Jiisusi Kristusi — Tusarliussaata sunniutaa

“Ilisimasup Kapernaumimeersup pingaaruteqassusianut uppernarsaat annerpaaq tassaavoq taassuma inuit uummataannut isumaannullu suli sunniuteqangaarsinnaanera.”a — ATUAKKIORTOQ GREGG EASTERBROOK.

OQAATSIT sunniisinnaassuseqarput. Oqaatsit ilisimassusermik tunngavillit eqqarsaatigilluakkat inuit uummataannik killiisinnaapput, taakkuninnga neriuuteqalersitsisinnaallutik inuunerannillu allannguisitsisinnaallutik. Inoqarsimanngilaq Jiisusip Kristusip oqaasiinit sunniuteqarnerusumik oqaaseqarsimasumik. Jiisusip qaqqami oqaluusianik tusaamasaaqisumik tusarnaartut ilaat kingusinnerusukkut ima allappoq: “Jiisusilu oqalulluni inermat ajoqersuutaa inuit tupigusuutigingaarpaat.” — Matthæusi 7:28.

Ullumikkut inuit silarsuarmiittut Jiisusip oqaasii nalunngilluarpaat. Taassuma oqaasiisa isumalerujussuit ilaat sammeriartigit.

“Guutilu pisuussutillu kiffartorfigisinnaanngilasi.” — Matthæusi 6:24, 1936.

“Taamaattumik: Inunnut qanorluunniit iliorfigeqqugussi ilississaaq taamatut iliorfigisigit.” — Matthæusi 7:12.

“Kaasari tunisiuk kaasarip piinik Guutilu Guutip piinik.” — Matthæusi 22:21.

“Tunisineq pilluarnarneruvoq tigusinermit.” — Apustilit Suliaat 20:35.

Jiisusili puiugassaanngitsunik oqaaseqaannanngilaq. Tusarliussaq oqaluussissutigisaa sunniuteqarluarpoq Guuti pillugu sallusuissummik ingerlatitseqqiigami, aamma tusarliussami inuunerup siunertavianik qanoq paasinnittoqarsinnaanera naalliunnartunillu tamanik piiaasussaq — Guutip naalagaaffia — ilinniartitsissutigineqarami. Quppernerni tulliuttuni tusarliussaq tamanna sammilerutsigu paasissavarput sooq Jiisusi inuit millionillit ‘uummataannut isumaannullu sunniuteqangaarsinnaajuarnersoq’.

Jiisusip imminut pilluni oqaasii

“Jiisusip qularutiginngilluinnarpaa kinaanerluni, suminngaanneernerluni, sooq nunarsuarmukarnerluni qanorlu siunissaqarnerluni.” — ATUAKKIORTOQ HERBERT LOCKYER.

JIISUSIP oqaasiisa akuersaannginneranni upperilinnginnerannilu taanna pillugu ilisimasaqaleqqaartariaqarpugut. Jiisusi kinarpiaagami? Suminngaanneerpa? Inuunerani suna pingaarnerpaava? Matthæusip, Markusip, Lukasip Johannesillu iivangkiiliuini apeqqutinut taakkununnga Jiisusip nammineq akissutai atuarsinnaavavut.

Nunarsuarmi inunngunngikkallarami piuvoq Jiisusi ilaanni ima oqarpoq: “Aaperaat pinngunngikkallarmalli uanga tassaareerpunga.” (Johannesi 8:58) Aaperaat Jiisusip inunngornera ukiut 2000-it missiliorlugit sioqqullugu inuuvoq. Ataataanerpaarli aalajaatsoq taanna suli inunngunngitsorli Jiisusi piuvoq. Jiisusi sumi piugami? Ima nassuiaavoq: ‘Qilammit aqqarpunga.’ — Johannesi 6:38.

Guutip ernera Guuti qilammiunik ernerpassuaqarpoq. Jiisusili immikkorluinnaq ittuuvoq. ‘Guutip ernituatut’ imminut eqqartorpoq. (Johannesi 3:18) Taamatut oqarnera ima paasisariaqarpoq, Jiisusi taannatuaasoq Guutip kisimiilluni pinngortitaa. Ernituaq aqqutigalugu Guutip suut allat tamaasa pinngortippai. — Kolossemiut 1:16.

‘Inuup Ernera’ Oqaatsit taakku Jiisusip imminut pilluni atornerpaavai. (Matthæusi 8:20) Taamaalilluni ersersippaa inngiliunani inuttut timeqalersimasoq anersaajunaniluunniit timitaligaq. Inuuvoq piviusoq. Guutip anersaani illernartoq aqqutigalugu ernermi inuunera qilammit nunarsuarmut, niviarsiap Mariap illiaanut, nuuppaa. Tamatuma kingunerisaanik Jiisusi inuttut naammalluinnartutut ajorteqanngitsutullu inunngorpoq. — Matthæusi 1:18; Lukasi 1:35; Johannesi 8:46.

Missiarsi neriorsuutigisaq Arnap Samariamiup Jiisusi ima oqarfigaa: “Nalunngilara Missiarsi tikiukkumaartoq.” Taannalu ima akivoq: “Uanga, ilinnut oqaluttoq, taannaavunga.” (Johannesi 4:25, 26) Oqaaseq “Missiarsi” oqaaserlu “Kristusi” isumaat assigiipput, isumaqaramik “Tanitaq”-mik. Jiisusi Guutip neriorsuutaasa eqquunnissaannut tunngatillugu immikkut ittumik suliaqartussatut Guutimit taninneqarsimavoq, imaluunniit suliarinnittussanngortinneqarsimavoq.

Suliassaasa pingaarnerpaartaat Jiisusi ilaanni ima oqarpoq: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” (Lukasi 4:43) Inunnut annikilliortunut ajunngingaartulioraluarluni Guutip naalagaaffianik oqaluussissutiginninneq pingaarnerpaatippaa. Naalagaaffik taanna pillugu oqaasii kingusinnerusukkut sammiumaarpavut.

Erseqqippoq Jiisusi inuusimasoq nalinginnaanngitsoq.a Soorlu paasiumaaripput, inuttut inunngunngikkallarami qilammi piunera oqaasiinik isumaqarnerulersitsivoq. Tupinnanngilaq tusarliussamik silarsuaq tamakkerlugu inunnut millionilinnut sunniuteqarsimasumik oqaluussissutiginnimmat.

[Quppernerup ataani ilanngussaq]

Jiisusip Guuti pillugu oqaasii

“Ataatamik ilisarisimannivissutuaq tassaavoq Erneq. Ernerulli allat Ataataq pillugu oqaluttuukkumavai taakkua taanna ilisarisimalerniassammassuk.” — LUKASI 10:22, CONTEMPORARY ENGLISH VERSION.

INUTTUT inunngunngikkallarami Guutip ernitua Ataatanilu ukiuni kisissaanngitsuni qanimut najortigiipput. (Kolossemiut 1:15) Taamaalilluni Ernerup Ataatami eqqarsaatai, misigissusii iliortaasiilu nalunngillualerpai. Kingusinnerusukkut inuttut Jiisusitut nunarsuarmut pigami Ataatani pillugu sallusuissut allanut oqaluttuarerusungaarpaa. Guuti pillugu paasisarpassuaqarsinnaavugut Ernerup oqaasiisa atuarnerisigut.

Guutip aqqa Guutip aqqa, Jehova, Jiisusip pingaartingaarpaa. Ernerup asangaakkap taassuma kissaatigaa Ataatami aqqa allanit ilisimaneqarlunilu atorneqassasoq. Jiisusip nammineq aqqa “Jehova annassutaavoq”-mik isumaqarpoq. Toqunissaminut aqaguttoq taanna Jehovamut qinnumini ima oqarsinnaasimavoq: ‘Aqqit ilisimalersippara.’ (Johannesi 17:26) Tupinnanngilaq Jiisusip Guutip aqqa atortarmagu allanullu ilisimalersimmagu. Jiisusimut tusarnaartut Jehova pillugu sallusuissut qanoq ilillutik paasissagamikku taanna qanoq ateqarnersoq taassumalu aqqata isumaa nalugunikku?a

Guutip asanningaarnera Ilaanni Jiisusi Guutimut qinunermini ima oqarpoq: “Ataataq, . . . [asavarma] silarsuaq tunngavilerneqanngikkallarmalli.” (Johannesi 17:24) Jiisusip qilammiikkami Guutip asanninnera nammineq misigisimavaa, taamaattumillu nunarsuarmut pigami asannittulioriaasii tamaasa ersersinniarsarai.

Jiisusip ersersippaa Jehova asanningaartuusoq. Ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Johannesi 3:16) Grækerit oqaasiat matumani “silarsuaq”-mik nutserneqarsimasoq “nunarsuaq”-mik isumaqanngilaq. Matumani atorneqarneratut inuit — aap, inuiaat tamarmik — pineqarput. Guuti inuiannik ima asannitsigaaq ernini asangaakkani pilliutigalugu inuit uppertut aalajaatsullu ajortimit toqumillu aniguisinneqarsinnaaniassammata naassaanngitsumillu inuunissamik neriuuteqalerlutik. Asanninnerup tamatuma qanoq annertutiginera naatsorsorsinnaanngisaannassavarput. — Romamiut 8:38, 39.

Jiisusip neriorsuummik tuppallersaataasumik eqqissiallannartumillu ima uppernarsaavigaatigut: Jehovap kiffani tamaasa inuttut ataasiakkaatut asangaarpai. Jiisusi oqarpoq Jehova savanik paarsisutut ittoq, savaatini tamaasa immikkut immikkooruteqartutut erlinnangaartutullu isigalugit. (Matthæusi 18:12-14) Jiisusi oqarpoq Jehovap nalusaanik qupaloraarsuk ataasinnguarluunniit nunamut nakkarneq ajortoq, imalu nangippoq: “Ilissimi nutsasiluunniit tamarmik kisissimapput.” (Matthæusi 10:29-31) Jehovap qupaloraarsuk ataaseq ulluminiinngitsoq maluginiartaruniuk, inuit imminik pallorfiginnittut tamaasa immikkut maluginiarnerungaartarlugillu isumaginerungaassavai! Aamma Jehovap nutsavut tamaasa kisissinnaallugillu maluginiarsinnaagunigit, taava inuunitsinniittut suut tamaasa — pisariaqartitavut, ajornartorsiutivut isumakuluutivullu — ilisimassavai!

Ataataq qilammiusoq Soorlu allaaserisap matuma siuliani sammereeripput, Jiisusi Guutip ernituaraa. Ernerup asangaakkap taassuma Jehova saaffigalugulu eqqartoraangamiuk tupinnanngilaq amerlanertigut ‘Ataataminik’ taasarmagu. Jiisusip oqaasii issuarneqaqqaarmata — taassuma aqqaneq-marlunnik ukioqarluni naalaffimmiilluni — Jehova ‘Ataatamisut’ eqqaavaa. (Lukasi 2:49) Oqaaseq ‘Ataataq’ iivangkiiliuni 190-it missiliorlugit atorneqarpoq. Jiisusip Jehova ‘Ataatassitut’, ‘Ataatatsitut’ ‘Ataatamisullu’ eqqartorpaa. (Matthæusi 5:16; 6:9; 10:33) Jiisusip taaguutip tamatuma taama atukulatigineratigut ersersippaa inuit ajortiliullutillu naammalluinnanngitsut Jehovamut nuannersumik tatiginnillutillu attaveqarsinnaasut.

Nallittuisuullunilu isumakkeerfiginnikkumasoq Jiisusip nalunngilaa inuit naammalluinnanngitsut Jehovamit nallittorneqangaarnissartik pisariaqartikkaat. Ernermik tammaraluartumik assersuusiamini Jiisusip Jehova ataatamut misiginneqataallunilu isumakkeerfiginnittumut ernerminik peqqissimisumik pakkussilluni tikilluaqqusisumut assersuuppaa. (Lukasi 15:11-32) Taamaalillutik Jiisusip oqaasii uppernarsaataapput Jehovap allanngornernik inuup ajortiliusup uummataaniittunik sunilluunniit nallittuinissaminut tunngavissaqalersitsisinnaasunik maluginiaasarneranut. Jehova ajortuliortumik peqqissimisumik isumakkeerfiginnikkusungaarpoq. Taamaattumik Jiisusi ima oqarpoq: “[Oqarfigaassi]: Taamatuttaaq ajortuliortoq ataaseq allamik isumataartoq qilammi nuannaarutaanerussaaq iluartunit 99-init allamik isumataarnissamik pisariaqartitsinngitsunit.” (Lukasi 15:7) Guutimut taama nallittuitigisumut kina kajungissannginnerpa?

Qinnutinik tusartartoq Jiisusip nunarsuarmukannginnermini qilammiikkami takuaa Jehova ‘qinnutinik tusartartuusoq’ kiffamilu aalajaatsut qinnutaannik nuannaarutiginnittartoq. (Tussiaat 65:3) Taamaattumik Jiisusip kiffartornermini tusarnaartuni ilinniartippai qanoq qinusassanersut sunillu qinnuteqarsinnaanersut. Ima oqarpoq: “Oqaatsisi uteqattaartassanngilasi.” (NV) Tusarnaartuni kajumissaarpai qinnutigisaqqullugu Guutip piumasaata ‘qilammisut nunamissaaq pinissaa’. Aamma ullut tamaasa inuussutissaqarnissarput, ajortitsinnik isumakkeerfigineqarnissarput ussernartunillu akiuisinnaanissarput qinnutigisinnaavavut. (Matthæusi 6:5-13) Jiisusi oqarpoq Jehovap Ataatagami asannittoq kiffami ilumoorlutik uppernikkut qinnutaat akisarai. — Matthæusi 7:7-11.

Erseqqippoq Jiisusip allat Jehova taassumalu Guutitut qanoq ittuunera pillugit sallusuissummik oqaluttuukkusukkai. Aammali Jiisusi allamik allanut oqaluttuarinnerusungaarpoq — tassa Jehova nunarsuarmut inunnullu siunertani eqqortinniarlugu silarsuaq tamakkerlugu qanoq allannguiumaarnersoq oqaluttuarerusungaarpaa. Jiisusip tusarliussaanut ilaasoq tamanna oqaluussinerani pingaarnersaasimavoq.

[Quppernerup ataani ilanngussaq]

Jiisusip Guutip naalagaaffia pillugu oqaasii

“Jiisusi angalaarpoq illoqarfiit illoqarfeeqqallu aqqusaartorlugit . . . [Guutip] naalagaaffianik iivangkiiliu tusarliuttarlugu.” — LUKASI 8:1.

PINGAARTITAVUT oqaluuserissallugit nuannarisarparput. Jiisusi ima oqarpoq: “[Uummatip] ulikkaarutaanik qaneq utsersortarpoq.” (Matthæusi 12:34) Jiisusip kiffartornermini oqaasii eqqarsaatigalugit isummersinnaavugut taanna Guutip naalagaaffianik pingaartitsingaartuusoq.

Guutip naalagaaffia suugami? Naalagaaffiuvoq Guutimit pilersinneqarsimasoq kunngimillu siulersorneqartoq. Jiisusip naalagaaffik taanna eqqartortupilussuuaa, aap, oqaluussinerani pingaarnersaavoq. Naalagaaffik taanna iivangkiiliuni sisamaasuni 110-nit amerlanerusunik innersuussutigineqarpoq. Jiisusili oqaluinnarluni ilinniartitsinngilaq. Aamma iliuusii Guutip naalagaaffia tamatumalu sunik naammassisaqarumaarnera pillugit ilinniarfigineqarsinnaasupilussuupput.

Kina kunngiua? Guutip naalagaaffiani kunngi inunnit qinigaanngilaq. Naalakkersuisoq taanna Guutimit qinigaavoq. Jiisusip ilinniartitsinermini qulaarpaa Guutimit kunngiusussanngortitaalluni.

Jiisusip nalunngilaa siulittuutigineqarsimasoq Missiarsip neriorsuutigisap naalagaaffimmi naassaanngitsumik atasussami kunngiusussaanera. (2 Samueli 7:12-14; Danieli 7:13, 14; Matthæusi 26:63, 64) Eqqaamajuk Jiisusip toqqaannartumik oqaatigigaa Missiarsiulluni siulittuutigisaq. Taamaalilluni ersersippaa kunngiulluni Guutip toqqagaa. (Johannesi 4:25, 26) Jiisusip arlaleriarluni oqariartaaseq “naalagaaffiga” naleqqulluartumik atorpaa. — Johannesi 18:36.

Jiisusi aamma oqarpoq Guutip naalagaaffiani naalakkersueqateqartussaalluni. (Lukasi 22:28-30) Naalakkersueqataasussat taakku ‘savarpannguanik’ taavai, amerlanngitsuusussaammata. Taakkua ima oqarfigai: “[Ataatarsi] aalajangiisimavoq Naalagaaffik ilissinnut tunniukkumallugu.” (Lukasi 12:32) Biibilimi allakkani kingullerni allassimavoq katillutik 144.000-it Kristusimik naalakkersueqateqarneq immikkut pisinnaatitaaffigissagaat. — Saqqummersitat 5:9, 10; 14:1.

Guutip naalagaaffia sumiippa? Jiisusip naalakkersuisoq Romamiu Pontiusi-Pilatusi ima oqarfigaa: “Uanga naalagaaffiga silarsuarmit matumannga pinngilaq.” (Johannesi 18:36) Guutip naalagaaffia Kristusimit siulersorneqartoq inuit nunarsuarmiittut aqqutigalugit naalakkersuinavianngilaq. Jiisusip Guutip naalagaaffia arlaleriarluni ‘Qilaap Naalagaaffiatut’ eqqartorpaa.a (Matthæusi 4:17; 5:3, 10, 19, 20) Tassa Guutip naalagaaffia qilammit naalakkersuissaaq.

Jiisusip nalunngilaa nunarsuarmeereeruni qilammut utertussaalluni. Oqarpoq tassani naalakkersueqatissani ‘inissaannik piareersaakkumaarlugit’ imminut ilaliunniassammata. — Johannesi 14:2, 3.

Guutip naalagaaffia sunik naammassisaqartarpa? Jiisusip tusarnaartuni Guutimut ima qinusarnissaannik ilinniartippai: “Naalagaaffiit tikiulli, piumasat qilammisut nunamissaaq pili.” (Matthæusi 6:9, 10) Guutip piumasaa qilammi pereerpoq. Guutillu naalagaaffini atorlugu nunarsuarmut siunertani naammassiumaarpaa. Tamatuma kingunerisaanik allanngornersuaqarumaarpoq.

Guutip naalagaaffia nunarsuarmi sunik naammassisaqassava? Jiisusi oqarpoq Guutip naalagaaffiata ajussuseq tamaat atuukkunnaarsissagaa inuit ajortut peqqissimiumanngitsut peernerisigut. (Matthæusi 25:31-34, 46) Tamanna suut peqquserluttuliornerusinnaasut suullu ajussusiusinnaasut tamavimmik atuukkunnaarnerannik kinguneqassaaq. Jiisusip oqaasii naapertorlugit nunarsuaq inunnik ‘qanilaartunik’, naapertuilluartunik, nallittuisunik, ‘uummatimikkut minguitsuusunik’ eqqisseqatigiissitsisunillu ulikkaarumaarpoq. — Matthæusi 5:5-9.

Inuit aalajaatsut taakku nunarsuarmi mingutsinneqarsimasumi najugaqassappat? Naamerluinnaq! Jiisusip neriorsuutigaa nunarsuaq Guutip naalagaaffiata aqutsinerani nuanningaartunik allannguiffiujumaartoq. Jiisusi toqutaasussanngormat, angutip nappakkamut taassuma sanianiittumut kikiattorneqarsimasup taanna ima oqarfigaa: “Naalagaaffinni tikiukkuit eqqaaginga.” Jiisusi ima akivoq: “Ilumut, ullumi oqarfigaakkit: Paratiisimeeqatigiumaarparma.” (Lukasi 23:42, 43, NV) Aap, Guutip naalagaaffiata nunarsuaq tamaat paratiisinngortikkumaarpaa — paratiisitut Edenip naatsiivianiittutut ilersillugu.

Guutip naalagaaffia inuiannut sunik allanik naammassisaqassava? Jiisusi Guutip naalagaaffiata naammassiumaagaanik neriorsuuteqaannanngilaq. Aamma ersersippaa Guutip naalagaaffia sunik naammassisaqarumaarnersoq. Jiisusi arlaleriaqaluni tupinnartuliornikkut ajorunnaarsitsisarpoq taamaalillunilu takutillugu Guutip naalagaaffiani kunngisut siunissami annertunerungaartumik suut iliuuseriumaarnerlugit. Iivangkiiliumi isumassarsiarititaasumi Jiisusi pillugu ima allassimasoqarpoq: “Galilæa tamaat angalaarfigaa, synagogiini ajoqersuisarluni, Naalagaaffimmik iivangkiiliu oqaluussissutigisarlugu, inuiaqatinilu nappaataannik anniaataannillu tamanik ajorunnaarsittarlugit.” — Matthæusi 4:23.

Jiisusip assigiinngitsorpassuarnik nappaatillit ajorunnaarsittarpai. ‘Tappiitsuulluni erniusup isaanik uisitsivoq’. (Johannesi 9:1-7, 32, 33) Aamma angut pupinnermik nappaatilik sallaatsumik attorlugu ajorunnaarsippaa. (Markusi 1:40-42) “Tusilartoq oqalunneq sapingajattoq” Jiisusimut aanneqarmat, Jiisusip takutippaa ‘tusilartut tusaasinnaalersissinnaallugit oqajuitsullu oqalulersissinnaallugit’. — Markusi 7:31-37.

Allaat Guutip kunnginngortitaata inuit toqumit aniguisissinnaavai. Pisimasut Jiisusip toqusimasumik uummartitseqqiffii pingasut allaatigineqarput. Uillarnerup ernitua, niviarsiaraq aqqaneq-marlunnik ukiulik qanimullu ikinngutini Lazarusi makitippai. — Lukasi 7:11-15; 8:41-55; Johannesi 11:38-44.

Apustili Johannesi aqqutigalugu Guutip naalagaaffiani innuttaasut nuannersumik siunissaqarnerat Jiisusip ima siulittuutigaa: “Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” (Saqqummersitat 1:1; 21:3, 4) Eqqarsaatigeriaruk — silarsuaq aliasunnermik qiaffiunngitsoq, anniarfiunanilu toqusoqarfiunngitsoq! Taava Guutip piumasaata qilammisut nunami pinissaanik qinnut tamakkiisumik eqquutissaaq.

Guutip naalagaaffia qaqugu tikiutissava? Jiisusi oqarpoq kunnginngortinneqarnermi kingorna piffissaq siulleq piffissap malunnaatillip ‘tikiunnerminik’ taasami, tassa najuunnermi, naligissagaa. Sukumiisumik siulittuuteqarpoq ersersinniarlugu Guutip naalagaaffiani kunngisut qaqugu najuutilissanerluni. Piffissap tamatuma ilisarnaatigissavai nunarsuaq tamakkerlugu ajornartorsiutit, ilaatigut sorsunnerit, kaannersuit, nunap sajuttarneri, nappaassuit inatsisaanneruleraluttuinnarnerlu. (Matthæusi 24:3, 7-12; Lukasi 21:10, 11) Pissutsit Jiisusip siulittuutigisai tamakku allarpassuillu 1914-imiilli, sorsunnersuaq siulleq aallartimmalli, immikkut malunnarsimapput. Tassa Jiisusi maanna kunngisut naalakkersuivoq. Qanittukkut Guutip naalagaaffia tikiutissaaq Guutillu piumasaa nunarsuarmi naammassissallugu.b

Guutip naalagaaffiata tikiunnera ilinnut qanoq kinguneqassava? Illit Jiisusip tusarliussaanut qanoq periarniarnerlutit aalajangernerit apeqqutaavoq.