’Tamakku tamarmik taamaalissapput’

’Jesusip akivai: „. . . Tamakku tamarmik taamaalissapput, naggatissarli tassaanngikkallarpoq.“’ — MATÎUSE 24:4-6.

1. Sammisaq suna soqutigisariaqarparput?

QULARNANNGITSUMIK inuunerit siunissallu soqutigaatit. Taamaattumik C. T. Russellip 1877-imi soqutigiligaanik aamma soqutigisaqartariaqarputit. Russellip, kingusinnerusukkut Napasuliaq Alapernaarsuiffiup Peqatigiiffianik tunngaviliisup, atuagassiaaraq The Object and Manner of Our Lord’s Return (Naalakkap qanoq ililluni sunalu siunertaralugu tikiunnissaa) allappaa. Atuagassiaaqqami tamatumani 64-inik quppernilimmi Jesusip uternissaa, imaluunniit tikiunnissaa, sammineqarpoq. (Juánase 14:3) Ilaanni Uuliap Qaqqaani Jesus issiaqatigitillugu uternissaa tamanna pillugu apustilit ima aperipput: ’Oqarfigitigut: qaqugu tamakku taamaalissappat, sunalu tikiuffissannut silarsuullu matuma naggatissaanut [najuunnissannut pissutsillu aaqqissuussaanerata naggatissaannut, NV] nalunaaqutaassava?’ — Matîuse 24:3.

2. Sooq Jesusip siulittuutaataa qanoq paasineqarnissaa isumaqatigiinngissutigineqartarpa?

² Jesusip akissutaa nalunngiliuk paasillugulu? Akissutaa iivangkiiliuni pingasuni allassimavoq. Professori D. A. Carson ima oqarsimavoq: „Biibilimi kapitalit ikittuinnaat Matîuse kapitali 24-tut, allassimaffiillu taamaaqataat Mákorse kapitali 13-itut Lúkarse kapitali 21-tullu, Biibilimik misissuisut akornanni taama isumaqatiginngissutaatigisoqanngilaq.“ Nangilluni nammineq isummani isummanut imminnut akeriissorpassuarnut ilanngullugu saqqummiuppaa. Isummat taakkua ilarpassui, amerlasuut ukiuni hundredelikkuutaani kingullerni saqqummiunneqarsimasut, uppernermik amigaateqarnermik ersersitsisuupput. Taamatut saqqummiisut oqarput Jesus iivangkiiliuni allassimasutut oqarsimanngisaannartoq, oqaasii kingornatigut allanngortinneqarsimasut siulittuutaaluunniit eqquussimanngitsut — isummat tamakku Biibilimik isornartorsiuiumatunermut ersiutaapput. Nassuiaasut ilaata allaat îvangkîlio Mákorsip agdlagâ ’Maháyána-Buddhasiortut isumaliutersuutaat tunngavigalugit’ misissorsimavaa.

3. Jehovap Nalunaajaasuisa Jesusip siulittuutaa qanoq isigaat?

³ Tamatumunnga akerliusumik Jehovap Nalunaajaasuisa Biibilip tutsuiginassusia ilumoorneralu, aamma Jesusip toqunissi ullunik pingasunik sioqqullugu Uuliap Qaqqaani apustilinut sisamanut oqaaserisimasai, akueraat. C. T. Russellip nalaaniilli Guutip innuttai Jesusip siulittuutaanik paasisaqariartuaarsimapput. Siulittuutip tamatuma qanoq paasineqarnissaanik isuma ukiuni kingullerni Napasuliaq Alapernaarsuiffik-mi nassuiarneqarnerusimavoq. Paasissutissat tamakkua paasiniarluarsimavigit inuuninnilu qanoq pingaaruteqarnera paasillugu?a Ilikkakkavut tamakku uteqqeriartigik.

Alianartoq qanittukkut eqquutingajalersoq

4. Suna pissutigigunarlugu apustilit Jesus siunissaq pillugu aperaat?

⁴ Apustilit nalunngilaat Jesus tassaasoq Messias. Taamaattumik tusaramikku toqunissani, makititaanissani uternissanilu eqqartorai ima isumaliorsimassapput: ’Jesus toquguni qimagukkunilu, qanoq ililluni Messiasitut tupinnartunik naammassisaqarsinnaassava?’ Aamma Jesusip Jerusalem naalaffiullu aserornissaat eqqartorsimavaa. Apustilit eqqarsarsimassapput: ’Qaqugu qanorlu ililluni taamaalissava?’ Apustilit tamakkua paaserusuppaat imalu aperipput: ’Qaqugu tamakku taamaalissappat? Sunalu nalunaaqutaassava tamakku tamarmik naammassineqassappata?’ — Mákorse 13:4; Matîuse 16:21, 27, 28; 23:37–24:2.

5. Jesusip akissutaa qanoq ukiuni hundredelinni siullerni eqquussimava?

⁵ Jesusip sorsunnerit, kaannersuit, nappaalanersuit, nunap sajuttarneri, kristumiunik uumissuineq malersuinerlu, Messiasioqqusersut, kiisalu Guutip naalagaaffianik nutaarsiassamik nuannersumik annertuumik oqaluussissutiginninneq siulittuutigai. Taava naggatissaq nalliussaaq. (Matîuse 24:4-14; Mákorse 13:5-13; Lúkarse 21:8-19) Ukiup 33-p aallartinnerani Jesus taama siulittuivoq. Ukiuni qulikkuutaani tulliuttuni ajoqersugaasa eqqumasut siulittuutit maluginiarnartumik eqquukkiartornerinut isiginnittuujumaarput. Oqaluttuarisaanerup uppernarsarsimavaa nalunaaqut taamanikkut eqquussimasoq ukiunilu 66-miit 70-imut juutit aaqqissuussaanerat Romamiunit aserorneqarneqartoq. Qanoq pisoqarsimava?

6. Ukiumi 66-imi Romamiut juutillu akornanni qanoq pisoqarpa?

⁶ Ukiumi 66-imi Judæami aasap kiattup ingerlanerani juutit zelotit Romamiut sakkutuui naalaffiup Jerusalemimiittup eqqaani pallittaalisamiittut saassuppaat, nunami sumiiffinni allani nakuusernernik aamma kinguneqartumik. Atuakkiamini History of the Jews-imi professori Heinrich Graetz allassimavoq: „Cestius Gallusip, Syriamut naalagaasutut Romamiut sakkutuuisa ataqqineqarnerannik illersuisussatut, . . . pikitsitsineq annertusiartuinnartoq unitsinniarlugu iliuuseqarnani isigiinnarsinnaajunnaarpaa. Sakkutuuni katersorpai, nunallu eqqaamiuuvisa naalagaat namminneq piumassutsiminnik sakkuutitik aallartippaat.“ Sakkutuut 30.000-t Jerusalem unguaat. Akersuuttoqareersoq juutit naalaffiup eqqaani qarmarsuit tunuanni pallittaaliffissipput. „Ulluni tallimani ullut tamaasa Romamiut qarmat saassuttaraluarpaat, tamatigulli Judæamiut qarsuinit tunuarteqqinneqartarlutik. Aatsaat ullut arfinilissaanni naalaffiup saavani qarmap avannarliup ilaa ataagut qajannarsisippaat.“

7. Sooq Jesusip ajoqersugai juutit amerlanersaannit allaanerusumik qisuariarsimappat?

⁷ Takorlooriaruk juutit taamani qanoq siuneerussimatigissasut, qularnanngitsumik sivisuumik isumaqarsimassapput Guutip illoqarfitsillu illernartoq illersussagaatik. Jesusilli ajoqersugai Jerusalemip aserorneqarnissaa pillugu mianersoqquneqarsimapput. Jesus ima siulittuisimavoq: ’Ullut ilinnut nalliukkumaarput, taava qinngarsortitit kaajallallutit ungaluliorumaarput ilujumaarlutillu tamaginnillu annikilliortillutit, suerullutillu illit qitornatillu ilinniittut ujaqqanillu qaleriissuerullutit.’ (Lúkarse 19:43, 44) Tamannali isumaqarpa kristumiut ukiumi 66-imi Jerusalemimiittut toqussasut?

8. Naalliunnartoq suna Jesusip siulittuutigaa, ’qinikkallu’ kikkut pillugit ullut taakku ikilissinneqassappat?

⁸ Uuliap Qaqqaani ajoqersukkami apeqqutaat Jesusip ima akivaa: ’Ulluni taakkunani naalliunnartoqangaassaaq Guutip pinngortitaasa pinngortitaaleqqaarnerannit mannalu tikillugu naleqanngisaannartumik kingornaluunniit naleqassanngitsumik. Ullullu taakku [Jehovap] ikilisinngippagit inummik ataatsimilluunniit annattoqanngeqqajaqaaq; qinikkalli qinersimasani pillugit ullut taakku ikilissippai.’ (Mákorse 13:19, 20; Matîuse 24:21, 22) Ullut ikilisinneqassapput ’qinikkallu’ annaanneqarlutik. ’Qinikkalli’ kikkuuppat? Tassaanavianngillat juutit pikitsitsisut Jehovamik pallorfiginnittuuneraraluarlutik taassumali erneranik ajattuisut. (Juánase 19:1-7; apustilit suliait 2:22, 23, 36) Taamanikkut qinikkat ilumoortut tassaasimapput juutit juutiunngitsullu Jesusip Messiasiuneranik Annaassisuuneranillu uppernermik ersersitsisut. Guutip qinigarai, ukiumilu 33-mi piinsip ulluani inuiaqatigiinngorput nutaat anersaakkut ittut, ’Israel Guutip pigisaa’. — Galâsiamiut 6:16; Lúkarse 18:7; apustilit suliait 10:34-45; 2 Pîtruse 2:9.

9, 10. Romamiut saassussinerata ullui qanoq ilillutik ’ikilissinneqarpat’, qanorlu kinguneqartumik?

⁹ Ullut ’ikilisinneqarpat’ qinikkallu tanitat Jerusalemimiittut annaanneqarpat? Professori Graetz ima nangippoq: „[Cestius Gallusip] sapiitsuliorniarlutik ingasattajaarniartunut akiuutiinnarnissaq ukiakkullu siallersarfik nallilersoq, . . . immaqa sakkutuunik pilersorneqarsinnaajunnaartitsisumik, sivisuumik sorsunnissaq ilalernartinngilaa. Tamanna tunuarneranut pissutaasinnaavoq.“ Qanorluunniit Cestius Gallus eqqarsarsimagaluarpat Romamiut sakkutuui illoqarfimmit tunuarput, juutinit malersuisunit ajorsartitaangaarlutik.

¹⁰ Romamiut tupaallannartumik tunuarnerat pissutigalugu ’inuit’ — Jesusip ajoqersugai Jerusalemimi navianartorsiortut — annaanneqarsinnaalerput. Oqaluttuarisaanerup takutippaa periarfissaq tamanna takkummat kristumiut illoqarfimmit eqqaanillu qimaasut. Tassaavoq Guutip siunissamik siumut ilisimasaqarneranik pallorfiginnitsiminillu aniguisitsisinnaaneranik ersiutaalluartoq! Juutimmi uppinngitsut Jerusalemimiiginnarsimasut Judæamiiginnarsimasullu qanoq pippat?

Juutit taamanikkut inuusut annikilliornartoq angisooq misigissavaat

11. ’Eqqarleriit uku’ pillugit Jesus qanoq oqarsimava?

¹¹ Juuterpassuit isumaqarput pallorfiginninnermik aaqqissuussaanertik naalaffimmik tunngaveqartoq atajuassasoq. Jesusili oqarsimavoq: ’Fiigequssuarmit assersuut ilinniarsiuk: Avalequtai isseqalerlutik pilutaqaleraangata aasaq qanillisoq ilisimasarparsi. Taamattaaq tamakku tamaasa takulerussigik taanna qanillisoq ilisimassavarsi. Ilumut oqarfigaassi: Eqqarleriit uku tamakku tamaasa naammassisinnagit nungussanngillat. Qilak nunalu nungussapput, oqaatsikkali nungussanngillat.’ — Matîuse 24:32-35.

12, 13. Jesusip ajoqersugaasa ’eqqarleriit uku’ qanoq paasisimavaat?

¹² Ukioq 66 sioqqutitsiarlugu kristumiut nalunaaqutip katitersimasup immikkoortuisa ilaat amerlasuut eqquukkiartortut takusimassavaat — sorsunnerit, kaannersuit Guutillu naalagaaffianik nutaarsiassamik nuannersumik annertuumik oqaluussissutiginninneq. (apustilit suliait 11:28; Kulorsamiut 1:23) Qaquguli naggatissaq nalliutissava? Jesusip oqaasii uku qanoq isumaqarpat: ’Eqqarleriit uku [griikerisoorlugu: geneaʹ] nungussanngillat,’? Jesusip arlaleriarluni nalimini juutit inuiaqatigiit assortuisut, ilaatigut upperisarsiornikkut siuttut, taasimavai ’eqqarleriit uku uersartut’. (Matîuse 11:16; 12:39, 45; 16:4; 17:17; 23:36) Taamaattumik Uuliap Qaqqaani ’eqqarleriit uku’ eqqaaqqikkamigit, ersarippoq kinguaariit juutiusut inuiaat oqaluttuarisaaneranni inuusimasut tamaasa pinngikkai; aamma ajoqersukkani eqqarsaatiginngilai, naak taakku ’eqqarleriinnik qinikkanik’ taaneqaraluartut. (1 Pîtruse 2:9) Jesus aamma oqanngilaq ’eqqarleriit uku’ taagamigit ukiut aalajangersimasut eqqarsaatigigini.

¹³ Akerlianik Jesusip juutit taamanikkut nalunaaqutip siulittuutigisimasami eqquukkiartorneranik takunnittut pivai. ’Eqqarleriit uku’ Lúkarse 21:32-mi eqqaaneqartut eqqarsaatigalugit professori Joel B. Green oqarpoq: „Iivangkiiliut pingajuanni ’eqqarleriit uku’ (aamma oqaatsit tamatumunnga assingusut) tassaagajupput inuit Guutip siunertaanik assortuisut. . . . Inuit naalasseriillutik Guutip siunertaanik tunussisut [pineqartarput].“b

14. ’Eqqarleriit’ taamanikkut inuusut suna misigaat, kristumiulli qanoq ilillutik allaanerulluinnartumik misigisaqarpat?

¹⁴ Eqqarleriit ajortut assortuisut juutiusut nalunaaqutip eqquukkiartorneranik takunnittut aamma juutit aaqqissuussaanerata naggatissaat misigiumaarpaat. (Matîuse 24:6, 13, 14) Misigivaallumi! Ukiumi 70-imi Romamiut sakkutuui Titusimit, kaasarip Vespasianip erneranit, siulersorneqarlutik uterput. Juutit illoqarfimmi ungusaaqqittut taassaanngitsumik naalliuuteqangaarsimapput.c Flavius Josefusip tamakkuninnga takunnittuusup oqaluttuaraa Romamiut illoqarfik aserormassuk juutit 1.100.000-it missaat toqusimasut 100.000-illu tigusaasut, taakkua amerlanersaat erniinnaq perlerput imaluunniit Romamiut isiginnaartitsivianni toqunneqarlutik. Ilumut, ukiuni 66-imiit 70-imut naalliunnartoq tassaasimavoq Jerusalemimut juutillu aaqqissuussaanerannut naalliunnartut pisimasut pisussallu tamarmik annerpaartaat. Kristumiunulli Jesusip siulittuummini mianersoqqussutaa malillugu Romamiut sakkutuuisa ukiumi 66-imi tunuarnerisa kingorna Jerusalemimit qimaasunut allaanerulluinnartumik kinguneqarpoq! ’Qinikkat’ kristumiut tanitat ukiumi 70-imi isumannaatsumikkaamik ’annaanneqarput’. — Matîuse 24:16, 22.

Eqquunnissaq alla

15. Sooq qularisariaqanngilarput Jesusip siulittuutaa ukiup 70-ip kingorna suli annertunerusumik eqquukkumaartoq?

¹⁵ Naggatissarli nalliutinngikkallarpoq. Siusinnerusukkut Jesusip eqqaasimavaa illoqarfiup aserorneqarnerata kingorna Jehovap aqqani tikiukkumaarluni. (Matîuse 23:38, 39; 24:2) Uuliap Qaqqaaniitilluni siulittuummini tamanna erseqqissarneruaa. ’Naalliunnartoqangaarnissaq’ eqqaariarlugu nangilluni oqarpoq Kristusioqqusersut saqqummerumaartut, Jerusalemilu Guutimik nalusut sivisuumik tullaarissagaat. (Matîuse 24:21, 23-28; Lúkarse 21:24) Ima paasisariaqarpa kingusinnerusukkut suli annertunerusumik eqquuttussaasoq? Aap, taamaanneranut uppernarsaatissaqarpoq. sarĸúmersitat 6:2-8 (ukiumi 70-imi Jerusalemimi annikkilliornartup kingorna allanneqarsimasut) Matîuse 24:6-8-mi aamma Lúkarse 21:10, 11-mi allassimasunut naleqqiukkutsigit, paasissavarput sorsunnerit, kaannersuit nappaalanersuillu annerusut piumaartut. Sorsunnersuup siulliup 1914-imi aallartinneraniilli Jesusip oqaasii annertunerusumik eqquukkiartorsimapput.

16-18. Qanoq pisoqarnissaa ilimagaarput?

¹⁶ Ukiuni qulikkuutaani Jehovap Nalunaajaasuisa ajoqersuutigisimavaat nalunaaqutip ullumikkut eqquukkiartornera suli ’naalliunnartoqangaarnissaanut’ uppernarsaataasoq. ’Eqqarleriit’ ajortut ullumikkut inuusut naalliunnartussaq tamanna misigiumaarpaat. Qularnanngitsumik aamma aallaqqateqassaaq (eqqunngitsumik upperisarsiornermut tamarmut saassussinermik), soorlu ukiumi 66-imi Gallusip saassussinera Jerusalemimi annikilliornartoqarneranut aallarniutaasimasoq.d Taava piffissaq ilisimaneqanngitsumik sivisussusilik qaangiuppat naggatissaq nalliutissaaq, nunarsuaq tamakkerlugu piuneerussaaneq ukiumi 70-imi pisimasumut assingusoq.

¹⁷ Naalliunnartussaq qanittukkut piumaartoq eqqarsaatigalugu Jesus oqarpoq: ’Ullut taakkua naalliunnartut [eqqunngitsumik upperisarsiornerit piuneerussaanerisa] kinguninnguatigut seqineq taarsissavoq qaammallu qaamajunnaarluni, ullorissallu qilammit nakkarumaarput qilaallu pissaaneri aalajumaarlutik. Taavalu inuup ernerata nalunaaqutaa qilammi takussaassavoq; taavalu nunami naggueqatigiit tamarmik nimaarumaarput, isigiumaarpaallu inuup ernera qilaap nuiaasigut aggersoq pissarsuulluni naalannartorsuullunilu.’ — Matîuse 24:29, 30.

¹⁸ Taamaalilluni Jesus nammineq oqarpoq ’ullut taakkua naalliunnartut kinguninnguatigut’ qilammi nalunaaquteqassasoq. (Naleqqiutikkit Joel 3:1-5; 4:15.) Tamatuma inuit naalasseriitsut annilaartissavaat ’nimaartillugillu’. Inuppassuit ’ersinermit inuillu najugaannut piumaartussanik ilimasunnermit tumanngussapput’. Kristumiulli ilumoortut taamaassanngillat! Taakkua ’aarlussapput niaqutillu makitissallugit, utertinneqarfissartik qanillimmat’. — Lúkarse 21:25, 26, 28.

Eqqartuussinissaq qanillivoq!

19. Qanoq ililluta nalunngissinnaavarput savat savaasallu pillugit assersuusiaq qaqugu eqquutissasoq?

¹⁹ Malugiuk Matîuse 24:29-31-mi siulittuutigineqarmat (1) Inuup Ernera tikiutissasoq, (2) naalannartorsuullunilu aggissasoq, (3) inngilit ilagissagaat, aamma (4) nunami naggueqatigiit tamarmik takussagaat. Savat savaasallu pillugit assersuusiamini Jesusip tamakku eqqaaqqippai. (Matîuse 25:31-46) Taamaattumik isummersinnaavugut assersuusiami tamatumani naalliunnartussap aallartinnerata kingorna Jesusip inngilini ilagalugit tikiunnissaa eqqartuussiniarlunilu issiavissaarsuarminut inginnissaa pineqartut. (Juánase 5:22; apustilit suliait 17:31; naleqqiutikkit 1 Kunngit 7:7; Daniel 7:10, 13, 14, 22, 26; Matîuse 19:28.) Kikkut eqqartuunneqassappat qanorlu kinguneqartumik? Assersuusiap takutippaa Jesus inuiaqatigiit tamaasa, qilammi issiavissaarsuata saanut katersorneqartullusooq, iliuuseqarfigissagai.

20, 21. Savat Jesusip assersuusiaani eqqaaneqartut suna misigiumaarpat? (b) Savaasat suna misigiumaarpat?

²⁰ Angutit arnallu savatut pissusillit Jesusip talerpiata tungaanut iluarisaatut immikkoortinneqassapput. Sooq? Taakkua periarfissatik atorlugit qatanngutai — tassa kristumiut tanitat Kristusip qilammi naalagaaffianut peqataasussat — ajunngitsuliorfigisarsimagamikkik. (Daniel 7:27; Eprîarit 2:9–3:1) Assersuusiamut naapertuuttumik kristumiut millionilikkuutaat savatut ittut Jesusip anersaakkut qatanngutai akueralugillu suleqatigisimavaat. Tamatuma kingunerisaanik amerlangaartut taakku Biibilimik tunngaveqartumik ’annikilliornartussamit angisuumit’ aniguinissaminnik paratiisimilu, nunarsuarmi Guutip naalagaaffiata ataani, naassaanngitsumik inuunissamik neriuuteqarput. — sarĸúmersitat 7:9, 14; 21:3, 4; Juánase 10:16.

²¹ Savaasalli allaanerulluinnartumik pineqassapput! Matîuse 24:30-mi allaatigineqarpoq taakku Jesus tikiuppat ’nimaarumaartut’. Nimaarnissaminnullu pissutissaqarluassapput, Guutip naalagaaffianik nutaarsiassaq nuannersoq itigartikkamikku, Jesusip ajoqersugai assortorsimagamikkik silarsuarlu nungujartortoq pingaartinnerugamikku. (Matîuse 10:16-18; 1 Juánase 2:15-17) Jesusip — nunami ajoqersugaasaanngitsoq — aalajangissavaa kikkut assersuutaasumik savaasaanersut. Taakku pillugit oqarpoq: ’Taakku naassaanngitsumik pillagaassapput.’ — Matîuse 25:46.

22. Jesusip siulittuutaata ilaa suna misissornerusariaqarparput?

²² Matîuse kapitali 24-mi 25-milu siulittuutinik paasisaqarnerunerput pissanganarsimaqaaq. Jesusilli siulittuutaata ilaa suli misissortariaqarparput — tassa ’maajunnartoq nungutitsisoq inimi illernartumi ittoq’ pillugu siulittuut. Tamatumunnga tunngatillugu Jesusip ajoqersukkani kajumissaarpai siuneqassuseqaqqullugit iliuuseqarnissaannullu piareersimaqqullugit. (Matîuse 24:15, 16) ’Maajunnartoq’ tamanna sunaava? Qaqugu inimi illernartumiilissava? Tamakkulu qanoq ullumikkut siunissamilu inuunitsinnut sunniuteqarpat? Allaaserisami tulliuttumi tamakku sammissavavut. (wE 1/5 99)

[Quppernerup ataani ilanngussat]

Eqqaamavigit?

□ Matîuse 24:4-14 qanoq ililluni ukiuni hundredelinni siullerni eqquussimava?

□ Matîuse 24:21, 22-mi siulittuutigineqartutut apustilit nalaanni ullut qanoq ikilissinneqarpat inunnillu annattoqarluni?

□ ’Eqqarleriit’ Matîuse 24:34-mi eqqaaneqartut suut ilisarnaatigaat?

□ Qanoq nalunngissinnaavarput siulittuut Uuliap Qaqqaani oqaatigineqartoq siunissami annertunerusumik eqquukkumaartoq?

□ Savat savaasallu pillugit assersuusiaq qaqugu qanorlu ililluni eqquutissava?

[Qupp. 12-mi assiliartaq]

Romami Titusip Qilaanngusaasaani Jerusalemip piuneerunneqarneranit tigusat ilaat

[Suminngaanneernera]

Soprintendenza Archeologica di Roma

’Atuartup qarsupiinnarnaveerligit’

’Taamaattumik maajunnartoq nungutitsisoq . . . inimi illernartumi ittoq takulerussiuk, . . . taava Judæamiittut qaqqanut qimaalit.’ — MATÎUSE 24:15, 16.

1. Jesusip mianersoqqussutaa Lúkarse 19:43, 44-mi allassimasoq qanoq qisuariarfigineqarsimava?

NAVIANARTOQARTOQ mianersoqquneqarutta ajunaarnaveersaarsinnaavugut. (Ussatit 22:3) Takorlooriartigik kristumiut Jerusalemimiittut ukiumi 66-imi u.n.k. Romamiut saassussinerisa kingorna atugaat. Jesus illoqarfiup unguneqarnissaanik aserorneqarnissaanillu mianersoqqusisimavoq. (Lúkarse 19:43, 44) Juutit amerlanersaasa sumiginnaarpaat. Ajoqersugaasali mianersoqqussutaa tusarnaarpaat. Taamaattumik ukiumi 70-imi u.n.k. ajunaarnersuarmit amilaarnartumit aniguipput.

2, 3. Sooq Jesusip siulittuutaa Matîuse 24:15-21-mi allassimasoq soqutigisariaqarparput?

² Ullunut inuuffigisatsinnut attuumassuteqartumik siulittuilluni Jesusip nalunaaqutit katitigaasut sorsunnernik, kaannersuarnik, nunap sajuttarneranik, nappaalanersuarnik kristumiunillu Guutip naalagaaffianik oqaluussissutiginnittunik malersuinernik ilallit, oqaluttuarai. (Matîuse 24:4-14; Lúkarse 21:10-19) Jesusip aamma eqqaavaa ajoqersukkami qanoq ilillutik nalunngissinnaagaat naggatissaq qanillisoq — tassa ’maajunnartoq nungutitsisoq inimi illernartumi ittoq’ takulerunikku. (Matîuse 24:15) Oqaatsit taakku immikkut pingaarutillit misissoriartigik paasiniarlugu maannakkut siunissamilu inuunitsinnut qanoq sunniuteqarnersut.

³ Nalunaaqutit oqaluttuarereeramigit Jesus oqarpoq: ’Taamaattumik maajunnartoq nungutitsisoq pruffiitikkut Danielikkut oqaatigisaq inimi illernartumi ittoq takulerussiuk, (tamakkuninnga atuartup qarsupiinnarnaveerligit), taava Judæamiittut qaqqanut qimaalit. Illullu qaaniittoq aqqanngikkili illuminit sumik aallerumalluni. Nunaatiminiittorlu utinngikkili atisani aajumallugit. Eqqanarli naartusut milutsitsisullu, ullut taakku nalliuppata. Qinugitsili qimaaffissarsi ukiuunerani sapaammiluunniit eqquuteqqunagu. Taamaanneranimi naalliunnartoqangaassavoq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik.’ — Matîuse 24:15-21.

4. Matîuse 24:15 ukiuni hundredelinni siullerni qanoq eqquussimava?

⁴ Markusip Lukasillu iivangkiiliuanni amerlanerusunik paasissutissaqarpoq. Mattæus ima allattoq: ’inimi illernartumi ittoq’ Mákorse 13:14-imi ima allassimavoq ’inissarinngisaraluaminiittoq’. Jesusip oqaasii makku Lúkarse 21:20-mi ilanngunneqarsimapput: ’Jerusalemili sorsuttorpassuit ilugaat takulerussiuk, taava ilisimassavarsi nungutitaaffissaa qanillisoq.’ Tamatuma paasitippaatigut ukiumi 66-imi Romamiut Jerusalemimik naalaffimmillu — juutinut illernartuusumik Jehovamulli illernartuujunnaartumik — saassussinerat siulittuutip siullermik eqquunnerigaa. Nungutitaalluinarfiuvoq ukiumi 70-imi Romamiut illoqarfik naalaffillu aserormatigik. Taamanikkut ’maajunnartoq’ sunaava? Qanorlu ililluni ’illernartumiippa’? Apeqqutit tamakkua akissutaasa siulittuutip ullumikkut qanoq eqquunnissaanik paasitilluassavaatigut.

5, 6. (a) Suna pillugu Danielip allagai kapitali 9-mik atuartut siuneqassuseqartariaqarpat? (b) Jesusip ’maajunnartoq’ pillugu siulittuutaa qanoq eqquussimava?

⁵ Jesusip atuartut ’qarsupiinnarnaveersaarinissaannik’ kajumissaarpai. Sumik atuartut? Qularnanngitsumik Danielip allagai kapitali 9-mik atuartut. Tassani Messias qaqugu takkukkumaartoq ukiullu pingasut affarlu qaangiuttut ’peersitaajumaartoq’ siulittuutigineqarpoq. Siulittuummi allassimavoq: „Maajunnartut suluini nungutitsisoq tikiukkumaarpoq; piuneerunneqarnissallu tungaanut aalajangeriigaq nungutinneqartumut kuineqassaaq.“ — Daniel 9:26, 27, NV; aamma takukkit Daniel 11:31; 12:11.

⁶ Juutit isumaqarsimapput siulittuummi pineqartoq tassaasoq ukiut 200-t tamatuma siorna Antiokus IV-p naalaffimmik illernassusiijaanera. Jesusilli pissutsit allaasut erseqqissarpaa atuartut siuneqassuseqaqqugamigit ’maajunnartup’ ’inimut illernartumut pinissaa’ aatsaat siunissami pisussaammat. Ersarippoq Jesusip Romamiut sakkutuui ilisarnaatiminnik katinngatillit ukiumi 66-imi takkukkumaartut pigai. Sakkutuut katinngataat imaluunniit ilisarnaataat tamakku qangali atorneqartartut tassaapput guutipiluit juutinut maajunnartut.a Qanga Romamiut ’inimut illernartumut pippat’? Tamanna pivoq Romamiut sakkutuuisa ilisarnaatitik nassarlugit Jerusalem tassanilu naalaffik, juutit illernartitaat, saassummatigik. Allaat Romamiut qarmaq naalaffiup eqqaaniittoq qajannarsisippaat. Aap, qangali maajunnartutut isigineqartoq maanna illernartumiilerpoq! — Jesaja 52:1; Matîuse 4:5; 27:53; apustilit suliait 6:13.

Ullumikkut ’maajunnartoq’

7. Jesusimit siulittuut suna ullutsinni eqquuppa?

⁷ Sorsunnersuup siulliup nalaaniilli Jesusip siulittuutaata Matîuse kapitali 24-mi allassimasup annertunerusumik eqquukkiartornera takusimavarput. Jesusilli oqaasii makku malugikkit: ’Maajunnartoq nungutitsisoq . . . inimi illernartumi ittoq takulerussiuk, . . . taava Judæamiittut qaqqanut qimaalit.’ (Matîuse 24:15, 16) Tamanna aamma ullutsinni eqquutissaaq.

8. Ukiorpassuarni Jehovap Nalunaajaasuisa ’maajunnartoq’ ullumikkut kinaasoq qanoq nassuiartarsimavaat?

⁸ Jehovap kiffaasa siulittuutip tamatuma eqquunnissaanik tatiginnilluinnassusiat ersarippoq Vagttaarnet-imi 1. februaari 1921-moortumi siulittuut tamanna Kangiani Qiterlermi pisimasunut naleqqiunneqarmat. Kingusinnerusukkut, Vagttaarnet-imi 1. februaari 1930-moortumi ima allassimavoq: „Folkeforbundip siunertavia tassaavoq inuit Guutimit Kristusimillu allamut saatinneqarnissaat, taamaattumillu aserorsaataalluni, Satanimit pilersinneqartutut Guutillu isaani maajunnartutut oqaatigineqartariaqarpoq.“ Taamaalilluni ’maajunnartoq’ 1919-imi takkuppoq. Kingusinnerusukkut Folkeforbundi Naalagaaffiit Peqatigiinnik taarserneqarpoq. Jehovap Nalunaajaasuisa tamanna qangali erseqqissartarsimavaat eqqissinissamut suliniaqatigiiffiit taakku inuit pilersitaat Guutip isaani maajunnartuusut.

9, 10. ’Annikilliornartussamik angisuumik’ paasinnittaasitoqqap qaqugu ’maajunnartup’ inimi illernartumiinnissaanik isiginnittaaserput qanoq sunnersimavaa?

⁹ Allaaserisami siulianiittumi Matîuse kapitali 24-mi 25-milu allassimasut pillugit paasinnittaaseq ersarinnerusoq nassuiarneqarpoq. ’Maajunnartoq inimi illernartumi ittoq’ pillugu nassuiaaneq aamma erseqqissarneqartariaqarpa? Aap. Jesusip siulittuutaani ’inimi illernartumi ittoq’ ’naalliunnartussap’ siulittuutigineqartup aallartilerneranut qanittumik attuumassuteqartinneqarpoq. Taamaattumik naak ’maajunnartoq’ sivisuumik pioreersimagaluartoq ’inimut illernartumut pinissaa’ annikilliornartussamut angisuumut attuumassuteqarnera malugisariaqarparput.

¹⁰ Guutip innuttai siornatigut isumaqarsimagaluarput annikiliornartup immikkoortua siulleq 1914-imi aallartittoq taavalu sorsunnissami Harmagedonimi immikkoortua kingulleq pissasoq. (sarĸúmersitat 16:14, 16; naleqqiuguk Vagttaarnet-imi 1. aggusti 1939-moortumi, qupperneq 237.) Taamaattumik paasinarpoq taamani isumaqartoqarmat ulluni kingullerni ’maajunnartoq’ sorsunnersuup siulliup kinguninnguatigut inimi illernartumiissimasoq.

11, 12. 1969-imi ’annikilliornartussaq angisooq’ pillugu qanoq nutaamik paasisaqartinneqarpugut?

¹¹ Ukiunili kingulliunerusuni pisimasut allatut isigilersimavavut. 1969-imi sisamanngornermi juulip ulluisa 10-anni New Yorkimi ataatsimeersuarnermi inuiannit tamalaanit peqataaffigineqartumi „Nunarsuarmi eqqissineq“-mik qulequtalimmi F. W. Franz, taamani Napasuliaq Alapernaarsuiffiup Peqatigiiffiata vicepræsidentia, pissanganartumik oqalugiarpoq. Jesusip siulittuutaanik paasinnittaaserisimasarput sammineqarmat qatanngut Franz ima oqarpoq: „Nassuiarneqarsimagaluarpoq ’annikilliornartoq angisooq’ 1914-imi aallartissimasoq Guutilli 1918-imi novembarimi sorsunnersuaq siulleq unitsikkaa. Taamanimiilli ’annikilliornartoq angisooq’ aallarteqqitsinnagu Harmagedonimilu naggaserneqartinnagu Guutip tanitat sinneri qinikkani suliaqarnissamut periarfissaqartikkai.“

¹² Taava paasinnittaaseq nutaanerusoq saqqummiunneqarpoq: „Pisimasut ukiuni hundredelinni siullerni pisimasunut nallersuutissappata . . . ’annikilliornartup angisuup’ assinga 1914-imi aallartissimanngilaq. Jerusalemitoqqap nalitsinni assingata ukiuni 1914-imiit 1918-imut nalaatai ’eqqanaarnartup aallaqqaataannarai’. . . . Manna tikillugu naleqarsimanngitsumik ’naalliunnartoqangaarnissaa’ suli siunissamiippoq, eqqunngitsumimmi upperisarsiornerup silarsuarmi tamarmi naalagaaffissuata (kristumiuuneraqatigiit ilanngullugit) nungutinneqarfigisussaavaa Guutillu ajugaqanngitsup ullussarsuani Harmagedonimi sorsunnerisussaallugu.“ Ima paasisariaqarpoq ’naalliunnartoqangaarnissaa’ suli aallartissimanngilaq.

13. Sooq tunngavissaqarluarpugut isumaqassalluta ’maajunnartoq’ siunissami aatsaat ’inimut illernartumut pissasoq’?

¹³ Tamanna ’maajunnartup’ qaqugu inimi illernartumiinnissaanut paasinnittaasitsinnut toqqaannartumik atassuteqarpoq. Eqqaamajuk ukiuni hundredelinni siullerni qanoq pisoqartoq. Ukiumi 66-imi u.n.k. Romamiut Jerusalem saassuppaat, tassanngaannarli tunuaqqillutik, ’inuit’ ilaat, tassa kristumiut, annannissaannut periarfissillugit. (Matîuse 24:22) Ilimagaarput ’nalliunnartoqangaarnissaa’ qanittukkut aallartissasoq, Guutillu qinigai pissutigalugit ullut taakku ikilisinneqassasut. Pingaarutilik manna malugiuk: Itsaq ’maajunnartup inimi illernartumiinnera’ Romamiut sakkutuut naalagaannit Gallusimit siulersorneqarlutik ukiumi 66-imi saassussinerannut attuumassuteqarpoq. Ullumikkut saassussinermut tamatumunnga assingusoq — ’naalliunnartoqangaarnissap’ aallartinnissaa — suli siunissamiippoq. ’Maajunnartup nungutitsisup’, 1919-imiilli piusimasup, inimi illernartumiinnera suli takusimagunanngilarput.b Qanoq ililluni taamaakkumaarpa? Uatsinnullu qanoq sunniuteqassava?

Saassussinissaq

14, 15. sarĸúmersitat kapitali 17-imi allassimasut Harmagedon sioqqullugu pisussat pillugit qanoq paasitissinnaavaatigut?

¹⁴ sarĸúmersitat-ni eqqunngitsumik upperisarsiornermut saassussinissaq allaatigineqarpoq. Kapitali 17-imi Guutip ’Babylonimut Angisuumut, uersartut arnaannut’ — nunarsuaq tamakkerlugu eqqunngitsumik upperisarsiornerup naalagaaffissuanut — eqqartuussinissaa siulittuutigineqarpoq. Kristumiuuneraqatigiit tamatumani immikkut pingaaruteqarput angerutsikkut Guutimut attaveqarnerartuugamik. (Naleqqiuguk Jeremia 7:4.) Eqqunngitsumik upperisarsiornerit, kristumiuuneraqatigiit ilanngullugit, sivisuumik ’nunap kunngii’ anersaakkut kanngunartuliorfigisarsimavaat, upperisarsiornerillu tamakku nungutinneqarpata taamatut attaveqartoqarunnaassaaq. (sarĸúmersitat 17:2, 5) Tamanna qanoq pissava?

¹⁵ sarĸúmersitat-ni allaatigineqarpoq ’nersut aappalujattoq’ pioriarluni tammarumaartoq takkuteqqillunilu. (sarĸúmersitat 17:3, 8) Nersut taanna silarsuup naalakkersuisuisa tapersersorpaat. Siulittuummi paasissutissat ikiortigalugit paasisinnaavarput nersut assersuutaasoq tassaasoq eqqissinermut suliniaqatigiiffik Folkeforbundi (’maajunnartoq’) 1919-imi pilersinneqartoq maannakkullu tassaalersimasoq Naalagaaffiit Peqatigiit. sarĸúmersitat 17:16, 17-imi takutinneqarpoq Guutip naalakkersuisut ilaat nuimasut ’nersummut’ ilaasut nunarsuaq tamakkerlugu eqqunngitsumik upperisarsiornerup naalagaaffissuanik piuneerulluinnartitsinissamik uummammiugisaqalersikkumaarai. Saassussinissaq tamanna tassaassaaq ’annikilliornartussap angisuup’ imaluunniit ’naalliunnartoqangaarnissaata’ aallartiffia.

16. Upperisarsiornerit eqqarsaatigalugit maluginiarnartumik qanoq ineriatortoqarsimava?

¹⁶ ’Annikilliornartussaq angisooq’ suli aallartissimanngimmat ’maajunnartup inimi illernartumiinnissaa’ aamma siunissami pisussaagunarpoq. ’Maajunnartoq’ ukiut hundredellit makkua aallartinneranni takkuppoq ukiunilu qulikkuutaani pioreersimalluni, qanittukkullu maluginiarnartumik ’inimut illernartumut pissaaq’. Soorlu ukiuni hundredelinni siullerni kristumiut pisimasut malinnaaffigeqqissaarsimassagaat takuniarlugu qanoq ililluni maajunnartup ’inimut illernartumut pinissaa’, ullumikkut kristumiut aamma taamaaliorput. Siulittuutip eqquunnissaa utaqqeqqaarlugu aatsaat annikitsualuit tamaasa paasisinnaavavut. Soqutiginarporli takullugu nunat ilaanni upperisarsiornermik iluarinninnginnerup annertusiartuinnarnera malunnaateqalereermat. Naalakkersuisut ilaasa siornatigut kristumiuusimasut upperisamit ilumoortumit tunussisimasut peqatigalugit nalinginnaasumik upperisarsiornermut ingammillu kristumiunut ilumoortunut akeqqersimaarneq siuarsarpaat. (Tussiaat 94:20, 21; 1 Timûtiuse 6:20, 21) Taamaattumik naalakkersuinikkut pissaanillit maanna ’Savaaraq sorsulereersimavaat’, soorlulu sarĸúmersitat 17:14-imi eqqaaneqartoq sorsunneq tamanna sualunnerulissaaq. Soorunami Jesus Kristus — Savaaraq Guutimit qutsisisinneqarsimasoq naalannarsisinneqarsimasorlu — saassussinnaannginnamikku, Guutip pallorfiginnittai ilumoortut, ingammik „innuttai illernartut“, saassutissavaat. (Daniel 7:25; naleqqiutikkit Rûmamiut 8:27; Kulorsamiut 1:2; sarĸúmersitat 12:17.) Guutip neriorsoqqissaarpaatigut Savaaraq taassumalu iligisai ajugaajumaartut. — sarĸúmersitat 19:11-21.

17. Sukannersumik isummernata ’maajunnartup’ inimut illernartumut pinissaa pillugu qanoq oqarsinnaavugut?

¹⁷ Nalunngilarput eqqunngitsumik upperisarsiorneq nungutinneqarumaartoq. Babylon Angisooq ’iluartut aavinit putumavoq’ dronningitullu iliortarluni, suujunnaarumaarporli. Nunarsuup kunngiinut minguttuumik sunniuteqarnera tassanngaannartumik allanngussaaq ’nassuit qulit nersutillu’ nakuuserlutik uumissulerpassuk. (sarĸúmersitat 17:6, 16; 18:7, 8) ’Nersutip aappalujattup’ upperisarsiornikkut atortittartoq saassuppagu, ’maajunnartoq’ kristumiuuneraqatigiit illernartuutitaanni aarlerinartorsiortitsissaaq.c Kristumiuuneraqatigiit ilumuunngitsut imminnut illernartuusorisut siulliullutik nungutinneqassapput.

Qanoq ililluni ’qimaasoqarsinnaava’?

18, 19. Sooq isumaqarpugut ’qaqqanut qimaaneq’ upperisarsiornikkut allannguinerussanngitsoq?

¹⁸ Jesusip ’maajunnartup inimut illernartumut pinissaa’ siulittuutigereeramiuk siuneqassusillit kajumissaarpai iliuuseqaqqullugit. Isumaqarpa taama kingusitsigisumik — ’maajunnartup inimi illernartumiinnerani’ — inuppassuit eqqunngitsumik upperisarsiorneq qimassagaat ilumoortumillu pallorfiginnilerlutik? Ilimananngilaq. Eqquussimanera siulleq eqqarsaatigiuk. Jesus oqarpoq: ’Judæamiittut qaqqanut qimaalit, illullu qaaniittoq illumut aqqanngikkili isernanilu sumik illuminit aallerumalluni, nunaatiminiittorlu utinngikkili annorassani aajumallugit. Eqqanarli naartusut milutsitsisullu, ullut taakku nalliuppata. Qinugitsili ukiuunerani nalliuteqqunagu.’ — Mákorse 13:14-18.

¹⁹ Jesus oqarsimanngilaq Jerusalemimiittut kisimik qimaasariaqartut, soorlu piffissami tamatumani juutit guutisiornerata qiterisaat qimassagaat; aamma oqarsimanngilaq upperisarsiornerminnik allannguissasut — upperisarsiorneq eqqunngitsoq qimallugu ilumoortumillu upperisarsiulerlutik. Jesusip ajoqersugai upperisarsiornermiit ataatsimiit allamut qimaasariaqanngillat; kristumiunngoreersimapput ilumoortut. Ukiumilu 66-imi u.n.k. Romamiut saassussinerisa juutit Jerusalemimiittut Judæamiittullu juutiussutsimiit kristumiussutsimut allannguisinngilaat. Professori Heinrich Graetz oqarpoq Romamiunik qimaasunik malinnittut illoqarfimmut utertut: „(Oktobarip ulluisa arfineq-pingajuanni) Zelotit sorsuttut erinarsuutaannik erinarsorlutik Jerusalemimut uterput, kiffaanngissuseqarnissamik attaviitsuunissamillu neriuuteqangaarlutik. . . . Guutip naakkinnilluni ikiorsimannginnerpai soorluttaaq siuaasaat ikiorsimagai? Zelotit siunissaq ernumassutiginngilaat.“

20. Kristumiut siulliit Jesusip qaqqanut qimaaqqusinera qanoq qisuariarfigaat?

²⁰ Taamanikkut qinikkat ikittut Jesusip mianersoqqussutaa qanoq qisuariarfigaat? Judæa qimallugu qaqqanut Jordanip illua-tungaaniittunut qimaanermikkut takutippaat juutit aaqqissuussaanerannut, naalakkersuinikkut upperisarsiornikkullu ittumut, ilaanatik. Nunaatitik angerlarsimaffitillu qimappaat pigisaminnik nassaratik. Jehovap illersuinera tapersersuineralu tatigilluinnarlugu taassuminnga pallorfiginninneq pingaaruteqarpasikkaluartunit allanit tamanit salliutippaat. — Mákorse 10:29, 30; Lúkarse 9:57-62.

21. ’Maajunnartoq’ saassussilerpat qanoq pisoqarnissaa ilimagissanngilarput?

²¹ Maanna eqquunneq anneq sammeriartigu. Ukiuni qulikkuutaani inuit kajumissaartarsimavavut eqqunngitsumik upperisarsiorneq qimaqqullugu pallorfiginninnermillu ilumoortumik akuerseqqullugit. (sarĸúmersitat 18:4, 5) Inuit millionilikkuutaat taamaaliorsimapput. Jesusip siulittuutaata takutinngilaa ’annikilliornartussaq angisooq’ aallartippat inuppassuit pallorfiginninnermut ilumoortumut saakkumaartut; ukiumi 66-imi u.n.k. juutit ataatsimoorrallutik allamik isumataarsimanngillat. Kisianni kristumiut ilumoortut Jesusip mianersoqqussutaa qimaaqqusineralu maleruarusungaassavaat.

22. Jesusip qaqqanut qimaaqqusinera maleruassagutsigu sunik nassataqarsinnaava?

²² Maannakkut annikilliornartussap angisuup annikitsualuttai tamaasa ilisimanngilagut, tunngavissaqarluartumilli isummersinnaavugut Jesusip ’qimaaqqusinera’ tassaanngitsoq sumiiffimmit sumiiffimmut allamut qimaanissaq. Nunarsuaq tamakkerlugu Guuti innuttaqarpoq. Nalunngilarpulli qimaaneq pisariaqalerpat kristumiut tamatigut eqqunngitsumik upperisarsiornerup peqatigiissortaannit immikkoorluinnartariaqartut. Aamma malugisariaqarpoq illumut uterluni atisanik pigisanilluunniit allanik aallernissaq Jesusip mianersoqqussutigimmagu. (Matîuse 24:17, 18) Imaassinnaavoq nunap piinik isiginnittaasitsinnik misilinneqartugut; tamakku Guutip tamanik annaassinissaanik pingaarnerutippagut? Aap, qimaanissarput artornartunik ujariatsinernillu nassataqarsinnaavoq. Qanorluunniit pisoqarsinnaaneranut piareersimasariaqarpugut, soorlu ukiuni hundredelinni siullerni uppeqativut Judæamit Jordanip illua-tungaanut Peræamut qimaasut taamaaliorsimasut.

23, 24. (a) Taamaallaat sumi illersorneqarsinnaavugut? (b) ’Maajunnartoq inimi illernartumi ittoq’ pillugu Jesusip mianersoqqussutaata qanoq sunnertariaqarpaatigut?

²³ Qulakkeertariaqarparput Jehova taassumalu peqatigiissortai qaqqatut ittut qimarnguigiuaannarnerlutigik. (2 Samuel 22:2, 3; Tussiaat 18:3; Daniel 2:35, 44) Tassani illersorneqarsinnaavugut. Inuppassuit ’qaarusunnut qaqqallu qunnerinut’ — tassa inuit peqatigiissortaannut aaqqissuussinernullu Babylonip Angisuup nungutitaanerata kingorna sivikitsumik atasussanut — qimaasut assigissanngilagut. (sarĸúmersitat 6:15; 18:9-11) Aap, immaqa ullut artornarsinnaassapput — soorlu ukiumi 66-imi u.n.k. arnanut naartusunut allanullu nillertumi siallersumilu Jerusalemimit qimaasariaqartunut ajornakusoorsimasoq. Qularutiginngilluinnarsinnaavarput Guutip aniguinissarput ajornartissanngikkaa. Taamaattumik maannakkut Jehovamik Erneranillu, Guutip naalagaaffiani kunngitut naalakkersuisumik, tatiginninnerput ineriartortinniartigu.

²⁴ Siunissaq ersissutigisariaqanngilarput. Jesusip taamanikkut ajoqersukkani ersitinnianngilai, aamma uagut maannakkut siunissamiluunniit ersinissarput kissaatiginngilaa. Mianersoqqusivoq uummatikkut isumakkullu piareersarsinnaaqqulluta. Eqqunngitsumimmi upperisarsiorneq pissutsillu aaqqissuussaanerat ajortoq manna nungutitaappat kristumiut naalattut pillarneqartussaanngillat. Akerlianik eqqumassapput ’maajunnartoq inimi illernartumi ittoq’ pillugu mianersoqqussut maleruassallugu. Aalajaatsumik uppissuseqarnerisa aalajangeriataarsinnaasumik iliuuseqartissavaat. Puiunngisaannartigu Jesusip ima neriorsuinera: ’Naggatissamut aalajangersoq annakkumaarpoq.’ — Mákorse 13:13. (wE 1/5 99)

[Quppernerup ataani ilanngussat]

Eqqaamavigit?

□ Ukiuni hundredelinni siullerni ’maajunnartoq nungutitsisoq’ sunaasimava?

□ Sooq tunngavissaqarluassava isumaqassalluni ullutsinni ’maajunnartoq’ aatsaat siunissami inimut illernartumut pissasoq?

□ ’Maajunnartumit’ saassussinissaq suna sarĸúmersitat-ni siulittuutigineqarpa?

□ ’Qimaasariaqarsinnaasugut’ qanoq paasisariaqarpa?

[Qupp. 16-mi assiliartaq]

Babylon Angisooq ’uersartut arnaat’-nik taaneqarpoq

[Qupp. 17-mi assiliartaq]

Nersut aappalujattoq sarĸúmersitat kapitali 17-imi eqqaaneqartoq tassaavoq ’maajunnartoq’ Jesusip eqqaasaa

[Qupp. 18-mi assiliartaq]

Nersutip upperisarsiorneq nungutitsilluinnartumik saassutissavaa

Eqqumagit eqiasuillutillu!

’Taamaattumik eqqumagitsi, ullorluunniit ullup qanoq ilinissaaluunniit nalugassiuk.’ — MATÎUSE 25:13.

1. Apustili Johannesip suna qilanaaraa?

BIIBILIMI allassimasuni oqaloqatigiinnermi kingullermi Jesus ima neriorsuivoq: ’Aap, [erniinnaq] aggerumaarpunga.’ Tamatumunnga apustili Johannes akivoq: ’Aammen, aggerna, Naalagaq Jesusi-aa.’ Apustilip qularinngilaa Jesus aggerumaartoq; Johannes ilaavoq apustilit Jesus ima aperimmassuk: „Qaqugu tamakku taamaalissappat, sunalu najuunnissannut [griikerisooq: parousiʹa] pissutsillu aaqqissuussaanerata naggatissaannut, nalunaaqutaassava?“ Taamaattumik Johannes tatiginnilluni Jesusip najuunnissaa qilanaarisimavaa. — sarĸúmersitat 22:20; Matîuse 24:3, NV.

2. Jesusip najuunnera eqqarsaatigalugu oqaluffeqarfinnut ilaasortat qanoq isumaqarpat?

² Tatiginninneq taama ittoq ullumikkut qaqutigoortuuvoq. Oqaluffeqarfiit amerlasuut Jesusip ’tikiuffissaa’ pillugu ajoqersuuteqaraluarput, ilaasortaasali ikittuinnaat ilumut tikiuteqqinnissaa ilimagaat, taamaanneralu inooriaasiisigut takuneqarsinnaavoq. Atuakkami The Parousia in the New Testament-imi (Testamentitaaq naapertorlugu Parousia) allassimavoq: „Parousia-mik neriuut ilagiit inuuneranni, eqqarsaataanni sulinerannilu siunertaqartumik sunniuteqarpallaanngilaq. . . . Ilagiit inunnik isumataartitsiniarlutik iivangkiiliumillu oqaluussinerminni sulilluarunnaavissimapput suliunnaavissimanngikkunik.“ Tamarmilli taamaanngillat!

3. (a) Kristumiut ilumoortut parousiʹa qanoq isumaqarfigaat? (b) Maannakkut ingammik suut misissussavavut?

³ Jesusip ajoqersugaasa ilumoortut ullumikkut pissutsit aaqqissuussaanerata ajortup naggatissaa erinigalugu utaqqivaat. Ilumoorfiginnilluta ilimasunnerput aalajangiusimatillugu Jesusip najuunneranut tunngasut tamaasa eqqortumik isigisariaqarpavut tamakkulu naapertorlugit inooriaaseqarluta. Taamaalilluta ’naggatissamut aalajangersinnaavugut annassinnaallutalu’. (Matîuse 24:13) Siulittuut Matîuse kapitali 24-mi 25-milu allassimasoq oqaatigigamiuk Jesus aamma pitsaasunik siunnersuivoq maleruarutsigik iluaqutigisassatsinnik. Kapitali 25-mi assersuusiat qularnanngitsumik tusarsimasatit, ilaatigut niviarsianik qulinik (niviarsianik sianisuunik sianiitsunillu) talantinillu assersuusiat, oqaluttuarineqarput. (Matîuse 25:1-30) Assersuusiat taakku qanoq ilinniarfigisinnaavavut?

Niviarsiat sianisuut assigalugit eqqumagitsi!

4. Niviarsianik assersuusiami suna pingaarnerpaava?

⁴ Immaqa niviarsianik assersuusiaq Matîuse 25:1-13-imi allassimasoq atuaqqikkusussavat. Assersuusiami juutit ileqquat malillugu katittorsiornersuaq oqaluttuarineqarpoq. Uissaq nuliassap angerlarsimaffianukartarpoq illuminukaanniarlugu ataatamiluunniit illuanukaanniarlugu. Ingerlaaqatigiit nipilersortartunik erinarsortartunillu ilaqarsinnaapput, ingerlaaqatigiillu qaqugorpiaq tikiutissanersut ilisimaneqarneq ajorpoq. Assersuusiami niviarsiat qulit unnuarsuarmut uissap tikiunnissaa utaqqivaat. Taakkua ilaat tallimat sianiilliorlutik qullitik naammattumik uuliassaqartinngilaat, taamaattumillu pisiniartariaqalerlutik. Sinneri tallimat silatusaarlutik puiaasami uuliassamaateqarput, taamaalillutik utaqqinerminni pisariaqassappat qullitik uulialeqqissinnaallugit. Taakku tallimat kisimik uissaq takkummat piareersimapput. Taamaattumik taakku kisimik katittorsiortunut isernissaminnut akuerineqarput. Niviarsiat tallimat sianiilliorsimasut uteramik isernissaminnut inortuereersimapput.

5. Allassimaffiit suut ikiortigalugit niviarsianik assersuusiap assersuutaasumik isumaqarnera paasisinnaavarput?

⁵ Assersuusiami tamatumani annikitsualuit arlallit assersuutitut paasineqartussaapput. Assersuutigalugu Biibilimi Jesus uissamut assersuunneqarpoq. (Juánase 3:28-30) Jesus kunngip erneranut katinnissaanut piareersaassunneqarsimasumut imminut assersuuppoq. (Matîuse 22:1-14) Aamma Biibilimi Kristus uimut assersuunneqarpoq. (Evfisumiut 5:23) Soqutiginarpoq allassimaffinni allani kristumiut tanitat Kristusip ’nuliassaatut’ allaatigineqartut niviarsianik assersuusiami nuliassaq eqqaaneqanngimmat. (Juánase 3:29; sarĸúmersitat 19:7; 21:2, 9) Niviarsialli qulit eqqaaneqarput, allassimaffinnilu allani tanitat niviarsiamut Kristusip nuliassaanut assersuunneqarlutik. — 2 Korintumiut 11:2.a

6. Niviarsianik assersuusiaq naggaserlugu Jesus qanoq kajumissaariva?

⁶ Annikitsualuit tamakkua assersuusiallu siulittuutitut isumaqarnerata saniatigut assersuusiaq aamma najoqqutassianik pitsaasunik ilinniutigisatsinnik imaqarpoq. Assersuutigalugu maluginiagassaavoq Jesus ima oqarluni assersuusiaq naggassermagu: ’Taamaattumik eqqumagitsi, ullorluunniit ullup qanoq ilinissaaluunniit nalugassiuk.’ Assersuusiap erseqqissarpaa tamatta eqqumasariaqartugut pissutsillu aaqqissuussaanerata ajortup naggatissaa qanillisoq arajutsinaveersaarlugu. Naggatissaq takkukkumaartoq qularutigineqarsinnaanngilaq, naak qaqugorpiaq takkukkumaartoq oqaatigisinnaanngikkaluaripput. Tamatumunnga tunngatillugu assersuusiami niviarsiat eqimattat marluk assigiinngitsunik isumaqarneri malugikkit.

7. Qanoq takuneqarsinnaava assersuusiami niviarsiat ilaat tallimat sianiilliortut?

⁷ Jesus oqarpoq: ’Taakkua ilaat . . . tallimat sianiitsuupput.’ Ima paasisariaqarpa uissap tikiunnissaa upperinngikkaat? Nuannaarniutit ulapputigaat? Salloqittarneqarsimappat? Naamik. Jesus oqarpoq ’uissaq paariartorlugu annivigigaat’. Nalunngilaat tikiutissasoq tikiuppallu tassaniikkusupput katittorsioqataajumallutik. Piareersarluarsimappalli? ’Unnuap qiterarnera’ tikillugu utaqqivaat, piffissakkulli qanoq ilisukkulluunniit — ilimagisartik sioqqullugu kingoqqulluguluunniit — tikilluaqqunissaanut piareersimanngillat.

8. Qanoq takuneqarsinnaava assersuusiami niviarsiat tallimat silatusaartuusut?

⁸ Ilaat tallimat — Jesusip sianisuunik taasai — aamma qullitik ikumatillugit anipput uissap tikiunnissaa ilimagalugu. Taakkuttaaq utaqqisariaqarput, ’sianisuujuppulli’. Griikerit oqaasiat ’sianisuumik’ nutserneqartoq isumaqarsinnaavoq „siumut sillimareersoq, silassorissoq, atoriaannaasumik ilisimassusilik“. Taakku tallimat uuliassamaateqarnermikkut, pisariaqassappat qullitik uulialeqqissinnaallugit, silatusaarnertik takutippaat. Aap, uissap tikiunnissaanut ima piareersimatigerusupput uuliaatiminnik tuniserusunnatik. Eqqumanerat naleqqulluartuusoq ersarippoq uissaq takkummat najuummata piareersimalluinnarlutillu. ’Piareersimasut katittorsiortussanut ilagalugu iserput; matulu parnaarpaat.’

9, 10. Niviarsianik assersuusiami suna ilinniassavarput, immitsinnullu qanoq aperisinnaavugut?

⁹ Jesus katittorsiortitsisarnermik ilinniartitsinianngilaq, allanulluunniit aveqatigiinneq pillugu siunnersuinani. Unali pivaa: ’Taamaattumik eqqumagitsi, ullorluunniit ullup qanoq ilinissaaluunniit nalugassiuk.’ Taamaattumik imminut aperigit: ’Jesusip najuunnera ilumut eqqumaffigaara?’ Upperaarput Jesus maanna qilammi naalakkersuisoq, kisianni qanittukkut ’Inuup Ernerata qilaap nuiaasigut pissarsuulluni naalannartorsuullunilu aggernissaa’ qanoq annertutigisumik soqutigaarput? (Matîuse 24:30) ’Unnuaq qiterarmat’ soorunami uissap aggernissaa qanillineruvoq niviarsiat naapikkiartorlugu aninerannit. Taamatulli ippoq Inuup Ernerata ullumikkut pissutsit aaqqissuussaanerat ajortoq nungutinniarlugu tikiunnissaa qaninneroqaaq tikiunnissaanik ilimasulernitsinnit. (Rûmamiut 13:11-14) Eqqumajuarpugut, piffissarlu qanilliartortillugu suli annerusumik eqqumarusuppugut?

¹⁰ Peqqussut ’eqqumagitsi’ maleruassagutsigu eqiingajuartariaqarpugut. Niviarsiat tallimat uuliaataarukkamik pisiniarput. Ullumikkut kristumiu aamma allamut saatinneqarsinnaavoq Jesusillu qanittukkut tikiunnissaanut piareersimalluarnani. Ukiuni hundredelinni siullerni kristumiut ilaat taamaassimapput. Ullumikkuttaaq ilaat taamaassinnaapput. Taamaattumik immitsinnut aperisariaqarpugut: ’Uanga taamaalisuulerpunga?’ — 1 Tásalûníkamiut 5:6-8; Eprîarit 2:1; 3:12; 12:3; sarĸúmersitat 16:15.

Naggatissaq qanilliartortillugu eqiasuigit

11. Nangilluni sumik Jesus assersuusiorpa, tamannalu assersuusiamut allamut sumut eqqaanarpa?

¹¹ Assersuusiami tulliattumi Jesusip malinnitsimi eqqumanissaat kajumissaarutigiinnanngilaa. Niviarsiat sianisuut sianiitsullu pillugit assersuusioreerami talantinik assersuusiorpoq. (Atuaruk Matîuse 25:14-30.) Assersuutip tamatuma miininik assersuusiaq arlalitsigut assigaa, Jesusip oqaatigereernerasut inuppassuit ’isumaqarmata Guutip naalagaaffia [erniinnaq] ersersitaassasoq’. — Lúkarse 19:11-27.

12. Talantinik assersuusiap suna pingaarnersaraa?

¹² Talantinik assersuusiami Jesusip oqaluttuaraa angut nunamut allamut aallartinnani kiffaminik pingasunik aggeqqusisoq. Ataaseq talantinik tallimanik tunivaa, alla marlunnik kingullerlu ataasiinnarmik — ’nungullugit piginnaassusiat naapertorlugu’. Qularnanngitsumik talantit siilviusut pineqarput, taamanikkut sulisup ukiuni 14-ini akisarsiaata nalingi — tassa aningaasarpassuit! Angut ’kingunersuagut’ uterami kiffani paarisaannik naatsorsueqatigilerpai. Kiffat siulliit marluk tamarmik paarisatik marloriaatinngortissimavaat. Nersualaarpai, akisussaaffimmillu annerusumik neriorsorlugit naggataatigullu oqarfigai: ’Naalakkassi tipaatsuffianut iseritsi.’ Kiffarli talantimik ataasiinnarmik tunineqartoq oqarpoq naalagaq sukannerpallaartumik peqqusisimasoq, paarisanilu niuernermut atorsimanagu. Aningaasaq toqquinnarsimavaa aningaaserivimmulluunniit erniaqartinniarlugu ilisimanagu. Naalakkap ’ajortumik eqiasuttumillu’ taavaa naalakkami soqutigisaata akerlianik iliorsimammat. Taamaattumik talantimik arsaarneqarpoq anisinneqarlunilu, ’tassani qiallunilu qorsaqqortassammat’.

13. Jesusip assersuusiamilu naalagaasup akornanni sukkut assigiissuteqarpat?

¹³ Assersuusiami tamatumani annikitsualuit aamma assersuutitut paasineqarsinnaapput. Assersuutigalugu angut nunamut allamut aallartoq Jesusimut assersuutaavoq, ajoqersukkani qimallugit qilaliarsimasoq tassanilu sivisuumik utaqqilluni kunngitut pissaaneqalernissami tungaanut.b (Tussiaat 110:1-4; apustilit suliait 2:34-36; Rûmamiut 8:34; Eprîarit 10:12, 13) Aammali assersuusiami ajoqersuut isumaqarnerusoq tamatta inuunitsinni malittariaqagarput pineqarsinnaavoq. Ajoqersuut suna?

14. Talantinik assersuusiap pingaaruteqarluinnartoq suna erseqqissarpaa?

¹⁴ Jesusip assersuusiaata ersarissumik takutippaa qilammi toqujuitsumik inuunissamik nunarsuarmiluunniit paratiisiusumi naassaanngitsumik inuunissamik neriuuteqaraluarutta, nukivut kristumiutut suliassamut atortariaqarivut. Aap, assersuusiap oqariartuutaa oqaatsimik ataasiinnarmik oqaatigineqarsinnaavoq: eqiasuinneq. Apustilit ukiumit 33-mit u.n.k. piinsip ulluanit tamatumani maligassaalluarput. Ima allassimavoq: ’Allanillu oqaatsinik amerlanernik [Peterip] nalunaajaaffigai kajumissaarlugillu oqarluni: „Eqqarleriinnit ukunannga killormoortunit annatsinniaritsi.“’ (apustilit suliait 2:40-42) Ilungersuussineralu ilumut kinguneqarluarpoq! Allat kristumiutut suliassamut eqiasuillutik apustilit suleqatigilerpaat, nutaarsiassarlu nuannersoq ’silarsuarmi tamarmi kingunissiorpoq’. — Kulorsamiut 1:3-6, 23; 1 Korintumiut 3:5-9.

15. Talantinik assersuusiami ilinniutissaq pingaarnerusoq qanoq immikkut ittumik maleruarsinnaavarput?

¹⁵ Eqqaamajuk assersuusiaq tamanna Jesusip najuunnissaa pillugu siulittuummut atatillugu saqqummiunneqarmat. Jesusip najuunnerata [parousiʹa-ta] aallartereersimaneranut qanittukkullu najuunnerata sakkortunerpaaffissani nallerumaaraa naammattunik uppernarsaatissaqarpoq. Eqqaamajuttaaq Jesusip ’naggatissaq’ kristumiullu suliarisariaqagaat imminnut atassuteqartimmagit: ’Naalagaaffimmik iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ (Matîuse 24:14) Tamanna eqqarsaatigigutsigu kiffat ilaat kina assigaarput? Imminut ima aperigit: ’Isumaqartoqarsinnaava uanga namminerisamik sammisassakka suliariitigalugit kiffaq paarisaminik toqquisoq assigigiga? Imaluunniit ersarippa kiffatut ajunngitsutut ilumoortutullu ittunga? Naalakkap soqutigisai amerlisinniarlugit tamatigut noqqaassutigisarpara?’

Jesusip najuunnerani eqqumaneq eqiasuinnerlu

16. Assersuusiat marluk sammisatta suna tusarliussaraat?

¹⁶ Assersuusiat taakkua marluk assersuutitigut siulittuutitigullu isumaqarnerata saniatigut aamma qiimmassaatinik Jesusip nammineq oqaatigisimasaanik ersarissunik imaqarput. Ima kajumissaarivoq: Eqqumajuaritsi; eqqiasuigitsi, ingammik Kristusip parousiʹa-anik nalunaaqut takulerussiuk. Maannakkut takuarput. Taamaattumik apeqqutaavoq ilumut eqqumanersugut eqiasuinnersugullu.

17, 18. Jesusip najuunnera eqqarsaatigalugu ajoqersugaq Jakob qanoq siunnersuiva?

¹⁷ Jesusip qatanngutissaa Jakob Jesus Uuliap Qaqqaani siulittuisoq tusaanngilaa; kingornatigulli tusarsimavaa pingaaruteqarneralu paasillugu. Ima allassimavoq: ’Taamaattumik, qatanngutikka, erinitsannaveeritsi Naalakkap tikiuffissaa [najuunnissaa, NV] nalliutserlugu. Ata, naasorissaasup nunap inerititassai akissarsilluarnartut ilimagisarai; erinitsajuilluni piaartumillu kingoqqutsisumillu siallerfigitsiivai; ilississaaq erinitsannaveeritsi, uummatisi nakussatsissigik, Naalakkap tikiuffissaa [najuunnissaa, NV] qanillimmat.’ — Jâko 5:7, 8.

¹⁸ Pisuussutiminnik atornerluisut Guutip eqqartuukkumaarai erseqqissariarlugu Jakokip kristumiut kajumissaarpai Jehovap akuliunnissaanik utaqqinerminni erinitsaqqunagit. Kristumiup erinitsassimasup eqqunngitsuliornerit immaqa ima isumatsaatigisinnaatigai, isumaqalerluni nammineerluni aaqqiiniartariaqarluni. Tamaaliortariaqanngilarli eqqartuutiffissarmi nalliutinngitsoornavianngilaq, soorlu Jakobip naasorissaasumik assersuusiaata tamanna ersarissumik takutikkaa.

19. Israelitoqqami naasorissaasoq qanoq ililluni erinitsajuissinnaavaa?

¹⁹ Israelitoqqami naasorissaasoq siaruarterereeruni utaqqisariaqarpoq. Siullermik naaqqaatit takkunnissaat, kingusinnerusukkut naatitat inerinnissaat naggataatigullu katersuinissaq utaqqisariaqartarpai. (Lúkarse 8:5-8; Juánase 4:35) Qaammatini tamakkunani immaqa pissutissaqarluarluni ernumasinnaavoq. Piaartumik naammattumillu siallissava? Aasap naalernerani sialleqqissava? Naatitat sullinernit silapilummilluunniit aserorneqassappat? (Naleqqiukkit Joel 1:4; 2:23-25.) Pissutsilli qanorluunniit ikkaluarpata Israelimi naasorissaasup Jehova pinngortitarsuarmilu ingerlaarnerit taassuma pilersitai tatigisinnaavai. (5 Moses 11:14; Jeremia 5:24) Naasorissaasup erinitsajuinnerata assigiinnarpaa isumalluarluni ilimasunnera. Qularutiginngilluinnarpaa ilimagisani takkukkumaartoq. Aap, taamaaliumaarpoq!

20. Jakobip siunnersuutaa malillugu qanoq ililluta erinitsajuissinnaavugut?

²⁰ Naasorissaasup immaqa qaqugorpiaq katersuissanerluni nalunngilaa. Ukiunili hundredelinni siullerni kristumiut naatsorsorsinnaasimanngilaat Jesus qaqugu najuutissanersoq. Nalliukkumaarporli. Jakob allassimavoq: ’Naalakkap tikiuffissaa [griikerisoorlugu: parousiʹa] qanillivoq.’ Piffissami Jakobip taama allannerata nalaani Kristusip najuunneranut nunarsuaq tamakkerlugu nalunaaqutaasussap eqquunnera suli takuneqarsinnaanngilaq. Maannakkulli takuarput! Taamaattumik nalerput qanoq isigisariaqarparput? Nalunaaqut ersarippoq. Takuarput. Qulanngivilluta oqarsinnaavugut: ’Nalunaaqut eqquuttoq takuara.’ Taamaattumik isumalluarluta ima oqarsinnaavugut: ’Naalakkap najuunnera piviusuuvoq, sakkortunerpaaffissaa qanillivoq.’

21. Qanoq iliornissamut aalajangerluinnarsimavugut?

²¹ Pissutsit taamaammata pissutissaqarluarpugut Jesusip assersuusiaasa marluk sammisatta maluginissaannut ilinniarfiginissaannullu. Ima oqarpoq: ’Taamaattumik eqqumagitsi, ullorluunniit ullup qanoq ilinissaaluunniit nalugassiuk.’ (Matîuse 25:13) Maannakkut kristumiutut kiffartornitsinni ilungersuussilluinnarnissamut piffissanngorpoq. Jesusip oqaasiinik paasinnissimanitsinnik ersersitsisumik ullut tamaasa inuusa. Eqqumaniarta! Eqiasuinniarta! (wE 1/5 99)

[Quppernerup ataani ilanngussat]

Eqqaamavigit?

□ Niviarsianik sianiitsunik sianisuunillu assersuusiaq pingaarnertut sumik ilinniarfigisinnaavarput?

□ Talantinik assersuusiorluni Jesusip sumik pingaartumik siunnersorpaatigut?

□ Kristusip parousiʹa-a eqqarsaatigalugu erinitsajuinneq Israelitoqqamilu naasorissaasut erinitsajuittariaqarnerat qanoq ilillutik assigiippat?

□ Sooq ullut inuuffigisavut immikkut pissanganarlutillu unamminiarnartuuppat?

[Qupp. 23-mi assiliartaq]

Niviarsianik talantinillu assersuusiat qanoq ilinniutigaagit?