Eqqartuussisup issiaviata saani qanoq inissisimassavit?

’Inuup Ernera tikiukkuni naalannassutsi atisimallugu inngilillu tamaasa ilagalugit, taava issiassavoq issiavissaarsuarmini naalannassutsimi piani.’ — MATÎUSE 25:31.

1-3. Naapertuilluassuseq eqqarsaatigalugu isumalluarnissatsinnut sumik pissutissaqarpugut?

’PISUUTITAASSANERPA IMALUUNNIIT PINNGITSUUTITAASSANERPA?’ Eqqartuussineq tusaraangamikku inuit ilaat taama eqqarsartarput. Eqqartuussisut inuinnaallu eqqartuussisussanngortitat immaqa eqqortumik aalajangiinissartik ilungersuutigisarpaat, tamatigulli naapertuilluartumik iliortoqartarpa? Eqqartuussinermi naapertuilluanngitsumik aalajangiisoqarsimaneranik pinngitsuusumillu pisuutitaasumik tusarnikuuit? Naapertuilluanngitsuliornerit taama ittut nutaajunngillat, soorlu Jesusip assersuusiaani Lúkarse 18:1-8-imi atuarsinnaasatsinni takusinnaagipput.

² Inuit naapertuilluassusiannut atatillugu qanorluunniit misigisaqarsimagaluaruit Jesusip oqaasii uku malugeriakkit: ’Guutip qinikkani ullukkullu unnuakkullu torlorfigisini innarlernaveersissannginnerpai [eqqortumik pineqartissannginnerpai] . . .? Oqarfigaassi: innarlernaveersinnasuassavai [eqqortumik pitinnasuassavai], kisiannili Inuup Ernera tikiukkuni uppernermik nunami nassaarumaarnerpa?’

³ Aap, Jehovap kiffami naapertuilluartumik pineqarnissaat naggataatigut isumagiumaarpaa. Aamma Jesus tamatumani pingaaruteqassaaq, ingammik ullumikkut aaqqissuussaanerup ajortup ’ulluini kingullerni’ inuunitsinni. Jehovap Ernini pissaasoq nunarsuarmi ajussutsimik qanittukkut piiaasissavaa. (2 Timûtiuse 3:1; 2 Tásalûníkamiut 1:7, 8; sarĸúmersitat 19:11-16) Jesusip assersuusiaasa kingulliit ilaat, savanik savaasanillu assersuusiaq, ikiortigalugu taassuma atorfia paasisaqarfiginerusinnaavarput.

4. Savanik savaasanillu assersuusiaq qanga eqquutilersimasorigaluarparput, soorli assersuusiaq tamanna maanna samminerulaassavarput? (Ussatit 4:18)

⁴ Sivisuumik isumaqarsimagaluarpugut assersuusiami tassani pineqartoq qanoq ililluni Jesus 1914-imi kunngitut issiavissaarsuarminut ingissimasoq taamanimiillu eqqartuussilersimasoq — inunnut savanut pissusilinnut inuuneq naassaanngitsoq savaasatullu pissusilinnut naassaanngitsussamut suujunnaarsitaaneq eqqartuussutissaralugit. Misissoqqinneratigulli qaqugu eqquunnissaa sumullu assersuutaanera nutaamik paasisaqarfigineqarpoq. Paasisaqarnerup tamatuma oqaluussinermik suliatta inuillu qisuariarnerisa pingaaruteqassusiat erseqqissarpaa. Assersuusiamut tamatumunnga itinerusumik paasisaqarnermut suna tunngaviunersoq paasiniarlugu Jehovap Jesusillu kunngitut eqqartuussisutullu qanoq ittuunerat pillugu Biibilimi suna ersersinneqarnersoq misissoriartigu.

Jehova, eqqartuussisoq qutsinnerussaartoq

5, 6. Sooq Jehova Kunngitut Eqqartuussisutullu isigissallugu naleqquttuua?

⁵ Jehova, qilammi nunarsuarmilu kisimi Naalagaq, tamanit pissaaneqarnerpaavoq. Aallartiffeqaranilu naaffeqarani ’naassaanngitsumik kunngiuvoq’. (1 Timûtiuse 1:17; Tussiaat 90:2, 4; sarĸúmersitat 15:3) Inatsisiliornissamut tamakkulu atortinnissaannut oqartussaassuseqarpoq. Oqartussaassusialu Eqqartuussisuuneranik ilaqarpoq. Jesaja 33:22-mi ima allassimavoq: „[Jehovami] eqqartuussisigaarput, [Jehova] naalakkersortigaarput, [Jehova] kunngigaarput, taassuma annatsikkumavaatigut.“

⁶ Guuti kiffaasa eqqartuussissutinik akerleriissutinillu eqqartuussisussatut akueriuarsimavaat. Assersuutigalugu, ’nunarsuarmik tamarmik eqqartuussisup’ Sodomamiut Gomorramiullu ajussusiannut takussutissat ’oqimaalutareerlugit’ suujunnaarsitaasussatut eqqartuussimavai eqqartuussutinilu naapertuilluartoq tamanna naammassillugu. (1 Moses 18:20-33; Job 34:10-12) Toqqissisimanaqaaq nalunagu Jehova tassaasoq eqqartuussisoq naapertuilluartoq eqqartuussutiminik eqqortitsiuaannartoq!

7. Jehova Israelikkunnut eqqartuussisutut qanoq iliortarsimava?

⁷ Israelitoqqami Jehova ilaannikkut toqqaannartumik eqqartuussisarsimavoq. Taamanikkut toqqissisimanarsimassaqaaq nalunagu naammalluinnartumik Eqqartuussisoqartoq. (3 Moses 24:10-16; 4 Moses 15:32-36; 27:1-11) Guuti aamma ’inatsisinik’ maleruagassaqartitsisimavoq eqqartuussinermi najoqqutassatut pitsaalluinnartunik. (3 Moses 25:18, 19; Nehemja 9:13; Tussiaat 19:9, 10; 119:7, 75, 164; 147:19, 20) Jehova tassaavoq nunarsuarmik tamarmik eqqartuussisoq, taamaattumik tamavitta kalluarneqarpugut. — Eprîarit 12:23.

8. Maanna eqqartukkatsinnut atatillugu soqutiginartumik Daniel takorruuisitaanermini sunik takusaqarsimava?

⁸ Takunnissimasup oqaluttuaa tamatumunnga uppernarsaatissaavoq. Pruffiitip Danielip takorruuisitaalluni takusimavai uumasut qaasuttut silarsuarmi naalagaaffinnut assersuutaasut. (Daniel 7:1-8, 17) Taava ima takusaqarsimavoq: „Issiavissaarsuit inissititerneqarput, innalu Ittuinnartoq arlaannut ingippoq. Atisai aputitut qaqortigaat.“ (Daniel 7:9) Malugiuk Danielip takugai issiavissaarsuit ’Ittuinnartorlu [Jehova] arlaannut ingittoq’. Tassa imaappa tassani Danielip Guuti kunnginngortoq takugaa?

9. Issiavissaarsuarmut ’inginneq’ qanoq isumaqarsinnaava. Assersuusiorit.

⁹ Takuat, issiavissaarsuarmut ’ingittumik’ atuaraangatta kunnginngortoq eqqaasinnaasarparput, Biibilimimi ilaannikkut taamatut atorneqartarmat. Assersuutigalugu allassimavoq: „[Simrip] kunnginngoreerami issiavissaarsuarmilu issialereerluni . . .“ (1 Kunngit 16:11; 2 Kunngit 10:30; 15:12; Jeremia 33:17) Messiasilu ima siulittuutigineqarsimavoq: „Naalagaassuseq pigilerumaarpaa naalakkersuisutullu issiassalluni issiavissaarsuarmini.“ Taamaattumik „inginneq“ imaluunniit „issianeq“ isumaqarsinnaavoq kunngitut naalakkersuilerneq. (Sakarja 6:12, 13) Jehova kunngitut issiavissaarsuarmi issiasutut eqqaaneqarsimavoq. (1 Kunngit 22:19; Jesaja 6:1; sarĸúmersitat 4:1-3) Tassaavoq ’naassaanngitsumik kunngi’. Kisimili oqartussaassutsimi immikkoortuanik nutaamik atuutititsilermat oqartoqarsinnaavoq kunnginngortoq, issiavissaarsuarmut ingeqqittutut nipeqartillugu. — 1 Israelikkut 16:1, 31; Jesaja 52:7; sarĸúmersitat 11:15-17; 15:3; 19:1, 2, 6.

10. Israelikkunni kunngit suliassaannut pingaarnerpaanut suna ilaasimava? Assersuusiorit.

¹⁰ Maanna pingaarnersaq tikipparput: Itsaq Israelimi kunngit suliassaasa pingaarnerit ilaat tassaavoq eqqartuussissutinik suliarinninneq eqqartuussummillu nalunaarutiginninneq. (Ussatit 20:8; 29:14) Arnat marluk meeqqamik ataatsimik pinnaassutiginnimmata Salomonip silatuumik eqqartuussinera eqqaamavarput. (1 Kunngit 3:16-28; 2 Israelikkut 9:8) Taassuma illussaarsuinut ilaasimavoq ’inersuaq issiavissaarsualik eqqartuussisarfia’, aamma ’eqqartuussivimmik’ taaneqartartoq. (1 Kunngit 7:7) Jerusalemimiissimapput „eqqartuussisut issiavii“. (Tussiaat 122:5) Tassa ’issiavissaarsuarmut inginneq’ aamma isumaqarsinnaavoq oqartussaassutsimik eqqartuussisutut atuineq. — 2 Moses 18:13; Ussatit 20:8.

11, 12. (a) Jehovap Danielimik allakkat, kapitali 7-imi, eqqaaneqartutut issiavissaarsuarmut inginnera qanoq isumaqarpa? (b) Allassimaffiit allat qanoq ilillutik takutippaat Jehova eqqartuussissalluni issiavissaarsuarmut ingittoq?

¹¹ ’Ittuinnartumik ingittumik’ Danielip takunninnera uterfigeqqeriartigu. Daniel 7:10-mi allassimavoq: „Taava eqqartuussineq aallartippoq atuagarsuillu mapperneqarlutik.“ Aap, Ittuinnartoq ingippoq silarsuarmut naalagaassuseq pillugu eqqartuussiniarluni inuullu Ernerata naalakkersuinissamut qinngaqqunnannginnera nalunaarutiginiarlugu. (Daniel 7:13, 14) Ima allassimavoq: „Taavali Ittuinnartoq tikiuppoq eqqartuussiartorluni illernartitani illersorlugit.“ ’Illernartitai’ tassa taakku Ernermik naalakkersueqateqarnissamut qinngaqqunnanngitsutut nalunaarutigineqartut. (Daniel 7:22) Taava „eqqartuussineq aallartissaaq“ silarsuarmilu pissaanilik kingulleq iluarisaanngitsutut eqqartuunneqassaaq. — Daniel 7:26.a

¹² Tassa Guutimik ’issiavissaarsuarmi issiasumik’ Danielip takunninnera isumaqarpoq Guuti eqqartuussiartorluni tikiuttoq. Siusinnerusukkut David ima erinarsorsimavoq: ’Eqqartuussininni [Jehova] pinngitsuutipparma, issiavissaarsuannut ingikkavit, illit eqqartuussisoq naapertuilluartoq.’ (Tussiaat 9:5, 8) Aamma Joel ima allassimavoq: „Inuiaat aallassapput Josafatip qooruanukarlutik, inuiaat avatangiisigisasi [uanga Jehova] tassani eqqartuunniarakkit.“ (Joel 4:12; naleqqiuguk Jesaja 16:5.) Jesus Paulusilu tamarmik eqqartuussisunut, inunnut eqqartuussissutissanik imminnut tunngasunik suliarinninniarlutik eqqartuussummillu naammassinninniarlutik eqqartuussisup issiavianut ingissimasunut, sassartinneqarsimapput.b — Juánase 19:12-16; apustilit suliait 23:3; 25:6.

Jesusip atorfia

13, 14. (a) Jesusip kunnginngornissaanut Guutip innuttai sunik qularunnaarutissaqarsimappat? (b) Jesus qanga issiavissaarsuarminut ingippa, ukiorlu 33 u.n.k. aallarnerfigalugu qanoq ittumik naalagaassuseqalerpa?

¹³ Jehova Kunngiullunilu Eqqartuussisuuvoq. Jesusimi? Inngili taassuma inunngorneranik nalunaarutiginnittoq ima oqarsimavoq: ’Guutip Jehovap tuniumaarpa siuaasaata Davidip issiavissaarsuanik; . . . naalagaaffialu soraarfeqassanngilaq.’ (Lúkarse 1:32, 33) Jesus Davidikkut kunngiussusiannik ataavartumik kingornussisussaasimavoq. (2 Samuel 7:12-16) Qilamminngaanniit naalakkersuissaaq, Davidimi ima oqarsimavoq: „Jehova Naalakkannut [Jesusimut] ima oqarpoq: ’Talerpimma tungaanut ingikkallaat akeqqatit isikkannut tummagassanngortitserlugit.’ Ajaappiaq pissaassutit Jehovap Zionimit isaakkumaarpaa, oqarluni: ’Akeqqavit akornanni naalakkersuigit.’“ — Tussiaat 110:1-4, NV.

¹⁴ Tamanna qaqugu pisussaasimagami? Jesus inuttut inuugallarami kunngitut naalakkersuinngilaq. (Juánase 18:33-37) Ukiumi 33-mi u.n.k. toquvoq, toqusunit makititaalluni qilaliartitaallunilu. Eprîarit 10:12-imi allassimavoq: ’Taassuma ajortit pillugit pilliut ataaseq pilliutigigamiuk, Guutip talerpiata tungaani issiattuinnalerpoq.’ Jesus qanoq ittumik oqartussassuseqarsimava? ’[Guutip] talerpimmi tungaanut qilammi ingitippaa annerussaartunngortillugu siulersuisunit naalakkersuisunillu pissaasunillu tamanit . . . tamanillu annerutillugu ilagiinnut niaqoritippaa.’ (Evfisumiut 1:20-22) Jesusip taamanimiilli kristumiunut kunngitut oqartussaassuseqalernera pissutigalugu Paulus allassinnaasimavoq Jehovap ’taartup pissaaneqarfianit aniguisikkaatik Ernermilu asasami naalagaaffianut nuutsillutik’. — Kulorsamiut 1:13; 3:1.

15, 16. (a) Sooq oqarsinnaavugut Jesus ukiumi 33-mi u.n.k. Guutip naalagaaffiani kunnginngorsimanngitsoq? (b) Qanga Jesus Guutip naalagaaffiani naalakkersuilerpa?

¹⁵ Kisianni taamanikkut Jesus inuiannut Kunngitut Eqqartuussisutullu atuutilinngilaq. Guutip sanianut ingippoq, Guutip naalagaaffiani kunnginngornissani utaqqillugu. Taanna pillugu Paulus ima allassimavoq: ’Kimut inngilimut qanga ima oqarnerpa: „Talerpimma tungaanut ingikkallaat, qinngarsortitit isikkannut tummagassanngortitserlugit“?’ — Eprîarit 1:13.

¹⁶ Jesusip utaqqinerata 1914-imi naammassineranut qilammilu takussaanani Guutip naalagaaffiani kunnginngorneranut uppernarsaatissarpassuit Jehovap nalunaajaasuisa saqqummiussortarsimavaat. sarĸúmersitat 11:15, 18-imi allassimavoq: ’Silamiut naalagaaffiat Naalakkatta tanitaatalu pigilerpaat, taannalu kunngiussavoq naassaanngilluinnartumik.’ ’Inuiaqatigiillu kamattunngorput, illillu kamannerit nalliuppoq.’ Aap, inuiaqatigiit sorsunnersuarmi siullermi imminnut kamaannertik ersersippaat. (Lúkarse 21:24) Sorsunnerit, nunap sajuttarneri, toqorarnerit, kaannersuit assigisaallu 1914-imiilli nunarsuarmi pisartut qularunnaarsitsipput Jesus Guutip naalagaaffiani kunngiulersimasoq, silarsuullu naggatissaa qanillisoq. — Matîuse 24:3-14.

17. Maannamut suna aalajangiupparput?

¹⁷ Eqqartoriikkavut naatsumik oqaatigalugit imaapput: Oqartoqarsinnaavoq Guuti kunngitut naalakkersuilluni issiavissaarsuarmini issiasoq; aammali oqartoqarsinnaavoq issiavissaarsuarminut ingittoq allamik siunertaqarluni: eqqartuussissalluni. Ukiumi 33-mi u.n.k. Jesus Guutip talerpiata tungaanut ingippoq, maannakkullu Guutip naalagaaffiani kunngiuvoq. Jesusili ullumikkut kunngitut naalakkersuisoq aamma eqqartuussisutut suliva? Aammalu sooq tamanna ingammik uagut ullumikkut inuusugut soqutigisariaqarparput?

18. Jesusip aamma eqartuussisuunissaanut sunik takussutissaqarpugut?

¹⁸ Jehovap, eqqartuussisussanik toqqaanissaminut pisussaasup, Jesus eqqartuussisutut najoqqutassaminik eqqortitsisutut toqqarsimavaa. Jesusip tamanna ersersissimavaa inuit anersaakkut uummartitaasut eqqartoramigit: ’Aammami Ataatap kinaluunniit eqqartuuttarinngilaa, kisianni Erneq tamanut eqqartuussisunngortippaa.’ (Juánase 5:22) Jesusilli eqqartuussisutut atorfia tassungaannaq killeqanngilaq, tassami inuusunik toqusunillu eqqartuussisussanngortitaasimavoq. (apustilit suliait 10:42; 2 Timûtiuse 4:1) Paulus ilaanni ima oqarsimavoq: ’Tassa [Guutip] ullormi aalajangersakkamini inuit najugaat naapertuilluarluni angut taamaaqqusani kiffaralugu eqqartuukkumaaramiuk, taannalu tamanut uppernarsarpaa toqusunit makitikkamiuk.’ — apustilit suliait 17:31; Tussiaat 72:2-7.

19. Sooq Jesus eqqartuussissalluni ingittussatut oqaatigissallugu eqqortuua?

¹⁹ Tamanna tunngavigalugu isummersinnaanerpugut Jesus issiavissaarsuarmut naalannassutsimi pianut ingissimasoq eqqartuussisutut? Aap. Jesus apustiliminut ima oqarsimavoq: ’Ilissi uannik malinnittusi, pinngoqqiffimmi inuup Ernera issiavissaarsuarmini naalannassutsimi piani issiappat ilississaaq issiassaasi issiavissaarsuarni aqqaneq-marlunni Israelip eqqarleriissortai aqqaneq-marluusut eqqartuullugit.’ (Matîuse 19:28) Jesus maannakkut Guutip naalagaaffiani kunngiulereerpoq, suliassaanulli Matîuse 19:28-mi taaneqartumut ilaassaaq ukiuni tuusintini eqqartuussissalluni issiavissaarsuarmini issianera. Piffissami tamatumani inuiaat tamaasa eqqartuutissavai, iluartut iluaatsullu. (apustilit suliait 24:15) Tamanna eqqarsaatigalugu Jesusip assersuusiaasa ilaat nalitsinnut inuunitsinnullu attuumassuteqartoq sammilaariartigu.

Assersuusiami suna oqaatigineqarpa?

20, 21. Jesus apustiliisa nalerput pillugu qanoq aperisimavaat, tamannalu apeqqummik sumik pilersitsiva?

²⁰ Jesus toqunissaa sioqqutitsiarlugu apustiliisa ima aperisimavaat: „Qaqugu tamakku pissappat, aamma najuinissannut pissutsillu aaqqissuussaanerata naggatissaanut suna nalunaaqutaassava?“ (Matîuse 24:3 NV) ’Naggatissap nalliutinnginnerani’ nunarsuarmi pisussat pingaaruteqartut Jesusip siulittuutigai. Naggatissarooq tamanna sioqqutitsiarlugu inuiaat ’isigiumaarpaat inuup Ernera qilaap nuiaasigut aggersoq pissarsuulluni naalannartorsuullunilu’. — Matîuse 24:14, 29, 30.

²¹ Taavami inuit inuiannit tamakkunaneersut inuup Ernera naalannartorsuulluni tikiuppat qanoq pissappat? Tamanna paasiniariartigu savanik savaasanillu assersuusiaq ikiortigalugu. Assersuusiaq tamanna ima aallartippoq: ’Inuup Ernera tikiukkuni naalannassutsi atisimallugu inngilillu tamaasa ilagalugit, taava issiassavoq issiavissaarsuarmini naalannassutsimi piani; inuiaqatigiillu tamarsuarmik saanut katersussapput.’ — Matîuse 25:31, 32.

22, 23. Suup takutippaa savanik savaasanillu assersuusiaq 1914 aallarnerfigalugu eqquutilersimanngitsoq?

²² Siornatigut paasisimasatsitut assersuusiami tassani pineqarpa 1914-imi Jesusip kunnginngornera? Matîuse 25:34-mi Jesus kunngitut eqqaaneqarpoq, taamaammat assersuusiaq tamanna taassuma 1914-imi kunnginngoreerneranut atuussimassaaq. Kikkulliuku tamatuma kinguninnguagut eqqartuukkai? ’Inuiannik tamanik’ eqartuussineq pineqanngilaq. ’Guutilli inoqutaanut’ ilaanerartut sammilerpai. (1 Pîtruse 4:17) Malaki 3:1-3 naapertorlugu Jesusip Jehovap aallartitaatut kristumiut tanitat nunarsuarmi sinneruttut eqqartuutissallugit alapernaarsuiffiartorpai. Aamma kristumiuunerartunut, sallullutik ’Guutip inoqutaanut’ ilaanerartunut, eqqartuussivissaq nalliussimavoq.c (sarĸúmersitat 17:1, 2; 18:4-8) Ersersinneqanngilarli taamanimiilli, imaluunniit kingusinnerusukkut, Jesus inunnik inuiannit tamaneersunik eqqartuussilersimanersoq savat savaasanit avissaartiterlugit.

²³ Assersuusiami Jesusip sulinera misissoqqissaarutsigu malugissavarput naggataatigut inuiaqatigiit tamaasa eqqartuukkai. Assersuusiami oqaatigineqanngilaq eqqartuussineq tamanna ukiorpassuarni pissasoq, taamaalilluni imaannani ukiuni qulikkuutaani ingerlareersimasuni toqusimasut toqumik naassaanngitsumik imaluunniit inuunermik naassaanngitsumik eqqartuussaasimasut. Nalunanngilaq ukiuni qulikkuutaani ingerlareersuni toqusut amerlanersaat inuiaat ataatsimut iliveqarfiannut pisimasut. (sarĸúmersitat 6:8; 20:13) Assersuummili pineqarpoq piffissaq Jesusip inunnik ’inuiannit tamaneersunik’ inuusunik eqqartuussutiminillu naammassinninnerminik takunnikkumaartunik eqqartuussiffissaa.

24. Savanik savaasanillu assersuusiaq qaqugu eqquutilissava?

²⁴ Allatut oqaatigalugu, assersuusiami tikkuarneqarpoq piffissaq inuup Ernerata naalannassutsimini tikiuffissaa. Inuit taamanikkussamut inuusut eqqartuutissallugit issiavissaarsuarmut ingissaaq. Eqqartuussutaa inuit qanoq ittuunerminnik ersersitsinerannik tunngaveqassaaq. Taamanikkussamut „iluartut guutiitsullu pineqarneri qanoq assigiinngitsigisut“ nalunaalluinnartumik takuneqarsinnaassaaq. (Malaki 3:18) Eqqartuussutip nalunaarutigineqarnera naammassineqarneralu piffissap sivikitsup ingerlanerani pissapput. Inunnut ataasiakkaanut atatillugu takussutissat erseqqissut tunngavigalugit Jesus naapertuilluartumik eqqartuussissaaq. — Aamma takuuk Korintumiunut agdlagkat áipait 5:10.

25. Inuup Ernera issiavissaarsuarmut naalannassutsimi pianut ingittoq Matîuse 25:31-mi eqqartorneqarmat suna pineqarpa?

²⁵ Tassa imaappoq, Jesusip eqqartuussissalluni ’issiavissaarsuarmut naalannassutsimi pianut inginnissaa’, Matîuse 25:31-mi eqqaaneqartoq, siunissami pissaaq, tassa kunngersuaq pissaasoq taanna inuiannut eqqartuussutini nalunaarutigissallugu naammassissallugulu issivissaarsuarmut ingippat. Tassa eqqartuussinerup Jesusimik inuttaqartup Matîuse 25:31-33, 46-mi eqqartorneqartup eqqartuussineq Daniel, kapitali 7-imi, eqqartorneqartoq assipalugaa, tassani eqqartorneqarmat kunngi naalakkersuisoq, Ittuinnartoq, Eqqartuussisutut suliassani suliarilissallugu ingittoq.

26. Assersuusiaq qanoq nutaamik paasivarput?

²⁶ Savanik savaasanillu assersuusiamik taamatut paasinninnerup ersersippaa taakkununnga eqqartuussutip naammassineqarnissaa siunissami pisussaasoq. Tamanna pissaaq ’annikilliornartoq angisooq’ Matîuse 24:29, 30-mi eqqartorneqartoq nalliutereerpat inuullu Ernera ’naalannartorsuulluni tikiutereerpat’. (Naleqqiuguk Mákorse 13:24-26.) Taava aaqqissuussanerup ajortup tamarmi naggatissani tikilerpagu Jesus eqqartuussissaaq eqqartuussutinilu naammassillugu. — Juánase 5:30; 2 Tásalûníkamiut 1:7-10.

27. Jesusip assersuusiaa kingulleq pillugu suut paasissallugit soqutigisariaqarparput?

²⁷ Tamanna Jesusip assersuusiaata piffissaanik nalunaallisitseqataallunilu savat savaasallu eqqartuunneqarnissaata qaqugu pinissaanik erseqqinnerulersitseqqataavoq. Tamannali uagutsinnik, ilungersuussillutik Guutip naalagaaffia pillugu nutaarsiassamik nuannersumik oqaluussissutiginnittunik, qanoq attuiva? (Matîuse 24:14) Suliatta pingaannginnerulissutigissavaa, imaluunniit annerusumik akisussaaffilerpaatigut? Qanoq tamatumannga attorneqarnerput ilanngutassiami tulliuttumi sammissavarput. (wD 15/10 95)

Savat savaasallu qanoq siunissaqarpat?

’Inuit avissaartissavai soorlu savanik paarsisup savat savaasanit avissaartittarai.’ — MATÎUSE 25:32, NV.

1, 2. Sooq savanik savaasanillu assersuusiaq soqutigisariaqarparput?

JESUS KRISTUS ajoqersuisut nunarsuarmi inuusimasut ilumut annerpaartarisimavaat. (Juánase 7:46) Ajoqersueriaasiisa ilagaat assersuusiorneq. (Matîuse 13:34, 35) Assersuusiai paasiuminartuupput sallusuissutinillu anersaakkut itisuunik siulittuutaasunillu ingerlatitseqqissutitut kimittuujullutik.

² Savanik savaasanillu assersuusiamini Jesusip piffissaq immikkut ittumik piginnaaneqartitaaffissani siumut tikkuarpaa: ’Inuup ernera tikiukkuni naalannassutsi atisimallugu . . . .’ (Matîuse 25:31) Tamanna soqutigisariaqarparput tassaammat assersuusiaq Jesusip apeqqummut matumunnga akissutimini naggasiullugu eqqartugaa: „Najuinissannut pissutsillu aaqqissuussaanerata naggatissaanut suna nalunaaqutaassava?“ (Matîuse 24:3, NV) Tamannali uagutsinnut qanoq isumaqarpa?

3. Siusinnerusukkut Jesusip oqarneratut annikilliornartup angisuup aallarteriitsiarnerani qanoq pisoqassava?

³ Annikilliornartup angisuup ’kinguninnguagut’ pisussat Jesusip siulittuutigisimavai, pisussat suli utaqqisavut. Oqarpoq taamanikkussamut ’inuup Ernerata nalunaaqqutaa’ takussaalerumaartoq. Tamanna ’nunami naggueqatigiinnut tamanut inuup Erneranik pissarsuulluni naalannartorsuullunilu qilaap nuiaasigut aggersumik’ takunnittunut attuissaaq. Inuup Ernera ’inngiliminit’ ingiaqatigineqassaaq. (Matîuse 24:21, 29-31)a Tamanna savanik savaasanillu assersuusiamut qanoq atassuteqarpa? Assersuusiaq tamanna ullutsinni biibilini nutsikkani kapitalimi 25-mi nassaassaavoq, Jesusilli akissutaanut ilaavoq, naalannartorsuulluni tikiunnissaa pillugu amerlanerusunik paasissutissiilluni ’inuiaqatigiinnillu tamarsuarnik’ eqqartuussinissaanik immikkut samminnilluni. — Matîuse 25:32.

Assersuusiami inuttaasut

4. Savanik savaasanillu assersuusiap aallartinnerani Jesus qanoq oqaatigineqarpa, aamma kikkut allat eqqaaneqarpat?

⁴ Jesusip assersuusiani ima aallartippaa: ’Inuup Ernera tikiukkuni.’ Qularnanngitsumik ’inuup Ernera’ kinaasoq nalunngilat. Iivangkiiliumik allattut taaguut tamanna Jesusimut atorajuppaat. Aamma Jesus imminut taamatut taasarpoq, qularnanngitsumik eqqarsaatigalugu Danielip takorruisitaalluni takusimasaa „Inuup Erneratut isikkoqartoq“ Ittuinnartumut orniguttoq „pissaanermik naalannaammillu naalagaassutsimillu“ tunineqassalluni. (Daniel 7:13, 14; Matîuse 26:63, 64; Mákorse 14:61, 62) Assersuusiami tassani Jesus pingaarnersaagaluarluni kisimiinngilaq. Siusinnerusukkut, Matîuse 24:30, 31-mi issuarneqartumik, oqarpoq inuup Ernera ’pissarsuulluni naalannartorsuullunilu’ tikiuppat taassuma inngilii pingaaruteqarluarumaartut. Savanik savaasanillu assersuusiami Jesus eqqartuussissalluni ’issiviassaarsuarmut naalannassutsimi pianut’ ingittoq inngilinit ilagineqartoq oqaatigineqarpoq. (Naleqqiuguk Matîuse 16:27.) Kisianni eqqartuussisoq inngiliilu qilammiipput, taamaattumik assersuusiami inuit pineqarnerpat?

5. Jesusip ’qatanngutai’ qanoq ililluta kinaassusersisinnaavavut?

⁵ Assersuusiami immikkooqatigiit pingasut kinaassusersisariaqakkavut eqqartorneqarput. Savanik savaasanillu assersuusiaminut ilanngullugit inuup Ernerata immikkooqatigiit pingajui, savat savaasallu kinaassusersissagutsigik pingaaruteqarluinnartut, eqqaavai. Immikkooqatigiit pingajui taakku Jesusip anersaakkut qatanngutiminik taavai. (Matîuse 25:40, 45) Tassaassimassapput pallorfiginnittut ilumoortut, Jesusimi oqarpoq: ’Kinaluunniit Ataatama qilammiusup peqqusaanik iliortoq tassa nukara najagalu anaanagalu.’ (Matîuse 12:50; Juánase 20:17) Paulusip kristumiut ’Abrahamip kinguaavinut’ ilaasut imaluunniit Guutip ernerinut ilaasut Jesusip ’qatanngutaanik qilammut qaaqquneqartunut ilanngussimasunik’ taavai. — Eprîarit 2:9–3:1; Galâsiamiut 3:26, 29.

6. Jesusip qatanngutaasa ilaat ’minninnguit’ kikkuuppat?

⁶ Sooq Jesus qatanngutimi ilaannik ’minninnguanik’ eqqartuiva? Oqaaseq tamanna siusinnerusukkut oqaaserisimasaanut apustilit tusarsimasaannut eqqaanarpoq. Johannes Kuisisoq imminit siulliulluni toqusoq, taamaattumillu nunarsuarmi inuunissaminik neriugisaqartoq, qilammi inuulernissaminnik neriugisalinnut sanilliullugu eqqartoramiuk Jesus ima oqarpoq: ’Arnanit erniusuni Johannes Kuisisumit annerusumik saqqummersoqanngilaq; qilammiulli naalagaaffiani minnerusoq taassumannga anneruvoq.’ (Matîuse 11:11) Immaqa qilaliartut ilaat ilagiinni nuimanerusumik inissisimaffeqarsimapput, soorlu apustilit taamaassimasut, ilaalli nuimannginnerusumik, tamarmilli tassaapput Jesusip anersaakkut qatanngutai. (Lúkarse 16:10; 1 Korintumiut 15:9; Evfisumiut 3:8; Eprîarit 8:11) Taamaammat qilaliartussat nunamiinnerminni nikanartutut isikkoqarsinnaagaluartut allaat Jesusip qatanngutigai tamannalu naapertorlugu iliorfigineqartussaallutik.

Savat savaasallu kikkuuppat?

7, 8. Savat pillugit Jesus qanoq oqarpa, taamaattumik taakku pillugit qanoq isummertariaqarpugut?

⁷ Savanut eqqartuussut pillugu ima allassimavoq: ’[Jesusip] talerpimmi tungaaniittut oqarfigiumaarpai: „Qaagitsi Ataatama pilluaqqusai ukorsii, naalagaaffik silarsuup tunngavileqqaarneranit ilissinnut piareersimasoq kingornussarisiuk. Kaattungami nerisippassinga; imerusuttunga immippassinga; tikeraasunga illusisippassinga; tamaqanngitsunga atisalerpassinga; napparsimasunga takusarpassinga; parnaarussiviimmiittunga ornippassinga.“ Taava iluartut akiumaarpaat oqarlutik: „Naalagaq, qanga takugatsigit kaattutit, nerlerlutillu? Imerusuttutilluunniit, immillutillu? Qanga takugatsigit tikeraasutit, illusisillutillu? Tamaqanngitsutilluunniit, atisalerlutillu? Qanga napparsimasutilluunniit parnaarussivimmiittutilluunniit takugatsigit ornillutillu?“ Kunngillu akiumaarpai oqarluni: „Ilumut oqarfigaassi: ukua qatanngutima minninnguit ilaat sumik pigissi tamatuminnga uanga pivassinga.“’ — Matîuse 25:34-40.

⁸ Erseqqippoq savat Jesusip talerpiata tungaaniittussanngortitaallutik iluarisaallutik eqqartuussaasut tassaasut inuit eqimattat. (Evfisumiut 1:20; Eprîarit 1:3) Qanoruna qangalu iliorsimasut? Jesus oqarpoq inussiarnerlutik, ataqqinnillutik tukkorlutillu nerisassaminik, imigassaminik atisassaminillu tunisimagaanni, aammalu napparsimagami parnaarussivimmiikkamilu takusarsimagaanni. Savat oqarmata namminneq inuttut Jesusimut taama iliorsimanatik, Jesusip tikkuarpaa anersaakkut qatanngutiminik, kristumiunik tanitaasunik sinneruttunik, tapersersuisimasut, taamaalillutillu imminut ajunngitsuliorlutik.

9. Sooq assersuusiaq ukiuni tuusintini naalakkersuinerup nalaanut atortuunngila?

⁹ Assersuusiaq tamanna ukiuni tuusintini naalakkersuinerup nalaanut atuutinngilaq, taamanikkussamummi tanitat kaannermik, imerusunnermik, napparsimanermik parnaarussaanermilluunniit naalliuuteqarnavianngillat. Pissutsilli aaqqissuussaanerata matuma naggatissaata nalaani tanitat ilarpassui tamakkuninnga nalaanneqartarsimapput. Satanip nunarsuarmut igitaagamili kamannini ingammik tanitanut sammisissimavaa, illaruaatissanngortittarlugit, naalliutsittarlugit toqutaatittarlugillu. — sarĸúmersitat 12:17.

10, 11. (a) Sooq tulluanngila isumaqassalluni Jesusip qatanngutaanut ajunngitsuliortut tamavimmik tassaasut savat? (b) Savat kikkunnut tulluarluinnartumik assersuutaappat?

¹⁰ Tassa imaappa Jesusip oqarneratut taassuma qatanngutaanut ajunngitsuliulaaginnartut, soorlu iffiaminermik nerisassillugit imermilluunniit immillugit, tamarmik savanut taakkununnga ilaassasut? Soorunami taamatut ajunngitsuliorneq tullermik asannissutsimut ersiutaasinnaavoq, kisianni savanut assersuusiami eqqartorneqartunut ilaasutut naatsorsuutigisaassagaanni annertunerujussuaq pisariaqarpoq. Jesusip assersuutigalugu Guuteqannginneraasut imaluunniit palasit qatanngutiminut ajunngitsuliullatsiartut eqqarsaatigisimanavianngilai. Jesusilli savat marloriarluni ’iluartunik’ taavai. (Matîuse 25:37, 46) Taamaattumik savat tassaasimassapput Kristusip qatanngutaanik sivisuumik ikiuisimasut — iliuuseqarlutik taakkuninnga tapersersuillutik — Guutillu saavani iluartumik inissisimalissutigisaminnik uppernermik ersersitsisimasut.

¹¹ Ukiut hundredelikkuutaat ingerlaneranni inuppassuit, ilaatigut Abraham, ’iluartuutitaasimapput’. (Jâko 2:21-23) Noa, Abraham allallu aalajaallutik inuusimasorpassuit ’savanut allanut’ nunarsuarmi paratiisiusumi Guutip naalagaaffianit aqunneqartumi inuulersussanut ilaapput. Ukiuni kingiulliunerusuni inuit millionilikkuutaat savanut allanut ilanngullutik ilumoortumik pallorfiginnilersimapput tanitallu peqatigalugit tassaalersimallutik ’savaatit ataatsit’. (Juánase 10:16; sarĸúmersitat 7:9) Nunarsuarmi inuunissaminnik neriugisallit Jesusip qatanngutai Guutip naalagaaffiata aallartitaatut isigaat taamaattumillu taakkununnga ikiuussimallutik, timikkut anersaakkullu. Savat allat qatanngutiminut nunarsuarmiittunut iliuusii Jesusip imminut iliuuserineqartutut isigai. Inuit taama ittut Jesus inuiaat eqqartuukkiartorlugit tikiuppat savatut eqqartuunneqassapput.

12. Sooq savat aperippat qanoq ilillutik Jesusimut ajunngitsuliorsimanerlutik?

¹² Taavami sooq uffa savat allat tanitat peqatigalugit nutaarsiassamik nuannersumik oqaluussillutik taakkuninngalu ikiuillutik ima aperippat: ’Naalagaq, qanga takugatsigit kaattutit, nerlerlutillu? Imerusuttutilluunniit, immillutillu?’ (Matîuse 25:37) Tamatumunnga assigiinngitsut pissutaasinnaapput. Tamanna assersuutaavoq. Tamanna ikiortigalugu Jesusip anersaakkut qatanngutiminik isumassuilluinnarnini takutippaa; misigeqatigai naallioqatigalugillu. Jesus siusinnerusukkut ima oqarsimavoq: ’Ilissinnik ilassisup uanga ilassivaanga, uannillu ilassisup aallartitsisiga ilassivaa.’ (Matîuse 10:40) Assersuusiami tassani Jesusip najoqqutassaq tamanna itisilerpaa, ersersillugu qatanngutiminut iliuuserineqartut (ajunngitsut ajortulluunniit) allaat qilammi malugineqartartut; qilammiilluni taassumunnga iliuuserineqartutut ipput. Jesusip aamma tassani Jehovap eqqartuussinermut najoqqutassiaa tikkuarpaa, nalunaallisillugu Guutip eqqartuussutai, iluarisaasutut iluarisaanngitsutulluunniit, pissutissaqarluarlutillu naapertuilluartuusartut. Savaasat patsisissarsiorsinnaanngillat oqarlutik Jesus inuttarsillugu takusimanngikkitsik.

13. Sooq inuit savaasatut pissusillit ilaasa Jesus ’Naalakkamittut’ taagulissavaat?

¹³ Eqqartuussinerup assersuusiami tamatumani eqqartorneqartup qaqugu pinissaa paasigutsigu savaasat kikkuunnerat paasilluarsinnaanerulissavarput. Tamanna eqquutissaaq ’inuup Ernerata nalunaaqqutaa qilammi takussaalerpat, taavalu nunami naggueqatigiit tamarmik nimaarumaarput, isigumaarpaallu inuup Ernera qilaap nuiaasigut aggersoq pissarsuulluni naalannartorsuullunilu’. (Matîuse 24:29, 30) Babylonimut Angisuumut anikilliornartumi aniguisut kunngip qatanngutaanik ajortumik pinnittarsimasut immaqa ilungersorlutik Eqqartuussisoq ’Naalakkaminnik’ taagulissavaat, annaanneqarnissartik neriuutigigaluarlugu. — Matîuse 7:22, 23; naleqqiuguk sarĸúmersitat 6:15-17.

14. Suna tunngavigalugu Jesusip savat savaasallu eqqartuutissavai?

¹⁴ Jesusilli eqqartuussinera naalagiartarsimasut, Guuteqannginneraasimasut allalluunniit piffissaq kingulleq atorlugu kimigiisernerannik tunngaveqarnavianngilaq. (2 Tásalûníkamiut 1:8) Aap, inuit uummataat ’qatanngutimilu minninnguit ilaannut’ iliuuserisimasaat eqqartuussisup isiginiassavai. Ilumoorpoq kristumiut tanitat nunarsuarmi sinneruttut ikiliartuinnartut. Tanitalli ’inussiamut aalajaallunilu silatuumut’ ilaasut anersaakkut nerisassiorlutillu unnersuussisartuartillugit savanut ilaalersussat taakkununnga ajunngitsuliornissaminnut periarfissaqartuassapput, soorlu ’amerlangaartut immikkut naggueqatigiissut immikkullu inuiaasut immikkullu oqaasillit tamarmik ilaat’ taamaaliortarsimasut. — sarĸúmersitat 7:9, 14.

15. (a) Inuppassuit savaasatut pissuseqarnertik qanoq ilillutik ersersissimavaat? (b) Sooq kikkut ’savaanersut’ kikkullu ’savaasaanersut’ uagut nalilerniartussaanngilarput?

¹⁵ Kristusip qatanngutai savallu allat millionilikkuutaat savaatitut ataatsitut ittut qanoq pineqartarsimappat? Inuppassuit immaqa Kristusip qatanngutaanik toqqaannartumik saassussisimanngikkaluarput, aammali innuttaanut asannittuliorsimanatik. Inuit savaasatut ittut silarsuarmut ajortumut atajumanerugamik Guutip naalagaaffia pillugu tusarliussamik ilassinnikkumanngillat, toqqaannartumik toqqaannanngitsumilluunniit tusaraluarunikku. (1 Juánase 2:15-17) Soorunami Jesus tassaavoq inaarutaasumik eqqartuussisussatut toqqarneqarsimasoq. Kikkut savaanersut kikkullu savaasaanersut uagut aalajangigassarinngilarput. — Mákorse 2:8; Lúkarse 5:22; Juánase 2:24, 25; Rûmamiut 14:10-12; 1 Korintumiut 4:5.

Savat savaasallu qanoq siunissaqarpat?

16, 17. Savat qanoq siunissaqarpat?

¹⁶ Jesusip savanut eqqartuussutaa imaappoq: ’Qaagitsi Ataatama pilluaqqusai ukorsii, naalagaaffik silarsuup tunngavileqqaarneranit ilissinnut piareersimasoq kingornussarisiuk.’ Qaaqqusineq asannippaluk! ’Qaagitsi’ — sumut? Inuunermut naassaanngitsumut, soorlu oqaatsini ima naggaserai: ’Iluartut naassaanngitsumik inuussapput.’ — Matîuse 25:34, 46.

¹⁷ Talentinik assersuusiamini Jesusip takutippaa qilammi naalakkersueqataasussanut suut piumasarineqartut; savanilli savaasanillu assersuusiamini takutippaa Guutip naalagaaffianut innuttaasussanut suut piumasarineqartut. (Matîuse 25:14-23) Erseqqippoq savat allat Jesusip qatanngutaanik tamakkiisumik tapersersuinertik pissutigalugu nunarsuaq Guutip naalagaaffiata ataaniittoq kingornutissagaat. Nunarsuarmi paratiisiusumi inuuneq nuannaarutigisinnaassavaat — siunissaq inuit utertinneqarsinnaasut ’silarsuaata tunngavilerneqaqqaarneranit’ Guutimit taakkununnga piareersimatitaasoq. — Lúkarse 11:50, 51.

18, 19. (a) Jesusip ’savaasat’ qanoq eqqartuutissavai? (b) Qanoq ililluta qularinngissinnaavarput savaasat naassaanngitsumik naalliutsitaanavianngitsut?

¹⁸ Savaasat eqqartuunneqarnerat allaanerulluinnarpoq. ’Taavalu saamimmi tungaaniittuttaaq oqarfigissavai: „Uannit aallaritsi perloqqusaasusi ukorsii, inneq naassaanngitsumik ikumasoq Diaavulumut inngiliinullu piareersimasoq ornissiuk. Kaattungami nerisinngilassinga; imerusuttunga immisinngilassinga; tikeraasunga illusisinngilassinga; tamaqanngitsunga atisalinngilassinga; napparsimasunga parnaarussivimmiittungalu takusanngilassinga.“ Taava taakkuattaaq akiumaarpaat oqarlutik: „Naalagaq, qanga takugatsigit kaattutilluunniit imerusuttutilluunniit tikeraasutilluunniit tamaqanngitsutilluunniit napparsimasutilluunniit parnaarussivimmiittutilluunniit, kiffartorfiginallu?“ Taava akiumaarpai oqarluni: „Ilumut oqarfigaassi: ukua minninnguit ilaat sumik pinnginnassiuk tamatuminnga uangattaaq pinngilassinga.“’ — Matîuse 25:41-45.

¹⁹ Biibilimik atuaqqissaartartut nalunngilaat tamanna ima paasineqarsinnaanngitsoq inuit savaasatut pissusillit toqujuitsumik tarneqartut innermi naassaanngitsumik anniartitaasussamik. Aap, inuit tarniupput; imaanngitsoq tarneqartut toqujuitsunik. (1 Moses 2:7, NV; Nalunaajaasup oqaasii 9:5, 10; Hesekiel 18:4, NV; aamma takuuk Korintumiunut agdlagkat sujugdlît 15:45.) Eqqartuussisup savaasat ’innermut naassaanngitsumik ikumasumut’ eqqartuummagit isumaqarpoq suujunnaarsitaalluinnassasut siunissami inuunissamik neriugisaqaratik, soorlu aamma Diaavulu inngilipiluilu allanngortinneqarsinnaanngitsumik inaarutaasumillu suujunnaarsinneqassasut. (sarĸúmersitat 20:10, 14) Tassa Jehovap eqqartuussisuutitaa marlunnik assigiinngilluinnartunik eqqartuussutissaqarpoq. Savat oqarfigai: ’Qaagitsi,’ savaasallu: ’Uannit aallaritsi.’ Savat ’inuuneq naassaanngitsoq’ kingornutissavaat. Savaasat ’naassaanngitsumik pillagaanissaq’ pisassarissavaat. — Matîuse 25:46.b

Uagutsinnut qanoq isumaqarpa?

20, 21. (a) Kristumiut sumik pingaaruteqartumik suliaqarpat? (b) Avissaartiterineq suna ullumikkut ingerlanneqarpa? (c) Savanik savaasanillu assersuusiaq eqquulluni aallartippat pissutsit suut inunnut atuutissappat?

²⁰ Apustilit sisamat Jesusip najuinissaminut pissutsillu aaqqissussaanerata naggatissaanut suup nalunaaqutaajumaarnissaanik apeqqummut akissutaanik tusaasut assut eqqarsaatigisassaqalerput. Eqqumajuarlutillu misissortuartariaqarput. (Matîuse 24:42) Aamma Mákorse 13:10-mi oqaatigineqartutut nalunaajaasariaqarput. Ullumikkut Jehovap nalunaajaasui suliniarluarlutik nalunaajaanermik tamatuminnga suliaqarput.

²¹ Savanik savaasanillu assersuusiamik paasinninneq nutaaq tamanna uagutsinnut qanoq isumaqarpa? Takuat, ullumikkut inuit sumiinnertik takutittalereerpaat. Ilaat ’aqqutikkut sileqisukkut aserorsimaffimmut sammisukkut’ ingerlapput, ilaalli ’aqqutikkut ameqisukkut inuunartumut sammisukkut’ ingerlaannarniarsaripput. (Matîuse 7:13, 14) Assersuusiamili eqqartorneqartutut savanik savaasanillu Jesusip inaarutaasumik eqqartuussinissaa siunissami pisussaavoq. Inuup Ernerata eqqartuussiartorluni tikiukkuni nalorninaallisissavaa kristumiut ilumoortorpassuit — assersuutaasumik savat tunniulluinnarsimasut ’amerlangaartut’ — ’annikilliornartoq angisooq’ anigorlugu silarsuarmi nutaami inuulernissamut piukkunnaateqartut. Siunissaq taama ittoq maannangaaq nuannaarnissamut pissutissaalluarpoq. (sarĸúmersitat 7:9, 14) Akerlianilli inuit ’inuiaqatigiinnit tamaneersut’ amerlanerpaartaat imminnut takutissapput savaasatut naalasseriitsutut illutik. Taakku ’naassaanngitsumik pillagaassapput’. Nunarsuarmi qanoq eqqissiallanneqartigissava!

22, 23. Sooq uffa assersuusiaq aatsaat siunissami eqquuttussaasoq oqaluussinerput ullumikkut taama pingaaruteqartigaa?

²² Eqqartuussineq assersuusiami eqqartorneqartoq siunissami qanittumi pisussaavoq, ullumikkulli pingaaruteqartumik pisoqalereerpoq. Uagut kristumiut annaassissutissaasumik inunnillu avissaartiterissutaasumik oqaluussissutiginnippugut. (Matîuse 10:32-39) Paulus ima allassimavoq: ’Kinaluunniit Jehovap aqqanik torlorfiginnittoq annakkumaarpoq. Qanorli ilillutik upperfiginngisartik torlorfigissavaat? Qanorlu ilillutik tusaamanngisartik upperfigissavaat? Qanorlu ilillutik oqaluussisoqanngippat tusassappat?’ (Rûmamiut 10:13, 14) Tamanut oqaluussissutiginninnitsigut inuit nunani 230-niittut Guutip aqqanik taassumalu tusarliussaanik annaassissutissaasumik tusarlerneqartarput. Kristusip qatanngutai tanitaasut oqaluussinermut tamatumunnga suli siuttuupput. Taakku ullumikkut inunnit savanut allanut ilaasunit 5 millionit missaanniittunit ilaaqquffigineqarsimapput. Inuillu nunarsuarmi sumi tamaaniittut Jesusip qatanngutaasa tusarliussaannik ilassinnittarput.

²³ Illumiit illumut imaluunniit torrutiinnarlugu oqaluussinitsigut inuppassuit tusarliussatsinnik tusarlerneqartarput. Allat arlaatigut, periaatsitigut uagut ilisimanngisatsigut, Jehovap nalunaajaasui suliaallu pillugit ilisimasaqalersimapput. Jesusip eqqartuussivissaq nalliuppat inuiaqatigiittut akisussaassuseq aamma angajoqqaatut akisussaassuseq nersornaatissarlu qanoq annertutigisumik naatsorsuutigissavai? Tamanna naluarput, aammalu tamanna isumaliutigissallugu pissutissaqanngilaq. (Naleqqiuguk Korintumiunut agdlagkat sujugdlît 7:14.) Ullumikkut inuppassuit tusaajumanngillat Guutillu innuttaanik illaruaatiginnittarlutik toqqaannartumik qinuginnittarlutik. Taamaattumik piffissaq inuuffigisarput pingaaruteqartorujussuuvoq; inuit taamaaliortut immaqa Jesusip savaasatut eqqartuussaanut ilaassapput. — Matîuse 10:22; Juánase 15:20; 16:2, 3; Rûmamiut 2:5, 6.

24. (a) Sooq inuit ataasiakkaat oqaluussinitsinnut ajunngitsumik qisuariarnissaat pingaartorujussuua? (b) Atuaqqissaarnerput manna oqaluussisarninnut qanoq isiginnilissutigaajuk?

²⁴ Qujanartumilli amerlasuut ajunngitsumik qisuariartarput, Guutip oqaasiinik atuaqqissaartalerlutik Jehovamullu nalunaajaasunngorlutik. Inuit savaasatut pissuseqarpasissinnaasut allanngorsinnaasarput savatut pissuseqalerlutik. Tusarliussamut qisuariartut iliuuseqarlutillu Kristusip qatanngutaasa sinnerinik tapersersuisut taamaaliornermikkut Jesusip, qanittukkut eqqartuussissalluni issiavissaarsuarmut ingippat, talerpiata tungaanut inissinneqarnissaminnut tunngavissiuipput. Taakku annertuumik pilluaqqusaapput pilluaqqusaajuassallutillu. Taamaattumik assersuusiaq tamanna kristumiutut kiffartornermi ilungersuussinerulernissatsinnut kajumississutigisariaqarparput. Kingusinaartinnata Guutip naalagaaffia pillugu nutaarsiassamik nuannersumik sapinngisarput tamaat oqaluussissutiginnikkusuppugut taamaalillutalu inuit tamatuminnga ilassinninnissaannut periarfissillugit. Taava Jesusip eqqartuussutissaq aalajangissavaa, perloqqusaasutut imaluunniit pilluaqqusaasutut. — Matîuse 25:46. (wD 15/10 95)