Sooq Biibili misissortariaqarpa?
Biibili pillugu ilisimasaqarluarpit? Atuagaq immikkut ittoq taanna atuakkanit allanit tamanit siaruarsimanerpaavoq. Inuit kulturinit tamaneersut tassani tusarliunneqartut tuppallersaatigalugillu neriuuteqalissutigisimavaat, aamma tassani siunnersuutigineqartut ulluinnarni atoriaannaasimavaat. Ullumikkulli inuppassuit Biibili pillugu ilisimasakipput. Uppertuugaluaruit uppertuunngikkaluaruilluunniit immaqa alapernaapputit. Atuagassiaaraq una illit Biibili pillugu tunngaviusumik ilisimasaqalernissannut iluaqutissiaavoq.
BIIBILIMIK atualinnginninni atuakkap tamatuma qanoq aaqqissuunneqarsimaneranik paasissutissat ikittunnguit iluaqutigissavatit. Allakkat Illernartut, tassa Biibili, allakkanit imaluunniit immikkoortunit 66-init katitigaapput; taakkunannga siulliupput Mosesimik allakkat siulliit Johannesimullu Saqqummersitat kingulliullutik.
Kina Biibilimik atuakkiortuua? Apeqqut tamanna soqutiginarpoq. Biibili ukiut 1600-t missiliorlugit ingerlaneranni angutinit 40-nit allanneqarpoq. Maluginiarnarpoq angutit taakku namminneq Biibilimik atuakkiortuunerannginnerat. Allattut ilaat ima allappoq: ‘Allakkat Guutimit anersaarfigineqarput.’ (2 Timotheusi 3:16) Alla ima allappoq: “Uakkut oqaluppoq [Jehovap] anersaava, oqaasii oqqanniipput.” (2 Samueli 23:2) Taamaalillutik allattut Jehova Guuti, qilammi nunamilu kisimi oqartussaalluni Naalagaasoq, Biibilimik atuakkiortuunerarpaat. Biibilimik allattut paasinarsisippaat Guuti inunnut qanikkusuttoq.
Biibilimik paasinnissagaanni aamma alla pingaaruteqarluinnarpoq. Allakkani manna pingaarnersaavoq: Guutip naalagaaffini qilammiusoq iluaqutigalugu inuiannut naalakkersuisinnaatitaaneranik qutsissisitsineq. Quppernerni tulliuttuni pingaarnersaq tamanna Biibilip aallaqqaataanit naaneranut ersittuartoq paasissavat.
Sammeriikkavut eqqarsaatigiitigalugit maanna atuakkami silarsuarmi pigiumaneqarnerpaami, Biibilimi, tusarliunneqartoq eqqarsaatigeriartigu.