allappoq. (apustilit suliait 8:1; 11:19; Galâsiamiut 6:16; 1 Pîtruse 1:1) Uaguttaaq kristumiutut qinugisaasarpugut ’tamalaanillu misilinneqartarluta’. Eqqaamagutsiguli misilinneqanermi nikallujuinneq uppernermik nakussatsitsisartoq, taava misilinneqarnerit ’tipaatsuutigiinnarsinnaassavavut’. Misilinneqarnitsinni assuarnaassuserput aalangiusimaannarutsigu Guutimullu uppernerput attattuaannarutsigu pilluarnermik ataavartumik nassataqassaaq.

5. Sunik misilinneqarsinnaavugut, nikallujuillutalu aalajaakkaangatta susoqartarpa?

⁵ Misilinneqartarnivut atoruminaatsunik inuit nalinginnaasumik atortagaannik ilaqarput. Assersuutigalugu, immaqa peqqiilliorpugut. Ullumikkut Guuti tupinnartuliornikkut ajorunnaarsitsisanngilaq, nappaatittali nikallujuilluta atornissaanut pisariaqartumik ilisimassuseqartillutalu nukissaqartitsinissaanik qinnuigigutsinni akissavaatigut. (Tussiaat 41:2-4) Jehovamut nalunaajaasuunerput pillugu qinugineqaraangatta naapertuilluarneq pillugu naalliuttarpugut. (2 Timûtiuse 3:12; 1 Pîtruse 3:14) Misilinneqarnerni taama ittuni nikallujuittuaannaraangatta ’uppernerput misilinneqartarpoq’, tassa ilumut piviusuunersoq misilinneqartarpoq. Uppernerpullu ajugaaguni ’nikallujuinnermut sunniutaassaaq’. Upperneq misilinneqartarnikkut nukittoriartortoq siunissami misilinneqarnissatsinni iluaqutigissavarput.

6. Nikallujuissuseq qanoq ililluni ’sulinermik inersimalluinnartumik kinguneqartarpa’, misilinneqaraangattalu qanoq iliuuseqarsinnaavugut?

⁶ ’Nikallujuinnerli sulinermik inersimalluinnartumik kinguneqassavoq,’ Jakob allappoq. Misilinneqarnerput akueriinnarlugu Biibilerpalaanngitsunik periaaseqarluta unitsinniarsarinngikkutsigu nikallujuissuserput ’inersimalluinnartumik suliaqassaaq’, tassa kristumiutut inersimasunngortissavaatigut upperneq eqqarsaatigalugu amigaateqanngitsut. Misilinneqarnitsinni paasinarsippat arlaatigut sanngiissuteqartugut, soorunami qaangernissaannut ikioqqulluta Jehova qinnuigisariaqarparput. Kanngunartuliornissamut ussernartorsiornermik misilinneqarutta qinnutitsinni eqqaasariaqarparput taavalu qinnutivut naapertorlugit iliuuseqarluta. Imaassinnaavoq Guutimut attaveqarnitsinni assuarnaassuserput attatiinnarumallugu allamik suliffittaartariaqartugut allatulluunniit iliuuseqartariaqartugut. — 1 Moses 39:7-9; 1 Korintumiut 10:13.

Ilisimassuseqarusunneq

7. Misilinneqarnitta nikallujuilluta atornissaannut qanoq ikiorneqarsinnaavugut?

⁷ Jakobip paasitippaatigut misilinneqarnitta qanoq iliorluta anigorniarnissaa nalugutsigu qanoq iliussasugut. (Jâko 1:5-8) Jehovap ilisimassummik amigaateqarutta upperlutalu tamatuminnga qinnuigigutsinni assuarinavianngilaatigut. Misilinneqarnitsinni nikallujuinnissatsinnut misilinneqarnitsinnillu eqqortumik isiginninnissatsinnut ikiussavaatigut. Imaassinnaavoq uppeqatitta allassimaffimmik aalajangersimasumik takutitsivigigaatigut, imaluunniit nammineq atuaqqissaarnitsinni allassimaffimmik aalajangersimasumik maluginiagaqartugut. Pisut Guutimit aqunneqartut qanoq iliornissatsinnik paasitissinnaavaatigut. Guutip anersaavanit siulersorneqarsinnaavugut. (Lúkarse 11:13) Soorunami tamakku tamaasa misigisinnaassagutsigik Guutimut innuttaanullu qanimut attaveqartariaqarpugut. — Ussatit 18:1.

8. Sooq qulartoq Jehovamit pissarsisinnaanngila?

⁸ ’Upperluta nakimanatalu qinujuarutta’ ilisimassummik misilinneqarnitsinni iluaqutissatsinnik Jehovap tunissavaatigut. ’Nakimasup’, imaluunniit qulartup, ’assigaa immap malinga anorip aalatitaa qaffiumisaartoq’ — naatsorsoruminaatsoq. Anersaakkut taamatulli allanngujatigigutta ’isumaqassanngilagut Jehovamit sumik’ pissarsissalluta. Qinuneq pissutsilluunniit allat eqqarsaatigalugit ’ataasiunngitsumik isumaqarnaveerta’ imaluunniit ’saqittuaannarnaveerta’. Akerlianilli Jehovamut, ilisimassutsip Pilerfianut, uppissuseqarniarta. — Ussatit 3:5, 6.

Pisuut piitsullu tamarmik qiimmattarsinnaapput

9. Sooq Jehovamik pallorfiginnittutut qiimmattarnissatsinnut pissutissaqarpugut?

⁹ Misilinneqaaterput tassaappat piitsuussuseq, pitsaassaaq eqqaamassallugu kristumiut pisuut piitsullu tamarmik qiimmattarsinnaammata. (Jâko 1:9-11) Ukiuni hundredelinni siullerni Jesusimut ajoqersuganngortut amerlanersaat pigisakitsuupput, silamiunillu nikagisaapput. (1 Korintumiut 1:26) Naalagaaffimmilli kingornussisussatut ’akimassusertik’ qiimmattaatigisinnaasimavaat. (Rûmamiut 8:16, 17) Akerlianillu pisuut siornatigut ataqqisaasimagaluartut Kristusimut ajoqersuganngorlutik silamiunit asissugaaleramik ’nikagisaaneq’ misigisimavaat. (Juánase 7:47-52; 12:42, 43) Jehovalli kiffaasut tamatta qiimmattarsinnaavugut silarsuarmi pisuussutit nuimassuserlu anersaakkut pigissaarnitsinnut sanilliullugit suunngimmata. Qujamasoqaagut inuttut nuimasumik inissisimaffeqarnermik pingaarniutiginninnissaq akornatsinni inissaqartinneqanngimmat! — Ussatit 10:22; apustilit suliait 10:34, 35.

10. Timikkut pisuussutit kristumiup qanoq isigisariaqarpai?

¹⁰ Jakobip paasitippaatigut pisuussutit silarsuarmilu anguneqarsinnaasut allat inuunitsinnut aalajangiisuunngitsut. Soorlu naasup seqernup uunarneranit toqutinneqarnissaa kusanassusiata akornusersinnaanngikkaa, taamatut pisuup inuunera pisuussutaasa sivitsortissinnaanngilaat. (Tussiaat 49:7-10; Matîuse 6:27) ’Ingerlavimmini’ ulappuseruttorluni, immaqa niuernerup silarsuaani, toqoratarsinnaavoq. Taamaattumik pingaarnerpaaq tassaavoq ’Guutimi pisuujunissaq’ Naalagaaffiullu soqutigisaanik sapinngisaq tamaat siuarsaaniarnissaq. — Lúkarse 12:13-21; Matîuse 6:33; 1 Timûtiuse 6:17-19.

Pilluarput misilinneqarnerminni nikallujuitsut

11. Misilinneqartaraluartik uppernerminnik aalajangiusimannittut suna qilanaarisinnaavaat?

¹¹ Pisuujugaluarutta piitsuugaluaruttaluunniit pilluarsinnaavugut aatsaat misilinneqarnitsinni aalajaattuarutta. (Jâko 1:12-15) Misilinneqarnitsinni uppernerput attatiinnarlugu nikallujuittuarutta pilluarnerarneqarsinnaavugut, Guutimmi isaani eqqortumik iliorneq nuannaarnartuuvoq. Kristumiut tanitat toqussartik tikillugu uppernikkut aalajaattuarunik ’niaqorut inuussutaasoq’, qilammi inuuneq toqujuitsoq, akissarsiarissavaat. (sarĸúmersitat 2:10; 1 Korintumiut 15:50) Nunarsuarmi neriugisaqarutta Guutimullu uppernitsigut aalajaakkutta nunarsuarmi naassaanngitsumik inuunissaq qilanaarisinnaavarput. (Lúkarse 23:43; Rûmamiut 6:23) Taamaalilluni Jehova imminut uppertunut tamanut ajunngitsuliorumatoorujussuuvoq!

12. Sooq atoruminaatsorsioraangatta ima oqartassanngilagut: ’Guutimit usserneqarpunga’?

¹² Jehovap atugarliornermik misilissinnaavaatigut? Naamik, ima oqanngisaannassaagut: ’Guutimit usserneqarpunga.’ Jehovap ajortuliortinniarsarineq ajorpaatigut. Uppernerput aalajangiusimaannarutsigu misilinneqarnitsinni nikallujuittuaannarnissatsinnut ikiorusulluinnarpaatigut pisariaqartumillu nakussatsikkusungaarluta. (Filípimiut 4:13) Guuti illernartuuvoq, taamaattumik eqqunngitsuliornissamut akiuussinnaassutsitsinnik sanngiillisitsisinnaasumut pisinneq ajorpaatigut. Imminut pissutsinut silatusaanngitsunut pisikkutta ajortuliorlutalu, taava Guuti pisuutinniassanngilarput, ’Guutimi ajortumut ussertinnavianngilaq, namminerlu kinaluunniit ussertanngilaa’. Immaqa Jehovap aalajangersimasumik misilinneqarnissarput akuerisarpaa uagutsinnut ajunngitsussaq pillugu perorsaatissinniarluta, ajortumilli siunertaqarluni misilinneq ajorpaatigut. (Eprîarit 12:7-11) Satanip eqqunngitsuliortinniarluta usserniarsinnaavaatigut, Guutilli ajortumit annaassinnaavaatigut. — Matîuse 6:13.

13. Kissaat eqqunngitsoq tunuartinngikkutsigu qanoq pisoqarsinnaava?

¹³ Pissutsit aalajangersimasut immaqa kukkusumik kissaateqalersissinnaavaatigut ajortuliortissinnaallutalu, taamaammat qinujuarnissarput pisariaqarpoq. Jakob ima allappoq: ’Kinaluunniit usserneqararaaq, nammineq piummatsiminit qiisagaangami uerillunilu.’ Ajortuliornitsinnut Guuti pisuutissinnaanngilarput nammineq pilerissuseq ajortoq uummatitsigut uteqqiaffigisimagutsigu. Pilerissuseq eqqunngitsoq tunuartinngikkutsigu ’pinngussaaq’, uummammi alliartulerluni ’ajortilu naammassissalluni’. Ajorti naammassineqareeruni ’toqumik kinguneqassaaq’. Taamaattumik nalunanngitsumik uummaterput paarisariaqarparput ajortulioriartarnerillu akiorlugit. (Ussatit 4:23) Kain mianersoqquneqareersimagaluarpoq ajortip naalagaaffiginialeraani, kisianni akiunngilaa. (1 Moses 4:4-8) Taamaattumik uagut Biibilerpalaanngitsumik ingerlaqqajaalerutta qanoq iliortariaqarpugut? Kristumiut utoqqaanertat iluamik ingerlaleqqinnissatsinnut Guutimullu ajortuliunnginnissatsinnut ikiorniarpatigut quujamasuutigilluinnartariaqarparput. — Galâsiamiut 6:1.

Guuti ajunngitsut tamarmik pilerfigaat

14. Suna eqqarsaatigalugu oqartoqarsinnaava Guutip tunissutai ’naammalluartuusut’?

¹⁴ Eqqaamasariaqarparput Jehova misilinneqarnerit pilerfiginngimmassuk, kisianni ajunngitsut tamarmik pilerfigimmassuk. (Jâko 1:16-18) Jakobip uppeqatini ’qatanngutiminik asasaminik’ taavai ersersillugulu ’tunissutit tamarmik ajunngitsut tunniussallu tamarmik naammalluartut’ Guutimit pisut. Jehovap tunissutai anersaakkut ittut aamma timikkut ittut ’naammalluartuupput’ imaluunniit naammalluinnartuupput, sumik amigaateqaratik. ’Pavannga’, Guutip qilammi najugaanit, pipput. (1 Kunngit 8:39) Jehova ’pavannga qaamasunut’ — seqinermut, qaammammut ullorissanullu — Ataataavoq imaluunniit Pinngortitsisuuvoq. Aammattaaq anersaakkut qaamanermik sallusuissummillu tunivaatigut. (Tussiaat 43:3; Jeremia 31:35; 2 Korintumiut 4:6) Seqineq qilammi kaajallakkiartortilluni ulloqeqqaaneranilu qutsinnerpaaffimminiikkaangami tarranik allanngorartitsiuartartoq assiginagu Guuti ajunngitsumik isumassuineq eqqarsaatigalugu ’qutsinnerpaaffimminiittuaannarpoq’. Taassuma oqaasii ’kiffarlu ilumoorlunilu silatooq’ aqqutigalugit anersaakkut inuussutissat pisartakavut tamakkiissumik iluaqutiginiarsarigutsigik misilinneqarnitsinni nikallujuinnissatsinnut pisariaqartumik ikiungaassavaatigut. — Matîuse 24:45.

15. Suna Jehovap tunissutaasa pitsaanerit ilagaat?

¹⁵ Guutimit tunissutisiatta pitsaanerpaat ilaat tassaavoq anersaakkut ernernik pilersitsisimanera anersaaq illernartoq, ’oqaatsit sallusuissutaasut’ (nutaarsiassaq nuannersoq) peqatigalugu sunniuteqartoq, ikiortigalugu. Anersaakkut erniarineqarnermik misigisaqartut ’naaqqaataapput’, qilammi ’kunngiusussatut palasiusussatullu’ inuiaat akornannit qinikkat. (sarĸúmersitat 5:10; Evfisumiut 1:13, 14) Jakobip eqqarsaatigisimasinnaavai karrit suaasiassat naaqqaataannik katersukkat nisanip 16-ani, ullormi Jesusip makititaaffiani, pilliutigineqartut, iffiallu qaqortut marluk piinsip ulluani anersaap illernartup kuineqarfiani pilliutigineqartut. (3 Moses 23:4-11, 15-17) Taamaammat Jesus tassaavoq naaqqaat kingornusseqatissaalu tassaallutik naaqqaatit ilaat. Nunarsuarmimi neriugisaqarutta? Neriugisarput tamanna eqqaamajuarutsigu ’tunissutinik ajunngitsunik tamanik’ Tunisisumut, naalagaaffimmi ataani naassaanngitsumik inuulernissamik ajornarunnaarsitsisimasumut, uppernerput aalajangiusimajuaannarsinnaassavarput.

’Oqaaseq naammassillugu pigit’

16. Sooq ’tusarasuartuusariaqarpugut, oqalukkumaarnertullutalu kamakkumaarnertusariaqarpugut’?

¹⁶ Maannakkut uppernikkut misilinneqaraluarutta misilinneqanngikkaluaruttaluunniit ’oqaatsimik naammassinnittuusariaqarpugut’. (Jâko 1:19-25) Guutip oqaasianut ’tusarasuartuusariaqarpugut’ naalattuullutalu peqqussutai malillugit iliortariaqarluta. (Juánase 8:47) ’Oqalukkumaarnertuujusariaqarpugut’ oqaasissavullu eqqarsaatigilluaqqaartarlugit. (Ussatit 15:28; 16:23) Immaqa tassani Jakobip kajumissaarpaatigut misilinneqarnitta Guutimeersuunerapallattannginnissaannut. Kajumissaarneqarpuguttaaq ’kamakkumaarnertunissatsinnik, angut kamatsilluni Guutip iluarisaanik iliortarinngimmat’. Allap oqaasiinut kamaammerutta imminut noqittariaqarpugut akillugu annernartumik oqartooqqunata. (Evfisumiut 4:26, 27) Kamajasuujugutta imminut ajornartorsiortilersinnaavugut allanullu misilinneqaataalerluta, Guutitsinnullu naapertuilluartumut uppernitta inerititarisariaqagaanik inerititaqarnissarput ajornakusuulersillugu. ’Angisuumik siuneqassuseqarutta’ ’kamakkumaarnertuujussaagut’, qatanngutittalu angutit arnallu kajungerissavaatigut. — Ussatit 14:29.

17. Ajortup uummammit isumamillu peerneratigut suna naammassineqartarpa?

¹⁷ ’Mingunnartunik sunik tamanik’ — Guutip maajugisaanik kamannermillu siuarsaasunik tamanik — ’iperaanissarput’ pisariaqarluinnarpoq. Aammattaaq ’ajussutsip amiakkua iperartariaqarparput’. Tamatta timimik anersaamillu mingutsitsisut suulluunniit iperartariaqarpavut. (2 Korintumiut 7:1; 1 Pîtruse 1:14-16; 1 Juánase 1:9) Ajortoq uummatitsinnit isumatsinnillu peeratsigu ’qanilaarluta [sallusuissutip] oqaasia uagutsinnut ikkunneqartoq ilassisimavarput’. (apustilit suliait 17:11, 12) Qanorluunniit sivisutigisumik kristumiuusimagaluarutta sallusuissutip oqaasiinik immitsinni ikkussuiuartariaqarpugut. Sooq? Oqaaseq tamanna uagutsinni ikkunneqaraangami Guutip anersaava ikiortigalugu ’inuttaamik’ pilersitsisarmat, annannermillu kinguneqassalluni. — Evfisumiut 4:20-24.

18. Oqaatsimik tusaaginnartoq oqaatsimik naammassinnittumit qanoq allaassuteqarpa?

¹⁸ Oqaatsimit siulersorneqarnerput qanoq ililluta ersersittarparput? Naalalluta ’tusaaginnarnata oqaatsimik naammassinnittuunitsigut’. (Lúkarse 11:28) ’Oqaatsimik naammassinnittut’ uppissuseqarput kristumiutut kiffartornermi ilungersuussilluarnermik Guutillu innuttaasa ataatsimiittarnerinut najuuttuaannarnermik inerititaqartumik. (Rûmamiut 10:14, 15; Eprîarit 10:24, 25) Oqaatsimik tusaaginnartup assigaa ’angut kiinnaminik inuuserisaminik tarrarsuutikkut qimerluuisoq’. Tarrarsorpoq qimagullunilu, immaqalu inuttut pissuserisamini aaqqitassaagaluit tamaasa puiorlugit. ’Oqaatsimik naammassinnittutut’ Guutip ’inatsisai naammalluartut’ misissoqqissaartarpavut maleruarlugillu Guutip uagutsinnut piumasaqaataanut tamanut naalannitsigut. Kiffaanngissuseq tassuunakkut pigiligarput ajortip toqullu ataanni inussiaataanerup akerlerluinnaraa, inuunermut sammisuugami. Taamaattumik ’inatsisinut naammalluartunut kiffaanngissutsip piinut soraarata itsuartorniarta’ isumaliutigeqqissaartarlugit naalallugillu. ’Oqaatsimik naammassinnittuugaangatta tusarnaarlutalu puiutunngikkaangatta’ nuannaarneq Guutimit iluarisaanerup nassatarisaa misigisarparput. — Tussiaat 19:8-12.

Pallorfiginneriaaseq Guutip iluarisaa

19, 20. (a) Jâko 1:26, 27 naapertussagaanni pallorfiginninneq minguitsoq uagutsinnut sunik piumasaqarpa? (b) Pallorfiginninneq minguitsoq sunik ilaqarpa?

¹⁹ Guutimit iluarisaassagutta pingaartorujussuuvoq taassuma akuerisinnaasaanik pallorfiginneriaaseqarnissarput. (Jâko 1:26, 27) Immaqa nammineq isumaqarsinnaavugut Jehovamut ’Guutisiortuulluta’, Jehovalli naliliinera pingaarnerpaavoq. (1 Korintumiut 4:4) Assersuutigalugu ’oqqamik naalakkersuinnginneq’ annertuumik sanngiissutaasinnaavoq. Allanik ingutsisaraluarluta, sallusaraluarluta allatulluunniit oqarput atornerluttaraluarlugu isumaqarutta guutisiornerput Guutip iluarigaa, imminut salloqittassaagut. (3 Moses 19:16; Evfisumiut 4:25) Kissaatiginngeqaarput ’guutisiornerput sussaanngitsuussasoq’ arlaatigulluunniillu Guutimut iluarinanngitsuussasoq.

²⁰ Pallorfiginninnerup minguitsup immikkoortui tamaasa Jakobip eqqartunngikkaluarlugit oqaatigaa ’iliarsunnik uillarnernillu naalliunneranni takusaasarnermik’ ilaatigut ilaqartoq. (Galâsiamiut 2:10; 6:10; 1 Juánase 3:18) Ilagiit kristumiut uillarnernik isumassuineq immikkut suliassatut isigaat. (apustilit suliait 6:1-6; 1 Timûtiuse 5:8-10) Guutip uillarnernik iliarsunnillu sernissuinissani kissaatigimmagu anersaakkut timikkullu taakkuninnga ikiuiniarluta sapinngisatsinnik iliornitsigut Taanna suleqatigisarparput. (5 Moses 10:17, 18) Pallorfiginninnerup minguitsup ilagaattaaq ’silarsuarmit [inuiannit naaapertuilluanngitsunit Satanip pissaaneqarfigisaanit] mingutsinnaveersaarneq’. (Juánase 17:16; 1 Juánase 5:19) Taamaattumik silarsuarmi ileqqut guutiitsorpaluttut ingalassimaniartigik Jehova naalannartissinnaajumallugu taassumunngalu kiffartornermi atorneqarsinnaajumalluta. — 2 Timûtiuse 2:20-22.

21. Jâkup agdlagai-nut atatillugu apeqqutit allat suut isumaliutigisinnaavavut?

²¹ Jakobip unnersuussutai maannamut sammeriikkavut misilinneqarnermi nikallujuinnissatsinnut uppernitsinnillu aalajangiusimanninnissatsinnut iluaqutigisariaqarpavut. Tunissutinik ajunngitsunik tamanik asannilluni tunisisumik pingaartitsinerulissutigisariaqarpavut. Jakobip oqaasiisa ersersippaattaaq qanoq iliorluta minguitsumik pallorfiginnissinnaasugut. Aamma suut eqqumaffigisariaqarpavut? Jehovamut ilumoortumik uppissuseqarnerput takutinniarlugu aamma qanoq iliuuseqartariaqarpugut? (wE 15/11 97)

[Quppernerup ataani ilanngussaq]

Qanoq akissavit?

□ Misilinneqarnitsinni nikallujuinnissatsinnut suna iluaqutigisinnaavarput?

□ Sooq kristumiut misilinneqartaraluarlutik tipaatsussinnaappat?

□ Qanoq ililluta oqaatsimik naammassinnittuusinnaavugut?

□ Pallorfiginninneq minguitsoq sunik ilaqarpa?

[Qupp. 9-mi assiliartaq]

Misilinneqaraangatta Jehovap qinnutinik akisinissamut pissaaneqarnera upperisariaqarparput

[Qupp. 10-mi assiliartaq]

’Oqaatsimik naammassinnittut’ Guutip naalagaaffia silarsuarmi tamarmi oqaluussissutigaat