Ajoqersuisooqqusersut mianersorfigisigik!
’Ilississaaq ajoqersuisooqqusersunik ilaqarumaarpusi.’ — 2 PÎTRUSE 2:1.
1. Judasip suna allaaserissamaarsimagaluarpaa, aammalu sooq allamik allaaserisaqaannarpaa?
IASILARALUTTUAQ! Ukiuni hundredelinni siullerni ilagiinni kristumiuni ajoqersuisooqqusersut! (Matîuse 7:15; apustilit suliait 20:29, 30) Jesusip affarmik qatanngutaata Judasip tamanna arajutsisimanngilaa. Taanna oqarpoq ’annaqatigiinnissartik’ pillugu uppeqatiminut allannissani siunertarisimagaluarlugu, nangillunili ima nassuiaalluni: ’Oqaaqqissaarumallusi allaffigisariaqartippassi upperisassaq iluartunut tunniussaareersoq assoruutigeqqullusiuk.’ Sooruna Judasip isummani allanngortissimagaa? ’Inuinngooq . . . Guutitta saammaanneranik kanngunartuliornermut atornerluisut’ ilagiit akornanniilersimammata. — Jûtarse 3, 4.
2. Sooq Pîtrusip agdlagaisa áipait, kapitali 2, aamma Jûtarsip agdlagai imminnut taama assingutigippat?
2 Judas Peterip aappassaanik allannerata kingunitsianngua allassimagunarpoq. Qularnanngitsumik Peterip allagai nalunngilluarpai, namminermi allakkamini kimittuuni oqaassutaasunilu eqqarsaatinik Peterip saqqummiussimasaasa assinginik amerlasuunik saqqummiussuivoq. Taamaattumik Pîtrusip agdlagaisa áipait, kapitali 2, misissorutsigu paasissavarput qanoq Jûtarsip agdlagai-nut assingutigisut.
Ajoqersuinerlunnerup kingunera
3. Itsaq pisimasut suut Peterip uteqqissanerarpai?
3 Qatanngutini siulittuutinik arajutsinaveersaarnissaannik kajumissaareeramigit Peter ima oqarpoq: ’Inuilli [Israelikkut] aamma pruffiitioqqusersunik ilaqarput, soorlu ilississaaq ajoqersuisooqqusersunik ilaqarumaartusi.’ (2 Pîtruse 1:14–2:1) Guutip itsaq innuttai siulittuutinik ilumoortunik pisarsimapput, aammali pruffiitioqqusersut ajoqersuinerluutaannit sunnerneqarsimallutik. (Jeremia 6:13, 14; 28:1-3, 15) Jeremias ima allassimavoq: „Jerusalaalli pruffiitertaani suli ajornerusumik takusaqarpunga: Allasiorlutik arnerisarput sallutuujullutillu.“ — Jeremia 23:14.
4. Sooq ajoqersuisooqqusersut suujunnaarsinneqartariaqarpat?
4 Ajoqersuisooqqusersut ilagiinni qanoq sunniinissaat pillugu Peter ima allappoq: ’Taakkua immikkoorniaqatigiit aserornartut aggiussavaat Naalagarlu [Jesus Kristus] pisiarinnitsertik allaat miserratigissallugu, imminnut pinasuartumik aseruutissiorlutik.’ (2 Pîtruse 2:1; Jûtarse 4) Ukiuni hundredelinni siullerni immikkoorniaqatigiit inaarutaasumik inernerat tassaavoq ullumikkut kristumiuunerartut nalunngisavut. Peterip ersersippaa sooq ajoqersuisooqqusersut suujunnaarsitaasariaqartut: ’Kanngunartuliornerisigullu amerlasuut malissavaat sallusuissut aqqutigisassaq mitagaalersillugu.’ — 2 Pîtruse 2:2.
5. Ajoqersuisooqqusersut qanoq sunniisimappat?
5 Tassagooq ajoqersuisooqqusersut sunniinerata kingunerisaanik ilagiinniittut amerlasuut kanngunartuliornermut ilaaqqutissapput. Griikerit oqaasiat ’kanngunartuliornermik’ tassani nutserneqartoq isumaqarsinnaavoq soqqusaassuseq, imminut naalakkersinnaannginneq, assuarnassuseq, inuunerlunneq. Peterip siusinnerusukkut eqqaareerpaa kristumiut ’aserornartut silarsuup pii pileritsannartut nigorsimagaat’. (2 Pîtruse 1:4) Ilaalligooq ajortunngorsimanermut tamatumunnga uteqqissapput, tamatumunngalu pisuunerpaasut tassaassapput ilagiinni ajoqersuisooqqusersut. Tamatuma kingunerisaanik sallusuissutip aqqutaa tusaamanerlugaalissaaq. Ila ajussusia! Tamatumani pineqarpoq ullumikkut Jehovap nalunaajaasuisa tamarmik eqqumaffigilluinnartariaqagaat. Puiunngisaannassavarput ileqqulersornitsigut Jehova Guuti taassumalu innuttai kanngunarsarsinnaagatsigik imaluunniit nersorneqaatississinnaallugit. — Ussatit 27:11; Rûmamiut 2:24.
Ajoqersuinerluutit qanoq pilersartut
6. Ajoqersuisooqqusersut sumik pissutiginiagaqarpat, qanorlu iliorlutik anguniagartik anguniartarpaat?
6 Ajoqersuisooqqusersut eqqarsaatiminnik aserornartunik qanoq iliorlutik sunniiniartarnerat eqqumaffigissagutsigu silatusaassaagut. Siullermik Peter oqarpoq nipaatsumik taamaaliortartut, imaluunniit peqqusersuumik malunnanngitsumillu. Taava oqaatsini ima ilavai: ’Oqaatsinik salloqittaaniutinik iluaqutissarsiffiginiassavaasi.’ Ajoqersuisooqqusersut namminissarsiornermit killinneqarlutik iliuuseqartarput, tamannalu nutsikkami The Jerusalem Bible-mi allassimaffiup tamatuma nutserneqarneratigut erseqqissarneqarpoq: „Oqaatsiminnik peqqusersuunik pisiariniarsuataassavaasi.“ James Moffattip ima nutsersimavaa: „Peqqusersuumik tunngavilersuuserlutik pilerissutsiminni atornerlunniassavaasi.“ (2 Pîtruse 2:1, 3) Ajoqersuisooqqusersut oqaasii anersaakkut mianersunngitsumut immaqa eqqortutut nipeqarsinnaapput, oqaatsitilli aaqqissuuteqqissaartarpaat inuit ’pisiariumallugit’ taamaalillutillu tammartillugit namminneq namminissarsiortutut salloqittaagajuttutullu anguniakkaminnut iluaqutissamik.
7. Filosofii suna ukiuni hundredelinni siullerni siaruarsimava?
7 Ukiuni hundredelinni siullerni ajoqersuisooqqusersut taamanikkut eqqarsariartaasiusumit qularnanngitsumik sunnersimaneqarput. Peterip allannerata nalaani filosofii gnosticismemik taaguutilik siarualeruttorpoq. Gnostikerit isumaqarput suut tigussaasut tamarmik ajortumit pisut, anersaamullu tunngasut kisimik ajunngitsuusut. Taakkua ilaat oqarniartarput timi qanorluunniit pigaluallaraanni soqutaanngitsoq, ullummigooq arlaanni pigiunnaartussaagamikku. Taamaattumik isummerput uinikkut ajortuliat, ilaatigut kinguaassiuutitigut ileqqorlunneq, ajoqutaanngitsut. Isummat tamakku kristumiussutsimik nassuerutiginnittut ilaannik sunniilersimagunarput.
8, 9. (a) Eqqarsariaaseq mumingasoq suna ukiuni hundredelinni siullerni kristumiut ilaannik sunniisimava? (b) Judas naapertussagaanni ilagiinniittut ilaat qanoq iliortarsimappat?
8 Biibilimik paasiniaasartoq oqarsimavoq ’taakkua oqaluffeqarfimmi saammaanneq pillugu ajoqersuut mumitissimagaat’. (Evfisumiut 1:5-7) Biibilimik paasiniaasartoq taanna naapertussagaanni imatut oqartarsimapput: „Oqarpit Guutip [saammaannera] ajortulianik sunilluunniit matusinissamut naammattumik angissuseqartoq? . . . Taava ajortuliortuarniarta, Guutimmi [saammaannerata] ajortuliat suulluunniit piiarsinnaavai. Ajortuliornerujartortillutami Guutip [saammaannera] naammassisaqarnerujartorsinnaassaaq.“ Eqqarsartaatsimik suli muminganerusumik nassaassaqarnerpa?
9 Guutip naakkinnissusia pillugu isuma kukkusoq tamanna apustilip Paulusip akerlilerpaa ima aperaluni: ’Ajortuliortuaannassanerpugut saammaanneq malunnangaaleqqullugu? . . . Inatsisit pinnatik saammaannerup qulangermatigut ajortuliussanerpugut?’ Paulus nammineq naqissuserlugu ima akivoq: ’Ajornaqaaq!’ (Rûmamiut 6:1, 2, 15) Judasip oqarneratut ’Guutitta saammaanneranik kanngunartuliornermut atornerluisoqarsimavoq’. Taakkuli eqqarsaatigalugit Peterip erseqqissarpaa ’aseruutissaat pinasaanngitsoq’. — Jûtarse 4; 2 Pîtruse 2:3.
Pisimasut anusinngorsaatissaasut
10, 11. Pisimasut anusinngorsaatissaasut suut Peterip saqqummiuppai?
10 Piaaralutik ajortuliortuartunik Guutip iliuuseqarfiginninnissaa erseqqissarniarlugu pisimasut anusinngorsaatissaasut pingasut Allakkani Illernartuni eqqartorneqartut Peterip eqqartorpai. Siullermik ima allappoq: ’Guutip inngilit ajortuliorsimasut [asattuussimanngilai, NV].’ Judasip taakku oqaatigai ’pissusereqqaagartik aalajangerfiginagu [qilammi] inigisartik qimassigaat’. Ulersuaqarnissaa sioqqullugu nunarsuarmukarsimapput inuttullu timeqalerlutik inuit panii kinguaassiuutitigut atoqatigisinnaajumallugit. Eqqunngitsumik pissusissamisuunngitsumillu ileqqulersornertik pillugu pillaatisiatut ’itinersuarmut’ iginneqarput, imaluunniit Judasip oqaluttuaa naapertussagaanni ’tarrup ataani qilersorsimattuinnarneqalerput ullussarsuaq eqqartuutiffissaq nalliutserlugu’. — 2 Pîtruse 2:4; Jûtarse 6; 1 Moses 6:1-3.
11 Aappassaanik Peterip inuit Noap nalaani inuusut innersuussutigai. (1 Moses 7:17-24) Oqarpoq Noap nalaani Guutip ’silamiut siulliit [asattuussimanngikkai, NV] . . . ulersuaq silamiunut iluaatsunut nalliutitikkamiuk’. Kiisalu Peter allappoq Guutip ’illorpassuaqarfiit Sodoma Gomorralu arsaannanngorlugit piuneerussimagai, anusinngorsaatissanngorlugit kingornisigut iluaatsuliorumaartunut’. Judasilu paasissutissiivoq taamanikkut inuit ’uersartorsuusimasut allanertanillu uinissiortuullutik’. (2 Pîtruse 2:5, 6; Jûtarse 7) Angutit arnanik atoqateqarnerminni eqqunngitsunik ileqqulersuuteqaannartarsimanngillat, aammali anguteqatiminnik, immaqalu allaat uumasunik, atoqateqartarsimallutik. — 1 Moses 19:4, 5; 3 Moses 18:22-25.
12. Peter naapertussagaanni iluartumik ileqqoqartoq qanoq akilerneqassava?
12 Tamanna ilutigalugu Peter oqarpoq Jehovap aalajaallutik imminut kiffartortut akissarsisittarai. Assersuutigalugu eqqaavaa Guutip ’Noa iluarnermik oqaluussisoq arfineq-pingatsiullugu aniguisissimagaa’ nunarsuarmi ulersuaqartitsinermini. Eqqaasitsissutigaattaaq Jehovap ’Lot iluartoq’ Sodomap nalaani aniguisissimagaa, imalu oqarluni: ’Taava Jehovap mianerinnitsini ussernartumit annaanneq nalussanngilai, iluaatsulli ullormut eqqartuutiffissamut toqqorumaarpai pillaqqullugit.’ — 2 Pîtruse 2:5, 7-9.
Iliuutsit pillaatissinneqartariaqartut
13. Kikkut ingammik Guutimit eqqartuunneqassappat, taakkualu qanoq iliortarsimagunarpat?
13 Ingammik kikkut Guutimit eqqartuunneqarumaartut Peterip oqaatigaa, tassagooq ’uinik malillugu ingerlasut mingunnartut illigutsaallugit naalagaasullu asiginnarlugit’. Peterip uumitsannera tusaasinnaavarpullusooq oqaasiini ukunani: ’Saperuttaallutik tatituugamik naalannartut uulinnatik mitaatigisarpaat.’ Judas allappoq ’taakkua sinnattortutut illutik uinitik mingutsikkaat naalagaasullu asiginnarlugit naalannartullu mitallugit’. (2 Pîtruse 2:10; Jûtarse 8) Immaqa atoqatigiinnermut tunngasunik sinnattualaaruteqartarsimapput kanngunartuliorneq aqqutigalugu kinguaassiuutitigut illigussutsiminnik naammassinnissutigisaminnik. Taavami qanoq ilillutik ’naalagaasunik asiginnaasarpat’ aamma ’naalannartunik mitaatiginnittarpat’?
14. Qanoq ’ajoqersuuisooqqusersut naalagaasunik asiginnaasarsimappat’ aamma ’naalannartunik mitaatiginnittarsimappat’?
14 Taamaaliortarput oqartussaassutsimik Guutip aaqqissuussaanik asissuinermikkut. Kristumiut utoqqaanertat ’naalannartumut’ Jehova Guutimut erneranullu sinniisuupput. Tamatuma nassatarisaanik naalannassutsimik tunineqarsimapput. Peteritulli kukkusarput, taamaakkaluartorli ilagiinnut ilaasortaasut Biibilimi kajumissaarneqarput naalannartunut taama ittunut naalatsigitissasut. (Eprîarit 13:17) Kukkusarnerat asissorneqarnissaannut pissutissiinngilaq. Peter oqarpoq inngilit ’taakkuninnga [ajoqersuisooqqusersunik] mitalliutaasumik eqqartuussinngitsut’ naak pissutissaqarluarsinnaagaluarlutik, imalu nangilluni: ’Taakkuli nalusaminnik mitallersut, uumasutut siuneqanngitsutut piniagassaannaallutik aserugassaannaallutillu erniusutut, taakkunatuttaaq aserugaassapput.’ — 2 Pîtruse 2:10-13.
’Nererulooqatigisaraangamisi’
15. Ajoqersuisooqqusersut qanoq periaaseqartarpat, aammalu sutigut allanik tammartitsiniaasarpat?
15 Inuit ajortunngorsimasut taakkua ’ullut tamaasa inuulluaannarneq illigutsannartuutippaat’ aammalu ’innarloqutaallutillu kanngunartorsuullutik’. Peterillu siusinnerusukkut oqareerneratut peqqusersuujupput ’salloqittaasarlutillu’. (2 Pîtruse 2:1, 3, 13) Immaqa utoqqaanertat Guutip ileqqussatigut najoqqutassiaanik atortitsiniarnerat toqqaannartumik akerlilersunngikkaluarpaat, imaluunniit isertuaratik kanngunartuliortanngikkaluarput. Kisianni Peter oqarpoq ’salloqittaallutik nererulooqatigisaraasi’. Judasilu ima allappoq: ’Taakku asaqatigiinniutissanik nerisarnissinni innarloqutaaqaat ittuujuitsumik nererulooqataallutik.’ (Jûtarse 12) Ny Verden-nutsikkami ’innarloqutaasut’-mut taarsiullugu ’ikkarluit ersinngitsut’ atorneqarpoq. Soorlu ikkarluit umiatsiap ataa putusinnaagaat taamaalilutillu umiartortut mianersuaatsut ajunaarnerannut pisuusinnaallutik, taamatut ajoqersuisooqqusersut inuit isumaatsut ’asaqatigiinniutissanik nereqatiginerini’ asasuusaartakkatik ajortunngortissinnaavaat.
16. (a) ’Nereqatigiinnerit asaqatigiinniutissat’ takkua suuppat, tamakkununngalu assingusuni suni ullumikkut inuit kanngunartuliortut sunniuteqarsinnaappat? (b) Ajoqersuisooqqusersut ingammik kikkunnik tiguaaniartarpat, taakkualu qanoq iliortariaqarpat?
16 ’Nereqatigiinnerit asaqatigiinniutissat’ tamakkua tassaasimagunarput katerisimaarnerit ukiuni hundredelinni siullerni kristumiut nereqatigiinniarlutik nuannaarsaqatigiinniarlutillu katersuuttarneri. Ullumikkuttaaq Jehovap nalunaajaasui ilaannikkooriarlutik katerisimaartarput, soorlu katittoqarnerani, imaluunniit asimukaqatigiillutik angerlarsimaffimmiluunniit unnussioqatigiillutik. Inuit ajortunngorsimasut qanoq ilillutik katerisimaarnerit taama ittut nakutitsiniarfissatut atorsinnaavaat? Peter ima allappoq: ’Uersaaffissarsiuinnartunik ajortuliornermullu ueritsalluinnalersunik iseqarput; tarnit aalajangersimanngitsut misiginngitsoortinniarpaat.’ Aammagooq ’piumatuunermut sungiussisimasunik uummateqarput’ taamaattumillu anersaakkut sanngiitsunik sallusuissummik aalajangiussilluinnarsimanngitsunik tiguaaniartarlutik. Peterip nalaani pisimasut mianersoqqussutitut tigusariaqarpavut sianigiuaqqulluta. Kanngunartumik qaninniarnerit suulluunniit tunuartittariaqarpavut, taamatullu qaninniartoq qanorluunniit ajuutiginartigigaluarpat kusanartigigaluarpalluunniit napititaanngisaannassalluta. — 2 Pîtruse 2:14.
’Bileamip aqqutaa’
17. ’Bileamip aqqutaa’ sunaava, tamatumalu qanoq Israelikkut 24.000-it eqqorsimavai?
17 Inuit taakkua, ’perloqqusassaanerup qitornai’-nik taaneqartut, sallusuissut sivisungaatsiartumik nalunngereersimavaat. Immaqa ilagiinni suli suliniuteqartutut isikkoqarput. Peterili ima oqarpoq: ’Aqqut narlusooq qimallugu tammarsimapput Bileamip Beorip ernerata aqqutaa aqqutigilerlugu; taassuma iluaatsuliornermut akissarsiaq nuannarigaluarpaa.’ (2 Pîtruse 2:14, 15) Pruffiitip Bileamip nammineq iluaqutissaminut siunnersuutigisimavaa kanngunartuliorneq ussassaarutitut atorneqassasoq. Moabimiut kunngiannut Balakimut oqarsimavoq Israelikkut kanngunartuliornissaannut usserneqarsinnaasuuppata Guutip perloqqussagai. Tamatuma kingunerisaanik Guutip innuttaasa ilarpassui Moabimiut arnartaannit kanngunartuliortinneqarput, inuillu 24.000-it kanngunartumik ileqqulersornertik pillugu toqutaapput. — 4 Moses 25:1-9; 31:15, 16; sarĸúmersitat 2:14.
18. Bileam qanoq anusinngujuitsigisimava, taassumalu pineqarsimanera ajoqersuisooqqusersunut qanoq aarlerisaarutaava?
18 Peterip oqaatigaa Bileamip pilersaarutaa akornuserneqartoq siutituujutaata oqaluummagu, taamaakkaluartorli Bileamip ’iluaatsuliornermut akissarsiassaq’ ima nuannaritigisimagaa allaat tamanna ’sianiitsuliornermi’ uteqqinnissaanut akornutigisimanagu. (2 Pîtruse 2:15, 16) Ila ajorsimaq! Eqqanaq kinaluunniit Bileamitut iliorluni ataasiakkaanik kanngunartuliornermut ussassaarinermigut Guutip innuttaanik ajortunngortitsiniaasoq! Bileam guutiitsuussutsimi kingunerisaanik toquvoq, tassuunalu erserpoq taassuma aqqutaanik malinnittut tamarmik qanoq pineqarumaartut. — 4 Moses 31:8.
Pilerisaarutit Diaavulorpaluttut
19, 20. (a) Bileamitut ittut sumut assersuunneqarpat, aammalu sooq? (b) Kikkunnik nakutitsiniaasarpat, qanorlu iliorlutik? (c) Sooq oqartoqarsinnaava pilerisaarutaat Diaavulorpaluttuusut, qanorlu ililluta imminut allallu taakkununnga sernissorsinnaavavut?
19 Bileamitut ittut Peterip ima eqqaavai: ’Taakku puilasutut imeqanngitsutut putsutullu anoraasuap ingerlatitaasut ipput.’ Puilasoq paqqersimasoq puilasuitsumi angalasumut qilalersumut toqumik kinguneqarsinnaavoq. Tupinnanngilaq taamatut eqqaaneqartut ’taartup taarnersuanik najugassaqartitaammata’. Peter nangilluni ima oqarpoq: ’Piunngitsunimmi oqallortullutik tammarsimasunit aniguileraluartut misiginngitsoortittarpaat uinimmut illigutsannartunik kanngunartuliortillugit.’ Misilittagakitsunik tammartitsisarput namminneq ’aserornartumut inussiaagaluarlutik’ ’inussiaajunnarnissamik neriorsuisarlutik’. — 2 Pîtruse 2:17-19; Galâsiamiut 5:13.
20 Ajoqersuisooqqusersut taama ittut pilerisaarutaat Diaavulorpaluttuupput. Immaqa ima oqartarput: ’Guutip nalunngilaa inuk sanngiitsuusoq perusussutsiminillu naalagaaffigineqartoq. Kinguaassiuutitigut perusussutsitsinnut nakkaannaraluarutta naakkinniffigissavaatigut. Ajortuliarput anngiiaatigigutsigu isumakkeerfigissavaatigut soorlu sallusuissummiileratta isumakkeerfigisimagaatigut.’ Eqqaamajuk Diaavulu tamatumunnga assingusumik Evamut oqarsimammat neriorsorlugulu Guutimut ajortulioraluaruni pillarneqarnavianngitsoq, ilisimasaqarnerulerneranillu kiffaanngissuseqalerneranillu kinguneqarumaartoq. (1 Moses 3:4, 5) Inummik ajortunngorsimasumik taama ittumik ilagiinniittumik naammattuuissagaluarutta pisussaavugut imminut allanullu sernissuissalluta ilagiinni kristumiuni akisussaasunut inuup taassuma oqaatigineratigut. — 3 Moses 5:1.
Eqqorluartumik ilisarsinermit sernissugaasut
21-23. (a) Eqqorluartumik ilisarsinermit siulersorneqartinngikkaanni qanoq kinguneqassava? (b) Ajornartorsiut suna eqqartugassarput Peterip iserfigaa?
21 Peterip allakkami immikkoortuat tamanna naggaserlugu ilisarsinermik, inuunermut Guutimillu mianerinninnissamut pingaaruteqartutut siusinnerusukkut eqqaareersimasaminik, atuinnginnerup kingunerisassai allaatigai. (2 Pîtruse 1:2, 3, 8) Ima allappoq: ’Massami Naalakkamik Annaassisumik Jesus Kristusimik ilisarsinikkut silamiut mingunnartuinit aniguisimasut kingumut ileqqorilerlugit artorsarunik, kingornagut siornagumit ajunaarnerusimassapput.’ (2 Pîtruse 2:20) Avaanngunassusia! Peterip nalaani inuit taama ittut qilammi inuunermik toqusuitsumik neriugisartik erlinnangaartoq kinguaassiuutitigut nuannisatsiarnermik taarsersimavaat.
22 Taamaattumik Peter ima oqarpoq: ’Iluarnermummi aqqut ilisimagaluarlugu inassut iluartoq imminnut pisitaq alaramikku ilisimanngikkaluarunikku iluanaarneroqqajaqaat. Taakkununnga eqquuppoq sallunngitsumik ussatigisaq imaattoq: „Qimmip meriaani kingumut saattaraa.“ Imaattorlu: „Puuluki ipiiarsimasoq attakorsuit maralluinut niuaataraaq.“’ — 2 Pîtruse 2:21, 22; Ussatit 26:11.
23 Ajornartorsiut alla kristumiunik siullernik sunniilersimagunartoq ullumikkut ilaannut sunniisumut assinguvoq. Taamanikkut Kristusip najuinissaata neriorsuutigisaasup takkutilinnginnera ilaasa naammagittaalliutigilersimagunarpaat. Tamanna pillugu Peter qanoq allassimasoq misissoriartigu. (wE 1/9 97)
Apeqqutit uteqqiissutissat
□ Anusinngorsaatissat pingasut suut Peterip eqqartorpai?
□ Ajoqersuisooqqusersut qanoq naalagaasunik asissuisarpat?
□ Bileamip aqqutaa sunaava, tassuunalu ingerlasut allanik qanoq tammartitsiniaasinnaappat?
□ Ilisarsinermit eqqorluartumit siulersorneqartinngikkaanni qanoq kinguneqassava?
[Qupp. 16, 17-imi assiliartaq]
Bileamimik pisimasoq anusinngorsaatissaavoq