Inuusuttuutillutit aalajangerit Jehovamut kiffartorniarlutit

„Ilinniarsimasatit nakimaatsumillu upperilersimasatit aalajangiunniakkit!“ — 2 TIMOTHEUSI 3:14.

1. Jehovap nalunaajaasumi inuusuttut kiffartornerat qanoq isigaa?

INUUSUTTUT illernartumik kiffartornerat Jehovamut ima pingaaruteqartigaaq taassuma tussiaasiortoq ima siulittuinissaanut isumassarsisissimallugu: „Ullormi sakkutuussannik sorsuttussarsiffigisanni innuttatit kajumillutik sassarumaarput. Illernartumik assuarsimallutik, qaalersup erniaasut, innuttatit inuusuttut kanernertut issapput.“ (Tussiaat 110:3, NV) Aap, Jehovap inuusuttut kajumillutik imminut kiffartorusuttut pingaartingaarpai.

2. Ullumikkut inuusuttut siunissamut anguniagassanut tunngatillugu silamiunit qanoq sunnerniarneqartarpat?

² Ilissi inuusuttut ilagiinni kristumiuniittut Jehovamut tunniulluinnarsimavisi? Amerlasuut Guutimut ilumoortumut kiffartussanerlutik aalajangeruminaatsittarpaat. Niuernerup silarsuaani siuttuusut, ilinniartitsisut ilaannikkullu aamma ilaquttat ikinngutillu inuusuttunik kajumissaarisarput nunap piinut tunngasunik anguniagaqaqqullugit. Taamaattumik inuusuttut anersaakkut ittunik anguniagaqartut silarsuarmi isornartorsiorneqarajupput. Ilumoortorli unaavoq: Inooriaatsimik Guutimut ilumoortumut kiffartornermit pitsaanerusumik toqqagassaqanngilaq. (Tussiaat 27:4) Tamatumunnga tunngatillugu apeqqutit pingasut ukua eqqarsaatigikkit: Sooq Guutimut kiffartortariaqarpit? Allat qanoq oqarnerat qanorlu iliornerat apeqqutaatinnagu qanoq ilillutit Guutimut tunniulluinnarsimallutit inuusinnaavit? Illernartumik kiffartornissamut periarfissat nuannersut suut illit periarfissarilersinnaavigit?

Jehovamut kiffartorneq toqqagassaavoq eqqortoq

3. Jehovap pinngortitarsua uagutsinnut qanoq sunniuteqartariaqarpa?

³ Sooq Guuti uumallunilu ilumoortoq kiffartorfigisariaqarpiuk? Tamatumunnga pissutaasoq pingaaruteqarnerpaaq Saqqummersitat 4:11-mi ima allassimavoq: „Illit, Naalagarput Guuterpullu [Jehova Guuterput, NV], qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.“ Jehova sunik tamanik pinngortitsisuuvoq. Nunarsuaq kusanarnerpaanut ilaavoq. Orpiit, naasut, uumasut, imarsuit, qaqqat qorlortorsuillu — taakkua tamaasa Jehovap pinngortitarai. Tussiaat 104:24-mi ima allassimavoq: ’Nunarsuaq [Guutip] pinngortitaanik ulikkaarpoq.’ Qujamasuutigisinnaavarput Jehovap asannilluni timilersimammatigut aamma silaqassusilersimammatigut nunarsuarmik nuannersorpassuarnillu tamatumaniittunik nuannaarutiginnissinnaanngortitsisunik. Pinngortitarsuarmik alutornangaartumik iluunngarluni qujamasuutiginninneq taassumunnga kiffartorusulissutigisariaqarparput, ilaa?

4, 5. Josvap suut Jehovamut qanittumik attaveqalissutigai?

⁴ Jehovamut kiffartornissamut pissutissaq alla Israelikkunnik siulersuisup Josvap toqungajalernermini Guutip innuttaanut oqaasiini erserpoq: „Tamassi uummatissigut tarnissigullu ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput.“ Sooq Josva taama oqarsinnaasimava? — Josva 23:14.

⁵ Josva meeraalluni Egyptenimi peroriartorami Jehovap Israelikkunnut nunamik namminneq pigilerumaagaannik tunniussiumaarnerminik neriorsuutaa pillugu ilisimasaqarsimassaaq. (1 Mosesi 12:7; 50:24, 25; 2 Mosesi 3:8) Tamatuma kingorna Josva Jehovap Egyptenimut perlunnik qulinik atuutitsinermigut Faraomillu uteriitsumik Israelikkunnik aallartitsisitsinermigut neriorsuutiminik eqqortitsilerneranik takunnittuuvoq. Josva aamma Immakkut Aappalaartukkut aniguisinneqartunut ilaavoq, tamatumalu kingorna takuaa Faraop sakkutuuisalu immamit iineqarnerat. Inoqajuitsukkut Sinajikkut — „inoqajuitsorsuakkut navianartulikkut“ — sivisuumik angalanermini Josvap takuaa Jehovap Israelikkut pisariaqartitaannik tamanik qanoq isumaginninnera. Taakkua ilaat ataasiinnarluunniit perlernaniluunniit qilalluni toqunngilaq. (5 Mosesi 8:3-5, 14-16; Josva 24:5-7) Israelikkut inuiannik Kana’anikkunnik ajugaaffiginninnissaannut nunamillu neriorsuutigisamik tiguaanissaannut piffissanngormat Josvap takuaa Guutip nammineq Israelikkullu allat pallorfigisamik suliassamut tamatumunnga tunngatillugu qanoq ikioraatik. — Josva 10:14, 42.

6. Qanoq ilillutit Guutimut kiffartorusunnerulersinnaavit?

⁶ Josvap nalunngilaa Jehova neriorsuutiminik piviusunngortitsisimasoq. Taamaattumik ima oqarpoq: „Uanga inoqutimalu [Jehova] kiffartuukkumavarput.“ (Josva 24:15) Illimmi? Illit Guutip ilumoortup neriorsuutai piviusunngortereersimasaalu siunissamilu piviusunngortikkumaagai tamaasa eqqarsaatigigaangakkit Josvap pisimaneratut taassumunnga kiffartorusulertarpit?

7. Sooq kuisinneq iliuusiua pingaarutilik?

⁷ Jehovap pinngortitarsuanik neriorsuutaanillu nuanningaartunik tutsuiginarluinnartunillu eqqarsaatiginninnerit Jehovamut tunniulluinnarnissamut kajumississutigiinnarnagu aammali kuisinnikkut tunniulluinnarsimaninnik ersersitsinissamut kajumississutigisariaqarpat. Kuisinneq Guutimut kiffartorusuttunut iliuusiuvoq pingaarutilik. Tamanna maligassatta maligassaalluarnerpaap, Jiisusip, iliuuserisimasaani erseqqippoq. Missiarsitut suliani aallartinngitsiarlugu kuisinniarluni Johannesi Kuisisoq saaffigaa. Sooq Jiisusi taama iliorpa? Kingusinnerusukkut ima oqarpoq: „Qilammit aqqarpunga uanga nammineq piumasara pinnagu aallartitsisimali piumasaa naammassiniarlugu.“ (Johannesi 6:38) Jiisusip kuisikkami takutippaa Ataatami piumasaatut iliorniarluni Guutimut sassarluni. — Matthæusi 3:13-17.

8. Sooq Timotheusi aalajangerpa Guutimut kiffartorniarluni, illillu susariaqarpit?

⁸ Aamma Timotheusi eqqarsaatigeriaruk. Taanna kristumiuuvoq inuusuttoq kingusinnerusukkut Jehovamit amerlasuunik suliassinneqarlunilu immikkut pisinnaatitaaffilerneqartoq. Sooq Timotheusi aalajangerpa Guuti ilumoortoq kiffartorfiginiarlugu? Biibilimi allassimavoq ’ilinniarsimasani nakimaatsumillu upperilersimasani’ pissutigalugit taamaaliortoq. (2 Timotheusi 3:14) Guutip oqaasia, Biibili, atuaqqissaarsimagukku tamatumanilu ilinniartitsissutigineqartut ilumoornerat qularutigiunnaarsimagukku, Timotheusip taamanikkut inissisimaneranut eqqaanartumik inissisimavutit. Illittaaq aalajangertariaqarputit. Soormi angajoqqaatit pilersaarutitit pillugit oqaloqatigigukkit? Taava taakkua ilagiinni utoqqaanertat peqatigalugit oqaluttuutissavaatsit kuisikkumalluni piumasaqaatit Biibilimiittut suut naammassineqartariaqarnersut. — Atuaruk Apustilit Suliaat 8:12.

9. Kuisikkuit inuit ilaat qanoq periarsinnaappat?

⁹ Kuisinnerit Guutimut ilumoortumut kiffartorninnut aallarniutaalluassaaq. Kuisinnikkut arpanneq, inuunermik naassaanngitsumik nuannaarnermillu Guutip piumasaatut iliornikkut maannangaaq misigineqartartumik akissarsiassartalik, aallartissavat. (Hebræerit 12:2, 3) Aamma ilaquttannut arpaqataalereersunut ikinngutinnullu ilagiinni kristumiuniittunut tamanna nuannaarutaassaaq. Pingaarnerpaamilli: Jehovap uummataa nuannaartissavat. (Atuaruk Ussatit 23:15.) Imaassinnaavoq allat paasisinnaanngikkaat sooq Jehovamut kiffartorniarlutit aalajangernersutit, aamma immaqa isumaqarput aalajangikkat eqqortuunngitsoq. Immaqa allaat akerlilersussavaatsit. Unamminiarnartulli tamakkua naammagalugit atorsinnaassavatit.

Allanit aperineqarlutilluunniit akerlilersorneqaraangavit

10, 11. (a) Guutimut kiffartorniarlutit aalajangeruit inuit ilaasa immaqa qanoq aperissavaatsit? (b) Jiisusip pallorfiginninneq ilumoortoq pillugu apeqqutinik akiseriaasia sumik ilinniarfigisinnaavarput?

¹⁰ Atuaqativit, ilaquttavit ilisarisimasavillu allat Jehovamut kiffartorusunnerit immaqa eqqumiigaat. Imaassinnaavoq sooq taamatut aalajangersimanersutit aperigaatsit aamma upperisat pillugu apersoraatsit. Qanoq iliussavit? Soorunami sooq taamatut aalajangersimanerlutit eqqarsaatigilluareersimasariaqarpat, tamannalu sooq taamatut aalajangersimanerlutit nassuiaanissamut iluaqutigissavat. Upperisat pillugu apeqqutinik akisissagaangavit Jiisusip maligassiaanik malinninneq iliuuserisinnaasavit pitsaanerpaartaraat.

¹¹ Jiisusi juutit upperisarsiornikkut siuttuinit makititaanissaq pillugu apersorneqarami allassimaffik taakkua eqqarsaatigisimanngisaat innersuussutigaa. (2 Mosesi 3:6; Matthæusi 22:23, 31-33) Allakkanik ilisimasup aperimmani inassut annerpaaq suunersoq, Jiisusip allassimaffiit tulluartut issuaavigai, angutillu taassuma Jiisusip akissutaa qujamasuutigaa. (3 Mosesi 19:18; 5 Mosesi 6:5; Markusi 12:28-34) Jiisusip Allakkanik atueriaasia oqaloriaasialu ’inuit akornanni isumaqatigiinngisitsilerpoq’. (Johannesi 7:32-46) Upperisat pillugu apeqqutit akigaangakkit Biibili atortaruk ’saamallutillu ataqqinnilluinnarlutillu’ akisarlutit. (1 Petrusi 3:15, NV) Apeqqut akisinnaanngikkukku, tamanna nassuerutigiuk misissoqqaarumallugulu. Taava Register til Vagttårnets publikationer imaluunniit Watchtower Library cd-rommimiittoq atorlugu paasissutissanik ujaasisinnaavutit. Piareersarluartaruit paasissavat ’kikkut tamaasa qanoq akisariaqartassallugit’. — Kolossemiut 4:6.

12. Sooq malersorneqarneq sapiissuseerussutigissanngilarput?

¹² Imaassinnaavoq illit isummat upperisallu pillugit aperineqaannanngitsutit. Guutimummi akeraasoq, Saatani Diaavulu, silarsuarmik aqutsisuuvoq. (Atuaruk 1 Johannesi 5:19.) Piviusorsiornerussanngilaq naatsorsuutigissallugu aalajangikkat pillugu kikkunnit tamanit nersualaarneqarnissat akuerineqarnissalluunniit, aamma immaqa akerlilersorneqassaatit. Inuit ilaasa immaqa ’mitaatigiuassavaatsit’. (1 Petrusi 4:4) Eqqaamajulli kisimiinnginnavit. Jiisusi Kristusi aamma malersorneqarpoq. Apustili Petrusi aamma malersorneqarpoq, taannalu ima allappoq: „Asasakka, innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu. Tipaatsugitsili Kristusi anniarnerani peqatigigassiuk.“ — 1 Petrusi 4:12, 13.

13. Sooq kristumiut malersugaanertik nuannaarutigisinnaavaat?

¹³ Kristumiuuneq pissutigalugu malersorneqarneq akerlilersorneqarnerluunniit nuannaarutigineqarsinnaavoq. Sooq? Nammineq inooriaaserisaq silarsuarmiittunit tamanit nuannarineqarpat, tamanna Saatanip najoqqutassiaanik — Guutip najoqqutassiaaniunngitsoq — malinninnermut ersiutaassagaluarmat. Jiisusi ima mianersoqqusivoq: „Eqqanaq tamanit ajunngitsumik oqaluuserineqarussi. Siuaasaasami pruffiitioqqusersuttaaq taama iliorfigaat.“ (Lukasi 6:26) Malersorneqaruit tamanna Jehovamut kiffartornerit pissutigalugu Saatanimit taassumalu silarsuaanit kamaanneqarninnut ersiutaassaaq. (Atuaruk Matthæusi 5:11, 12.) Taamaattumik ’Kristusip aqqa pissutigalugu mitaatigineqarnerit’ nuannaarutigisinnaavat. — 1 Petrusi 4:14.

14. Malersorneqarnermi Jehovamut aalajaattuarneq nuannersunik sunik kinguneqassava?

¹⁴ Akerlilersorneqarnerni Jehovamut aalajaattuaruit, tamanna nuannersunik minnerpaamik sisamanik kinguneqassaaq. Guuti taassumalu ernera pillugit nalunaajaassaatit. Aalajaallutit pinertusaarnerit qatanngutinnut kristumiunut qiimmassaataassaaq. Jehovamik nalusut immaqa taassuminnga ujartuinissamut kajumissisinneqassapput. (Atuaruk Filippimiut 1:12-14.) Aamma misilinneqarnernik naammagittarluni atuinissamut Jehovamit nakussatsinneqarnerit misigigaangakku, taassumunnga asanninnerit ineriartortassaaq.

’Ammaanneqarputit periarfissaqarluarlutillu’

15. Apustili Paulusi sumut ’ammaanneqarpa’?

¹⁵ Apustili Paulusi Efesosimi kiffartornini pillugu ima allappoq: „Sulilluarnissamut ammaanneqarpunga periarfissaqarluarlungalu.“ (1 Korinthimiut 16:8, 9) Illoqarfimmi tamatumani nutaarsiassamik nuannersumik oqaluussissutiginninneq ajoqersuganngortitsiortornerlu sulilluarnissamut periarfissaalluarput. Periarfissanik taakkuninnga atuinermigut Paulusip inuppassuit Jehovamik ilisarisimannilernissaannut pallorfiginnilernissaannullu ikiorpai.

16. Tanitat kinguleruttut 1919-imi ’matu mapperneqarsimasoq’ qanoq iserfigaat?

¹⁶ 1919-imi Jiisusip Kristusip naalannarsisitaasimasup tanitat kinguleruttut ’matumik mappiuppai’. (Saqqummersitat 3:8) Qatanngutit taakkua matukkut tassuuna iserput aatsaallu taama pileritigalutik nutaarsiassamik nuannersumik oqaluussissutiginnilerlutik, sallusuissutit Biibilimeersut pillugit allanik ilinniartitsillutik. Taakkua oqaluussinerat qanoq kinguneqarpa? Nutaarsiassaq nuannersoq ullumikkut nunarsuup isua tikillugu allaat anngunneqarpoq, aamma inuit 7 millionit missaanniittut Guutip silarsuassaani nutaami naassaanngitsumik inuunissamik neriuuteqalerput.

17. Qanoq ilillutit ’sulilluarnissamut periarfissaalluartunik’ atorluaasinnaavit?

¹⁷ ’Sulilluarnissamut periarfissaalluartut’ Jehovap kiffaanut tamanut suli ammapput. Taakkuninnga atorluaasut nutaarsiassamik nuannersumik oqaluussissutiginninnermi iliuuseqarnerunermikkut nuannaarlutillu nalerisimaarput. Ilissi Jehovamut kiffaasut inuusuttut, ’iivangkiiliumik upperinnilernissamut’ allanik ikiuinermik immikkut pisinnaatitaaffik nalissaqanngitsoq qanoq pingaartitsigaasiuk? (Markusi 1:14, 15) Pionerinngornissat imaluunniit ikiorti-pionerinngornissat eqqarsaatigisimaviuk? Aamma ilarpassuassinnut naalagaaffilersaarfilioqataaneq, Betelimi kiffartorneq ajoqersuiartortitatulluunniit angalaneq periarfissaalersinnaapput. Saatanip silarsuaa ajortoq piffissaarutilermat Guutip naalagaaffianut kiffartoriaatsini taakkunani peqataanissaq ullut tamaasa nukinginnarneruleraluttuinnarpoq. Piffissaqarallartillugu ’periarfissaalluartunik’ atorluaarusuppit?

’Ussersiuk takusiullu Jehova ajunngitsuusoq’

18, 19. (a) Daavip Jehovamut kiffartornissaminik kissaateqangaarnermi attatiinnarnissaanut suna iluaqutigaa? (b) Sumit erserpa Daavip Guutimut kiffartornini peqqissimissutiginngisaannaraa?

¹⁸ Tussiaasiortup Daavip isumassarsisitaalluni allat kajumissaarpai ’Jehovap ajunngitsuuneranik ussiillutillu takunneqqullugit’. (Tussiaat 34:9) Daavi nukappiaraalluni savanik paarsisuusoq Jehovap uumasut nujuartat saassussinerinit annaattarpaa. Aamma Goliatimut akiuummat Guutip annertoqqusersorpaa ajunaarnernillu allarpassuarnit annaattarlugu. (1 Samueli 17:32-51; Tussiaat 18:1) Guutip ilumoorfiginnilluni tunniusimangaarnera kajumississutigalugu Daavi ima allappoq: „Angingaarput naammassisatit; [Jehova] Guutiga, iluaqutigaavut suliatit pilersaarutitillu tupinnangaartut, ilinnut naleqqiunneqartoqarsinnaanngilaq!“ — Tussiaat 40:6.

¹⁹ Daavi Jehovamik asanningaalerpoq isumakkullu uummatikkullu iluunngarluni taassuminnga unnersiutiginninnissani kissaatigalugu. (Atuaruk Tussiaat 40:9-11.) Ukiut ingerlatillugit Daavip inuunerminik Guutimik ilumoortumik pallorfiginninnermut atuisimanini peqqissimissutiginngisaannarpaa. Taassumunnga erlinnartuut annerpaaq tassaavoq Guutimut tunniusimalluni inuuneq, tamannalu allamut naleqqiunneqarsinnaanngitsumik nuannaarutigaa. Utoqqalilluni Daavi ima allappoq: „Illit neriuffigaakkit, [Jehova], inuusunninnilli qimarnguffigisarpakkit, [Jehova]. Taava qimaqinanga, Guuti, utoqqanngoruma qeersuunngorumalu.“ (Tussiaat 71:5, 18) Daavi timikkut sanngiilliartoraluarluni Jehovamik tatiginninnerujartuinnarpoq ikinngutigiinnerallu nukittoraluttuinnarluni.

20. Sooq Guutimut kiffartorneq inooriaasiua pitsaanerpaaq?

²⁰ Josvap, Daavip Timotheusillu inooriaasiat uppernarsaataavoq Jehovamut kiffartornerup illit inooriaaserisinnaasanni pitsaanerpaajuneranut. Silarsuarmi matumani anguniagaqarnerup pigisatigut iluaqutissartarisinnaasai killeqartut, iluaqutissanut sivisuumik atasussanut ’Jehovamut uummatikkut tarnikkullu iluunngarlutit kiffartornikkut’ angusinnaasannut sanilliunneqarsinnaanngisaannassapput. (Josva 22:5) Jehovamut qinunikkut tunniulluinnareersimanngikkuit imminut ima aperigit: ’Jehovamut nalunaajaasunngornissannut suna akornutigaara?’ Kuisereersimaguit Jehovamullu kiffartorlutit, inuunermi suli nuannaarutissaqarnerorusuppit? Taamaappat kiffartornerulerit anersaakkullu siumukartuarlutit. Allaaserisami tulliuttumi apustilip Paulusip maligassiaanik malinninnikkut qanoq ilillutit anersaakkut ineriartorsinnaanersutit ilinnut paasinarsisinneqassaaq.

Paulusip maligassiaanik malinninnikkut anersaakkut siumukarit

„Ajunngitsoq sorsuutigisimavara, arpaffissaq naavara upperneralu attatiinnarlugu.“ — 2 TIMOTHEUSI 4:7.

1, 2. Saulusi Tarsusimiu inuunermini qanoq allannguiva, suliassarlu pingaarutilik suna suliarilerpaa?

SILASSORISSUULLUNILU piumassuseqarluarpoq. ’Uinimmili eqqarsaatimilu piumasaat malillugit iliortarpoq’. (Efesosimiut 2:3) Kingusinnerusukkut ’mitaatiginnittutut qinuginnittutullu angutaasersorsuartullu’ imminut allaatigivoq. (1 Timotheusi 1:13) Angut taanna tassaavoq Saulusi Tarsusimiu.

² Kingusinnerusukkut Saulusi inuunermini allannguerujussuarpoq. Siornatigut inooriaaserisimasani inooriaaseriunnaarpaa ’imminullu pitsaanerpaasussaq pinnagu, amerlasuunut iluaqutaasoq’ assut pingaartillugu. (1 Korinthimiut 10:33) Saamasumik pissusilersorpoq akeqqersimaarfigisimasanilu asalerlugit. (Atuaruk 1 Thessalonikamiut 2:7, 8.) Ima allappoq: ’Kiffartortunngorpunga,’ imalu nangilluni: „Uanga illernartunit tamanit nikanarnersaasunga saammaanneq [ajunngissuseq pisassarinngisaraluaq, NV] manna pivara Kristusip peqangaassusia siunersissaanngitsoq Guutimik nalusunut nalunaajaatigeqqullugu.“ — Efesosimiut 3:7, 8.

3. Paulusip allagaanik kiffartornerminillu oqaluttuaanik atuaqqissaarneq qanoq iluaqutigisinnaavarput?

³ Saulusi, aamma Paulusitut ilisimaneqartoq, maluginiarnartumik anersaakkut siumukarpoq. (Apustilit Suliaat 13:9) Sallusuissummi siumukarusukkutta Paulusip allagaanik kiffartornerminillu oqaluttuaanik misissuinerput, tamatumalu kingorna upperneranik ilaarsinerput, qularnanngilluinnartumik iluaqutigissavarput. „Eqqarsaatiginiarsigit siulersortisi Guutip oqaasiinik ilissinnut oqalussimasut, inuunerisalu naggatissaat eqqarsaatigisiuk [iliuusiisa kinguneri maluginiaqqissaartarlugit, NV] uppersuseqarnerisigullu assiginiarlugit.“ (Hebræerit 13:7; atuaruk 1 Korinthimiut 11:1.) Tamanna nammineq atuaqqissaartarnermik ileqquliussilluarnissamut, allanut asanninnermik ilumoortumik ineriartortitsinissamut imminullu eqqortumik isiginissamut qanoq kajumississutigisinnaaneripput misissoriartigu.

Paulusip Allakkanik atuaqqissaartarnera

4, 5. Paulusip nammineq atuaqqissaartarnini qanoq iluaqutigaa?

⁴ Farisiiariugami ’Gamalielip isigaasa killinganni siuaasat inatsisaannik peqqissaartumik ilinniartinneqarsimasoq’, Paulusip Allakkani qanoq allassimasoqarnersoq nalunngereerpaa. (Apustilit Suliaat 22:1-3; Filippimiut 3:4-6) Kuiseqqammerluni ’Arabialiarpoq’ — immaqa Syriap Inoqajuitsuanut imaluunniit Arabiami eqqissisimanartumut allamut eqqarsaatiginnilluarnissamut periarfissaqarfiulluartumut. (Galatiamiut 1:17) Qularnanngitsumik Paulusip allassimaffiit Jiisusip Missiarsiuneranut uppernarsaataasut eqqarsaatigerusuppai. Aammattaaq kissaatigaa suliassaminut piareersarnissani. (Atuaruk Apustilit Suliaat 9:15, 16, 20, 22.) Paulusip anersaakkut ittunik eqqarsaatiginneqqissaarnissani piffissaqarfigaa.

⁵ Paulusip nammineq atuaqqissaarnermigut Biibilimik ilisimasaqalernini paasisimasaqalerninilu pissutigalugit sallusuissut pillugu sunniuteqarluartumik ilinniartitsisinnaanngorpoq. Assersuutigalugu synagogimi Antiokiami Pisidiamiittumi Jiisusip Missiarsiunera uppernarsarniarlugu Allakkat Hebræerisuut minnerpaamik tallimariarluni toqqaannartumik issuaavigai. Paulusip aamma allakkat illernartut arlaleriarluni innersuussutigai. Tunngavilersuutai Biibilimeersut qularunnaarnangaarmata „juutit juutillu upperisaannut ilanngussimasut Guutimik mianerinnittut arlalissuit Paulusi Barnabalu ingerlaqatigaat“ ilikkagaqarnerujumallutik. (Apustilit Suliaat 13:14-44) Ukiut arlallit tamatuma kingorna juutit eqimattat Romamiittut taanna inisimaffianut pulaarmassuk, Paulusi „taakkununnga nassuiaavoq nalunaajaallunilu Guutip naalagaaffianik, Mosesillu inatsisai pruffiitillu najoqqutaralugit Jiisusimik [qularunnaarsinniarlugit]“. — Apustilit Suliaat 28:17, 22, 23.

6. Paulusip misilinneqaraangami anersaakkut nukittujuarnissaminut suna iluaqutigisarpaa?

⁶ Paulusi misilinneqaraangami Allakkanik atuaqqissaartuartarpoq tusarliussarlu taakkunaniittoq isumassarsiarititaasoq nakussatsissutigisarlugu. (Hebræerit 4:12) Toqutaanissani sioqqutitsiarlugu Romami parnaarussivimmiilluni Timotheusi qinnuigaa „mappersakkat [nassaqqullugit], pingaartumik taakku pergamentimut allassimasut“. (2 Timotheusi 4:13) Assammik assilillugit allakkat taakkua qularnanngitsumik Allakkanit Hebræerisuuneersuupput Paulusip peqqissaartumik atuarnermini atortagai. Allakkat pillugit ilisimasaqarnissani aalajangersimasumillu Biibilimik atuaqqissaartarnermut pilersaarummik malitaqarnissani pingaartippaa aalajaalluni pinertusaarsinnaaniassagami.

7. Aalajangersimasumik Biibilimik atuaqqissaartarnerup iluaqutissartaasa ilaannik eqqaasaqarit.

⁷ Siunertaqarluartumik eqqarsaatiginniitigaluni aalajangersimasumik Biibilimik atuaqqissaartarneq anersaakkut siumukarnissatsinnut iluaqutigissavarput. (Hebræerit 5:12-14) Guutip oqaasiisa pingaaruteqassusiat pillugu tussiaasiortoq ima erinarsorpoq: „Inatsisit tunniussimasatit iluaqutigineruakka kuultinit sølvinillu tuusintinit. Naalakkiutivit akeqqannit ilisimasaqarnerulersippaannga uanni ittuinnaramik. Isikkakka aqqutinit ajortunit tamanit nigorsimatippakka oqaatsisit maleruarsinnaaqqullugit.“ (Tussiaatit 119:72, 98, 101) Biibilimik nammineq atuaqqissaartarneq ileqquliussimaviuk? Guutimut kiffartornermi siunissami suliassariumaakkannut piareersartarpit ullut tamaasa Biibilimik atuartarnikkut atuakkannillu eqqarsaatiginnittarnikkut?

Saulusip allanut asannittuliorneq ilikkarpaa

8. Saulusip inuit juutiussutsimut ilaanngitsut qanoq pisarpai?

⁸ Saulusi kristumiunngunngikkallarami upperisaminik aallussilluartuusimavoq, juutiussutsimulli ilaanngitsunik iluarinnippiarsimanngilaq. (Apustilit Suliaat 26:4, 5) Taassuma Stefanusip juutinit ujaqqanik milloorneqarnera iluaralugu isiginnaarpaa. Immaqa Stefanusip toqutaanera eqqortumik pillaanertut isigaa taamaattumillu isumaqannguatsiarluni Jiisusip ajoqersugaanik malersuinissamut pisinnaatitaalluinnarluni. (Apustilit Suliaat 6:8-14; 7:54–8:1) Biibilimi ima allaatigineqarpoq: „Saulusip ilagiit nungutinniarpai, illunut iseqattaarluni angutit arnallu aallaruttarpai parnaarutitittarlugillu.“ (Apustilit Suliaat 8:3) Allaat ’illoqarfiit nunani allaniittut tikivillugit malersortarpai’. — Apustilit Suliaat 26:11.

9. Pisimasoq suna pissutigalugu Saulusip inunnik allanik pinnittarnini isumaliutigeqqippaa?

⁹ Naalakkap Jiisusip Saulusi saqqummerfigimmagu, taanna Damaskusimut ingerlaarpoq tassani Kristusip ajoqersugaanik malersuiniarluni. Guutip ernerata tupinnartuliornikkut qinngornera pissutigalugu Saulusi tappingerpoq nammineersinnaassuseerullunilu. Jehovap Anania atorlugu Saulusi isigisaqarsinnaanngorteqqimmagu taassuma allanut isiginnittaasia ataavartumik allanngorpoq. (Apustilit Suliaat 9:1-30) Kristusimut ajoqersuganngoreerami Jiisusip iliorsimaneratut inunnik tamanik pinnittarnissani tamaviaarutigaa. Tamatuma kingunerisaanik nakuusertarunnaarpoq ’inuillu tamaasa eqqisseqatiginissaat’ ilungersuutigilerlugu. — Atuaruk Romamiut 12:17-21.

10, 11. Paulusip inoqatini qanoq ilumoortumik asannittuliorfigai?

¹⁰ Paulusip allanik eqqisseqatiginninnissaannaq naammagiinnarnagu, ilumoortumik asannittuliorfiginninnissani kissaatigaa, kristumiutullu kiffartorneq aqqutigalugu taamaaliornissamut periarfissaqalerpoq. Ajoqersuiartortitatut angalanermini siullermi nutaarsiassaq nuannersoq Asiaaqqami oqaluussissutigaa. Sakkortuumik akerlilersorneqaraluarlutik Paulusip angalaqataasalu inuit maniguuttut kristumiunngornissaannut ikiornissaat salliutippaat. Lystra Ikonionilu tikeraaqqippaat, naak akerlilersuisut illoqarfinni taakkunaniittut Paulusimik toqutseriarsimagaluartut. — Apustilit Suliaat 13:1-3; 14:1-7, 19-23.

¹¹ Kingusinnerusukkut Paulusi angalaqataalu illoqarfimmi Makedoniamiittumi Filippimi eqqortumik isumaqarfiginnittunik ujaasipput. Juutit upperisaannut ilanngussimasup Lydiamik atillip nutaarsiassaq nuannersoq tusarnaarpaa kristumiunngorlunilu. Illoqarfimmi atorfillit Paulusip Silasillu iperartorneqarnissaat parnaarunneqarnissaallu peqqussutigaat. Paulusilli parnaarussanik paarsisoq oqaluussiffigaa, tamannalu taassuma taassumalu ilaqutaasa Jehovamut kiffatut kuisinnerannik kinguneqarpoq. — Apustilit Suliaat 16:11-34.

12. Saulusip sorraatsup suna kajumississutigaa Jiisusimut Kristusimut apustilitut asannittunngornissaminut?

¹² Paulusip, siornatigut malersuisuusimasup, suna malersukkami upperisaattut upperisaqalissutigaa? Inuup sorraatsup taassuma apustilitut inussiarnerlunilu asannittunngornissamut, allat Guuti Kristusilu pillugit sallusuissut paasisinnaaniassammassuk inuunerminik ulorianartorsiortitsinissamut, suna kajumississutigaa? Paulusi nammineq ima nassuiaavoq: „Guutip . . . saammaannermigut [ajunngissutsimigut pisassarinngisaraluakkut, NV] qaaqqusisima aalajangermagu ernini uannut saqqummersikkumallugu.“ (Galatiamiut 1:15, 16) Timotheusimut ima allappoq: „Tamannarpiaq pissutigalugu nallittorneqarpunga Kristusi-Jiisusip kamajuissuserminik takutitsiffigisaani siullersaasinnaaqqullunga, uppertunngorumaartunut inuunermillu naassaanngitsumik pissarsisussanut maligassatut.“ (1 Timotheusi 1:16) Jehovap Paulusi isumakkeerfigaa, Paulusillu taamatut pisassarinngisaraluamik ajunngisaarfigineqarnini nallittorneqarninilu pissutigalugit allanut asannittuliorpoq nutaarsiassaq nuannersoq taakkununnga oqaluussissutigalugu.

13. Allanut asannittuliornissamut suna kajumississutigisariaqarparput, qanorlu asannittuliorsinnaavugut?

¹³ Jehovap uagut aamma kukkunitsinnik ajortitsinnillu isumakkeerfigisarpaatigut. (Tussiaat 103:8-14) Tussiaasiortoq ima aperaaq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Guutimit nallittorneqarnata arlaannarpulluunniit kiffartornermik illernartumik nuannaarutiginnissinnaassanngikkaluarpoq, aamma naassanngitsumik inuusinnaanngortinneqarnissarput qilanaarisinnaassanngikkaluarparput. Guutip tamatta ajunngissusermik pisassarinngisaraluamik ersersitsivigaatigut. Taamaattumik Paulusip pisimaneratut oqaluussinitsigut sallusuissullu pillugu ilinniartitsinitsigut qatanngutitsinnillu nakussatsitsinitsigut allanut asannittuliornissarput kissaatigisariaqarparput. — Atuaruk Apustilit Suliaat 14:21-23.

14. Guutimut kiffartornitsinni immaqa qanoq ililluta iliuuseqarnerulersinnaavugut?

¹⁴ Paulusip nutaarsiassamik nuannersumik oqaluussissutiginnittutut siumukarnissani kissaatigaa, aamma Jiisusip maligassiaa puiugassarinngisaminik killinneqaatigisimavaa. Guutip ernera ilaatigut oqaluussinermigut inunnut asseqanngitsumik asannittuliorpoq. Jiisusi ima oqarpoq: „Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.“ (Matthæusi 9:35-38) Paulusip qularnanngitsumik suli amerlanerusunik sulisussaqarnissaa pillugu qinnutigisarsimasani naapertorlugit iliuuseqartarpoq nammineq oqaluussisartutut aallussilluartuunermigut. Illimmi? Illit kiffartornerit pitsanngorsarsinnaaviuk? Imaluunniit Guutip naalagaaffianik oqaluussissutiginneqataanerulersinnaavit, immaqa allaat inuuninni allannguillutit pionerinngorsinnaaniassagavit? Allanut ilumoortumik asannittuliorta, ’oqaatsimik inuuneqaataasumik aalajangiussinissaannut’ taakkua ikiornerisigut. — Filippimiut 2:16.

Paulusip imminut qanoq isiginera

15. Paulusi uppeqatiminut kristumiunut sanilliulluni imminut qanoq isigiva?

¹⁵ Guutip oqaasianut kiffaasutut Paulusi suli allatigut uagutsinnut maligassaalluarpoq. Ilagiinni kristumiuni immikkut pisinnaatitaaffippassuaqaraluarluni nalunngilluinnarpaa nammineq iliuuseqarnini piginnaaniniluunniit taakkuninnga immikkut pisinnaatitaaffeqarnerminut pissutaanngitsut. Imminut pilluaqqussutigineqartut Guutip ajunngissusianut pisassarinngisaraluamut ersiutaanerat paasivaa. Paulusip aamma misiutiginngilaa kristumiut allattaaq nutaarsiassamik nuannersumik oqaluussissutiginnittuusut pikkorissut. Guutip innuttaasa akornanni akisussaaffeqaraluarluni maniguuttuarpoq. — Atuaruk 1 Korinthimiut 15:9-11.

16. Paulusi kipineqartarneq pillugu ajornartorsiut eqqarsaatigalugu qanoq maniguullunilu anneruniajuippa?

¹⁶ Paulusip ajornartorsiummik Syriamiut illoqarfianni Antiokiami pilersumik qanoq iliuuseqarfiginninnera eqqarsaatigeriaruk. Ilagiit kristumiut tassaniittut kipineqartarneq pillugu apeqqut isumaqatigiinngissutigaat. (Apustilit Suliaat 14:26–15:2) Paulusi juutiunngitsut kipineqanngitsut akornanni oqaluussinermi siuttuusussanngortinneqarsimagami, apeqqutinik juutiunngitsunut tunngasunik paasisimannilluartutut taamaattumillu ajornartorsiummik kisimi aaqqiinissamut piukkunnarluartutut imminut isigisinnaagaluarpoq. (Atuaruk Galatiamiut 2:8, 9.) Iliuuseqarnini aaqqiissutaasorinanngimmat maniguulluni anneruniajuillunilu siulersuisoqatigiinnut Jerusalemimiittunut saaffiginnittoqarnissaanut isumaqataavoq taakkua ajornartorsiut oqaloqatigiissutiginiassammassuk. Siulersuisoqatigiinnut ilaasortat ajornartorsiut pillugu tusarnaareerlutik aalajangiimmata taakkunanngalu nalunaariartortitanut ilaasussanngortinneqarami suleqataajumalluinnarpoq. (Apustilit Suliaat 15:22-31) Taamaalilluni Paulusi uppeqatiminik ataqqinninnermigut maligassiuivoq. — Romamiut 12:10b.

17, 18. (a) Paulusip qatanngutini ilagiinniittut qanoq misigissuseqarfigai? (b) Paulusip aallalernerani utoqqaanertat Efesosimiittut periarnerat Paulusi pillugu qanoq ilinniarfigisinnaavarput?

¹⁷ Paulusip maniguuttup qatanngutini ilagiinniittut ungasillinngilai. Qanittumik attaveqarfigilerpai. Romamiunut allakkami naggataatungaani inuit 20-t sinnerlugit atiisigut taallugit inuulluaqquai. Taakkua amerlanersaat Biibilimi allassimaffinni allani eqqaaneqanngillat, taakkualu ikinnerpaartaat immikkut ittunik pisinnaatitaaffeqarput. Jehovamulli kiffaapput ilumoorfiginnittut, Paulusillu asavai. — Romamiut 16:1-16.

¹⁸ Paulusip maniguuttuunnera inussiarnersuuneralu ilagiinnik nakussatsitsivoq. Utoqqaanertat Efesosimiut naggammik naapisimaaramigit, taakkua „Paulusi qungasiagut eqippaat kunillugulu. Anniaatiginerusaat tassaavoq oqarmat takoqqinnaveeritsik“. Taakkuninnga qimatsisussaq makitallunilu pingaakujuttuusimagaluarpat, taakkua taamatut periarsimanavianngikkaluarput. — Apustilit Suliaat 20:37, 38.

19. Kristumioqatitsinnut attaveqarnitsinni qanoq ililluta maniguunnermik ersersitsisinnaavugut?

¹⁹ Anersaakkut siumukarusuttut tamarmik Paulusitut maniguuttuusariaqarput. Taassuma kristumioqatini ima kajumissaarpai: „Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit.“ (Filippimiut 2:3) Siunnersuut taanna qanoq malissinnaavarput? llaatigut taamaaliorsinnaavugut utoqqaanertanut ilagiinniittunut suleqataanitsigut, taakkua siulersuinerat naapertorlugu iliornitsigut ingasattumillu ajortuliornernut tunngatillugu aalajangikkat naapertorlugit iliornitsigut. (Atuaruk Hebræerit 13:17.) Aamma siunnersuut taanna malissinnaavarput qatanngutitsinnik ilagiinniittunik tamanik pingaartitsillutalu ataqqinninnitsigut. Jehovap innuttaasa ilagiivinut ilaagajupput inuit inuiaassutsikkut, kulturikkut naggueqatigiissutsikkullu assigiinngitsunik tunuliaqutallit. Tamannali Paulusip iliorsimaneratut kinaassusersiorani asannittumillu kikkunnik tamanik pinninnissamik ilinniarfigilluarsinnaavarput, ilaa? (Apustilit Suliaat 17:26; Romamiut 12:10a) Kajumissaarneqarpugut ’akuereqatigiinnissamut soorlu Kristusip akuerigaatigut Guutip naalannaatissaanik’. — Romamiut 15:7, NV.

Inuunermut arpannermi pinertusaarit

20, 21. Inuunermut arpannermik naammassinninnissamut suna iluaqutigissavarput?

²⁰ Kristumiup inuunera sivisuumik arpannermut assersuunneqarsinnaavoq. Paulusi ima allappoq: „Ajunngitsoq sorsuutigisimavara, arpaffissaq naavara upperneralu attatiinnarlugu. Maanna uannut pissamaartitaavoq ajugaasumut niaqorusiussassaq iluarsutsip pia Naalakkap naapertuilluartumik eqqartuussisup ullussami issumani uannut tunniukkumaagaa — uannuinnaanngitsorli, kisianni aamma saqqummernissaminut qilanaartunut tamanut.“ — 2 Timotheusi 4:7, 8.

²¹ Paulusip maligassiaanik malinninnerput naassaanngitsumik inuunissamut arpannermik naammassinninnissamut iluaqutigissavarput. (Hebræerit 12:1) Taamaattumik anersaakkut siumukartuarta nammineq atuaqqissaarnermik ileqquliussilluarnitsigut, allanut asanninnermik ineriartortitsinitsigut maniguuttuarnitsigullu. (w08 05/15-E)

Qanoq akissavit?

• Paulusip aalajangersimasumik Allakkanik atuaqqissaartarnini qanoq iluaqutigaa?

• Sooq kristumiut ilumoortut inoqatiminnik ilumoortumik asanninnissaat pingaaruteqarpa?

• Pissuserineqartussat suut kinaassusersiornak allanik pinninnissamut iluaqutigissavigit?

• Paulusip maligassiaa illit ilagiinni utoqqaanertanik suleqateqarnissannut qanoq iluaqutigisinnaaviuk?