amiilaarnartumik siaruaakkiartorpoq. Atuakkiaminni Intimate Violence-imi misissuisartut Richard Gelles Murray Strausilu ima allapput: „Nammineq angerlarsimaffinni asasannit timikkut saassussineqarnissat, unatarneqarnissat toqutaanissallu ilimanarnerupput, sumiiffimmi allami kimilluunniit taama pineqarnissamut naleqqiullugu.“

Ilaqutariit nakuussusiat atugartuussutsip aniguinissaanut ilumut aalajangiisuussappat, atugartuussutsip siunissaa siooragisariaqarparput. Immaqali atugartuussutsip siunissaanit allaanerusunik isumakuluuteqartarputit. Qularnanngitsumik eqqarsaatiginerusarpat ularussimaneq tamanna nammineq ilaqutannut qanoq kinguneqarumaarnersoq. Qanoq kinguneqassava? Oqaasissaqarluartup tamatuminnga akissutaa immaqa tupigusuutigissavat. (wD 15/10 92)

Ilaqutariit annikilliortarnerat — Ullut nalunaaqqutaat

ILAQUTARIIT annikilliortarnerat — inuppassuit isumaqarput tamanna aappariinnerup angajoqqaajunerullu pisoqalisimanerannut ersiutaasoq. Allat isumaqarput naalakkersuinikkut, aningaasatigut inuiqatigiissutsikkullu allanngorsimanerup kingunerigaa. Allallu teknologip nutaaliaasup ajoqutaasa ilaattut isigaat. Kisianni ilaqutariit ullumikkut ajornartorsiutaat tamakkunannga annerungaartumik pissuteqarput. Malugeriakkit Biibilimi 2 Timûtiuse 3:1-4-mi allassimasut:

’Imaattorli ilisimassavat: ullussani kingullerni ajornartunik nalliuttoqassammat, inuit inuujumaarmata imminnik asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut, Guuti kajumiginagu nuannaarutinut kajumittut.’

Oqaatsit taakkua ullumikkut ajornartorsiutit nagguiannik tikkuaannginnerpat? Ullumikkut ilaqutariit annikilliortarnerannut siulittuut malillugu pissutsit silarsuup matuma ulluini kingullerni piumaartussat pissutaapput. Ullullu annikilliornartut taakkua 1914-imi aallartissimanerannut uppernarsaaterpassuaqarpoq.a Ingammik taamaniilli anersaaq inunnit pissaaneqarnerungaartoq Satan Diaavulumik taaneqartoq toqussutaasinnaasumik sunniuteqalersimavoq. — Matîuse 4:8-10; 1 Juánase 5:19.

1914-imiilli nunarsuup eqqaanut killiligaasimagami Satan Diaavulu ’kamattorsuuvoq piffissakitsusi nalunnginnamiuk’. (sarĸúmersitat 12:7-12) Satan Guutimut ’qilammilu nunamilu ataataasut tamarmik ateqaatigisaannut’ akeraalluinnarmat, nunarsuup ilaqutariinnut navianartorsiorfinngorsimanera tupinnanngilaq. (Evfisumiut 3:15) Satanip inuiaat tamaasa Guutimit saatsinniarlugit aalajangersimavoq. Tamanna anguniarlugu ilaqutariit ajornartorsiutinik saassuttarunigit iluatsitsissannginnerpa?

Ilaqutariit inunnit pissaaneqarnerusup saassussisarnerinut tamakkununnga illersussagaanni inuit immikkut ilisimasaqarneragaasut isumaliuutaat ’torrallataasut’ naammaqqajassanngillat. Biibilimili Satan pillugu ima allassimasoqarpoq: ’Taassuma isumaliorneri nalunngilavut.’ (2 Korintumiut 2:11) Saassusseriaasiisa ilaat nalunngikkutsigik ilaatigut illersorneqarsinnaavugut.

Aningaasat sulinerlu

Satanip saassusseriaasiisa sakkortuunerpaat ilaat tassaavoq aningaasaqarniarnikkut naqisimaneqarneq. Ilumut ullutsinni ’ajornartunik nalliuttoqartarpoq’ soorlu 2 Timûtiuse 3:1-imi allassimasoq. Nunani siuarsarniakkani suliffissaaleqineq, akissarsiakinneq pisariaqartitanillu amigaateqarneq ilaqutariinnut ajornartorsiutaangaartarput. Aammali USA-mi peqangaarfiugaluartumi aningaasaqarniarnikkut atoruminaatsorsiornerit malunniuttarput. USA-mi misissuinerup takutissimavaa ilaqutariit pingaartumik aningaasat pillugit isumaqatigiinngissuteqartartut. Atuakkami Secrets of Strong Families-imi nassuiarneqarpoq ’piffissap, soqutigiinninnerup nukiillu’ suliffimmut atorneqartariaqartut aamma ’akeqqatut isertortutut’ aappariinneq aseroriartortissinnaagaat.

Atugarisat pissutigalugit arnarpassuit suliffeqalersariaqartarsimapput. Atuakkiortoq Vance Packard ima nalunaarpoq: „Maannakkut Amerikami inoorlaat meeraaqqallu ikinnerpaamik 25 procentii sulisartunik anaanaqarput.“ Suliffeqartilluni meeraaqqat pisariaqartitaat naammatsittussaanngingajattut isumagissagaanni nukillaarnarsinnaavoq — meeqqanut angajoqqaanullu ajoqutaasumik. Packard nangilluni allassimavoq USA-mi meeqqat paarineqarnissaannik periarfissakinnera pissutigalugu ’ullumikkut meeqqat millionilikkuutaat ukiuminni siullerni isumaginninnermik pinngitsoortinneqartartut’. — Our Endangered Children.

Suliffiup nammineq akuttuunngitsumik ilaqutariittut inuunerup oqimaaqatigiinnera qajannarsisittarpaa. Sulisut amerlasuut suleqatiminnit kanngunartuliornissamut usserneqartarput. Allarpassuit atorfimminni qaffatsitaanissartik asuli noqqaassutigisarpaat ilaqutariittut inuunertik pilliutigalugu. (Nalunaajaasut oqaasii 4:4) Angutip tuniniaasutut atorfini ima sammisimatigaa allaat nulia imminut ’aappaqanngikkaluarluni anaanaanerarsimalluni’.

Aappariinnerup qilerutai qajannarsisitat

Aappariinnermik aaqqissuussineq saassutarineqalerpoq. Atuakkami The Intimate Environment-imi ima allassimavoq: „Siornatigut ilimagineqartarsimavoq aappariit aappariittuassasut, taakkua ilaata — allasiorluni, pinerluffiginnilluni imaluunniit paarsinerlulluni — aappariinneq sualuttumik ajoqusinngippagu. Maannakkut inuit amerlanersaat isumaqarput aappariinnerup piumasarisanik naammassinninnissaq siunertarigaa.“ Aap, aappariinneq pilluaannermut, qasunassutsimut kiserliornermulluunniit sunniinaveeqqutitut isigineqartarpoq — inummut allamut inuuneq naallugu attaveqarnertut isigineqarani. Maanna aappariinnermit tigusinnaasat pingaartinneqartarput, aappariinnermut tunniussinnaasat pingaartinneqaratik. (Akerliatut apustilit suliait 20:35 takuuk.) ’Aappariinnermut tunngatillugu naleqartitat pillugit annertuumik allanngorsimanerup’ tamatuma aappariinneq qajannarsisissimavaa. Piumasanik angusaqanngitsoorunik aappariit avinnissartik aniguiffissatut piuminartutut qinertarpaat.

Biibilimi siulittuutigineqarsimavoq maani ’ulluni kingullerni’ inuit ’Guutimik mianerinninneq ileqqorisuusaarlugu pissaaneqarfigiumanngikkaat’. (2 Timûtiuse 3:5) Ilisimatuut arlallit isumaqarput upperisarsiornerup kinguariarsimanera aappariinnerup qajannarsisinneqarneranut pisooqataasoq. Atuakkiamini The Case Against Divorce-mi Dr. Diane Medved ima allassimavoq: „Upperisarsiornerit amerlanersaat naapertussagaanni Guuti oqarsimavoq aappariinneq ataavartussaasoq. Guuteqarnerali qularigukku imaluunniit upperinagu piumasannik iliortarputit.“ Taamaattumik aappariinnermi ajornartorsiuteqaraangat aappariit iluarsiissutissat peqqinnartut anguniarneq ajorpaat. „Tuaviorlutik aappariinnertik taamaatippaat.“

Inuusuttut saassunneqartarput

Ullumikkut tatineqarneq pissutigalugu meeqqat paatsiveerupput. Meerarpassuit ajoqqaaminnit nakuusernikkut pinerluffigineqartarput, oqaatsit atorlugit kinguaassiutitigulluunniit atornerlunneqartarlutik. Avissimaneq pissutigalugu millionilikkuutaat angajoqqaanit asanninnermik ersersitsivigineqarneq amigaatigaat, angajoqqaallu avissimanerat inuuneq naallugu aliasuutigineqarajuttarluni.

Inuusuttut sualuttumik sunnertittarput. Amerikami inuusuttuaqqat 14-inik ukioqalerunik agguaqatigiissillugit TV-kkut inuarnerit 18.000-it aamma nakuusernermik, kanngunartuliornermik, naalliutsitsinermik pinerluttuliornermillu pisimasut kisissaanngitsut isiginnaarsimassavaat. Nipilersorneruttaaq inuusuttut sakkortuumik sunnertarpai allaallu uissuumminartumik sunniuteqangaartarluni, kinguaassiutinut tunngasumik erseqqissumik imaluunniit allaat Satanimut tunngasumik imaqartarluni. Atuarfinni inuusuttut pinngoriartornermik eqqarsartaaseq ilinniartarpaat tassuunalu Guutimik Biibilimillu upperisaq aseroriartortinneqartarpoq. Ilagisartakkaminnit sunnerneqarlutik inuusuttorpassuit kanngunartuliorneq, imigassartorneq ikiaroornartutornerlu peqataaffigisarpaat.

Ilaqutariit annikilliornerata pissutai

Taamaattumik ilaqutariit sumit tamanit aserornartunik saassunneqartarput. Qanoq ilillutik aniguisinnaappat? Ilaqutariinnik siunnersuisartoq John Bradshaw ima siunnersuivoq: „Angajoqqaanut maligassiat ukiuni 150-ini nutaanngortinneqarsimanngillat. . . . Isumaqarpunga maligassiatoqqat tamakku atorsinnaajunnaartut.“ Kisianni inuit maligassiarititaat nutaat aniguisissinnaanngilaatigut. Jehova Guutip ilaqutariinneq pilersissimavaa. Kikkunnit tamanit Taassuma nalunnginnerussavaa ilaqutariittut inuuneq pilluarnissatsinnut qanoq pingaartigisoq aamma ilaqutariit qanoq ilillutik nukittuujusinnaasut pilluarsinnaasullu. Tupigusuutigissanerparput Taassuma oqaasiani, Biibilimi, ilaqutariit annikilliornerannit aniguiffissaq nassaarineqarsinnaammat?

Atuakkami pisoqqami tamatumani nassuiarneqarpoq ilaqutariilluni inuuneq qanoq ajutoorsimasoq. Inuit aappariit siulliit, Adamikkut, naatsiivimmi kusanartumi inissinneqarsimallutik siunertaqarluartumik suliassaqartinneqarsimapput, nunarsuaq tamaat paratiisinngortinniassagamikku. Guutip aalajangersimavaa Adam ilaqutariinnut ittuussasoq. Eva suleqataasoq Adamip ikiortigisimagaluarpaa. Evalli aaqqissuussaaneq tamanna pikitsitsiffigaa. Uimi naalagaanera kisermaannialerpaa Guutip inerteqqutigisatuaa maleruarumanagu. Adamip taava naalagaanini taamaatitillugu pikitsitseqatigisimavaa. — 1 Moses 1:26–3:6.

Guutip aaqqissuussaaneranut nigorsimanerup tamatuma kingunipilui erniinnarluinnaq malunniupput. Minguikkunnaaramik pisuunngissuseerullutillu Adamikkut kanngusullutik ilerasuuteqalerput. Adamip siornatigut nuliani taalliortorpaluttumik allaatigisimagaluarlugu maanna misigittaalluni ’arnaq uannut tunniussat’-tut eqqaavaa. Oqaatsinik tamakkuninnga aappariinneq naalliunnassuseqartoq aallartippoq. Adamip asuliinnaq ittuunini tigoqqinniaruniuk Evamut ’naalagaajumaarpoq’. Evallu uini ’pilerissuseqarfigilissavaa’, immaqa ingasappallaartumik. — 1 Moses 2:23; 3:7-16.

Tupinnanngilaq Adamip Evallu aappariittut akiuunnerat kinguaavinut aserornartunik kinguneqarsimammat. Angajulliliaat Kain inuartunngorsimavoq misigittaalluinnartoq. (1 Moses 4:8) Lemek, Kainimut kinguaajusoq, ilaqutariittut inuunerup kinguartoorneranut ilasaataasutut tassaalersimavoq ataatsikkut qassiinik nulialik siulleq eqqartorneqartoq. (1 Moses 4:19) Taamaalillutik Adamikkut ajorti toqulu kisiat pinnagit aammali ilaqutariinnut maligassaq ajortoq kinguassaminnut inunnguuseritippaat, tamatuma kingorna inuiaat atortualigaannik. Maanna ulluni kingullerni ilaqutariinni isumaqatigiinnginneq aatsaat taama sualutsigilerpoq.

Ilaqutariit peqqissiartortut

Taamaattoq ullumikkut ilaqutariit tamarmiunngitsut annikilliortarput. Assersuutigalugu, USA-mi illoqarfinnguami uiusoq nuliani paninilu marluk ilagalugit inuuvoq. Naak eqqaamiuini amerlasuuni angajoqqaat meeqqallu imminnut avissaartuusimagaluartut, taakku taamaanngillat, aamma panimik ikiaroornartunik atoqateqartarnermillu misiliisarnersut isumakuluutiginngilaat. Ataasinngornerit tamaasa unnukkut, inuusuttut allat TV-mik isiginnaartuaannartillugit, ilaqutariit tamarmik nerrivimmut katersortarput Biibilimik atuaqqissaaqatigiinniarlutik. „Ataasinngornikkut unnukkut ataatsimoorluta oqaloqatigiittarpugut,“ taama ittuat nassuiaavoq. „Panitta nangaassuteqaratik ajornartorsiutigisaminnik oqaloqatigisarpaatigut.“

Aammalu New York Citymi anaanaasup aappaqanngitsup panini marluk nuannaarluni immikkut attaveqarfigisarpai. Qanoq ililluni? „Aatsaat arfininngornikkut sapaatikkullu TV ikittarparput,“ taama nassuiaavoq. „Ullut tamaasa Biibilimi allassimaffik oqaloqatigiissutigisarparput. Aamma sapaatit akunneranut unnuk ataaseq ilaqutariittut Biibilimik atuaqqissaaqatigiinnermut atortarparput.“

Ilaqutariit tamarmik Jehovamut nalunaajaasuupput. Biibilimi ilaqutariinnut najoqqutassiat maleruartarpaat — iluaqutigalugillu. Qaqutigoorluinnanngillalli. Ilaqutariit hundredelinnik tuusintillit taakkunatut ilaqutariinnut najoqqutassiat Biibilimeersut maleruarlugit iluaqutigisarpaat.b Najoqqutassiat suut? Illit ilaqutavillu qanoq ilillusi iluaqutigisinnaavisigik? Tamanna paaseqqullugu kajumissaarniarpatsigit ilanngutassiat tulliuttut misissoqqullugit. (wD 15/10 92)

[Quppernerup ataani ilanngussat]

[Qupp. 4-mi assiliartaq]

Nunani siuarsarniakkani piitsuussutsip ilaqutariit annikilliortittarpai

[Suminngaanneernera]

Assiliaq: U.S. Navy

[Qupp. 8-mi assiliartaq]

Najoqqutassiat Biibilimeersut maleruarlugit ilaqutariit amerlasuut ullumikkut annikilliornartut akiorsinnaasarpaat