1-3. (a) Sooq Josva maligassaalluarpa? (b) Aalajangigassaqaraangatta suna eqqaamasariaqarparput?

AALAJANGIISARNIVUT pingaaruteqartorujussuupput. Inuup aalajangiisarnermigut aqussinnaavaa inuunermini sukkut ingerlaniarnerluni. Assersuutigalugu takorloorsinnaavat inuk aqqusinikkut narlusuukkut ingerlatilluni aqquserngit avissaarfiat tikikkamiuk sukkuussanerluni aalajangertariaqalersoq. Ilimanarpoq aqqusineq ornigassami tungaanukartoq, uiarterisitsinngitsoq, atuassagaa.

² Inuit pingaarutilinnik aalajangiisariaqarsimasut arlallit Biibilimi allaaserineqarput. Assersuutigalugu Kainip kamannini nunussanerlugu nunussannginnerluguluunniit aalajangertariaqarsimavaa. (1 Mos 4:6, 7) Josvap Guuti ilumoortoq kiffartorfigissanerlugu imaluunniit guutit ilumuunngitsut kiffartorfigissanerlugit aalajangertariaqarsimavaa. (Jos 24:15) Josvap aqqusinikkut eqqortukkut ingerlanissani pingaartippaa. Jehovamut qanikkusukkami taamaaliornissaminut iluaqutissaminik aalajangiussivoq. Kainili Jehovamit ungasillissutigisaminik aalajangiussivoq.

³ Uaguttaaq aqqusinikkut eqqortukkut ingerlasinnaajumalluta ilaannikkut pingaarutilinnik aalajangigassaqartarpugut. Eqqaamasariaqarparput aalajangiisarnivut Jehovamik ataqqinartitsiniarnitsinnut taassumunngalu qaninniarnitsinnut iluaqutigisinnaallugillu taassumannga ungasinnerulissutigisinnaagatsigit. (Atuaruk Hebræerit 3:12). Allaaserisami matumani tulliuttumilu immikkoortuni arfineq-marlunni inuunermut attuumassuteqartuni sunilluunniit Jehovamit ungasillisinneqannginnissarput sammissavarput.

SULIFFEQARNEQ

4. Sooq sulisarnissaq pingaaruteqarpa?

⁴ Kristumiu imminut pilersorsinnaajumalluni ilaquttanilu pilersorsinnaajumallugit sulisariaqarpoq. Biibilimi ersersinneqarpoq ilaquttaminik isumaginnikkumanngitsoq uppinngitsumit, Jehovamit tunussisumit, ajornerusoq. (2 Th 3:10; 1 Tim 5:8) Taamaattumik sulisarnissaq pingaaruteqarpoq. Suliffinnulli tunngatillugu aalajangiisarninni mianersunngikkuit Jehovamit ungasillisinnaavutit. Qanoq?

5. Suliffittaannginninni suna eqqarsaatigeqqaartariaqarpiuk?

⁵ Suliffissarsioruimmi? Nunanni suliffittaarnissaq ajornakusoorpat immaqa qanorluunniit ittumik suliffeqalernissannut akuersiinnarusussinnaavutit. Taavami suliffigisinnaasat najoqqutassianut Biibilimiittunut naapertuutinngippat? Suliffilli ima piffissartornartigiva allaat ilagiinnik tapersersuinissannut ilaquttannilluunniit peqateqarnissannut piffissaqarpallaarunnaarlutit? Atorfininnissat akueriinnassaviuk suliffeqannginneq suliffilunnermit pitsaanerutinnera pissutigiinnarlugu? Eqqaamassavat aalajangiinerit Jehovamut qanillissutigisinnaalluguluunniit ungasillissutigisinnaagakku. (Hebr 2:1) Suliffittaarnissat pisariaqartikkukku allamilluunniit suliffeqalernissat eqqarsaatigigukku qanoq silatusaarlutit aalajangiisinnaavit?

6, 7. (a) Inuup suliffittaarusunneranut pissutaasinnaasut marluk suuppat? (b) Suliffittaarusunnermut pissutaasoq sorleq Jehovamut qanikkusunnermut ersersiutaava, aamma sooq?

⁶ Aallaqqaammut oqaatigineqareersutut sumukarniarnerlutit eqqarsaatigisariaqarpat. Imminut ima aperigit: ‘Suna pissutigalugu sulerusuppunga?’ Jehovamut kiffartortuarsinnaajumallutit imminullu pilersorsinnaajumallutit ilaquttatilluunniit pilersorsinnaaneri pissutiginerullugu sulisaruit Jehovamit ikiorneqassaatit. (Matt 6:33) Soraarsitaariataaruit aningaasaqarnikkulluunniit ajornartorsiuteqaleruit Jehovap qanoq ikiussanerlutit nalunngilluinnarpaa. (Es 59:1) Taassuma “inuit Guutimut tunniusimasut misilinneqarnermit” qanoq aniguisissanerlugit nalunngilluinnarpaa. — 2 Petr 2:9, NW.

⁷ Aningaasarsiorluarnissammi pissutiginerullugu sulisaruit? Imaassinnaavoq aningaasarsiorlualertutit. Pisuunngornissalli taamaallaat pissutigalugu sulinerit navianarsinnaavoq. (Atuakkit 1 Timotheusi 6:9, 10). Aningaasat suliffeqarnerlu inuuninni pingaarnerpaatikkukkit Jehovamit ungasilliartulissaatit.

8, 9. Angajoqqaat suliffeqarnerminnut tunngatillugu imminnut qanoq aperisariaqarpat, aamma sooq?

⁸ Meeraqaruit eqqaamassavat aalajangeeriaatsit meeqqavit ilinniarfigisarmassuk. Inuuninni suna pingaarnerutinnerit — suliffeqarnerit imaluunniit Jehovamik ikinnguteqarnerit — meeqqannut ersarippa? Pingaarutilimmik inissisimaffeqarnissat aningaasarsiorluarnissalluunniit pingaarnerutittuarukku, taava ilimagaajuk meeqqatit perorunik ilittulli ajortumik aalajangiissasut? Imaluunniit illit angajoqqaatut ataqqiunnaassavaatsit? Kristumiu inuusuttoq ima oqaluttuarpoq: “Meeraallungali ataatama suliffini sunit tamanit pingaarnerpaatittuarnikuuaa. Taamani isumaqartarnikuuvunga ilaquttani ajunnginnerpaamik kissaakkamigit suleruloortartoq. Isumagilluarneqarnissarput kissaatigaa. Ukiunili kingullerni allanngoriartulerpoq. Suliinnaavippoq akisuunillu pisariaqartinngisatsinnik pitsittalerluta. Tamatuma kingunerisaanik ilaqutariittut allat anersaakkut anguniagaqarnissaannik kajumissaarineq ajortutut ilaqutariittulli pisuutut ilisimaneqalerpugut. Ataatannit anersaakkut tapersersorneqarusunnerugaluarpunga taassumannga aningaasanik tunineqarnissaminngarnit.”

⁹ Angajoqqaajususi suliffissi aalluppallaarneratigut imminut Jehovamit ungasillisinniaqinasi. Meeqqassinnut maligassaalluaritsi. Taakkununnga ersersissiuk Jehovamut attaveqarluarneq aningaasanit pigisanilluunniit pingaarnerutilluinnarlusiuk. — Matt 5:3, NW.

10. Inuusuttup aalajangersimasumik suliffittaarniarluni aalajanginnginnermini suna eqqarsaatigeqqaartariaqarpaa?

¹⁰ Inuusuttuuguit inersimasunngoruillu sulerisunngorniarnerlutit eqqarsaatigigukku qanoq silatusaartumik aalajangiisinnaavit? Soorlu sammereeripput qanoq inuuniarnerit naapertorlugu aalajangiisariaqarputit. Aalajangersimasumik suliffeqalerniarlutit ilinniagaqalernissat eqqarsaatigigukku, taava suliffigiligassat inuuninni Jehovamut kiffartornermik pingaarnerpaatsitsinissannut iluaqutigissaviuk? Imaluunniit Jehovamit ungasillissutigissaviuk? (2 Tim 4:10) Silarsuarmiut taamaallaat aningaasaaterpassuaqaraangamik pilluartartut assigerusuppigit? Imaluunniit Daavitut Jehovamik tatiginnikkusuppit? Taanna ima allappoq: “Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik qitornaanilluunniit nerisassanik qinnuuloortunik.” (Tuss 37:25) Tamanna sukkoorniarnerluni aalajangernissamut assersuunneqarsinnaavoq. Eqqaamassavat aqquserngup aappaatigoornerit Jehovamit ungasillissutigissagakku, aqqusinikkulli eqqortukkoornerit pilluarnarnerpaamik inuulissutigissagakku. (Atuakkit Ussatit 10:22; Malaki 3:10). Aqqusinikkut sukkuussavit?a

SUNNGIFFIMMI SAMMISARTAKKAT ALIIKKUSERSUUTILLU

11. Sunngiffimmi sammisartakkat aliikkusersuutillu pillugit Biibilimi qanoq allassimasoqarpa, sunalu eqqaamasariaqarparput?

¹¹ Biibilimi allassimanngilaq nuannisarneq ajortuusoq sunngiffimmilu sammisartakkat aliikkusersuutillu piffissaajaataannaasut. Paulusi Timotheusimut allappoq sungiusarneq iluaqutaasinnaasoq. (1 Tim 4:8) Biibilimi allaat allassimasoqarpoq ‘illarfissaqartoq’ ‘qittaserfissaqartorlu’ aamma Biibilimi kajumissaarneqarpugut naammattumik sinittassasugut. (Oqal 3:4; 4:6) Mianersunngikkuilli sunngiffimmi sammisartakkat aliikkusersuutillu Jehovamit ungasillissutigilersinnaavatit. Qanoq? Sunngiffimmi sammisartakkat aliikkusersuutillu eqqunngitsut toqqarnerisigut taakkuluunniit piffissartorfigivallaarnerisigut.

12. Sunngiffimmi sammisartagassannik aliikkusersuutissannillu toqqaaleraangavit suut eqqarsaatigeqqaartariaqarpigit?

¹² Siullermik sunngiffimmi sammisartakkat aliikkusersuutillu suut toqqartariaqarnerivut sammeriartigu. Pitsaasunik sunngiffimmi sammisassarpassuaqarlunilu aliikkusersuuterpassuaqarpoq. Silarsuarli inuuffigisarput aliikkusersuutinik Guutip uumigisaanik — nakuusernermik, anersaarsiornermik kinguaassiuutitigullu inuunerlunnermik — ulikkaarpoq. Taamaattumik sunik sunngiffimmi sammisartagaqarniarlutit aliikkusersuuteqarniarlutillu toqqaanialeraangavit mianersortassaatit. Apeqqutit soorlu uku eqqarsaatigisinnaavatit: Aliikkusersuutikka qanoq sunnertissutigisarpakka? Nakuusernissannut nunannilluunniit tulluusimaarutiginninnissannut sunnertissutigisarpakka? Ajugaajuarusuttutut misigilissutigisarpakka? (Uss 3:31) Aningaasartuutigivallaarpakka? Allat paasigunikku sunngiffimmi sammisartakkakka aliikkusersuutigisartakkakkaluunniit suunersut ajuallassappat? (Rom 14:21) Sunngiffimmi sammisartakkat aliikkusersuutilluunniit aalluttakkakka inunnut qanoq ittunut attaveqarfigilissutigisarpakka? (Uss 13:20) Ajortuliussutigisarpakka? — Jaak 1:14, 15.

13, 14. Sooq sunngiffimmi sammisartakkat qanoq piffissartorfigitiginerlugit eqqarsaatigisariaqarpiuk?

¹³ Aamma sunngiffimmi sammisartakkat aliikkusersuutillu qanoq piffissartorfigitiginerlugit eqqarsaatigiuk. Imminut ima aperigit: ‘Sunngiffimmi sammisartakkat ima aallutsigisarpakka allaat oqaluussinissannut ataatsimiinnernullu najuunnissannut piffissaqarpallaarunnaassutigisarlugit?’ Sunngiffimmi sammisartakkat aliikkusersuutillu aalluppallaartarukkit tamakkiisumik nuannisassutiginavianngilatit. Sunngiffimmi sammisartakkanik aallussivallaarnaveersaartut sunngiffimmi sammisartakkaminnik nuannarinninnerusarput. Sooq? Suliassatik pingaarutillit tamaasa naammassereernikuullugit nuannisarnissaminnut ilerasuutissaqannginnamik. — Atuakkit Filippimiut 1:10, 11.

¹⁴ Sunngiffimmi sammisartakkanut piffissamik annertuumik atuisarneq nuannerpasissinnaagaluarpoq, tamannali Jehovamit ungasillissutigisinnaavat. Kim qatanngut arnaq 20-nik ukiulik taamatut misigisaqarsimavoq. Oqaluttuarpoq tallimanngornerit, arfininngornerit sapaatillu tamaasa festertarsimalluni. Maannali pingaaruteqarnerusunik suliassaqartoq paasilluarsimavaa. Ima oqarpoq: “Assersuutigalugu pioneritut oqaluussiniarlunga ullaakkut arfinermut makittarpunga, taamaattumillu ullaassakkut ataatsip marlulluunniit tungaanut katerisimaartuniissinnaanngilanga. Imaanngilaq katerisimaarnerit tamarmik ajortuusut, kisianni allanut saasaataasinnaapput. Katerisimaarnerit allatulli mianersorfigineqartariaqarput.”

15. Angajoqqaat meeqqatik sunngiffimmi sammisartakkanik pitsaasunik toqqaanissaannut qanoq ikiorsinnaavaat?

¹⁵ Angajoqqaat ilaquttami pisariaqartitaat matussusertussaavaat. Aamma ilaquttami Jehovamut qaninnissaannut aamma nuannaartutut asaneqartutullu misiginissaannut akisussaasuupput. Angajoqqaat sunngiffimmi sammisartakkanut tamanut ajortumik isiginnittaaseqarnaveersaassapput. Soorunami sunngiffimmi sammisartakkat aliikkusersuutillu ilaat ajortuupput. (1 Kor 5:6) Sunngiffimmili sammisartakkat aliikkusersuutillu mianersorlutit toqqartarukkit ilaqutariittut nuannisaaqatigiissinnaavusi.b Taamaalillutit aliikkusersuutinut tunngatillugu aalajangiisarnitit Jehovamit ungasillissutigissanngilatit.

ILAQUTTANUT ATTAVEQARNEQ

16, 17. Angajoqqaat amerlasuut qanoq alianaqisumik misigisaqarsimappat, qanorlu ililluta nalunngilarput Jehovap taakkua erloqinerat nalunngilluinnaraa?

¹⁶ Angajoqqaat meeqqallu imminnut asasorujussuusarnerat nalinginnaavoq. Jehova allaat oqarsimavoq innuttani anaanap meeqqaminut asannitsigineratut asallugit. (Es 49:15) Ilaquttap Jehovamik qimatsiniarluni aalajangerneranik aliasuutiginningaartarneq nalinginnaavoq. Qatanngut arnaq ilaajunnaarsitaasimasumik panilik ima oqarpoq: “Erloqisorujussuuvunga. Imalu eqqarsarlunga: ‘Sooq Jehovamik tunussiva?’ Ilerasuppunga imminullu pisuutillunga.”

¹⁷ Massakkut taamatut atugaqaruit Jehovap qanoq misiginersutit nalunngilluinnarpaa. Nunarsuarmi ernini siulleq ulersuarlu sioqqullugu inuit amerlanersaat pikitsitsilermata Jehova “aliasulerpoq”. (1 Mos 6:5, 6) Taamatut alianaqisumik atugaqarneq inunnit taamatut aqqusaagaqarsimanngitsunit paasiuminaatsinneqarsinnaavoq. Ulorianassaarli ilaquttavit eqqunngitsuliornera pissutigalugu Jehovamit ungasilliguit. Ilaquttavit Jehovamik qimatsisimanerata aliasuutiginera qanoq naammagalugu atorsinnaaviuk?

18. Sooq angajoqqaat meerartik Jehovamik qimatsiniarluni aalajangerpat imminut pisuutissanngillat?

¹⁸ Pisumut imminut pisuuteqinak. Ilaqutaasup tunniulluinnarsimasup kuisimasullu ‘nammagassani nammineq nammattussavaa’ Jehovalu kiffartorfiginiarnerlugu nammineq aalajangertussaallugu. (Gal 6:5) Jehovap ajortuliortoq nammineq aalajangikkaminut akisussaasutut isigaa. Guutip pisuutinnavianngilaatit. (Ez 18:20) Aamma allat pisuutissanngilatit. Jehovap innuttaminut perorsaatisseeriaasia ataqqiuk. Utoqqaanertat ilagiinnik illersuisuusut pisuutissanngilatit. Diaavululi akerlilersorniarlugu aalajangiusimajuk pisorlu Jehovamit ungasillissutiginagu. — 1 Petr 5:8, 9. 

19, 20. (a) Ilaajunnaarsitaasimasunut angajoqqaajusut aliasunnertik qanoq naammagalugu atorsinnaavaat? (b) Angajoqqaat taakku sumik neriuuteqassappat?

¹⁹ Meeqqannut tunngatillugu pisoq Jehovamik kamaatiginnissutigilerukku qanoq kinguneqassava? Taamatut misiginerit Jehovamit ungasillissutigisinnaavat. Ilaquttavit asasavit paasisariaqarpaa Jehova ilaquttannit asanerujuarniarlugu aalajangiusimagit. Taamaattumik aliasunnerit naammagalugu atorsinnaajumallugu Jehovamut attaveqarnerit nukittorsarniartuartariaqarpat. Qatanngutitit kristumiut aalajaatsut peqatigiuakkit. (Uss 18:1) Jehovamut qinusarit qanorlu misiginerlutit unneqqarillutit oqaluttuuttaruk. (Tuss 62:8, 9) Ilaajunnaarsitaasimasunut tunngatillugu taassuma peqqussutaanik maleruaannginnissannut utoqqatsissutissarsiortassanngilatit. Ilaquttap ilaajunnaarsitaasimasup peqatiginissaanut oqarasuaatikkulluunniit imaluunniit e-mailikkut attaveqarfiginissaanut utoqqatsissutissarsiortassanngilagut. (1 Kor 5:11) Jehovamut kiffartorneq ulapputigiuk. (1 Kor 15:58) Qatanngut arnaq qulaani issuarneqartoq ima oqarpoq: “Nalunngilara Jehovamut kiffartorninni ulapputeqartariaqarlunga panigalu Jehovamut uteqqippat ikiorluarsinnaaniassagakku anersaakkut nukittuniartuartariaqarlunga.”

²⁰ Biibilimi allassimavoq asanninneq ‘tamatigut neriuttartoq’. (1 Kor 13:4, 7) Asasavit Jehovamut uternissaanik neriuuteqarnerit ajortuunngilaq. Ukiut tamaasa ilaajunnaarsitaasimasut amerlasuut peqqissimilertarput Jehovallu peqatigiissortaanut uteqqinniarlutik aalajangertarlutik. Jehovap, ‘isumakkeerfiginnikkumasuusup’, peqqissimmileraangata kamaakkunnaartarpai. — Tuss 86:5.

SILATUSAARLUTIT AALAJANGIISARIT

21, 22. Kiffaanngissuseqarlutit aalajangiisarninnut tunngatillugu suna aalajangiusimaviuk?

²¹ Jehovap inuit namminneq aalajangiinissaannut kiffaanngissuseqartippai. (Atuakkit 5 Mosesi 30:19, 20). Taamaattumillu silatusaarluta aalajangiinissatsinnut akisussaaffeqarpugut. Kristumiut tamarmik imminut ima aperisariaqarput: ‘Aqqusinermi eqqortumiissutigisannik aalajangiisarsimavunga? Suliffiga, sunngiffimmi sammisartakkakka aliikkusersuutikkalu ilaquttannulluunniit attaveqarnera Jehovamit ungasillissutigisimavakka?’

²² Jehovap innuttani asajunnaarnavianngilai. Taamaattumillu aatsaat silatusaarata aalajangiisarutta Jehovamit ungasillisinnaavugut. (Rom 8:38, 39) Taamatulli pisoqartariaqanngilaq! Suulluunniit Jehovamit ungasillissutigilinngisaannakkit. Allaaserisami tulliuttumi aalajangiileraangatta immikkoortut sisamat allat inuunitsinnut attuumassuteqartut mianersorfigisariaqakkavut sammissavavut.

1, 2. (a) Qanoq Saatanip inuit salloqittarniartarpai? (b) Guutimut qanillinissamut suna iluaqutigisinnaavarput?

JEHOVAP GUUTIP inuit imminut qanimut attaveqarusussuseqartillugit pinngortippai. Saatanilli Jehovamik pisariaqartitsinngitsutut eqqarsalersinniartarpaatigut. Saatanip Eva naatsiivimmi Edenimi salloqittaramiulli inuit taamatut isumaqalersinniartalernikuuai. (1 Mos 3:4-6) Taamanimiilli inuppassuit Guutimik pisariaqartitsinngissorilersimapput.

² Qujanartumilli uagut Saatamit uukapaatinneqartariqanngilavut, “nalunngilarpummi taanna qanoq ittumik pilersaaruteqartoq.” (2 Kor 2:11) Jehovamit ungasillissutigisinnaasatsinnik aalajangiisinniarsarisarpaatigut. Allaaserisami siullermi suliffitsinnut, aliikkusersuutinut ilaquttatsinnullu tunngatillugu qanoq silatusaartumik aalajangiisinnaanerput nassuiarneqarpoq. Allaaserisami matumani atortunut elektroniskiusunut, peqqinnermut, aningaasanut tulluusimaarnermullu tunngatillugu eqqortumik isiginnittaaseqarnitsigut ‘Guuti qanillisinnaagipput’ sammissavarput. — Jaak 4:8.

QARASAASIAT ATORTULLU ELEKTRONISKIUSUT

3. Qarasaasiat atortullu elektroniskiusut eqqortumik eqqunngitsumillu qanoq atorneqarsinnaanerat nassuiaruk.

³ Inuit qarasaasianik atortunilluunniit allanik elektroniskiusunik atuisartut amerligaluttuinnarput. Atortut taakku eqqortumik atortarutsigit iluaqutigingaarsinnaavavut. Eqqunngitsumilli atortarutsigit Ataatatsinnit qilammiusumit ungasillissutigisinnaavavut. Qarasaasiat iluaqutigisinnaavavut. Atuagassiaq una maannakkut atuakkat qarasaasiaq atorlugu allagaallunilu saqqummersinneqarnikuuvoq. Misissueqqissaarnermi attaveqaqateqarnermilu qarasaasiat iluaqutigineqarsinnaallutillu atussallugit nuannersinnaapput. Qarasaasialli tiguartiffigilluinnarsinnaavavut. Pilerisaarutini oqariartuutigineqartuarpoq atortut kingulliit saqqummersimasut pisiarisariaqarivut. Angutip inuusuttup qarasaasiaq aalajangersimasoq pilerigingaaramiuk qarasaasiaq pisiariniassagamiuk isertorluni tartuersissimavoq. Ila ajussusia!

4. Qatanngut angut qarasaasiamik atuivallaarunnaarniarluni qanoq iliorsimava?

⁴ Ajornerussaarli atortut elektroniskiusut Jehovamik attaveqarnitsinnut akornutigilerutsigit. Piffissaajaatigivallaalersinnaavavut eqqunngitsumilluunniit atulersinnaallugit. Qatanngut Jonimik atilik 28-nik ukiulik oqaluttuarpoq atuaqqissaanngiinnarluni qarasaasiamik atuisarsimalluni.a Unnuarsuarmut interneterluni eqqumasarsimavoq. Oqaluttuarpoq qasunerujartortilluni allaqateqarunnaarnissani isiginnaagassianilluunniit, allaat eqqunngitsunik, isiginnaarunnaarnissani sapernarsinerusartoq. Ileqqunilu allanngortinniarlugu innarfissanngoraangat qarasaasiani nammineerluni qamittartunngortippaa. — Atuakkit Efesosimiut 5:15, 16.

5, 6. (a) Angajoqqaat meeqqaminnut qanoq akisussaaffeqarpat? (b) Angajoqqaat meeqqatik maligassaalluartunik peqateqartarnissaat qanoq qulakkeersinnaavaat?

⁵ Angajoqqaajususi meeqqasi sulerinersut nakkutigiin­naavittaria­qanngilasi, qarasaasianilli qanoq atuisarnersut nakkutigisaria­qarpasi. Kinguaassiuu­titigut inuunerluttunik anersaarsior­tunilluunniit nittartakkakkut isiginnaar­tarnissaat, nakuuser­tortalinnik pinnguaate­qarnissaat nittartakkak­kulluunniit ikinngutipalaanut attaveqarnissaat akuerissanngilarsi. Akornuser­neqarusun­ngiinnarlusi meeqqassi qanorluunniit iliornissaat akuerisarussiuk isumaqalersinnaaput taamaattunik sammisaqarneq ajunngitsuusoq. Ilissi angajoqqaajususi meeqqassi inuusuttuutissilu Jehovamit ungasillissu­tigisinnaa­saannit tamanit sernissornissaat akisussaaffigaarsi. Allaat uumasut piaqqatik ulorianartunut sernissorniarlugit saassussisarput. Takorluulaariaruk nannup piaqqani ulorianartunut sernissorniarlugu qanoq iliussanersoq! Taamatuttaaq angajoqqaat meeqqatik ulorianartunut sernissortaria­qarpaat. — Naleqqiuguk Hosea 13:8.

⁶ Meeqqassi kristumiunik, qanorluunniit ukiulinnik, maligassaalluartunik peqateqartarnissaannut ikiortarsigit. Eqqaamassavarsilu meeqqassi ilissinnit ilagineqarnissartik pisariaqartimmassuk! Taamaattumik illaqatigisarsigit, pinnguaqatigisarsigit, suleqatigisarsigit ‘Guutimullu qanilliartoqatigisarsigit’.b

PEQQINNEQ

7. Sooq tamatta peqqissoorusuppugut?

⁷ Allat qanoq innersut aperisarpavut. Adami Evalu Saatanimit salloqittarneqarmatali taamaalillutillu Jehovamit ungasillimmata inuit tamarmik napparsimasalerput. Nappaateqaleraangatta Jehovamut kiffartornissarput sapernarnerulersittaratsigu napparsimalernerput Saatanip nuannaarutigisarpaa. Toquguttalu Jehova kiffartorfigisinnaajunnaassavarput. (Tuss 115:17) Taamaattumik peqqissuujumalluta sapinngisatsinnik iliuuseqarusuppugut.c Qatanngutittalu peqqissusiat soqutigisariaqarparput.

8, 9. (a) Qanoq ililluta peqqissutsitsinniinnaq eqqarsaatiginninnginnissarput qulakkeersinnaavarput? (b) Sooq nuannaartuunissarput pingaaruteqarpa?

⁸ Peqqissuserpulli kisiat eqqarsaatigisassanngilarput. Inuit ilaasa Guutip naalagaaffiata oqaluussissutiginissaaninngarnit nerisassiornermut malittarisassat, katsorsartinnerit isikkorissaatillu aalajangersimasut oqaluuserinerusarpaat. Imaassinnaavoq inuit taakku allanik ikiuilluartutut misigisut. Naalagaaffilersaarfilli ataatsimeersuarnerillu nioqqutissanik tuniniaaffigisarnagilluunniit peqqinnissamut tunngasunik isummersorfigisanngilavut. Sooq?

⁹ Biibili oqaloqatigiissutiginiarlugu Guutillu anersaava illernartoq nuannaarutiginiarlugu naapisimaaqatigiittarpugut. (Gal 5:22) Peqqinnermut peqqissaatinulluunniit tunngatillugu, aperineqarsimagutta aperineqarsimanngikkaluaruttaluunniit, siunnersuuteqarneq anersaakkut sammineqartussanit allanut saassutigisinnaavarput allallu tamanna nuannaarunnaassutigisinnaavaat. (Rom 14:17) Inuit namminneq peqqinnissaminnut tunngatillugu aalajangiisartussaapput. Nappaatit tamarmik kimilluunniit, allaat nakorsamit, katsorsarneqarsinnaanngillat. Peqqinnissamik isumakuluuteqartuarnerput iluaqutiginavianngilarput. (Luk 12:25) Biibilimili allassimavoq ‘uummatikkut nuannaarneq peqqinnartuusoq’. — Uss 17:22.

10. (a) Jehovap inunnut tunngatillugu suna pingaartinneruaa? (b) Qaqugu peqqilluinnalissaagut?

¹⁰ Taamatuttaaq isikkorput soqutigisariaqarparput, inuusunneruniarsarisariaqanngilagulli. Biibilimi ima allassimasoqarpoq: “Nutsat qeersuusut niaqorutaasarput kusanangaartut naapertuilluarnerup aqqutaaniikkaangata.” (Uss 16:31, NW) Jehovap ilorlikkut qanoq innersugut qanoq isikkoqarnitsinninngarnit pingaartinneruaa, uaguttaaq taamatut eqqarsartariaqarpugut. (Atuakkit 1 Petrusi 3:3, 4). Taamaattumik isikkorilerniaannarluta ulorianartunik nakorsaatitornitsigut suliaritinnitsigulluunniit peqqinnerput inuunerpulluunniit navianartorsiortikkumassavarput? Qanorluunniit utoqqaatigigaluarutta qanorluunniillu peqqiitsigigaluarutta pinnissuseq piviusoq ‘Jehovami nuannaarnermit’ aallaaveqarpoq. (Neh 8:10) Silarsuassami nutaami peqqilluinnalerlutalu inuususseqqissaagut. (Job 33:25; Es 33:24) Tamanna nalliutserlugu silatusaarluta aalajangiisariaqarlutalu Jehovap neriorsuutai upperilluinnartariaqarpavut. Taamaalilluta maanna inuunerput nuannaarutigisinnaassallugulu peqqinnerput isumakuluutigivallaassanngilarput. — 1 Tim 4:8.

ANINGAASAT

11. Qanoq aningaasat Jehovamit ungasillissutigisinnaavavut?

¹¹ Aningaasaateqarneq aningaasarsiornerluunniit ajortuunngillat. (Oqal 7:12; Luk 19:12, 13) ‘Aningaaserituujuguttali’ Jehovamit ungasillissaagut. (1 Tim 6:9, 10) Oqaaseqatigiit ‘silarsuarmi matumani isumakuluutit’ isumaqarput pisariaqartitanik pissarsinissamik ernumateqarpallaarnermik. Taamatut isumakuluuteqarneq Jehovamit ungasillissutigisinnaavarput. Oqaaseqatigiit ‘pisuussutit nakutitsisarneri’ isumaqarput aningaasateqarnermit pillualersinneqarnissamik toqqissisimalersinneqarnissamillu upperinnilernissamut uukapaatinneqarsinnaanermik. (Matt 13:22) Jiisusi oqarpoq Guutimut kiffartuutigaluni pisuunngorniartoqarsinnaanngitsoq. — Matt 6:24.

12. Aningaasaliisarnerit suut ullumikkut nalinginnaappat, qanorlu taakku ingalassimasinnaavavut?

¹² Aningaasanut eqqunngitsumik isiginnittaaseqarneq ajortuliussutigisinnaavarput. (Uss 28:20) Inuit ilaat aningaasarsiupallakkusunnertik pissutigalugu unammisitsinerni eqquiniaasarput. Qatanngutit ilaat niuernermi ingerlatanut aningaasarsiupallassutigisinnaasaminnut aningaasaliisarsimapput allaallu ilagiinniittut allat aningaasarsiupallannissaannik neriorsuisarsimallutik. Qatanngutit ilaat aningaasanik niuernermi atugassaminnik ilagiinniittunut atorniartarsimapput atukkaminnillu annerujussuarmik taarsiiumasarsimalutik. Piumatuujugutta niuernermi neqeroorutit aningaasanik annaasaqassutigerujussuarsinnaasavut akuererusussinnaavavut. Taamaattumik piumatuunngornissat mianersuutigisaruk. Amerlanertigut aningaasarsiupallattoqarsinnaaneq ajorpoq.

13. Jehovap aningaasanut qanoq isiginnittaaseqaqquaatigut?

¹³ ‘Naalagaaffik naapertuilluassuserlu taassuma pia siulliullugit noqqaassutigiuarutsigit’ Jehovap pisariaqartitavitsinnik tamaviaarluta pissarsiniarnitsinni pilluaqqujumaarpaatigut. (Matt 6:33, NW; Ef 4:28) Suleruloortarnerput pissutigalugu ataatsimiinnerni sinilertarnissarput imaluunniit naalagaaffilersaarfimmiinnitsinni aningaasaqarnermik isumakuluuteqartarnissarput Jehovap kissaatiginngilaa. Silarsuarmi inuppassuit isumaqarput kingusinnerusukkut inuunerminni sulissanngikkunik aningaasarsiorluarumallutik ullut tamaasa tamaviaartariaqarlutik. Meeqqatillu taamaaliornissaannut kajumissaarajuppaat. Jiisusilli tamanna ingasattajaarnerusoq ersersippaa. (Atuakkit Lukasi 12:15-21). Gehazi piumatuujutigaluni Jehovamut attaveqarluarsinnaasorivoq. — 2 Kng 5:20-27.

14, 15. Sooq aningaasanik toqqissisimalissuteqarsinnaasorineq silatusaarnerunngila? Assersuuteqarit.

¹⁴ Nattorallit ilaat aalisakkamik oqimaappallaamik pisaqarniarsarigaangamik ipisarput. Uaguttaaq pisuunngorniapallakkusunnerput ipissutigisinnaavarpullusooq. Utoqqaanertaq Aleximik atilik oqaluttuarpoq nalinginnaasumik aningaasaatini mianersortumik atortarsimallugit. Allaat quliut sipaarluni atortarsimavaa. Aningaasaateqarnerulerunili suliniunnaariarluni pionerinngorsinnaasorivoq. Taamaattumik aktianik qanoq pisisoqarsinnaallunilu tuniniaasoqarsinnaanersoq ilinniariarlugu aningaasaatini tamaasa aktianik pisinermut atorpai. Allaat aktianik amerlanerusunik pisisinnaajumalluni taarsigassarsivoq! Aktialli pisiai naleerupput. Alex ima oqaluttuarpoq: “Aningaasaatima utertinnissaat aalajangiusimavara.” Utaqqiguni aktiat naleqarnerulersinnaasorai.

¹⁵ Alexip aktiatini eqqarsaatigiinnaavilerpai. Jehovamut kiffartornini salliutikkuminaatsilerpaa iluamillu sinissinnaajunnaarluni. Aktialli naleqarneruleqqinngisaannarput. Alexip aningaasaatini tamaasa annaavai illunilu tuniniartariaqalerlugu. Ilaquttani ajornartorsiortittorujussuusimallugit oqaluttuarpoq. Pingaarutilimmilli ilikkagaqarpoq. Ima oqarpoq: “Kinaluunniit Saatanip aaqqissuussinera iluaqutigalugu toqqissisimalersinnaasoralunilu pillualersinnaasorisoq pakatsingaartussaavoq.” (Uss 11:28) Aningaasat aningaasarsiorsinnaassuserpulluunniit kisiisa isumalluutigilerutsigit Saatani ‘silarsuup matuma guutia’ isumalluutigilissavarput. (2 Kor 4:4; 1 Tim 6:17) Alex maanna nutaarsiassamik nuannersumik oqaluussinermik aallussilluarneruleqqissinnaajumalluni inuunerminik allannguisimavoq. Allannguimmat ilaqutariittut pilluarnerulerlutillu Jehovamut qaninnerulerput. — Atuakkit Markusi 10:29, 30.

TULLUUSIMAARNEQ

16. Tulluusimaarneq qanoq iluaqutaasinnaava, makitalernerli qanoq kinguneqarsinnaava?

¹⁶ Jehovap Nalunaajaasuinut ilaanerput tulluusimaarutigisariaqarparput. (Jer 9:23) Tamanna pissutigalugu silatusaartumik aalajangiiniartuarlutalu Guutip najoqqutassiai qutsissut malinniartuarpavut. Makitalernissarpulli Jehovamillu silatunerusorilernissarput mianersuutigisariaqarparput, taamaaliunngikkuttami Jehovamit ungasillisinnaagatta. — Tuss 138:6; Rom 12:3.

17, 18. (a) Biibilimi maniguuttutut makitasuutullu allaatigineqartunik eqqaasaqarit. (b) Qatanngut angut makitaneq Jehovamit ungasillissutigiumanagu qanoq iliorsimava?

¹⁷ Inuit makitasut maniguuttullu Biibilimi allaatigineqarput. Kunngi Daavi maniguulluni Jehovap siulersuineranik noqqaassutiginnikkami tassumannga pilluaqquneqarpoq. (Tuss 131:1-3) Jehovalli kunngi Nebukadnesari Belshassarilu makitanerat pissutigalugu pillarpai. (Dan 4:27-34; 5:22-30) Uaguttaaq ilaannikkooriarluta makitanerput pissutigalugu imminut isumakuluutississinnaavugut. Ryan 32-nik ukiulik ilagiinni kiffartortuusoq ilagiinnut allanut nuuppoq. Ingerlaannangajak utoqqaanertanngortussatut inassutigineqarnissani naatsorsuutigaa. Ukiorli ataaseq qaangiummat suli utoqqaanertanngorsimanngilaq. Ryan makitalerpa utoqqaanertallu inassuteqarsimannginnerat pissutigalugu kamaatilerlugit? Ataatsimiinnerit najuuffigisarunnaarpai makitaninilu Jehovamit ilagiinnillu ungasillissutigalugu? Illit Ryaniugaluaruit qanoq iliorsimassagaluarpit?

¹⁸ Ryan anguniagaqarnermini utaqqisinnaassuseqarneq pillugu misissuivoq. (Uss 13:12) “Paasilerpara utaqqisinnaassuseqartariaqarlungalu maniguunnerusariaqarlunga. Jehovamit ilinniartinneqarnissara pisariaqartippara.” Ryanip ilagiinni qatanngutiminik oqaluussinerminilu naapissimasaminik ikiuilluarnissani aallunnerulerpaa. Sivitsunngitsoq arlalinnik siumukarluartunik Biibilimik atuaqqissaaqateqartalerpoq. Ima oqarpoq: “Kiffartorninnik nuannaarutiginninnerulerama anguniagara isumakuluutigiunnaarpara, taamaattumillu ukiup aappaa affaq qaangiummat utoqqaanertanngortinneqarama tupaallappunga.” — Atuakkit Tussiaat 37:3, 4.

JEHOVAMUT QANITTUARIT!

19, 20. (a) Allaaserisani marlunni sammisatta Jehovamit ungasillissutiginnginnissaat qanoq qulakkeersinnaavarput? (b) Kikkut Jehovamut qanittuarnermut tunngatillugu maligassaalluarpat?

¹⁹ Allaaserisani marlunni immikkoortuni arfineq-marlunni eqqartukkavut ajortuunngillat. Jehovap Nalunaajaasuinut ilaanerput tulluusimaarutigaarput. Ilaqutariittut pilluarnerput peqqissuunerpullu nuannaarutigaavut. Imminut pilersorsinnaajumalluta ilaquttatsinnillu pilersuisinnaajumalluta sulisariaqarlutalu aningaasarsiortariaqarpugut. Sunngiffimmi sammisartakkat atortullu elektroniskiusut iluaqutaapput. Puiunngisaannartariaqarparpulli eqqaariikkatsinnik atornerluineq Jehovamit ungasillissutigisinnaallutigu.

²⁰ Saatanip Jehovamit ungasillinissarput kissaatigaa. Imminulli illersorniarluta ilaquttavullu illersorniarlugit tamaviaarsinnaavugut. (Uss 22:3) Jehovamut qanillinissat sulissutigiuaruk taannalu qanittuaruk. Tamatumunnga tunngatillugu maligassaalluartorpassuit Biibilimi allaatigineqarput. Enokip Noallu ‘Guuti ilumoortoq saqeqatigaat.’ (1 Mos 5:22; 6:9, NW) Mosesi ‘takussaanngitsumik isigisaqarlunilusooq pinertusaarpoq.’ (Hebr 11:27) Jiisusi Ataatami piumasaatut iliortuarami pilluaqquneqarpoq. (Joh 8:29) Maligassaalluartut taakku ilaartigit. “Tipaatsuttuaannaritsi, qinuttuinnaritsi, qanorluunniit atugaqaraluarussi qujasaritsi.” (1 Th 5:16-18) Sunaluunniit Jehovamit ungasillissutigeqinagu!