“Guuti inooqatigaa”

NOA qeq­qaris­sivoq nukersor­nikuunermil­lu tasitsaarluni. Takorlooruk umiarsuaq sanaar­tor­neqar­toq qimerloor­niarlugu sulinermini unil­latsiariarluni paak­karum­mut silit­tumut ingit­toq. Sanaar­torfik us­serus­sun­nip­poq san­natinil­lu atuer­palun­neq tusarsaal­luni. Noap er­nini sanaar­torfiup im­mik­koor­tuini as­sigiin­ngitsuni umiarsualior­tut is­siaf­figisaminit takusin­naavai. Er­nerisa ukuaasalu nuliatalu asangaagaata ukiuni qulik­kuutaani tamaviaarlutik sanaar­toqatigisimavaat. Sanaar­tuler­tupal­laqaat, sulili naam­mas­seq­qajan­ngil­lat.

Nunaq­qataasa Noa ilaqutaalu sianiitsutut isigaat. Umiarsuup ilusinik­kiar­tor­nera ilutigalugu nunarsuarmi ulersuaqar­nis­saanik oqalun­nera il­laruaatiginerujar­tuin­nar­paat. Noap ajunaar­nersuaqar­nis­saanik mianersoq­qusinera piviusorsior­palun­ngitsutut isigalugulu tis­sigaat! Inup­pas­suit angutip inuunerminik — ilaqut­tamilu inuuneran­nik — suliamut sianiitsor­pal­lan­nerusumut taamatut inuunerminik atuerusun­nera paasisin­naan­ngilaat. Noal­li Guutia, Jehova, angum­mut taas­sumun­nga al­laanerul­luin­nar­tumik isigin­nit­taaseqar­poq.

Guutip oqaasiani ima al­las­simasoqar­poq: “Noap Guuti inooqatigaa.” (1 Mosesi 6:9) Al­las­simaf­fim­mi suna pineqar­pa? Noa Jehovalu nunarsuarmi qilam­miluun­niit inooqatigiin­nerat pineqar­nani Noap Jehovamut naalat­tuar­nera taas­sumin­ngalu ikin­ngutitut asan­ningaar­nera pineqar­poq. Ukiut tusindilip­pas­suit tamatuma kingor­na Biibilimi Noa ima al­laatigineqar­poq: ‘Up­per­nermigut silarsuaq eq­qar­tuup­paa.’ (Hebræerit 11:7) Taman­na qanoq paasisariaqar­pa? Ul­lumik­kul­lu up­per­nera qanoq ilin­niarfigisin­naavar­put?

SILARSUARMI AJOR­TUMI ANGUT AS­SUAR­NAATSOQ

Noa silarsuarmi ajorsiar­tuin­nar­tumi peroriar­tor­poq. Taamani aataq­qiia, Enoki, inuugal­larmat nunarsuarmi pis­sutsit ajorsereersimap­put. Angut taan­na, Noatut naaper­tuil­luar­tuusoq Guutimil­lu inooqateqar­toq, Guutip inun­nut guutiitsunut eq­qar­tuus­sutiminik naam­mas­sin­nik­kumaar­neranik siulit­tuisimavoq. Noal­li nalaani inuit ajor­nerulersimap­put. Inuit nakuuser­tar­nerat nalingin­naangaarmat Jehovap nunarsuaq aserorsimasutut isigaa. (1 Mosesi 5:22; 6:11; Judasi 14, 15) Inuit ajorsiar­tuin­nar­neran­nut suna pis­sutaava?

Guutip er­neri anersaajusut, in­ngilit, ilaat ajor­tun­ngoriar­tuler­put. Ataaserlu Jehovamut pikitsitsereersimavoq Guutimil­lu mamarliinermigut aam­ma Adamimik Evamil­lu ajor­tulior­titsinermigut im­minut Saatanin­ngor­til­lunilu Diaavulun­ngor­tereersimavoq. Noap nalaani in­ngilit al­lat Jehovap naaper­tuil­luar­tumik aqutsineranut pikitsitsiler­put. Qilam­mi Guutimit akisus­saaf­filer­neqarsimaner­tik sumigin­narlugu inut­tut timeqarlutik nunamut aq­qar­put ar­nal­lu pin­nersut nulis­siul­lugit. In­ngilit taak­ku makitasuut, nam­minis­sarsior­tut pikitsitsiumatuul­lu inun­nut ajor­tumik sun­niuteqar­put. — 1 Mosesi 3:1-5; 6:1, 2; Judasi 6, 7.

Tamatuma saniatigut in­ngilit inut­tut timil­lit nalingin­naan­ngitsumik ar­nanut at­taveqaler­nerat akusanik kinguaas­siuler­nermik, tas­sa angisoorujus­suar­nik nukit­toorujus­suar­nil­lu er­ner­taar­neran­nik, kinguneqar­poq. Inorujus­suit taak­ku soq­qusaatsut nunarsuarmi pis­sutsinik ajor­nerulersitsip­put. Pin­ngor­titsisup takuaa “nunarsuarmi inuit ajus­susiat angeqisoq ul­lorlu tamaat iliuuseriumasaat pilersaarusiaal­lu ajor­tuin­naasut”. Ukiut 120-t tamatuma kingor­na Jehova aalajanger­poq inuiaat ajor­tut piuneerun­niarlugit. — 1 Mosesi 6:3-5.

Silarsuarmi taamaat­tumi meeq­qanik perorsaaniar­neq ajor­nakusoorsimas­saqaaq! Pis­sutsil­lu Noap nalaani taamaap­put. Pitsaasumik nuliar­poq, 500-nil­lu ukioqarluni pingasunik er­ner­taar­poq — Semi, Kami Jafetilu.a Noap nulianilu nukap­piaraatitik avatangiisinut ajor­tunut navianar­tunul­lu il­lersor­tariaqarsimavaat. Angutit ‘pis­sarsuit’ ‘tusaamasal­luun­niit’ nukap­piarar­pas­suar­nit nuan­naar­torineqar­tar­put, Noal­lu nalaani inorujus­suit taamator­piaq it­tuup­put. Noap nuliatalu qitor­natik inorujus­suit pil­lugit tusagaqar­tar­nis­saat pin­ngitsoor­tis­sin­naan­ngilaat, kisian­ni Jehova Guuti, ajus­sutsimik sumil­luun­niit uumigin­nit­toq, ilumoor­toq pil­lugu ilin­niar­tis­sin­naavaat. Inuit nakuuser­tar­neran­nik pikitsitsisimaneran­nil­lu Jehovap aliasuutigin­nit­tar­neranik er­nitik paasin­nin­nis­saan­nut ikior­tariaqar­paat. — 1 Mosesi 6:6.

Ul­lumik­kut angajoq­qaajusut Noap nuliatalu atugaat paasil­luarsin­naavaat. Silarsuarmi inuuf­figisatsin­ni nakuuser­neq pikitsitsiumatunerlu nalingin­naap­put. Al­laat meeq­qanut aliik­kutas­siat tamak­kunin­nga ulik­kaar­tar­put. Angajoq­qaat sianisuut sapin­ngisar­tik tamaat atorlugu meeq­qatik tamak­kunun­nga il­lersor­niar­tar­paat. Taamaalior­tar­put eq­qis­sinermut Guutiusoq, Jehova, ul­lut ilaan­ni nakuuser­nermik atuuk­kun­naarsitsil­luin­nar­tus­saq pil­lugu meeq­qatik oqalut­tuut­tar­nerisigut. (Tus­siaat 11:5; 37:10, 11) Angajoq­qaat silarsuarmi ajor­tumi inuugaluarlutik meeq­qatik eq­qor­tulior­tar­nis­saan­nut ilin­niar­tis­sin­naavaat. Noak­kut iluatsil­luar­tumik perorsaap­put. Er­neri inersimasun­ngoramik naaper­tuil­luar­tun­ngor­put nuliarlutil­lu Guutimik, Jehovamik, sal­liutitsisunik.

“UMIARSUALIORIT”

Ul­lut ilaan­ni Noap inuunera al­lan­ngorluin­nar­poq. Jehovap kif­fani asasani oqaluuk­kamiuk nalunaarfigaa silarsuatoqaq suujun­naarsin­niarlugu. Guutip Noa ima peq­quaa: “Qisuk goferi atorlugu umiarsualiorit.” — 1 Mosesi 6:14.

Inuit ilaasa Noap umiarsuaa eq­qun­ngitsumik takorloor­tar­paat. Sioqaranilu aqoqan­ngilaq, kujaaqaranilu aquuteqan­ngilaq aam­ma najunganeqaranilu qatinganeqan­ngilaq. Karsersuar­tut iluseqar­poq. Jehovap Noa oqarfigaa umiarsuaq qanor­piaq takis­suseqas­sal­lunilu iluseqas­sal­lunilu us­serin­neqas­sasoq. Sooq Noa umiarsualius­sanersoq ima nas­suiar­paa: “Nunarsuarmi ulersuar­titsiumaar­punga . . . nunarsuarmiit­tut tamarmik nungutitaas­sap­put.” Taamaak­kaluar­torli Jehovap Noa ima peq­quaa: “Umiarsuarmut ikis­saatit er­nitit nulial­lu ukuatil­lu ilagalugit.” Noap aam­ma uumasut tamalaat umiarsuarmut ikeqatigis­savai. Umiarsuarmut ikisut kisimik ulersuarmit aniguis­sap­put. — 1 Mosesi 6:17-20.

Noa imaan­naan­ngitsumik sulias­saqar­poq! Umiarsuaq angisoorujus­suusus­saavoq — 133 meterit mis­saan­ni takis­suseqas­saaq, 22 meterit mis­saan­ni silis­suseqas­saaq 13 meteril­lu mis­saan­ni takis­suseqas­sal­luni. Nalitsin­ni qisum­mik umiarsualianit anginer­paanit al­laat anginerujus­suuvoq. Noap sulias­sani suliarinaveersaar­paa, sulias­saq ajor­nar­pal­laar­nerarlugu naam­magit­taal­lior­pa imaluun­niit umiarsualior­nis­sani ajor­nan­ngin­nerulersin­niarlugu ilitsersuutit an­nikitsualut­tor­tai al­lan­ngor­tip­pai? Apeq­qutit taak­ku Biibilimi ima akineqar­put: “Noa Guutip peq­qusineratorluin­naq ilior­poq.” — 1 Mosesi 6:22.

Ukiuni qulik­kuutaani, im­maqa ukiut 40-t 50-il­lu akor­nan­ni, umiarsualior­put. Noak­kut or­pin­nik up­pititsisus­saap­put, as­sar­tuisus­saap­put, kil­luisus­saap­put katiterisus­saal­lutil­lu. Umiarsuaq quleriin­nik pingasunik initaqas­sal­lunilu arlalin­nik im­mik­koor­tor­taqas­sal­lunilu sinaatigut matoqas­saaq. Umiarsuup qaavata-tungaa tamaat kaajal­lal­lugu igalaaqarsimagunar­poq, imerlu kuutsin­neqarsin­naanias­sam­mat qeq­qatigut sivinganeqalaarsimasin­naavoq. — 1 Mosesi 6:14-16.

Ukiut ingerlanerini umiarsualial­lu ilusinik­kiar­tor­nerani Noap ilaqut­taminit tapersersor­neqar­nini qujamasuutigingaarsimas­savaa. Sulias­samul­li tun­ngatil­lugu al­lamik, umiarsualior­nermit suli unam­miniar­nar­nerungaarunar­tumik, sulias­saqar­poq. Biibilimi al­las­simavoq Noa tas­saasoq ‘iluar­nermik oqaluus­sisoq’. (2 Petrusi 2:5, 1936) Sapiil­luni inuit ajor­tut guutiitsul­lu ajunaar­nersuaqar­tus­saaneranik mianersoq­quai. Mianersoq­qusai tusaarusup­pat? Ukior­pas­suit tamatuma kingor­na Noap nalaani inuusimasut Jiisusip eq­qumaniarsiman­ngin­nerar­pai. Oqar­poq ul­luin­nar­ni pisar­tunik — nerinermik, imer­nermik aap­par­taar­nermil­lu — ulap­puteqar­pal­laar­ner­tik pis­sutigalugu Noamut tusar­naan­ngitsut. (Mat­thæusi 24:37-39) Qular­nan­ngitsumik Noak­kun­nik il­laruaatigin­nit­tarsimas­sap­put; im­maqalu al­laat sioorasaar­tarsimas­sal­lugil­lu nakuuserfigisarsimas­savaat.

Noak­kul­li tun­niutiin­nan­ngil­lat. Inuunermin­ni pingaar­ner­paatitar­tik — umiarsualior­neq — aal­lutiin­nar­paat, naak suliaat itsaq inuusunit soqutaan­ngitsutut, sianiitsor­pal­lan­nerusutut kuk­kunerujus­suar­tul­lu isigineqaraluar­toq. Ul­lumik­kut ilaqutariit kristumiut Noap ilaqutaasalu up­per­nerat ilin­niarfigingaarsin­naavaat. Biibili naaper­torlugu ‘ul­luni kingul­ler­ni’, tas­sa pis­sutsit aaq­qis­suus­saanerata naggatis­saani, inuuvugut. (2 Timotheusi 3:1) Jiisusip ul­lutsin­ni pis­sutsit Noap umiarsualior­nerata nalaani pis­sutsinut as­singunerar­pai. Ul­lumik­kut inuit Guutip naalagaaf­fia pil­lugu tusarlius­samik soqutigin­nin­ngik­kaangata, il­laruaatigin­nik­kaangata im­maqalu al­laat uagutsin­nik malersuileraangata Noamik eq­qarsaatigin­nit­tar­neq iluaqutigis­savar­put. Taamatut misilin­neqar­neq takor­nar­taan­ngilaq.

“UMIARSUARMUT IKIAR­TORITSI”

Ukiut ingerlaler­toqaat umiarsuarlu kiisami inaar­neqangajaler­poq. Noa 600-liingajalerluni asasami ilaat toquk­kut an­naavai. Siul­lermik angutaa, Lemeki, toquvoq.b Ukiut tal­limat tamatuma kingor­na aataava, Metusalemi, 969-inik ukioqarluni — Biibili naaper­torlugu ukioq­qor­tuner­paal­luni — toquvoq. (1 Mosesi 5:27) Inuup siul­liup, Adamip, Metusalemi Lemekilu angumerai.

Ukiumi tamatumani ataataaner­paaq Noa Jehovamit Guutimit tusarlius­samik nutaamik ima nalunaarfigineqar­poq: “Umiarsuarmut ikiar­toritsi, il­lit ilaqut­tatil­lu tamas­si.” Tamatuma saniatigut Guutip Noa oqarfigaa uumasut tamalaat as­sigiin­ngitsut — minguitsut, kingusin­nerusuk­kut pil­liutigineqarsin­naasut, arfineq-marluk­kuutaat uumasul­lu sin­neri marluk­kuutaat — umiarsuarmut ikeqatigis­sagai. — 1 Mosesi 7:1-3.

Pisoq puiunaatsuusimas­saaq! Uumasut tamalaaneersut hundredik­kuutaat as­sigiin­ngitsunik angis­susil­lit ilusil­lil­lu as­sigiin­ngitsunik pis­susil­lit — pisul­lutik, tim­mil­lutik, paarmorlutik, orraal­lutik arriitsumil­luun­niit pisul­lutik — umiarsuarmukarras­simas­sap­put. Noap uumasut nujuar­tat umiarsuarmut kil­lilim­mik inis­salim­mut ikitin­niarlugit katersor­niarsarisimanaviar­nagil­lu malersorsimanaviar­nagil­lu pisariniarsarisimanavian­ngilai. Biibilimimi al­las­simavoq uumasut ‘umiarsuarmut ikisut’. — 1 Mosesi 7:9.

Oqalut­tuamik up­perin­nin­ngitsut im­maqa ima aperis­sap­put: ‘Ilumut taamaat­toqarsin­naagami? Qanoq uumasut tamarmik umiarsuarmi taama inis­sakitsigisumi eq­qis­seqatigiis­sin­naagamik?’ Una eq­qarsaatigiuk: Qilam­mik nunamil­lu Pin­ngor­titsisup uumasut pin­ngor­tis­simasani aqus­sin­naavai, soorlu nujuitsun­ngor­tin­nerisigut imaluun­niit naalatsik­kuminar­tun­ngor­tin­nerisigut? Eq­qaamas­savat Jehova Im­mamik Aap­palaar­tumik avitsitsinikuul­lunilu seqinermik unitsitsinikuum­mat. Noa pil­lugu oqalut­tuami al­laatigineqar­tut tamaasa iliuuserisimasin­naavai? Soorunami iliuuserisin­naavai, taamaalior­porlumi!

Soorunami Guutip uumasut al­latut aniguisis­sin­naagaluar­pai. Guuti silatusaarluni aalajanger­poq nunarsuarmi pin­ngor­titanik tamanik isumas­suinis­samut tun­ngatil­lugu inun­nik akisus­saaf­filiisimanerminut naaper­tuut­tumik periuseqar­niarluni. (1 Mosesi 1:28) Ul­lumik­kut angajoq­qaar­pas­suit meeq­qatik Jehovap uumasunik inun­nil­lu pin­ngor­tis­simasaminik pingaar­titsingaar­neranik ilin­niar­tileraangamik­kit Noa pil­lugu oqalut­tuaq ator­tar­paat.

Jehovap Noa ul­lut arfineq-marluk qaangiup­pata ulersuaqarumaar­neranik oqarfigaa. Ul­lut taak­ku ilaqutariin­nut ulapaarfiusimas­sap­put. Takorloorsin­naavar­put uumasut neruk­kaatis­sal­lu ilaqutariil­lu pisataat umiarsuarmut torersumik inis­sititer­nis­saat suliarujus­suusimas­sasoq. Noap nuliata aam­ma Semip, Kamip Jafetil­lu nuliaasa umiarsuaq najoruminarsar­niarlugu qular­nan­ngitsumik ulapit­tarsimas­sap­put.

Nunaq­qataasami pisoq qanoq isumaqarfigaat? Jehovap Noamik suliaanil­lu pil­luaq­qusisimaneranut up­per­narsaatis­sar­pas­suaqaraluar­toq eq­qumanian­ngil­lat. Uumasut umiarsuarmukarrat­tut maluginian­ngitsoorsimanavian­ngilaat. Soqutigisaqan­ngitsuunerat tupaal­laatigisariaqan­ngilar­put. Taamatut­taaq ul­lumik­kut inup­pas­suit pis­sutsit aaq­qis­suus­saanerata naggataani inuunitsin­nut up­per­narsaatis­sar­pas­suit eq­qumaniarfigineq ajor­paat. Apustilip Paulusip siulit­tuisimaneratut mital­lersut, Guutip mianersoq­qus­sutaanik eq­qumaf­figin­nit­tunik il­laruaatigin­nit­tut, ‘tikiutereersimap­put’. (2 Petrusi 3:3-6) Qular­nan­ngitsumik aam­ma Noak­kut il­laruaatigineqar­tarsimas­sap­put.

Qanga Noak­kut inun­nit il­laruaatigineqarun­naar­pat? Biibilimi al­las­simavoq Noap ilaqut­tani uumasul­lu umiarsuarmut ikeqatigereermagit Jehovap ‘umiarsuup matua matugaa’. Noamik il­laruaatigin­nit­tut pisoq qanimut malin­naaf­figisimagunik­ku Guutip matumik matusinera oqaasis­saarus­sutigisimas­savaat. Taamaan­ngip­pat sial­lilermat nipaarul­luin­narsimas­sap­put — sialus­sualer­pormi! Jehoval­lu oqarsimaneratorluin­naq nunarsuup tamarmi qarsun­neqar­nis­saata tungaanut sialus­suar­poq. — 1 Mosesi 7:16-21.

Jehovap guutiitsut toqunerat iluaraa? Naamik! (Ezekieli 33:11) Akerlianik im­minut saan­nis­saan­nut eq­qor­tuliuler­nis­saan­nul­lu periarfis­seqat­taarsimavai. Aniguisin­naajumal­lutik inooriaatsimin­nik al­lan­ngor­titsisin­naasimagaluar­pat? Noap inooriaasia apeq­qum­mut tamatumun­nga akis­sutaavoq. Jehovamik inooqateqar­nermigut, taas­sumun­nga sutigut tamatigut naalan­nermigut, aniguisoqarsin­naasoq Noap ersersip­paa. Taamaalil­luni oqar­toqarsin­naavoq Noap up­per­nermigut silarsuaq eq­qar­tuuk­kaa; tas­sa kinguaariit ajus­susiat qulaaraa. Noa up­persuseqarmat ilaqut­tanilu aniguisin­neqar­put. Noap up­persusia malik­kuk­ku im­minut an­nas­sin­naal­lutil­lu asasatit an­nan­neqar­tis­sin­naavatit. Noatut Jehova Guuti inooqatigisin­naal­lugulu ikin­ngutigilersin­naavat. Naas­saan­ngitsumil­lu ikin­ngutigiis­sin­naavusi!