Arnaq inuunerluttoq tusaamasaanerluttoq — Taassuma uppissimanera

’Uppippoq, uppippoq Babylon Angisooq, inuiaqatigiit tamaasa viinnimik kamaammik uersarnermi pianik immikkamigit.’ — SARKÚMERSITAT 14:8.

Jehovap Nalunaajaasuisa ataatsimeersuarnerini „Guutip naapertuilluassusia“-nik qulequtaqartuni 1988-imi pisimasuni oqalugiaatit tulleriiaartut ’Piffissaq aalajangersagaq qaneqaaq’-mik qulequtallit kingullersaannut ilanngutassiaq una aallaqqaataavoq

1. ’Arnaq inuunerluttoq’ tusaamasaanerluttoq kinaava, sunalu pissutigalugu taassumunnga tunngasumik ilisimasaqartariaqarpugut?

ARNAQ inuunerluttoq tusaamasaanerluttoq — kinaava? Sooq taanna oqaluuserissavarput? Kanngunartuliorneq atuakkani oqaluttualiani isiginnaagassianilu assigiinngitsuni naammattorsuarmik saqqummiunneqartariinnginnerpa? Ilaana! Arnarli inuunerluttoq matumani pineqartoq tassaanngilaq atortittartoq nalinginnaasoq. Ilumoortumik oqaatigalugu tassaavoq inuiaat oqaluttuarisaaneranni arnat inuunerluttut sunniuteqarnersaat, tusaamasaanerlunnersaat aammalu toqutsiumatunersaat. Ukiullu 4000-init amerlanerusut ingerlaneranni inuunerluttuunini iluanaarutigisimavaa. Navianartorsiulissanngikkutta taassumunnga tunngasunik ilisimasaqartariaqarpugut. sarĸúmersitat 14:8-mi arnaq tusaamasaanerluttoq taanna inngilimit taaneqarpoq ’Babylon Angisooq’, tassaanerarneqarlunilu inuiannik tamanik tammartitsiniartoq. Taama navianartorsiortitsitigimmat, qujamasuutigisariaqarparput taassumunnga eqqartuussutip naammassineqarnissaanut piffissaq Jehovap aalajangersarsimasaa qaneqimmat. — sarĸúmersitat 1:3.

2. Arnaq inuunerluttoq taanna sumut atsiunneqarpa, silarsuarmilu tamarmi eqqunngitsumik upperisarsiorneq qanoq naalagaaffissuanngorsimava?

² Arnaq inuunerluttoq taanna itsaq Babylonimut, illoqarfimmut usorsisimaartumut ukiut 4000-init amerlanerusut matuma siornagut Nimrodip, ’aallaaniallaqqissorsuup Jehovamik assortuisup’ (NV), Mesopotamiami tunngavilersimasaanut atsiunneqarpoq. Babylonimiut guutipilussiuutaasumik qaqiffilialiulermata oqaasii Jehovap paatsiveerutippai nunallu isuinut siammarlugit. Siammaramik upperisatik nassarpaat, taamaalillunilu Babylonimiut upperisarsiornerannik silarsuarmi tamarmi naalagaaffissuaq aallartippoq. Ilumut, tassaavoq Babylon ANGISOOQ. (1 Môrsase 10:8-10; 11:1-9) Upperisat paasiuminaatsut itsaq Babylonimi atulersitaasut suli uagut ulluvut tikillugit silarsuarmiut upperisaanni ileqquinilu malunnarput. (sarĸúmersitat 17:7) Illoqarfiup taaguutaa hebræerisooq, Babel, isumaqarpoq „paatsiveerunneq“ — tassaallunilu ullumikkut eqqunngitsumik upperisarsiornerit tamalaarpassuarnik akuleriissitaannut taaguut naleqqulluartoq!

3. (a) Guutip innuttai, Israelikkut, Babylonip qanoq sivisutigisumik tigusareqqavai, tigusaaqqasullu sumut qanippat? (b) Babylon qanga ajunaarutaasumik ajorsartinneqarpa, taamanikkulli suujunnaarsinneqarpa?

³ Babylonitoqqap ajorsartinneqarnini siulleq tamanna anigorpaa, taavalu, Assyriap ukiumi 632-mi u.n.a.s. tigusaaneraniit, silarsuarmi naalagaaffissuit Bibelimi oqaluttuarineqartut pingajorilerpaat. Naalagaaffissuartut alutornassuseqarnera sivikitsuinnaavoq — ukiunit hundredenit sivikinnerulluni — ukiulli tamakkua ilaanni 70-ingajanni Guutip innuttai Israelikkut tigusareqqavai. Babylonimi tigusaaqqanerminni Israelikkut Babylonimiut naalaffiinut oqaluffiinullu tuusintilikkuutaanut, guutiinut pingasuussusiliusunut diaavuluinullu pingasuussusiliusunut, anaanamik ernermillu pallorfiginninnerannut kiisalu ullorissat najoqqutaralugit siulittuiniartarnerannut, toqusuitsuunerarneqartunik guutisiornerusumut, qaneqaat. Tassa Israelikkut tigusaaqqasut ukiumi 539-mi u.n.a.s. illoqarfik Babylon ajunaarutaasumik ajorsartinneqarmat tassaniipput. Taamanili suujunnaarsinneqanngikkallarpoq! Ajorsartitsisuisa illoqarfik upperisarsiornermut qitiusutut akimasutut atuinnarpaat.

Silarsuarmi tamarmi upperisarsiornikkut naalagaaffissuaq

4. (a) Jehovap pruffiitii Babylon pillugu sunik nalunaaruteqarsimappat, Babylonilu qanoq pineqarpa? (b) Babylon alla suna suli, nunamiut ajoqutissaannik, piujuarpa?

⁴ Babylonip ’saligummik nunngutaajaammik salinneqarluni’ aammalu ’Guutip Sodomamik Gomorramillu mumitsineratut’ pineqarluni eqqartuunneqarnissaa Jehovap pruffiitiisa nalunaarutigisarsimavaat. Siulittuutit tamakku kingusinnerusukkut eqquuppat? Aap, annikitsualuttai tamaasa ilanngullugit eqquupput! Illoqarfiusimagaluartoq Babylon illukuinnanngorpoq — paarmortunit nersutinillu nujuartanit taamaallaat najugarineqalerluni! (Isaia 13:9, 19-22; 14:23; Jerimia 50:35, 38-40) Babylonili alla, ullumikkut Babylon Angisooq, piujuarpoq. Eqqunngitsumik upperisarsiornerup silarsuarmi tamarmi naalagaaffissuatut Babylonitoqqap ajoqersuutai makitasuuneralu ingerlateqqiinnarpai. Inuit Jehovap Naalagaaffimminut atatillugu siunertarisaanut tappiillisinniarnerini Satanip sakkugisaasa taanna pingaarnersaraat. — 2 Korintumiut 4:3, 4.

5. (a) Babylonip pissatseruttorfiata nalaani upperisarsiornerit suut pinngoriartorpat, sunali pissutigalugu eqqunngitsumik upperisarsiornerup kisimi silarsuarmi tamarmi atugaalernissaanik misiliinermini Satan iluatsitsinngila? (b) Kristumiussutsip atulersinneqarnerata kingornagut Satanip eqqunngitsumik upperisarsiorneq qanoq sakkugaa?

⁵ Kristusip inunngornera ukiunik 600-it missaanniittunik sioqqullugu naalagaaffissuup silarsuarmi pissaaneqarnerpaap Babylonip pissatseruttorfiata nalaani upperisarsiornerit hinduussuseq, Buddhasiorneq, Kungfutsisiorneq shintosiornerlu aamma saqqummilerput. Eqqunngitsumilli upperisarsiornerup kisimi silarsuarmi tamarmi atuutilernissaanik Satanip misiliinera iluatsippa? Naagga, tassami Jehovap nalunaajaasui itsaq inuusut sinneruttut Babyloniminngaanniit Jerusalemimut uterput Jehovamik pallorfiginninneq atulerseqqikkumallugu. Taamaattumik ukiut 600-t tamatuma kingornagut suli juutinik aalajaatsunik tassaniittoqarpoq Messiasimik ilassinnittunik kristumiullu ilagiissaannut siulliullutik ilaasortanngortunik. Eqqunngitsumik upperisarsiortitsisut Guutip ernera marteerisut toqunneqartippaat, aammalu, Jesusip apustiliisalu mianersoqqusinerattut, Satanip kristumiussutsimik ilumoortumik assortuinermini eqqunngitsumik upperisarsiorneq tamanna sakkugilerpaa. — Matîuse 7:15; apustilit suliait 20:29, 30; 2 Pîtruse 2:1.

6. (a) Satanip qanoq ililluni kristumiut ajoqersuutaat ajortunngortippai, ajoqersuutillu Guutimut ataqqinaataajaasut suut ineriartorsimappat? (b) Inuit tuusintilikkuutaat Babylonimiut ajoqersuutaat pinnagu sallusuissummik Bibelimiittumik piumanerusut qanoq pineqarpat?

⁶ Jerusalemip ukiumi 70-imi aappassaanik pingaarnerusumik aserorneqarnerata kingornagut, Babylonip paasiuminaatsortaanik grækeritoqqallu silamiorpaluttumik ilisimaqqissaarniarnikkut isumaliutaannik akulerussilluni, kristumiut ajoqersuutigisaannik eqqunngitsunngortitsiniarnermini Satanip apustilioqqusersut sakkugisarpai. Taamaalilluni ’Jehova ataasiusoq’ Bibelimi eqqartorneqartoq taarserlugu ’pingasuussusilik illernartoq’, tassa guuti ataasiullunilu pingasuussusilik, ajoqersuutigineqalerpoq. (5 Môrsase 6:4; Mákorse 12:29; 1 Korintumiut 8:5, 6) Aamma inuup tarnaata toqusuitsuuneranik ajoqersuut, itisuumik eqqarsaatersortartup guutipilussiortup Platonip ajoqersuutaa, atulersinneqarpoq Kristusip utertitsissutissamik pilliutaaneranik makititsinissamillu Bibelimi ajoqersuutigineqartut erlinnartut taarserlugit. Taamaalilluni anniarfik ikualasoq eqqiarfillu ikualannginnerulaartoq upperineqalerput. (Tussiaat 89:49; Hisĩkiale 18:4, 20) Ajoqersuutit Guutimut ataqqinaataajaasut inuillu siooranerannut pissutaasut taamaattut oqaluffiit aningaasaasiviisa immerneqaatigisarsimavaat. Aammattaaq katuullit upperisaminnit allaasumik ajoqersuuteqartunik killisiuisarnerata nalaani iluarsaaqqinnerullu nalaani naalliutsitassat anniarfiup ikualanerinit anniartitaanissaat palasinit erinitsaanneqartarsimaqaat. Inuit tuusintilikkuutaat Babylonimiut ajoqersuutaat pinnagu sallusuissummik Bibelimiittumik piumanerusut suli uumallutik katuulinit naaggaartunillu ikikkaavinni ikuallanneqartarsimapput. Kisianni soorlu takussagipput Babylon Angisuup inuunerluttuunera tassaannaanngilaq eqqunngitsumik ajoqersuineq.

Ulloq Jehovap eqqartuussiffia

7. (a) Qanga qanorlu ililluni Jehovap ajoqersuutit ilumoortut Bibelimeersut tunngaviunerusut atuutilerseqqippai ajoqersuinerluutillu Babylonimeersut qulaartalerlugit? (b) Ajoqersuutit ilumoortut Bibelimeersut tunngaviunerusut suut Bibelimik Atuaqqissaartartut atulerseqqippaat?

⁷ Jehovap arnamik inuunerluttumik taassuminnga eqqartuussiffissaa nalliutinngitsoorsinnaanngilaq! (Eprîarit 10:30) 1870-ikkunni ullut piareersarfiusut aallartipput, Jehovap ’aallartitani’ — tassa Bibelimik atuaqqissaartartorpaaluit peqqusersuitsut — aallartimmagit ajoqersuinerluutinik Babylonimeersunik qulaarsiartoqqullugit ajoqersuutinillu ilumoortunik Bibelimeersunik tunngaviunerusunik atulersitseqqeqqullugit. (Malakia 3:1a, NV) ’Aallartitap’ katersaasup taassuma oqaatsit siulittuutaasut sarĸúmersitat 4:11-miittut uku akuerai: ’Jehova Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ Jesusip pilliutaata utertitsissutaasup Guutip inuiannik tamanik utertitsissutissaatut pingaaruteqassusia ’aallartitap’ erseqqissarpaattaaq. Utertitassat siullermik tassaapput ’savarpannguit’ Jesusip qilammi naalagaaffimmini naalakkersueqatigisassai, tulliuppullu inuit hundredelinnik millionillit nunami paratiisiusumi naassaanngitsumik inuusussat — taakkualu amerlanersaat toqusunit makittussaasut. (Lúkarse 12:32; 1 Juánase 2:2; apustilit suliait 24:15) Aap, Bibelimik Atuaqqissaartartut taakkua ajoqersuutit ilumoortut tunngaviunerusut tamakku saqqummerseqqippaat, Babylonimiullu naassaanngitsumik anniartitaanermik ajoqersuutigisaannik qulaarinermikkut assersuutikkut ’anniarfik qatserpaat innerlu qamillugu’!a

8. (a) Kristumiuuneraqatigiit ilagiissaanni kiffartuutillit qanoq ilillutik sorsunnersuaq siulleq iluaqutiginiarlugu Bibelimik Atuaqqissaartartut nungutinniarsaraat? (b) Eqqartuussisoq, pisortat arfineq-pingasut Vagttårnip peqatigiiffianeersut akiliinikkut iperarneqarnissaannik akuersissutiginnikkumanngeriarluni taakkuninnga parnaarussaatitsisoq, qanoq pineqarpa?

⁸ Ukiut 40-t missaanni Bibelimik Atuaqqissaartartut nakimaatsumik nalunaarutigisarpaat ukiumi 1914-imi Guutimik nalusut ullussaat naammatsissimassasut. Ilimagisaattut ukiumi tassani pisoqarpoq silarsuarmiunut uissuummissutaasunik, ingammik sorsunnersuaq siulleq aallartimmat. Kristumiuuneraqatigiit — tassa Babylon Angisuup immikkoortortaasa nuimanerpaartaasa — palaseqatigiissortaasa sapinngisartik tamakkerlugu silarsuarmi ajornartorsiuteqaleruttorfik iluaqutiginiarpaat Bibelimik Atuaqqissaartartut nakimaatsut nungunniarsaralugit! Naggataatigut 1918-imi innuttaaqatigiinnut ajoqutaasumik suliaqarnerarlugit sallullutik unnerluutiginerisigut Vagttårnip Peqatigiiffiani suleqataasut ingerlatsisuusut ilaat arfineq-pingasut parnaarussaatippaat. Qaammatilli qulingiluat qaangiummata suleqataasut taakku iperarneqarput, kingusinnerusukkullu pinngitsuutinneqarlutik. Eqqartuussisoq Martin T. Manton, Bibelimik Atuaqqissaartartut taakku akiliinikkut iperarneqarnissaannik akuersissutiginnikkumanngeriarluni taakkuninnga parnaarussaatitsisoq, kingorna paavi Pius XI-mit „iluartuutitap Gregorersuup mattuttoqatigiivinut“ ataqqinaammik saqqarmiortaartinneqarpoq. Ataqqinartitaanerali sivikitsuinnaavoq, 1939-mimi ukiuni marlunni parnaarussassanngortinneqarpoq pillarneqarlunilu annertuumik akiliisinneqarluni. Sooq? Dollarinik 186.000-inik akilerneqarluni peqquserluttulisussanngortitaalluni eqqartuussutinik arfinilinnik ’tunisisimasutut’ pisuutinneqarami!

9. Jehovap innuttaasa taamanikkut misigisaat Malakiap siulittuutaani qanoq nassuiarneqarpa, taamaalillunilu kikkut siulliullutik eqqartuunneqalerpat?

⁹ Soorlu taaneqareersoq 1918-imi Jehovap innuttaasa ullut misilinneqangaarfiusut atulerpaat. Malakia 3:1-3-mi (NV) pruffiitip oqaasiisa tulliuttut suut pisimanersut nalunarunnaarsippaat: „Tassanngaannarlu Naalagaq ilumoortoq [Jehova] ujagarsi naalaffiutiminut tikiukkumaarpoq, [Abrahamimik] angeruseq pillugu aallartitaq [Jesus] ilagalugu.“ Aap, Jehova Messiasinngortitani ilagalugu eqqartuussiartorluni tikiuppoq. Taava Jehova ima aperivoq: ’Kiali atorsinnaassavaa ulloq tikiuffissaa? Kinalu atasinnaassava, takutippat? Kuultimik aatsitsisup inneratut ikkumaarmat, errorsisullu qaqorsaataatut.’ Pîtrusip agdlagai sujugdlît 4:17 naapertorlugu eqqartuussassat siulliit tassaapput ’Guutimut inoqutaanerartut’. Taamani kristumiut ilumoortut minguiarneqarput akuiarneqarlutillu Jehova kiffartorfigisinnaaniassagamikku.

’ANIGITSI TASSANNGA, INNUTTAKKA’!

10. Kristumiuuneraqatigiit, eqqunngitsumik upperisarsiornerit tamaasa ilanngullugit, 1919-imi qanoq Guutimit eqqartuunneqarpat, tamannalu Babylon Angisuumut qanoq kinguneqarpa?

¹⁰ Babylon Angisuumut ilaagamik peqqissimiumanngitsut, kristumiuuneraqatigiit ilagiissaannut kiffartuutillit Jehovamit eqqartuunneqarnerminni atasinnaasimanngillat. Sorsunnersuarmi toqoraanersuarmut peqataanermikkut aammattaaq kristumiunik ilumoortunik malersuisitsinermikkut atisatik mingutsersimaqaat. (Jerimia 2:34) Kristusip naalagaaffia qilammi pilerseqqammersoq naalakkumallugu nalunaarfigiumanagu Naalagaaffiit Peqatigiit-nik inuit pilersissimasaannik tapersersuipput, taallugulu „Guutip naalagaaffiata nunarsuarmi politikkikkut ersernera“. 1919-imi nalunarunnaarsimavoq Jehovap kristumiuuneraqatigiinnut — ilami eqqunngitsumik upperisarsiornernut tamanut — eqqartuussutini nalunaarutigisimagaa. Babylon Angisooq uppissimavoq, suujunnaarsitassanngortitaalluni! Sallusuissummik naapertuilluarnermillu nuannarisaqartut tamarmik Jerimia 51:45-mi peqqussut siulittuutaasoq naalattariaqarpaat: ’Anigitsi tassannga, innuttakka; tarnisi annatsissigik Jehovap kamannerata katsungaanneranit.’

11, 12. (a) Babylon Angisuumut eqqartuussut pillugu sarĸúmersitat 17:1, 2-mi inngili qanoq oqarpa? (b) ’Imerpassuit’ arnap inuunerluttorsuup issiavigisai suuppat, qanorlu ilillutik nunami ineqartut ’viinni uersarnerata pia putumassutigaat’?

¹¹ Babylon Angisooq uppissimavoq! Sulili suujunnaarsinneqarsimanngilaq. Upperisarsiornerup silarsuarmi tamarmi naalagaaffissuatut, Satanip salloqittaasiaatut asseqanngitsutut, sivikitsumik piussaaq. Guutip taassumunnga eqqartuussutaa inaarutaasoq sunaava? Tamatuminnga nalornissuteqartinneqanngilagut! sarĸúmersitat 17:1, 2-mi inngilip apustili Johannes saaffigaa (taannalu aqqutigalugu siulittuummik ullumikkut misissuisartut saaffigalugit) oqarlunilu: ’Qaagit, uersartorsuup [arnap inuunerluttorsuup] imerpassuarnik issiaviginnittup eqqartuunneqarnera ilinnut takutissavara; taanna nunap kunngiisa uersaagaat, viinnilu uersarnerata pia nunami ineqartut putumassutigaat.’ ’Imerpassuit’ tassaapput inuiappassuit eqqissiveqanngitsut arnap inuunerluttorsuup naqisimajuagai. Siulittuummilu allassimavoq ’nunami ineqartut’ taassuma viinnia putumassutigigaat. Babylon Angisuup ajoqersuinerluutai imerfigaat, ileqqorlunnera silamiorpaluttoq nuannaapiluutigalugu, kiisalu viinnipiluk akikitsoq putumassutigalugu uppeqqajaallutik ingerlapput.

¹² Jâko 4:4-mi ima atuarpugut: ’Uersartusi ukorsiiaa, ilisimanngilisiuk silap piinik asanninneq Guutimut akerartuutaasoq?’ Ullumikkut upperisarsiortut silamiunut sapinngisartik tamakkerlugu iluareqqusaartuupput, ingammillu kristumiuuneraqatigiit taamaallutik. Palasertaasa tusagassaq nuannersoq Jehovap naalagaaffianut tikiuttussamut tunngasoq oqaluussissutiginngitsuuginnanngilaat, aammattaarli ileqqussat Bibelimi ajoqersuutigineqartut kimikillisittarpaat ilagiinnut ilaasortat aalajangersumik pisaaseqanngitsumik silamiorpaluttumillu ileqqoqarneri ilaginnartarlugit. Palasit ilaata allaat uinikkut kanngunartuliorneq ajornerarsinnaasanngilaat, ileqqoqaramik apustili Paulusip isertuarani avoqqaarisaanik, oqarami: „Tammaqinasi. Kinguaassiuutitigut kanngunartuliortulluunniit guutipilussiortulluunniit allasiortulluunniit angutilluunniit pinngortitat pissusiannut akerliusumik atortittut, angutilluunniit anguteqatiminnik atoqatiginnittut, . . . Guutip naalagaaffia kingornussarissanngilaat. Taamaattunillu ilaqarsimagaluarpusi. Uffarsimavusili.“ — 1 Korintumiut 6:9-11, NV.

’Attakorsuit maralluinut niuaataraat’

13, 14. (a) Taaneqarsinnaasut suut ersersippaat ullumikkut ilagiinni nalinginnaasuni kiffartuutillit ’uffarsimanngitsut’? (b) Tuluit ilagiissaanni isumalioqatigiit ataatsimeersuarnerminni angutit anguteqatiminnik atoqateqartarnerat qanoq isummerfigaat, aviisimilu ilanngutassiortup ilagiit taakkua qanoq taaneqartariaqaraluarnerat siunnersuutigaa? (c) Apustili Peterip oqaasii suut palaseqatigiinnut tunussisimasunut tulluarpat?

¹³ Ullumikkut palasit ’uffarsimappat’? Assersuutigalugu Tuluit Nunaanni, qanga naaggaartuussutsip najugarisaani pingaarnermi, pissutsit qimerlooriartigik. 1987-imi novemberiugaa Tuluit Nunaanni ministeriunerup palasit ileqqussatigut maligassaalluartooqqullugit kajumissaarmagit, ilagiinni anglikanerini palasit ilaat ima oqarpoq: „Anguteqatiminnik atoqatiginnittartut inuttut allatut kinguaassiuutitigut piumasaminnik iliorsinnaatitaapput; taamaaliornerata ajunngitsortaa isiginiartariaqarparput taamaaliortullu [anguteqatiminnik] ilumoorfigeqatiginninnissamut kajumissaartariaqarlugit.“ Londonimi aviisit ilaat ima allappoq: „Anglikanerit upperisamut ilisimatusaatinik ilinniarfiisa ilaanni anguteqatigiit atoqatigiittarnerat ima atugaatigilermat ilinniarfimmi allami ilinniartut ilinniartitsisiminnit tassungaqqusaanngillat.“ Misissuinerit ilaanni missiliuunneqarpoq Londonip ilaani aalajangersimasumi palasit amerlassusiisa affaannit amerlanerusut anguteqatiminnik atoqatiginnikkajuttuusut. Aammalu ilagiinni isumalioqatigiit ataatsimeersuarneranni tuluit ilagiissaanni palasit 95 procentii akuerseqataapput siunnersuutigineqarmat katissimanngitsut akornanni atoqatigiittarneq allasiornerlu ajortuliatut taaneqassasut, angutilli akornanni atoqatigiittarneq ajortuliatut taaneqassanngitsoq; taamatut iliornerit taaneqaannarput pissusissamisoortutut isigineqartut naapertornagit iliornerit. Tamakku tamaasa oqaaseqaatigalugit aviisiliortut ilaat oqarpoq tuluit ilagiissaat Sodomamik Gomorramillu taaneqartariaqaraluartut. Aviisi Londonimi saqqummersartoq alla ima allappoq: „Kinguaariit aalajangersumik pisaaseqanngitsuunerata nakkaannajasuuneratalu kinguneri qimerlooraangamikkik tuluit annilaarutigisarpaat.“

¹⁴ Apustili Peterip oqaasiisa ukiut ingerlaneranni ilagiinni kiffartuutilinnut tunussisimasunut ila tulluassusii: ’Taakkununnga eqquuppoq sallunngitsumik ussatigisaq imaattoq: „Qimmip meriaani kingumut saattaraa,“ imaattorlu: „Puuluki ipiiarsimasoq attakorsuit maralluinut niuaataraaq“’! — 2 Pîtruse 2:22.

15. (a) Kristumiuuneraqatigiinni tamani ileqqussat eriaginartut qanoq aseroriartuinnarsimappat? (b) Kingunipilunnut tamakkununnga kikkut pisooqataappat?

¹⁵ Kristumiuuneraqatigiinni tamani, aap silarsuarmi tamarmi, ileqqussat eriaginartut amiilaarnartumik aseroriartuinnarsimapput. Innuttaaqatigiit ilaanni aappariit katinnissaat pisariaarussimasutut isigineqarpoq, aappariillu katissimasut ilumoorfigeqatigiinnissartik pisariaqartippallaartanngilaat. Aappariit ikiliartuinnartut inatsisit naapertorlugit aappariinnerminnut allagartartaartarput, katissimasullu amerliartuinnartut avittarput. USA-mi ukiut 25-t kingulliit ingerlaneranni ukiut tamaasa avittartut pingasoriaammik amerlisimapput, maanna ukiut tamaasa millioninit amerlanerungaartunik amerlassuseqalersimallutik. Tuluit Nunaanni, 1965-imiit 1985-imut ukiut tamaasa avittartut sisamariaammik amerlisimapput, 41.000-iniit 175.000-inut. Katissimanngitsut katissimanngitsoqatiminnik atoqateqarumanerusarput, ilaatigut arnat arnaqatiminnik angutillu anguteqatiminnik, ilarpassuilu taarserartunik atoqateqartarlutik. Nappaatit kinguaassiuutitigut tunillaattartut amiilaarnartut, ingammik AIDS, ileqqorluttumik inooriaasiata kingunerisaanik siaruaattartut, kappialaatigisarpaat, taamaakkaluartorli kinguaassiuutitigut ileqqorisatik kanngunaqisut atuinnarlugit. Ilagiinnut ilaasortaasut ajortuliortuaannartut kristumiuuneraqatigiit palasertaannit perorsarneqarneq ajorput. Kanngunartuliornermik ilaginnaanermik annertussusia naapertorlugu kingunipiluinut akisussaasariaqarput. — Jerimia 5:29-31.

16. (a) Babylon Angisuup uppissimaneranut suna erseqqissaataava, sarĸúmersitat 18:2-milu inngilip torlulassutigisaa suna naleqqulluarpa? (b) Silarsuup naggatissaani annakkusuttut tamarmik qanoq iliortariaqarpat?

¹⁶ Ileqqussatigut pissutsit alianartut eqqunngitsumik upperisarsiornerup silarsuarmi tamarmi naalagaaffissuani atuuttut uppernarsaataaqataapput Babylon Angisuup uppissimaneranut. Guutip taanna eqqartuussimavaa, aap, aalajangersimavoq suujunnaarsinneqassasoq. Taamaattumik sarĸúmersitat 18:2-mi inngilip nipini nipittortillugu ima torlulassutigisaa naleqqulluarpoq: ’Uppippoq, uppippoq Babylon Angisooq, anersaapiluillu najugarilerpaat, anersaallu minguttuut tamalaat parnaarussaaffigilerpaat, timmissallu minguttuut uuminartullu tamalaat parnaarussaaffigilerpaat.’ Taamaattumillu silarsuup naggatissaani annakkusuttut tamarmik kaammattuut versi 4-miittoq naalaartariaqalerpaat: ’Taassumannga anigitsi, innuttakka, ajortaasigut peqatigileqinavarsi, perluutissaanillu pineqaqinavusi’! Eqqunngitsumik upperisarsiornermit aninissaq pisariaqarluinnarpoq ’annikilliornartumi angisuumi’ qanittukkut piumaartussami annakkumagaanni. (sarĸúmersitat 7:14) Soorluli takussagipput, allattaaq piumasarineqarpoq. (wD 15/4 89)

[Quppernerup ataani ilanngussaq]

[Qupp. 9-mi ungalusaq]

PALASIT ILEQQUI

„Ukiut tallimat kingulliit ingerlaneranni meeqqat USA-mi najugaqartut arlalinnik hundredelinnik amerlassusillit palasinit katuuliusunit kinguaassiuutitigut atornerlunneqarsimasut misigissutsimikkut ajoquserneqangaarsimapput, angajoqqaavi, tarnip pissusiinik ilisimatuut misissuisartullu, politiit eqqartuussissuserisullu pisimasunik sulissutiginnittut taama oqarput.“ — Akron Beacon Journal, 3. januari 1988.

„Ilagiit katuullit Romalerisut USA-miittut ilaqutariinnut meeqqaminnik palasinit kinguaassiuutitigut atornerlunneqarsimaneraasunut dollarinik arlalinnik millioninik taarsiissutitut akiliinissaminnut pinngitsaalineqarput. Taamaakkaluartorli, ajornartorsiut tamanna ima ingasatsigilersimavoq eqqartuussissuserisut ajoquserneqartullu ilarpassuinit ilagiit pisimasunik sumiginnaanerarneqarlutillu isertuinerarneqarput.“ — The Miami Herald, 3. januari 1988.

[Qupp. 6-mi assiliartaq]

Guutit ataasiullutillu pingasuussusiliusaliat — Ægyptenitoqqameersoq kristumiuuneraqatigiinneersorlu

[Suminngaanneernera]

Saint-Remi-mi katersugaasivik Reimsimiittoq, assiliisoq J. Terrisse Louvre, Paris

[Qupp. 10-mi assiliartaq]

Upperisarsiornerup tungaatigut pisortat kanngunartuliortartut Bibelimi puulukimut uffarsimasumut attakorsuit maralluinut niuaatarisartumut assersuunneqarput