Sooq Noa Guutimit iluarisaasoq — qanoq ilinniarfigisinnaagipput

AMERLANERSATTA nutaarsiassamik pingaarutilimmik tusarlerneqarnitta nalaani pisut eqqaamasinnaavaat. Sumiinnerput sulerinerpullu kisiisa pinnagit, aammali qanoq periarnerput eqqaamavarput. Qularnanngilaq Noap Jehova Guutimit, silarsuarmi Kisimi Oqartussaasumit, nutaarsiassamik pingaaruteqangaartumik ulloq tusarlerneqarfini puiunngisaannaraa. Jehova oqarpoq aalajangersimalluni nunamiittut „anersaartornermik uumassutaasumik peqartut“ nungutinniarlugit. Noa oqarfigineqarpoq nammineq, ilaquttami uumasullu assigiinngitsukkuutaat tamarmik annaanneqaatissaannik angisoorsuarmik umiarsualiussasoq. — 1 Mosesi 6:9-21.

Noa qanoq piva? Nutaarsiassaq taanna nuannaarutigaa, naammagittaalliuutigaaluunniit? Nuliani qitornanilu nutaarsiassamik qanoq oqaluttuuppai? Biibilimi tamakku oqaatigineqanngillat. Ima allassimaannarpoq: „Noa Guutip peqqusineratorluinnaq iliorpoq.“ — 1 Mosesi 6:22.

Tamanna paasissutissaavoq pingaaruteqartoq, paasinarsisitseqataavormi sooq Noa Guutimit iluarisaanersoq; Noa Guutimit qinnuigineqarnermisut iliornissaminut piumassuseqarpoq. (1 Mosesi 6:8) Noap Guutimit iluarisaaneranut aamma suna pissutaava? Tamatuma akissutaata ilisimanissaa uagutsinnut pingaaruteqarpoq, Guutimmi nunarsuaq ajussusiiaqqippagu aniguissagutta Noatut ittuusariaqarpugut. Ulersuaq sioqqullugu inuuneq Noamut qanoq issimanersoq sammeqqaariartigu.

Anersaapiluit nunamut aqqartut

Inuiaat oqaluttuarisaaneranni siusissukkut Noa inuuvoq. Inuup siulliup pinngortitaaneranit ukiut tusindit missaat qaangiuttut inunngorpoq. Inuppassuit takorluugaannit allaanerulluni taamanikkut inuit tassaanngillat meqqullit, qaarusummiut siumut peqingallutik anaatamik tigumiarlutik pisuttartut. Nassaartoqarsimavoq sakkunik saviminermik kanngussammillu sanaanik, Noallu umiarsualiornermini sakkut taamaattut atorsimasinnaavai. Aamma nipilersuutinik sanasoqartarsimavoq. Inuit katittarput, ilaqutaqalertarput, naatitanik naatitsisarput uumasuuteqartarlutillu. Tuniniaasarput pisisarlutillu. Tamakkunuunatigut ullumikkut inuuneq taamanikkut inuunermit allaanerungaanngilaq. — 1 Mosesi 4:20-22; Lukasi 17:26-28.

Allatigut allaanerulluinnarpoq. Allaassutit ilagaat inuit sivisunerujussuarmik inuusarnerat. Allaat inuit ilaat 800-t sinnerlugit ukioqalertarput. Noa 950-inik ukioqalerpoq; Adami 930-nik Metusalemilu, Noap aataava, 969-inik.a — 1 Mosesi 5:5, 27; 9:29.

Allaanerussutaasoq pingaarutilik alla Mosesimik allakkani siullerni 6:1, 2-mi ima allaatigineqarpoq: „Inuit nunarsuarmi amerliartorlutik panissaartalermata guutit ernerisa inuit panii isigilerpaat pinnaralugit pileritsaassatillu nulissiuttarlugit.“ ’Guutit erneri’ taakkua inngiliupput qilamminngaaneersut inuttut timeqalersimasut nunamilu inuusut. Guutimit nunamut aallartitaanngillat; aamma nunarsuarmukanngillat inunnut iluaqutaaniarlutik. Qilammi ’inigisassaraluaminnik qimatsipput’ arnanik pinnersunik nunarsuarmiittunik kinguaassiuutitigut atoqateqarniarlutik. Anersaapilunngorput. — Judasi 6.

Anersaapiluit pikitsitsiumatuut kanngunartuliorumatuullu taakkua inunnit pissaaneqarnerullutillu silassorinnerusut aseruutaasumik sunniuteqarput. Ilimanarluinnarpoq inuiaqatigiit naalakkersorlugillu naalagarsiortitarisimagaat. Isertuussillutik pinngillat, pinerluttutut peqqusersuutut kinaassutsiminik iliuutsiminillu ajortunik isertuussisutut periaaseqarlutik. Kanguttaallutilli isertuanngilluinnarlutik Guutip aaqqissuussineranut pikitsitsipput.

Guutip erneri qilammiusut taakkua arnanik kinguaassiuutitigut atoqateqarput, arnallu qitornartaarput inersimaleramik nakuarsuanngortunik. Ima allassimavoq: „Taamani guutit ernerisa inuit panii innaattarallarmatigit qitornartaarfigalugillu — kingornalumi aamma — nunarsuarmi inorujussuaqartarpoq. Tassaapput pissarsuit itsarsuarli tusaamasat.“ (1 Mosesi 6:4) Inorujussuit taakkua siooraginissaannut pissutissaqarluarpoq. Inuartuupput nakuuserajuttuullutik qularnanngitsumik oqaluttuatoqqani itsarnittani oqaluttuareqqinneqarlutik.

Naapertuilluartunut naalliuutaasoq

Taakkua nalaat pillugu Biibilimi allaatigineqartoq ukiorpassuarni ajussuseqangaarneranik oqaluttuaavoq. Allassimavoq ’nunarsuarmi inuit ajussusiat angeqisoq ullorlu tamaat iliuuseriumasaat pilersaarusiaallu ajortuinnaasut, . . . nakuusernernik ulikkaarluni. . . . Nunarsuarmi inuit tamarmik aseruutaasumik iliuuseqarmata’. — 1 Mosesi 6:5, 11, 12.

Silarsuaq Noap inuuffigisaa taamaappoq. Inunnit avatangiisigisaminiittunit tamanit allaanerulluinnarluni „Noa angutaavoq iluartoq“ ’Guutimik inooqateqartoq’. (1 Mosesi 6:9) Inuiaqatigiinni naapertuilluanngitsuni inuuneq angummut naapertuilluartumut imaannaanngitsuuvoq. Noap isigisani tusaasanilu aliasuutigisimassaqai. Lotip, angutip naapertuilluartup Ulersuup kingorna inuusup, misigineratut misigisimassaaq. Loti, Sodomami innuttaasut ajortunngorsimasut akornanni inuusoq, ’inuit soqqusaatsut inuunerlunnerannit atugarliortitaavoq’, „angut iluartuusoq taanna taakkua akornanni najugaqartoq ullut tamaasa tarnimigut iluartukkut erloqissuteqartarpoq iluaatsuliornerit tusartakkani takusartakkanilu pissutigalugit“. (2 Petrusi 2:7, 8) Aamma Noa taama misigisarsimassaaq.

Annilaarnartut tusagassiuutitigut tusartakkavut inuilluunniit avatangiisigisavit pissusilersornerat eqqissiunnaarutigisarpiuk? Taamaappat Noa paasilluarsinnaavat. Takorlooriaruk taassumunnga ukiuni 600-ni, ulersuarmi nalliummat taama utoqqaatigaaq, silarsuup naapertuilluanngiffiusup naammagittarfiginissaa qanoq sapernartigisimassasoq. Ajussuseerunnissaa erinigisimassaqaa. — 1 Mosesi 7:6.

Noa allanit allaanerunissaminut sapiissuseqarpoq

Noa ’naligisami akornanni assuarnaatsumik inuuseqarpoq’. (1 Mosesi 6:9) Malugiuk Biibilimi allassimasoq naligisami akornanni, taakkua isaanniunngitsoq, assuarnaatsumik inuuseqartoq. Allatut oqaatigalugu: Guutip isaani assuarnaatsuuvoq, inunnilli Ulersuaq sioqqullugu inuusunit eqqumiigineqarpoq. Qularutigisariaqanngilarput amerlanerusunut maleruutiinnanngitsoq taamanikkulluunniit guutiitsut aliikkusersuutaannut inuiaqatigiillu sammisartagaannut akuliuttarsimassanngitsoq. Takorlooruk umiarsualiorluni aallartikkami inunnit qanoq isigineqarsimanersoq. Qularnanngitsumik quiasuutigaat illaruaatigalugulu. Upperinngilaat.

Aammattaaq Noa upperluartuuvoq, upperisanilu nipangiusimaannanngilaa. Biibilimi allassimavoq taanna ’iluarnermik nalunaariartortitaasoq’. (2 Petrusi 2:5) Qularnanngilaq Noap assortorneqarnissani ilimagigaa. Aataqqiutaa Enoki angutaavoq naapertuilluartoq Guutip inunnut ajortunut eqqartuussutiminik naammassinninnissaanik siulittuisoq. Tamanna Enokip malersugaassutiginnguatsiarpaa, akerlilersuisiminilli toqutaanissaa Guutip akuerinngilaa. (1 Mosesi 5:18, 21-24; Hebræerit 11:5; 12:1; Judasi 14, 15) Saatanimit, anersaapilunnit inorujussuarnillu kiisalu inunnit soqutiginninngitsunit toqqaannartumilluunniit akeqqersimaartunit akerlilersorneqarluni, Noap aamma pisariaqartippai sapiissuseqarnissaq Jehovallu imminik illersuisinnaaneranik upperinninnissaq.

Guutip kiffai taassumunnga kiffaanngitsunit akerlilersorneqartuaannarsimapput. Allaat Jiisusi Kristusi uumissorneqarpoq, ajoqersugaalu aamma taamatut pineqarput. (Matthæusi 10:22; Johannesi 15:18) Noa Guutimut kiffartornissaminut sapiissuseqarpoq, naak taamaaliorneq nuannarineqanngikkaluartoq. Paasivaa Guutimit iluarisaaneq pingaarnerungaartoq, Guutimut akeqqersimaartunit akuerineqarnissaminngarnit. Noalu Guutimit iluarisaavoq.

Noa eqqumaffiginnippoq

Soorlu takoreeripput, Noa sapiilluni allanut oqaluussivoq. Tusarliussaq qanoq iliuuseqarfigaat? Biibilimi allassimavoq Ulersuaq sioqqullugu inuit ’nerillutillu imerlutillu nuliartaarlutillu uinitsitsisartut ulloq Noap umiarsuarmut ikiffia tikillugu; aatsaallu paasisaqalersut ulersuaq nalliummat tamaasalu nungutillugit’. Mianersoqqussut sumiginnarpaat. — Matthæusi 24:38, 39.

Jiisusi oqarpoq nalitsinni aamma taamaassasoq. Ukiut hundredit sinnilaarlugit Jehovap Nalunaajaasuisa mianersoqqussutigigaat Jehova silarsuarmik nutaamik naapertuilluarfiusumik pilersitsiumalluni neriorsuumminik eqquutitsiumalluni allannguerujussuarumaartoq. Inuit millionillit mianersoqqussummut ajunngitsumik periarput, nunarsuulli inui milliardillit eqqumaffiginninngillat. „Namminneq kissaatigisartik malillugu“ (NV) Ulersuup ilumut pisimanera tamatumalu isumaa sianiginngitsuusaarpaat. — 2 Petrusi 3:5, 13.

Noali eqqumaffiginnippoq. Jehovap imminut oqaaserisimasai upperai. Naalannini annaanneqaatigaa. Apustili Paulusi ima allappoq: „Uppernikkut Noa ilimasaarneqarpoq suli takussaanngitsumik, Guutimillu mianerinnittuugami umiarsualiorpoq inoqutimi annaffissaannik.“ — Hebræerit 11:7.

Maligassiuineq malittariaqagarput

Noap umiarsualiaa, angisoorujussuusimavoq — isikkamik arsaattarfimmit takinerulluni illorsuarmillu pingasunik quleriiaanik initalimmit portunerulluni. Umiarsuaaqqamit Wyoming-imit, angallatit qisummik sanaajusut takinersarigunagaannit, 30 meterit sinnerlugit takineruvoq. Noalli umiarsuaa umiarsuartut allatut sanaajunani puttaannartussiaavoq. Taamaattoq sanariaaseq siuarsimalluinnartoq atorlugu sananeqarpoq. Aamma ilua qaavalu usserineqartussaapput. Immaqa ukiut 50-it sinnerlugit sananeqarpoq. — 1 Mosesi 6:14-16.

Tamannaannaanngilarli. Noa ilaquttami uumasullu ukiumi ataatsimi nerisassaannik peqqumaatissarsiortariaqarpoq. Ulersualertinnagu uumasut katersoriarlugit umiarsuarmut ikitinneqartariaqarput. „Noa [Jehovap] peqqusineratorluinnaq iliorpoq.“ Tamarmik piareermata Jehovallu umiarsuup matua matummagu oqiliallassimassaqaaq. — 1 Mosesi 6:19-21; 7:5, 16.

Ulersuaq nalliuppoq. Ullut unnuallu 40-t siallerpoq. Nuna immamit qarsussimajunnaarserlugu inuit uumasullu ukioq ilivitsoq umiarsuarmiiginnartariaqarput. (1 Mosesi 7:11, 12; 8:13-16) Inuit ajortut tamarmik ajunaarput. Noa ilaqutaalu kisimik annapput nunamilu minguiarsimasumiilerlutik.

Biibili naapertorlugu Noap nalaani nunarsuaq tamakkerlugu ulersuaqarnerani pisut ’sioorasaarutaapput’. Qanoq? Ima allassimavoq: „Qilaat nunalu maannakkut ittut . . . atatinneqarput utaqqisitaallutillu ullormi eqqartuussivissami iluaatsut nungutitaanissaanni ikuallagaanissaminnut.“ Noalli nalaanisulli aniguisoqassaaq. Qularissanngilarput ’Jehovap mianerinnitsini ussernartunit aniguisinneq sapinngikkai’. — 2 Petrusi 2:5, 6, 9; 3:7.

Noa angutaavoq Guutimik mianerinnittoq naapertuilluartorlu kinguaariit ajortunngorsimasut akornanni inuusoq. Tamatigorluinnaq Guutimut naalappoq. Eqqortumik iliornissaminut sapiissuseqarpoq, nalunngikkaluarlugu Guutimut kiffaarusunngitsunit asissorneqassalluni uumissorneqassallunilu. Tamakkunuunatigut Noa ilaarutsigu, aamma uagut Guutimit iluarisaassaagut aniguisitaanissarlu neriuutigisinnaallutigu silarsuassamilu nutaami piviusunngungajalersumi inuusinnaalluta. — Tussiaat 37:9, 10. (wp08 06/01-E)

[Quppernerup ataani ilanngussaq]

[Qupp. 5-mi assiliartaq]

Inorujussuit nakuuserumatuujunerat qularnanngitsumik oqaluttuatoqqani itsarnitsani oqaluttuareqqinneqarpoq

[Suminngaanneernera]

Alinari/​Art Resource, NY

[Qupp. 7-mi assiliartaq]

Noatut uppissuseqarnitsigut Guutimit iluarisaasinnaavugut