’Guutip ima asatigaatigut’
’Guutip taama asammatigut uaguttaaq asaqatigiinniassaagut.’ — 1 JUÁNASE 4:11.
1. Marsip ulluisa 23-anni seqernup tarrinnerata kingorna nunarsuaq tamakkerlugu sooq inuit millionilikkuutaat Naalagaaffilersaartarfinni ataatsimiittarfinnilu katersuutissappat?
SAPAAT, marsip ulluisa 23-anni, 1997-imi seqernup tarrinnerata kingorna nunarsuaq tamakkerlugu qularnanngitsumik inuit 13.000.000-init amerlanerusut Naalagaaffilersaartarfinni Jehovallu Nalunaajaasuisa ataatsimiittarfiini allani katersuutissapput. Suna pillugu? Guutip inuiannut asanninneranik ersiutaasumit annerpaamit uummatikkut killineqaramik. Jesus Kristusip Guutip asanninneranik ersiutaalluartoq tamanna tikkuarpaa oqarami: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — Juánase 3:16.
2. Guutip asanninneranut qisuariarnerput eqqarsaatigalugu qanoq imminut aperisariaqarpugut?
2 Guutip asannittuliornera eqqarsaatigitillugu imminut ima aperisariaqarpugut ’Guutip taamaaliorsimanera ilumut pingaartippara? Inooriaatsinni pingaartitsineq tamanna takuneqarsinnaava?’
’Guuti asassutaavoq’
3. (a) Sooq asannittuliorneq Guutimut pissusissamisoorpa? (b) Pissaaneq ilisimassuserlu qanoq pinngortitaatigut takuneqarsinnaappat?
3 Asannittuliortarneq Guutimut pissusissamisoorpoq ’Guuti asassutaammat’. (1 Juánase 4:8) Asanninneq pissusiisa pingaarnerpaartaraat. Nunarsuaq inoqartussatut piareersaramiuk qaqqat ilusilersoramigit tatsillu imarpiillu immeramigit pissaanini mianernangaartoq takutippaa. (1 Moses 1:9, 10) Guutip erngup iltillu pinngortitarsuarmi kaaviiaarneri aallartimmagit, uumasuaraaqqat naasullu kisissaanngitsut nunarsuup kemiikkut sananeqaatai inuit nerisinnaasaannut allanngortitsisinnaasut pinngortimmagit timitsinnilu pisartuartut assigiinngitsut nunarsuarmi ullut qaammatillu sivisussusiannut naleqqulluartunngortimmagit ilisimassusianut ersiutaalluarpoq. (Tussiaat 104:24; Jeremia 10:12) Pinngortitarsuarmili takussaasumi Guutip asanninneranik ersiutit maluginiarnarneroqaat.
4. Pinngortitat takussaasut eqqarsaatigalugit Guutip asanninneranik ersiutit suut tamatta malugisariaqarpavut pingaartillugillu?
4 Paarnamik isserissumik inuussutissaannaanngitsutut aammalu nuannaarutissaasutut pinngortitaasumik mamarsaraangatta ooqattaarisinnaanitta Guutip asanninneranik oqaluttuuttarpaatigut. Seqernup alutornangaartumik tarrittarnera, unnuakkut qilak allaaqqissoq, naasut qalipaatigissaartut assigiinngitsorpassuit, uumasut piaraat pinnguartut ikinngutittalu qungujunnerat — tamakku tamarmik Guutip asanninneranut ersiutaalluarput takussaasut. Uppernaakkut naasut tipigileraangata naamasinnaassutsitta tamatuminnga paasitittarpaatigut. Kuussuup qorlorpalunnera, timmissat qitivinnerat asasattalu nipaat tusaraangatsigik siutitta malugisarpaat. Asasatsinnit eqinneqaraangatta malugisarparput. Uumasut ilaat inuit takusinnaanngisaannik, tusarsinnaanngisaannik naamasinnaanngisaannillu malussarsinnaatitaapput. Kisianni inuit, Guuti assilillugu pinngortitaasut, Guutip asanninnera uumasup suulluunniit masigisinnaanngisaa misigisinnaavaat. — 1 Moses 1:27.
5. Jehovap qanoq ililluni Adam Evalu asannittuliorfigingaarsimavai?
5 Jehova Guutip inuit siulliit, Adam Evalu, pinngortikkamigit asanninnerminut takussutissarpassuarnik avatangiiseqartippai. Naatsiiviliorpoq, paratiisimik, tassanilu orpiit tamalaat naatillugit. Imerterutissaanik kooqartippaa, pissanganartunillu timmiaqartippaa uumasoqartillugu. Tamakku tamaasa Adamimut Evamullu angerlarsimaffissaattut tunniuppai. (1 Moses 2:8-10; 19) Jehovap qitornamisut, silarsuarmi ilaqutariissortaminut ilaasutut, iliorfigai. (Lúkarse 3:38) Paratiisip nunarsuarmut tamarmut allisinneqaqqullugu Eden maligassatut pinngortikkamiuk inuit aappariit siulliit Ataataata qilammiusup nalerisimaarnartumik suliassaqartippai. Nunarsuaq tamarmi taakkua kinguaavinik inoqartussaavoq. — 1 Moses 1:28.
6. (a) Adamip Evallu pikitsitsiniarnerat qanoq isumaqarfigaajuk? (b) Sutigut takuneqarsinnaava uagut Edenimi pisimasut ilinniutigisimagivut tamakkuninngalu ilisarsinerput iluaqutigigipput?
6 Tamatuma kinguninngua Adamip Evallu naalassinnaanerat ilumoorsinnaarallu misilinneqarput. Tamarmik asannittuliorfigineqarnerminnik pingaartitsinngitsoorput. Uissuumminartumik iliorput. Utoqqatsissutissaqanngivipput! Taamaattumik Guutimut attaveqarnertik annaavaat, ilaqutariissortaanit ilaajunnaarsinneqarput Edenimillu anisinneqarlutik. Ullumikkut uagut suli ajortuliaata kinguneri atortariaqarpavut. (1 Moses 2:16, 17; 3:1-6, 16-19, 24; Rûmamiut 5:12) Pisimasulli ilinniutigisimanerpavut? Uagut Guutip asanninnera qanoq qisuariarfigaarput? Ullut tamaasa aalajangertakkatta takutittarpaat asanninnera pingaartikkipput? — 1 Juánase 5:3.
7. Naak Adam Evalu ajortuliungaartut Jehovap qanoq ililluni taakkua kinguaavi asannittuliorfigai?
7 Naak siuaasavut siulliit Guutip imminnut iliuuserisimasaanik pingaartitsinngitsooraluartut tamatuma Guuti asannikkunnaarsissimanngilaa. Inuiaat suli inunngunngitsut — ilaatigut uagut ullumi inuusugut — misiginneqatigalugit Guutip Adam Evalu periarfissaqartippai toqutinnatik kinguaassiorsinnaatillugit. (1 Moses 5:1-5; Matîuse 5:44, 45) Taamaaliorsimanngikkaluarpat arlaannarpulluunniit inunngorsimassanngikkaluarpoq. Piumasani siuariartortumik saqqummersissikkamiuk Jehovap Adamip kinguaasai uppernermik ersersitserusuttut neriuuteqarnissaannik tunngavissaqartippai. (1 Moses 3:15; 22:18; Jesaja 9:6, 7) Aaqqissuussinera inuit inuiaqatigiinnit tamaneersut Adamip annaasimasaanik — tassa Guutip ilaqutariissortaanut ilaasutut naammalluinnartutut inuunissamik — angusinissaannut periarfissaqartippai. Taamaaliorpoq utertitsissut pilersikkamiuk.
Sooq utertitsisoqartariaqarpa?
8. Suna pillugu Guutip aalajangiinnarsinnaanngilaa Adam Evalu toqusariaqartut, kinguaavili naalattut tamarmik toqusariaqanngitsut?
8 Ilumut inuup inuuneranik utertitsissutip akilernissaa pisariaqarpa? Guutip aalajangiinnarsinnaasimanngilaa Adam Evalu pikitsitsigamik toqusariaqartut kinguaavili Guutimut naalakkumagunik naassaanngitsumik inuusinnaasut? Inuit killilimmik isumaat malillugu immaqa tamanna isumatusaarsorinarpoq. Kisianni Jehovap „innarluissut naapertuilluarnerlu nuannarai“. (Tussiaat 33:5) Adam Evalu ajortulioreeramik aatsaat qitornaqalerput; taamaattumik qitornaat tamarmik naammalluinnanngitsuupput. (Tussiaat 51:7) Tamarmik ajorti kingornuppaat ajortilu toqumik pillaagaanermik kinguneqartarpoq. Jehovap tamanna sumiginnarsimagaluaruniuk ilaqutariissortaminut anersaajusunut tamanut qanoq ittumik maligassiuinerussagaluarpa? Naapertuilluartumik najoqqutassiani sumiginnarsinnaanngilai. Naapertuilluarnermut piumasarisat ataqqivai. Guutip tamatumani iliuuserisimasai avoqqaarissallugit pissutissaqanngivippoq. — Rûmamiut 3:21-23.
9. Guutip naapertuilluarnermik najoqqutassiai naapertorlugit utertitsissut qanoq ittoq pisariaqarpa?
9 Taavali Adamip kinguaavisa ilaasa Jehovamut naalakkumajumaartut aniguinissaannut eqqortumik tunngavissaqarsinnaava? Inuup naammalluinnartup inuunini pilliutigisinnaappagu inuunerup naammalluinnartup tamatuma nalinga inuit utertitsissummik tamatuminnga uppernikkut akuerinnittut ajortaasa matoorneqaatigisinnaassavaat. Inuup ataatsip, Adamip, ajortuliornera inuiaat tamarmik ajortiliunerannik kinguneqarmat, inuup naammalluinnartup allap, assingusumik nalillip, aavata kuinera utertitsissutaasinnaavoq. (1 Timûtiuse 2:5, 6) Inulli naammalluinnartoq taanna sumi nanineqarsinnaava?
Akiliutissaq qanoq annertutigissava?
10. Sooq Adamip kinguaavisa arlaataluunniit utertitsissut pilersissinnaanngivippaa?
10 Ajortuliortup Adamip kinguaavisa akornanni kialuunniit inuunissamik periarfissat Adamip annaasimasaasa utertissinnaanngilai. „Kialuunniit inoqanni akiliullugu aniguisissinnaanngilaa, kinaluunniit inoqammi utertitaassutissaanik Guutimut akiliuteqarsinnaanngilaq. Akiliutissarmi utertitsiniutissaq inummut angivallaassaqaaq naammanngilluinnassallunilu. Kialuunniit inoqanni inuuginnartissinnaanngilaa ilivermut aqqarnaveersillugu.“ (Tussiaat 49:8-10) Inuiaalli aniguiffissaqanngitsut sumiginnarnagit Jehova nammineq utertitsissutissaqartitsivoq.
11. Qanoq ililluni Jehovap inuup naammalluinnartup inuunera utertitsissutaasinnaasoq pilersippaa?
11 Jehovap inngili timilersimasoq toqusuusaartussaq anersaatulli inuuginnartussaq nunarsuarmut aallartissimanngilaa. Akerlianik Guutip Pinngortitsisup kisimi tupinnartuliarisinnaasaanik iliorluni ernermi qilammiusut ilaata inuussusia arnap, Mariap, Elip Judakkuusup paniata, illiaanut nuutsippaa. Guutip nukiata, anersaavata illernartup, nartup alliartornerani illersorpaa, taannalu inuttut naammalluinnartutut inunngorpoq. (Lúkarse 1:35; 1 Pîtruse 2:22) Taassuma akiliut utertitsissutaasinnaasoq Guutip naapertuilluartumik piumasaqaataasa naammassineqarnissaannut pisariaqartoq atorsinnaavaa. — Eprîarit 10:5.
12. (a) Jesus sooq ’Guutip ernitua’-nik taaneqarpa? (b) Guutip taanna utertitsisussatut aallartimmagu uatsinnut asanninnera qanoq erseqqissarneqarpa?
12 Ernermi qilammiusut amerlasoorpassuit ilaat kina Jehovap tamatuminnga suliassissavaa? Taanna Biibilimi ’Guutip ernitua’-nik taaneqarpoq. (1 Juánase 4:9) Oqaatsit taakkua allaatigaat qilammi siornatigut inisissimaffia, inuttut inunngorami inisissimaffeqalernera pinnagu. Taanna kisiat Jehovap toqqaannartumik allanit ikiorteqarani pinngortissimavaa. Taanna pinngortitanit tamanit angajulliliaavoq. Guutip taanna atorlugu pinngortitat allat tamaasa pinngortippai. Inngilit Guutip ernerai, soorlu Adam ernerisimallugu. Jesusili ’naalannassuseqarpoq soorlu ernituap ataataminit naalannassuserisaa’. Taanna ’Ataatap saaniippoq’. (Juánase 1:14, 18) Ataatani qanittumik tatiginnilluartumillu attaveqarfigaa. Ataatamisut inuiaat asalluinnarpai. Ussatit 8:30, 31-mi nassuiarneqarput Ataatap Ernerminut misigissusii Ernerullu inuiaannut misigissusii: „[Jehovamut] nuannaarutaavunga ullut tamaasa, kiinaatalu saani pinnguartuarlunga . . . inuit nuannaarutigisarlugit.“ Tamaani Jesus Jehovap suliortuusimasuatut, ilisimassutsitut inuttut pissusiligaasutut allaatigineqarpoq. Ernini erliginerpaasani taanna Guutip nunarsuarmut aallartissimavaa utertitsisussatut. Taamaattumik Jesusip oqaasii uku tulluartorujussuupput: ’Silamiut Guutip ima asatigai ernitui tunniullugu’! — Juánase 3:16.
13, 14. Abrahamip Isakimik pilliuteqarniarneranik oqaluttuap Biibilimiittup qanoq ikiorsinnaavaatigut Jehovap iliuuserisimasaanik pingaartitsisinnaatilluta? (1 Juánase 4:10)
13 Tamatuma qanoq isumaqarneranik paasitinniarluta Jesusip nunarsuarmut tikiunnera sioqquterujussuarlugu, ukiut 3890-it missaat matuma siorna, Guutip Abraham ima peqquaa: „Ernerit Iisaaq, ernituat asasat, Moriamut aallaqatiguuk, tassanilu ikikkagassatut pilliutiguuk qaqqami ilinnut innersuukkumaakkanni.“ (1 Moses 22:1, 2) Abraham upperluni naalappoq. Takorlooriaruk illit Abrahamiullutit. Illit ernerit, ernituat asasat pineqaraluarpat? Pilliutissap ikikkagassap piareersarnerani, ullut arlallit Moriamut ingerlatillutit ernerpillu pilliivimmut ilinerani qanoq misigissagaluarpit?
14 Suna pillugu angajoqqaat misiginneqataasut taama misigisarpat? 1 Moses 1:27-mi allassimavoq Guutip inuk imminik assililluni pinngortikkaa. Asanninnerput misiginneqataanerpullu Jehovap asanninneranut misiginneqataaneranullu killilimmik ersiutaapput. Abrahamip nalaani Guuti akuliuppoq, taamaattumillu Isak pilliutaanngilaq. (1 Moses 22:12, 13; Eprîarit 11:17-19) Namminerli pineqarami Jehovap utertitsissut pilersinngitsoorsimanngilaa, naak tamanna imminut ernerminullu akisorujussuugaluartoq. Guutip utertitsissut pilersittariaqanngivikkaluarpaa, ajunngissuserli pisassarinngisaraluaq immikkut ittoq ersersillugu taamaaliorpoq. Uagut taamaaliornera ilumut pingaartinnerparput? — Eprîarit 2:9.
Utertitsissut sunik periarfissiisoq
15. Utertitsissutip qanoq ililluni aaqqissuussaanermi maanna atuuttumi allaat inuit inuuneri sunniuteqarfigai?
15 Guutip asannittumik pilersitaanut tamatumunnga uppertut inuunerannut sunniuteqarluartarpoq. Siornatigut ajorti pissutigalugu Guutimut takornartaasimapput. Soorlu Guutip oqaasiani allassimasoq ’isumamikkut akerartoraluarput ajortunik sulisarlutik’. (Kulorsamiut 1:21-23) ’Erneratali toquagut Guutimut saammaannartitaasimapput’. (Rûmamiut 5:8-10) Inooriaasertik allanngortissimagamikku Guutillu Kristusip pilliutaanik uppertunut isumakkeerfiginninnera akuerigamikku ilerasuuteqarunnaarsimapput. — Eprîarit 9:14; 1 Pîtruse 3:21.
16. Savarpannguit utertitsissummik upperisaqaramik qanoq pilluaqquneqassappat?
16 Inuit taakkua ilaat amerlassusii killilikkat savarpannguanik taaneqartut, Jehovap immikkut pisinnaatitaaffilersimavai qilammi Naalagaaffimmi ernerminut najuisussatut, Guutip aallaqqaammut nunarsuarmut siunertaata piviusunngortinneqarnissaa siunertaralugu. (Lúkarse 12:32) Taakku ’inuit immikkut naggueqatigiissunit immikkullu oqaasilinnit immikkullu inuiaasunit inuiaqatigiinnillu tamanit’ tigusaapput, ’kunngiuffinngortinneqarlutillu palasinngortinneqarput Guutitsinnut, nunamullu kunngiussapput’. (sarĸúmersitat 5:9, 10) Paulusip taakku ima allaffigisimavai: ’Qitornaasutut anersaaqartitaavusi; taassumuuna torlulavugut: „Abba, Ataataq!“ Anersaap taassuma anersaarput nalunaajaaqatigaa Guutip qitornarigaatigut. Qitornaaguttali kingornussisussaavuguttaaq, Guutimit kingornussissalluta Kristusilu kingornusseqatigissallugu.’ (Rûmamiut 8:15-17) Guutip ernerisut qitornarsianngoramik Adamip annaasimasaanik attaveqartitaalerput; ernerilli taakku qilammi kiffartuuteqarnissamik immikkut pisinnaatitaaffeqalerput — Adamip pisinnaasimanngisaannagaanik. Tupinnanngilaq apustili Johannes oqarmat: ’Ata Ataatap asangaarmatigut, Guutip qitornaanik taaneqassagatta, tassaavugummi!’ (1 Juánase 3:1) Guutip taakku najoqqutassiat tunngavigiinnarnagit asavai (a·gaʹpe), aammalu ikinngutigilluakkatut tunniussilluni asallugit (phi·liʹa). — Juánase 16:27.
17. (a) Utertitsissummik uppertut tamarmik sumik periarfissinneqassappat? (b) ’Guutip qitornaasa kiffaanngissusiata naalannaataat’ taakkununnga qanoq isumaqassava?
17 Allanuttaaq — Guutip Jesus Kristus aqqutigalugu inuunissamik periarfissarititaanik uppertunut tamanut — Jehova attaveqarnermik erlinnartumik Adamip annaasimasaanik pisinnaatitsivoq. Apustili Paulus nassuiaavoq: ’Pinngortitammi kipisallutik neriuttut Guutip qitornaasa saqqummersitaanissaat utaqqivaat; pinngortitammi naalatsigititaapput piunngitsumut, massali piaarinatik naalatsigititsisorli pissutigalugu, neriugalugu pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu.’ (Rûmamiut 8:19-21) Kiffaanngissuseq tamanna qanoq isumaqassava? Ajortimit toqumillu aniguisinneqassapput. Isumakkut timikkullu naammalluinnartunngussapput, Paratiisi angerlarsimaffigissallugu, naassaanngitsumillu inuussallutik naammalluinnassusertik nuannaarutigalugu Jehovalu, Guuti ilumoortutuaq, qujamasuffigeqalugu. Tamakku qanoq ilillutik ajornarunnaarsimappat? Guutip ernituata utertitsissummik pilliutaa aqqutigalugu.
18. Marsip ulluisa 23-anni seqernup tarrinnerata kingorna sussaagut, aamma sooq?
18 Ukiumi 33-mi u.n.k., nisanip ulluisa 14-ianni Jerusalemimi inersuarmi qullermi Jesusip toqunerminik eqqaaniaalluni nalliuttorsiorneq atulersippaa. Toquneranik eqqaaniaalluni nalliuttorsiorneq ukiumoortoq kristumiut ilumoortut tamarmik inuuneranni immikkut pingaaruteqartuuvoq. Jesus nammineq ima peqqusivoq: ’Taamaaliortaritsi eqqaallunga.’ (Lúkarse 22:19) 1997-imi Eqqaaniaalluni nalliuttorsiorneq marsip ulluisa 23-anni seqernup tarrinnerata kingorna (nisanip ulluisa 14-at aallartippat) pissaaq. Ulloq taanna Eqqaaniaalluni nalliuttorsiornermut najuunnissamit pingaarnerusoqarsinnaanngilaq. (wE 1/2 97)
Qanoq akissavit?
□ Guutip qanoq ililluni inuiaat asannittuliorfigingaarpai?
□ Sooq inuup naammalluinnartup inuunera pisariaqarpa Adamip kinguaavisa utertinneqarnissaannut?
□ Jehovap qanoq ililluni annertuumik akiliuteqarluni utertitsissut pilersippaa?
□ Utertitsissut pissutigalugu suut ajornarunnaarpat?
[Qupp. 9-mi assiliartaq]
Guutip ernituani tunniuppaa