Ilisarsinissinnut ilanngussiuk imminut naalakkersinnaaneq

„Ilanngussiuk . . . ilisarsinermut imminut naalakkersinnaaneq . . . ilatsiinnartuussanngilasi inerititaqanngitsuussanasilu.“ — 2 PETRUSI 1:5-8.

1. Sooq inuit ajornartorsiuterpassuaqarpat?

IKIAROORNARTUNUT akiuunnermi USA-mi inuusuttut ima kajumissaarneqarput: „Naaggaaginnassaasi.“ Qanorlimi pissutsit pitsaanerutigissagaluarpat kikkut tamarmik ikiaroornartunut, aammalu imerajunnermut, silatusaanngitsumik kanngunartumilluunniit inooriaaseqarnermut, niuernermi peqquserluttuliornermut ’uinimmullu atasunut pilerinartunut’ naggaarsinnaagaluarpata. (Romamiut 13:14) Kinali oqarsinnaava naaggaarnissaq tamatigut ajornanngitsuusoq?

2. (a) Assersuutit Biibilimeersut suut takutippaat ullumikkuinnaanngitsoq naaggaarnissaq ajornakusoortinneqartarsimasoq? (b) Assersuutit taamaattut qanoq iliornissamut kajumissaarsinnaavaatigut?

² Inuit naammalluinnanngitsut tamarmik imminut naalakkersinnaaneq ajornakusoortittarmassuk tamatta soqutigisariaqarparput nammineq sorsuffigisariaqakkatsinnut ajugaanissap ilinniarnissaa. Biibilimi oqaluttuarineqarput itsaq inuit ilaat Guutimut kiffartorniaraluarnerminni naaggaartariaqakkaminnut ilaannikkut naaggaarnissaminnik artornartitsisarsimasut. Eqqaamajuk Daavip Batseba allasiorfigalugu ajortuliorsimanera. Tamatuma kingunerisaanik inuit pisuussuteqanngitsut marluk toqupput, tassa meerartaavat Batseballu uia. (2 Samueli 11:1-27; 12:15-18) Imaluunniit eqqarsaatigiuk apustili Paulusi isertuarani nassuertoq: „Ajunngitsormi piumasarigaluara iliuuserinngitsoortarpara ajortorli piumanngisara iliuuserisarlugu.“ (Romamiut 7:19) Illittaaq ilaannikkut taassumatut erloqiummertarpit? Paulusi nangippoq: „Guutimmi inatsisai inuutsikkut ilorlikkut nuannarigaluarpakka, kisianni paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga. Uangannguakkuluk! Kia kiffajunnaarsissavaanga timimit matumannga toqup pianit?“ (Romamiut 7:22-24) Maligassiat Biibilimeersut tamakkua imminut naalakkersinnaanerulerumalluta aalajangersimanitsinni nakussatsissavaatigut.

Imminut naalakkersinnaaneq ilinniagassaavoq

3. Nassuiaruk sooq naatsorsuutigisinnaanngikkipput imminut naalakkersinnaanerup ajornaatsuinnaanissaa?

³ Imminut naalakkersinnaaneq, ilaatigut naaggaarsinnaaneq, 2 Petrusi 1:5-7-imi eqqaaneqarpoq uppernermut, ileqqorinnermut, ilisarsinermut, nikallujuinnermut, Guutimik mianerinninnermut, qatanngutigiittut pissuseqarnermut asanninnermullu ilagitillugu. Pissuserisat taakku tamaasa inunnguuserinngilavut. Tamarmik ineriartortitussaapput. Pissuserisat tamakku ineriartortissimagivut malunnarsilluassappat aalajaanniartariaqarpugut tamaviaarlutalu. Taamaattumik pissutissaqanngilaq isumaqassalluni imminut naalakkersinnaalerniarneq ajornaatsuinnaasoq.

4. Sooq inuppassuit isumaqarpat imminut naalakkersinnaaneq ajornartorsiutiginagu, tamannali sumut ersiutaava?

⁴ Inuit millionilippassuit immaqa isumaqarput imminut naalakkersinnaaneq ajornartorsiutiginagu. Piumasaminnik inuupput, nalunagu nalulluguluunniit uinimmik kajungerisaa maliinnarlugu, imminnut allanullu kingunerisassai eqqarsaatigivallaarnagit. (Judasi 10) Naaggaarsinnaannginneq naaggaarsinnaajumannginnerlu nalitsinni aatsaat taama malunnartigilerput. Tamannalu ilumut ’ulluni kingullerni’ inuunitsinnut ersiutaavoq, Paulusi ullut taakku pillugit ima allammat: ’Nalliukkumaarput ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut, usorsitsaartut, anneruniartut, asissuingaartut, . . . naammatsiuitsut.’ — 2 Timotheusi 3:1-3.

5. Jehovap Nalunaajaasuisa sooq imminut naalakkersinnaaneq soqutigaat, siunnersuutillu suup maleruarnissaa suli silatusaarnerua?

⁵ Jehovap Nalunaajaasuisa nalunngilluarpaat imminut naalakkersinnaaneq unamminiarnartuusoq. Paulusitut ilisimavaat Guuti nuannaartikkumallugu taassuma najoqqutassiaanik maleruaarusunneq uinimmullu naammalluinanngitsumut pilerinartunik perusunneq imminnut akioriittut. Taamaattumik akioriinnermi tamatumani ajugaanissaq soqutigiuarsimavaat. 1916-imili atuagassiap maanna atuakkavit normuisa ilaanni allassimavoq ’imminut, eqqarsaatitsinnut, oqaatsitsinnut iliuutsitsinnullu naalakkiisinnaasariaqartugut’. Atuartut kajumissaarneqarput Filippimiut 4:8 eqqaamaqqullugu. Siunnersuut Guutimeersoq tamanna suli atuuppoq, naak ukiut 2000-ingajaat matuma siorna allanneqarsimagaluartoq, immaqalu taamanernit imaluunniit 1916-imit ullumikkut maleruaruminaannerugaluartoq. Taamaakkaluartorli kristumiut silarsuarmiut kajungerisaannut naaggaartarnissartik pimooruppaat, nalunnginnamikku taamaalioraangamik Pinngortitsisertik angerfigisarlugu.

6. Imminut naalakkersinnaanerup ineriartortinnerani sooq isumatsattariaqanngilagut?

⁶ Galatiamiut 5:22, 23-mi imminut naalakkersinnaaneq ’anersaap inerititaasa’ ilaattut eqqaaneqarpoq. Pissuserisaq taanna ’asanninnermik, nuannaarnermik, eqqissineermik, kamajasuunnginnermik, inussiarnisaarnermik, ajunngitsuunermik, unneqqarissusermik qanilaarnermillu’ ilallugu pissuserigutsigu iluaqutigingaassavarput. Kingusinnerusukkut Petrusip oqaatigaa tamakku pissuserigutsigik Guutimut kiffartornitsinni ’ilatsiinnartuussanatalu inerititaqanngitsuussanngitsugut’. (2 Petrusi 1:8) Kissaatigisatsitulli sukkatigisumik pissuserisat taamaattut ineriartortissinnaanngikkutsigik nikallortariaqanngilagut imminulluunniit avoqqaarisariaqarnata. Qularnanngitsumik malugisimassavat atuarfimmi ilinniartut ilaat allanit sukkanerusumik ilikkartartut. Suliffinniluunniit malugisimassavat sulisut ilaat allanit ilinniartikkuminarnerusartut. Tamatumunnga assingusumik kristumiut ilaat allanit kristumiutut pissuseqalernissartik ilikkapallannerusarpaat. Pingaarnerpaaq tassa pissuserisat Guutimik mianerinninnermut atasut tamakkua sapinngisarput naapertorlugu ineriartortittuarnissaat. Taamaaliorsinnaavugut Jehovap oqaatsimigut peqatigiissortamigullu ikiuinerata tamakkiisumik iluaqutiginiarneratigut. Aalajaalluni siumukarniarnissaq sukkasuumik angusaqarniarnissamit pingaarneruvoq.

7. Suup takutippaa imminut naalakkersinnaaneq pingaaruteqartoq?

⁷ Imminut naalakkersinnaaneq anersaap inerititaani kingulliullugu eqqaaneqaraluartoq allanit pingaaruteqannginnerunngivippoq. Ilami pingaaruteqarluinnarpoq. Eqqaamasariaqarparput ’uinngup suliai’ tamaasa pinngitsoortinneqarsinnaagaluartut imminut naalakkersinnaagaluarutta. Inuilli naammalluinnanngitsut ’uinngup suliaasa’ ilaannut nakkaannaqqajaasarput, ’kinguaassiuutitigut inuunerlunnermut, mingunnartuliornermut, ileqqorlunnermut, guutipilussiornermut, ilisiinnermut, akerariinnernut, saqitsaannermut, sinnganermut, kamajassusermut, namminissarsiornermut, assuariinnernut immikkoorniarnermullu’. (Galatiamiut 5:19, 20) Taamaattumik akiuuttuartariaqarpugut ajortiliunikkut ileqqupiluit uummatitsinnit isummatsinnillu peerniarlugit.

Ilaat immikkut ilungersortariaqarput

8. Ilaasa suut pissutigalugit imminut naalakkersinnaaneq artornartittarpaat?

⁸ Kristumiut ilaasa allanit imminut naalakkersinnaaneq artornartinneruaat. Sooq? Qanoq perorsarneqarsimanerat misigisimasaalluunniit pissutaasinnaapput. Immaqa imminut naalakkersinnaaneq nammineq ajornartorsiutigisimanngilarput. Tamannalu taava nuannaarutigisinnaavarput. Tamatuminngali ajornartorsiutillit peqatigigaangatsigit misigeqatigalugillu paasisariaqarpavut. Minnerunngitsumik taamaattariaqarpoq imminut naalakkersinnaanngissutsiminni arlaatigut uatsinnut nuanniilliortitsisimappata. Tamatta naammalluinnanngitsuunerput eqqarsaatigissagaanni kina imminut iluartuutinnissaminut pissutissaqarnerpa? — Romamiut 3:23; Efesosimiut 4:2.

9. Ilaasa sanngiissutit suut akiortariaqarpaat, tamakkulu qaqugu ajugaaffigineqarluinnassappat?

⁹ Assersuuteqariarta. Immaqa ilagiinni kristumiuni nalunngisaqarpugut pujortassaarsimasunik ikiaroortarunnaarsimasunilluunniit, ilaannikkulli pujortaguummertartunik ikiaroorusuummertartunilluunniit. Immaqaluunniit ilaasa nerinertik imigassartornertilluunniit killileruminaatsittarpaat. Allat oqqatik paariuminaatsittarpaat, taamaattumillu oqaluppallaartoortarlutik. Sanngiissutit taamaattut iliuuseqarfigissagaanni imminut naalakkersinnaajumalluni ilungersortariaqarpoq. Sooq? Jaaku 3:2-mi piviusorsiortumik nassuerutigineqarami: „Tamatta amerlasuunik kukkussuteqartarpugut. Oqalunnermigut kukkussuteqartanngitsoq naammalluinnartuuvoq timiminillu tamarmiusumik naalatsitsisinnaasuulluni.“ Allallu aningaasanoorneq puuffigisimavaat. Imaluunniit kamassarissuupput. Sanngiissutsit taamaattut ajugaaffiginiarnerat sivisunaarsinnaavoq. Naak maannakkut allaat malunnarluartumik iluarsiartorsinnaagaluartugut ajortumik periartarnerit aatsaat peerluinnarneqassapput naammalluinnartunngorutta. Tamanna nalliutserlugu imminut naalakkersinnaaneq noqqaassutigigutsigu ajortuliorajunnermut utertuussanngilagut. Akiuuttuarnermi tamatumani nikallujuinnissatsinnut ikioqatigiissinnaavugut. — Apustilit Suliaat 14:21, 22.

10. (a) Sooq kinguaassiuutinut tunngasut eqqarsaatigalugit imminut naalakkersinnaaneq immikkut unamminiarnartuua? (b) Qatanngut angut qanoq annertuumik allanngortitsisimava? (Takuuk quppernermi 25-imi ungalusaq.)

¹⁰ Ilaasa aamma kinguaassiuutitigut atoqateqarnermut tunngasut eqqarsaatigalugit imminut naalakkersinnaaneq artornartippaat. Guutip Jehovap inuit kinguaassiorsinnaatillugit pinngortissimavai. Ilaasali kinguaassiuutinut tunngasut Guutip najoqqutassiaanut naapertuuttumik eqqortumik inissinnissaat allanit artornartinnerusarpaat. Ilaasa ajornartorsiutaat sakkortunerulertarput kinguaassiuutitigut ingasattumik perusussuseqaramik. Silarsuarmi tiingasulerituffiulluinnartumi inuuvugut, assigiinngitsutigullu sunnerneqartarpugut piumatussutsip tungaanut. Taamaattumik kristumiut aappaninngikkallarlutik taamalu aappaariittut akisussaaffinnik isumakuluuteqanngikkallarlutik Guutimut kiffartorumagaluartut erloqinartorsiorsinnaapput. (1 Korinthimiut 7:32, 33, 37, 38) Immaqalu ’aappaninnerup pileritsassimanermit iluarneruneranik’ Biibilimi siunnersuut maleruarlugu aappaninniaannartarput, tamannalu ataqqineqartariaqarpoq. Aalajangerputtaaq Biibilimi siunnersuut maleruarlugu ’Naalakkamiinnaq’ katikkumallutik. (1 Korinthimiut 7:9, 39) Qularissanngilarput Jehovap nuannaarutigigaa najoqqutassiaminik iluartunik maleruaarusunnerat. Uppeqataasalu kristumiut nuannaarutigaat assuarnaattuarusuttunik ileqqussatigullu qutsissunik najoqqutaqartunik ilaqarlutik Guuti kiffartorfigisinnaagamikku.

11. Qatanngut katikkusukkaluartoq aapparisinnaasaminilli nassaarsimanngitsoq qanoq tapersersorsinnaavarput?

¹¹ Taavami tulluartumik aappartaarsinnaanngikkaanni? Takorlooruminarpoq aappartaarusukkaluarluni aapparisinnaasamik nanisisinnaannginneq qanoq ilungersuummernartigissasoq. Immaqa takusarpaat ikinngutitik katittut pilluarlutillu aappariittut, namminnerli aapparisinnaasaminnik ujarlertuarlutik. Taamatut atugaqaraanni ileqqut minguttuut, soorlu imminut inertittarneq, ajornartorsiutigineqartarsinnaapput. Qanorluunniit pisoqaraluarpat kikkulluunniit ileqqussatigut minguitsuujuarumallutik ilungersortut nikallortinnissaat kristumiut kissaatiginavianngilaat. Immaqa piaarinngikkaluarluta allat nikallortissinnaavavut isumaalliorluta ima oqarfigigutsigik: ’Illimmi qaqugu katissagavit?’ Ajortumik isumaqarluni taama oqanngikkaluarluni pitsaanerungaassagaluarpoq imminut naalakkersinnaagaanni oqarlu paaralugu. (Tussiaat 39:2) Uppeqativut katissimanngitsut ileqqussatigut minguitsuujuartut nersorneqangaartariaqarput. Nikallornarsinnaasunik oqalunnata qiimmassaasariaqarpugut. Soorlu ikinngutitta ilaat inersimalluartut nereqatigiumallugit ineriartornartumilluunniit peqatigiumallugit qaaqqugutsigik aamma kisermaat ilaatissinnaavavut.

Aappariinnermi imminut naalakkersinnaaneq

12. Sooq aamma aappariit kinguaassiuutitigut atoqatigiinnikkut imminnut naalakkersinnaasariaqarpat?

¹² Katikkaluaraanniluunniit kinguaassiuutitigut atoqatigiinnikkut imminut naalakkersorsinnaasariaqarpoq. Soorlu uiusup nuliaasullu kinguaassiuutitigut pisariaqartitaat assigiinngitsorujussuusinnaapput. Imaluunniit aapparisap napparsimanera pissutigalugu ilaannikkut kinguaassiuutitigut inooqatigiinneq nalinginnaasumik ingerlakkuminaassinnaasarpoq ajornavittarluunniit. Aapparisap siornatigut misigisimasai pissutigalugit aamma oqaaqqissaarutip uuma maleruarnissaa unamminiarnartuusinnaavoq: „Angutip nulii iliorfigiliuk taassumunnga iliuuserisariaqakkaminik arnallu uini taamatut.“ Pissutsit taamaappata aappaa immaqa imminut naalakkersinnaanerusariaqarpoq. Tamarmilli Paulusip kristumiunut aappariinnut asannittumik ilitsersuutaa eqqarsaatigisariaqarpaat: „Aappariittut atoqatigiinnissamut immissinnut itigartinniaqinasi isumaqatigiissutigisimanngikkussiuk qinunissamut tunniulluinnarallarnissaq kingornatigullu atoqatigiittaleqqilluni, Saatanimit usserneqaqqunasi pinaveersaarsinnaanngikkussi.“ — 1 Korinthimiut 7:3, 5.

13. Imminut naalakkersinnaalerumallutik ilungersortut qanoq ikiorsinnaavavut?

¹³ Aappariit qujamasuttariaqarput tamarmik atoqatigiinnikkut eqqortumik imminnut naalakkersinnaagunik. Aammali uppeqatinut suli tamatumani imminut naalakkersinnaajumallutik ilungersortunut paasinnittuusariaqarput. Puigunngisaannartariaqarparput Jehovap qinnuigisarnissaa anersaakkut qatanngutivut paasinninnermik, qunusuissutsimik aalajaassutsimillu tuneqqullugit, taakku imminnut naalakkersinnaalerumallutik kissaatigisapalaaminnillu aniguiumallutik akiuuttuarsinnaaqqullugit. — Filippimiut 4:6, 7.

Ikioqatigiittuarta

14. Sooq uppeqativut misiginneqatigalugillu paasinniffigisariaqarpavut?

¹⁴ Uppeqativut kristumiut uagut nammineq ajornartorsiutigisimanngisatsinnik sanngiiffigisaqarlutik erloqisut immaqa paasinniffigiumaataartarpavut. Inuilli assigiinngitsuupput. Ilaat misigissutsikkut killitsiasuupput; allat taamaanngillat. Ilaat imminnut naalakkersinnaalluarput ilungersuarujussuartariaqaratik. Allat ilungersuanerusarput. Eqqaamajulli: Inuk ajornartorsiutiminut ajugaaniartoq inupalaajunngilaq. Uppeqativut misiginneqatigineqartariaqarlutillu paasinniffigineqartariaqarput. Imminnullu naalakkersinnaanerujumallutik ilungersortunik naakkinninnerput nuannaarnissatsinnut aalajangiisuussarpoq. Tamanna Jiisusip oqaasiinit Matthæusi 5:7-miittunit paasinarpoq.

15. Sooq oqaatsit Tussiaat 130:3-miittut imminut naalakkersinnaanermut tunngasuni tamani tuppallernartuuppat?

¹⁵ Uppeqat kukkusumik nalilerniaqinatigu kristumiutut pissuseqarniaraluarluni immaqa ilaannikkut iluatsitsinngitsoortaraluarpalluunniit. Qiimmaallannaqaaq paasillugu Jehovap kukkunivut kisiisa pinnagit aammali iluatsitsinerpassuavut tamaasa, uppeqatitta immaqa nalusaat, maluginiartarai. Oqaatsit Tussiaat 130:3-miittut aamma tuppallernaqaat: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“

16, 17. (a) Galatiamiut 6:2, 5 qanoq imminut naalakkersinnaanermut attuumassuteqarpa? (b) Allaaserisap tulliani suut sammissavavut?

¹⁶ Jehovap iluarisaanik inuussagutta tamatta imminut naalakkersinnaaneq ineriartortittariaqarparput. Qularisariaqanngilarpulli qatanngutitta kristumiut ikiussagaatigut. Kikkut tamarmik immikkut akisussaaffitik isumagisariaqarpaat, taamaattorli kajumissaarneqarpugut sanngiissutit ajugaaffiginiarneranni ikioqatigeeqqulluta. (Galatiamiut 6:2, 5) Pingaartittartigu angajoqqatta, aappatta ikinngutittaluunniit ornittariaqanngisatsinnik, isiginnaartariaqanngisatsinnik iliuuserisariaqanngisatsinnilluunniit inerteraangatigut. Ikiorniaannaraatigut-una imminut naalakkersinnaaqqulluta — ilumoorluta naaggaarsinnaassuseqaqqulluta.

¹⁷ Kristumiorpassuit qularnanngitsumik imminut naalakkersinnaanermut tunngatillugu taagukkatsinnut isumaqataapput, immaqali misigalutik suli ilinniagassaqaqalutik. Imminut naalakkersinnaanerujumagaluarput, inunnit naammalluinnanngitsunit naatsorsuutigineqarsinnaasut naapertorlugit. Illittaaq taama misigivit? Taamaappat pissuserisaq tamanna Guutip anersaavata inerititaasa ilaat ineriartortissinnaaviuk? Qanorlu ungasinnerusoq eqqarsaatigalugu kristumiutut anguniagassatit angusinnaavigit? Tamakku allaaserisap tulliani sammissavavut.

Eqqaamavigit?

Sooq imminut naalakkersinnaaneq . . .

• kristumiunut pingaaruteqarpa?

• inuit ilaannut ajornakusoornerua?

• aappariinnermi pingaaruteqarluinnarpa?

• ineriartortillugu ikioqatigiissutigisariaqarparput?

[Qupp. 25-mi ungalusaq/​assiliartaq]

Naaggaarneq ilinniarpaa

Jehovap Nalunaajaasuisa ilaata Tysklandimiittup suliaminut atatillugu tv-kkut radiukkullu aallakaatitat assigiinngitsut 30-t missaat nakkutigisussaavai. Programmit ilaanni teknikkikkut ajortoqaleraangat taakku sammisariaqartarpai ajornartorsiut sunaanersoq paasiniarlugu. Ima oqaluttuarpoq: „Soorlumi aatsaat piffissaanngitsukkut teknikkikkut ajornartorsiuteqalersartoq, tassa isiginnaagassiani nakuusertoqaleraangat tiingasoqaleraangalluunniit. Ulluni sapaatilluunniit akunnerini arlalinni isigisimasakka ajoqutaasut puigorsinnaaneq ajorpakka, soorlulusooq qaratsanni naqissuserneqartut.“ Miserratiginngilaa tamanna anersaakkut peqqissutsiminut ajoqutaasoq: „Puffajasuugama nakuusernerit isiginnaarsimasakka pissutigalugit imminut naalakkersinnaannginnerulerpunga. Tiingasunik isiginnaartarnera nuliamalu akornatsinni nuanniilliutaalerpoq. Ullut tamaasa tamaviaartariaqarpunga. Ajugaaffigineqarumananga aalajangerpunga allamik suliffissarsiorniarlunga, naak taamaaliornikkut akissarsiakillisussaagaluarlunga. Ungasinngitsukkullu allamik suliffittaarpunga.“

[Qupp. 24-mi assiliartaq]

Biibilimik atuaqqissaarnikkut paasinninneq iluaqutigalugu imminut naalakkersinnaalissaagut

Akissarsiumallutit imminut naalakkersinnaagit!

„Timersorlutik unammisut tamarmik sunik tamanik pinaveersaagaqartarput.“ — 1 KORINTHIMIUT 9:25.

1. Efesosimiut 4:22-24-mi allassimasumut naapertuuttumik inuit millionilikkuutaat qanoq Jehova angerfigisimavaat?

JEHOVAP NALUNAAJAASUISA ilaattut kuisissimaguit allanut takutissimavat inuuneq naassaanngitsoq akissarsiariniarlugu arpaqataarusullutit. Taamaaliornikkut Jehovap piumasaanik iliornissat akueraat. Ilarpassuavut Jehovamut tunniulluinnartinnatik inuunerminni allannguisimaqaat, tunniulluinnarnertik taassumunnga iluarisaaqqullugu. Apustili Paulusip kristumiunut siunnersuutaa maleruarparput: „Tassa inutoqaq manna tikillugu inuuserisassinniittoq pileritsannernillu nakutitsissutaasunit aserorneqartoq iperassagissi, . . . atillugulu inuk nutaaq Guuti assilillugu pinngortitaq iluarsuseqarlusi upperluarlusilu sallusuissutsip piinik.“ (Efesosimiut 4:22-24) Tassa imaappoq Guutimut tunniulluinnarnissamut angertinnata eqqunngitsumik inooriaaserisimasatsinnut naaggaaqqaartariaqarpugut.

2, 3. 1 Korinthimiut 6:9-12 naapertorlugu allanngornissat assigiinngitsut marluk suut pisariaqarpat Guutimit iluarisaassagutta?

² Inutoqqap ilisarnaataasa ilaat Jehovamut Nalunaajaasunngorusuttut iperartariaqagaat Guutip oqaasiani toqqaannartumik avoqqaarineqarput. Paulusip Korinthimiunut allakkamini tamakkua ilaat eqqaavai: „Kinguaassiuutitigut inuunerluttut guutipilussiortulluunniit, allasiortut anguteqatiminnoortartulluunniit,tillittut piumatuulluunniit, imerajuttut mitaatilliisulluunniit piiaasulluunniit Guutip naalagaaffia kingornussarsiarissanngilaat.“ Taava eqqartorpaa kristumiut ukiuni hundredelinni siullerni inuusut ilaat inuttut pisariaqartutigut allanngorsimasut: „Ilasi taamaassimagaluarput.“ Malugiuk allassimasoq: ’taamaassimagaluarput’, allassimanani: ’taamaapput’. — 1 Korinthimiut 6:9-11.

³ Paulusi paasititsivoq allanngornerit suli amerlanerusut pisariaqartinneqarsinnnaasut, ima nangikkami: „Sunik tamanik iliorsinnaatitaavunga, imaanngilarli suut tamarmik iluaqutaasut.“ (1 Korinthimiut 6:12) Ullumikkut Jehovamut Nalunaajaasunngorusuttut amerlasuut paasisarpaat iliuutsinut aalajangersimasunut inerterneqanngikkaluarlutik taamaaliornissamut naaggaarnissaq pisariaqarsinnaasoq taamaaliornissaq iluaqutaanngippat ataavartussamilluunniit naleqanngippat. Assersuutigalugu iliuuseq aalajangersimasoq piffissaajaataaginnarsinnaavoq allamullu saasaataaginnarsinnaalluni, pingaaruteqarnerusunut piffissaarutitilluta.

4. Kristumiut tunniulluinnarsimasut sukkut Paulusimut isumaqataappat?

⁴ Nammineq piumassutsimik Guutimut tunniulluinnartariaqarpoq, pinaaserani pilliuteqarujussuartussatullu misiginani. Kristumiut tunniulluinnarsimasut Paulusi isumaqatigaat, taanna kristumiunngoreerluni oqarmat: „[Jiisusi] pillugu tamakku tamaasa annaasimavakka, tamaasalu perlukutut igitassaannaatippakka Kristusi pigilerumallugu.“ (Filippimiut 3:8) Paulusi nuannaarluni naleqarpallaanngitsunut naaggaarpoq, Guuti angerfigiuarsinnaajumallugu.

5. Paulusip arpanneq suna naammassivaa, qanorlu uaguttaaq taamaaliorsinnaavugut?

⁵ Paulusi anersaakkut ittumik arpannermini imminut naalakkersinnaasimavoq taamaattumillu ima oqarsinnaalersimalluni: „Ajunngitsoq sorsuutigisimavara, arpaffissaq naavara upperneralu attatiinnarlugu. Maanna uannut pissamaartitaavoq ajugaasumut niaqorusiussassaq iluarsutsip pia Naalakkap naapertuilluartumik eqqartuussisup ullussami issumani uannut tunniukkumaagaa — uannuinnaanngitsorli, kisianni aamma saqqummernissaminut qilanaartunut tamanut.“ (2 Timotheusi 4:7, 8) Uagut taamaalluta taama oqarsinnaajumaarnerpugut? Taamaaliorsinnaassaagut upperluta imminut naalakkersinnaagutta, kristumiutut arpattuarutta tamannalu naammassillugu.

Ajunngitsumik pissagutta imminut naalakkersinnaasariaqarpugut

6. Imminut naalakkersinnaaneq sunaava, qanorlu marlutsigut taamaaliortariaqarpugut?

⁶ Hebræerit grækerillu oqaasii Biibilimi „imminut naalakkersinnaaneq“-mik nutserneqartut isumaqarsinnaapput nunusinnaanermik immaluunniit imminut aqussinnaanermik. Pineqartoq tassaagajuppoq eqqunngitsuliornaveersaarneq. Aammali paasinarpoq eqqortuliussagaanni imminut naalakkersinnaaneq pisariaqartoq. Inuit naammalluinnanngitsut eqqunngitsulioqqajaasarput, tamannalu pissusissamisoorpoq. Taamaattumik marlutsigut sorsugassaqarpugut. (Oqaluussisartup oqaasii 7:29; 8:11) Ajortuliornaveersaajutigaluta imminut pinngitsaalisariaqarpugut ajunngitsuliorumalluta. Ajunngitsumik piumalluni assoruunneq tassaavoq eqqunngitsuliornaveersaarut pitsaanerpaaq.

7. (a) Daavitut suna qinnutigisinnaavarput? (b) Suna imminut naalakkersinnaanerulissutigisinnaavarput?

⁷ Taamaattumik Guutimut tunniulluinnarnitsinnut naapertuuttumik inuussagutta imminut naalakkersinnaaneq pingaaruteqarpoq. Daavitut qinusariaqarpugut: „Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga!“ (Tussiaat 51:12) Ileqqussatigut eqqunngitsumik timikkulluunniit ajoqutaasumik iliornaveersaarnerup iluaqutaassusia eqqarsaatigisinnaavarput. Peqqiilliulernissamut, ikinngutigiinnermik ilaqutariinnillu aseruinissamut immaqaluunniit piaarpallaartumik toqunissamut sernissorneqarsinnaavugut. Aamma pitsaassaaq inooriaatsip Jehovap maleruaqqusaata assigiinngitsorpassuartigut iluaqutaassusia eqqarsaatigigutsigu. Piviusorsiortariaqarpugulli eqqaamallugulu uummat tatigisassaanngitsuusoq. (Jeremia 17:9) Taamaattumik aalajaattariaqarpugut uummatitta Jehovap najoqqutassiaasa maleruarnissaata pisariaqarnera sumiginnarniaraangagu.

8. Suna misigisimavarput? Assersuummik taasaqarit.

⁸ Amerlanersatta misigisimavaat uinik eqiasuttoq qanoq kajumissuseerunnartigisartoq. Aamma Guutip naalagaaffianik oqaluussissutiginninneq eqqarsaatigalugu taamaappoq. Jehovap nuannaarutigisarpaa inuunermik annaassiniarluni sulinermi kajumilluta peqataagaangatta. (Tussiaat 110:3; Matthæusi 24:14) Inunnut allanut oqaluussinermik ilinniarneq amerlanersatsinnut ajornaatsuinnaasimanngilaq. Taamaaliussagaannimi imminut naalakkernissaq pisariaqarsimavoq — sulilu immaqa pisariaqarluni — timerput ’peqqarniisaarfigisariaqarlugu’ ’naalatsillugulu pinngitsaalisariaqarlugulu’, ajornannginnersiuinnaqqunata. — 1 Korinthimiut 9:16, 27; 1 Thessalonikamiut 2:2.

„Sunik tamanik“?

9, 10. ’Sunik tamanik imminut naalakkersinnaaneq’ sumik nassataqarpa?

⁹ Biibilimi peqquneqaratta ’sunik tamanik pinaveersaagaqaqqulluta’, (imaappoq ’sutigut tamatigut imminut naalakkersinnaaqqulluta’, NV) tamatuma takutippaa imaanngitsoq imminut naalakkersinnaaneq taamaallaat kamannaveersaarsinnaanermut imaluunniit inuunerlunnaveersaarnermut pisariaqartoq. Immaqami isumaqarpugut tamakku eqqarsaatigalugit imminut naalakkersinnaareerluta. Taamaappat qujamasuttariaqarpugut. Inuunermili aamma allatigut imminut naalakkersinnaanerup pisariaqarnera qarsupiinnartoorsinnaavarput? Soorlu nunami pigissaarfiusumi inuugutta piisaarpallaarnaveersaarnissap ilinniarnissaa silatusaarnerussannginnerpa? Angajoqqaat silatusaassapput meeqqatik ilinniartikkunikkit takusatik tamaasa pisiarisariaqanngikkaat, nutaajugaluarpataluunniit, pilerinaraluarpataluunniit aammalu akissaqarfigigaluarunikkilluunniit. Ilinniartinneqarneq taamaattoq iluaqutaassappat angajoqqaat soorunami namminneq maligassaalluartariaqarput. — Lukasi 10:38-42.

¹⁰ Pinaveersaagaqarneq ilikkarutsigu piumassuseqarluarnerulersinnaavugut. Aamma pigeriikkavut nuannaarutiginerulersinnaavavut, inuillu tamakkuninnga pigisaqanngitsut — imaanngitsoq pigisaqarumannginnamik kisiannili periarfissaqannginnamik — misiginneqatiginerusinnaassallugit. Pilimanianngitsumik inuuneq isumaliortaatsimut nalinginnaasumut akerliugaluarpoq, oqarluartaarutinut imaattunut naapertuunnani: ’Imminut nukatsilaartarlutit,’ imaluunniit ’Illit pitsaanerpaamik pisassaqarputit’. Ussassaarutit aqqutigalugit isumaqalersinniarneqartarpugut kissaatigisavut maannakkorpiaq eqqortinneqartariaqartut. Taamali kajumissaarisut taamaallaat namminneq niuernikkut soqutigisatik siuarsarniarpaat. Tamannalu imminut naalakkersinnaaniarnitsinnut ajoqutaasinnaavoq. Nunami pigissaarfiusumi Europamiittumi atuagassiami ungasinngitsukkut ima allassimasoqarpoq: „Inunni piitsungaartuni periataartarnerit kissaatiginanngitsut nununissaat ilungersunartuuppat, taavami inunni ’nunami neriorsuutigisami’ — tassa ullutsinni nunani pigissaarfiusuni — inuusuni nununissaq qanoq ajornartigissava?“

11. Pilimanianngitsumik inuuneq sooq iluaqutaava, sunali pillugu sapernarsinnaava?

¹¹ Kissaatigisat pisariaqartitallu immikkoortikkuminaatsikkutsigit mianersuaalliorumanata iliuuseqarsinnaasariaqarpugut. Soorlu aningaasatigut atuivallaanngitsoorusukkutta aalajangersinnaavugut naafferartumik akilersuiumanata. Aamma pisiniaraangatta aningaasanik killilinnik taamaallaat nassartarsinnaavugut. Eqqaamajuk Paulusi oqartoq ’Guutimik mianerinninneq naammagittarnermik ilaqartoq taamaalluni immini iluanaarnaraluartoq’. Nangilluni oqarpoq: „Sunnguamimmi nassataqarata silarsuarmut matumunnga pisimagatta aamma sunnguamik nassataqarnata silarsuaq manna qimattussaavarput. Nerisassaqarlutalu atisassaqarutta tamakku naammagissavavut.“ (1 Timotheusi 6:6-8) Taamaannerpugut? Pilimanianngitsumik inuuneq ilikkassagutsigu imminullu nukatsikkusunnermik pisariaqanngitsunik nanertuuteqalinngitsuussagutta piumassuseqarluartariaqarlutalu imminut naalakkersinnaasariaqarpugut. Tamaviaarnerilli imminnut akilertarput.

12, 13. (a) Sooq kristumiut ataatsimiinnerini imminut naalakkersinnaasariaqarpugut? (b) Aamma pissutsit allat imminut naalakkersinnaasariaqarfigisat taakkit.

¹² Aamma kristumiut ataatsimiinneri ataatsimeersuarnerilu najuuffigigaangatsigik imminut naalakkersinnaasariaqarpugut. Taamaanngikkutta saqqummiussat ingerlaneranni eqqarsaativut allamut saaqqajaasinnaapput. (Ussatit 1:5) Issiaqativut isussuullugit akornusersussanngikkutsigit oqalugiartorli tusarnaaqqissaassagutsigu aamma imminut naalakkersinnaasariaqarpugut. Aammattaaq piffissaq eqqorlugu aggissagutta piffissaalluartillugu pikinissamut imminut naalakkersinnaasariaqarpugut. Taamatuttaaq ataatsimiinnernut piareersartarnermut piffissaqassagutta peqataasassaguttalu imminut naalakkersinnaasariaqarpugut.

¹³ Mikisutigut imminut naalakkersinnaagutta aamma angisuutigut imminut naalakkersinnaassaagut. (Lukasi 16:10) Taamaattumik silatusaarnerussaaq akulikitsumik Guutip oqaasiinik Biibililersaarutinillu atuartarnissaq, atuaqqissaarluni atuarsimasallu isumaliutigalugit. Naleqqutinngitsumik suliffeqarneq, ikinnguteqarneq, isiginnittaaseqarneq ileqqoqarnerlu eqqarsaatigalugit imminut perorsarnissaq imaluunniit iliuutsinut piffissamut erlinnartumik Guutimut kiffartornermut atorneqarsinnaagaluartumik inangiisunut naaggaarsinnaanissaq aamma pissusissamisuussaaq. Jehovamut kiffartornermi ulapputeqarnerup illersussavaatigut Jehovap silarsuaq tamakkerlugu ilagiissaani anersaakkut paratiisimit peersitsisinnaasunut.

Imminut naalakkersinnaanikkut inersimallualeritsi

14. (a) Meeqqat qanoq imminut naalakkersinnaaneq ilinniarsinnaavaat? (b) Meeraanermiilli imminut naalakkersinnaanerup ilinniartarnera sunik iluaqutissartaqarpa?

¹⁴ Nalunngilarput inoorlaat imminut naalakkersinnaanngitsut. Naqitaaqqami meeqqat pissusii pillugit immikkut ilisimasallit allassimasaanni ima nassuiaasoqarpoq: „Meeqqat imminut naalakkersinnaanermik imaaliallaannaq ilikkarsinnaanngillat. Naalungiarsuit meeraaqqallu angajoqqaaminnit ikiorneqarlutillu tapersersorneqartariaqarput imminut naalakkersinnaaleriartussagunik. . . . Angajoqqaamik ikiorpatik atuartuutillutik imminut naalakkersinnaassusiat alliartulissaaq.“ Meeqqanik sisamanik ukiulinnik misissuinermi paasineqarpoq imminut naalakkersinnaalersimasut „amerlanertigut inuusuttuaqqatut sungiussianerusartut, nuannarineqarnerusarlutik, namminneq iliuuseqarnerusarlutik, imminnut tatiginerusarlutik tutsuiginarnerusarlutillu“. Meeqqat suli imminnut naalakkersinnaanermik ilinnialersimanngitsut „kiserliornerusarput, pakatsianerusarlutik uteriinnerusarlutillu. Stresserlutik qasusoortarput unamminiarnartunillu suliaqarusussanatik.“ Nalunanngilaq meeqqat inersimasunngorunik iluatsissagunik imminut naalakkersinnaaneq ilinniartariaqaraat.

15. Imminut naalakkersinnaannginneq sumut ersiutaava, Biibilimilu anguniagassaq suna siunnersuutigineqarpa?

¹⁵ Kristumiutut inersimasunngussagutta aamma imminut naalakkersinnaaneq ilinniartariaqarparput. Tamanna pissuserinngikkutsigu immaqa suli anersaakkut inoorlaajussaagut. Biibilimi kajumissaarneqarpugut ’silatussutsimi inersimasunngoqqulluta’. (1 Korinthimiut 14:20) Anguniagaraarput ’uppernermi ataasiunissaq Guutillu erneranik ilisarsinissaq, tassa ima alliartorluta Kristusip peqangaassusianut ineqarfiussalluta naammaattunngorluta’ Sooq? Taamaakkutta „meeraajunnaassaagut sianiitsut, tamanut tamaanga nassataritittarunnaarluta malinnit ajoqersuutit suulluunniit anoraannit inuillu immeraammik nalussinerannit, taakkua peqqusersusaarlutik aqqutissaanngitsunut tammarnartunut ingerlakkaangatigut“. (Efesosimiut 4:13, 14) Imminut naalakkersinnaaneq anersaakkut peqqissutsitsinnut pingaaruteqangaarpoq.

Imminut naalakkersinnaaneq ineriartortiguk

16. Jehovap qanoq ikiortarpaatigut?

¹⁶ Imminut naalakkersinnaaneq ineriartortissagutsigu Guutimit ikiorneqartariaqarpugut, taassumalu ikiorumavaatigut. Guutip oqaasia tarrarsuutitut naammalluinnartutut ippoq, takutippaatigullu inuttut qanoq allanngortittariaqartugut, aammalu qanoq iliussanersugut siunnersorluta. (Jaaku 1:22-25) Qatanngutigiissuit asannittut aamma ikiorumavaatigut. Kristumiut utoqqaanertat paasinnipput ikiorusullutalu. Jehovallu nammineq anersaaminik illernartumik tunissavaatigut tamatuminnga qinnuigigutsigu. (Lukasi 11:13; Romamiut 8:26) Taamaattumik ikiuiniarnerit tamakku tamaasa ilassilluarniartigik. Quppernermi 30-imi siunnersuutit ungalusamiittut iluaqutigisinnaavavut.

17. Ussatit 24:16-imi sumik qiimmassaarineqarpa?

¹⁷ Tuppallernarpoq nalunagu Jehovap pingaartikkaa iluarisaanik inuujumalluta ilungersornerput. Tamatuma kajumissisittariaqarpaatigut imminut naalakkersinnaanerup ineriartortittuarnissaanut. Iluatsitsinngitsoorajukkaluaruttaluunniit nakkaannanngisaannarta. „Iluartoq arfineq-marloriarluni orlusinnaasaraluarpoq nikueqqittarlunili.“ (Ussatit 24:16) Ajugaanerit tamaasa tulluusimaarnissatsinnut pissutissaqarpugut. Qularisariaqanngilarpullu Jehovap nuannaarutigigaatigut. Qatanngut angut oqaluttuarpoq inuunini Jehovamut tunniulluinnanngikkallaramiuk sapaatip-akunnera ataaseq pujortarsimanngikkaangami imminut akilertarluni. Imminut naalakkersinnaanermigut aningaasat sipaakkani atorlugit iluaqutigisassaminik pisisarpoq.

18. (a) Imminut naalakkersinnaaniarluta ilungersussagutta aamma suna pisariaqarpa? (b) Jehovap sumik neriorsoqqissaarpaatigut?

¹⁸ Tamanit pingaarnerpaatut eqqaamasariaqarparput imminut naalakkersinnaaneq isumamut misigissutsinullu attuumassuteqartoq. Jiisusip oqaasiisa makkua tamanna paasinarsisippaat: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:28; Jaaku 1:14, 15) Eqqarsaatiminut misigissutsiminullu naalakkiisinnaasup aamma timini tamaat naalakkersinnaanerussavaa. Taamaattumik aalajangeqqinniarta eqqunngitsuliunngitsoorumalluta, aammalu eqqunngitsunik eqqarsarumanata. Eqqarsaatit ajortut isumatsinni qaffappata ingerlaannaq itigartittartigik. Ussernartoq qimarratigisinnaavarput qinuneq iluaqutigalugu Jiisusilu qimerloorlugu. (1 Timotheusi 6:11; 2 Timotheusi 2:22; Hebræerit 4:15, 16) Sapinngisamik pitsaanerpaamik iliortilluta Tussiaat 55:23-imi ilitsersuut maleruarsinnaavarput: „Nanertuutigisat Jehovamut tunniuguk, taava isumagiumaarpaatit. Iluartoq patajatinngisaannassavaa.“ (wE 15/10 03)

Uteqqiinermut apeqqutit

• Pissutsini marlunni assigiinngitsuni suni imminut naalakkersinnaasariaqarpugut?

• ’Sunik tamanik imminut naalakkersinnaaneq’ qanoq paasisariaqarpa?

• Imminut naalakkersinnaanerup ineriartortinnissaanut siunnersuutit atoriaannaasut suut allaaserisami matumani illit malugaagit?

• Imminut naalakkersinnaassagutta pisariaqartoq siulleq sunaava?

[Qupp. 30-mi ungalusaq/​assiliartaq]

Qanoq imminut naalakkersinnaanerulersinnaasugut

• Mikisutigut imminut naalakkersinnaaneq ineriartortiguk

• Eqqarsaatigiuk maannakkut siunissamilu imminut naalakkersinnaanerup iluaqutaassusia

• Guutip inerteqqutigisai kajumissaarutigisaanik tarsertakkit

• Eqqarsaatit ajortut itigartipallakkit

• Isummat anersaakkut ineriartornartunik immertaruk

• Kristumiut uppeqativit inersimalluartut ikiuinerat ilassilluartaruk

• Eqqunngitsuliornissannut ussernartut ingalassimaniakkit

• Usserniarneqaraangavit Guuti ikioqqullutit qinnuigiuk

[Qupp. 28-mi assiliartat]

Imminut naalakkersinnaanerup ajunngitsumik iliortittarpaatigut