Pilluarneq piviusoq qanoq anguneqarsinnaava?
INUIT pilluarlutik inuunissaat Guutip siunertarisimavaa. Qanoq ililluta tamanna qularinngissinnaavarput? Atagu inuiaat pilernerat qimerlooriartigu.
Jehova Guutip inuit aappariit siulliit pilluarsinnaassusilerlugit pinngortippai. Adam Evalu inissinneqarput paratiisimut, nuannaarnerup naatsiivianut Edenimik taaneqartumut. Inuunerminni pisariaqartitaannik tamanik Pinngortitsisup pilersorpai. Naatsiivimmiipput „orpiit tamalaat takorannersut neriffigiuminartut“. (1 Moses 2:9) Adam Evalu peqqillutillu nukittullutillu pinnersuupput — naammalluinnartuupput pilluarluinnarlutillu.
Pilluarnerannut suna pissuterpiaava? Angerlarsimaffiat paratiiserpalaartoq imaluunniit timikkut naammalluinnassusiat? Guutip tunissutai tamakkua inuunerminni nuannaarutaannut soorunami allisaaqataapput, tigussaasulli tamakkua pilluarnerannut aalajangiisuunngillat. Edenip naatsiivia tassaannaanngilaq naatsiivissuaq alianaatsoq. Guutimik pallorfiginnittarfiuvoq. Inuit siulliit naassaanngitsumik pilluarnissaannut aalajangiisuusussaq tassaavoq Pinngortitsisumut asannittumik attaveqarnermik ineriartortitsillutillu ataavartitsinissaat. Pilluarsinnaassagunik pingaarnerpaamik anersaamut tunngasunik pingaartitsisuusariaqarput. — Naleqqiuguk Matîuse 5:3.
Anersaamut tunngasunik pingaartitsisuuneq pillualernarpoq
Aallaqqaataani Adam Guutimut anersaakkut attaveqarpoq. Tamanna asannittumik attaveqatigiinneruvoq ernerup ataatallu attaveqatigiinnerattut ittoq. (Lúkarse 3:38) Adam Evalu Edenip naatsiivianut pitsaalluinnartunik avatangiisilimmut Guutimillu pallorfiginnerusussutsiminnik naammassinniffigisinnaasaminnut inissinneqarput. Uumasunit qutsinnerujussuarmik periaaseqarlutik Jehova ataqqinartillugulu unnersiutigisinnaavaat, namminneq kajumissutsiminnik asanninnerlu pissutigalugu taassumunnga naalassinnaagamik. Silaqassusertik atorlugu Guuti pissusii nuanningaartut pillugit unnersiutigisinnaassavaat kisimilu oqartussaassusia tapersersorsinnaassallugu. Aammattaaq Jehovamit asannittumik isumassorneqartuaannarsinnaassapput.
Siuaasatta siulliit Pinngortitsisumut attaveqarnertik taassumalu inatsisaanut naalannertik piviusumik pillualissutigaat. (Lúkarse 11:28) Adam Evalu pilluarnermut aqqut ujarlugu ukiorpassuarni misileraasariaqanngillat. Pinngortinneqarnerminnilli pilluarput. Guutimik eqqisseqateqarput taassumalu oqartussaassusianut naalatsigitillutik, tamannalu pilluaatigaat.
Naalannginniariartulli pilluarneq tamanna kipivoq. Adamip Evallu pikitsitsinermikkut Jehovamut anersaakkut attaveqarnertik aserorpaat. Guutimut ikinngutaajunnaarput. (1 Moses 3:17-19) Edenimit anisitaanerata kingorna Guutip attaveqarfigiunnaarsimagunarpai. Naammalluinnassusertik, naassaanngitsumik inuusinnaanerigaluartik angerlarsimaffitsillu paratiisiusoq annaavaat. (1 Moses 3:23) Pingaarnerusumillu — Guutimut ajunngitsumik attaveqarnertik annaagamikku pilluarnermuttaaq aqqut annaavaat.
Qinersisinnaassuserput
Adamip Evallu toqutinnatik inuttut pissutsitik, nalunngeqatiginnissusertik inunnguusaasoq anersaakkullu piginnaanitik kinguaaminnut kingornutsippaat. Inuit kinguaariit uumasutut piginnaasakitsigilersitaanngillat. Uagut inuit uumasut angusinnaanngisaannik Pinngortitsisumit saammaanneqarsinnaavugut. (2 Korintumiut 5:18) Pinngortitatut sianissusilittut Guutimut naalakkumanerluta naalakkumannginnerlutaluunniit qinersisinnaatitaajuarsinnarpugut. Tamanna ukiut hundredelippassuit qaangiunneranni takussutissarsisinneqarpoq Jehovap inuiaat Israelikkut pilersitaaqqammersut inuunerup toqullu akornanni qinigassimmagit. Guuti oqaaseqartitani Moses aqqutigalugu ima oqarpoq: „Ullumi ilissinnut saqqummiuppakka inuussut pilluarnerlu, illuatungaanilu toqu perlussiornerlu.“ — 5 Moses 30:15-18.
Ullumikkumut allaat, paratiisip siulliup maangaannarneranit ukiut tuusintilikkuutaat qaangiunneranni, uagut inuit suli eqqortumik qinersisinnaassuseqarpugut. Nalunngeqatiginnissuseqarpugut inunnguusaasumillu Guutip inatsisaanut naalassinnaassuseqarluta. Biibilimi eqqaaneqarpoq ’inuuserput ilorleq’. (2 Korintumiut 4:16; Rûmamiut 7:22) Oqariaatsimi tamatumani pineqarput piginnaanerit inunnguuserisavut, uagutsinnik Guutip pissusiisa assinginik ersersitsisinnaalersitsisut, taassuma eqqarsaataanik pigiliussisinnaalersitsisut anersaamullu tunngasunik pingaartitsisinnaalersitsisut.
Ileqqussatigut sianissuserput nalunngeqatiginnissuserpullu pillugit apustili Paulus ima allassimavoq: ’Guutimimmi nalusut inatsiseqanngitsut inatsisit peqqusaat isumaminnik naammassisaramikkik, taava inatsiseqanngitsut taakku imminnut inatsisitut ipput, inatsisit suliareqqusaat uummatiminni allassimasut nalunaaramikkik, tarnimik nalunngissusiata nalunaajaaffigimmatik, eqqarsaataallu paarlaattarmata imminnik pasillersarlutik illersortarlutilluunniit.’ — Rûmamiut 2:14, 15.
’Isertugaq’ — Guutip ilisimassusia naalannerlu
Immaqa ilaat ima aperiumassapput: ’Inuit tamarmik pissusissamisoortumik Guutimik pallorfiginnikkumassuseqarpata tamatumalu kingunerisaanik pilluarnermik piviusumik misigisaqarsinnaassuseqarpata, taava sooq inuit pilluaatsut taama amerlatigippat?’ Taamaappoq pilluarsinnaassagutta tamatta immikkut anersaamut tunngasunik pingaartitsinermik ineriartortitsisariaqaratta. Inuk Guuti assilillugu pinngortitaagaluarluni Pinngortitsisiminit nigorsimavoq. (Evfisumiut 4:17, 18) Taamaattumik Guutimut anersaakkut attaveqalerniarluni tamannalu ataannartinniarlugu suliniuteqartariaqarpoq. Attaveqarneq taama ittoq nammineerluni pilerneq ajorpoq.
Anersaakkut peqqissutsimik ineriartortitsinissamut atatillugu najoqqutassat pingaartut marluk Jesusip eqqaasimavai. Siullermik, Guuti pillugu eqqorluartumik ilisimasaqartariaqarpoq, aappassaanik, naalalluni taassuma piumasaanut naalatsigitittariaqarpoq. (Juánase 17:3) Guutip oqaasii issuarlugit Jesus ima oqarpoq: ’Allassimavoq: „Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.“’ (Matîuse 4:4) Aamma allami ima oqarsimavoq: ’Neqissara tassa aallartitsisima peqqusaa malillugu suliareqqusaalu naammassillugu.’ (Juánase 4:34) Pilluarneq ujarlugu ukiorpassuarni misileraasariaqanngilagut. Inuunermi pilluarneq piviusoq anguneqarneq ajorpoq misigisanik nuanniitsunik ilinniarfiginninnikkut, kisianni anguneqartarpoq Guutip ilisimassusianik pigiliussinikkut taassumunngalu naalannikkut. — Tussiaat 19:8, 9; Nalunaajaasup oqaasii 12:13.
Pilluarneq ilisimassummik Guutimeersumik atuinikkut taassumunngalu attaveqarluarnikkut pigilersinnaasarput nalunanngitsumik angussaasumiippoq. (apustilit suliait 17:26, 27) Jehova taassumalu siunertai pillugit ilisimasassat kikkunnut tamanut ammapput. Biibili milliardilikkuutaanngorlugu oqaatsini assigiinngitsorpassuarni naqiterneqarsimavoq taamaalillunilu suli silarsuarmi atuakkat siammarsimanerpaartaralugu. Atuagaq tamanna ikiortigalugu Guutimut ikinngutaalersinnaavutit pilluarnerlu piviusoq angusinnaallugu, tassanimi ima allassimasoqarpoq: „Pilluarput inuiaat [Jehovamik] Guuteqartut!“ — Tussiaat 144:15. (wE 15/10 97)
[Qupp. 6-imi ungalusaq]
Pilluarnermut ilasaataasut
1. Anersaamut tunngasunik pingaartitsineq ineriartortiguk. Jesus oqarsimavoq: ’Pilluarput Guutip oqaasianik tusartut toqqorlugulu.’ — Lúkarse 11:28.
2. Paasiuk Guutimut iluaritinnissaq pingaarnerummat pisuussutinik inuulluataarutinillu pigisaqarnermit. Paulus ima allassimavoq: ’Iluanaarnaraluaqaarmi Guuti mianerigaanni pinilu naammagalugit. . . . Nerisassaqarlutali atisassaqarutta tamakku naammagissavavut.’ — 1 Timûtiuse 6:6-8.
3. Nalunngeqatiginnissuseq Biibilimit ilinniartinneqarsimasoq ineriartortillugulu qisuariarfigisaruk. — Rûmamiut 2:14, 15.
4. Aalajangerit Jehova Guuti naalakkumallugu, taassuma innuttaanut ilaasinnaalerumallutit. Itsaq David ima allassimavoq: „Pilluarput inuiaat [Jehovamik] Guuteqartut.“ — Tussiaat 144:15.
[Qupp. 7-imi assiliartaq]
„Pilluarput anersaakkut pisariaqartitaqarnerminnik miserratiginninngitsut.“ — Matîuse 5:3, (NV)