Maria anersaakkut ittunik pingaartitsisuusimavoq. Arnat Jerusalemimut poorskisioriartortarnissaat Inatsisini peqqussutigineqanngikkaluartoq, Mariap Josefi ukiumoortumik taqqavunnaraangat angalaqatigisarpaa. (Lukasi 2:41) Katillugit 300 kilometeringajannik isorartutigisumut angalasarput — ilaqutariinniittut suli amerliartorneranni! Angalanerilli taakkua qularnanngitsumik ilaqutariinnut nuannersuusimassapput.

Ullumikkut arnarpassuit Mariap maligassiuilluarnera malippaat. Biibili naapertorlugu akisussaaffimminnik naammassinninniarlutik namminissarsioratik suleruloorput. Nuliaasut imminut pilliutigeriaannaasut taakku amerlanertigut naammagittartorujussuullutillu pinertoorujussuullutillu maniguuttorujussuusarput. Taakku Mariap isiginnittaasianik eqqarsaatiginninnertik namminneq ilorrisimaarnissamik aliikkusersornissamillu kissaatigisatik pingaarnerutinnagit anersaakkut ittunik pingaarnerutitsinissaminnut iluaqutigisarpaat. Soorlu Mariap qularnanngitsumik nalunngikkaa, nalunngilaat Guutimik pallorfiginneqatigiinneq ilaqutariit nakussatsissutigisarlugulu ataasiussuseqalissutigisaraat.

Ilaanni Mariap Josefillu nalliuttorsiornerup kingorna Jerusalemimit angerlartillutik — qularnanngitsumik arlalinnik meerartaqarlutik — paasilerpaat Jiisusi aqqaneq-marlunnik ukiulik peqanngitsoq. Takorloorsinnaaviuk Maria qanoq ernumasimatigissasoq annilaangalluni ulluni pingasuni ernerminik ujaasinerminni? Taassuma Josefillu Jiisusi naalaffimmiittoq kiisami nassaarimmanni ima oqarpoq: “Nalugassiuk Ataatanniittariaqartunga?” Oqaluttuarineqartumi ersersinneqaqqippoq Mariap ‘oqaaserineqartut tamaasa uummamminut toqqoqqissaarai’; tamanna taassuma anersaakkut ittunik assut pingaartitsisuuneranut takussutissaavoq suli alla. Mariap Jiisusip inuunerani pisut eqqarsaatigeqqissaarpai. Ukiorpassuit tamatuma kingorna qularnanngitsumik pisimasoq tamanna Jiisusillu meeraanerani pisimasut allat iivangkiiliumik allattunut takorlooruminartumik oqaluttuarisinnaasimassavai. — Lukasi 2:41-52.

Naalliuutit annaasaqarnerlu naammagalugit atorpai

Josefi, Jiisusip ataatarsiaa, qanoq piva? Jiisusip meeraanerani pisimasumut aatsaannguaq eqqartorneqartumut atatillugu naatsumik eqqaaneqarpoq, tamatumali kingorna iivangkiiliuni eqqaaneqaqqinngilaq. Ilaat isumaqarput tamanna takussutissaasoq Josefip Jiisusip kiffartornerminik aallartitsinnginnerani toqusimaneranut. Qanorluunniit pisoqarsimagaluarpat Maria Jiisusip kiffartornerata naalernerani uillarninngorsimagunarpoq. Jiisusip toqunngitsiarnermini apustili Johannesi Mariamik isumaginnittussanngortippaa. (Johannesi 19:26, 27) Josefi suli uumasimagaluarpat taamaaliorsimassanngikkaluarpoq.c

Maria Josefilu amerlaqisunik misigisaqaqatigiissimapput. Inngilinit pulaarneqarsimapput, naalakkersuisumit naqisimannittumit qimaasimapput, arlaleriarlutik nuuttariaqarsimapput meerarpassuillu perorsarsimallugit. Unnuit amerlasuut issiaqatigiittarsimassapput Jiisusi oqaloqatigiissutigalugu siunissamilu qanoq misigisaqarumaarnera isumaliutigalugu, eqqortumik perorsarnerlugu piareersarnerlugulu isumakuluutigalugu. Ullulli ilaanni Maria kisimiileriataarpoq.

Aappannik toqukkut annaasaqarnikuuit? Ukiorpassuit qaangiutereeraluartut annaasaqarnerpit kingunerisaanik naalliungaarneq imaqanngissuserlu misigisarpigit? Mariap qularnanngitsumik upperisani toqusunillu makititsisoqarumaarneranik ilisimanninnini tuppallersaatigaa.d (Johannesi 5:28, 29) Eqqarsaatilli tuppallernartut taakku ajornartorsiutaanut aaqqiissutaanngillat. Ullumikkut anaanat kisermaarpassuit pisimanerattut Mariap uimit ikiorneqarani tapersersorneqaranilu meeqqanik isumassuineq unamminiagaraa.

Josefi toqummat Jiisusip ilaqutariit timikkut pisariaqartitaannik isumaginninniarluni pilersuisunngorsimasorinissaanut pissutissaqarpoq. Jiisusip nukai inersimasunngoriartortillutik ilaqutariinnut akisussaaqataasinnaapput. Jiisusip ‘30-it missiliorlugit ukioqarluni’ ilaquttani qimappai kiffartorninilu aallartillugu. (Lukasi 3:23) Angajoqqaat amerlanersaat ernertik panitsilluunniit angerlarsimaffimminnit nuukkaangat tulluusimaarlutillu aliasuttarput. Piffissarujussuaq nukippassuillu misigissuserpassuillu meeqqaminnut atornikuugamikkit, aallaraangata maqaasisorujussuusarput. Erneqarpit paneqarpilluunniit anguniakkatik angusinnaajumallugit nuussimasunik? Tulluusimaarutigivigit, immaqali aamma kissaatigalugu qaninnerulaartumi najugaqarnissaat? Taamaappat takorloorsinnaavat Maria qanoq misigisimassasoq Jiisusi nuummat.

Naatsorsuutiginngisamik misilinneqarnerit

Maria aamma naatsorsuutiginngisaannarunakkaminik misilinneqarpoq. Inuppassuit Jiisusi oqaluussisoq tusareerlugu taanna malilerpaat — taassumali nammineq qatanngutai malinninngillat. Biibilimi ima allassimavoq: “Qatanngutaasaluunniimmi upperfiginngilaat.” (Johannesi 7:5) Qularnanngilaq Mariap taakku oqaluttuussimassagai inngilip qanoq oqarsimanera pillugu — tassa Jiisusi “Guutip erneranik” taaneqartoq. (Lukasi 1:35) Jaakulli Josefillu, Siimuup Juutarsillu Jiisusi angajumittut isigiinnarpaat. Tassa Mariap qanigisai upperisarsiornikkut assigiinngitsunik isumaqarput.

Taanna tamanna pissutigalugu nikallorpa neriuutaarullunilu? Naamerluinnaq! Ilaanni Jiisusi Galilæami oqaluussitilluni illut ilaannut neriartorpoq. Inuppassuit tusarnaarniarlugu katersuupput. Kikkut silataaniippat taanna ujarlugu? Maria Jiisusillu qatanngutai. Tassa Jiisusi ilaqutariit angerlarsimaffiata qanittuaniikkaangat Mariap taanna malittarpaa, meeqqanilu allat ilagisarsimannguatsiarpai, immaqa neriuutigalugu taakkua Jiisusimut isiginnittaasertik allanngortissagaat. — Matthæusi 12:46, 47.

Aamma illit ilaquttavit ilaat allat Jiisusimik malinnikkusunngitsut illit Jiisusimik malinninniarsuataarpit? Taamaappat nikalloqinak neriuutaaruteqinallu. Inuppassuit Mariap pisimaneratulli allannguisoqartinnagu ukiorpassuit ingerlaneranni naammagittarlutik ilaquttamik ilaannik kajumissaarisarsimapput. Guutip taamatut naammagittartoqartarnera pingaartingaarpaa, inuit isumaminnik allannguippata allannguinngikkaluarpataluunniit. — 1 Petrusi 3:1, 2.

Misilinneqaatit artornarnersaat

Biibilimi oqaluttuarineqartut naapertorlugit Mariap misilinneqarnera kingulleq qularnanngitsumik misilinneqarnerisa annernarnersaraat. Taanna ernermi asasami inuiaqatiminit ajattugaareerluni naalliungaarluni toquneranik takunnittuuvoq. Qitornamik toqukkut annaasaqarneq allaaserineqarsimavoq “annaasaqarnerit annersaattut”, “toqukkut annaasaqarnerit ajornersaattut”, qitornaq qassinilluunniit ukioqaraluarpat. Ukiut qulikkaat tamatuma siorna siulittuutigineqartutut, Maria nammineq panamik kapineqartutut misigisimassaaq. — Lukasi 2:34, 35.

Taamatut naggataamik misilinneqarnini Mariap misigissutsikkut sapililissutigaa? Jehovamut uppernikilliva? Naagga. Mariap tullissaanik Biibilimi eqqaaneqarami Jiisusip ajoqersugai ‘qinusarnerminnik aalajangiusseqatigai’. Aamma kisimiinngilaq. Ernini allat angajuminnik upperinnikkiartulersimasut ilagai. Tamanna Mariamut tuppallersaataangaarsimassaaq!e — Apustilit Suliaat 1:14.

Mariap inuunera imaqarluarlunilu nalerisimaarnartuusimavoq, aamma nuliaallunilu anaanaasimavoq Guutimik mianerinnittoq. Anersaakkut pisuunnguallannartunik amerlasuunik misigisaqarsimavoq, aamma misilinneqarnerit atugarliuutillu qassiit anigorpai. Ilimaginngisatsinnik allanik ajornartorsiuteqalerutta imaluunniit ilaqutariinni ajornartorsiutit pissutigalugit isumakulukkutta, Mariap aalajaannera pinertuneralu ilinniarfigisinnaavavut. — Hebræerit 10:36.

Marialli pallorfigineqartarnera pillugu qanoq oqartoqarsinnaava? Biibilimi Mariamik oqaluttuat taassuminnga pallorfiginninnissamut pissutissaqalersitsippat?

Mariap Guutip siunertaani inissisimaffia

ILAANNI Jiisusip kiffartornerata nalaani arnaq inuppassuit nipiliornerat akimorlugu nipituumik ima oqarpoq: “Pilluarpoq ilumiuuffigisat pilluarputtaaq ivianngit miluffigisatit!” Jiisusip kissaatigisimagaluaruniuk anaanani immikkut ataqqineqassasoq, maanna tamatuminnga erseqqissaanissamut periarfissaqarluaraluarpoq. Jiisusilli akissutaa imaappoq: “Pilluarput Guutip oqaasianik tusartut toqqorlugulu!” — Lukasi 11:27, 28.

Jiisusip anaanani immikkut ataqqinngilaa; aamma ajoqersukkani qaqugukkulluunniit kajumissaanngilai taamaalioqqullugit. Taamaammat inuppassuit ilumoorlutik uppertut Mariamik immikkut ataqqinninnerat tunngavissaqarluarpa? Jiisusip anaanaa pillugu ajoqersuutit nalinginnaanerpaat Allakkat Illernartut atorlugit misissoriartigit.

“Saammaannermik ulikkaartoq”, “Pilluaqqusaasoq . . . arnat akornanni”

Inngilip Gabrielip Maria Guutip siunertaani qanoq inissisimaffeqassanersoq oqaluttuuppaa. Inngilip taanna imatut oqarluni ilassivaa: “[Jehovap] najorpaatit saammaassaasutit uumaa!” (Lukasi 1:28) Nutsigaq alla imaappoq: “Pilluarna, saammaannermik ulikkaartutit!, Naalakkap najorpaatit.” (Erikke Rosenørn-Lehn) Taamatut oqartoqarnerata kinguninngua Elisabethip Maria ima ilassivaa: “Arnat akornanni pilluaqqusaavutit, ilumiullu pilluaqqusaavoq!” (Lukasi 1:42) Mariap immikkut ataqqineqartariaqarnera oqaatsini taakkunani ersersinneqannginnerpa?

Naamik, taamatut oqartoqarsinnaanngilaq. Katuullit Mariamut qinnutaat taamatut oqaasertaqaraluartoq taassumunnga qinunissaq Biibilimi tunngavissaqanngilaq. Gabrielip Elisabethillu miserratiginngilaat Mariap Missiarsimik ernertaarnissaq immikkut pisinnaatitaaffigigaa, Mariamulli qinusarnissamik eqqarsaat Biibilimi allassimasunut attuumassuteqanngilluinnarpoq. Ajoqersukkalli qanoq qinusarnissaminnik ilinniarteqqullutik qinnuigimmanni, Jiisusip ersersippaa qinnutit tamarmik Ataataminut qinnutaasariaqartut. Jiisusip qinnutaa tusaamasaasoq, Ataatarpuumik taaneqarajuttoq, ima aallartippoq: “Ataatarput qilanniittutit.” — Matthæusi 6:9.

Naalakkersueqataasoq

Ajoqersuut nalinginnaasoq alla naapertorlugu Maria maanna ‘Dronningiuvoq qilammiu’. Biibilimili taamatut taaguuserneqanngilaq. Ersersinneqarporli Maria Guutip qilammi aaqqissuussaani immikkut ittumik inissisimaffeqartoq. Inissisimaffik suna?

Jiisusi oqarpoq ajoqersukkami ilumoortut ilaasa naalagaaffimmini naalakkersueqatigissagaanni. (Lukasi 22:28-30) Jiisusip qinikkat taakkua piginnaatippai ‘Guutitsinnut palasitut’ kiffartornissaannut, “nunarsuarmilu [nunamullu, 1936] kunngiussapput”. (Saqqummersitat 5:10) Biibilimi erseqqippoq Maria tamatuminnga immikkut pisinnaatitaaffeqalersimasunut ilaasoq. Qanoq taamatut oqarsinnaavugut?

Immaqa eqqaamasinnaavat Maria Jiisusip toqunerata kingorna Jiisusip ajoqersugai taassumalu nukai ‘qinusarnerminnik aalajangiusseqatigigai’. Taamaalioqataaniarlutik katersuussimasut katillutik 120-t missaanniipput, taakkununnga ilaallutik “arnat”. (Apustilit Suliaat 1:12-15) Biibilimi ima allassimavoq: “Ulloq piinsi nalliummat tamarmik katisimapput”, Guutillu anersaava illernartoq taakkununnga kuineqarpoq taakkua allamiut oqaasiinik oqalussinnaanngortillugit. — Apustilit Suliaat 2:1-4.

Mariap taamatut pilluaqquneqartunut ilaanerani erserpoq taanna arnallu allat anersaamik illernartumik kuineqartut Jiisusip naalagaaffiani qilammiittumi naalakkersueqataasussatut qinikkanut ilaasut. Taamaattumik Mariap qilammi naalannassutsimi Jiisusimik issiaqateqarsorinissaanut pissutissaqarluarpoq. (Romamiut 8:14-17) Taassuma Jiisusillu naalakkersueqatissaasa allat Guutip siunertaata naammassineqarneranut tunngatillugu immikkut pisinnaatitaaffigilissaasa ilaat misissoriartigit.

Pilluaqqussutinik nuanningaartunik ingerlatitseqqeqataasussaq

Saqqummersitani Biibilip ilaaniittuni allassimavoq 144.000-it qilammi inuunissamut makititaassasut Jiisusimut palasioqataasussatut, eqqartuussisooqataasussatut kunngioqataasussatullu. (Saqqummersitat 14:1, 4; 20:4, 6) Palasiullutik inuit naalattut iluaqutissaannut Jiisusip pilliutaata nalinganik ingerlatitseqqeqataassapput, taakkua anersaakkut, ileqqussatigut timikkullu naammalluinnartunngoriartuaartillugit. (Saqqummersitat 21:1-4) Piffissap nuanningaartup tamatuma misiginera Jehovamik pallorfiginnittunut ilumoortunut tamanut immikkut pisinnaatitaaffiussaaq angingaartoq!a

Maria Jehovap siunertaani inissisimaffeqarsimavoq sulilu inissisimaffeqarluni. Taassuma maniguunnera, uppernera, kiisalu anaanatut isumassuinera minnerunngitsumillu misilinneqarnermini pinertusaarnera maligassaqqissuupput. Aamma ataqqineqangaartariaqarpoq Missiarsi erniarisimagamiuk inuiaallu tamarmik pilluaqqussutisiassaannik ingerlatitseqqeqataasussaagami.

Mariamilli ilinniarsinnaasatta pingaarnersaraat taassuma, Guutip kiffai ilumoortut allat tamaasa peqatigalugit, allat pinnagit Jehova kisiat pallorfigimmagu. Maria Jiisusip naalakkersueqatai allat peqatigalugit ima nalunaarpoq: “Issiavissaarsuarmi issiasoq [Jehova] Savaararlu [Jiisusi Kristusi] naalannartitaalit ataqqineqarlutillu unnersiutigineqarlutillu pissaaneqarlutillu naassaanngilluinnartumik.” — Saqqummersitat 5:13; 19:10.  (wp09 01/01-E)

[Quppernerup ataani ilanngussaq]

[Qupp. 10-mi issuagaq]

Mariap maniguunnera, uppernera naalanneralu maligassaqqipput

Atuartartunut inuusuttunut

Toqutsinissamik pilersaarutipiluk kingunipiloqartoq!

Ilitsersuutit: Eqqissillutit akornusersorneqarnak sungiusarfigisinnaasanni una sungiusaatigiuk. Allassimaffiit atuarukkit takorlooruk nammineq najuullutit. Pisut takorluukkit. Nipaat tusaasutut ikkit. Inuttaasut pingaarnerit misigissusii malugikkit.

OQALUTTUAQ EQQARSAATIGEQQISSAARUK. — ATUARUK DANIELI 6:2-29.

Dareiosi inuttut qanoq ittuusoraajuk? Isikkua qanoq takorloorpiuk? Misigissutsit suut nipaagut tusarneqarsinnaasoraagit? (Versit 15, 17, 19-21 atuaqqikkit).

․․․․․

Løvit inaat qanoq ittuusoraajuk? Løvit allaatigikkit.

․․․․․

Danieli løvit inaannut iginneqareermat itersaliallu paavaata matuneqarnerata kingorna minutsini siullerni qanoq pisoqarsimaneranik takorluukkat allaatigiuk.

․․․․․

SULI ITINERUSUMIK EQQARSAATIGIUK.

Sooq naalagaaffimmi atorfillit Danieli sinngagaat? (Versi 4 atuaqqiguk).

․․․․․

Sooq Danieli aalajangerpa allanit takuneqarsinnaalluni qinuniarluni naak isertorluni qinusinnaagaluarluni? (Versit 11, 12 atuaqqikkit).

․․․․․

Sooq qinuneq pillugu inatsisissamik siunnersuut Dareiosimut iluarinarsimasinnaava? (Versi 8 atuaqqiguk).

․․․․․

ILIKKAKKATIT ATUKKIT. UKU PILLUGIT ILIKKAKKATIT ALLATTUKKIT . . .

Akerlilersorneqaraluarluni sapiitsuuneq.

․․․․․

Qinunerup pingaaruteqassusia.

․․․․․

Jehovap kiffaminik aalajaatsunik isumassuinera.

․․․․․

OQALUTTUAMI MATUMANI SUNA ILINNUT PINGAARNERPAAVA, AAMMA SOOQ?

․․․․․

(wp08 11/01-E)

Jiisusip oqaasii naapertorlugit kikkut pilluartuusut

‘Jiisusi qaqqamut majuarpoq, ajoqersugaasalu ornippaat. Taava oqalulerpoq ajoqersorlugillu.’ — MATTHÆUSI 5:1, 2.

1, 2. (a) Jiisusi pissutsini qanoq ittuni qaqqami oqalugiarpa? (b) Jiisusip oqalugiaatini qanoq aallartippaa?

UKIOQ 31-uvoq. Jiisusip Jerusalemimi poorskisiorniarluni Galilæami oqaluussilluni angalanini unitsillatsiarpaa. (Johannesi 5:1) Galilæamut uterami apustilinik aqqaneq-marlunnik toqqaanermini Guutimit siulersorneqarnissani unnuaq tamaat qinnutigaa. Aqaguani inuppassuit katersuupput, Jiisusillu napparsimasut ajorunnaarsippai. Ajoqersukkat allallu qaqqap sivingarnanut ingeqatigai ilinniartitsilerlunilu. — Matthæusi 4:23–5:2; Lukasi 6:12-19.

² Jiisusip oqalugiaatini — qaqqami oqaluutsimik taasartagarput — aallartippaa ersersillugu pilluartoqartartoq Guutimut attaveqarluarnerup kingunerisaanik. (Atuaruk Matthæusi 5:1-12). Pilluarneq tassaavoq ‘ilorrisimaarneq nalerisimaarnerusinnaallunilu qamannga pisumik nuannaangaarnerusinnaasoq’. Jiisusip ‘pilluarneraaneri’ qulingiluat sooq kristumiut pilluarnerannik ersersitsipput, aamma ukiut 2000-ingajaat matuma siorna iluaqutaanerattulli ullumikkut iluaqutaatigipput. Pilluarneraanerit taakku tamaasa immikkut sammeriartigit.

“Anersaakkut pisariaqartitaqarnerminnik miserratiginninngitsut”

3. Anersaakkut pisariaqartitaqarnermik miserratiginninnginneq qanoq paasisariaqarpa?

³ “Pilluarput anersaakkut piitsut [anersaakkut pisariaqartitaqarnerminnik miserratiginninngitsut, NV], taakkuami Qilaap Naalagaaffia pigaat.” (Matthæusi 5:3) “Anersaakkut pisariaqartitaqarnerminnik miserratiginninngitsut” paasivaat anersaakkut ittunik amigaateqarlutillu piitsuullutik aamma Guutimit nallittorneqarnissaminnik pisariaqartitsillutik.

4, 5. (a) Sooq anersaakkut pisariaqartitaqarnerminnik miserratiginninngitsut pilluartuuppat? (b) Anersaakkut pisariaqartitat qanoq matussuserneqartarpat?

⁴ Anersaakkut pisariaqartitaqarnerminnik miserratiginninngitsut pilluartuupput ‘Qilaap Naalagaaffia pigigamikku’. Jiisusip ajoqersugaasa siulliit taassuma Missiarsiuneranik akuerinninnertik naalagaaffimmi qilammiusumi taassuminnga naalakkersueqateqalernissaminnut periarfissaqalissutigaat. (Lukasi 22:28-30) Naalagaaffimmi qilammiusumi Kristusimik kingornusseqateqarnissamik neriuuteqaraluarutta Guutilluunniit naalagaaffiata aqutsinerani nunarsuarmi paratiisiusumi naassaanngitsumik inuunissaq qilanaarigaluarutsigu, pilluarsinnaavugut anersaakkut pisariaqartitaqarnerput miserratiginngikkutsigu Guutimillu pisariaqartitsilluinnarnerput ilisimaarigutsigu.

⁵ Inuit ilaannaasa nalunngilaat anersaakkut pisariaqartitaqarlutik, inuppassuaqarpormi upperisaqanngitsunik illernartunillu pingaartitsinngitsunik. (2 Thessalonikamiut 3:1, 2; Hebræerit 12:16) Anersaakkut pisariaqartitat matussuserneqartarput eqiasuilluni Biibilimik atuartarlunilu atuaqqissaartarnikkut, aallussilluarluni oqaluusseqataallunilu ajoqersuganngortitsiortoqataanikkut kristumiullu ataatsimiinnerinut najuuttuartarnikkut. — Matthæusi 28:19, 20; Hebræerit 10:23-25.

Aliasuttut ‘pilluartut’

6. “Aliasuttut” kikkuuppat, aamma sooq ‘pilluarpat’?

⁶ “Pilluarput aliasuttut, taakkumi tuppallersarneqassapput.” (Matthæusi 5:4) ‘Aliasuttut’ inuit “anersaakkut pisariaqartitaqarnerminnik miserratiginninngitsut” assigiinnarpaat. Aliasunnerat inuunerminni atukkaminnik naammagittaalliutiginninnertut paasisariaqanngilaq. Aliasupput ajortiliunertik silarsuarmilu pissutsit inuit naammalluinnanngitsuunerata kingunerisaanik atuuttut aliasuutigigamikkit. Sooq ‘pilluarpat’? Guutimut Kristusimullu upperamik Jehovamullu attaveqarluarnertik tuppallersaatigigamikku. — Johannesi 3:36.

7. Saatanip silarsuaa qanoq isumaqarfigisariaqarparput?

⁷ Saatanip silarsuaani naapertuilluannginneq tamatta immikkut aliasuutigaarput? Silarsuup neqeroorutigisinnaasai qanorpiaq isumaqarfigaavut? Apustili Johannesi ima allappoq: ‘Silarsuarmiittut tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat.’ (1 Johannesi 2:16) ‘Silarsuup anersaavanit’, nukimmit innuttaaqatigiinnik Jehovamut Guutimut kiffartunngitsunik siulersuisumit, sunnerteqqajaanitta kingunerisaanik anersaakkut ittunik pingaartitsiunnaariartornerput malugigutsigu qanoq iliussaagut? Qamannga pisumik qinusariaqarpugut, Guutip oqaasia atuaqqissaarlugu utoqqaanertanullu ikiortissarsiorluta. Guutimut qanillinerujartortilluta ‘tuppallersarneqassaagut’, sunaluunniit aliasunnitsinnut pissutaagaluarpat. — 1 Korinthimiut 2:12; Tussiaat 119:52; Jaaku 5:14, 15.

“Qanilaartut” pilluartuupput

8, 9. Qanilaarneq imaluunniit saamaneq qanoq paasisariaqarpa, aamma sooq taamatut pissusillit pilluartuuppat?

⁸ “Pilluarput qanilaartut, taakkuami nunarsuaq kingornutissavaat.” (Matthæusi 5:5) Qanilaarneq, imaluunniit saamaneq, tassaanngilaq sanngiinneq, aamma inussiarnersuusaarnerunngilaq. (1 Timotheusi 6:11) Saamagutta qanilaartuussaagut Jehovap piumasaatut iliorluta, taassuma siulersuinera naapertorlugu iliorluta. Aamma saamanerput uppeqatitsinnik allanillu pinneriaatsitsinni ersertarpoq. Apustilip Paulusip siunnersuutaanut naapertuuttarpoq. — Atuaruk Romamiut 12:17-19.

⁹ Sooq “qanilaartut”, imaluunniit saamasut, pilluartuuppat? Jiisusip, aamma nammineq saamasuusup, oqarneratut ‘nunarsuaq kingornutissagamikku’. Taanna pingaarnertut nunarsuarmik kingornussisussaavoq. (Tussiaat 2:8; Matthæusi 11:29; Hebræerit 2:8, 9) ‘Kristusip kingornussisussaaqatai’ saamasuusut aamma nunarsuaq kingornutissavaat. (Romamiut 8:16, 17) Aamma saamallutillu qanilaartuusut allarpassuit Guutip naalagaaffiata naalakkersuiffigisassaani nunarsuarmiittumi naassaanngitsumik inuussapput. — Tussiaat 37:10, 11.

10. Saamanngikkutta kiffartornermi immikkut pisinnaatitaaffitsinnut inunnullu allanut attaveqarnitsinnut qanoq sunniuteqarsinnaava?

¹⁰ Uagut Jiisusitut saamasuusariaqarpugut. Taavami assortuiumatuutut ilisimaneqarutta? Taamatut makitallutalu akeqqersimaartarutta inuit qanillinaveersaarsinnaavaatigut. Qatanngutit angutit taamatut pissusillit ilagiinni akisussaaffeqarnissamut piukkunnanngillat. (1 Timotheusi 3:1, 3) Paulusi allappoq Titusip kristumiut Kretamiittut eqqaasissagai ‘saqitsaassiumatuunnginnissaat, saamasuunissaat inoqatiminnullu tamanut qanilaartumik pissuseqarnissaat’ pillugu. (Titusi 3:1, 2) Taamatut saamasaartarnerput allat iluaqutigissaqaat.

‘Naapertuilluarnermut kaattut’

11-13. (a) Naapertuilluarnermut kaallunilu imerusunneq qanoq paasisariaqarpa? (b) Naapertuilluarnermut kaallutillu imerusuttut qanoq ilillutik ‘qaarsillartinneqassappat’?

¹¹ “Pilluarput iluarnermut [naapertuilluarnermut, NV] kaattut imerusuttullu, taakkumi qaarsillartinneqassapput.” (Matthæusi 5:6) ‘Naapertuilluarneq’ Jiisusip eqqartugaa tassaavoq naapertuilluarneq Guutip piumasaanut peqqussutaanullu naapertuulluinnartoq. Tussiaasiortoq oqarpoq tarnini ‘sororiartortoq’ Guutip inassutai naapertuilluartut “kajungerinermit”. (Tussiaat 119:20) Naapertuilluarneq ima pingaartitsigaarput kaattutut imerusuttutullu kajungeralugu?

¹² Jiisusi oqarpoq naapertuilluarnermut kaallutillu imerusuttut pilluassasut ‘qaarsillartinneqassagamik’, imaluunniit nalerisimaalissagamik. Tamanna ukiumi 33-mi piinsip kingorna pisinnaanngorpoq, tassami taamanimiilli Jehovap anersaavata illernartup ‘silarsuaq nalujunnaarsittalerpaa iluarnermik’, imaluunniit naapertuilluarnermik. (Johannesi 16:8) Guutip anersaani illernartoq atorlugu angutit isumassarsisillugit allakkat grækerisuut Biibilimiittut, ‘naapertuilluarnermut perorsaanermut’ iluaqutaasut, allatsillugillu katersortippai. (2 Timotheusi 3:16, NV) Aamma Guutip anersaavata ‘atisisinnaanngortittarpaatigut inuttut pissusermik nutaamik Guutip piumasaa naapertorlugu ilumoortumik naapertuilluarnikkut pinngortitamik’. (Efesosimiut 4:24, NV) Peqqissimisut Jiisusillu pilliutaa tunngavigalugu isumakkeerfigineqarnissaminnik qinnutiginnittut Guutimit naapertuilluartuutitaasinnaanerat nalunagu tuppallernangaarami, ilaa? — Atuaruk Romamiut 3:23, 24.

¹³ Nunarsuarmi inuunissamik neriugisaqarutta, nunarsuarmi maani pissutsini naapertuilluartuni naassaanngitsumik inuulerutta naapertuilluarnermut kaallutalu imerusunnerput matussuserneqarluinnassaaq. Tamanna nalliutserlugu Guutip najoqqutassiaanut naapertuuttumik inuunissarput aalajangiusimatigu. Jiisusimi ima oqarpoq: “Naalagaaffik naapertuilluassuserlu [Guutip] pia ujaqqaartuarsigik.” (Matthæusi 6:33, NV) Taamaaliorutta ajunngitsunik suliassarpassuaqassallutalu piviusumik pilluassaagut. — 1 Korinthimiut 15:58.

Sooq “nallittuisut” pilluartuusut

14, 15. Qanoq ililluta nallittuisinnaavugut, aamma sooq “nallittuisut” pilluartuuppat?

¹⁴ “Pilluarput nallittuisut, taakkumi nallittorneqassapput.” (Matthæusi 5:7) “Nallittuisut” allanik misigeqatiginnittarput. Jiisusip imminut orniguttut ilarpassui nalligingaarpai, tupinnartulianilu iluaqutigalugit naalliuutaat atoruminarsisippai. (Matthæusi 14:14) Nallittuineq aamma ersertarpoq inuk inuup allap ajortuliaanik isumakkeerfiginnikkaangat, soorluttaaq Jehovap ajortuliortut peqqissimisut nallittorlugit isumakkeerfigisarai. (2 Mosesi 34:6, 7; Tussiaat 103:10) Aammattaaq uagut nallittuisinnaavugut atugarliortut oqaatsitsigut iliuutsitsigullu tuppallersarutsigit. Nallittueriaaseq pitsaasoq tassaavoq tusarliussamik Biibilimiittumik allanut ingerlatitseqqinneq. Jiisusip inuppassuit katersorsimasut nalligingaaleramigit ‘amerlasuunik ajoqersulerpai’. — Markusi 6:34.

¹⁵ Jiisusip oqaasiisa ukua isumaqatiginissaannut pissutissaqarluarpugut: “Pilluarput nallittuisut, taakkumi nallittorneqassapput.” Allat nallittorutsigit, qularnanngitsumik aamma taakkua nallittussavaatigut. Jehovap eqqartuuttussanngorunitigut allanik nallittuisimagutta immaqa iluarisaanngitsutut eqqartuunniarnata aalajangersinnaavoq. Nallittuisut kisimik ajortuliaminnik isumakkeerfigineqarnissaminnik naassaanngitsumillu inuunissamik neriuuteqarsinnaapput. — Matthæusi 6:15.

Sooq “uummatimikkut minguitsuusut” pilluartut

16. ‘Uummatikkut minguitsuuneq’ qanoq paasisariaqarpa, uummatikkullu minguitsuusut qanoq ilillutik ‘Guuti takussavaat’?

¹⁶ “Pilluarput uummatimikkut minguitsuusut, taakkuami Guuti takussavaat.” (Matthæusi 5:8) ‘Uummatikkut minguitsuugutta’ kissaatigisavut, pissutiginiakkavut tunniusimaffigisavullu minguitsuussapput. “Asanninneq uummammit minguitsumit . . . naggueqartoq” ersersissavarput. (1 Timotheusi 1:5) Ilorlikkut pissutsitsigut minguitsuugatta ‘Guuti takussavarput’. Imaanngilaq Guuti ilumoortumik takussagipput “[Guutimik] takunnittoq inuuginnarsinnaanngimmat”. (2 Mosesi 33:20) Jiisusilli Guutip kinaassusia naammalluinnartumik ersersippaa taamaattumillu ima oqarsinnaalluni: “Uannik takunnittup Ataataq takuaa.” (Johannesi 14:7-9) Nunarsuarmi maani uagut Jehovamik pallorfiginnittut ‘Guuti takusinnaavarput’ iluaqutissatsinnut taassuma suut iliuuserisarnerai maluginiarneratigut. (Jobi 42:5) Kristumiut tanitat Guuti ilumoortumik takussavaat qilammi anersaakkut inuunermut makititaagunik. — 1 Johannesi 3:2.

17. ’Uummatikkut minguitsuunerput’ uagutsinnut qanoq sunniuteqassava?

¹⁷ ‘Uummatikkut minguitsuusut’ ileqqussatigut anersaakkullu minguitsuugamik, Jehovap minguttuutut isigisaanik sammisaqarneq ajorput. (1 Nalunaarsuutit 28:9; Esaja 52:11) Uummatikkut minguitsuugutta oqaatsivut iliuutsivullu minguitsuussapput, Jehovamullu kiffartornerput ilumoortuusaarnerussanngilaq.

“Eqqisseqatigiissitsisut” Guutimut qitornanngussapput

18, 19. “Eqqisseqatigiissitsisut” suna ilisarnaatigaat?

¹⁸ “Pilluarput eqqisseqatigiissitsisut, taakkumi Guutip qitornaanik taaneqassapput.” (Matthæusi 5:9) “Eqqisseqatigiissitsisut” iliuuserisartakkatik iliuuserisanngisatillu ilisarnaatigaat. Inuit Jiisusip eqqarsaatigisai assigigutsigit eqqisseqatigiissitsissaagut ‘ajortorlu ajortoqataanik akilertarnagu’, tamatigullu ‘noqqaassutigisassavarput akunnitsinni ajunngitsuliornissaq’. — 1 Thessalonikamiut 5:15.

¹⁹ Eqqisseqatigiissitsisunut ilaaniarluni eqqissinermik siuarsaaniarluni iliuuseqartariaqarpoq. ‘Ikinngutigiinnik avissaartitsisunik’ iliuuseqassanngilagut. (Ussatit 16:28) ‘Noqqaassutiginiassavarput tamanik eqqisseqatiginninnissaq’. — Hebræerit 12:14.

20. Kikkut maannakkut ‘Guutimut qitornaappat’, kikkullu allat naggataatigut Guutimut qitornanngussappat?

²⁰ “Eqqisseqatigiissitsisut” pilluartuupput “Guutip qitornaanik” taaneqassagamik. Kristumiut tanitat aalajaatsut Jehovamit qitornavissiartaarineqarput. Maannangaaq Jehovamut qitornaasutut taassumunnga anngigisaqarnatik qanittumik attaveqarput Kristusimut upperamik uummatikkullu iluunngarlutik ‘Guuti asannittoq eqqissisitsisorlu’ kiffartorfigigamikku. (2 Korinthimiut 13:11; Johannesi 1:12) Taavami Jiisusip ‘savaatai allat’ eqqisseqatigiissitsisut? Taakku Jiisusip ukiuni tusindini naalakkersuinerani taanna ‘Naassaanngitsumik Ataatagilissavaat’, ukiulli tusindit taakku qaangiuppata taanna Jehovamut naalatsigitissaaq, taakkulu tamakkiisumik Guutimut qitornaalissapput. — Johannesi 10:16; Esaja 9:5; Romamiut 8:21; 1 Korinthimiut 15:27, 28.

21. ‘Anersaami inuugutta’ qanoq pissusilersussaagut?

²¹ “Anersaami inuugutta”, eqqisseqatigiissitsisuunerput allanit takuneqariaannaassaaq. ‘Immitsinnut kamassaarnavianngilagut’. (Galatiamiut 5:22-26) ‘Inuilli tamaasa eqqisseqatiginiarlugit’ sapinngisarput tamaat iliuuseqassaagut. — Romamiut 12:18.

Malersorneqaraluarlutik pilluartut!

22-24. (a) Naapertuilluarneq pissutigalugu qinugineqartut, imaluunniit malersorneqartut, pilluarnerarneqarsinnaanerannut suna pissutaava? (b) Allaaserisani atuaqqissaaqatigiissutissani tulliuttuni marlunni suut sammissavavut?

²² “Pilluarput iluarneq [naapertuilluarneq, NV] pissutigalugu qinugineqartut, taakkuami Qilaap naalagaaffia pigaat.” (Matthæusi 5:10) Jiisusi nangilluni ima oqarpoq: “Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.” — Matthæusi 5:11, 12.

²³ Kristumiut naatsorsuutigaat, itsaq Guutip pruffiitiisa pineqartarsimanerattut, mitaatigineqartarlutillu qinugineqartarlutillu salluliuutigineqartarnissartik — ‘naapertuilluarneq pissutigalugu’. Misilinneqarnerilli taamaattut aalajaalluta naammagalugit atorutsigit, Jehovamit iluarisaanerput taassuminngalu ataqqinninnerput nalerisimaarluta eqqarsaatigisinnaavarput. (1 Petrusi 2:19-21) Naalliuutivut pissutigalugit maanna siunissamiluunniit Jehovamut kiffartornitsinnik nuannaarutiginnikkunnaarsinnaanngilagut. Aamma tamakku pissutigalugit naalagaaffimmi qilammiusumi Kristusimik naalakkersueqateqarnissamik naalagaaffimmiluunniit tamatumani innuttaasutut nunamiusutut naassaanngitsumik inuusussanngortitaanissamik nuannaarutiginnikkunnaarsinnaanngilagut. Pilluaqqussutit tamakku Guutip iluarinnillunilu ajunngisaarlunilu tukkorneranut uppernarsaataapput.

²⁴ Qaqqami oqaluuseq suli allarpassuarnik ilinniarfigisinnaavarput. Allaaserisani atuaqqissaaqatigiissutissani tulliuttuni marlunni tamanna sammissavarput. Taakkunani Jiisusip oqaasii suli allat misissussavavut.

Qanoq akissavit?

• Sooq “anersaakkut pisariaqartitaqarnerminnik miserratiginninngitsut” pilluartuuppat?

• “Qanilaartut” pilluartuunerannut suna pissutaava?

• Sooq kristumiut malersorneqaraluarlutik pilluartuuppat?

• Jiisusip pilluartuuneraanerisa arlaat sorleq illit killinneqaatigaajuk?

[Qupp. 13-mi assiliartaq]

Jiisusip pilluarneraaneri qulingiluat taamanikkut iluaqutaatiginermissulli ullumikkut iluaqutaatigipput

[Qupp. 15-mi assiliartaq]

Nallittueriaaseq pitsaasoq tassaavoq sallusuissutinik Biibilimiittunik allanut oqaluussissutiginninneq

Jiisusip oqaasii isummannut sunniuteqartikkit

‘Guutimit aallartitaasoq Guutip oqaasiinik oqaluttarpoq.’ — JOHANNESI 3:34.

1, 2. Qaqqami oqaluutsimi Jiisusip oqaasii sumut assersuunneqarsinnaappat, aamma sooq oqartoqarsinnaava Guutip oqaasianik tunngaveqarluartoq?

DIAMANTIT silarsuarmi annerpaartaasa ilaat tassaavoq Cullinan I, aamma the Great Star of Africa-mik taaneqartartoq, 530-nik caraatilik (106 grammit sinnerlugit oqimaassusilik). Ujarak erlinnartoq taanna nalilerujussuuvoq! Ujaqqammilli erlinnartumit tamatumannga suli naleqarnerupput Jiisusip qaqqami oqaluutsimini oqaasii. Tamannalu tupinnanngilaq, Jiisusimmi oqaasii Jehovamit aallaaveqarput. Jiisusi pillugu Biibilimi ima allassimasoqarpoq: ‘Guutimit aallartitaasoq Guutip oqaasiinik oqaluttarpoq.’ — Johannesi 3:34-36.

² Qaqqami oqaluuseq immaqa akunnerup affaa inorlugu sivisussuseqaraluarluni allakkanit arfineq-pingasunit Allakkanit Hebræerisuuneersunit 21-nik issuaanertaqarpoq. Tassa “Guutip oqaasiinik” tunngaveqarluarpoq. Guutip ernerata asasaata oqalugiaataani torrallatami tamatumani oqaaserineqartut nalissaqanngitsut ilarpassui qanoq atorsinnaanerivut misissoriartigu.

“Qatanngutit eqqisseqatigiartoqqaarallaak”

3. Jiisusip ajoqersukkani kamattuarnerup sunniutai pillugit mianersoqqoreerlugit qanoq siunnersorpai?

³ Kristumiutut eqqisseqatigiissitsisuullutalu pilluarpugut Guutip anersaava illernartoq pigigatsigu, taannalu eqqissinermik nuannaarnermillu ineriartortitsisarpoq. (Galatiamiut 5:22, 23) Jiisusip kissaatiginngilaa ajoqersukkami eqqissiunnaarlutillu nuannaarunnaarnissaat. Taamaattumik kamattuarnerup sunniutai toqussutaasinnaasut pillugit mianersoqquai. (Atuaruk Matthæusi 5:21, 22).a Tamatuma kingorna ima oqarpoq: “Tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak [eqqisseqatigiartoqqaarallaak, NV], taavalu aatsaat kingorna tunissutissat pilliutigiartorlugu.” — Matthæusi 5:23, 24.

4, 5. (a) ‘Tunissutissaq’ Jiisusip Matthæusi 5:23, 24-mi eqqartugaa suua? (b) Qatanngummik ajuallassimasumik eqqisseqateqarnissaq sooq pingaaruteqarpa?

⁴ ‘Tunissutissaq’ Jiisusip eqqaasaa tassaavoq naalaffimmi Jerusalemimiittumi pilliutigineqartoq sunaluunniit. Assersuutigalugu uumasunik pilliutit pingaaruteqangaarput inuiaat guutisiornerannut ilaagamik. Pilliummilli tamatumannga pingaaruteqarnerusoq, Jiisusip oqarneratut, tassaavoq qatanngummik ajuallassimasumik eqqisseqateqarnissaq Guutimut tunissuteqartinnani.

⁵ ‘Eqqisseqatigiinneq’ saammaateqatigiinnertut paasisariaqarpoq. Jiisusip oqaasii taakku sumik ilinniarfigisinnaagatsigit? Tassa allanut pissusilersornerput Jehovamut attaveqarnitsinnut sunniuteqartartoq. (1 Johannesi 4:20) Aap, itsaq Guutimut pilliutigineqartut inoqatit iluamik pinngikkaanni naleqarneq ajorput. — Atuaruk Mika 6:6-8.

Maniguunnissaq pingaaruteqarpoq

6, 7. Qatanngut ajuallatsissimasaq eqqisseqatigeqqikkumallugu sooq maniguunnissaq pisariaqarpa?

⁶ Qatanngummik ajuallassimasumik eqqisseqateqarnissaq qularnanngitsumik maniguunnitsinnut misilinneqaataassaaq. Maniguuttut eqqortumik iliorsimasoralutik eqqortumik iliorsimanertik uppernarsarniarlugu uppeqatitik oqqateqatigineq ajorlugilluunniit isumaqatiginnginneq ajorpaat. Tamanna pissutsinik nuanniillisitsissaaq — soorlu itsaq kristumiut Korinthimiittut nalaanni taamaattoqarsimasoq. Apustili Paulusi taamaattoqarnera pillugu eqqarsalernartumik ima allappoq: “Akornassinni saqitsaassutinik eqqartuussisunut suliassanngortitsisarnersi tassaareerpoq sapersinneq. Sooq pitsaanerutinnginnerpisiuk iluaatsuliorfigitinneq? Sooq pitsaanerutinnginnerpisiuk ajunaaruteqarneq?” — 1 Korinthimiut 6:7.

⁷ Jiisusi oqanngilaq qatanngupput saaffigissagipput nammineq ilumoornitsinnik taassumalu kukkuneranik qularunnaarsinniaannarlugu. Eqqisseqatigeeqqilernissaq siunertaasussaavoq. Eqqisseqatigiikkumalluta qanoq misiginerput unneqqarilluta oqaatigisariaqarparput. Aamma oqaloqatigisatta misigissutsikkut annersinneqarsimanera akuerisariaqarparput. Uagullu nammineq kukkusimagutta maniguulluta utoqqatsertariaqarpugut.

“Isivit talerpilliup tammartippatit”

8. Jiisusip oqaasii Matthæusi 5:29, 30-mi allassimasut pingaarnersiukkit.

⁸ Jiisusi qaqqami oqaluutsimi kinguaassiuutinut tunngatillugu ileqqussat pillugit iluaqutaasumik siunnersuivoq. Nalunngilaa avativut naammalluinnanngitsut uagutsinnut ajortumik sunniisinnaasut. Taamaattumik ima oqarpoq: “Isivit talerpilliup tammartippatit, peeruk igillugulu. Ilinnummi pitsaaneruvoq timinni avativit ilaat ataaseq annaassallugu timivit tamarmiusup Anniarfimmut [Gehennamut, NV] iginneqarnissaanit. Talerpippit tammartippatit, kipiuk igillugulu. Ilinnummi pitsaaneruvoq avativit ilaat ataaseq annaassallugu timivit tamarmiusup Anniarfimmut [Gehennamut, NV] pinissaanit.” — Matthæusi 5:29, 30.

9. ‘Isitta’ imaluunniit ‘talerpitta’ qanoq ‘tammartissinnaavaatigut’?

⁹ ‘Isi’ Jiisusip eqqartugaa arlaannik maluginiaasinnaassutsitsinnut assersuutaavoq, ‘talerpillu’ assavut atorlugit iliuuserisinnaasatsinnut. Mianersunngikkutta avatit taakkua tammartissinnaavaatigut ‘Guutimik saqeqatiginnikkunnaarsilluta’. (1 Mosesi 5:22; 6:9, NV) Guutimut naalannginnissamut ussernartorsioraangatta iliuuseqarujussuartariaqarpugut, isi peerlugulusooq imaluunniit talerpik kipillugulusooq.

10, 11. Kinguaassiuutitigut inuunerlunnginnissamut suna iluaqutigisinnaavarput?

¹⁰ Isivut ileqqorlunnermut tunngasunik isiginnaannginniassammata qanoq ililluta aqussinnaavavut? Jobi Guutimik mianerinnittoq ima oqarpoq: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Jobi 31:1) Jobi aappaqarpoq Guutillu ileqqussatigut inatsisaanik unioqqutitsinnginnissaminik aalajangiusimannilluni. Uaguttaaq taamatut isiginnittaaseqartariaqarpugut, aappaqaraluarutta aappaqanngikkaluaruttaluunniit. Kinguaassiuutitigut inuunerlukkumanata Guutip anersaavanit illernartumit siulersortittariaqarpugut, taannami inunni Guutimik asannittuni ilaatigut imminut naalakkersinnaanermik ineriartortitsisarpoq. —  Galatiamiut 5:22-25.

¹¹ Kinguaassiuutitigut inuunerlukkumanata imminut ima aperisariaqarpugut: ‘Isima atuakkani, tv-mi internettikkulluunniit ileqqussatigut kanngunartunik uannik isiginnaarusussuseqalersitsinissaa atuarusussuseqalersitsinissaaluunniit akueraara?’ Aamma ajoqersukkap Jaakup allagai uku eqqaamasariaqarpavut: “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.” (Jaaku 1:14, 15) Guutimut tunniulluinnarsimasoq angutaaguni arnamut arnaagunilu angummut ileqqorluttumik pissutiginiagaqarluni ‘isigiuaruni’ (NV) iliuuseqarujussuartariaqarpoq, isini peerlugulusooq igillugulu. — Atuaruk Matthæusi 5:27, 28.

12. Paulusip siunnersuutaa suna kinguaassiuutitigut pilerissusipilunnik akiuinissamut iluaqutigisinnaavarput?

¹² Assannik eqqunngitsumik atuineq Jehovap ileqqussatigut najoqqutassiaanik unioqqutitserujussuarnermik kinguneqarsinnaammat, ileqqussatigut minguitsuujuarnissarput aalajangiusimalluinnartariaqarparput. Taamaattumik Paulusip siunnersuutaa una malittariaqarparput: “Toqutissigit nunamut atasut ilissinniittut: Kinguaassiuutitigut inuunerlunneq, minguttuuneq, pileritsaassineq [tiinngartuneq, NV] kajungerisapiluillu aamma piumatuuneq, tassa guutipilussiorneq.” (Kolossemiut 3:5) Oqaaseq “toqutissigit” kinguaassiuutitigut pilerissusipiluit akiorniarlugit sukannersumik imminut piumaffigisariaqarnermut erseqqissaataavoq.

13, 14. Kinguaassiuutitigut inuunerluppalaartumik eqqarsartaaseqannginnissarput kinguaassiuutitigullu inuunerluttuliunnginnissarput sooq pingaaruteqarluinnarpa?

¹³ Inuk inuuinnarumalluni taleersinnissaminut niuersinnissaminulluunniit piumassuseqarsinnaavoq. Isitta assattaluunniit assersuutaasumik iginnissaa pingaaruteqarluinnarpoq, anersaakkut inuunitsinnik navianartorsiortitsisinnaasunik kinguaassiuutitigut inuunerluppalaartumik eqqarsartaaseqarumanata kinguaassiuutitigullu inuunerluttuliorumanata. Naassaanngitsumik piuneerunneqarnermik — Gehennatut eqqartorneqartumik — pinngitsuuisinnaavugut aatsaat eqqarsartaatsikkut, ileqqussatigut anersaakkullu minguitsuujuarutta.

¹⁴ Ajorti naammalluinnanngissuserlu kingornussat pissutigalugit ileqqussatigut minguitsuujuarniarluni iliuuseqarnissaq pisariaqarpoq. Paulusi ima allappoq: “Timiga peqqarniisaarfigaara naalatsillugulu pinngitsaalillugu allanut oqaluussisartunga narrugisaaqqunanga.” (1 Korinthimiut 9:27) Taamaattumik ileqqussanut tunngatillugu Jiisusip oqaasiisa maleruarnissaat aalajangiusimatigu Jiisusillu utertitsissutitut pilliutaanik qujamasuutiginninnginnermik ersersitsisumik iliuuseqanngisaannarluta. — Matthæusi 20:28; Hebræerit 6:4-6.

“Tunisiuartaritsi”

15, 16. (a) Jiisusi tunisineq eqqarsaatigalugu qanoq maligassiuiva? (b) Jiisusip oqaasii Lukasi 6:38-mi allassimasut qanoq paasisariaqarpat?

¹⁵ Jiisusip oqaasii maligassiuilluarnerpaaneralu tunisiumatunermik siuarsaapput. Taanna tunisiumatungaarpoq inuit naammalluinnanngitsut iluaqutissaannut maanga nunarsuarmut pinermigut. (Atuaruk 2 Korinthimiut 8:9). Kajumilluni qilammi naalannassutsi iperarpaa inunngorniarluni inuuninilu inuit ajortillit pillugit tunniunniarlugu, inuillu taakkua ilaat Guutip naalagaaffianik taassuminnga kingornusseqatiginnittut qilammi pisuussuteqalissapput. (Romamiut 8:16, 17) Jiisusi tunisiumatunissamut ilumut kajumissaarivoq ima oqarami:

¹⁶ “Tunisigitsi [Tunisiuartaritsi, NV], taava ilississaaq tunineqassaasi. Uuttukkap imai ajunngitsut naqittaassat aalaterussat qammisimasullu ilissinnut tunniunneqarumaarput [saassinnut tunniukkumaarpaat, 1936]. Uuttuutigisassinnimmi uuttuiffigineqarumaarpusi.” (Lukasi 6:38) Oqariartaatsimi “saassinnut tunniukkumaarpaat”-mi pineqarpoq niuffaffimmi tuniniaasup pisisup qallersaataanut qiterummik aalajangeriarlugu qummoorneqarsimasumut pisiaanik immiussisarnera. Qallersaataa qummoorsimasoq puussianngortarporlusooq pisisup assigiinngitsunik immersinnaasaa. Tunisiumatugutta imaassinnaavoq uagut nammineq naammangaartunik tunineqartugut, assersuutigalugu immaqa annikilliornitsinni. — Oqaluussisartup oqaasii 11:2.

17. Tunisineq eqqarsaatigalugu Jehova qanoq maligassiuilluarnerpaava, aamma qanoq tunisineq nuannaarutaassava?

¹⁷ Jehovap nuannaarlutik tunisisut asavai, aamma akissarsisittarpai. Taanna nammineq maligassiuilluarnerpaavoq, ernituani tunniukkamiuk “taassumunnga uppertoq kinaluunniit tammaqqunagu naassaanngitsumilli inooqqullugu”. (Johannesi 3:16) Paulusi ima allappoq: ‘Naammangaartunik siaruarterisoq aamma naammangaartunik katersuiumaarpoq. Kinaluunniilli tunisissaaq uummammigut aalajangiisimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq!’ (2 Korinthimiut 9:6, 7) Pallorfiginninneq ilumoortoq siuarsarniarlugu piffissarput, nukivut pigisavullu atortarutsigit nuannaarnerulissallutalu akissarsisinneqangaassaagut. — Atuakkit Ussatit 19:17; Lukasi 16:9.

“Siuninni qarlortartitseqinak”

18. Pissutsini qanoq ittuni Ataatatsinnit qilammiusumit ‘akissarsisinneqarnavianngilagut’?

¹⁸ “Mianersuutiginiarsiuk iluassutsissi inunnut nittarsaannissaa, taakkununnga takoqqullusi. Nittarsaattarussiummi Ataatassinni qilanniittumi akissarsiassaqassanngilasi.” (Matthæusi 6:1) Jiisusip oqaaseq ‘iluassuseq’ atoramiuk pissusilersorneq Guutip piumasaanut naapertuuttoq pivaa. Una pinngilaa, allanik isigisoqartillugu ajunngitsuliortoqanngisaannassasoq,